အခန်း (၁၅) တတိယ ဝိညာဉ်ကွင်းဝိုင်း

အကယ်ဒမီအတွင်း၌ အများကိစ္စနှင့် အုန်းကိစ္စကို ပြတ်ပြတ်သားသား ခွဲခြားထားရမည် ဖြစ်ပါသည်၊၊ ရှောင်ဟန် က အခြေအနေကို လျင်မြန်စွာ လိုက်လျောညီထွေဖြစ်အောင် နေထိုင်နိုင်သဖြင့် လင်းဇိရော့ သည် အလွန်တရာ ကျေနပ်မိ၏၊၊ သူမက ဆက်လက်၍ "မင်းတို့ မြင်တဲ့အတိုင်းပဲ... ဒီနှစ်မှာ ငါတို့အသင်းရဲ့ ဖွဲ့စည်းပုံက အရင်နှစ်တွေနဲ့ မတူဘူး၊ ငါတို့က အရံကစားသမား တစ်ယောက်ကို ကြိုတင်ပြီးတော့ အတည်ပြုထားတယ်၊ အဲဒါကတော့ ရှောင်ဟန် ပဲ ဖြစ်တယ်" ဟု ပြောပါသည်၊၊

ရွှယ်ဘင်းအာ က ပြုံးလျက် "ရှောင်ဟန် ရဲ့ အရည်အချင်းနဲ့ဆိုရင် အရံလူ ဖြစ်နေတာက တကယ်ကို မတန်ပါဘူး" ဟု ဆိုလျှင် ရွှယ်ယွဲ့အာ ကလည်း "ဟုတ်ပါပတ်" ဟု ထောက်ခံချက် ပေးလိုက်၏၊၊

လင်းဇိရော့ က သူတို့၏စကားကို ဖြတ်လိုက်ပြီး ရှောင်ဟန် ကို တစ်ချက်ကြည့်ကာ နောက်ပြောင်သည့် လေသံဖြင့် "သူ့အတွက် စိတ်မကောင်း ဖြစ်မနေကြပါနဲ့၊ တို့ရဲ့ အမျိုးသမီး အကယ်ဒမီမှာ သူ ဆက်နေခွင့်ရနေတာတင်ပဲ တော်တော်လေး ဟုတ်နေပါပြီ" ဟု ဆိုရာ ရှောင်ဟန် က တဟားဟား ရယ်မောလိုက်ပြီး "ကျွန်တော် နည်းနည်းမှ စိတ်မကောင်း မဖြစ်ပါဘူး၊ စီနီယာအစ်မတို့နဲ့ အသင်းဖော် ဖြစ်ရတာတင်ပဲ အရမ်းပျော်နေပါပြီ၊ ပထမလူစာရင်း ဖြစ်ဖြစ်၊ အရံလူ ဖြစ်ဖြစ် ကျွန်တော် ဂရုမစိုက်ပါဘူး၊ အရံလူတစ်ယောက်အနေနဲ့ ကျွန်တော်က စီနီယာအစ်မတို့ရဲ့ အသန်မာဆုံး နောက်ခံအင်အား ဖြစ်ပေးမှာပါ" ဟု ပြောသဖြင့် အားလုံး ဝိုင်းဝန်းရယ်မောကြတော့သည်၊၊

လင်းဇိရော့ က ဆက်လက်၍ "မင်းတို့ထဲက အချို့က အတူတူ လေ့ကျင့်ဖူးကြလို့ တစ်ယောက်နဲ့တစ်ယောက် နားလည်မှု ရှိနေကြပြီဆိုပေမဲ့၊ တချို့ကတော့ အတန်း မတူကြလို့ အခုထိ ရင်းနှီးမှု မရှိကြသေးဘူး၊ ဒါကြောင့်... အရင်ဆုံး မိမိကိုယ်ကိုယ် မိတ်ဆက်လိုက်ကြဦး" ဟု ညွှန်ကြားလိုက်ပါသည်၊၊

"ကောင်းပါပြီ"

အသင်းတွင် အသက်အကြီးဆုံး ဖြစ်သည့် ယူဟိုင်ရို က ပထမဆုံး ရှေ့သို့ တက်လှမ်းကာ မိတ်ဆက်လိုက်၏ "အားလုံးပဲ မင်္ဂလာပါ၊ ကျွန်မနာမည်က ယူဟိုင်ရို ပါ၊ သိုင်းဝိညာဉ်ကတော့ သန္တာငါးမုဆိုး ဖြစ်ပြီး၊ အဆင့် နှစ်ဆယ့်ခြောက် အားကောင်းလှတဲ့ တိုက်ခိုက်ရေးစနစ် ဝိညာဉ်သခင်တစ်ယောက် ဖြစ်ပါတယ်"

ဒုတိယအဖြစ် ကုချင်းပေါ် က စင်မြင့်ထက်သို့ တက်လာခဲ့ပါသည် "အားလုံးပဲ မင်္ဂလာပါ၊ ကျွန်မက ကုချင်းပေါ် ပါ၊ သိုင်းဝိညာဉ်ကတော့ ကောင်းကင်ပြာဓားရှည်ငါး ဖြစ်ပြီး၊ အဆင့် နှစ်ဆယ့်လေး အလျင်နှုန်း တိုက်ခိုက်ရေးစနစ် ဝိညာဉ်သခင်တစ်ယောက် ဖြစ်ပါတယ်"

နောက်တစ်ယောက်မှာ ရွှီဝူ ဖြစ်ပေသည် "အားလုံးပဲ မင်္ဂလာပါ၊ ကျွန်မက ရွှီဝူ ပါ၊ သိုင်းဝိညာဉ်ကတော့ ရှန်းဝူနှင်းပိုးဝတ်လွှာ ဖြစ်ပြီး၊ အဆင့် နှစ်ဆယ့်ခုနစ် အကူအညီပေးရေးစနစ် ဝိညာဉ်သခင်တစ်ယောက် ဖြစ်ပါတယ်"

ရွှီဝူ တွင် ရှည်လျားလှသော ဆံပင်နက်ကေသာနှင့် နှင်းကဲ့သို့ ဖြူစင်သော အသားအရေ ရှိပြီး ငြိမ်သက်အေးချမ်းသည့် ပုံစံ ရှိပါသည်၊၊ သူမသည် ရွှယ်ဘင်းအာ ထက် တစ်နှစ် ပိုကြီး၏၊၊ ရှောင်ဟန် သည် အကယ်ဒမီသို့ ရောက်ရှိနေသည်မှာ ငါးနှစ်ခန့် ရှိပြီဖြစ်သော်လည်း သူမကို မြင်တွေ့ရခဲလှပါသည်၊၊ အကူအညီပေးရေးစနစ် ဝိညာဉ်သခင်များ၏ ကျင့်ကြံခြင်းသည် သာမန်ဝိညာဉ်သခင်များထက် ပိုမိုခက်ခဲလှပေရာ၊ ရွှီဝူ သည် မိမိနှင့် သက်တူရွယ်တူများကြားတွင် အတော်ဆုံး ဖြစ်လာစေရန်အတွက် သေချာပေါက် အလွန်အမင်း ကြိုးစားအားထုတ်ခဲ့ရမည် ဖြစ်ကြောင်း ရှောင်ဟန် ခန့်မှန်းမိလိုက်ပါသည်၊၊ ၎င်းအပြင် ရွှီဝူ သည် ရာသီဥတုကို ပြောင်းလဲနိုင်သည့် စွမ်းရည်ရှိရုံမျှမက၊ ရွှယ်ဘင်းအာ နှင့် ပူးပေါင်း၍ အစွမ်းထက်လှသော သိုင်းဝိညာဉ်ပေါင်းစပ်ခြင်းစွမ်းရည် ဖြစ်သည့် "နှင်းပွင့်လေလွင့်မျောခြင်း" ကိုလည်း ထုတ်ဖော်နိုင်ကြောင်း သူ သိရှိထား၏၊၊

ထို့နောက်တွင် အေးချမ်းတည်ငြိမ်သော မိန်းကလေးတစ်ဦး စင်ပေါ်သို့ တက်လာပြန်ပါသည် "အားလုံးပဲ မင်္ဂလာပါ၊ ကျွန်မက ရှန်လူယု ပါ၊ သိုင်းဝိညာဉ်ကတော့ ကြွေရည်သုတ် မိကျောင်း ဖြစ်ပြီး၊ အဆင့် နှစ်ဆယ့်သုံး အားကောင်းလှတဲ့ တိုက်ခိုက်ရေးစနစ် ဝိညာဉ်သခင်တစ်ယောက် ဖြစ်ပါတယ်"

ရှန်လူယု တွင် ဆံပင်ကတုံးပုံစံ အပြာနုရောင် ဆံပင်တိုလေးများ ရှိပြီး အလွန်ပင် လိမ္မာယဉ်ကျေးမည့် ပုံပေါ်ပါသည်၊၊

နောက်ထပ် တက်လာသည့် မိန်းကလေးမှာ အရပ်ရှည်ပြီး၊ အပေါ်သို့ ထောင်တက်နေသော ရှည်လျားလှသည့် ရေခဲအပြာရောင် ဆံနွယ်များကို ပိုင်ဆိုင်ထားပါသည်၊၊ ပါးပြင်နှစ်ဖက်တွင်လည်း ဆံပင်အနည်းငယ် ဝဲကျနေသဖြင့် သပ်ရပ်ကျနလှသော သွင်ပြင်ကို ဆောင်နေ၏ "အားလုံးပဲ မင်္ဂလာပါ၊ ကျွန်မက ချိုးရော့ရွှေ ပါ၊ သိုင်းဝိညာဉ်ကတော့ ကြာစိမ်းငါးပုတ်သင် ဖြစ်ပြီး၊ အဆင့် နှစ်ဆယ့်သုံး အားကောင်းလှတဲ့ တိုက်ခိုက်ရေးစနစ် ဝိညာဉ်သခင်တစ်ယောက် ဖြစ်ပါတယ်"

၎င်းနောက်တွင် ရွှယ်ဘင်းအာ က ရှေ့သို့ လျှောက်လှမ်းလာခဲ့ပါသည် "အားလုံးပဲ မင်္ဂလာပါ၊ ကျွန်မက ရွှယ်ဘင်းအာ ပါ၊ သိုင်းဝိညာဉ်ကတော့ ရေခဲဖီးနစ် ဖြစ်ပြီး၊ အဆင့် နှစ်ဆယ့်ရှစ် ထိန်းချုပ်ရေးစနစ် ဝိညာဉ်သခင်တစ်ယောက် ဖြစ်ပါတယ်"

ရွှယ်ယွဲ့အာ ကလည်း ထပ်ကြပ်မကွာ လိုက်ပါလာခဲ့၏ "အားလုံးပဲ မင်္ဂလာပါ၊ ကျွန်မက ရွှယ်ယွဲ့အာ ပါ၊ သိုင်းဝိညာဉ်ကတော့ ရင်ယု လင်းပိုင် ဖြစ်ပြီး၊ အဆင့် နှစ်ဆယ့်နှစ် အလျင်နှုန်း တိုက်ခိုက်ရေးစနစ် ဝိညာဉ်သခင်တစ်ယောက် ဖြစ်ပါတယ်"

မိန်းကလေးများ အားလုံး မိတ်ဆက်ပြီးစီးသွားသောအခါ ရှောင်ဟန် သည် သဘာဝကျစွာပင် နောက်ဆုံးလူ ဖြစ်လာခဲ့ပါသည်၊၊ အားလုံး၏ အမြင်အာရုံများသည် ရှောင်ဟန် ထံသို့ တစ်ပြိုင်နက်တည်း ကျရောက်သွားကြ၏၊၊ ရှောင်ဟန် သည် ထျန်းရွှေ အကယ်ဒမီ၏ တစ်ဦးတည်းသော အမျိုးသားကျောင်းသား ဖြစ်ရုံမျှမက၊ အမျိုးသမီးအဆောင်ရှေ့ရှိ "လုံခြုံရေးအသေးစားလေး" လည်း ဖြစ်ဖူးသဖြင့် မိန်းကလေးများ၏ တိုက်ရိုက်စိုက်ကြည့်မှုများကို ကြာမြင့်စွာကတည်းက ကျင့်သားရနေခဲ့ပြီ ဖြစ်ပါသည်၊၊ သူသည် တည်ငြိမ်စွာဖြင့် ရှေ့သို့ လျှောက်လှမ်းလာပြီး မိတ်ဆက်လိုက်၏ "စီနီယာအစ်မတို့ အားလုံးပဲ မင်္ဂလာပါ၊ ကျွန်တော့်နာမည်က ရှောင်ဟန် ပါ၊ သိုင်းဝိညာဉ်ကတော့ ရေခဲလေးနှင့်မြှား ဖြစ်ပြီး၊ အဆင့် နှစ်ဆယ့်ကိုး အားကောင်းလှတဲ့ တိုက်ခိုက်ရေးစနစ် ဝိညာဉ်သခင်တစ်ယောက် ဖြစ်ပါတယ်"

အသင်းအတွင်း၌ ရှောင်ဟန် ၏ ဝိညာဉ်စွမ်းအား အဆင့် နှစ်ဆယ့်ကိုး သို့ ရောက်ရှိနေကြောင်းကို ရွှယ်ဘင်းအာ နှင့် ရွှယ်ယွဲ့အာ တို့နှစ်ဦးသာ သိရှိထားကြခြင်း ဖြစ်သဖြင့်၊ တခြားမိန်းကလေးများအားလုံး အလွန်တရာ အံ့အားသင့်သွားကြရပါသည်၊၊ သူတို့သည် ရှောင်ဟန် တွင် မွေးရာပါ အပြည့်အဝရှိတဲ့ ဝိညာဉ်စွမ်းအား ရှိကြောင်းနှင့် သူ၏ ဒုတိယ ဝိညာဉ်ကွင်းဝိုင်းမှာ သက်တမ်းတစ်ထောင်အဆင့် ဖြစ်ကြောင်းသာ သိထားကြခြင်း ဖြစ်၏၊၊ သို့သော်လည်း အသက်အငယ်ဆုံး ဖြစ်သည့် ရှောင်ဟန် ၏ အဆင့်က အမြင့်ဆုံး ဖြစ်နေလိမ့်မည်ဟု သူတို့ လုံးဝ မမျှော်လင့်ထားခဲ့ကြပေ၊၊

လင်းဇိရော့ ၏ အမြင်အာရုံသည် လူအချို့ကို ဖြတ်သန်းသွားပြီးနောက် နောက်ဆုံးတွင် ရွှယ်ဘင်းအာ ထံ၌ ရပ်တန့်သွားပါသည် "တို့ရဲ့ ထျန်းရွှေ အကယ်ဒမီအသင်းက အမြဲတမ်း အစွမ်းအစပေါ်မှာပဲ အခြေခံပြီး စကားပြောတာပါ၊ ဘင်းအာ က အသက်ငယ်သေးတယ်ဆိုပေမဲ့ တည်ငြိမ်တဲ့ စရိုက်ရှိပြီး အခြေအနေအရပ်ရပ်ကို အကောင်းဆုံး ထည့်သွင်းစဉ်းစားနိုင်စွမ်း ရှိတယ်၊ ဒါတင်မကဘဲ သူက မင်းတို့ အဓိက ကစားသမား ခုနစ်ယောက်ထဲမှာ အသန်မာဆုံးလည်း ဖြစ်နေတာမို့ အသင်းခေါင်းဆောင်အတွက် အသင့်တော်ဆုံးပဲ၊ ဘင်းအာ... ဒီနေ့ကစပြီး မင်းက အသင်းခေါင်းဆောင် ဖြစ်တယ်"

အားလုံး၏ အမြင်အာရုံများသည် ရွှယ်ဘင်းအာ ထံသို့ ရောက်ရှိသွားကြ၏၊၊ ရွှယ်ဘင်းအာ သည် ရှောင်ဟန် ကို တစ်ချက် ကြည့်လိုက်ပါသည်၊၊ လွန်ခဲ့သော နှစ်နှစ်က သူ ခန့်မှန်းခဲ့သည့်အတိုင်း အမှန်တကယ်ပင် ဖြစ်လာခဲ့ပြီ ဖြစ်ပေသည်— "ကျောင်းအုပ်ကြီးလင်း... ကျွန်မ အသင်းခေါင်းဆောင်တစ်ယောက်ရဲ့ တာဝန်ကို ပုခုံးထမ်းတင်ပြီး၊ လူတိုင်းနဲ့အတူ ပိုမိုကောင်းမွန်တဲ့ ရလဒ်တွေ ရရှိအောင် အကောင်းဆုံး ကြိုးစားသွားပါ့မယ်"

"အလွန်ကောင်းတယ်... ရွှီဝူ၊ မင်းက ဒုတိယ အသင်းခေါင်းဆောင်အဖြစ် တာဝန်ယူပြီး ဘင်းအာ ကို ကူညီပေးပါ"

"ကောင်းပါပြီ"

လင်းဇိရော့ သည် ကျေနပ်စွာဖြင့် ခေါင်းညိတ်လိုက်ပြီး— "နောက်ပိုင်းမှာ... ငါ မင်းတို့ကို နားလည်မှုရှိရှိ ပူးပေါင်းဆောင်ရွက်နိုင်စေဖို့ စနစ်တကျ လေ့ကျင့်ပေးသွားမယ်၊ ပြီးရင် တိုက်ပွဲအတွေ့အကြုံတွေ ရရှိစေဖို့အတွက် လက်တွေ့တိုက်ပွဲတွေမှာ ပါဝင်ခိုင်းဦးမှာ ဖြစ်တယ်၊ ဒီအချိန်ကစပြီး မင်းတို့အားလုံးဟာ တစ်ခုတည်းသော အစုအဖွဲ့ ဖြစ်သွားပြီ၊ တစ်ယောက်ကိုတစ်ယောက် ကူညီပြီး အတူတူ ကြီးပြင်းလာကြရမယ်" ဟု မှာကြားလိုက်၏၊၊

"နားလည်ပါပြီ"

ထို့နောက်တွင် လင်းဇိရော့ သည် အားလုံးကို ဦးဆောင်၍ လေ့ကျင့်ရေးများကို စတင်ခဲ့ပါသည်၊၊ မျက်စိတစ်မှိတ်အတွင်းမှာပင် နောက်ထပ် သုံးလေးလခန့် ကုန်လွန်သွားခဲ့၏၊၊ ဤလအနည်းငယ်အတွင်း သူတို့သည် နေ့စဉ်နေ့တိုင်း အတူတူ လေ့ကျင့်ခဲ့ကြသဖြင့် တစ်ယောက်နှင့်တစ်ယောက် နားလည်မှုများ ပိုမိုကောင်းမွန်လာပြီး အစွမ်းများလည်း သိသိသာသာ တိုးတက်လာခဲ့ပါသည်၊၊

ထိုနေ့တွင် ရှောင်ဟန် သည် လေ့ကျင့်ရေး ပြီးစီးသွားပြီးနောက် သူ၏ မျက်လုံးများ ရုတ်တရက် တောက်ပလာခဲ့၏ "ငါ နောက်ဆုံးတော့ အဆင့် သုံးဆယ်ကို ချိုးဖျက်နိုင်ခဲ့ပြီပဲ၊ ဒါပေမဲ့... ဒီတစ်ကြိမ် နှင်းခဲတောအုပ်ကို သွားတဲ့အခါ ဘင်းအာ ကို ခေါ်သွားလို့ ရမှာ မဟုတ်တော့ဘူး"

လွန်ခဲ့သော ရက်အနည်းငယ်ကပင် ရွှယ်ဘင်းအာ သည် အဆင့် နှစ်ဆယ့်ကိုး သို့ အောင်မြင်စွာ တက်လှမ်းနိုင်ခဲ့ခြင်း ဖြစ်ပါသည်၊၊ သူမ၏ ကျင့်ကြံခြင်း အရှိန်အဟုန်အရ အဆင့် သုံးဆယ်သို့ ရောက်ရှိရန် နောက်ထပ် လေးလခန့် ကြာမြင့်ဦးမည် ဖြစ်၏၊၊ ယခုအခါ လင်းဇိရော့ သည် အသင်းခေါင်းဆောင် ဖြစ်နေသဖြင့် နှင်းခဲတောအုပ်အတွင်း၌ အချိန်နှင့် ခွန်အားအလွန်အမင်း ကုန်ဆုံးရန် မဖြစ်နိုင်ပေ၊၊

မထွက်ခွာမီ ရှောင်ဟန် သည် ရွှယ်ဘင်းအာ ထံသို့ လာရောက်ခဲ့ပါသည် "ဘင်းအာ... ငါ နှင်းခဲတောအုပ်ကို သွားတော့မယ်၊ လွန်ခဲ့တဲ့ နှစ်ကြိမ်လုံး ဝိညာဉ်သားရဲ ဖမ်းတဲ့အချိန်မှာ မင်း ငါ့အနားမှာ ရှိနေခဲ့တာဆိုတော့၊ ဒီတစ်ကြိမ် မင်း မပါဘူးဆိုရင် ငါ အသားမကျသလို ဖြစ်နေလိမ့်မယ်"

"ငါလည်း မင်းနဲ့အတူ သွားချင်တာပေါ့၊ ဒါပေမဲ့ ငါက အဆင့် နှစ်ဆယ့်ကိုးကိုပဲ ရောက်သေးတာဆိုတော့ ကျောင်းအုပ်ကြီးလင်း ရဲ့ အချိန်တွေကို အလဟဿ မဖြစ်စေချင်ဘူး"

"ဒါဆိုရင်လည်း နောက်တစ်ကြိမ်ကျမှပေါ့၊ အဲဒီကျရင် ငါ မင်းနဲ့အတူ လိုက်ခဲ့မယ်"

"ကောင်းပါပြီ"

ရွှယ်ဘင်းအာ ကို နှုတ်ဆက်ပြီးနောက် ရှောင်ဟန် သည် လင်းဇိရော့ နှင့်အတူ အဝေးဆုံး မြောက်ဘက်အရပ်ဆီသို့ ထွက်ခွာခဲ့ကြပါသည်၊၊ နှစ်ဦးသားသည် လမ်းခရီးတစ်လျှောက်လုံး အရှိန်အဟုန်အပြည့်ဖြင့် မြင်းစီးလာခဲ့ကြရာ၊ လဝက်မပြည့်မီ အချိန်အတွင်းမှာပင် နှင်းခဲတောအုပ်သို့ ရောက်ရှိလာခဲ့ကြ၏၊၊

လင်းဇိရော့ က "ရှောင်ဟန်... ဒီတစ်ကြိမ်တော့ တို့တွေ အတိုတောင်းဆုံး အချိန်အတွင်းမှာ သင့်တော်တဲ့ ဝိညာဉ်သားရဲကို ရှာဖွေနိုင်အောင် ကြိုးစားကြမယ်၊ မင်းအတွက် ဝိညာဉ်ကွင်းဝိုင်း ရရှိပြီးတာနဲ့ စောစော ပြန်ကြတာပေါ့" ဟု ပြောလျှင် ရှောင်ဟန် ကလည်း "ကောင်းပါပြီ... အမေ၊ ကျွန်တော့်ရဲ့ တတိယ ဝိညာဉ်ကွင်းဝိုင်းက အနည်းဆုံး သက်တမ်း နှစ်ထောင်လောက်တော့ ဖြစ်ဖို့ လိုမယ်နော်" ဟု ဆိုသည်၊၊

"သိတာပေါ့"

ရှောင်ဟန် သည် ဝေလငါးကော် ကို စားသုံးထားဖူးသော်လည်း လင်းဇိရော့ အနေဖြင့် သူ့ကို စွန့်စားခိုင်းမည် မဟုတ်ပေ၊၊ သူမ၏ အမြင်အရ ရှောင်ဟန် စုပ်ယူတော့မည့် တတိယ ဝိညာဉ်ကွင်းဝိုင်းအတွက် သက်တမ်း သုံးထောင်သည် အကန့်အသတ် ဖြစ်သည်ဟု ယူဆထား၏၊၊

နှစ်ဦးသားသည် နှင်းခဲတောအုပ်အတွင်း ဆယ်ရက်ကျော်ခန့် ရှာဖွေခဲ့ကြသော်လည်း သင့်တော်သော ဝိညာဉ်သားရဲနှင့် မတွေ့ဆုံခဲ့ရပေ၊၊ ၎င်းတို့သည် သက်တမ်း အလွန်ငယ်လွန်းခြင်း သို့မဟုတ် သက်တမ်း အလွန်ကြီးမားလွန်းခြင်းများ ဖြစ်နေပြီး သုံးထောင်ထက် ကျော်လွန်နေကြပါသည်၊၊ လင်းဇိရော့ ၏ ပစ်မှတ်မှာ အလွန်ရှင်းလင်းပြီး သက်တမ်း နှစ်ထောင်နှင့် သုံးထောင်ကြားရှိသော ကျင့်ကြံခြင်းသက်တမ်းရှိသည့် ဝိညာဉ်သားရဲကိုသာ လိုချင်ခြင်း ဖြစ်၏၊၊

ထိုနေ့တွင် နှစ်ဦးသား လျှောက်လှမ်းနေစဉ် လင်းဇိရော့ သည် ရုတ်တရက် ခြေလှမ်းရပ်လိုက်ပါသည် "ရှောင်ဟန်... ဝိညာဉ်သားရဲ တစ်ကောင် ရှိနေတယ်"

"ဘယ်နားမှာလဲ"

"ဟောဟို သစ်ပင်ကြီးပေါ်မှာ"

ရှောင်ဟန် သည် လင်းဇိရော့ ၏ အမြင်အာရုံနောက်သို့ လိုက်ကြည့်လိုက်ရာ၊ မီတာတစ်ရာခန့် အကွာရှိ မြင့်မားလှသော သစ်ပင်ကြီးပေါ်တွင် ရေခဲအပြာရောင် ငှက်အချို့ နားနေသည်ကို မြင်တွေ့လိုက်ရပါသည် "အမေ... အဲဒါတွေက နှင်းခဲပျံလွှားငှက်တွေလား"

"ဟုတ်တယ်... ကျင့်ကြံခြင်းသက်တမ်း သုံးထောင်ဝန်းကျင်ရှိတဲ့ ကောင် နှစ်ကောင် ရှိနေတယ်၊ တို့တွေ အဲဒီထဲက တစ်ကောင်ကို မင်းရဲ့ တတိယ ဝိညာဉ်ကွင်းဝိုင်းအဖြစ် သတ်မှတ်ကြမယ်၊ သူတို့ရဲ့ အရှိန်က အလွန်မြန်ပြီး တိုက်ခိုက်နိုင်စွမ်းကိုလည်း လျှော့တွက်လို့ မရဘူး၊ တို့တွေ အမြန်ဆုံး ဆုံးဖြတ်ချက်ချပြီး တိုက်ခိုက်ရမယ်၊ မင်းကိုယ်မင်း အကာအကွယ်ပေးထားပါ" ဟု ပြောပြီးသည်နှင့် လင်းဇိရော့ သည် အပြာရောင် လျှပ်စီးတန်းတစ်ခုအလား ရှေ့သို့ ချက်ချင်း ပြေးဝင်သွားတော့သည်၊၊