အခန်း (၉၂) တောမီးက လောင်ကျွမ်းလို့ မပြတ်၊ နွေဦးလေက ပြန်လည်ရှင်သန်စေတယ်
ငွေပြာ တောအုပ်။
ရုတ်တရက် ကောင်းကင်ယံတွင် အက်ကွဲကြောင်း တစ်ခု ပေါ်လာပြီး လက်ဝါးအရွယ်အစားရှိကာ ပြင်းထန်သော သက်စောင့်စွမ်းအားများကို ထုတ်လွှတ်နေသည့် မြစိမ်းရောင် မျိုးစေ့တစ်စေ့ အက်ကွဲကြောင်းထဲမှ ထွက်ပေါ်လာခဲ့၏။
ဤ မြစိမ်းရောင် မျိုးစေ့သည် သက်စောင့် နတ်ဘုရားမ ဖန်တီးလိုက်သော သက်စောင့် မျိုးစေ့ပင်။
သက်စောင့် မျိုးစေ့သည် လေဟာနယ် အက်ကွဲကြောင်းမှ ထွက်လာပြီး တောအုပ်ထဲသို့ ဖြည်းညင်းစွာ ဆင်းသက်လာကာ မြေပြင်ပေါ်တွင် လဲလျောင်းနေသော လုချန်ကို ရှာတွေ့ပြီးနောက် သူ၏ ခန္ဓာကိုယ်ထဲသို့ ဝင်ရောက်သွားခဲ့သည်။
ချက်ချင်းဆိုသလိုပင် အဆုံးမဲ့ သက်စောင့်စွမ်းအား များက လုချန်၏ ခန္ဓာကိုယ် တစ်လျှောက် ပျံ့နှံ့သွားပြီး သူ၏ ခြေလက်များ၊ အရိုးများနှင့် အတွင်းကလီစာများထဲသို့ ပေါင်းစပ်သွားခဲ့သည်။
ပျက်စီးနေသော အရိုးများ၊ သွေးကြောလမ်းကြောင်းများ၊ ကြွက်သားများနှင့် အရေပြားများ... အားလုံးက ထို သက်စောင့်စွမ်းအား၏ အာဟာရ ဖြည့်တင်းမှုအောက်တွင် ဆယ်ဆ ပိုမိုမြန်ဆန်စွာ ပြန်လည် ကောင်းမွန်လာခဲ့လေသည်။
သက်စောင့် မျိုးစေ့သည် လုချန်၏ ခန္ဓာကိုယ်အနှံ့ လှည့်လည်သွားလာပြီး နောက်ဆုံးတွင် သူ၏ ဒန်ထျန်းသို့ ရောက်ရှိလာကာ သူ၏ ဝိညာဉ်စွမ်းအား များကို စုပ်ယူပြီး သန့်စင်လေတော့သည်။
ဤ သက်စောင့် မျိုးစေ့က သန့်စင်လိုက်သော ဝိညာဉ်စွမ်းအားက သန့်စင်ခံလိုက်ရသကဲ့သို့ ဖြစ်သွားပြီး ၎င်း၏ သန့်စင်မှုကို ကြီးမားစွာ တိုးမြှင့်ပေးရုံသာမက သက်စောင့်စွမ်းအား အရိပ်အယောင် လေးတစ်ခုကိုပါ ရရှိသွားခဲ့သည်။
ကွာခြားချက် တချို့ကို ထောက်ပြရမယ်ဆိုရင်...
အရင် ဝိညာဉ်စွမ်းအားက သာမန် ဝိညာဉ်စွမ်းအား သက်သက်ပင်။
အခု ဝိညာဉ်စွမ်းအားကိုတော့ သက်စောင့် ဝိညာဉ်စွမ်းအားလို့ ခေါ်လို့ရပေသည်။
သက်စောင့် မျိုးစေ့မှတစ်ဆင့် သန့်စင်ထားသော ဤ သက်စောင့် ဝိညာဉ်စွမ်းအားများက သူ၏ ငွေပြာအင်ပါယာ ဝိညာဉ်နှင့် ပေါင်းစပ်သွားပြီး သူ၏ ငွေပြာအင်ပါယာ ဝိညာဉ်ကို နောက်ထပ် ဆင့်ကဲပြောင်းလဲမှု စတင်ရန် လှုံ့ဆော်ပေးခဲ့သည်။
ငွေပြာအင်ပါယာ၏ သက်စောင့် သဘာဝသည် အမြင့်မြတ်ဆုံး သက်စောင့် သဘာဝအဖြစ်သို့ ဆင့်ကဲပြောင်းလဲနေပြီ ဖြစ်သည်။
တစ်ရက်ခန့် အကြာတွင် လုချန်သည် နှစ်နှစ်ခြိုက်ခြိုက် အိပ်မောကျနေရာမှ ဖြည်းညင်းစွာ နိုးလာခဲ့သည်။
ဤသည်မှာ သက်စောင့် မျိုးစေ့၏ ကျေးဇူးကြောင့်ပင်။ မဟုတ်ပါက သူ၏ ခန္ဓာကိုယ် ပျက်စီးမှုများ လုံးဝ ပြန်လည် ကောင်းမွန်လာစေရန် သူဟာ အနည်းဆုံး ဆယ်ရက်ခန့် အိပ်စက်ရန် လိုအပ်ပေမည်။
သက်စောင့် မျိုးစေ့ကြောင့် လုချန်၏ ခန္ဓာကိုယ်က တစ်ရက်တည်းဖြင့် အထွတ်အထိပ် အခြေအနေသို့ ပြန်လည် ရောက်ရှိသွားခဲ့၏။
လုချန် မျက်လုံးဖွင့်လိုက်ပြီး မြေပြင်မှ ထကာ လက်မောင်းများကို ဆန့်တန်းပြီး အားပါးတရ သမ်းဝေလိုက်လေသည်။
“အာ... အိပ်လို့ အရမ်း ကောင်းတာပဲ..”
“ငါ သတိလစ်မသွားခင်တုန်းက ငါ့ရဲ့ မွေးရာပါ ဝိညာဉ်ကွင်းက အောင်မြင်စွာ ဖန်တီးပြီးသွားပြီ... ပြီးတော့ သူ့သက်တမ်းက နှစ် ၁၉၀,၀၀၀ တောင် ရှိတယ်ဆိုတာ မှတ်မိသေးတယ်”
စကားပြောပြီးသည်နှင့် လုချန် ၏ မျက်လုံးများ တောက်ပလာပြီး ဝိညာဉ်ကို ဆင့်ခေါ်လိုက်လေသည်။
အမြစ်များ၊ ပင်စည်များနှင့် အရွက်များပေါ်တွင် ရွှေရောင် ပုံစံများ ဖုံးလွှမ်းနေသော ကြည်လင်တောက်ပသည့် ငွေပြာအင်ပါယာတစ်ပင်က သူ့ရှေ့ရှိ လေထဲမှ ရုတ်တရက် ထွက်ပေါ်လာခဲ့သည်။
ခရမ်း၊ ခရမ်း၊ ခရမ်း၊ အနက်၊ အနက်၊ အနက်၊ အနက်၊ အနီ၊ အနီ။
ဝိညာဉ်ကွင်းပေါင်းစပ်မှုဖြစ်သော ခရမ်း သုံးကွင်း၊ အနက် လေးကွင်းနှင့် အနီ နှစ်ကွင်းမှာ တကယ်ကို အံ့မခန်းပင်။
အထူးသဖြင့် သူ၏ မွေးရာပါ ဝိညာဉ်ကွင်းဖြစ်သော အနီရောင် နဝမဝိညာဉ်ကွင်း၏ သက်တမ်းမှာ နှစ် ၁၉၀,၀၀၀ ဖြစ်သည်။
လုချန် တစ်ခဏမျှ အာရုံခံလိုက်ပြီးနောက် အသံထွက်၍ ရယ်မောလိုက်၏။
“ဟားဟားဟား... ငွေပြာအင်ပါယာရဲ့ အမြင့်ဆုံး လျှို့ဝှက်ချက် နည်းစနစ်ဖြစ်တဲ့ တောမီးက လောင်ကျွမ်းလို့ မပြတ်၊ နွေဦးလေက ပြန်လည်ရှင်သန်စေတယ်ဆိုတဲ့ စွမ်းရည်ကို နောက်ဆုံးတော့ ငါ ရသွားပြီ”
“နာမည်က ငွေပြာအင်ပါယာ ညာဘက် ခြေထောက်အရိုးရဲ့ စွမ်းရည် နာမည်နဲ့ တူပေမဲ့ အကျိုးသက်ရောက်မှုတွေကတော့ လုံးဝ ကွာခြားတယ်”
“ငွေပြာအင်ပါယာ ညာဘက် ခြေထောက်အရိုးရဲ့ တောမီးက လောင်ကျွမ်းလို့ မပြတ်၊ နွေဦးလေက ပြန်လည်ရှင်သန်စေတယ်ဆိုတာက အလွန်ဆုံး ကုသရေး စွမ်းရည် သက်သက်ပဲ။ ထန်စန်း ဘွဲ့ခံတိုလော ဖြစ်လာပြီးတဲ့နောက်မှာတောင် ဒီစွမ်းရည်ရဲ့ အစွမ်းအထက်ဆုံး ကုသရေး အကျိုးသက်ရောက်မှုက သူ့အဖေ ထန်ဟောက်ရဲ့ ပြတ်နေတဲ့ ခြေလက်တွေကို ပြန်လည် မွေးဖွားပေးတာပဲ”
“ဒါပေမဲ့ ငါ့ရဲ့ တောမီးက လောင်ကျွမ်းလို့ မပြတ်၊ နွေဦးလေက ပြန်လည်ရှင်သန်စေတယ်ဆိုတာက တကယ့် ပြန်လည်ရှင်သန်ခြင်း နတ်ဘုရား စွမ်းရည်ပဲ။ ငါ အသတ်ခံရပြီး ငါ့ရဲ့ ဝိညာဉ် လွင့်စဉ်သွားရင်တောင် ဒီတိုက်ကြီးပေါ်မှာ ငွေပြာမြက်ပင်တွေ ရှိနေသရွေ့ သူတို့က ငါ့ရဲ့ ဝိညာဉ်ကို ပြန်လည် စုစည်းပေးပြီး ခန္ဓာကိုယ်ကိုပါ ပြန်လည် တည်ဆောက်ပေးလိမ့်မယ်။ အဲဒါက ငါ့ကို ၄၉ ရက် အကြာမှာ ပြန်လည် ရှင်သန်စေပြီး အထွတ်အထိပ် အခြေအနေကို တိုက်ရိုက် ပြန်ရောက်သွားစေလိမ့်မယ်”
“အခု ငါက တကယ့် ငွေပြာအင်ပါယာဖြစ်သွားပြီ။ ငါ မသေချင်သရွေ့ ဒီလောကမှာ ဘယ်သူကမှ ငါ့ကို တကယ် သတ်လို့ မရတော့ဘူး”
လုချန် ဘယ်လိုလုပ် မပျော်ဘဲ နေနိုင်မည်နည်း။
သူ အလိုချင်ဆုံး ဖြစ်ခဲ့တဲ့ ပြန်လည်ရှင်သန်ခြင်း စွမ်းရည်ကို နောက်ဆုံးတော့ သူ ရရှိခဲ့အေပြီ။ အခုတော့ သူ တိုက်ကြီးပေါ်မှာ စိတ်အေးချမ်းသာစွာ သွားလာနိုင်ပေပြီ။
နတ်ဘုရားတွေ ဝင်ရောက် စွက်ဖက်တာမျိုး မဟုတ်ရင် ဒီလောကမှာ ဘယ်ဝိညာဉ်သခင်ကမှ လုချန် ကို တကယ် သတ်လို့ မရနိုင်တော့ချေ။
ခဏလောက် ရယ်မောပြီးနောက် လုချန်သည် သူ၏ နဝမ ဝိညာဉ်စွမ်းရည်တွင် ဖျက်ဆီး၍မရနိုင်ခြင်းနှင့် အမြဲတမ်း ပြန်လည်ရှင်သန်ခြင်းတို့အပြင် အခြား စွမ်းရည် တစ်ခု ရှိသေးကြောင်း တွေ့လိုက်ရ၏။
ငွေပြာ အရှင်သခင်။
ဤစွမ်းရည်၏ အကျိုးသက်ရောက်မှုက လုချန်ကိုပင် အံ့အားသင့်သွားစေခဲ့သည်။
“ငွေပြာ အရှင်သခင်က အပင်ဝိညာဉ်သားရဲတွေနဲ့ သူတို့ရဲ့ ပိုင်ရှင်တွေ အားလုံးကို ဖိနှိပ်နိုင်တယ်။ ကိုယ့်ရဲ့ စိတ်ပိုင်းဆိုင်ရာ စွမ်းအားက တစ်ဖက်လူထက် ပိုများနေရင် သူတို့ရဲ့ ဆန္ဒကို အတင်းအဓမ္မ ပြောင်းလဲပစ်နိုင်ပြီး သူတို့ကို လုံးဝ အညံ့ခံလာအောင် လုပ်နိုင်တယ်”
“ဘယ်လောက်တောင် အစွမ်းထက်တဲ့ စွမ်းရည်လဲ... ဒီလို စွမ်းရည်မျိုးနဲ့ဆိုရင် ငါ့ရဲ့ ငွေပြာအင်ပါယာ ဝိညာဉ်က တကယ့် အင်ပါယာလို့ ခေါ်လို့ ရသွားပြီ”
“ကိုယ့်ရဲ့ စိတ်ပိုင်းဆိုင်ရာ စွမ်းအားက တစ်ဖက်လူထက် ပိုများနေရင် သူတို့ရဲ့ ဆန္ဒကို အတင်းအဓမ္မ ပြောင်းလဲပစ်နိုင်တယ်...”
မျက်လုံးတစ်ချက် လက်သွားပြီးနောက် လုချန်သည် ဤစွမ်းရည်ကို ဘယ်သူ့အပေါ် အသုံးပြုသင့်လဲဆိုတာကို ချက်ချင်း သိသွားခဲ့သည်။
ထို့နောက် လုချန်သည် ဝိညာဉ်ကို ပြန်ရုပ်သိမ်းလိုက်ရာ သူ၏ ဝိညာဉ်ကွင်းကိုးခုမှာ လေဟာနယ်ထဲသို့ ပျောက်ကွယ်သွားခဲ့လေသည်။
ထို့နောက် သူ၏ ကိုယ်ပိုင် ဝိညာဉ်စွမ်းအားကို အာရုံခံလိုက်၏။
“ဝိညာဉ်စွမ်းအား အဆင့် ၉၁ နဲ့တင် ငါက မွေးရာပါ ဝိညာဉ်ကွင်းတစ်ခုကို ဖန်တီးနိုင်ခဲ့ပြီ။ ငါ့အတွက် အသင့်တော်ဆုံး စွမ်းရည်ကို ရခဲ့တယ်ဆိုပေမဲ့ အဲဒါက ဝိညာဉ်ကွင်းကို စုပ်ယူတဲ့အခါ ပါလာတဲ့ ဝိညာဉ်စွမ်းအား အပိုဆုကိုတော့ မပေးဘူးပဲ”
“ဘာပဲဖြစ်ဖြစ် ဝိညာဉ်စွမ်းအား အဆင့် ၉၁ဆိုလည်း ၉၁ ပေါ့။ ငါ့ရဲ့ ကျင့်ကြံခြင်း အမြန်နှုန်းက မြန်ပြီးသားပဲ။ ပြီးတော့ ငါ့မှာ ငွေပြာအင်ပါယာဝိညာဉ် ရှိတယ်။ ငါ နဝမ ဝိညာဉ်ကွင်းအဆင့်ကို ရောက်တာနဲ့ ဒုတိယ ဝိညာဉ်ဖြစ်တဲ့ သံမဏိတံစဉ်ကို စပြီး ကျင့်ကြံ လို့ ရပြီ”
“သဟဇာတဖြစ်တဲ့ သဘာဝတွေ ရှိတဲ့ အစွမ်းထက်တဲ့ ဝိညာဉ်ကွင်းကိုးခုကို စုပ်ယူလိုက်တာနဲ့ ငါ့ရဲ့ ဝိညာဉ်စွမ်းအားက သဘာဝကျကျ လျင်မြန်စွာ တိုးတက်လာမှာပဲ။ ဝိညာဉ်စွမ်းအား အဆင့် ၉၉ကို ထိုးဖောက်ဝင်ရောက်ဖို့ ဆိုတာ အချိန်ပြဿနာ တစ်ခုပဲ ဖြစ်သွားမှာပါ”
ထိုအချိန်မှာပင် လုချန်သည် ရုတ်တရက် ရပ်တန့်သွားခဲ့ရသည်။ သူ အရင်က သတိမထားမိခဲ့သော်လည်း ယခု သူ၏ ဝိညာဉ်စွမ်းအားကို အာရုံခံလိုက်သောအခါ သူ၏ ဒန်ထျန်းထဲတွင် ဘယ်အချိန်ကတည်းက ရောက်နေမှန်း မသိသော တောက်ပသည့် အစိမ်းရောင် မျိုးစေ့ တစ်စေ့ကို တွေ့လိုက်ရ၏။
လက်သီးဆုပ်ခန့် အရွယ်အစားရှိသော မြစိမ်းရောင် မျိုးစေ့သည် ပြင်းထန်သော သက်စောင့်စွမ်းအား များကို ထုတ်လွှတ်နေပြီး သူ၏ ဝိညာဉ်စွမ်းအားများကို စုပ်ယူကာ သန့်စင်ပေးနေခဲ့သည်။
လုချန် ၏ စိတ်ထဲတွင် မေးခွန်းများဖြင့် ပြည့်နှက်သွားခဲ့ရသည်။
“ဒါက ဘာကြီးလဲ။ ငါ သတိလစ်မသွားခင်တုန်းက ဘာမှ မသိခဲ့ရပါလာ..”
“ဒါမှမဟုတ် ငါက ဘွဲ့ခံတိုလောအဆင့်ကို ထိုးဖောက်ဝင်ရောက် သွားလို့ ဝိညာဉ်စွမ်းအား ကိုယ်တိုင်က ဖန်တီးလိုက်တဲ့ ဝိညာဉ်အူတိုင် တစ်ခု များလား”
သတိထားမှုနှင့် စူးစမ်းလိုစိတ်များ ရောနှောကာ လုချန်သည် သူ၏ စိတ်ပိုင်းဆိုင်ရာ စွမ်းအားကို ဆွဲထုတ်ပြီး ဒန်ထျန်းထဲသို့ ထည့်သွင်းကာ မြစိမ်းရောင် မျိုးစေ့ နှင့် စတင် ထိတွေ့လိုက်လေသည်။
သူ၏ စိတ်ပိုင်းဆိုင်ရာ စွမ်းအားက မြစိမ်းရောင် မျိုးစေ့ နှင့် ထိတွေ့လိုက်သည်နှင့် မြင်ကွင်း တစ်ခု သူ၏ မျက်စိရှေ့တွင် ပေါ်လာခဲ့၏။
၎င်းမှာ ကျယ်ပြောပြီး ထူထပ်သော တောအုပ်ကြီး တစ်ခုဖြစ်ပြီး ထိုတောအုပ်၏ အလယ်ဗဟိုတွင် ကောင်းကင်ယံသို့ ထိုးထွက်နေသော ရှေးဟောင်း သစ်ပင်ကြီး တစ်ပင် ရှိနေခဲ့သည်။ ၎င်း၏ သစ်ကိုင်းများနှင့် သစ်ရွက်များမှာ အလွန် ထူထပ်လှသဖြင့် နေရောင်ကိုပင် ကွယ်ထားနိုင်ပေသည်။
လုချန် ချက်ချင်း ထိတ်လန့်သွားပြီးနောက် တောအုပ်နှင့် ရှေးဟောင်း သစ်ပင်ကြီး အကြောင်း သတင်းအချက်အလက်များ သူ၏ စိတ်ထဲတွင် ပေါ်လာခဲ့သည်။
“သက်စောင့် တောအုပ်.. ရှေးဟောင်း သက်စောင့် သစ်ပင်ကြီး... သက်စောင့် နတ်ဘုရားမ”
လုချန်သည် ဤ မျိုးစေ့၏ မူလအစကို သဘောပေါက်သွားခဲ့သည်။
“ငါ ဘွဲ့ခံတိုလောအဆင့်ကို ထိုးဖောက်ဝင်ရောက်တဲ့အချိန်မှာ သက်စောင့် နတ်ဘုရားမက ငါ့ကို သတိထားမိသွားတာပဲ။ သက်စောင့် သဘာဝကို ကျင့်ကြံ တဲ့သူတွေအတွက် ဆုလာဘ်အနေနဲ့ သက်စောင့် နတ်ဘုရားမက သက်စောင့် မျိုးစေ့ကို ဖန်တီးပြီး ငါ့ခန္ဓာကိုယ်ထဲကို ထည့်ပေးလိုက်တာ”
လုချန်၏ မျက်လုံးများ ကျဉ်းမြောင်းသွားပြီး နက်ရှိုင်းသော ကြောက်ရွံ့လေးစားမှု တစ်ခုကို ခံစားလိုက်ရ၏။
ကူးပြောင်းလာသူ တစ်ဦးအနေဖြင့် သူသည် ဝိညာဉ်ကုန်းမြေကမ္ဘာ၏ နတ်ဘုရားများကို အစပိုင်းတွင် အနည်းငယ် အထင်သေးခဲ့မိသည်။ အဘယ်ကြောင့်ဆိုသော် တချို့ နတ်ဘုရားများ၏ စွမ်းဆောင်ရည်မှာ အတော်လေး ညံ့ဖျင်းသောကြောင့်ပင်။
ဥပမာအားဖြင့် ပင်လယ်နတ်ဘုရား၏ သုံးခွခက်ရင်း ခွသည် အလေးချိန် ၁၀၈,၀၀၀ဂျင်သာ ရှိသဖြင့် သူ့အတွက် မြို့တစ်မြို့ကိုတောင် ဖျက်ဆီးဖို့ ခက်ခဲလှပေသည်။
(၁ ဂျင် = ၀.၅ ကီလိုဂရမ် ဝန်းကျင်)
အခုကြည့်ရတာ သူ အဲဒီလို လွယ်လွယ်တွေးခဲ့လို့ မရဘူးပဲ။
လောက၏ အမြင့်မြတ်ဆုံး ဖြစ်တည်မှုအနေဖြင့် ဝိညာဉ်ကုန်းမြေတိုက်ကြီး၏ နတ်ဘုရားများတွင် သူတို့၏ ထူးခြားချက်များရှိနေဆဲ ဖြစ်သည်။
သက်စောင့် နတ်ဘုရားမသည် တိုင်းတာ၍မရနိုင်သော အကွာအဝေးမှ သူ၏ တည်ရှိမှုကို အာရုံခံနိုင်ခဲ့ပြီး ဆုလာဘ်အနေဖြင့် သူ့ကို သက်စောင့် မျိုးစေ့ တစ်စေ့ ပေးခဲ့၏။
အကယ်၍ သူတို့က ဒီလို နည်းလမ်းကို သုံးပြီး သူ့ကို ရင်ဆိုင်ချင်တယ်ဆိုရင် သိပ်တော့ ခက်ခဲမှာ မဟုတ်ဘူး ထင်တယ်။
လုချန်၏ ရင်ထဲတွင် ဗြောင်းဆန်နေခဲ့ပြီး တည်ငြိမ်သွားရန် အချိန်အတော်ကြာ ယူခဲ့ရသည်။
“ဖြစ်လာမယ့် အရာက ဖြစ်လာမှာပဲလေ..”
“ဒီ သက်စောင့်မျိုးစေ့က ငါ့ကို ဘယ်လို အကျိုးကျေးဇူးတွေ ပေးနိုင်မလဲ ဆိုတာ ကြည့်ရအောင်...”
လုချန်သည် ဤ သက်စောင့် မျိုးစေ့ကို စတင် လေ့လာလိုက်လေသည်။
တဖြည်းဖြည်းနှင့် ဤ သက်စောင့်မျိုးစေ့က ဝိညာဉ် အူတိုင်တစ်ခုနှင့် ဆင်တူသော အကျိုးသက်ရောက်မှု ရှိကြောင်း တွေ့ရှိလာခဲ့သည်။ ၎င်းသည် ဝိညာဉ်စွမ်းအားကို တစ်နေ့ ၂၄ နာရီလုံး အဆက်မပြတ် သန့်စင်ပေးနိုင်ပြီး သူ၏ ကျင့်ကြံခြင်း အမြန်နှုန်းကို တိုးမြှင့်ပေးနိုင်သည်။ ထို့အပြင် သန့်စင်ထားသော ဝိညာဉ်စွမ်းအားက ပြင်းထန်သော သက်စောင့်စွမ်းအား ပါဝင်သည့် အထူး ဝိညာဉ်စွမ်းအား တစ်မျိုးအဖြစ် ပြောင်းလဲသွားနိုင်လေသည်။
သူ၏ ဝိညာဉ်က ဤ ဝိညာဉ်စွမ်းအားကို စုပ်ယူပြီးနောက် ၎င်းသည် ဆက်လက် ဆင့်ကဲပြောင်းလဲလာပြီး ၎င်း၏ သက်စောင့် သဘာဝက ပိုမို သန့်စင်လာခဲ့သည်။
လုချန်၏ မျက်လုံးများ တောက်ပလာခဲ့လေသည်။
ဒါက သတင်းကောင်းပဲ... လုံးဝကို သတင်းကောင်းပဲ..
သက်စောင့် နတ်ဘုရားမ၏ နိယာမ များ ပါဝင်သော ဤ သက်စောင့်မျိုးစေ့သည် ဤလောကရှိ အခြေခံအကျဆုံး သက်စောင့်စွမ်းအားပင်။
အကယ်၍ သူသာ ၎င်းကို အပြည့်အဝ နားလည်နိုင်ပါက သူသည် အမြင့်မြတ်ဆုံး သက်စောင့် သဘာဝကို ကျွမ်းကျင်နိုင်မည် ဖြစ်သည်...