အခန်း (၇၅) မြေနဂါး ချပ်ဝတ်သားရဲ

ရေခဲမီးလျှံရေပူစမ်းက တကယ်ကို ကောင်းမွန်သော နေရာတစ်ခုပင်။

ဤနေရာရှိ ထူးခြားစွာ များပြားလှသော ရေခဲနှင့် မီး စွမ်းအင်များက လုချန်အတွက် သူ၏ ဝိညာဉ်စွမ်းအားကို လျင်မြန်စွာ မြှင့်တင်နိုင်သည့် သုခဘုံတစ်ခုကဲ့သို့ ဖြစ်နေခဲ့၏။

လုချန်က အသက်ရှူရုံဖြင့် စွမ်းအင်များကို စုပ်ယူနိုင်ပြီး ဤ ရေခဲမီးလျှံရေပူစမ်းအတွင်းတွင် ကျင့်ကြံခြင်းအရှိန်ကို နှစ်ဆ တိုးစေနိုင်သော သဘာဝ အားသာချက် တစ်ခု ရှိနေခဲ့သည်။

အကယ်၍ သူသာ ကျင့်ကြံခြင်း တရားထိုင်မှုကို တက်ကြွစွာ ပြုလုပ်မည်ဆိုပါက ကျင့်ကြံခြင်း၏ ထိရောက်မှုသည် နောက်ထပ် နှစ်ဆ ထပ်မံ တိုးလာနိုင်ပြီး ကျင့်ကြံခြင်း အရှိန် လေးဆအထိ ရောက်ရှိနိုင်လေသည်။

ကျင့်ကြံခြင်း အရှိန်လေးဆ။

ယင်းက လုချန်ကို ကျင့်ကြံခြင်း လုပ်ငန်းစဉ်အတွင်း သူ၏ ဝိညာဉ်စွမ်းအား အဆက်မပြတ် တိုးပွားနေသည်ကို ရှင်းလင်းစွာ သိမြင်ခံစားနိုင်စေခဲ့သည်။ ဤခံစားချက်မှာ အလွန် သာယာဖွယ်ကောင်းလှသဖြင့် သူသည် သတိမထားမိဘဲ ၎င်းထဲတွင် နစ်မြုပ်သွားခဲ့ပြီး တစ်နေ့တာ၏ တစ်ဝက်ခန့်ကို ကျင့်ကြံခြင်း တွင် ကုန်ဆုံးခဲ့သည်။

အချိန်တိုအတွင်းမှာပင် နှစ်လ ကုန်လွန်သွားခဲ့လေသည်။

လုချန်၏ ဝိညာဉ်စွမ်းအားမှာ ကြီးမားစွာ တိုးတက်လာခဲ့ပြီး အဆင့် ၇၅ မှ အဆင့် ၇၆သို့ ရောက်သွားခဲ့သည်။

ဤသည်မှာ ဝိညာဉ်သူတော်စင်အဆင့်တွင် ဝိညာဉ်စွမ်းအားတစ်ဆင့် တိုးလာခြင်းပင်။ အခြားသော ဝိညာဉ်သူတော်စင်များသည် ခြောက်လ သို့မဟုတ် တစ်နှစ်ခန့် ကျင့်ကြံခြင်း ပြုလုပ်လျှင်ပင် သူတို့၏ ဝိညာဉ်စွမ်းအားကို တစ်ဆင့် တိုးမြှင့်နိုင်မည် မဟုတ်ပေ။

လုချန်သည် နှစ်လတည်းဖြင့် သူ၏ ဝိညာဉ်စွမ်းအား ကို တစ်ဆင့် တိုးမြှင့်နိုင်ခဲ့ခြင်းမှာ အလွန် မြန်ဆန်သော ကျင့်ကြံခြင်းအရှိန် ဖြစ်လေသည်။

လုချန်အပြင် တူကူရန်လည်း ရှိသေးသည်။ သူမသည် လွန်ခဲ့သော နှစ်လအတွင်း ကျင့်ကြံခြင်းတွင် အလွန် ကြိုးစားခဲ့ပြီး သူမ၏ ဝိညာဉ်စွမ်းအားကို တစ်ဆင့် တိုးမြှင့်ရန် အောင်မြင်ခဲ့သည်။

သူမ၏ ဝိညာဉ်စွမ်းအားကို အဆင့် ၄၉ မှ အဆင့် ၅၀ သို့ တိုးမြှင့်နိုင်ခဲ့လေသည်။

သူမသည် ဝိညာဉ်ဘုရင် ဖြစ်လုနီးပါး အဆင့်သို့ ရောက်ရှိသွားခဲ့သည်။

ဝိညာဉ်ကွင်းတစ်ခုကို စုပ်ယူလိုက်ရုံဖြင့် သူမသည် ဝိညာဉ်ဘုရင် ဖြစ်လာနိုင်ပြီး အသက် ဆယ့်ခြောက်၊ ဆယ့်ခုနစ်နှစ်အရွယ် ဝိညာဉ်ဘုရင်တစ်ဦး ဖြစ်လာမည် ဖြစ်၏။

တူကူပိုသည် အလွန်ဝမ်းသာသွားပြီး သူမနှင့် သင့်တော်မည့် ပဉ္စမ ဝိညာဉ်ကွင်းကို ရှာဖွေရန် တူကူရန်ကို ခေါ်ဆောင်သွားခဲ့သည်။ သေချာသည်မှာ လုချန်လည်း လိုက်ပါသွားမည် ဖြစ်သည်။

နေဝင်ချိန် တောအုပ်။

တူကူပို၊ လုချန်နှင့် တူကူရန်တို့သည် မြူဖုံးနေသော တောအုပ်ထဲတွင် ဖြည်းညှင်းစွာ လျှောက်သွားနေကြပြီး လုံးဝ သတိမထားနေကြပုံ ရသည်။

တူကူပို၏ အရင်းအမြစ်များနှင့် ဘွဲ့ခံတိုလော၏ ခွန်အားအရ သတိထားနေရန် တကယ်ကို မလိုအပ်ပေ။ နေဝင်ချိန်တောအုပ်ရှိ ဝိညာဉ်သားရဲများသည် အဝေးဆုံးသို့ ထွက်ပြေးကြရမည်ဖြစ်ပြီး သူတို့ကို အရင်စတင် တိုက်ခိုက်ရဲမည် မဟုတ်ချေ။

ထို့အပြင် လုချန်လည်း ရှိသေးသည်။ ငွေပြာနယ်ပယ် ကို ဖြန့်ကြက်လိုက်သည်နှင့် ဤတောအုပ်ထဲရှိ ငွေပြာမြက်ပင်များ အားလုံးသည် သူ၏ မျက်စိနှင့် နားများအဖြစ် လိုလိုလားလား ဖြစ်လာကြပေမည်။

သူတို့ပတ်ဝန်းကျင်ရှိ အနည်းငယ်သော လှုပ်ရှားမှုများကိုပင် တောအုပ်ထဲတွင် ဖုံးလွှမ်းနေသော ငွေပြာမြက်ပင်များက ချက်ချင်း ထောက်လှမ်းနိုင်မည် ဖြစ်၏။

သူတို့ သုံးယောက်အတွက် ယခု အရေးအကြီးဆုံးအရာမှာ တူကူရန်၏ ပဉ္စမ ဝိညာဉ်ကွင်း ရွေးချယ်မှုအကြောင်း ဆွေးနွေးရန်ပင်။

တူကူပိုက သူ၏ အတွေ့အကြုံကို မျှဝေလိုက်သည်။

“ငါ့ရဲ့ ပဉ္စမ ဝိညာဉ်ကွင်းက ကောင်းကင် ကင်းခြေများလို့ခေါ်တဲ့ နှစ်တစ်သောင်း သက်တမ်းဝိညာဉ်သားရဲ ဆီက ရတာ။ ကောင်းကင်ကင်းခြေများက အရမ်း အဆိပ်ပြင်းပြီး ဖျက်ဆီးလို့မရနိုင်တဲ့ အခွံ ရှိတယ်။ ဒီစွမ်းရည်နှစ်ခုနဲ့တင် ကောင်းကင်ကင်းခြေများက နှစ်တစ်သောင်း သက်တမ်း ဝိညာဉ်သားရဲတွေထဲမှာ သောင်းကျန်းပြီး လွှမ်းမိုးနိုင်တဲ့ တည်ရှိမှုတစ်ခု ဖြစ်နေတာ”

“ငါ ကောင်းကင်ကင်းခြေများရဲ့ ဝိညာဉ်ကွင်းကို စုပ်ယူလိုက်တဲ့အခါ အဲဒါက ငါ့ ဝိညာဉ်ရဲ့ အဆိပ်တွေကို ကြီးမားစွာ တိုးမြှင့်ပေးရုံသာမကဘဲ မြစိမ်းရောင် ကောင်းကင် ကင်းခြေများ ဒိုင်းလွှားလို့ခေါ်တဲ့ ကာကွယ်ရေး ဝိညာဉ်စွမ်းရည်တစ်ခုကိုပါ ပေးခဲ့တယ်”

“ဒီစွမ်းရည်က အရမ်း အသုံးဝင်တယ်။ ရန်သူတွေ တိုက်ခိုက်တဲ့အချိန်မှာ သေစေနိုင်တဲ့ ဒဏ်ရာတွေကနေ အကြိမ်များစွာ ကယ်တင်ပေးခဲ့တယ်”

“ယန်ယန်... မင်းရဲ့ ပဉ္စမ ဝိညာဉ်ကွင်းအတွက် လိုအပ်တဲ့ ဝိညာဉ်သားရဲအနေနဲ့ နှစ်တစ်သောင်း သက်တမ်း ကောင်းကင်ကင်းခြေများ ကို ရွေးချယ်လိုက်ရင်ရော ဘယ်လိုလဲ”

မြစိမ်းရောင် မြွေမျိုးဆက်မှ ဘွဲ့ခံတိုလောတစ်ဦးအနေဖြင့် တူကူပို၏ အတွေ့အကြုံများမှာ အလွန် တန်ဖိုးရှိပြီး တူကူရန် အနေဖြင့် အလေးအနက် ကိုးကားရန် ထိုက်တန်ပေသည်။

တူကူရန်က ဤအကြံပြုချက်ကို အလေးအနက် စဉ်းစားနေခဲ့သည်။

လုချန်က ဤအချိန်တွင် ဝင်ပြောလိုက်၏။

“ညီအစ်ကို တူကူ... ညီအစ်ကိုရဲ့ ဝိညာဉ်က မြစိမ်းရောင် မြွေဖြစ်ပြီး ယန်ယန်ရဲ့ ဝိညာဉ်က မြစိမ်းရောင်နဂါးပါ။ ဒါကြောင့် ဝိညာဉ်ကွင်းရဲ့ အတွေ့အကြုံကို သင်ယူလို့ရပေမဲ့ ယန်ယန်အနေနဲ့ လုံးဝ ကူးချနေစရာ မလိုပါဘူး”

“ကောင်းကင်ကင်းခြေများက အဆိပ် အရည်အသွေးကို သေချာပေါက် တိုးမြှင့်ပေးနိုင်ပြီး အရမ်း ကောင်းတဲ့ ကာကွယ်ရေး ဝိညာဉ်စွမ်းရည်တစ်ခုကိုလည်း ယူဆောင်လာပေးနိုင်တယ်။ ဒါပေမဲ့ အဲဒါက အခု ယန်ယန်နဲ့ သင့်တော်ချင်မှ သင့်တော်မှာ”

“ယန်ယန်ရဲ့ ကြီးထွားမှု လမ်းကြောင်းက နဂါး ဘက်ကို ဆက်သွားလို့ ရပါတယ်။ ဒီ ပဉ္စမ ဝိညာဉ်ကွင်းဆက် အတွက် နဂါးမျိုးဆက်သွေးပါတဲ့ ဝိညာဉ်သားရဲတစ်ကောင်ကို ရွေးချယ်လိုက်ရင်ရော ဘယ်လိုလဲ”

“ကျွန်တော့် အမြင်အရတော့ နဂါးရဲ့ အနာဂတ် အလားအလာတွေက အဆိပ်ထက် သေချာပေါက် ပိုကောင်းပါတယ်”

ယင်းကို ကြားသောအခါ တူကူရန်သည် လုချန်ကို တောက်ပသော မျက်လုံးများဖြင့် ကြည့်လိုက်၏။ သူမသည် များများစားစား မတုံ့ဆိုင်းဘဲ ချက်ချင်း သဘောတူညီစွာ ခေါင်းညိတ်လိုက်လေသည်။

“သမီးလည်း လန်ချန်ပြောတာ မှန်တယ်လို့ ထင်တယ်။ အကယ်လို့ ကျွန်မတို့သာ နဂါးမျိုးဆက်သွေး ပါတဲ့ ဝိညာဉ်သားရဲတစ်ကောင်ကို စုပ်ယူလိုက်မယ်ဆိုရင်... ဝိညာဉ်ကွင်းက သမီးရဲ့ မြစိမ်းရောင် နဂါး ဝိညာဉ်ကိုတောင် ပိုအစွမ်းထက်ပြီး ပြီးပြည့်စုံအောင် ဆင့်ကဲပြောင်းလဲဖို့ မြှင့်တင်ပေးနိုင်လောက်တယ်”

“ဒါက အဆိပ်ပြင်းတဲ့ ဝိညာဉ်သားရဲကို စုပ်ယူတာထက် ပိုကောင်းတယ်။ ဝိညာဉ်ကွင်းက သမီးရဲ့ အဆိပ် အရည်အသွေးကို မြှင့်တင်ပေးတာက ပိုပြီး အဓိပ္ပာယ် ရှိလိမ့်မယ်”

“သမီး ဆုံးဖြတ်လိုက်ပြီ။ သမီးရဲ့ ပဉ္စမ ဝိညာဉ်ကွင်းက နဂါး မျိုးဆက်သွေးပါတဲ့ ဝိညာဉ်သားရဲရဲ့ ဝိညာဉ်ကွင်းကို စုပ်ယူမယ်”

စကားအနည်းငယ်မျှဖြင့် လုချန်နှင့် တူကူရန်တို့သည် တူကူရန်၏ ပဉ္စမ ဝိညာဉ်ကွင်းအတွက် လမ်းကြောင်းကို ဆုံးဖြတ်လိုက်ကြသည်။

ဘေးတွင် ရပ်နေသော တူကူပိုသည်လည်း လုချန်၏ စကားများက ယုတ္တိရှိသည်ဟု ထင်သော်လည်း သူ၏ မြေးမလေးက လုချန်ကို ခြွင်းချက်မရှိ ယုံကြည်နေသည်ကို မြင်သောအခါ သူ အနည်းငယ် မသက်မသာ ဖြစ်သွားခဲ့ရသည်။

သက်ပြင်းချလိုက်ရင်း အခုဆို မြေးမလေးက အရွယ်ရောက်လာပြီဖြစ်လို့ အဘိုးဖြစ်သူနဲ့ သိပ်မရင်းနှီးတော့ဘူးဆိုတာကို သူ သဘောပေါက်သွားခဲ့ရသည်။

သမီးမိန်းကလေးဆိုတာ ကြီးပြင်းလာရင် အိမ်ကနေ ထွက်သွားတတ်တဲ့ ငှက်လေးတွေနဲ့ တူတယ်လေ။

နောက်ဆုံးတွင် တူကူပိုက မည်သည့် ကန့်ကွက်မှုမျှ မလုပ်ခဲ့ချေ။

“မင်းတို့ တိုင်ပင်ပြီးပြီဆိုမှတော့ ဒီ အဘိုးကြီးက ကန့်ကွက်စရာ မရှိပါဘူး။ ယန်ယန်ရဲ့ ပဉ္စမ ဝိညာဉ်ကွင်းက နဂါးမျိုးဆက်သွေးပါတဲ့ ဝိညာဉ်သားရဲပဲ ဖြစ်ရမယ်”

သူတို့ သုံးယောက် သဘောတူညီမှု ရသွားသည်ကို မြင်သောအခါ လုချန်က ငွေပြာနယ်ပယ်ကို အစွမ်းကုန် ဖွင့်လိုက်ပြီး နေဝင်ချိန် တောအုပ်ထဲတွင် နဂါး မျိုးဆက်သွေး ပါရှိသည့် သင့်လျော်သော သက်တမ်းရှိ ဝိညာဉ်သားရဲ တစ်ကောင်ကို ရှာဖွေရန် ပြင်ဆင်လိုက်၏။

ပုံမှန် အခြေအနေများအောက်တွင် လုချန်၏ စိတ်ပိုင်းဆိုင်ရာ စွမ်းအား ဖြင့် ငွေပြာနယ်ပယ်၏ ကျယ်ပြန့်နိုင်စွမ်း အကန့်အသတ်မှာ မီတာ ၁၅၀၀ ဖြစ်သည်။

သို့သော် ငွေပြာမြက်ပင်များ ပေါများစွာ ပေါက်ရောက်နေသော တောအုပ်များနှင့် မြက်ခင်းပြင်များတွင် ငွေပြာနယ်ပယ်၏ ကျယ်ပြန့်နိုင်စွမ်းမှာ လုံးဝနီးပါး အကန့်အသတ် မရှိပေ။

လုချန်က ငွေပြာနယ်ပယ်ကို ကျယ်ပြန့်စေရန် အသုံးပြုလိုက်သော ကုန်ကျစရိတ်များကို ငွေပြာနယ်ပယ်အတွင်းရှိ ငွေပြာမြက်ပင်များ အားလုံးက ခွဲဝေ ကျခံကြမည် ဖြစ်သည်။

ထို့ကြောင့် လုချန်၏ ငွေပြာနယ်ပယ်သည် တောအုပ် တစ်ခုလုံးကို တိုက်ရိုက် လွှမ်းခြုံထားနိုင်ခြင်း ဖြစ်၏။

အချိန်တိုအတွင်းမှာပင် လုချန်၏ ငွေပြာနယ်ပယ် သည် နေဝင်ချိန် တောအုပ်တစ်ခုလုံးကို လွှမ်းခြုံသွားခဲ့သည်။

နေဝင်ချိန် တောအုပ်ထဲရှိ ငွေပြာမြက်ပင်များ အားလုံးသည် ရွှင်လန်းအားတက်စွာဖြင့် လုချန်ဆီသို့ အနည်းငယ် ယိမ်းယိုင်သွားကြပုံရပြီး ဘုရားဖူးများကဲ့သို့ ဖြစ်နေကြသည်။

လုချန်က နေဝင်ချိန် တောအုပ်ထဲတွင် သက်တမ်း တစ်သောင်းမှ နှစ်သောင်းကြားရှိပြီး နဂါးသွေးမျိုးဆက် ပါရှိသော ဝိညာဉ်သားရဲတစ်ကောင်ကို ရှာဖွေရန် ချက်ချင်း အမိန့်ပေးလိုက်၏။

အမိန့်ရရှိသည်နှင့် ငွေပြာမြက်ပင်များ အားလုံး လှုပ်ရှားသွားကြပြီး သတင်းအချက်အလက် အမျိုးမျိုးမှာ လျင်မြန်စွာ စုစည်းရောက်ရှိလာခဲ့သည်။ နောက်ဆုံးတွင် သတ်မှတ်ချက်များနှင့် ကိုက်ညီသော ဝိညာဉ်သားရဲ၏ သတင်းအချက်အလက်များက လုချန်၏ စိတ်ထဲသို့ ရောက်ရှိလာခဲ့သည်။

“ရှာတွေ့ပြီ.. အဲဒါပဲ”

လုချန်က ရုတ်တရက် မျက်လုံးဖွင့်လိုက်ပြီး မရေတွက်နိုင်သော ငွေပြာမြက်ပင်များက ပေးပို့လာသော သတင်းအချက်အလက်များမှတစ်ဆင့် သူ၏ သတ်မှတ်ချက်များနှင့် ကိုက်ညီသော ဝိညာဉ်သားရဲ တစ်ကောင်ကို အလျင်အမြန် သတ်မှတ်လိုက်သည်။

“ညီအစ်ကို တူကူ.. ယန်ယန်... ကျွန်တော့်နောက် မြန်မြန် လိုက်ခဲ့ကြ”

ထိုသို့ပြောပြီးနောက် လုချန်က ဦးဆောင်ကာ တောအုပ်ထဲရှိ အရပ်မျက်နှာ တစ်ခုဆီသို့ အရှိန်ပြင်းပြင်း ထွက်သွားလေသည်။

ယင်းကို မြင်သောအခါ တူကူပိုသည် ဝမ်းသာသည့် အမူအရာ မပြဘဲ မနေနိုင်တော့ပေ။ လုချန်၏ နယ်ပယ်စွမ်းရည်က ဘယ်လောက်တောင် အဆင်ပြေလိုက်သလဲဟု စိတ်ထဲမှ မတွေးဘဲ မနေနိုင်တော့ပေ။

ထို့နောက် သူက တူကူရန်၏ ပခုံးကို လှမ်းကိုင်လိုက်ပြီး တူကူရန်ကို ခေါ်ဆောင်ကာ လုချန်၏ နောက်မှ အလျင်အမြန် လိုက်သွားလေတော့သည်။

မိနစ် နှစ်ဆယ်ခန့်အကြာတွင် လုချန်သည် တူကူပိုနှင့် တူကူရန်တို့ကို သူတို့၏ ခရီးပန်းတိုင်သို့ ခေါ်ဆောင်လာခဲ့သည်။

သူတို့ရှေ့ရှိ ရှင်းလင်းနေသောနေရာတွင် ဧရာမ သတ္တဝါကြီး တစ်ကောင်က နေပူစာ လှုံရင်း အေးအေးဆေးဆေး အနားယူနေခဲ့သည်။

ဧရာမ သတ္တဝါကြီးမှာ အရှည် ဆယ်မီတာနီးပါး ရှိပြီး ထူထဲသော အကြေးခွံများဖြင့် ဖုံးလွှမ်းနေကာ သန်မာသော ခြေလက်များနှင့် ခေါင်းမှ အမြီးအထိ ဓားဆူး များ တစ်တန်းကြီး ပါရှိလေသည်။

မြေနဂါး ချပ်ဝတ်သားရဲ။

၎င်းမှာ ဝိညာဉ်သားရဲတစ်ကောင်ဖြစ်ပြီး နဂါး မျိုးကွဲ ဖြစ်ကာ နဂါးမျိုးဆက်သွေး အချို့ပါရှိသည်။ ၎င်း၏ ထူထဲသော အကြေးခွံများက ထိုးဖောက်၍ မရနိုင်သော ကာကွယ်မှုများကို ပေးစွမ်းလေသည်။

သေချာသည်မှာ ၎င်း၏ တိုက်ခိုက်ရေး စွမ်းရည်များမှာလည်း ကာကွယ်ရေး စွမ်းရည်များထက် မနိမ့်ကျပေ။

၎င်း၏ ကျောပေါ်ရှိ အလွန် ထက်မြက်သော ဓားဆူး များ တစ်တန်းကြီးက မည်သည့် ဝိညာဉ်သားရဲ၏ အသားကိုမဆို ဆုတ်ဖြဲပစ်နိုင်လောက်အောင် အစွမ်းထက်သော လက်နက်တစ်ခု ဖြစ်၏။

လုချန်က တူကူပိုနှင့် တူကူရန်တို့ကို ပြောလိုက်သည်။

“ဒီ မြေနဂါး ချပ်ဝတ်သားရဲက ယန်ယန် ရဲ့ လိုအပ်ချက်တွေနဲ့ ကိုက်ညီတယ်။ ဒါပေမဲ့ သူ့ရဲ့ သက်တမ်းက နည်းနည်း ကြီးနေပြီး ကျင့်ကြံခြင်း သက်တမ်းက နှစ်သောင်းလောက် ရှိမယ်”

“ဒါပေမဲ့ အဲဒါက ယန်ယန်ရဲ့ စုပ်ယူနိုင်စွမ်း အကန့်အသတ်ထဲမှာ ရှိနေလောက်ပါသေးတယ်။ ယန်ယန်က နဂါးမူလသစ်သီးကို စားထားပြီး နှစ်ငါးသောင်း သက်တမ်း ဝိညာဉ်အရိုးကိုလည်း စုပ်ယူထားတယ်ဆိုတော့ သူမခန္ဓာကိုယ်ရဲ့ ခံနိုင်ရည်ကို ကြီးမားစွာ တိုးမြှင့်ပေးဖို့ လုံလောက်တယ်”

“ဝိညာဉ် ရိုက်ခတ်မှု နဲ့ ပတ်သက်ရင်တော့ နဂါးမူလ သစ်သီးရဲ့ ကြွင်းကျန်နေတဲ့ နဂါးစွမ်းအားက မြေနဂါး ချပ်ဝတ်သားရဲရဲ့ ကျန်ရစ်နေတဲ့ ဝိညာဉ်ကို အရမ်းမသောင်းကျန်းအောင် ထိန်းထားဖို့ လုံလောက်တယ်”

“ညီအစ်ကို တူကူ... ယန်ယန်... ဒါက ဖြစ်နိုင်တယ်လို့ ထင်လား”

အခန်း ၇၅ပြီး