အခန်း ၂၆ ယွီရှောင်ကန်း၏ ဒုတိယအကျော့ ငရဲခန်း

"ဟက်... ဒါလေးတွေကို ကြည့်စမ်းပါဦး ဒါတွေအကုန်လုံးက မင်းရဲ့ စွမ်းဆောင်ချက်တွေပေါ့လေ"
ပုံရိပ်ယောင်ကျောက်တုံး၌ ပါဝင်သော အဝတ်ဗလာနှင့် ကြမ်းတမ်းသော လူခြောက်ယောက်မှာ အသူရာချောက်နက်ကြီး၏ လူများ ဖြစ်ကြပြီး ပုံရိပ်ကို ဗျူဟာမြောက် ရှောင်ကွင်းကာ ရိုက်ကူးထားသဖြင့် သူတို့၏ မျက်နှာများမှာ ပေါ်လွင်ခြင်း မရှိချေ။ သို့သော် ဇာတ်လိုက်ကျော် ယွီရှောင်ကန်း၏ မျက်နှာကိုမူ အနီးကပ် ဆွဲ၍ သေသေချာချာ ရိုက်ကူးထားခဲ့သည်။
ဤနေရာတွင် ရုပ်သံမှတ်တမ်းတင် ပုံဆောင်ခဲ ပေါင်း သောင်းနှင့်ချီ၍ ရှိနေသည်။ အကယ်၍ ၎င်းတို့ထဲမှ အနည်းငယ်ကိုသာ အပြင်သို့ ချပြလိုက်လျှင် ယွီရှောင်ကန်း၏ နာမည်သည် မဟာဒိုလော့တိုက်ကြီးတစ်ခုလုံးတွင် ရေပန်းစားသွားမည် ဖြစ်သည်။
သူသည် ကျော်ကြားလှသော နဂါးပြာလျှပ်စီးဂိုဏ်း၏ ဂိုဏ်းချုပ်ငယ်တစ်ဦး ဖြစ်ပြီး ဤကဲ့သို့ အရှက်ရဖွယ် ကိစ္စရပ်ကို ပြုလုပ်ခဲ့ခြင်း ဖြစ်ရာ အကယ်၍ ဤသတင်းသာ အပြင်သို့ ပေါက်ကြားသွားပါက နဂါးပြာလျှပ်စီးဂိုဏ်းတစ်ခုလုံး သိက္ခာကျဆင်းသွားပေလိမ့်မည်။
"မိစ္ဆာမ... မင်းက တကယ့် မိစ္ဆာမပဲ"
ယွီရှောင်ကန်း၏ ရူးသွပ်စွာ အော်ဟစ်ဆဲဆိုနေမှုကို ကြည့်ပြီး ဘီဘီတုန်းက အလျင်စလို မလုပ်ဆောင်ချေ။ သူ၏ အပြစ်အတွက် သေဒဏ် ဆိုသည်မှာ အပေါ့ပါးဆုံး ပြစ်ဒဏ်သာ ဖြစ်သည်။ သူမသည် ယွီရှောင်ကန်းအား လမ်းဘေးတွင် လေလွင့်ခွေးတစ်ကောင်ကဲ့သို့ အစားအစာ လိုက်လံလုယက် စားသောက်နေရသည့် ဘဝသို့ ရောက်ရှိသွားစေရန်နှင့် သူ၏ အရှက်ရဖွယ် လုပ်ရပ်များကို တိုက်ကြီးပေါ်ရှိ လူအားလုံး သိရှိသွားစေရန် ပြုလုပ်လိုခြင်း ဖြစ်သည်။
သူက လူအများရှေ့တွင် ဆရာကြီးတစ်ဦးအဖြစ် ဟန်ဆောင်ကာ ထင်ပေါ်ကျော်ကြားချင်သည် မဟုတ်ပါလား။ သို့ဆိုလျှင် သူမအနေဖြင့် သူ၏ သိမ်မွေ့လှသော မာနတရားကို ကောင်းကောင်းမွန်မွန် ချိုးနှိမ်ပေးရပေလိမ့်မည်။
"ဒါဆိုရင် မင်း ဖူယဲ့ကို သတ်ခဲ့တယ်ဆိုတာ ဝန်ခံတာပေါ့"
ဖူယဲ့၏ နာမည်ကို ပြောဆိုလိုက်သည့် အချိန်တွင် ဘီဘီတုန်း၏ ထံမှ ဖုံးကွယ်၍မရသော သတ်ဖြတ်ခြင်း အရှိန်အဝါများ ဖြာထွက်လာခဲ့သည်။ အဆင့် ၆၈ ဝိညာဉ်ဧကရာဇ် တစ်ဦး၏ သတ်ဖြတ်ခြင်း အရှိန်အဝါမှာ အလွန် ပြင်းထန်လှသည်။
"ဟားဟားဟား... ဖူယဲ့လား။ မင်း ပြောနေတာက ငါ ကိုယ်တိုင် အကြောတွေကို ဖြတ်ပြီး လျှာကို ဖြတ်ပစ်ခဲ့တဲ့ အဲဒီ သာမန် အရပ်သား အောက်တန်းစားလေးကို ပြောတာလား။ ငါ မင်းကို ပြောလိုက်မယ် ဘီဘီတုန်း... ငါပဲ သူ့ကို သတ်ခဲ့တာ ငါ့လက်နဲ့တင် သူ့အကြောတွေကို ဖြတ်ပစ်ခဲ့တာ။ သူ့ရဲ့ လျှာကိုလည်း ဓားနဲ့ တစ်စစီ ဖြတ်ပစ်ခဲ့တာကွ"
ယွီရှောင်ကန်းသည် ဤအချိန်တွင် သူ၏ ကံကြမ္မာကို သိရှိသွားပုံရပြီး မည်သည့်အရာကိုမျှ ဖုံးကွယ်ထားခြင်း မရှိတော့ချေ။ သူသည် ဘီဘီတုန်း ဒေါသထွက်ကာ သူ့ကို ချက်ချင်း သတ်ပစ်ရန် ရည်ရွယ်ချက်ရှိရှိ ဆွပေးနေခြင်း ဖြစ်သည်။
"ဟက်... ဒါဆို သူက ဒီလို နာကျင်မှုမျိုးကို ခံစားခဲ့ရတာပေါ့။ ကောင်းပြီလေ"
ဘီဘီတုန်းက သူ၏ အနောက်ကနေ ရုပ်သံမှတ်တမ်းတင် ပုံဆောင်ခဲ အချို့ကို ထပ်မံ ထုတ်ယူလိုက်သည်။ ၎င်းထဲတွင် ယွီရှောင်ကန်း၏ ဒေါသတကြီး ပြောဆိုနေသော စကားများနှင့် သူ၏ ရက်စက်ကြမ်းကြုတ်သော မျက်နှာအမူအရာများ ပါဝင်နေသည်။
"ယွီရှောင်ကန်း... မင်း နောက်ဆုံးတော့ ဝန်ခံလိုက်ပြီပေါ့။ မင်း သိချင်မှ သိလိမ့်မယ်... နဂါးပြာလျှပ်စီးဂိုဏ်းက ဝိညာဉ်နန်းတော်အပေါ် ဖိအားတွေ အများကြီး ပေးထားပြီး ခိုင်လုံတဲ့ သက်သေမရှိရင် ဒီနေ့ မင်းကို လွှတ်ပေးရမယ်လို့ ရာဇသံ ပေးထားတာ။ ဒါပေမဲ့ မင်းကတော့ သက်သေကို ကိုယ်တိုင် အပ်နှင်းလိုက်ပြီပဲ"
ပြောရင်းနှင့် ဘီဘီတုန်း၏ နှုတ်ခမ်းထောင့်တွင် အောင်နိုင်သူ အပြုံးတစ်ခု ပေါ်ထွက်လာခဲ့သည်။
ဤစကားကို ကြားလိုက်ရတဲ့ အခါမှာတော့ ယွီရှောင်ကန်းသည် ရေခဲလှိုဏ်ဂူထဲသို့ ကျဆင်းသွားသလို ခံစားလိုက်ရပြီး နေရာမှာတင် ဆွံ့အသွားခဲ့ရသည်။
"မဟုတ်ဘူး... ငါ သူ့ကို မသတ်ခဲ့ဘူး။ ငါ ဘာမှ မသိဘူး။ မင်း ငါ့ကို ဖူယဲ့အကြောင်း မေးလို့ ဖြေလိုက်တာပဲ ရှိတာ။ ငါ ဘာမှ မသိဘူး"
ယွီရှောင်ကန်းသည် လုံးဝ ထိတ်လန့် တုန်လှုပ်သွားခဲ့ပြီး အစောပိုင်းက မျှော်လင့်ချက်များမှာ စိတ်ပျက်အားငယ်မှုအဖြစ်သို့ ပြောင်းလဲကာ မှောင်မိုက်သော ချောက်နက်ကြီးထဲသို့ ကျဆင်းသွားခဲ့ရသည်။
ယွီရှောင်ကန်း၏ ဝန်ခံချက်များက ခိုင်လုံသော သက်သေအဖြစ် တည်ရှိသွားခဲ့ပြီ ဖြစ်ပြီး ၎င်းကို ပုံဆောင်ခဲထဲတွင် သေသေချာချာ မှတ်တမ်းတင်ထားပြီး ဖြစ်သည်။
အကယ်၍ ယခုမှတ်တမ်းနှင့်အတူ ယွီရှောင်ကန်း ကြမ်းတမ်းသော လူခြောက်ယောက်၏ နှိပ်စက်မှုကို ခံနေရသည့် ပုံရိပ်များကို နဂါးပြာလျှပ်စီးဂိုဏ်းသို့ ပေးပို့လိုက်လျှင် လုံလောက်ပြီ ဖြစ်သည်။ ဂိုဏ်းအနေဖြင့် ဤကိစ္စကို ကိုင်တွယ်ဖြေရှင်းပါက ယွီရှောင်ကန်း၏ မွေးသမိခင်နှင့် ဖခင်ဖြစ်သူ ဂိုဏ်းချုပ်ကြီး ယွီယွမ်ကျိပင်လျှင် သူနှင့် ပတ်သက်မှု အားလုံးကို ဖြတ်တောက်ကာ ဂိုဏ်းမှ မောင်းထုတ်ပေလိမ့်မည်။
ယွီရှောင်ကန်းသည် အစောပိုင်းက အခြေအနေကောင်းများ ရှိနေခဲ့သော်လည်း ယခုအခါတွင်မူ သူ၏ မိုက်မဲမှုကြောင့် လူပြက်တစ်ယောက်ကဲ့သို့ ဖြစ်သွားခဲ့ရသည်။
ဘီဘီတုန်းက ယွီရှောင်ကန်း၏ အော်ဟစ်ငိုကြွေးမှုကို ဂရုမစိုက်ဘဲ ထိုကြမ်းတမ်းသော လူခြောက်ယောက်ဘက်သို့ လှည့်ကာ ခရမ်းရောင် ကတ်ပြားတစ်ခုကို စားပွဲပေါ်သို့ ပစ်တင်ပေးလိုက်သည်။
"ဒီကတ်ထဲမှာ ရွှေဒင်္ဂါးပြား သုံးသောင်း ရှိတယ် ဒါက လွန်ခဲ့တဲ့ ခြောက်လစာအတွက် မင်းတို့ရဲ့ လုပ်အားခပဲ။ အခု ပြန်လို့ရပြီ"
ဘီဘီတုန်း၏ စကားကို ကြားတော့ ထိုလူခြောက်ယောက်က အချင်းချင်း ကြည့်လိုက်ကြပြီးနောက် သူမကို အတူတကွ ဦးညွှတ် အလေးပြုလိုက်ကြသည်။
"ကျေးဇူးတင်ပါတယ်... သန့်ရှင်းသော မိန်းကလေး"
လူခြောက်ယောက်သည် ခရမ်းရောင် ကတ်ပြားများကို ကိုင်ဆောင်ကာ တစ်ပြိုင်နက်တည်း ထွက်ခွာသွားကြပြီး ထိုအချိန်တွင် ယွီရှောင်ကန်းက မိမိကိုယ်ကိုယ် အသုံးမကျသော လူမိုက်တစ်ယောက်အဖြစ် သတ်မှတ်ကာ စိတ်ထဲမှ နေ၍ ကျိန်ဆဲနေခဲ့သည်။
သို့သော် စိတ်ထဲမှ မည်မျှပင် ကျိန်ဆဲနေပါစေ အလကားပဲ ဖြစ်သည်။ ဘာပဲဖြစ်ဖြစ် ဘီဘီတုန်းက သက်သေ အားလုံးကို ပုံဆောင်ခဲထဲတွင် မှတ်တမ်းတင်ထားပြီး ဖြစ်သည်။
"မင်းတို့ လေးယောက်... ဝင်ခဲ့ကြတော့"
ဘီဘီတုန်း စကားပြောပြီးသည်နှင့် အရပ် ၂ ဒသမ ၃ မီတာခန့် ရှိသော ထွားကျိုင်းသည့် လူလေးယောက်က တံခါးမှတစ်ဆင့် တိုးဝှေ့ ဝင်ရောက်လာခဲ့ကြသည်။
ဟုတ်ပါသည် သူတို့၏ ခန္ဓာကိုယ် တည်ဆောက်ပုံမှာ အလွန် ကြီးမားလွန်းသဖြင့် တံခါးဝတွင် ညှပ်လုနီးပါး တိုးဝှေ့ ဝင်လာကြခြင်း ဖြစ်သည်။
သံဘောင်တွင် ချည်နှောင်ခံထားရတဲ့ ယွီရှောင်ကန်းကို မြင်လိုက်ရတဲ့ အခါမှာတော့ သူတို့၏ မျက်လုံးများထဲတွင် ထူးဆန်းသော အရသာကို ခံစားလိုသည့် အလင်းတန်းများ ဖြတ်ပြေးသွားခဲ့သည်။
မှန်ပါသည် ဤသူ လေးယောက်မှာ ဘီဘီတုန်းက အထူး ရှာဖွေခိုင်းထားသော ကျောက်တောင်သားကြီးများ ဖြစ်ကြပြီး သူတို့၏ ခန္ဓာကိုယ် အချိုးအစားမှာ အလွန် ထူးခြားကာ ယွီရှောင်ကန်းကဲ့သို့ ခေါင်းမာလှသော လူစားမျိုးနှင့် အသင့်တော်ဆုံး ဖြစ်သည်။
ထို့ပြင် ၎င်းတို့ လေးယောက်ထဲတွင် အကူအညီပေးရေး အမျိုးအစား ဝိညာဉ်မဟာဆရာ တစ်ဦးနှင့် ကုသရေး အမျိုးအစား ဝိညာဉ်မဟာဆရာ တစ်ဦး ပါဝင်နေတာကြောင့် ဘီဘီတုန်းအနေဖြင့် သူတို့ကို အလွန် မြင့်မားသော စျေးနှုန်း ပေးဆောင်ထားခဲ့ခြင်း ဖြစ်သည်။
"နှုတ်ဆက်ပါတယ်... သန့်ရှင်းသော မိန်းကလေး"
သူတို့သည် သံဘောင်တွင် ချည်နှောင်ခံထားရတဲ့ ယွီရှောင်ကန်းကို မြင်တွေ့လိုက်ရသော်လည်း သူတို့၏ ရှေ့မှောက်တွင် ရပ်နေသူမှာ ဝိညာဉ်နန်းတော်၏ သန့်ရှင်းသော မိန်းကလေး ဖြစ်သလို သူတို့အား ငွေအမြောက်အမြား ပေးဆောင်ထားသည့် အလုပ်ရှင် ဖြစ်သဖြင့် ရိုသေစွာ နှုတ်ဆက်လိုက်ကြသည်။
"နောက်ထပ် တစ်နှစ်လုံးလုံး မင်းတို့ သူ့ကို စိတ်ကြိုက် နှိပ်စက်နိုင်တယ်။ ငါ သူ့ကို မသေစေချင်ဘူး ဒါပေမဲ့ ကောင်းကောင်းမွန်မွန် ရှင်သန်နေတာမျိုးလည်း မမြင်ချင်ဘူး။ အထဲမှာ မင်းတို့ နားနေဖို့ အခန်းအချို့ ရှိသလို စားစရာနဲ့ သောက်စရာတွေကိုလည်း လူလွှတ်ပြီး ပို့ပေးမယ်။ ဒီကာလအတွင်းမှာတော့ မင်းတို့ အပြင်ထွက်ခွင့် မရှိဘူး"
ဘီဘီတုန်း၏ စကားကို ကြားလိုက်ရတဲ့ အခါမှာတော့ ယွီရှောင်ကန်း၏ မျက်လုံးထဲရှိ အလင်းတန်းများ လုံးဝ ကွယ်ပျောက်သွားခဲ့ပြီး သူ၏ ဘဝတစ်ခုလုံး ပြီးဆုံးသွားခဲ့ပြီ ဖြစ်ကြောင်း သိရှိလိုက်ရသည်။
"တစ်နှစ် ပြည့်သွားတဲ့ အခါမှာတော့ မင်းတို့ တစ်ယောက်ချင်းစီကို ရွှေဒင်္ဂါးပြား တစ်သောင်းစီ ထပ်ပေးမယ်... နားလည်လား"
ဘီဘီတုန်း၏ စကားကို ကြားတော့ ထိုလူလေးယောက်က အချင်းချင်း ကြည့်လိုက်ကြပြီး ဤမျှ ကောင်းမွန်သော အခွင့်အရေးမျိုး ရရှိလိမ့်မည်ဟု မယုံကြည်နိုင်ဘဲ ဖြစ်နေကြသည်။
"စိတ်ချပါ... သန့်ရှင်းသော မိန်းကလေး အရှင်မ ညွှန်ကြားထားတဲ့အတိုင်း ကျွန်တော်တို့ သေသေချာချာ လုပ်ဆောင်သွားပါ့မယ်"
"ကျွန်တော်လည်း သဘောတူပါတယ်"
"ကျွန်တော်လည်း ထပ်တူ သဘောတူပါတယ် +၁"
"ကျွန်တော်လည်း ထပ်တူ သဘောတူပါတယ် +၂"
ဘီဘီတုန်းက သူတို့၏ တုံ့ပြန်မှုကို အလွန် ကျေနပ်သွားခဲ့ပြီး မထွက်ခွာမီ ထိုလူလေးယောက်ကို တစ်ချက် သတိပေးလိုက်သည်။
"သူက လက်ရှိ နဂါးပြာလျှပ်စီးဂိုဏ်းရဲ့ ဂိုဏ်းချုပ်ငယ်ပဲ ဖြစ်တယ်"
ဘီဘီတုန်း ထွက်ခွာသွားပြီးနောက် ယွီရှောင်ကန်း၏ နှုတ်မှ စူးရှလှသော အော်ဟစ်သံကြီး ထွက်ပေါ်လာခဲ့သည်။
"အား... ဘီဘီတုန်း... မင်း မိစ္ဆာမ"
သို့သော် ထိုအော်ဟစ်သံမှာ မကြာမီမှာတင် ချက်ချင်း ရပ်တန့်သွားခဲ့ရသည်။
"အစ်ကိုကြီး ဝမ်... မင်းရဲ့ ခြေအိတ်အနံဆိုးတွေကို ချွတ်လိုက်ဦး။ ဒီကောင်က ပါးစပ် သိပ်သန်တာ ငါ့ခြေအိတ် တစ်စုံတည်းနဲ့တင် မလုံလောက်ဘူး ဖြစ်နေတယ်"
ထိုအချိန်မှစ၍ ယွီရှောင်ကန်း၏ ခေတ္တ ရပ်တန့်နေခဲ့သော ငရဲဘဝ ခရီးစဉ်ကြီးမှာ အသစ်တစ်ဖန် ပြန်လည် စတင်သွားခဲ့ရတော့သည်။
ညနေခင်း၏ အေးမြသော လေပြေလေး ဖြတ်သန်း တိုက်ခတ်နေစဉ် ဘီဘီတုန်းသည် ဥယျာဉ်၏ လှေကားထစ်ပေါ်တွင် ထိုင်ကာ အေးစက်လှသော နံရံကို မှီ၍ ကောင်းကင်ယံက တောက်ပနေသော လမင်းကြီးကို မော့ကြည့်နေခဲ့သည်။
"အစ်ကို ဖူယဲ့... ကျွန်မ နောက်ဆုံးတော့ အစ်ကို့အတွက် ကလဲ့စားချေတာကို စတင်နိုင်ခဲ့ပြီ။ သူ သေချင်စိတ် ပေါက်လာအောင် ကျွန်မ လုပ်ဆောင်ပေးမယ် ပြီးရင် ယွီရှောင်ကန်းရဲ့ အကြောတွေကို တစ်ခုချင်းစီ ဖြတ်ပစ်ပြီး သူ့ရဲ့ အသားတွေကို တစ်စစီ လှီးဖြတ်ကာ သူ့ရှေ့တင် လမ်းဘေးခွေးတွေကို ကျွေးပစ်မယ်"
ဘီဘီတုန်းက ဥယျာဉ်ထဲတွင် တစ်ယောက်တည်း ရေရွတ်နေခဲ့ပြီး တစ်ချိန်တည်းမှာပင် နင်းဖုန်းကျိသည် သူ၏ တပည့် ဖြစ်သူ၏ အခြေအနေအပေါ် သိပ်ပြီး အားမရဘဲ ဖြစ်နေသည်။
ဘာပဲဖြစ်ဖြစ် ဖူယဲ့ သေဆုံးသွားခဲ့တာ တစ်နှစ်ခန့် ရှိပြီ ဖြစ်သော်လည်း ဘီဘီတုန်းကတော့ ယခုတိုင်အောင် ဝမ်းနည်းပူဆွေးမှုထဲကနေ ရုန်းမထွက်နိုင်သေးချေ။
သို့သော် ကံကောင်းထောက်မစွာဖြင့် သူမ၏ ကျင့်ကြံခြင်း အဆင့်အတန်းက ကျဆင်းသွားခြင်း မရှိဘဲ ခြောက်လအတွင်းမှာတင် အဆင့် ၆၅ ဝိညာဉ်ဧကရာဇ် မှ အဆင့် ၆၈ သို့ ရောက်ရှိသွားခဲ့သည်။ ဤကဲ့သို့သော ပါရမီမျိုးကို ကြည့်ပြီး သူကိုယ်တိုင်ပင် အံ့အားသင့်ရသည်။