အခန်း ၃၈ — အရိုးပျော့လက်ဝါး

လှုပ်ရှားမှုတစ်ချက်တည်းဖြင့် ချီလင်းသည် သူ၏အောင်ပွဲကို အပိုင်အတည်ပြုနိုင်ခဲ့ပြီ ဖြစ်သော်လည်း ဤပွဲကို ထိုမျှနှင့်တင် အဆုံးမသတ်လိုသေးပေ။

အကြောင်းရင်းမှာ အခြားမဟုတ်၊ ဤမျှနှင့်သာ ပွဲသိမ်းလိုက်ပါက ကျန်းလေ့အတွက် အပြစ်ပေးခံရသည်မှာ ပေါ့လွန်းနေမည်ဟု သူယူဆသောကြောင့်ပင်။

ကျူးကျူးချင်း၏ ခန္ဓာကိုယ်ဖွဲ့စည်းပုံ အားနည်းသောကြောင့်လားတော့ မသိသော်လည်း မနေ့က သူမသည် အလွန်အမင်း ဝေဒနာခံစားခဲ့ရပြီး ယခုအချိန်အထိပင် အလုံးစုံ ပြန်လည်ကောင်းမွန်လာခြင်း မရှိသေးချေ။

ထို့ကြောင့် ချီလင်းသည် ကျန်းလေ့ကို ထိုက်တန်သော တန်ဖိုးပေးဆပ်စေရန် ဆုံးဖြတ်ထားပြီး ဖြစ်သည်။ ထို့ထက် ပို၍အရေးကြီးသည်မှာ နောက်တစ်ကြိမ် ကျူးကျူးချင်းနှင့် ပြန်လည်ယှဉ်ပြိုင်ချိန်တွင် ကျန်းလေ့ ထွက်မပြေးနိုင်စေရန်လည်း အာမခံချက်ရှိဖို့ လိုအပ်ပေသည်။

ထို့ကြောင့် ကျန်းလေ့ တစ်ကိုယ်လုံး တုန်တုန်ရင်ရင်ဖြင့် ပြန်လည်မတ်တပ်ရပ်လာချိန်တွင် ချီလင်းက ပြုံးလျက် ဆိုလိုက်သည် - "မင်း ခုနက ငါ့ကို လက်ဝါးငါးချက် ရိုက်ခဲ့တယ်နော်။ 'အပေးအယူ မျှတစေရမယ်' ဆိုတဲ့ စကားအတိုင်း ငါလည်း မင်းကို လက်ဝါးတစ်ချက် ပြန်ပေးရမှာပေါ့"

ချီလင်းသည် စကားပြောရင်း သူ၏ ညာဘက်လက်ကို ဆန့်ထုတ်လိုက်ရာ ဝိညာဉ်စွမ်းအားများ စုစည်းလာတော့သည်။ သူ၏ လက်ဝါးမှာ အရိုးများမရှိတော့သကဲ့သို့ မြွေတစ်ကောင်နှယ် ကွေးလိမ်နေပြီး ထူးဆန်းသော အရှိန်အဝါများ ထွက်ပေါ်လာသည်။

"သိုင်းပညာ - အရိုးပျော့လက်ဝါး !"

ဟင်းလင်းပြင်ကို ဖြတ်၍ လက်ဝါးဖြင့် တစ်ချက်ရိုက်လိုက်ရာ ကျန်းလေ့မှာ အသေအလဲ ထိတ်လန့်သွားတော့သည်။ ကျန်းလေ့သည် အော်ဟစ်ကာ နောက်သို့ ခြေလှမ်းအနည်းငယ် ဆုတ်လိုက်မိသော်လည်း သူ၏ ခန္ဓာကိုယ်တွင် နာကျင်မှု တစ်စုံတစ်ရာ မခံစားရသလို၊ ရိုက်နှက်ခံလိုက်ရသည်ဟုပင် မခံစားရကြောင်း တွေ့လိုက်ရသည်။

သို့သော် ခုနက အတွေ့အကြုံအရ ကျန်းလေ့သည် တိုက်ခိုက်မှုတစ်ခုမှာ ပုံမှန်ဟု ထင်ရလေလေ၊ အမှန်တကယ်တွင် ပို၍ အသက်အန္တရာယ် ပေးနိုင်လေလေ ဖြစ်သည်ကို သိနေသည်။

သေချာပေါက်ပင် နောက်တစ်စက္ကန့်တွင် ကျန်းလေ့သည် သူ၏ ဝိညာဉ်စွမ်းအားကို ထုတ်သုံး၍မရတော့ကြောင်း သိလိုက်ရသည်။ သူ၏ အားအင်အားလုံးမှာ ခန္ဓာကိုယ်အတွင်းမှာပင် ချိတ်ပိတ်ခံလိုက်ရသကဲ့သို့ ဖြစ်နေပြီး သူ၏ ဝိညာဉ်ကိုပင် ဆင့်ခေါ်၍ မရတော့ချေ။

"မင်း... မင်း ငါ့ကို ဘာလုပ်လိုက်တာလဲ!" ကျန်းလေ့က ထိတ်လန့်တကြား အော်ဟစ်သည်။ ဝိညာဉ်ဆရာသခင် တစ်ဦးအတွက် သူ၏ ဝိညာဉ်ကို အသုံးမပြုနိုင်တော့ခြင်းမှာ သေခြင်းတရားထက်ပင် ပို၍ လက်မခံနိုင်စရာ ကောင်းလှသည်။

"ဘာမှမဟုတ်ပါဘူး၊ မင်းရဲ့ ဝိညာဉ်ကို ခဏလောက် ချိတ်ပိတ်ထားလိုက်တာပါ။ ပြီးတော့ မင်းရဲ့ လက်မောင်းကိုလည်း ကြည့်လိုက်ဦး၊ အနီရောင် မျဉ်းတစ်ကြောင်း ပေါ်နေတယ် မဟုတ်လား" ဟု ချီလင်းက ဆိုသည်။

ကျန်းလေ့ သူ၏ လက်မောင်းကို ကြည့်လိုက်ရာ သေချာပေါက်ပင် သူ၏ ညာဘက်လက်မောင်းပေါ်တွင် အနီရောင်မျဉ်းတစ်ကြောင်းကို တွေ့လိုက်ရသည်။

"နောက်ဆယ်ရက်ကြာလို့ ဒီအနီရောင်မျဉ်းက မင်းရဲ့ ပခုံးအထိ ရောက်သွားရင်တော့ မင်း သေချာပေါက် အလွန်ခံရခက်စွာနဲ့ သေရလိမ့်မယ်" ဟု ချီလင်းက ဆက်ပြောသည်မှာ - "ငါ့စကားကို မယုံရင်တော့ မင်း စမ်းကြည့်နိုင်ပါတယ်"

"အကယ်၍ မင်း အသက်ရှင်ချင်သေးရင်တော့ နောက်ဆယ်ရက်အကြာမှာ ငါသတ်မှတ်ပေးတဲ့သူနဲ့ ယှဉ်ပြိုင်ရမယ်! မင်း နိုင်ရင်တော့ ငါ အဲ့ဒီအစီရင်ကို ဖြုတ်ပေးမယ်၊ မင်း ရှုံးရင်တော့ မင်းရဲ့ ကံကြမ္မာလို့ပဲ မှတ်လိုက်တော့!"

ချီလင်း၏ စကားကို ကြားပြီးနောက် မထင်မှတ်ဘဲ ကျန်းလေ့သည် ကြောက်လန့်တကြားဖြင့် မေ့လဲသွားတော့သည်။

သူသည် သူတစ်ပါး အသက်ကို ခြိမ်းခြောက်စဉ်က မည်မျှပင် ထောင်လွှားခဲ့ပါစေ၊ မိမိအသက်ကို ပြန်လည်ခြိမ်းခြောက်ခံရချိန်တွင်မူ အလွန်ပင် သူရဲဘောကြောင်လှပေသည်။ လူသားတို့၏ စရိုက်မှာ ဤသို့ပင် ရုပ်ဆိုးလှပေသည်။

ဝိညာဉ်သတ်ကွင်းကြီး၏ အရှုံးမရှိသော မိစ္ဆာဟု တင်စားခံရသည့် ကျန်းလေ့သည် ဤမျှအထိ အရှက်တကွဲ ရှုံးနိမ့်သွားလိမ့်မည်ဟု မည်သူမျှ မထင်ထားခဲ့ကြပေ။

"ဒါ... ဒါကတော့ စီနီယာချီက အရမ်းသန်မာလွန်းတာပဲ မဟုတ်လား။ ဒါက ပြိုင်တာမဟုတ်ဘဲ တစ်ဖက်သတ် နှိပ်စက်တာပဲ!" စင်အောက်တွင် ထိုင်နေသော အော်စကာက အံ့ဩတုန်လှုပ်စွာ ပြောလိုက်သည်။

"ဒါကတော့ သဘာဝကျပါတယ်။ ချီလင်းရဲ့ ဝိညာဉ်က ကျန်းလေ့ရဲ့ ဝိညာဉ်ကို လုံးဝ ဖိနှိပ်ထားနိုင်တာမို့ ကျန်းလေ့အနေနဲ့ လှုပ်ရှားဖို့ နေရာလပ်တောင် မရှိခဲ့ဘူးလေ" ဟု ဖလန်းဒါးက ဆိုသည်။

"ဒါပေမဲ့ သူ တကယ် သန်မာတာကတော့ ငြင်းလို့မရတဲ့ အချက်ပဲ။ သူ့ရဲ့ စွမ်းအားက အဆင့်အတန်းတွေကို ကျော်လွန်နေပြီ။ အဆင့်တူချင်းကြားမှာတော့ ဘယ်သူမှ သူ့ပြိုင်ဘက် ဖြစ်လာမှာ မဟုတ်ဘူး"

"ဟားဟား... ကျောင်းအုပ်ကြီး၊ ဒါကြောင့်ပဲ ကျောင်းအုပ်ကြီးက စီနီယာချီအပေါ်မှာ ရှိသမျှ အကုန်ပုံအောပြီး လောင်းခဲ့တာပေါ့ ဟုတ်လား" အော်စကာက ရယ်မောလိုက်သည်။

ဖလန်းဒါးက သူ၏ မုတ်ဆိတ်ကို သပ်ရင်း ကျေနပ်အားရစွာဖြင့် "ပြောနေဖို့တောင် မလိုဘူး! အရှုံးမရှိဘဲ အမြတ်ပဲရမယ့် စီးပွားရေးမျိုးကို ဘယ်သူက ငြင်းမှာလဲ" ဟု ဆိုသည်။

ချီလင်း စင်ပေါ်မှ ဆင်းလာချိန်တွင် ရှောင်ဝူက ထုံးစံအတိုင်း သူ့ကို နွေးထွေးစွာ ဖက်လိုက်သည်။ အားလုံးကို အံ့ဩသွားစေသည်မှာ လူတိုင်းကို အဖက်မလုပ်တတ်သော ကျူးကျူးချင်းကပင် ပထမဆုံးအကြိမ် စကားစလာခြင်းပင်။

"ဂုဏ်ပြုပါတယ်... ပြီးတော့ ကျေးဇူးတင်ပါတယ်။" ကျူးကျူးချင်း၏ မျက်နှာလေးမှာ အနည်းငယ် နီမြန်းသွားသော်လည်း ချက်ချင်းပင် ပုံမှန်အတိုင်း ပြန်ဖြစ်သွားသည်။

အားလုံးက ချီလင်းသည် သူမအတွက် ကူညီလက်စားချေပေးသောကြောင့် ကျူးကျူးချင်းက ကျေးဇူးတင်သည်ဟု ထင်နေကြသော်လည်း ချီလင်းကမူ သိသည်။ သူမသည် ကျန်းလေ့ကို သူမအတွက် ချန်ထားပေးပြီး ကိုယ်တိုင် လက်စားချေခွင့်ပေးသောကြောင့် ကျေးဇူးတင်နေခြင်း ဖြစ်သည်။

"ကဲ... ချီလင်းလည်း ပွဲပြီးပြီဆိုတော့ ငါတို့ နှစ်ယောက်ချင်း ပြိုင်ကွင်းဘက်ကို အရင်သွားကြရအောင်" ဟု ဖလန်းဒါးက ပြောသည်။

"စစ်မှန်တဲ့ ဝိညာဉ်ဆရာသခင်တွေရဲ့ ပွဲစဉ်ဆိုတာ ဘယ်လိုမျိုးလဲဆိုတာ မင်းတို့ကို မျက်မြင်ကိုယ်တွေ့ ကြည့်ခွင့်ပေးမယ်"

သူတို့အဖွဲ့ နှစ်ယောက်ချင်း ပြိုင်ကွင်းနယ်မြေသို့ ရောက်ရှိလာချိန်တွင် ပြိုင်ကွင်းမှာ ပို၍ ကျယ်ဝန်းရုံသာမက ပရိသတ်အရေအတွက်မှာလည်း ပို၍ များပြားနေသည်ကို တွေ့လိုက်ရသည်။

"နှစ်ယောက်ချင်း ပွဲစဉ်တွေက ပိုပြီး ကြည့်ကောင်းလို့ လက်မှတ်ဝယ်ကြည့်တဲ့သူတွေ ပိုများတာ" ဟု ဖလန်းဒါးက ရှင်းပြသည်။

"ဘာလို့လဲဆိုတော့ ဝိညာဉ်ဆရာသခင်တွေရဲ့ အပေးအယူမျှတမှုနဲ့ ပူးပေါင်းဆောင်ရွက်မှုတွေက တစ်ပေါင်းတစ်ဟာ နှစ်ထက် ပိုကြီးတဲ့ စွမ်းအားကို ထုတ်ပေးနိုင်လို့ပဲ!"

"ဟင်? ဒါဆို ကျွန်တော့်အတွက်လည်း ပြိုင်ပွဲဝင်ဖို့ အခွင့်အရေး ရှိတာပေါ့" အော်စကာက ရုတ်တရက် စိတ်လှုပ်ရှားစွာ ပြောလိုက်သည်။

"တကယ်တော့ မဟုတ်ဘူး။ နှစ်ယောက်ချင်း ပွဲစဉ်တွေရဲ့ သဘာဝအရ အထောက်အကူပြု ဝိညာဉ်ဆရာသခင် တွေအတွက် အခွင့်အရေးက နည်းနေသေးတယ်" ဟု ဖလန်းဒါးက ဆိုသည်။ "ဘယ်လောက်ပဲ အထောက်အကူပေးနိုင်ပါစေ၊ တိုက်ခိုက်ရေးစွမ်းအား ကောင်းတဲ့သူ နောက်တစ်ယောက် ပါတာလောက်တော့ မစွမ်းနိုင်ဘူးလေ"

"အထောက်အကူပြု ဝိညာဉ်ဆရာသခင်တွေရဲ့ စင်မြင့်ကတော့ အဖွဲ့လိုက် တိုက်ပွဲတွေပဲ။ အဲ့ဒီအချိန်ကျမှသာ မင်းတို့ရဲ့ တကယ့်တန်ဖိုးက ပေါ်လွင်လာမှာ"

ဖလန်းဒါး၏ စကားကြောင့် အော်စကာ ချက်ချင်းပင် မျက်နှာညှိုးငယ်သွားသော်လည်း နောက်ဆက်တွဲ စကားကြောင့် ပြန်လည် တက်ကြွလာသည်။

"ဒါပေမဲ့ နှစ်ယောက်ချင်း ပွဲစဉ်မှာ အထောက်အကူပြု ဝိညာဉ်ဆရာသခင်တွေ လုံးဝ ပြိုင်လို့မရတာတော့ မဟုတ်ပါဘူး" ဖလန်းဒါးက ရယ်မောလျက် "မင်းအနေနဲ့ ပြိုင်ဘက်နှစ်ယောက်လုံးကို တစ်ယောက်တည်းနဲ့ ရင်ဆိုင်နိုင်လောက်အောင် သန်မာတဲ့ အသင်းဖော်တစ်ယောက်ကို ရှာနိုင်ဖို့ပဲ လိုတာ!"

ထိုစကားကို ကြားလိုက်ရသဖြင့် လူတိုင်း၏ မျက်လုံးများမှာ အလိုလိုပင် ချီလင်းထံသို့ ရောက်ရှိသွားကြသည်။

ပြိုင်ဘက်နှစ်ယောက်ကို တစ်ယောက်တည်း ရင်ဆိုင်ရန်မှာ ချီလင်းအတွက် အခက်အခဲ မဟုတ်ပေ။ ချီလင်းသည် လူတစ်ဆယ်ကိုပင် တစ်ယောက်တည်း ရင်ဆိုင်နိုင်သည်ဟု လူတိုင်းက ခံစားနေကြရသည်။

"စီနီယာချီ!" အော်စကာသည် ရုတ်တရက် ပြေးဝင်လာကာ ချီလင်း၏ ပေါင်ကို တင်းတင်းဖက်ပြီး "ကျွန်တော်က အားကိုးထိုက်တဲ့ ညီလေးတစ်ယောက် ဖြစ်ခဲ့တာကို ထောက်ထားပြီး ကျွန်တော့်ကို တစ်ခါလောက် ခေါ်သွားပါဦး!" ဟု ပြောတော့သည်။

【တင်တောင်! လက်ခံသူသည် အော်စကာထံမှ တောင်းဆိုချက်တစ်ခုကို ရရှိနေကြောင်း စစ်ဆေးတွေ့ရှိရပါသည်။ ကျေးဇူးပြု၍ အောက်ပါ ရွေးချယ်မှုများထဲမှ ရွေးချယ်ပါ】

ရွေးချယ်မှု ၁ - အော်စကာနှင့်အတူ နှစ်ယောက်ချင်းအဖွဲ့ ဖွဲ့ပြီး အနည်းဆုံး တစ်ပွဲ အနိုင်ယူပါ။ ဆုလာဘ် - ဝိညာဉ်စွမ်းအား ပြန်လည်ဖြည့်တင်းဆေး (အသေး)၊ အော်စကာ၏ နှစ်သက်မှု + ၁၀ ရာခိုင်နှုန်း။

ရွေးချယ်မှု ၂ - စင်မြင့်ပေါ်ရှိ အခြားသူတစ်ယောက်နှင့် နှစ်ယောက်ချင်းအဖွဲ့ ဖွဲ့ပြီး အနည်းဆုံး တစ်ပွဲ အနိုင်ယူပါ။ ဆုလာဘ် - ဝိညာဉ်လက်နက် (Level 3) x ၁၊ နှစ်သက်မှု + ၁၀ ရာခိုင်နှုန်း။

ရွေးချယ်မှု ၃ - နင်ရုံရုံနှင့် နှစ်ယောက်ချင်းအဖွဲ့ ဖွဲ့ပြီး အနည်းဆုံး တစ်ပွဲ အနိုင်ယူပါ။ ဆုလာဘ် - နင်ရုံရုံ၏ နှစ်သက်မှု + ၁၀ ရာခိုင်နှုန်း၊ ဝိညာဉ်နှောင်ကြိုး + ၅ ရာခိုင်နှုန်း၊ နဂါးစစ်သိုင်းပညာ - နဂါးဝင်သက် (Dragon Breath)။

ရွေးချယ်မှု သုံးခုထဲတွင် တတိယမြောက် ရွေးချယ်မှု၏ ဆုလာဘ်မှာ အကောင်းဆုံး ဖြစ်သည်မှာ ငြင်းဖွယ်မရှိပေ။ ဝိညာဉ်လက်နက်မှာ ကောင်းမွန်သော ဆုလာဘ် ဖြစ်သော်လည်း Level 3 ဝိညာဉ်လက်နက်မှာ ချီလင်းအတွက် အသုံးဝင်မှု အကန့်အသတ် ရှိသည်။

တတိယရွေးချယ်မှု၏ ဆုလာဘ်ဖြစ်သော 'နဂါးဝင်သက်' မှာမူ 'ကိုးကြိမ်မြောက် နဂါးစစ်ကျင့်စဉ်' ၏ အသုံးချနည်းလမ်းတစ်ခုပင် ဖြစ်သည်။ ၎င်းကို အသုံးပြုရန် နဂါးစစ်ချီစွမ်းအင် အပေါ်တွင် အခြေခံရမည်ဖြစ်ရာ ၎င်း၏ အရေးပါမှုမှာ ပြောနေရန်ပင် မလိုတော့ပေ။

ထို့ပြင် ဤရွေးချယ်မှု မရှိလျှင်တောင် ချီလင်းသည် နင်ရုံရုံနှင့် ချိန်းဆိုထားပြီး ဖြစ်သည်။ သူ ဒီနေ့ ဤနေရာသို့ လာရခြင်းမှာလည်း နင်ရုံရုံနှင့် အဖွဲ့ဖွဲ့ရန်သာ ဖြစ်သည်။

【တင်တောင်! ရွေးချယ်မှု ၃ - နင်ရုံရုံနှင့် အဖွဲ့ဖွဲ့ရန် ရွေးချယ်သည့်အတွက် ဂုဏ်ယူပါသည်။ ဆုလာဘ် - နင်ရုံရုံ၏ နှစ်သက်မှု + ၁၀ ရာခိုင်နှုန်း၊ ဝိညာဉ်နှောင်ကြိုး + ၅ ရာခိုင်နှုန်း၊ နဂါးစစ်သိုင်းပညာ - နဂါးဝင်သက် တို့ကို ရရှိပါသည်】

"အဲ... အော်စကာ၊ ငါက မင်းကို ခေါ်ပြီး အစွမ်းမပြချင်တာ မဟုတ်ပါဘူး။ ဒါပေမဲ့ နှစ်ယောက်ချင်း ပွဲစဉ်အတွက် ငါ တခြားတစ်ယောက်နဲ့ ချိန်းထားပြီးသား ဖြစ်နေလို့ပါ" ဟု ချီလင်းက မတတ်သာသလို ပြောလိုက်သည်။

"ဟင်? ဘယ်သူနဲ့ ချိန်းထားတာလဲ။ ဝက်ကလေး (မာဟုန်ကျွင်း) လား၊ ရှောင်ဝူလား၊ ဒါမှမဟုတ် ရှောင်ဆန်းလား" အော်စကာက "သူတို့အားလုံးက အရမ်းသန်မာကြတာပဲ၊ စီနီယာ ခေါ်သွားဖို့တောင် မလိုပါဘူး!" ဟု ဆိုသည်။

"စီနီယာ... အထောက်အကူပြု ဝိညာဉ်ဆရာသခင်ကို ခေါ်သွားနိုင်တာ စီနီယာ တစ်ယောက်ပဲ ရှိတာပါ။ စွမ်းအားကြီးတဲ့သူမှာ တာဝန်ကြီးတယ်လေ၊ စီနီယာ တာဝန်ယူပေးရမယ်!"

"ကံမကောင်းတာကတော့ အော်စကာ... ငါ ခေါ်သွားမယ့်သူကလည်း အထောက်အကူပြု ဝိညာဉ်ဆရာသခင်ပဲ ဖြစ်နေတာပါပဲ" ချီလင်းက ရယ်မောလိုက်သည်။

"ဗျာ? အထောက်အကူပြု ဝိညာဉ်ဆရာသခင် ဟုတ်လား" အော်စကာက ဇဝေဇဝါဖြင့် မေးသည်။ "ကျွန်တော်ကလွဲလို့ ဒီမှာ တခြား ဘယ်သူက အထောက်အကူပြု ဝိညာဉ်ဆရာသခင် ရှိသေးလို့လဲ"

"ကြည့်လေ... သူမ ရောက်လာပြီ!" ချီလင်းက ပြောပြောဆိုဆိုဖြင့် သူတို့နောက်ဘက်သို့ လက်ညှိုးညွှန်ပြလိုက်လေသည်။