အခန်း (၅၈) ငွေပြာကိုယ်ပွား
ငွေပြာအင်ပါယာ အသစ် ရောက်ရှိလာခြင်းနှင့်အတူ။
ငွေပြာတောအုပ် တစ်ခုလုံးရှိ ငွေပြာမြက်ပင်များ အားလုံးသည် ပျော်ရွှင်စွာ အော်ဟစ်နေကြသည့်အလား သို့မဟုတ် အချင်းချင်း ဂုဏ်ပြုနေကြသည့်အလား ညင်သာစွာ တုန်ခါနေခဲ့ကြသည်။
လုချန် ငွေပြာအင်ပါယာ အသစ် ဖြစ်လာသည့်အတွက် အားပေးဂုဏ်ပြုကြခြင်းပင်။
ယခင် ငွေပြာအင်ပါယာဖြစ်သူ အားရင် သေဆုံးပြီးကတည်းက ဝိညာဉ်ကုန်းမြေတိုက်ကြီးရှိ ငွေပြာမြက်ပင်များ အားလုံးသည် အင်ပါယာ၏ အရှိန်အဝါကို တစ်ဖန် ပြန်လည် မခံစားခဲ့ရတော့ပေ။
ယခုအခါ လုချန်သည် အင်ပါယာအဖြစ် နန်းတက်လာသည်နှင့် တစ်ပြိုင်နက် ငွေပြာမြက်ပင်များ အားလုံး၏ ထောက်ခံမှုကို ချက်ချင်း ရရှိခဲ့၏။
ဤအချိန်တွင် တူကူပိုနှင့် တူကူရန် အဘိုးနှင့်မြေး နှစ်ယောက်စလုံးသည်လည်း လုချန်၏ အံ့မခန်း ပြောင်းလဲမှုကြောင့် အံ့အားသင့်နေခဲ့ကြ၏။
ဝိညာဉ်ကွင်းကို စုပ်ယူပြီးနောက် ဝိညာဉ်များ သက်ရောက်မှု ရှိမည်ကို သူတို့ သိထားကြသည်။
ဥပမာအားဖြင့် တူကူပိုနှင့် တူကူရန်တို့၏ မြစိမ်းရောင်မျက်လုံးများမှာ သူတို့၏ ကိုယ်ပိုင်ဝိညာဉ်ကြောင့် ဖြစ်လာခြင်းဖြစ်သည်။
သို့သော် လုချန်ကဲ့သို့ အလုံးစုံ ရုပ်ရည်သွင်ပြင် အဆရာပေါင်းများစွာ တိုးတက်လာပြီး ပြောင်းလဲမှုများ အားလုံးက ပိုမို ခန့်ညားပြီး ကြည့်ကောင်းလာခြင်းဟူသော အကြောင်းအရာကို ဗဟိုပြုနေသည်ကို မြင်တွေ့ရခြင်းမှာ အလွန် ရှားပါးလှပေသည်။
တူကူပိုမှာ အနည်းငယ် တော်သေး၏။ သူ အံ့အားသင့်သွားသော်လည်း အထူးတလည် စိတ်လှုပ်ရှားသွားခြင်းမျိုး မရှိပေ။
တူကူရန်ကမူ ကွဲပြားလေသည်။ သူမက ရုပ်ရည်ချောမောသူများကို အမြဲတမ်း စိတ်ဝင်စားလေ့ရှိပြီး ပြီးခဲ့သည့်အကြိမ်က လုချန် သူမ၏အဆိပ်ကို ကုသပေးခဲ့စဉ်ကတည်းက သူမ၏ စိတ်ထဲတွင် လုချန်အပေါ် အလွန် ရှုပ်ထွေးသော စိတ်ပိုင်းဆိုင်ရာ ပြောင်းလဲမှုများ ဖြစ်ပေါ်နေခဲ့သည်။
ယခု လုချန်၏ မျက်နှာ အစစ်အမှန်ကို မြင်လိုက်ရသောအခါ သူသည် အလွန် ငယ်ရွယ်နေပြီး သတ္တမမြောက် ဝိညာဉ်ကွင်းကို စုပ်ယူပြီးနောက် ပို၍ပင် ခန့်ညားလာခဲ့သည်။
တူကူရန်၏ မျက်လုံးများက တောက်ပနေပြီး သူမ၏ မြစိမ်းရောင် သူငယ်အိမ်များထဲတွင် ပန်းရောင် အသည်းပုံလေးများ တောက်ပနေလေသည်။
ကလေးများ မကြည့်သင့်သော ပုံရိပ်အချို့က သူမ၏ စိတ်ထဲတွင် ဖြတ်ပြေးသွားပြီး တူကူရန်ကို နက်ရှိုင်းစွာ လွှမ်းမိုးသွားကာ သူမ၏ ရင်ခုန်သံများ မြန်လာစေခဲ့သည်။
ယောက်ျားများသာ ရမ္မက်ကြီးသည် မဟုတ်။ မိန်းမများသည်လည်း ရမ္မက်ကြီးကြလေသည်။ အခြားသူတစ်ယောက်၏ ရမ္မက်ကို နှိုးဆွနိုင်ရန် လိုအပ်ချက် တစ်ခုတည်းမှာ လုံလောက်စွာ လှပချောမောနေရန်ပင်။
( ရုပ်ချောသူတို့တွေရဲ့ ဘဝ...)
လုချန်သည် တစ်နည်းအားဖြင့် ငြင်းပယ်၍မရအောင် ချောမောသူ ဖြစ်သည်။
ရုတ်တရက် လုချန်၏ မျက်ခွံများ လှုပ်ရှားသွားပြီး သူ မျက်လုံးဖွင့်လိုက်ရာ သူ၏ မျက်လုံးများမှာ ကြည်လင်ပြီး နက်ရှိုင်းသော အပြာရောင်အဖြစ် ပြောင်းလဲသွားခဲ့သည်။
သူ၏ မျက်လုံးများထဲတွင် အခြားကမ္ဘာတစ်ခုမှ ရောက်လာသကဲ့သို့ ကင်းကွာနေသော အရိပ်အယောင်တစ်ခု ရှိနေခဲ့သည်။
သူသည် ဝိညာဉ်ကွင်းကို စုပ်ယူစဉ်က ခံစားခဲ့ရသော နာကျင်မှုမှ ပြန်လည် မသက်သာသေးပုံရသည်။
ယခုတစ်ကြိမ် ဝိညာဉ်ကွင်းကို စုပ်ယူခြင်းမှ ရရှိသော အကျိုးကျေးဇူးများမှာ ကြီးမားသော်လည်း ခံစားခဲ့ရသော နာကျင်မှုမှာ ယခင်က ဝိညာဉ်ကွင်းများကို စုပ်ယူခဲ့စဉ်ကထက် ဆယ်ဆ သို့မဟုတ် အဆတစ်ရာခန့် ပိုမို ပြင်းထန်နေခဲ့သည်။
လုချန် သတိပြန်ဝင်လာရန် အချိန်အနည်းငယ် ယူလိုက်ရm။
ထို့နောက် မြေပြင်ကို လက်ဝါးဖြင့် ထောက်ကာ လေထဲသို့ ခုန်တက်လိုက်လေသည်။
သူ၏ လက်များ၊ ခြေထောက်များကို အနည်းငယ် လှုပ်ရှားလိုက်ရာ သူ၏ တစ်ကိုယ်လုံးမှ အရိုးအဆစ်မြည်သံများ ထွက်ပေါ်လာပြီး သူ့ကို အလွန် သက်တောင့်သက်သာ ရှိသွားစေခဲ့သည်။
ထိုအချိန်တွင် တူကူရန်သည် ရုတ်တရက် တောက်ပသော အပြုံးဖြင့် ရှေ့သို့ တိုးလာလေသည်။ သူမ၏ မျက်လုံးလေးများ အနည်းငယ် ကျဉ်းသွားပြီး နူးညံ့စွာ ပြောလိုက်၏။
“အဘိုး လန်ချန်... သက်တမ်း ရှစ်သောင်းကျော်ရှိတဲ့ သတ္တမမြောက် ဝိညာဉ်ကွင်းကို အောင်မြင်စွာ စုပ်ယူနိုင်ခဲ့တဲ့အတွက် ဂုဏ်ယူပါတယ်”
ယင်းကို ကြားသောအခါ လုချန်က ပြုံးကာ ပြန်ဖြေလိုက်သည်။
“ကံကောင်းသွားလို့ပါ။ အကယ်လို့ အရင်က အင်မော်တယ် ဆေးမြစ်သုံးခုကို မစားထားခဲ့ဘူးဆိုရင် ဒီတစ်ခါ ဝိညာဉ်ကွင်းကို စုပ်ယူဖို့ သေချာပေါက် ကျရှုံးမှာပဲ.. ပြီးတော့ ဝိညာဉ်ကွင်းရဲ့ စွမ်းအင်တွေကြောင့် ငါ ပေါက်ကွဲပြီး သေသွားလောက်တယ်”
ယင်းကို ကြားသောအခါ တူကူရန်၏ အမူအရာက ရုတ်တရက် ပြောင်းလဲသွားရသည်။ သူမ၏ ပြုံးနေသော မျက်နှာမှာ ရေခဲလို အေးစက်သွားပြီး လုချန်ကို သတ်ဖြတ်လိုသော အကြည့်ဖြင့် စိုက်ကြည့်လိုက်လေသည်။ ထို့နောက် သူမက လက်သီးဆုပ်ကာ လုချန်ကို ထိုးလိုက်၏။
“ရှင်က တကယ် ပြန်ထူးရဲတယ်ပေါ့... ယုတ်မာတဲ့ ကောင်စုတ်လေး။ ရှင်က ကျွန်မထက် သေချာပေါက် ငယ်နေတာကို ရှင့်ကို အဘိုးလို့ ခေါ်တာကို လုံးဝ ပုံမှန်လိုလို ခံယူနေတယ်ပေါ့”
“အား... ဒီလက်သီးကို ယူလိုက်စမ်း”
တူကူရန်မှာ အငြိုးထားနေခဲ့သဖြင့် ချက်ချင်းပင် ၎င်းကို ထုတ်ဖော်လိုက်ခြင်းပင်။
တူကူရန်၏ စကားများကို ကြားသောအခါမှ လုချန်သည် ငွေပြာနယ်ပယ်၏ အသွင်ဖျောက်နိုင်စွမ်းမှာ မည်သို့ပင်ဖြစ်စေ ပျက်ပြယ်သွားခဲ့ပြီဖြစ်ကြောင်း နောက်ကျမှ သဘောပေါက်သွားရသည်။
သူက စိတ်ထဲမှ တွေးလိုက်၏။ ‘ဒါတော့ ဆိုးပြီ။ တူကူပို နဲ့ တူကူရန်တို့ အမှန်တရားကို သိသွားပြီဆိုတော့ ငါ အလစ်အငိုက် မိတော့မယ်’
အရင်က တူကူရန် သူ့ကို အဘိုးလို့ ခေါ်တုန်းက သူ အလွယ်တကူ လက်ခံခဲ့သည်။
ယခု တူကူရန် အမှန်တရားကို သိသွားပြီဆိုတော့ အရိုက်ခံရန်မှလွဲ၍ အခြား ရွေးချယ်စရာ မရှိတော့ချေ။
တူကူရန်၏ ထိုးလာသော လက်သီးကို ရင်ဆိုင်ရချိန်တွင် လုချန်က အကူအညီမဲ့စွာ ပြုံးလိုက်ပြီး ညာလက်ကို မြှောက်ကာ ထိုးလာသော လက်သီးကို ဖမ်းဆုပ်လိုက်လေသည်။
“ယန်ယန်... ငါ့ကို ရှင်းပြခွင့် ပေးပါ။ ငါ့မှာ ငါ့အကြောင်းပြချက်နဲ့ငါ ရှိပါတယ်”
တူကူရန်က သူ့ကို လုံးဝ ဂရုမစိုက်ပေ။ သူမ၏ ညာဘက်လက်သီး အဖမ်းခံလိုက်ရသော်လည်း သူမက ဘယ်ဘက်လက်သီးဖြင့် ဆက်လက် ထိုးလေတော့သည်။
လုချန်က အလျင်အမြန် တုံ့ပြန်လိုက်သည်။ သူ၏ လွတ်နေသော ဘယ်ဘက်လက်က လျှပ်စီးကဲ့သို့ ပစ်ထွက်သွားပြီး တူကူရန်၏ လက်ကောက်ဝတ်ကို ဖမ်းဆုပ်လိုက်ပြန်သည်။
တူကူရန်၏ လက်နှစ်ဖက်စလုံး အချုပ်ခံလိုက်ရပြီး လုချန်၏ ခွန်အားမှာ ကြောက်မက်ဖွယ် ကောင်းလှသဖြင့် သူမ ရုန်းထွက်ရန် မဖြစ်နိုင်ပေ။
တူကူရန်၏ မျက်နှာလေးမှာ သတ်ဖြတ်လိုစိတ်များဖြင့် ပြည့်နှက်နေခဲ့သည်။ သူမက တကယ် ဒေါသထွက်နေခြင်း မဟုတ်သော်လည်း လုချန်ကို အဘိုးဟု အချိန်အကြာကြီး ခေါ်ခဲ့ရသဖြင့် သူမ လက်စားချေရပေမည်။
ထို့နောက် သူမက ညာဘက်ခြေထောက်ဖြင့် ကန်ထည့်လိုက်ရာ လုချန်၏ ပေါင်ကြားဆီသို့ ဦးတည်သွားလေသည်။
တူကူရန်သည် သူမ၏ကန်ချက်က မည်မျှ အန္တရာယ်ကြီးကြောင်း သတိမထားမိပေ။
သို့သော် လုချန်က သတိထားမိခဲ့သည်။
လုချန်၏ အမူအရာက လေးနက်သွားခဲ့သည်။ တူကူရန်၏ မျိုးဆက်ပြတ် ကန်ချက်ကို သူ လုံးဝ အထိခံမည် မဟုတ်ပေ။
ရုတ်တရက် အားစိုက်လိုက်ပြီး သူက တူကူရန်ကို သူမ၏ ကျောပြင်က သူ့ဘက်လှည့်သွားအောင် ဆွဲလှည့်လိုက်ကာ သူမ၏ လည်ပင်းကို လက်မောင်းဖြင့် ရစ်ပတ်ပြီး သူမကို ရင်ခွင်ထဲတွင် တင်းကျပ်စွာ ပွေ့ဖက်ထားလိုက်၏။
ထို့နောက် လုချန်က လေးနက်သော အမူအရာဖြင့် ပြောလိုက်သည်။
“ယန်ယန်... မင်းရဲ့ ကန်ချက်က နောက်ပြောင်နေတာ မဟုတ်ဘူး။ မင်း ဘာပဲ လုပ်ချင်လုပ်ချင်... ငါ့ကို ရိုက်မလား... ဆဲမလား... ငါ အကုန်ခံပါ့မယ်။ ဒါပေမဲ့ အခု မင်း စိတ်အေးအေးထားဖို့ လိုတယ်”
တူကူရန်သည် လုချန်၏ ရင်ခွင်ထဲသို့ ဆွဲသွင်းခံလိုက်ရပြီး သူမ၏ ကျောပြင်က မာကျောပြီး ခိုင်မာကာ နွေးထွေးသော နံရံတစ်ခုနှင့် ထိကပ်နေသည်ကို ခံစားလိုက်ရသည်။
နွေးထွေးမှုများက တူကူရန်၏ ခန္ဓာကိုယ်သို့ ပျံ့နှံ့သွားပြီး သူမ၏ ခန္ဓာကိုယ်မှာ ပူလောင်လာသကဲ့သို့ ခံစားရစေခဲ့သည်။ သူမ၏ ပါးပြင်များ နီရဲလာပြီး သူမ၏ အမူအရာမှာ အနည်းငယ် တွေဝေသွားလေသည်။
စောစောက သူမ ခံစားခဲ့ရသော အနည်းငယ်သော ဒေါသများမှာ လေထဲတွင် ပျောက်ကွယ်သွားခဲ့ပြီ ဖြစ်သည်။
မွှေးလိုက်တာ။
ယခု တူကူရန်၏ စိတ်ထဲတွင် ဤအတွေး တစ်ခုတည်းသာ ရှိတော့ပေသည်။
လုချန်၏ ငွေပြာဘုရင်ဝိညာဉ်သည် ငွေပြာအင်ပါယာ အဖြစ် ဆင့်ကဲပြောင်းလဲသွားပြီးနောက် ယခုအခါ သူ၏ တစ်ကိုယ်လုံးမှ သက်စောင့်အသက်သွေး စွမ်းအင်များကို ထုတ်လွှတ်နေခဲ့သည်။
ဤသက်စောင့်အသက်သွေး စွမ်းအင်၏ ရနံ့မှာ လတ်ဆတ်ပြီး သဘာဝဆန်ကာ တကယ်ကို ကောင်းမွန်လှသည်။
ယခုအခါ တူကူရန်သည် ဤသက်စောင့်အသက်သွေး စွမ်းအင်၏ လွှမ်းခြုံမှုကို ခံထားရသဖြင့် သူမသည် တောအုပ် သို့မဟုတ် တောရိုင်းထဲတွင် ရောက်နေသကဲ့သို့ ခံစားရပြီး သူမ၏ စိတ်အခြေအနေမှာလည်း ပိုမို ကောင်းမွန်လာခဲ့ရသည်။
သို့သော် လူတစ်ယောက်၏ မျက်နှာမှာ မည်းမှောင်သွားခဲ့ပြီး ထိုသူမှာ တူကူပိုပင်။
တူကူရန်နှင့် လုချန်တို့ ပွေ့ဖက်နေသည်ကို မြင်သောအခါ တူကူပို၏ မျက်နှာမှာ ဒယ်အိုးမည်းကဲ့သို့ မည်းမှောင်သွားခဲ့ရသည်။
သူက ပြင်းထန်စွာ ချောင်းဆိုးလိုက်၏။
“အဟွတ် အဟွတ်... အဟွတ် အဟွတ် အဟွတ်...”
သူရှိနေကြောင်းကို သိစေရန်အတွက် အသုံးပြုခြင်းပင်။
ထိုချောင်းဆိုးသံကို ကြားလိုက်ရသောအခါ တူကူပို မည်မျှ ဒေါသထွက်နေမည်ကို လုချန် စိတ်ကူးကြည့်နိုင်လေသည်။
သူက ရှက်ကိုးရှက်ကန်း အပြုံးဖြင့် တူကူရန်ကို အလျင်အမြန် လွှတ်ပေးလိုက်ရသည်။
လွှတ်ပေးပြီးနောက် တူကူရန်က နှုတ်ခမ်းကို ကိုက်ကာ လုချန်ကို စိုက်ကြည့်လိုက်သော်လည်း ဒေါသထွက်နေသည့် အရိပ်အယောင် လုံးဝမရှိဘဲ နောက်ပြောင်ချင်စိတ်နှင့် ချစ်စရာကောင်းမှုများသာ ရှိနေခဲ့သည်။
ထို့နောက် သူမက မျက်နှာကို ဖုံးကာ ဘေးသို့ ထွက်သွားခဲ့သည်။
တူကူပိုက တူကူရန်၏ လမ်းကို ပိတ်ကာ ရှေ့သို့ လျှောက်လာပြီး သူ၏ မျက်လုံးများက လုချန်ကို အလွန်အမင်း သတိထားကာ စိုက်ကြည့်နေခဲ့သည်။ သူက စကားလွှဲကာ အလျင်အမြန် ပြောလိုက်၏။
“လန်ချန် ညီလေး... အာ ထားလိုက်ပါတော့... မင်းရဲ့ ဒီလောက် ငယ်ရွယ်တဲ့ မျက်နှာကို ကြည့်ပြီး မင်းကို ညီလေးလို့ ငါ ဆက်မခေါ်နိုင်တော့ဘူး”
“လန်ချန်... မင်း ဒီ သက်တမ်း ရှစ်သောင်းရှိတဲ့ ဝိညာဉ်ကွင်းကို အောင်မြင်စွာ စုပ်ယူနိုင်ခဲ့တာပဲ။ ဂုဏ်ယူပါတယ်။ တကယ့် အာနိသင်က ဘယ်လိုနေလဲ။ ဘုံခုနစ်ဆင့် ပြဿာဒ်ဂိုဏ်းက ဓားတိုလော နဲ့ အရိုးတိုလော တို့ကို ငါ ရင်ဆိုင်နိုင်အောင် ကူညီပေးနိုင်မယ်လို့ ယုံကြည်မှု ရှိလား”
ခေတ္တမျှ တုံ့ဆိုင်းနေပြီးနောက် လုချန်က ပွင့်ပွင့်လင်းလင်း ပြောလိုက်၏။
“ပြဿနာ မရှိပါဘူး။ ဒီ ငွေပြာဘုရင်ဝိညာဉ်ကွင်က ကျွန်တော့်ရဲ့ ဝိညာဉ်ကို ငွေပြာဘုရင်ကနေ ငွေပြာအင်ပါယာအဖြစ် ဆင့်ကဲပြောင်းလဲစေခဲ့ရုံသာမကဘဲ ကျွန်တော့်အတွက် အသင့်တော်ဆုံး ဝိညာဉ်ကိုယ်ပွား စွမ်းရည်ကိုပါ ဖွင့်ပေးခဲ့ပါတယ်”
“ငွေပြာကိုယ်ပွားကို အသုံးပြုရင် ကျွန်တော့်ရဲ့ ပထမ ဝိညာဉ်စွမ်းရည် ခြောက်ခုကို ၁၀၀ ရာခိုင်နှုန်း မြှင့်တင်ပေးနိုင်တယ်... အဲဒါက ကျွန်တော့်ရဲ့ အထောက်အကူပြု စွမ်းရည်တွေကို ကြီးမားစွာ တိုးတက်စေပြီး ငွေပြာအင်ပါယာအဖြစ်လည်း ကိုယ်ပွားဖန်တီးနိုင်ပါတယ်။ ပြီးတော့ ရန်သူတွေရဲ့ တိုက်ခိုက်မှုတွေကို ရှောင်လွှဲနိုင်ဖို့ အဲဒီမှာရှိတဲ့ ငွေပြာအင်ပါယာတွေ အားလုံးကို ကျွန်တော့်ရဲ့ လက်ခံရာ နေရာတွေအဖြစ် လုပ်နိုင်ပါတယ်”
“ကျွန်တော့် နယ်ပယ်ရဲ့ စွမ်းအားနဲ့ ဘယ် ငွေပြာမြက်ပင် ကိုမဆို ငွေပြာအင်ပါယာအဖြစ် ပြောင်းလဲနိုင်ပါတယ်။ တစ်နည်းအားဖြင့် ပြောရရင် ကျွန်တော်က ငွေပြာနယ်ပယ်ထဲမှာ ဝိညာဉ်ကိုယ်ပွား ကို အသုံးပြုပြီး နေရာတိုင်းမှာ ရှိနေနိုင်ပါတယ်”
“အကယ်လို့ ရန်သူက ကျွန်တော့်ကို သတ်ချင်ရင် အဲဒီနေရာမှာရှိတဲ့ ငွေပြာမြက်ပင်တွေ အားလုံးကို ဖျက်ဆီးပစ်ရမယ်။ သေချာတာပေါ့... အဲဒီလုပ်ငန်းစဉ်အတွင်းမှာ ကျွန်တော်က ငွေပြာမြက်ပင်တွေရဲ့ ကြီးထွားမှုကို အရှိန်မြှင့်တင်ပေးနိုင်တယ်”
“အဲဒါက လမ်းကြောင်းကို ပိတ်လိုက်တာပဲ။ ဧရိယာကျယ်ကျယ် တိုက်ခိုက်နိုင်တဲ့ စွမ်းရည်ကို သုံးပြီး ငွေပြာမြက်ပင်တွေ အားလုံးကို တစ်ပြိုင်နက်တည်း မဖျက်ဆီးနိုင်ဘူးဆိုရင် အတိုင်းအတာ သေးသေးလေးလောက် ဖျက်ဆီးတာဆိုရင်တော့ ကျွန်တော် ငွေပြာမြက်ပင်တွေ ထပ်ဖန်တီးတာလောက် မမြန်ဘူး”
“ဓားတိုလော နဲ့ အရိုးတိုလောတို့နဲ့ တွေ့ရင် ကျွန်တော် ငွေပြာကိုယ်ပွားကို အသုံးပြုပြီး ပုန်းနေမယ်... ပြီးတော့ ညီအစ်ကို တူကူကို အပြည့်အဝ အထောက်အကူ ပေးမယ်။ သူတို့ကို တကယ် အနိုင်ယူဖို့ ခက်ကောင်းခက်နိုင်ပေမဲ့ သူတို့လည်း ညီအစ်ကို့ကို အလွယ်တကူ အနိုင်ယူနိုင်ဖို့ မမျှော်လင့်သင့်ဘူး.. အဲဒီအတွက် ကျွန်တော် ယုံကြည်မှု ရှိပါတယ်”
“ဒါ့အပြင် ကျွန်တော့်ရဲ့ ငွေပြာနယ်ပယ်ကလည်း စွမ်းရည်သစ် တစ်ခု ရလာတယ်။ အားလုံးကို လွှမ်းခြုံနိုင်တဲ့ တောအုပ်လို့ ခေါ်တယ်။ အဲဒါက ကျွန်တော့်ကို ၂၀ ရာခိုင်နှုန်း မြှင့်တင်ပေးနိုင်ပြီး ရန်သူတွေရဲ့ ခွန်အားကို ၂၀ ရာခိုင်နှုန်း လျှော့ချပစ်နိုင်တယ်”
“ဒါက အခြေခံအကျဆုံးပဲ။ အကယ်လို့ ကျွန်တော်တို့ တောအုပ် ဒါမှမဟုတ် မြက်ခင်းပြင်၊ ငွေပြာမြက်ပင် ပေါများတဲ့ နေရာတွေမှာ ရောက်နေရင် ငွေပြာမြက်ပင်ရဲ့ စွမ်းအားကို အသုံးပြုပြီး ကိုယ့်ကိုယ်ကိုယ် မြှင့်တင်ပေးတဲ့ အာနိသင်နဲ့ ရန်သူကို ဖိနှိပ်တဲ့ အာနိသင်တွေကို ၃၀ ရာခိုင်နှုန်း၊ ၅၀ ရာခိုင်နှုန်း၊ ၈၀ ရာခိုင်နှုန်း... ဒါမှမဟုတ် ၁၀၀ ရာခိုင်နှုန်းအထိတောင် ဆက်ပြီး မြှင့်တင်နိုင်သေးတယ်