နင်ရုံရုံနှင့် လမ်းခွဲခဲ့ပြီးနောက် ချီလင်းသည် ရှရက်ခ်အကယ်ဒမီ၏ ဆေးကုသဆောင်သို့ ရောက်ရှိလာခဲ့သည်။ ဒဏ်ရာရရှိထားသော ကျူးကျူးချင်းကို ဤနေရာသို့ ခေါ်ဆောင်လာခဲ့ပြီးဖြစ်ကာ ထန်ဆန်းနှင့် အခြားသူများသည်လည်း ဖလန်းဒါးကို စိုးရိမ်တကြီး စောင့်ဆိုင်းနေကြသည်။
"ဘယ်လိုလဲ... ကျူးကျူးချင်းရဲ့ ဒဏ်ရာက ပြင်းထန်လား" ချီလင်း ရောက်ရောက်ချင်း ထန်ဆန်းကို မေးလိုက်သည်။
ထန်ဆန်းက လေးနက်သော မျက်နှာပေးဖြင့် "အခြေအနေက သိပ်မကောင်းဘူး" ဟု ဆိုသည်။
ချီလင်း မျက်ခုံးတစ်ချက် ပင့်လိုက်မိသည်။ အဆိပ်အတတ်၏ အရှင်သခင်တစ်ဦးအနေဖြင့် ထန်ဆန်း၏ ဆေးပညာကျွမ်းကျင်မှုမှာလည်း အလွန်မြင့်မားလှသည်။ သူပင်လျှင် အဖြေရှာမရဖြစ်နေသည်ဆိုပါက ကျူးကျူးချင်း၏ ဒဏ်ရာမှာ အမှန်တကယ်ပင် အလွန်စိုးရိမ်ရသည့် အနေအထားဖြစ်ပုံရသည်။
"ကျူးကျူးချင်းက ပြိုင်ပွဲမှာ တစ်ယောက်ယောက်ရဲ့ တိုက်ခိုက်တာကို ခံလိုက်ရတာ။ အဲ့ဒီလူက ကျွန်တော် တစ်ခါမှမမြင်ဖူးတဲ့ အင်မတန် ယုတ်မာကောက်ကျစ်တဲ့ လက်ဝါးသိုင်းတစ်ခုကို သုံးသွားတာပဲ" ဟု ထန်ဆန်းက ပြောသည်။
"အခုလောလောဆယ်တော့ ကျောင်းအုပ်ကြီး ဖလန်းဒါးက သူမကို ကုသပေးနိုင်တဲ့ ပညာရှင်တစ်ယောက် ခေါ်လာပေးဖို့ပဲ မျှော်လင့်ရတော့မယ်။ မဟုတ်ရင်တော့ ကျူးကျူးချင်းရဲ့ ဒဏ်ရာက သက်သာဖို့ ခက်လိမ့်မယ်"
သူတို့စကားပြောနေစဉ်မှာပင် ကျူးကျူးချင်းသည် ရုတ်တရက် အပြင်းအထန် ချောင်းဆိုးလာပြီး လတ်ဆတ်သော သွေးနီရောင်များကို အန်ထုတ်လိုက်ရာ ကြည့်ရသည်မှာ အလွန်ပင် ထိတ်လန့်ဖွယ်ကောင်းလှသည်။
"ဘယ်လိုဖြစ်ရတာလဲ... ကျူးချင်း၊ နင် တောင့်ခံထားရမယ်နော်" ကျူးကျူးချင်း၏ အခြေအနေကိုကြည့်ကာ ရှောင်ဝူက စိုးရိမ်တကြီး ပြောရှာသည်။
ချီလင်းလည်း အလွန်ပင် ပူပန်နေသော်လည်း သူသည် ထန်ဆန်းကဲ့သို့ ဆေးပညာကို နားမလည်သောကြောင့် ယခုအချိန်တွင် ဘာမှမတတ်နိုင်ဘဲ ဖြစ်နေသည်။
【ဒေါင်! လက်ခံသူသည် ရွေးချယ်မှုတစ်ခုနှင့် ရင်ဆိုင်နေရကြောင်း စစ်ဆေးတွေ့ရှိရပါသည်။ ကျေးဇူးပြု၍ အောက်ပါ ရွေးချယ်မှုများထဲမှ တစ်ခုကို ရွေးချယ်ပါ】
ရွေးချယ်မှု ၁ - ဘာမှမလုပ်ဘဲ ဖလန်းဒါးက ဆရာဝန်ခေါ်လာပြီး ကျူးကျူးချင်းကို ကုသပေးမည့်အချိန်ကို စောင့်ဆိုင်းပါ။ ဆုလာဘ် - ဝိညာဉ်စွမ်းအား Rank - ၁ လျော့နည်းမည်။ ကျူးကျူးချင်း ပြန်လည်ကျန်းမာလာနိုင်ခြေ ၃၀ ရာခိုင်နှုန်း။
ရွေးချယ်မှု ၂ - ကျူးကျူးချင်းကို ကုသရန် ကိုယ်တိုင် ပါဝင်ဆောင်ရွက်ပါ။ ဆုလာဘ် - ကျူးကျူးချင်း၏ နှစ်သက်မှု + ၂၀ ရာခိုင်နှုန်း၊ ဝိညာဉ်နှောင်ကြိုး ၅ ရာခိုင်နှုန်း၊ နတ်ဘုရားအဆင့် ဆေးပညာကျွမ်းကျင်မှု - ဟွာထော့၏ ကမ္ဘာကြီးကို ကယ်တင်ခြင်း ကျမ်းစာ။
ယခုတစ်ကြိမ် ရွေးချယ်မှုနှစ်ခုကို ကြည့်ပြီး ချီလင်း မိမိကိုယ်ကိုယ် ဘက်စုံတော်သည့် ပါရမီရှင်တစ်ဦး ဖြစ်လာတော့မည်ဟု ခံစားလိုက်ရသည်။ သူသည် လူကိုပင် ကုသပေးနိုင်တော့မည်မဟုတ်ပါလား။
ရွေးချယ်မှု ၂ ကို ရွေးမည်မှာ သေချာပါသည်။ နတ်ဘုရားအဆင့် ဆေးပညာတစ်ခုအနေဖြင့် 'ဟွာထော့၏ ကမ္ဘာကြီးကို ကယ်တင်ခြင်း ကျမ်းစာ' သည် ခက်ခဲနက်နဲလှသော ရောဂါဝေဒနာအားလုံးကို ကုသနိုင်သည်ဟု ဆိုနိုင်သောကြောင့် ကျူးကျူးချင်းကို ကုသပေးရန်မှာ သူ့အတွက် အပျော့ထုတ်ပင် ဖြစ်ပေလိမ့်မည်။
သို့သော် ဤဆုလာဘ်များထဲတွင် 'နှစ်သက်မှု' ဆိုသည်မှာ သူ့အပေါ်ထားသည့် စိတ်ဝင်စားမှုကို ဆိုလိုမှန်း သူနားလည်သော်လည်း 'ဝိညာဉ်နှောင်ကြိုး' ဆိုသည်မှာ အဘယ်နည်း။
အများကြီး စဉ်းစားနေရန် အချိန်မရှိတော့ပေ။ စနစ်က တုံ့ပြန်မှုပေးနေပြီဖြစ်ရာ ချီလင်း နောက်မှသာ အေးအေးဆေးဆေး စဉ်းစားရန် ဆုံးဖြတ်လိုက်သည်။
【ဒေါင်! ရွေးချယ်မှု ၂ - ကျူးကျူးချင်းကို ကုသပေးရန် ရွေးချယ်သည့်အတွက် လက်ခံသူကို ဂုဏ်ယူပါသည်။ ဆုလာဘ် - ကျူးကျူးချင်း၏ နှစ်သက်မှု + ၂၀ ရာခိုင်နှုန်း၊ ဝိညာဉ်နှောင်ကြိုး ၅ ရာခိုင်နှုန်း၊ နတ်ဘုရားအဆင့် ဆေးပညာကျွမ်းကျင်မှု - ဟွာထော့၏ ကမ္ဘာကြီးကို ကယ်တင်ခြင်း ကျမ်းစာ ရရှိပါသည်】
"ကျူးကျူးချင်း ရထားတဲ့ ဒီလိုဒဏ်ရာမျိုးကို ငါ တစ်နေရာမှာ မြင်ဖူးသလိုပဲ။ ငါ သူမကို ကယ်နိုင်ကောင်း ကယ်နိုင်လိမ့်မယ်" ဟု ချီလင်းက ပေါ့ပေါ့ပါးပါး ပြောလိုက်သည်။
"အစ်ကိုကြီး... အတည်ပြောနေတာလား" ထန်ဆန်းက အံ့အားသင့်စွာဖြင့် "ကျွန်တော့်ရဲ့ နှစ်ရှည်လများ အတွေ့အကြုံအရတောင် ဒီဒဏ်ရာကို ဘယ်လိုကုရမလဲဆိုတာ စဉ်းစားလို့မရဘူး။ အစ်ကိုကြီးက တကယ် ကုနိုင်တာလား"
"ဟုတ်တယ်။ ရှေးဟောင်းကျမ်းစာတစ်အုပ်ထဲမှာ ဒီလိုဒဏ်ရာမျိုးအကြောင်း ဖတ်ဖူးပြီး ကုသနည်းကိုလည်း အမှတ်မထင် သိနေတာ" ချီလင်းက ရှေ့ဆက်တိုးရန် ဆုံးဖြတ်လိုက်ပြီး အတည်ပေါက် လိမ်ပြောလိုက်သည်။
"ဒါပေမဲ့ ဒီဒဏ်ရာကို ကုသနေတုန်း ဘယ်သူမှ နှောင့်ယှက်လို့မရဘူး။ မဟုတ်ရင် နှစ်ဖက်စလုံး အသက်အန္တရာယ်ရှိနိုင်တယ်။ မင်းတို့အားလုံး အပြင်ထွက်နေကြ။ ကျူးကျူးချင်း သက်သာသွားပြီဆိုရင် ငါ လှမ်းခေါ်လိုက်မယ်"
အခန်းထဲမှ အနှင်ထုတ်ခံလိုက်ရသော ထန်ဆန်း၊ ရှောင်ဝူနှင့် အော်စကာတို့သည် တစ်ယောက်မျက်နှာ တစ်ယောက် ကြည့်လိုက်ကြသည်။ အော်စကာက မနေနိုင်ဘဲ "စီနီယာချီနဲ့ ကျူးကျူးချင်း နှစ်ယောက်တည်း အခန်းထဲမှာဆိုတော့... ကလေးတွေမကြည့်သင့်တဲ့ ကိစ္စတွေများ လုပ်နေမလား မသိဘူးနော်" ဟု ကောက်ချက်ချလိုက်သည်။
"ဟဲ့! အော်စကာ... အစ်ကိုချီကို နင့်လိုလူစားမျိုးလို့ ထင်နေတာလား" ရှောင်ဝူက ဒေါသတကြီး ပြောလိုက်သည်။
"နင့်ရဲ့ ညစ်ပတ်တဲ့ အတွေးတွေနဲ့ အစ်ကိုချီကို မတွေးနဲ့။ အစ်ကိုချီက ကျူးကျူးချင်းကို ကယ်ဖို့အတွက် အခုလို လုပ်တာဖြစ်မှာပါ"
"ဒါပေမဲ့ ရှောင်ဝူ... စဉ်းစားကြည့်ဦးလေ။ ကျူးကျူးချင်းရဲ့ ခန္ဓာကိုယ် ဖွံ့ဖြိုးမှုက သာမန်မှမဟုတ်တာ။ စီနီယာချီ သူမကို ကုပေးတဲ့အခါ အဝတ်အစားတွေ ချွတ်ရမှာကတော့ ရှောင်လွှဲလို့မရတဲ့ ကိစ္စပဲလေ" အော်စကာ၏ ဦးနှောက်က မြန်မြန်ဆန်ဆန် အလုပ်လုပ်နေသည်။ ယောက်ျားလေးများမှာ ထိုသို့သော ကိစ္စရပ်များတွင် စိတ်ကူးယဉ် အလွန်ကောင်းကြသည် မဟုတ်ပါလား။
"သေချင်းဆိုး... နင်တော့ သေပြီသာမှတ်။ နင်လို နှာဗူး ဝက်အူချောင်းဦးလေးကြီးရဲ့ ပါးစပ်ကို ငါ အခု ဖြဲပစ်မယ်" ရှောင်ဝူသည် အလွန်ဒေါသထွက်သွားပြီး အော်စကာကို ပညာပေးရန် လိုက်လံနှိပ်စက်တော့ရာ အော်စကာမှာ အကူအညီတောင်းကာ ထွက်ပြေးရတော့သည်။
ရုတ်ရုတ်သဲသဲ ဖြစ်သွားပြီးနောက် ရှောင်ဝူသည် သူမ၏ ရင်ဘတ်ကို တိတ်တဆိတ် ကာလိုက်ပြီး နှုတ်ခမ်းလေးစူကာ "ငါ့ဟာကလည်း... အဲ့လောက်တော့ မသေးပါဘူးနော်" ဟု တိုးတိုးလေး ရေရွတ်လိုက်မိသည်။
အမှန်စင်စစ် အော်စကာ ခန့်မှန်းသည်မှာ တစ်စိတ်တစ်ပိုင်း မှန်ကန်နေသည်။ ချီလင်း တံခါးပိတ်ထားချင်ရသည့် အကြောင်းရင်းမှာ သူ၏ ကုသနည်းက အမှန်တကယ်ပင် ကလေးသူငယ်များ မကြည့်သင့်သည့် အနေအထားမျိုး ဖြစ်နေသောကြောင့်ပင်။
ကျူးကျူးချင်း ထိမှန်ထားသည်မှာ အလွန်ယုတ်မာလှသော လက်ဝါးရိုက်ချက်တစ်ခု ဖြစ်သည်။ အချိန်မီ မကုသနိုင်ပါက သူမ၏ အသက်စွမ်းအားကို ဝါးမြိုသွားပြီး တဖြည်းဖြည်း အားအင်ကုန်ခမ်းကာ သေဆုံးသွားစေမည်ဖြစ်သည်။
'ဟွာထော့၏ ကမ္ဘာကြီးကို ကယ်တင်ခြင်း ကျမ်းစာ' အရ ဤကဲ့သို့သော ဒဏ်ရာကို ကုသရန် ပိုမိုစွမ်းအားကြီးမားသော ကျင့်စဉ်တစ်ခုကို အသုံးပြုကာ အဆိပ်စွမ်းအင်များကို နှင်ထုတ်ရမည်ဖြစ်သည်။ ချီလင်း ကျင့်ကြံထားသော 'ကိုးကြိမ်မြောက် နဂါးစစ်ကျင့်စဉ်' က ထိုလိုအပ်ချက်နှင့် အတိအကျ ကိုက်ညီနေသည်။
သူ့ရှေ့တွင် သတိမေ့မြောနေသော ကျူးကျူးချင်းကို ကြည့်ရင်း ချီလင်း အလွန်ပင်တွေဝေနေမိသည်။ အခုလို လုပ်လိုက်ခြင်းက သူမအပေါ် အခွင့်အရေးယူရာ ကျရောက်မလား။
"ကြည့်ဦး ကျူးချင်း... ငါ အခုလိုလုပ်တာက နင့်ကို ကယ်ချင်လို့သက်သက်ပဲနော်၊ အခွင့်အရေးယူတာ မဟုတ်ဘူး" ချီလင်းက အပြစ်ရှိသလို ခံစားချက်ဖြင့် ပြောလိုက်သည်။
"နင် သဘောတူတယ်ဆိုရင် ငြိမ်နေလိုက်။ သဘောမတူဘူးဆိုရင်တော့... ကဲ... နောက်ပြန်ကျွမ်းတစ်ပတ် ထိုးပြလိုက်လေ"
အကယ်၍ ကျူးကျူးချင်းသာ သတိမလစ်ဘဲ ဤစကားကို ကြားသွားခဲ့လျှင် ဘာပဲဖြစ်ဖြစ် ချီလင်းရှေ့မှာ နောက်ပြန်ကျွမ်း အပတ်တစ်ရာလောက် ထိုးပြမိပေလိမ့်မည်။
သို့သော် ကံမကောင်းစွာဖြင့်ပင် ယခုအချိန်တွင် သူမသည် လက်ချောင်းလေးတစ်ချောင်းကိုပင် မလှုပ်နိုင်ရှာပေ။
ထို့ကြောင့် ချီလင်းသည် စိတ်အေးလက်အေးဖြင့်ပင် ကျူးကျူးချင်း၏ အင်္ကျီကြယ်သီးများကို ဖြုတ်လိုက်ရာ သူမ၏ ရင်ဘတ်ပေါ်တွင် သွေးနီရောင် လက်ဝါးရာကြီးတစ်ခု ထင်ကျန်နေသည်ကို တွေ့လိုက်ရသည်။
ချီလင်း မျက်မှောင်ကြုတ်ကာ ထိုလက်ဝါးရာကို ကြည့်လိုက်မိသည်။ တစ်စုံတစ်ယောက်က ဤမျှ ရက်စက်ကြမ်းကြုတ်သော နည်းလမ်းကို အသုံးပြုလိမ့်မည်ဟု သူ တကယ် မထင်ထားခဲ့မိပေ။ ၎င်းမှာ သတ်ဖြတ်ရန် ရည်ရွယ်ချက်သက်သက်သာ ဖြစ်သည်။
"ဟင်း! ဒီဒဏ်ရာက တကယ်ကို ကြီးတာပဲ။ မဟုတ်ဘူး... ဒီသွေးရောင်က တကယ်ကို ဖြူနေတာပဲ။ ဟုတ်ပါဘူး... ဒီလက်ဝါးရာက တကယ်ကို လုံးဝန်းတာပဲ"
"မဟုတ်ဘူး မဟုတ်ဘူး! ငါ ဘာတွေ ကြည့်နေတာလဲ" ချီလင်း နှာခေါင်းသွေးယိုလာသည်ကို သုတ်လိုက်ရင်း "မြန်မြန်လေး ကျူးချင်းကို ကုပေးမှဖြစ်မယ်" ဟု ကိုယ့်ကိုယ်ကိုယ် သတိပေးလိုက်သည်။
ကျူးကျူးချင်း၏ ဒဏ်ရာပေါ်သို့ လက်တင်လိုက်ပြီးနောက် ချီလင်းသည် ပြင်းထန်သော စိတ်ဓာတ်ခွန်အားကို အသုံးပြုကာ 'ကိုးကြိမ်မြောက် နဂါးစစ်ကျင့်စဉ်' ကို လည်ပတ်စေလျက် ကုသမှုကို စတင်လိုက်သည်။
ကုသမှုဖြစ်စဉ်မှာ အလွန်ပင် ရိုးရှင်းလှသည်။ အခြားသူများအတွက် ကုမရနိုင်သော ခက်ခဲသည့် ဝေဒနာဖြစ်သော်လည်း 'ကိုးကြိမ်မြောက် နဂါးစစ်ကျင့်စဉ်' မှ စစ်မှန်သောချီစွမ်းအင်များ စီးဝင်သွားပြီးနောက် ၎င်းတို့သည် ရေထဲတွင် အရည်ပျော်သွားသော ရေခဲများကဲ့သို့ ချက်ချင်းပင် ပျောက်ကွယ်သွားတော့သည်။
ချီလင်းက သူ၏ နဂါးချီစွမ်းအင်များကို ကျူးကျူးချင်း၏ သွေးကြောများအတွင်းသို့ လမ်းကြောင်းပေးကာ ကုသပေးနေစဉ်မှာပင် ကျူးကျူးချင်း၏ ဖြူဖျော့နေသော မျက်နှာလေးမှာ လန်းဆန်းစိုပြေလာပြီး တဖြည်းဖြည်း ပုံမှန်အရောင်သို့ ပြန်လည်ရောက်ရှိလာသည်။
တစ်နာရီခန့် ကြာပြီးနောက်တွင် ချီလင်းသည် ကျူးကျူးချင်း၏ ဒဏ်ရာကို လုံးဝဥဿုံ ကုသပေးနိုင်ခဲ့သည်။ ထိတ်လန့်ဖွယ်ကောင်းသော သွေးလက်ဝါးရာကြီးမှာ မရှိတော့ဘဲ ကျူးကျူးချင်း၏ နဂိုမူလ အသားအရေအတိုင်း ဖြူဝင်းနုနယ်သွားပြီဖြစ်သည်။
မကြာမီအချိန်အတွင်း သူမ သတိရလာတော့မည်ဟု ခန့်မှန်းရသည်။
ယခု သူလုပ်ရမည့်အလုပ်မှာ သူမ သတိမရလာခင် အခန်းထဲမှ ခိုးထွက်သွားရန်ပင် ဖြစ်သည်။ မဟုတ်ပါက ကျူးကျူးချင်း၏ စရိုက်အရ သူမအပေါ် သူ ဘာတွေလုပ်ခဲ့သည်ကို သိသွားလျှင် ထိုနေရာမှာပင် အသေအလဲ တိုက်ခိုက်လာနိုင်သောကြောင့်ဖြစ်ပေသည်။