အခန်း (၅၉) ငွေပြာဘုရင် ညာဘက်လက်အရိုး
တူကူပို၏ မျက်နှာပေါ်တွင် အံ့သြမှင်တက်နေသော အရိပ်အယောင်များ ပေါ်လွင်နေပြီး အသက်ရှူမှားသွားခဲ့ရသည်။
ဝိညာဉ်ကိုယ်ပွား၏ ကြောက်မက်ဖွယ်ကောင်းသော အကျိုးသက်ရောက်မှုများက သူ့ကို အလွန် အံ့အားသင့်သွားစေခဲ့၏။
သူက သက်တမ်း ၈သောင်းကျော်ရှိသော ဝိညာဉ်ကွင်းတစ်ခုနှင့် တကယ်ကို ထိုက်တန်သည်ဟု စိတ်ထဲမှ တွေးကာ သက်ပြင်းချလိုက်မိသည်။ ယင်းမှာ သာမန် ဘွဲ့ခံတိုလော တစ်ဦးအတွက် နဝမမြောက် ဝိညာဉ်ကွင်းအဖြစ် အသုံးပြုရန် လုံလောက်သည်ထက်ပင် ပိုနေသေးပေသည်။
ယခုအခါ ၎င်းကို သတ္တမမြောက် ဝိညာဉ်ကွင်း နေရာတွင် ထားရှိလိုက်သဖြင့် ၎င်း၏ တန်ဖိုးကို အပြည့်အဝ အသုံးချနိုင်ခဲ့ပြီဖြစ်သည်။
တူကူပိုက လုချန်ကို အဓိပ္ပာယ်ပါပါ ကြည့်လိုက်၏။
“ဒီလောက် ကြောက်စရာကောင်းတဲ့ ဝိညာဉ်ကိုယ်ပွား စွမ်းရည်မျိုးက မင်းရဲ့ ဝှက်ဖဲစွမ်းရည် ဖြစ်သင့်တာ။ အခု မင်းက ဒါရဲ့ အာနိသင်တွေကို ငါတို့ကို ပွင့်ပွင့်လင်းလင်း ပြောပြတယ်ဆိုတာ ငါတို့အပေါ် မင်းရဲ့ ယုံကြည်မှုကို ပြသတာပဲ... ငါတို့ကလည်း မင်းကို စိတ်ပျက်အောင် လုပ်မှာ မဟုတ်ပါဘူး”
“လန်ချန်... မင်းရဲ့ အသွင်ဖျောက်ထားမှုက ပေါက်ကြားသွားပြီဆိုတော့ အခုကစပြီး ငါတို့ရှေ့မှာ ဟန်ဆောင်နေစရာ မလိုတော့ဘူး... ပြီးတော့ ငါတို့က မင်းကို အန္တရာယ်ပြုမှာ မဟုတ်ဘူး။ ဒါပေမဲ့ မင်း အပြင်ထွက်တဲ့အခါ အသွင်ဖျောက်တာကို ဆက်လုပ်ထားဖို့တော့ လိုသေးတယ်”
“ဘာပဲဖြစ်ဖြစ် မင်းက အရမ်း ငယ်လွန်းတယ်။ အလွန်ဆုံးမှ ယန်ယန် နဲ့ ရွယ်တူလောက်ပဲ ရှိမယ်။ ဒီလောက် ငယ်ငယ်ရွယ်ရွယ်နဲ့ ဝိညာဉ်သူတော်စင် ဖြစ်နေပြီး ဒီလို ကောင်းကင်ဘုံကို အာခံနိုင်တဲ့ အထောက်အကူပြု အာနိသင်မျိုး ရှိနေတာဆိုတော့ မင်း ထင်ပေါ်ကျော်ကြားလာတာကို မြင်ချင်မှာ မဟုတ်တဲ့ လူတွေ အများကြီး ရှိလိမ့်မယ်”
“ဒီနေ့ မင်းပြောခဲ့တာတွေကို ဒီကထွက်သွားပြီးရင် ယန်ယန် နဲ့ ငါ ဘာမှ မသိခဲ့သလိုပဲ ဟန်ဆောင်နေလိုက်မယ်။ မင်းရဲ့ ဝိညာဉ်ကိုယ်ပွား နဲ့ မင်းရဲ့ နယ်ပယ် စွမ်းရည်တွေက အသက်ရှင်ဖို့အတွက် မင်းရဲ့ ဝှက်ဖဲစွမ်းရည်တွေပဲ... နောက်နောင် ဘယ်တော့မှ ပေါ့ပေါ့ဆဆ ထုတ်မပြနဲ့”
“ငါတို့ရဲ့ ဒီခရီးစဉ်အတွက် ရည်ရွယ်ချက်က အတော်လေး ပြည့်မြောက်သွားပါပြီ။ တခြား ဘာမှ မရှိတော့ဘူးဆိုရင် ငါတို့ အခု ပြန်လို့ရပြီ”
လုချန်သည် တူကူပို၏ ရိုးသားလှိုက်လှဲသော စကားများကို ကြားသောအခါ သူ၏ မျက်နှာပေါ်တွင် အပြုံးတစ်ခု ပေါ်လာခဲ့လေသည်။
ဝိညာဉ်ကိုယ်ပွား နှင့် နယ်ပယ်တို့၏ အကျိုးသက်ရောက်မှုများမှာ သူ၏ ဝှက်ဖဲစွမ်းရည်များဖြစ်ပြီး ၎င်းတို့ကို သူ များသောအားဖြင့် ထုတ်မပြလိုပေ။
သို့သော် ငွေပြာဘုရင်၏ သက်စောင့်အသက်သွေး စွမ်းအင်များကို ကုန်ခမ်းသွားအောင် လုပ်ပေးခဲ့သော တူကူပိုကို ကျေးဇူးတင်ရပေမည်။ ထို့ကြောင့်သာ သူက ငွေပြာဘုရင် ကို သတ်နိုင်ခဲ့ခြင်း ဖြစ်၏။
ထိုအချက်ကို စိတ်ထဲထား၍ လုချန်သည် သူ၏ ဝိညာဉ်ကိုယ်ပွား အကျိုးသက်ရောက်မှုများ၏ အမှန်တရားကို တူကူပိုကို ပြောပြခဲ့ခြင်း ဖြစ်သည်။
လူတစ်ယောက်ကို စစချင်း တွေ့တဲ့အခါမှာ အနည်းငယ် သတိထားနေတာက လုံးဝ ပုံမှန်ပါပဲ။
သို့သော် ယခုအခါ နှစ်ဖက်စလုံး၏ အကျိုးစီးပွားများမှာ ဆက်စပ်နေပြီဖြစ်ရာ သူတို့၏ ဆက်ဆံရေးကို ပိုမို နက်ရှိုင်းလာစေရန်အတွက် ရိုးသားမှုကို ရိုးသားမှုဖြင့် ဖလှယ်သင့်ပေသည်။
အတော်လေး အလုပ်ဖြစ်ပုံရ၏။
တူကူပိုက သူ့ကို အမြဲတမ်း ပထမနေရာမှာ ထားပြီး သူ့ကို ညီအစ်ကို တစ်ယောက်၊ သူငယ်ချင်း တစ်ယောက်လို တကယ် သဘောထားခဲ့သည်။
ချက်ချင်းပင် လုချန်က ငွေပြာဘုရင်၏ ကြွင်းကျန်ရစ်သော ခန္ဓာကိုယ်ဆီသို့ လှည့်ကြည့်လိုက်ပြီး လေးနက်ပြီး တည်ငြိမ်သော အသံဖြင့် ပြောလိုက်၏။
“အခုက ထွက်သွားရမယ့် အချိန် မဟုတ်သေးဘူး။ ဒီ သက်တမ်း ၈၅,၀၀၀ ရှိတဲ့ ငွေပြာဘုရင်က ရတနာ တစ်ခု ချန်ထားခဲ့တယ်”
ယင်းကို ကြားသောအခါ တူကူပို၏ အမူအရာမှာ လေးနက်သွားရသည်။ သူသည် ဝိညာဉ်သားရဲများကို အမဲလိုက်ခဲ့သည်မှာ တစ်ကြိမ်ထက်မကတော့ပေ။ ဝိညာဉ်သားရဲများ ထုတ်ပေးနိုင်သော ရတနာများမှာ ဝိညာဉ်ကွင်းအပြင် ဝိညာဉ်အရိုးလည်း ပါဝင်သည် မဟုတ်လော။
တူကူပို လေကို ပြင်းပြင်းရှူသွင်းလိုက်မိ၏။ သက်တမ်း ၈၅,၀၀၀ ရှိသော ဝိညာဉ်အရိုးက ဘွဲ့ခံတိုလောတစ်ဦးဖြစ်သော သူ့ကိုပင် စိတ်လှုပ်ရှားမှု ဖြစ်ပေါ်လာစေခဲ့သည်။
ခဏအကြာတွင် တူကူပိုက ရုတ်တရက် လှည့်ကာ တူကူရန်ကို ဆွဲခေါ်ပြီး တောအုပ်ထဲမှ ထွက်သွားရင်း ပြောလိုက်၏။
“လန်ချန်... ယန်ယန် နဲ့ ငါ အရင် ထွက်သွားနှင့်မယ်။ ငါတို့ ဘာမှ မသိဘူး။ ဒီက ကိစ္စတွေ ရှင်းပြီးရင် တောအုပ် အပြင်ဘက်မှာ လာရှာလှည့်”
အရည်အသွေးမြင့် ဝိညာဉ်အရိုးတစ်ခုသည် မည်သူ့အတွက်မဆို ယှဉ်ပြိုင်၍မရသော သွေးဆောင်မှု တစ်ခုပင်။
တူကူပိုမှာလည်း သွေးဆောင်မခံရဘဲ မနေနိုင်သော်လည်း သူက လုချန်ကို ပို၍ တန်ဖိုးထားသဖြင့် မသိချင်ယောင်ဆောင်ရန်သာ ရွေးချယ်လိုက်ခြင်း ဖြစ်သည်။
တူကူရန်ကို ဆွဲခေါ်သွားရင်း တူကူပိုသည် လုချန် မည်သို့သော ဝိညာဉ်အရိုးမျိုး ရမည်ကို မသိချင်ခဲ့ပေ။
ထိုသို့လုပ်ခြင်းဖြင့်သာ သူ၏ လောဘကို ထိန်းချုပ်နိုင်မည် ဖြစ်၏။
လုချန်က တူကူပိုနှင့် တူကူရန်တို့ ထွက်သွားသည်ကို လှည့်ကြည့်လိုက်ရာ သူ၏ မျက်ခုံးများ ပြေလျော့သွားပြီး တူကူပို၏ ဉာဏ်ပညာ ကြီးမားမှုကို ချီးကျူးမနေဘဲ မနေနိုင်တော့ချေ။
တူကူပိုနှင့် တူကူရန်တို့ တောအုပ်ထဲတွင် လုံးဝ ပျောက်ကွယ်သွားသည်အထိ စောင့်ပြီးနောက် လုချန်သည် ငွေပြာဘုရင်၏ ကြွင်းကျန်ရစ်သော ခန္ဓာကိုယ်ရှိရာသို့ ချက်ချင်း ပြေးသွားလိုက်သည်။
သူက လက်ကို မြှောက်ကာ သူ၏ ဒုတိယ ဝိညာဉ်ဖြစ်သော အနက်ရောင် သံမဏီ တံစဉ်ကို ဆင့်ခေါ်လိုက်ပြီး ၎င်းကို ကိုင်ဆောင်ကာ ငွေပြာဘုရင်၏ ကြွင်းကျန်ရစ်သော ခန္ဓာကိုယ်ကို ခုတ်ပိုင်းလိုက်သည်။
ဂျွတ်... ဂျွတ် ...
သစ်သားစများ လွင့်စင်လာမှုနှင့်အတူ ငွေပြာဘုရင် ၏ ကြွင်းကျန်ရစ်သော ခန္ဓာကိုယ်တွင် ကြီးမားသော အက်ကွဲကြောင်း တစ်ခု ဖြစ်ပေါ်လာခဲ့သည်။
ချက်ချင်းဆိုသလိုပင် ထိုအက်ကွဲကြောင်းမှ တောက်ပသော အပြာရောင် အလင်းတန်းတစ်ခု ဖြာထွက်လာလေသည်။
ယင်းကို မြင်သောအခါ လုချန်သည် အသက်ရှူမှားသွားပြီး စိတ်လှုပ်ရှားစွာဖြင့် လက်ကို ဆန့်ထုတ်ကာ ထိုအက်ကွဲကြောင်းထဲမှ လက်ဖဝါးအရွယ်အစားရှိသော ညာဘက်လက်အရိုး တစ်ပိုင်းကို ထုတ်ယူလိုက်၏။
ငွေပြာဘုရင်တွင် ကျင့်ကြံမှု သက်တမ်း ၈၅,၀၀၀ ရှိသဖြင့် ၎င်းထုတ်ပေးသော ညာဘက်လက်အရိုးမှာ အလွန် အရည်အသွေး မြင့်မားနေခဲ့သည်။
ဤညာဘက်လက်အရိုးမှာ အလွန် ပြည့်စုံပြီး ကြီးမားလှသော စွမ်းအင်လှိုင်းများ ဖြာထွက်နေကာ လန်းဆန်းစေသော သက်စောင့်အသက်သွေး စွမ်းအင်များ ထွက်ပေါ်နေခဲ့သည်။
လုချန်၏ မျက်လုံးများ တောက်ပသွားပြီး စိတ်ထဲမှ တွေးလိုက်၏။
‘ဒီ ဝိညာဉ်အရိုးက အရည်အသွေး အရမ်း မြင့်ပြီးတော့ ငွေပြာဘုရင်ဆီက ရတာ။ ဝိညာဉ်သားရဲရဲ့ ဝိညာဉ်ကွင်းနဲ့ ဝိညာဉ်အရိုး ကို လူတစ်ယောက်တည်းက စုပ်ယူမှသာ သူ့ရဲ့ အာနိသင် အမြင့်ဆုံးကို ရောက်ရှိနိုင်မှာ’
‘ဒီ ဝိညာဉ်အရိုးက ငါ့အတွက် နှစ်တစ်သိန်း ဝိညာဉ်အရိုးထက် တန်ဖိုး မလျော့ဘူး။ တစ်ခုတည်းသော ကွာခြားချက်က ဒီ ဝိညာဉ်အရိုးမှာ စွမ်းရည် တစ်ခုပဲ ရှိပြီး နှစ်တစ်သိန်း ဝိညာဉ်အရိုးမှာကျတော့ စွမ်းရည် နှစ်ခု ရှိနေတာပဲ ဖြစ်မှာ’
‘မမျှော်လင့်ထားတာတွေ မဖြစ်လာခင် အခုပဲ စုပ်ယူလိုက်ရအောင်။ ဒီ ဝိညာဉ်အရိုးက ငါ့ကို ကောင်းမွန်တဲ့ စွမ်းရည်တစ်ခု ပေးစွမ်းနိုင်ဖို့ မျှော်လင့်တယ်။ ငွေပြာ အာဏာရှင်လှံဆိုရင် အကောင်းဆုံးပဲ... ဒါဆို ငါလည်း နောက်ဆုံးတော့ တကယ့် တိုက်ခိုက်ရေး စွမ်းရည်တစ်ခု ရပြီပေါ့’
‘ငါ့ရဲ့ ဝိညာဉ်စွမ်းအားက မူလက အဆင့် ၇၀ ရှိတယ်... ဒါပေမဲ့ ငွေပြာဘုရင်ရဲ့ ဝိညာဉ်ကွင်းကို စုပ်ယူပြီးတဲ့နောက်မှာ အဆင့် ၇၂ ကို ကျော်ဖြတ်သွားတယ်။ အခု ငွေပြာဘုရင်ရဲ့ ဝိညာဉ်အရိုးကို စုပ်ယူလိုက်ရင် ငါ့အတွက် ကြီးမားတဲ့ တိုးတက်မှုတစ်ခုကို သေချာပေါက် ယူဆောင်လာပေးမှာပဲ’
၎င်းကို တွေးပြီးနောက် လုချန် ချက်ချင်း တင်ပျဉ်ခွေ ထိုင်ချလိုက်ပြီး ငွေပြာဘုရင် ညာဘက်လက်အရိုး ကို သူ၏ ညာဘက်လက်တွင် တွဲဆက်လိုက်လေသည်။
သူ၏ ဝိညာဉ်စွမ်းအားကို ညာဘက်လက်အရိုးထဲသို့ ထည့်သွင်းလိုက်သည်နှင့် ၎င်းမှာ ချက်ချင်း တောက်ပသွားခဲ့သည်။
တောက်ပသော အပြာရောင် အလင်းတန်းများကြားတွင် ညာဘက်လက်အရိုးမှာ မရေတွက်နိုင်သော အပြာရောင် စွမ်းအင်စီးကြောင်းများ အဖြစ်သို့ အခိုးအငွေ့ပျံသွားပြီး လုချန်၏ ဝိညာဉ်စွမ်းအားကြောင့် ဆွဲဆောင်ခံရကာ မရေတွက်နိုင်သော အပြာရောင် စွမ်းအင်စီးကြောင်းများက လုချန်၏ ညာဘက်လက်ဆီသို့ ဝင်ရောက်လာခဲ့ကြသည်။
လုချန်၏ ညာဘက်လက်တစ်ခုလုံးကို နွေးထွေးသော စွမ်းအင်တစ်ခုက လွှမ်းခြုံထားသည်ကို ခံစားလိုက်ရ၏။
ထိုစွမ်းအင်မှာ စမ်းချောင်းလေးတစ်ခုကဲ့သို့ အလွန် နူးညံ့ပြီး သူ၏ ညာဘက်လက်ရှိ အရေပြား၊ ကြွက်သားများ၊ သွေးကြောလမ်းကြောင်းများနှင့် အရိုးများကို အာဟာရ ဖြည့်တင်းပေးနေခဲ့သည်... နောက်ဆုံးတွင် ၎င်းသည် သူ၏ ညာဘက်လက်တစ်ခုလုံးနှင့် ပေါင်းစပ်သွားသည်အထိပင်။
ဤလုပ်ငန်းစဉ်အတွင်း စွမ်းအင်များက သူ၏ ဝိညာဉ်စွမ်းအားထဲသို့လည်း ဝင်ရောက်သွားပြီး သူ၏ ဝိညာဉ်စွမ်းအားကို ဒုံးပျံတစ်စင်းကဲ့သို့ လျင်မြန်စွာ မြင့်တက်လာစေသည်။
အစိတ်ဝင်စားစရာ အကောင်းဆုံးအချက်မှာ လုချန်၏ ငွေပြာအင်ပါယာဝိညာဉ်၏ သတ္တမမြောက် ဝိညာဉ်ကွင်းသည် ဤ ဝိညာဉ်အရိုးကဲ့သို့ပင် တူညီသော ငွေပြာဘုရင် ဝိညာဉ်သားရဲထံမှ ရရှိခဲ့ခြင်းပင်။
ဝိညာဉ်အရိုး၏ စွမ်းအင်များကို သူ စုပ်ယူလိုက်သည်နှင့်အမျှ ငွေပြာဘုရင်၏ ဝိညာဉ်ကွင်း နှင့် ဝိညာဉ်အရိုးတို့မှာ အချင်းချင်း ပဲ့တင်ထပ်သွားပြီး တူညီသော အရင်းအမြစ်မှ စွမ်းအင်နှစ်ခုမှာ အချို့အဆက်မရှိ ပေါင်းစပ်သွားကာ သူ၏ စုပ်ယူမှု လုပ်ငန်းစဉ်ကို အလွန် ချောမွေ့သွားစေခဲ့သည်။
လုချန်သည် ဝိညာဉ်အရိုး၏ စွမ်းအင် ားလုံးကို စုပ်ယူရန် ငါးနာရီခန့် အချိန်ယူခဲ့ရလေသည်။
အံ့သြမှုများဖြင့် တောက်ပနေသော သူ၏ နက်ရှိုင်းသည့် အပြာရောင်မျက်လုံးများကို ဖွင့်လိုက်ပြီးနောက် သူက အားရပါးရ မရယ်ဘဲ မနေနိုင်တော့ပေ။
“ဟားဟား... မျှော်လင့်ထားတဲ့ အတိုင်းပဲ... ဝိညာဉ်ကွင်းနဲ့ ဝိညာဉ်အရိုးကို အတူတူ စုပ်ယူတာက သူ့ရဲ့ အာနိသင်ကို အမြင့်ဆုံး ဖြစ်စေတာပဲ။ ငါ့ရဲ့ ဝိညာဉ်စွမ်းအားက အဆင့် ၇၂ ကနေ အဆင့် ၇၅ အထိ တိုက်ရိုက် ခုန်တက်သွားတယ်”
“ငါက ဝိညာဉ်သူတော်စင်တစ်ယောက်လေ။ သာမန် ဝိညာဉ်အရိုးတစ်ခုတည်းကတော့ ငါ့ကို ဝိညာဉ်စွမ်းအား သုံးဆင့်အထိ ကျော်ဖြတ်သွားအောင် သေချာပေါက် လုပ်ပေးနိုင်မှာ မဟုတ်ဘူး။ ငွေပြာဘုရင်ရဲ့ ဝိညာဉ်ကွင်း နဲ့ ဝိညာဉ်အရိုးတို့ရဲ့ ပဲ့တင်ထပ်မှုကြောင့်သာ ဝိညာဉ်အရိုးကို စုပ်ယူတဲ့ အချိန်မှာ ကြီးမားတဲ့ အကျိုးကျေးဇူးတွေကို ရရှိစေခဲ့ပြီး ငါ့ကို ဝိညာဉ်စွမ်းအား သုံးဆင့် တစ်ပြိုင်နက်တည်း ကျော်ဖြတ်သွားစေနိုင်တာ”
“ပြီးတော့ ဒီစွမ်းရည်ကလည်း ငါ့ကို တကယ်ပဲ စိတ်မပျက်စေပါဘူး။ ငွေပြာ အာဏာရှင်လှံ lတဲ့။ အခု နောက်ဆုံးတော့ ငါ့မှာ ကိုယ်ပိုင် တိုက်ခိုက်ရေး စွမ်းရည်တစ်ခု ရပြီပေါ့”
“ငါက သဘာဝအရ အထောက်အကူပြု ဝိညာဉ်သခင် တစ်ယောက်ပဲ။ အပင် ဝိညာဉ်တွေရဲ့ ရစ်ပတ်တဲ့ စွမ်းရည်ကြောင့် ထိန်းချုပ်ရေး ဝိညာဉ်သခင် တစ်ယောက် အနေနဲ့လည်း လုပ်ဆောင်နိုင်တယ်။ အခု ငါ့မှာ ငွေပြာ အာဏာရှင်လှံ စွမ်းရည် ရှိလာပြီဆိုတော့ တိုက်ခိုက်ရေး ဝိညာဉ်သခင် တစ်ယောက် အနေနဲ့တောင် လုပ်ဆောင်နိုင်ပြီ”
“အခု ငါ့မှာ သိသာထင်ရှားတဲ့ အားနည်းချက်တွေ မရှိတော့ဘူး”