အခန်း (၇၃) လုချန်၏ သတင်းအချက်အလက်
အိမ်ရှေ့မင်းသား နန်းတော်ရှိ စာကြည့်ခန်း။
ဝိညာဉ်နန်းတော်တွင် ဆယ်ရက်ကျော်ကြာ စာရွက်စာတမ်းများစွာကို ပြန်လည်သုံးသပ်ပြီးနောက် နောက်ဆုံးတွင် လုချန်၏ ဝိညာဉ်အခြေအနေကို သိရှိသွားသော မြွေလှံတိုလောသည် ကောင်းကင်အင်ပါယာမြို့တော်သို့ ချက်ချင်း ပြန်လာခဲ့သည်။
မြွေလှံတိုလော ပြန်လာသည်ကို မြင်သောအခါ ရွှယ်ချင်းဟယ်၏ မျက်နှာပေါ်တွင် အလွန် စိတ်ဝင်စားသော အမူအရာ ပေါ်လာခဲ့၏။
“ဦးလေးမြွေလှံ... ကျွန်တော် စုံစမ်းဖို့ ပြောလိုက်တဲ့ ကိစ္စက ရလဒ် ထွက်လာပြီ ထင်တယ်။ မြန်မြန် ပြောပါဦး... ဒီလန်ချန်ရဲ့ ဝိညာဉ်က တကယ်တော့ ဘာလဲ”
မြွေလှံတိုလော၏ အမူအရာမှာ လေးနက်နေခဲ့သည်။ သူက ရိုသေစွာ ဦးညွှတ်ပြီး ပြောလိုက်၏။
“သခင်လေး... လန်ချန်ရဲ့ ဝိညာဉ်က ကျွန်တော်တို့ ဝိညာဉ်နန်းတော်ရဲ့ မှတ်တမ်းတွေမှာ လွန်ခဲ့တဲ့ ဆယ်နှစ်က တစ်ကြိမ်ပဲ ပေါ်ဖူးပါတယ်”
“နာမည်က ငွေပြာအင်ပါယာလို့ခေါ်ပြီး နယ်ပယ်ကို ငွေပြာနယ်ပယ်လို့ ခေါ်ပါတယ်။ ငွေပြာအင်ပါယာ ဝိညာဉ်ကို အရင်က ပိုင်ဆိုင်ခဲ့သူက အားယင်းလို့ခေါ်တဲ့ အမျိုးသမီး တစ်ဦးပါ”
“သူမက လူသား မဟုတ်ပါဘူး... လူအသွင်ပြောင်းထားတဲ့ ဝိညာဉ်သားရဲတစ်ကောင်ပါ။ လွန်ခဲ့တဲ့ ဆယ်နှစ်က ဒီအမျိုးသမီးက ဟောက်ထျန်းဂိုဏ်းက ထန်ဟောက်နဲ့ ချစ်ကြိုက်ခဲ့ပြီး ကိုယ်ဝန်ရသွားပုံ ပေါ်ပါတယ်”
( မှတ်ချက် - အင်္ဂလိပ်ဘာသာပြန်က clear sky sectလို့ရေးထားတော့ အရင်အပိုင်းတွေမှာ ထန်ဟောက်ရဲ့ ဂိုဏ်းကို ကောင်းကင်ဂိုဏ်းလို့ ရေးလိုက်တာ။ ခု မူရင်းခေါ်နေကျ ဟောက်ထျန်းဂိုဏ်းလို့ ပြင်ရေးပါမယ် )
“ကျွန်တော်တို့ ဝိညာဉ်နန်းတော်က ဒီကိစ္စကို သိသွားတဲ့နောက် အရင် ပုပ်ရဟန်းမင်းကြီးက အကြီးအကဲ နှစ်ယောက်ကို ဦးဆောင်ပြီး အားယင်းလို့ခေါ်တဲ့ လူအသွင်ပြောင်း ဝိညာဉ်သားရဲကို လိုက်လံ ဖမ်းဆီးခဲ့ပါတယ်”
“သခင်လေးလည်း နောက်ပိုင်း ဘာဖြစ်သွားလဲဆိုတာ သိမှာပါ။ အားယင်းက ထန်ဟောက်အတွက် သူမကိုယ်သူမ စတေးခဲ့ပြီး ထန်ဟောကမကို နှစ်တစ်သိန်း ဝိညာဉ်ကွင်းနဲ့ ဘွဲ့ခံတိုလော ဖြစ်သွားစေခဲ့တယ်။ သူက အကြီးအကဲဖြစ်တဲ့ ဘွဲ့ခံတိုလောနှစ်ယောက်ကို သတ်ပစ်ရုံသာမကဘဲ အရင်ပုပ်ရဟန်းမင်းကြီးကိုလည်း ပြင်းထန်တဲ့ ဒဏ်ရာရအောင် လုပ်ခဲ့လို့ မကြာခင်မှာပဲ သေဆုံးသွားခဲ့ပါတယ်”
“ဒါက လက်ရှိ ပုပ်ရဟန်းမင်းကြီးကို တက်လာစေခဲ့ပြီး ဝိညာဉ်နန်းတော် နဲ့ ဟောက်ထျန်းဂိုဏ်းကြားက ရန်ငြိုးကိုလည်း ဖြစ်ပေါ်စေခဲ့ပါတယ်။ အဲဒီ လန်ချန် ရဲ့ ဝိညာဉ်ကလည်း ငွေပြာအင်ပါယာပါပဲ”
“သခင်လေး... လန်ချန် နဲ့ အားယင်းကြားမှာ တစ်ခုခု ပတ်သက်မှု ရှိနေနိုင်တယ်လို့ ကျွန်တော် သံသယရှိပါတယ်...”
ယင်းကို နားထောင်ရင်း ရွှယ်ချင်းဟယ်၏ မျက်လုံးများ ပြူးကျယ်လာပြီး ဤမျှလောက် လျှို့ဝှက်ချက်များ ပါဝင်နေလိမ့်မည်ဟု ဘယ်တုန်းကမှ မမျှော်လင့်ထားခဲ့သဖြင့် ထိုင်ခုံမှ ချက်ချင်း မတ်တပ်ရပ်လိုက်၏။
အားယင်း... လူအသွင်ပြောင်း ဝိညာဉ်သားရဲ။
ထန်ဟောက်... ကောင်းကင်တိုလော...
ယခင် မျိုးဆက် ပုပ်ရဟန်းမင်းကြီး ချန်းရွှင်ကျိ။
လက်ရှိ မျိုးဆက် ပုပ်ရဟန်းမင်းကြီး ပီပီတုန်။
လန်ချန်တစ်ယောက်တည်းက အတိတ်က အဖြစ်အပျက်တွေ လူတွေ အများကြီးနဲ့ ဘယ်လို ပတ်သက်နေရတာလဲ။
ရွှယ်ချင်းဟယ်၏ အမူအရာမှာ ယခင်ကထက် ပိုမို ရှုပ်ထွေးနေခဲ့လေသည်။
ချန်းရွှင်ကျိသည် သူမ၏ ဖခင်ဖြစ်ပြီး နောက်ဆုံးတွင် ထန်ဟောက်၏ လက်ချက်ဖြင့် သေဆုံးခဲ့ရသဖြင့် ထန်ဟောက်သည် သူမ၏ ဖခင်ကို သတ်ခဲ့သူ ဖြစ်သည်။
အကယ်၍ လန်ချန်သည် အားယင်း နှင့် တကယ် ပတ်သက်နေမည်ဆိုပါက လန်ချန်ကို ဆက်လက် သိမ်းသွင်းသင့်၊ မသင့် သူမ အနည်းငယ် မသေချာဖြစ်သွားခဲ့ရသည်။
ချက်ချင်းပင် ရွှယ်ချင်းဟယ်က တင်းမာသော လေသံဖြင့် ပြောလိုက်၏။
“ဦးလေး မြွေလှံ... လှည့်မပြောနေနဲ့တော့... ဦးလေး ခန့်မှန်းမိတာကိုသာ ပြောလိုက်ပါ!”
ရွှယ်ချင်းဟယ်၏ ခွင့်ပြုချက် ရရှိပြီးနောက် မြွေလှံ တိုလောသည် သူ၏ ခန့်မှန်းချက်ကို ချက်ချင်း ပြောပြလိုက်သည်။
“သခင်လေး... ငွေပြာအင်ပါယာဝိညာဉ်က တိုက်ကြီးပေါ်မှာ အရင်က တစ်ခါမှ မပေါ်ဖူးပါဘူး။ လူအသွင်ပြောင်း ဝိညာဉ်သားရဲဖြစ်တဲ့ အားယင်းတစ်ယောက်ပဲ ဒီ ဝိညာဉ်ကို ပိုင်ဆိုင်ခဲ့ဖူးတာပါ”
“ကောလာဟလတွေအရ အားယင်းမှာ ကိုယ်ဝန်ရှိနေတယ်လို့ ဆိုကြတယ်။ ဒီ လန်ချန်ကများ အားယင်း ရဲ့ သား ဖြစ်နေမလား... ဒါကြောင့်များ သူ့ဆီမှာ ငွေပြာအင်ပါယာဝိညာဉ် နိုးထလာတာလား ဆိုတာပါပဲ။ ဘာပဲဖြစ်ဖြစ် လန်ချန်ရဲ့ မျက်နှာက အတုလေ... သူ့ရဲ့ အသွင်ဖျောက်မှုအောက်မှာ အလွန် ငယ်ရွယ်တဲ့ မျက်နှာတစ်ခု ရှိနေနိုင်ပါတယ်...”
ဤ အဓိပ္ပာယ်မရှိသော ခန့်မှန်းချက်ကို ကြားသောအခါ ရွှယ်ချင်းဟယ်က သူ့ကို “ဦးလေး ကျွန်တော့်ကို နောက်နေတာလား” ဆိုသည့် အကြည့်ဖြင့် ကြည့်လိုက်ပြီး မြွေလှံတိုလောကို လေးနက်သော အမူအရာဖြင့် ပြောလိုက်၏။
“ဦးလေးမြွေလှံ... ဦးလေးရဲ့ ခန့်မှန်းချက်က အရမ်း လွန်ကဲနေပြီ။ အားယင်း ကိုယ်ဝန်ရှိခဲ့တာ လွန်ခဲ့တဲ့ ဆယ်နှစ်ကလေ။ သူမ ကလေးမွေးခဲ့ရင်တောင် အဲဒီကလေးက အလွန်ဆုံးမှ အသက် ဆယ်နှစ်ပဲ ရှိဦးမှာပေါ့”
“အသက် ခြောက်နှစ်အရွယ် ဝိညာဉ်နိုးထချိန်မှာ သူက မွေးရာပါဝိညာဉ်စွမ်းအား အပြည့်အဝကို ပိုင်ဆိုင်ထားရင်တောင် လေးငါးနှစ်အတွင်းမှာ ဝိညာဉ်ကွင်းခုနစ်ခုပါတဲ့ ဝိညာဉ်သူတော်စင် တစ်ယောက် ဖြစ်လာဖို့ဆိုတာ မဖြစ်နိုင်ဘူး”
“မွေးမွေးချင်း ချက်ချင်း ကျင့်ကြံနိုင်တဲ့ သူများ ရှိလို့လား။ အဲဒါ မဖြစ်နိုင်ဘူး။ ဘယ်လိုလုပ် လူတစ်ယောက်က ဘာမှမရှိတဲ့ အခြေအနေကနေ ဆယ်နှစ်အတွင်းမှာ ဝိညာဉ်ကွင်း ခုနစ်ခုပါတဲ့ ဝိညာဉ်သူတော်စင်တစ်ယောက် ဖြစ်လာနိုင်မှာလဲ”
“ကျွန်တော်လည်း မလုပ်နိုင်ဘူး... ပီပီတုန်လည်း မလုပ်နိုင်ဘူး... ဒီတိုက်ကြီးပေါ်က ဘယ်သူမှလည်း မလုပ်နိုင်ဘူး။ တကယ်လို့ တစ်ယောက်ယောက်က တကယ် လုပ်နိုင်တယ်ဆိုရင် အဲဒီလူက လူ့လောကကို ဆင်းလာတဲ့ နတ်ဘုရားပဲ ဖြစ်ရမယ်”
ရွှယ်ချင်းဟယ်သည် မွေးမွေးချင်း ချက်ချင်း ကျင့်ကြံနိုင်ပြီး အသက်ရှူရုံဖြင့် ကျင့်ကြံနိုင်သော သူရှိလိမ့်မည်ဟု ဘယ်တုန်းကမှ မတွေးဖူးခဲ့ပေ။
တကယ်တမ်းတွင် မြွေလှံတိုလောလည်း ၎င်းမှာ အဓိပ္ပာယ်မရှိဟု ထင်နေခဲ့သည်။ သူက ခန့်မှန်းကြည့်ရုံသာဖြစ်ပြီး ယခု ရွှယ်ချင်းဟယ်က မယုံကြည်သောအခါ သူက စကားရပ်လိုက်ပြီး သူ၏ ဒုတိယ ခန့်မှန်းချက်ကို စတင် ပြောပြလိုက်၏။
“သခင်လေး... အကယ်လို့ ဒီ လန်ချန်က အားယင်း ရဲ့ သား မဟုတ်ဘူးဆိုရင် သူက သူမရဲ့ အစ်ကို ဒါမှမဟုတ် မောင်ပဲ ဖြစ်ရမယ်။ အားယင်းက နှစ်တစ်သိန်း သက်တမ်းရှိတဲ့ လူအသွင်ပြောင်း ဝိညာဉ်သားရဲ တစ်ကောင်ဖြစ်ပြီး ဒီ လန်ချန်ကလည်း... နှစ်တစ်သိန်း သက်တမ်းရှိတဲ့ လူအသွင်ပြောင်း ဝိညာဉ်သားရဲ တစ်ကောင် ဖြစ်နိုင်ပါတယ်”
“အကယ်လို့ ဒီခန့်မှန်းချက်သာ မှန်ခဲ့ရင် လန်ချန်ရဲ့ အစွမ်းထက်တဲ့ ပါရမီကို ရှင်းပြနိုင်ပါတယ်။ ကောလာဟလတွေအရ နှစ်တစ်သိန်း သက်တမ်းရှိတဲ့ လူအသွင်ပြောင်း ဝိညာဉ်သားရဲဟာ မွေးရာပါ ဝိညာဉ်စွမ်းအားအပြည့်အဝ ဖြစ်ရမှာဖြစ်ပြီး ကျင့်ကြံခြင်း အရှိန်ကလည်း အလွန် မြန်ဆန်ပါတယ်။ ဒါက လန်ချန် ဒီလောက် ငယ်ငယ်ရွယ်ရွယ်နဲ့ ဝိညာဉ်ကွင်းခုနစ်ခုပါတဲ့ ဝိညာဉ်သူတော်စင်တစ်ယောက် ဖြစ်နေတာနဲ့ ကိုက်ညီနေပါတယ်”
“သခင်လေး... ဒီ လန်ချန်က အရမ်း သံသယဖြစ်စရာ ကောင်းပါတယ်။ သူက တိုက်ကြီးပေါ်ကနေ ရုတ်တရက် ပေါ်လာသလိုပဲ။ သူ့မှာ အတိတ် မရှိဘူး၊ သူ့ရဲ့ မျက်နှာစစ်စစ်ကိုလည်း မပြရဲဘူး။ သူက နှစ်တစ်သိန်း သက်တမ်းရှိ လူအသွင်ပြောင်း ဝိညာဉ်သားရဲရဲ့ လက္ခဏာတွေနဲ့ အတိအကျ ကိုက်ညီနေပါတယ်”
“ဒါနဲ့စကားမစပ်... ကျွန်တော်တို့ ဂိုဏ်းချုပ်နင်းကို တကယ်ပဲ နားလည်မှုလွဲခဲ့တာ ဖြစ်နိုင်တယ်။ လန်ချန် ဟာ သူ့ရဲ့ မည်သူမည်ဝါဖြစ်ကြောင်းကို ပြောင်းလဲပြီး ပုန်းအောင်းနေခဲ့တာက ဘုံခုနစ်ဆင့် ပြဿာဒ်ဂိုဏ်းရဲ့ ညှဉ်းပန်းနှိပ်စက်မှုကြောင့် မဟုတ်ဘဲ သူက နှစ်တစ်သိန်း သက်တမ်းရှိတဲ့ လူအသွင်ပြောင်း ဝိညာဉ်သားရဲ ဖြစ်နေလို့ပါ”
မြွေလှံတိုလော၏ ဒုတိယ ခန့်မှန်းချက်သည် လုချန်၏ လက္ခဏာများနှင့် အတိအကျ ကိုက်ညီနေသည်ဟု ဆိုရမည်ဖြစ်သည်။
အကယ်၍ နင်းဖုန်းကျီသာ ဤသတင်းကို သိရှိပါက သူ ထမ်းပိုးထားရသော မတရားမှုမှာ နောက်ဆုံးတွင် ရှင်းလင်းသွားပြီဖြစ်သဖြင့် ဝမ်းသာမျက်ရည် ကျသွားလောက်ပေသည်။
ဤအချိန်တွင် ရွှယ်ချင်းဟယ် မျက်မှောင်ကြုတ်သွားရသည်။ မြွေလှံတိုလော၏ ခန့်မှန်းချက်အရ လုချန်၏ အပြုအမူများစွာကို ရှင်းပြနိုင်သော်လည်း တစ်ခုခု မှားယွင်းနေသည်ဟု သူမ ခံစားနေရဆဲပင်။
ရွှယ်ချင်းဟယ်က ခေါင်းကို အဆက်မပြတ် ခါယမ်းလိုက်သည်။
“မဖြစ်နိုင်ဘူး.. လုံးဝ မဖြစ်နိုင်ဘူး”
“အကယ်လို့ လန်ချန်ကသာ တကယ်ပဲ နှစ်တစ်သိန်း သက်တမ်း လူအသွင်ပြောင်းဝိညာဉ်သားရဲဆိုရင် သူက တူကူပို နဲ့ ဘယ်လိုလုပ် ရင်းနှီးအောင် ချဉ်းကပ်ရဲမှာလဲ။ ဘာပဲဖြစ်ဖြစ် ဘွဲ့ခံတိုလောက နှစ်တစ်သိန်း သက်တမ်းရှိ ဝိညာဉ်သားရဲရဲ့ အစစ်အမှန် ပုံစံကို မြင်နိုင်စွမ်း ရှိတယ်လေ”
“တူကူပို အပြင် ဘုံခုနစ်ဆင့် ပြဿာဒ်ဂိုဏ်းက ဓားတိုလော နဲ့ အရိုးတိုလော... ပြီးတော့ ဦးလေး မြွေလှံ၊ ဦးလေးဆူးငါးတို့ အားလုံးက လန်ချန်ကို မြင်ဖူးကြပေမဲ့ သူ့ရဲ့ အသွင်ဖျောက်ထားတာကို သိခဲ့ကြလို့လား”
“သူ့ရဲ့ အသွင်ဖျောက်နိုင်စွမ်းက ဘွဲ့ခံတိုလောတွေတောင် မမြင်နိုင်လောက်အောင် အစွမ်းထက်နေတာ မဟုတ်ရင်တော့ သူက အစောကြီးကတည်းက ပေါ်သွားလောက်ပြီ”
စကားပြောပြီးနောက် ရွှယ်ချင်းဟယ်လည်း တိတ်ဆိတ်သွားသကဲ့သို့ မြွေလှံတိုလောလည်း တိတ်ဆိတ်သွားပြီး စာကြည့်ခန်းမှာ တစ်ခဏမျှ တိတ်ဆိတ်သွားခဲ့သည်။
ရွှယ်ချင်းဟယ်သည် ယခုအချိန်တွင် အလွန် အကျပ်ရိုက်နေခဲ့၏။
မူလက သူမသည် လန်ချန်၏ ဝိညာဉ်ကို အသုံးပြု၍ သူ၏ နောက်ခံနှင့် အရင်းအမြစ်ကို စုံစမ်းကာ သူ့ကို မိမိ၏ ဘက်သို့ သိမ်းသွင်းရန် ရည်ရွယ်ခဲ့ခြင်း ဖြစ်သည်။
သို့သော် စုံစမ်းစစ်ဆေးမှု ရလဒ်များက နောက်ထပ် ဘာဆက်လုပ်ရမည်ကို သူမ အနည်းငယ် မသေချာဖြစ်သွားစေခဲ့ရသည်။
မြွေလှံတိုလော၏ ခန့်မှန်းချက် နှစ်ခု။
ပထမ ခန့်မှန်းချက်မှာ လွန်ကဲလွန်းပြီး ရွှယ်ချင်းဟယ် လုံးဝ မယုံကြည်ပေ။
ဒုတိယ ခန့်မှန်းချက်မှာ အနည်းငယ် ပိုယုတ္တိရှိပြီး ရွှယ်ချင်းဟယ်က ၎င်းကို စတင် ယုံကြည်လာခဲ့သည်။
အကယ်၍ လန်ချန်သာ ကောင်းကင်ကို အန်တုနိုင်သော အသွင်ဖျောက်စွမ်းရည်ကို တကယ် ပိုင်ဆိုင်ထားမည်ဆိုပါက အရာအားလုံးကို ယုတ္တိရှိရှိ ရှင်းပြနိုင်ပေလိမ့်သည်။
ဤအရာများက သူတို့ စဉ်းစားနိုင်သော ခန့်မှန်းချက် နှစ်ခုတည်းသာ ဖြစ်သည်။
တတိယ ခန့်မှန်းချက်ဖြစ်သော လုချန်သည် သာမန် ငွေပြာမြက်ပင်တစ်ပင်ကို နိုးထစေခဲ့ပြီး လေးငါးနှစ်အတွင်းမှာပင် အပင် ဝိညာဉ်ကွင်းများကို စုပ်ယူကာ ငွေပြာအင်ပါယာအဖြစ် ဆင့်ကဲပြောင်းလဲသွားခဲ့သော သာမန်လူတစ်ယောက်သာဖြစ်သည် ဆိုသောအချက်ကိုမူ။
ဤဖြစ်နိုင်ခြေက သူတို့၏ စိတ်ထဲသို့ ဘယ်တော့မှ ရောက်လာမည် မဟုတ်ပေ။
ရွှယ်ချင်းဟယ်သည် ညှိုးနွမ်းစွာ ကြည့်နေခဲ့သည်။ လက်ရှိ အချက်အလက်များအရ လန်ချန်သည် အားယင်း နှင့် ပတ်သက်မှု တစ်ခုခု ရှိနေနိုင်ခြေ အလွန် များနေခဲ့သည်။
အားယင်း၏ သေဆုံးမှုမှာ သူမ၏ ဖခင်ကြောင့် ဖြစ်ခဲ့ရပြီး နောက်ဆုံးတွင် သူမ၏ ဖခင်မှာလည်း ထန်ဟောက်၏ သတ်ဖြတ်ခြင်းကို ခံခဲ့ရသည်။
အသေအချာ စဉ်းစားပြီးနောက် ရွှယ်ချင်းဟယ်သည် အကူအညီမဲ့စွာ လက်ကို ဝှေ့ယမ်းလိုက်၏။
“ဦးလေးမြွေလှံ... ဒီတစ်ခါ ပင်ပန်းသွားပါပြီ။ ဒီတွေ့ရှိခဲ့တဲ့ အချက်အလက်တွေကို ကျွန်တော်တို့ နှစ်ယောက်ကြားမှာပဲ ထားပါ... တတိယ လူကို မပြောပါနဲ့”
“လန်ချန်ရဲ့ မည်သူမည်ဝါဖြစ်ကြောင်း အစစ်အမှန်ကို ကျွန်တော် နောက်တစ်ကြိမ် စမ်းသပ်ဖို့ အခွင့်အရေး ရှာပါ့မယ်။ နောက်ဆုံး အတည်မပြုနိုင်သေးခင်မှာ ဦးလေးတို့ အလျင်စလို မလှုပ်ရှားပါနဲ့။ လောလောဆယ်တော့ သူ့ကို သိမ်းသွင်းဖို့က ကျွန်တော်ရဲ့ အဓိက ရည်ရွယ်ချက်ပဲ”
“လန်ချန်မှာ နင်းဖုန်းကျီထက် သာလွန်တဲ့ အထောက်အကူပြု စွမ်းရည်တွေ ရှိတယ်။ သူ့ရဲ့ တန်ဖိုးကို ကျွန်တော် အသိအမှတ်ပြုပြီးပြီ။ သူ့ကို ကျွန်တော့် လက်အောက်ကို သိမ်းသွင်းနိုင်သရွေ့ သူ့ရဲ့ မည်သူမည်ဝါဖြစ်ကြောင်းကို ဂရုမစိုက်ဘဲ သူ့ကို လက်ခံသွားမှာ”
“အကယ်လို့ သူက ကျွန်တော်တို့နဲ့ ပူးပေါင်းဖို့ ဆက်ပြီး ငြင်းဆိုနေရင်တော့ ဘာလုပ်ရမလဲဆိုတာကို အဲဒီအချိန်ကျမှ ဆုံးဖြတ်ကြတာပေါ့”
“သွားပြီး အနားယူလိုက်ပါတော့”
ရွှယ်ချင်းဟယ်က ထိုသို့ ပြောလာသဖြင့် မြွေလှံတိုလောလည်း သဘောတူညီစွာ ခေါင်းညိတ်ရုံသာ တတ်နိုင်တော့လေသည်။
“ဟုတ်ကဲ့ပါ..”
အခန်း ၇၃ပြီး