အခန်း (၅၇) အသစ်ခန့်အပ်ခံရသော ငွေပြာအင်ပါယာ
လုချန်သည် ငွေပြာဘုရင် ဝိညာဉ်ကွင်းကို စတင် စုပ်ယူလိုက်သည်နှင့် တစ်ပြိုင်နက် သမုဒ္ဒရာကြီးတစ်ခုကဲ့သို့ ကြီးမားလှသော စွမ်းအင်လှိုင်းတစ်ခုက သူ၏ ခန္ဓာကိုယ်ကို လျင်မြန်စွာ လွှမ်းခြုံသွားခဲ့၏။
ငွေပြာဘုရင်သည် ကျင့်ကြံမှု သက်တမ်း ၈၅,၀၀၀ ရှိပေသည်။
ထို့ကြောင့် ဝိညာဉ်ကွင်းတွင် စုဆောင်းထားသော ကြီးမားလှသည့် စွမ်းအင်များက အသက်ရှူချိန် အနည်းငယ်အတွင်းမှာပင် လုချန်ကို လွှမ်းမိုးသွားခဲ့သည်။ သူ၏ သွေးကြောလမ်းကြောင်းများမှာ အပြည့်အမောက် ဖြစ်သွားခဲ့ရသည်။
သူ၏ ခန္ဓာကိုယ်မှာ အဆက်မပြတ် လေထိုးသွင်းခံနေရသော ပူဖောင်းတစ်ခုကဲ့သို့ ခေါင်းမှ ခြေဖျားအထိ အလျင်အမြန် ဖောင်းကားလာခဲ့သည်။
လုချန်သည် ဝိညာဉ်ကွင်းများကို စုပ်ယူသည့်အခါ ဤကဲ့သို့ အန္တရာယ်များသော အခြေအနေမျိုးကို ယခင်က တစ်ကြိမ်မှ မကြုံတွေ့ခဲ့ဖူးပေ။
ဝိညာဉ်ကွင်းကို စုပ်ယူစဉ် သူ သတိမထားမိပါက သူ၏ ခန္ဓာကိုယ်မှာ ထိုဖိအားများကြောင့် ပေါက်ကွဲသွားနိုင်သည်။
နာကျင်လိုက်တာ။
ပြင်းထန်လှသော နာကျင်မှုများက လုချန်၏ ဦးခေါင်းထိပ်အထိ ထိုးတက်သွားပြီး သူ၏ ဦးရေပြားကို ထုံကျဉ်သွားစေခဲ့သည်။
ကံကောင်းထောက်မစွာဖြင့် သူ၏ သွေးကြောလမ်းကြောင်းများ၊ အရိုးများ၊ ကြွက်သားများနှင့် အရေပြားများ အားလုံးမှ ယခုအချိန်တွင် မှေးမှိန်သော ရွှေရောင် အလင်းတန်းတစ်ခု ဖြာထွက်လာခဲ့သည်။
ထိုအရာများမှာ သူ၏ ရွှေရောင်ခန္ဓာကိုယ်ကို ဖန်တီးပေးခဲ့သော အင်မော်တယ် ဆေးမြစ်နှစ်ခုဖြစ်သည့် ရှစ်ထောင့် ရေခဲနက် မြက်ပင် နှင့် ရဲရဲတောက် မီးလျှံပန်း တို့၏ အာနိသင်များပင်။ သူ၏ ရွှေရောင် ခန္ဓာကိုယ်၏ ကြံ့ခိုင်မှုကြောင့်သာ ထိုကြီးမားလှသော စွမ်းအင်များနှင့် တစ်လှိုင်းပြီးတစ်လှိုင်း ရိုက်ခတ်လာသော ဖိအားများကို အနိုင်နိုင် ခံနိုင်ရည်ရှိနေခြင်း ဖြစ်သည်။
မဟုတ်ပါက သူ၏ ခန္ဓာကိုယ်မှာ သေချာပေါက် ပေါက်ကွဲသွားပေလိမ့်မည်။
ထိုအချိန်ကျမှသာ လုချန်သည် ယခင်က ဝိညာဉ်ကွင်းခြောက်ခုကို စုပ်ယူခဲ့စဉ်က သူ မည်မျှ ကံကောင်းခဲ့ကြောင်း သဘောပေါက်သွားခဲ့ရသည်။
ထိုအချိန်က သူသည် ဝိညာဉ်ကွင်း မရှိခဲ့သော်လည်း သူ၏ အတွင်းတွင် အဆင့် ၆၀ ဝိညာဉ်စွမ်းအား များ ငုပ်လျှိုးနေခဲ့သဖြင့် ဝိညာဉ်ကွင်းများကို အလွယ်တကူ စုပ်ယူနိုင်ခဲ့ခြင်း ဖြစ်သည်။
သို့သော် ယခုအချိန်တွင် သူသည် အဆင့် ၇၀ ဝိညာဉ်စွမ်းအားသာ ရှိပြီး ဤ သက်တမ်း ၈၅,၀၀၀ ရှိ ဝိညာဉ်ကွင်းကို ဖိနှိပ်ရန် အကူအညီပေးမည့် အပို ဝိညာဉ်စွမ်းအား မရှိသောကြောင့် ၎င်းကို စုပ်ယူရန် ဤမျှ ခက်ခဲနေခြင်းပင်။
ဤအခြေအနေတွင် ယခင်က ကန့်သတ်ချက်ထက် ကျော်လွန်၍ စုပ်ယူခဲ့သော ဝိညာဉ်ကွင်းခြောက်ခုကြောင့် သူ၏ ခန္ဓာကိုယ်မှာ ကြီးမားစွာ ကြံ့ခိုင်လာခဲ့ခြင်းကို ကျေးဇူးတင်ရပေမည်။ ထို့အပြင် ရှစ်ထောင့် ရေခဲနက် မြက်ပင် နှင့် ရဲရဲတောက် မီးလျှံပန်း ဟူသော အင်မော်တယ် ဆေးမြစ်နှစ်ခုကို စုပ်ယူထားခြင်းကလည်း သူ၏ ခန္ဓာကိုယ်ကို ပို၍ ကြံ့ခိုင်လာစေခဲ့သည်။
ဤသို့ဖြင့် သူ၏ ခန္ဓာကိုယ် ချက်ချင်း ပေါက်ကွဲမသွားအောင် ကာကွယ်နိုင်ခဲ့ခြင်း ဖြစ်သည်။
လုချန်က သွားကိုကျိတ်ကာ စိတ်ထဲမှ ပြတ်သားစွာ တွေးလိုက်၏။
‘အခု နောက်ကြောင်းပြန်လှည့်လို့ မရတော့ဘူး။ ငါက ငွေပြာဘုရင်ရဲ့ ဝိညာဉ်ကွင်းကို စုပ်ယူပြီးသွားပြီဆိုတော့ အဲဒါကို ပြန်ထွေးထုတ်ဖို့ လုံးဝ မဖြစ်နိုင်တော့ဘူး’
‘ဒီ ဝိညာဉ်ကွင်းရဲ့ ကြီးမားလှတဲ့ စွမ်းအင်တွေက ငါ့ကို ဖောင်းကားနေတဲ့ ဘောလုံးကြီး တစ်လုံးလို ဖြစ်သွားစေပေမဲ့ နောက်ဆုံးမှာတော့ ငါ့ခန္ဓာကိုယ်ကို ပေါက်ကွဲသွားအောင် မလုပ်နိုင်ခဲ့ဘူး။ ဒါကြောင့် အဲဒါကို အောင်မြင်အောင် သန့်စင်ဖို့ ငါ့မှာ အခွင့်အရေး ရှိသေးတယ်’
၎င်းကို တွေးပြီးနောက် လုချန်သည် သူ၏ ငွေပြာဘုရင်ဝိညာဉ်ကို ထိုကြီးမားလှသော စွမ်းအင်များကို အဆက်မပြတ် မျိုချ သန့်စင်စေရန် အပြင်းအထန် တိုက်တွန်းလိုက်လေသည်။
ယခုအချိန်တွင် သူ၏ ငွေပြာဘုရင်ဝိညာဉ်သည် ဆယ်ရက်၊ ဆယ့်ငါးရက်ခန့် အစာငတ်နေသော သားရဲကြီး တစ်ကောင်ကဲ့သို့ ငွေပြာဘုရင်၏ ဝိညာဉ်ကွင်းကို မျိုချနေခဲ့သည်။ ထို ဝိညာဉ်ကွင်း၏ စွမ်းအင်များကို သန့်စင်နိုင်မည်၊ မနိုင်မည်ကို ၎င်းက ဂရုမစိုက်ဘဲ အဆက်မပြတ် မျိုချနေခဲ့သည်။
သူ၏ ငွေပြာဘုရင်ဝိညာဉ်မှာ အလွန် စိတ်လှုပ်ရှားနေခဲ့သည်။ ၎င်း၏ တစ်သက်တာလုံးတွင် ဤမျှ အရသာရှိသော စွမ်းအင်မျိုးကို တစ်ခါမှ မမြည်းစမ်းဖူးခဲ့ပေ။
သူ၏ ငွေပြာဘုရင်ဝိညာဉ်သည် မူလက သာမန် ငွေပြာမြက်ပင်ဝိညာဉ် တစ်ခုသာ ဖြစ်ခဲ့သည်။
ယင်းမှာ လုချန်၏ ယခင် ဝိညာဉ်ကွင်းခြောက်ခုစလုံးက အကြိမ်တိုင်းတွင် ကန့်သတ်ချက်ထက် ကျော်လွန်၍ စုပ်ယူခဲ့သောကြောင့် စုပ်ယူခဲ့သော ဝိညာဉ်ကွင်းများ၏ စုစုပေါင်း သက်တမ်းမှာ နှစ်တစ်သိန်းအထိ ရောက်ရှိသွားခဲ့ခြင်းကြောင့် ဖြစ်သည်။
ထို့အပြင် ၎င်းစုပ်ယူခဲ့သည်များမှာ အားကောင်းသော သက်စောင့်အသက်သွေး စွမ်းအင်များရှိသည့် အပင် အမျိုးအစား ဝိညာဉ်သားရဲများ၏ ဝိညာဉ်ကွင်းများသာ ဖြစ်သဖြင့် နောက်ဆုံးတွင် ငွေပြာဘုရင်ဝိညာဉ် အဖြစ်သို့ ဆင့်ကဲပြောင်းလဲသွားခဲ့ခြင်း ဖြစ်သည်။
ယခု ပြဿနာမှာ သူ၏ ငွေပြာဘုရင်ဝိညာဉ်သည် အခြား အပင်အမျိုးအစား ဝိညာဉ်သားရဲများ၏ ဝိညာဉ်ကွင်းများကိုသာ စုပ်ယူခဲ့ပြီး ငွေပြာမြက်ပင် အမျိုးအစား ဝိညာဉ်သားရဲ၏ ဝိညာဉ်ကွင်းကို တစ်ခါမှ မစုပ်ယူဖူးခြင်းကြောင့် အခြေခံ မခိုင်မာခြင်း၊ အရင်းအမြစ် မတည်ငြိမ်ခြင်းနှင့် အရေးကြီးသော ငွေပြာ သွေးဆက် မရှိခြင်းတို့ကြောင့် ငွေပြာအင်ပါယာ အဆင့်သို့ မရောက်ရှိနိုင်ခြင်း ဖြစ်သည်။
မဟုတ်ပါက ပြီးခဲ့သည့် အကြိမ်က ငွေပြာဘုရင် အဆင့်တွင် ရပ်တန့်နေမည့်အစား ငွေပြာအင်ပါယာ အဖြစ်သို့ ဆင့်ကဲပြောင်းလဲသွားပေမည်။
ဤ ငွေပြာဘုရင်သည် ကျင့်ကြံမှု သက်တမ်း ၈၅,၀၀၀ ရှိပြီး ယခင် ငွေပြာအင်ပါယာဖြစ်သူ အားရင် သေဆုံးပြီးနောက် အသန့်စင်ဆုံး သွေးဆက်၊ အကြွယ်ဝဆုံး အခြေခံနှင့် အတည်ငြိမ်ဆုံး အရင်းအမြစ်များကို ပိုင်ဆိုင်ထားကာ ငွေပြာအင်ပါယာအဆင့်သို့ ရောက်ရှိရန် အခွင့်အရေး အများဆုံးပင်။
ထန်စန်းပင်လျှင် ငွေပြာဘုရင်ကို မယှဉ်နိုင်ပေ။ သူသည် ငွေပြာအင်ပါယာ၏ သွေးမျိုးဆက် ဖြစ်သော်လည်း လူတစ်ဝက်၊ ဝိညာဉ်သားရဲတစ်ဝက် ဖြစ်သဖြင့် သူ၏ သွေးဆက်မှာ လုံလောက်စွာ မသန့်စင်ပေ။
အကြောင်းအမျိုးမျိုးကြောင့် ငွေပြာဘုရင်သည် ငွေပြာအင်ပါယာအပေါ် သစ္စာရှိခြင်းကြောင့် ဖြစ်စေ၊ သို့မဟုတ် ထန်ဟောက်၏ ခြိမ်းခြောက်မှုကို ကြောက်ရွံ့ခြင်းကြောင့်ဖြစ်စေ နောက်ဆုံးတွင် ငွေပြာအင်ပါယာအဖြစ် ဆင့်ကဲပြောင်းလဲမည့် အခွင့်အရေးကို ထန်စန်းထံသို့ ပေးအပ်ခဲ့ခြင်း ဖြစ်ပေမည်။
အကယ်၍ ငွေပြာဘုရင်သာ သူ၏ နေရာကို စွန့်လွှတ်ရန် မကမ်းလှမ်းခဲ့ပါက ထန်စန်းသည် သူ၏ လူတစ်ဝက်၊ ဝိညာဉ်သားရဲတစ်ဝက် သွေးမျိုးဆက်ဖြင့် တိရစ္ဆာန်အမျိုးအစား ဝိညာဉ်သားရဲများ၏ ဝိညာဉ်ကွင်းများကိုသာ စုပ်ယူခဲ့ခြင်းကြောင့် လုံးဝ ကွဲပြားသွားမည် ဖြစ်သည်။ သူသည် ငွေပြာအင်ပါယာ အဖြစ် ဆင့်ကဲပြောင်းလဲလိုလျှင်တောင် နောက်ဘဝတွင်ပင် ဖြစ်နိုင်မည် မဟုတ်ချေ။
သို့သော် ယခုအခါ ငွေပြာဘုရင်ကို လုချန်က သတ်ဖြတ်လိုက်ပြီး လုချန်က ငွေပြာဘုရင်၏ ဝိညာဉ်ကွင်းကို စုပ်ယူနေပြီဖြစ်သည်။
ထို ဝိညာဉ်ကွင်း၏ အတွင်းတွင် ငွေပြာဘုရင်၏ အသန့်စင်ဆုံး သွေးမျိုးဆက်စွမ်းအင်များ တည်ရှိနေပြီး ၎င်းမှာ လုချန် ယခုအချိန်တွင် အလိုအပ်ဆုံး အရာပင် ။
သူ၏ ငွေပြာဘုရင်ဝိညာဉ်သည် ဤ သွေးမျိုးဆက် စွမ်းအင်ကို စုပ်ယူပြီးနောက် ၎င်း၏ သက်ရှိ အဆင့်မှာ စတင် အသွင်ပြောင်းလာခဲ့သည်။
၎င်းမှာ ဘုရင်မှသည် အင်ပါယာအဖြစ်သို့ တကယ့် အသွင်ပြောင်းခြင်းပင်။
သို့သော် အပြင်ဘက်တွင်မူ။
ဘောလုံးကြီး တစ်လုံးကဲ့သို့ ဖောင်းကားနေသော လုချန်ကို ကြည့်ကာ တူကူပိုနှင့် တူကူရန်တို့သည် စိုးရိမ်ပူပန်မှု အရိပ်အယောင်များ မပြဘဲ မနေနိုင်ကြပေ။
တူကူရန်က တိုးတိုးလေး မေးလိုက်၏။
“အဘိုး... အဘိုးလန်ချန်က တကယ်ကို သူ့ကိုယ်သူ အရမ်း ဖိအားပေးနေတာပဲ။ သူက သတ္တမမြောက် ဝိညာဉ်ကွင်းအတွက် သက်တမ်း ရှစ်သောင်းရှိတဲ့ ဝိညာဉ်သားရဲကို စုပ်ယူဖို့ တကယ် ကြိုးစားနေတာ။ သူ့ရဲ့ ဝိညာဉ်ကွင်းက ဘယ်အချိန်မဆို ပေါက်ကွဲထွက်သွားမယ့် ပုံပေါက်နေတယ်”
တူကူပိုက ခေါင်းခါလိုက်ပြီး ပြောလိုက်သည်။
“ရှောင်လွှဲလို့မရတဲ့ အကြောင်းပြချက် တချို့ ရှိလို့ ဖြစ်မှာပါ။ သက်တမ်း ရှစ်သောင်းကျော်ရှိတဲ့ ဝိညာဉ်သားရဲရဲ့ ဝိညာဉ်ကွင်းကို စုပ်ယူတာက သူ့ကို ချက်ချင်း ပေါက်ကွဲမသွားစေတာကတင် သတင်းကောင်းပဲ။ သူ တကယ်ပဲ အောင်မြင်ကောင်း အောင်မြင်နိုင်တယ်”
တူကူပိုနှင့် တူကူရန် အဘိုးနှင့်မြေး နှစ်ယောက် စကားပြောနေစဉ် လုချန်ဘက်တွင် ပြောင်းလဲမှု အချို့ ဖြစ်ပေါ်လာခဲ့သည်။
ယခုအခါ သူ၏ စိတ်အာရုံမှာ ငွေပြာဘုရင်၏ ဝိညာဉ်ကွင်းကို စုပ်ယူရန်အတွက်သာ အာရုံစိုက်နေရသောကြောင့် သူ၏ အသွင်အပြင်ကို ဖုံးကွယ်ထားရန် ငွေပြာနယ်ပယ်ကို ဆက်လက် မထိန်းသိမ်းထားနိုင်တော့ဘဲ သူ၏ မူလပုံစံသို့ ပြန်လည်ရောက်ရှိသွားခဲ့လေသည်။
သူ၏ ရှည်လျားသော အပြာရောင်ဆံပင်များက လျင်မြန်စွာ အနက်ရောင် ပြောင်းသွားပြီး သူ၏ မူလ သာမန် လူလတ်ပိုင်းမျက်နှာမှာလည်း လူငယ်လေး တစ်ယောက်၏ မျက်နှာအဖြစ် ပြောင်းလဲသွားခဲ့၏။
ဤမြင်ကွင်းကြောင့် တူကူပိုနှင့် တူကူရန်တို့၏ မျက်လုံးများ ပြူးကျယ်သွားကြရသည်။
တူကူပိုက အံ့အားသင့်စွာဖြင့် ပြောလိုက်၏။
“ဒါက ညီအစ်ကို လန်ချန်ရဲ့ မျက်နှာ အစစ်အမှန်ပဲ။ သူက အရမ်း ငယ်လွန်းတယ်။ အသက် နှစ်ဆယ်တောင် ပြည့်မယ့်ပုံ မပေါ်ဘူး။ အလွန်ဆုံးမှ ယန်ယန် နဲ့ ရွယ်တူလောက်ပဲ ရှိမယ်”
တူကူရန်မှာ ခြေဆောင့်လိုက်ပြီး ပြောလိုက်၏။
“ကျစ်... အဘိုးကလည်း သူ့ကို ဘာလို့ ညီအစ်ကိုလို့ ခေါ်ရတာလဲ။ ပြီးတော့ အဲဒီ လန်ချန်ဆိုတဲ့ ကောင်စုတ်လေးက သမီးထက်တောင် ကြီးမယ့်ပုံ မပေါ်ဘူး... အဲဒါကို သမီးက သူ့ကို အဘိုးလို့ ခေါ်ခဲ့ရတယ်လို့”
“ကျစ်... သူ ဒီ ဝိညာဉ်ကွင်းကို စုပ်ယူပြီးသွားရင် သူ့ကို သေချာပေါက် ပညာပေးရမယ်။ သူက သမီးရဲ့ ခံစားချက်တွေကို လုံးဝ သစ္စာဖောက်တယ်။ သမီးက သူ့ကို အဘိုးလို့ ခေါ်တာကို သူက တကယ် ပြန်ထူးခဲ့တယ်”
မြေးမလေး၏ ညည်းတွားသံများကို နားထောင်ရင်း တူကူပိုသည် ခါးသက်သက် အပြုံးဖြင့် ခေါင်းခါရုံသာ တတ်နိုင်တော့သည်။ ဤ လုချန်သည် ၎င်းကို သူ့ထံမှ ဤမျှ ကြာမြင့်စွာ ဖုံးကွယ်ထားခဲ့သည်။
တကယ့် လက်တွေ့မှာ သူ ဒီလောက် ငယ်ရွယ်လိမ့်မည်ဟု သူ ဘယ်တုန်းကမှ မမျှော်လင့်ထားခဲ့ပေ။ သူ့ကို ညီအစ်ကိုအဖြစ် အသိအမှတ်ပြုရန် နည်းနည်း လောသွားခဲ့ပုံရသည်။
သို့သော် သူ ပြန်လည် စဉ်းစားကြည့်လိုက်ရာ အသက် သုံးဆယ်ခန့်ရှိ ဝိညာဉ်ကွင်းခုနစ်ခုပါသော ဝိညာဉ်သူတော်စင်တစ်ဦးဆိုလျှင်ပင် အလွန် အထင်ကြီးစရာ ကောင်းနေပြီဖြစ်သည်။
အခု လုချန်ကို ကြည့်ရတာ အသက် နှစ်ဆယ်တောင် ပြည့်သေးပုံ မရဘူး။ အသက် နှစ်ဆယ်တောင် မပြည့်သေးတဲ့ ဝိညာဉ်ကွင်းခုနစ်ခုပါတဲ့ ဝိညာဉ်သူတော်စင် တစ်ယောက်... ၎င်းကို တွေးမိပြီးနောက် တူကူပို အသက်ရှူမှားသွားခဲ့ရသည်။
ဒါက ကောင်းကင်ဘုံကို အာခံနေတာပဲ။
ဝိညာဉ်ကုန်းမြေတိုက်ကြီးတစ်ခုလုံးကို လိုက်ကြည့်လျှင်တောင် အသက် နှစ်ဆယ်အောက် ဝိညာဉ်ကွင်းခုနစ်ခုပါတဲ့ ဝိညာဉ်သူတော်စင် တစ်ယောက်မှ မရှိခဲ့ချေ။
အသက် နှစ်ဆယ်ဝန်းကျင်မှာ ဝိညာဉ်ကွင်းလေးခုပါတဲ့ ဝိညာဉ်ဘိုးဘေးအဆင့်အထိ ကျင့်ကြံနိုင်တဲ့ ဝိညာဉ်သခင်တွေက လူတွေကြားထဲမှာ နဂါးတွေ၊ ဖီးနစ်ငှက်တွေလိုမျိုး ပါရမီရှင်တွေပသ်။
ယခု ပြန်တွေးကြည့်သောအခါ တူကူပိုသည် လုချန်က သူ၏ အသွင်အပြင်ကို ဘာကြောင့် ဖုံးကွယ်ထားချင်ရသည်ကို နားလည်နိုင်သွားပြီဖြစ်သည်။
အကယ်၍ သူတို့ အဘိုးနှင့်မြေး နှစ်ယောက်နှင့် လုချန်တို့ကြားတွင် နက်ရှိုင်းသော သံယောဇဉ် မရှိခဲ့ပါက ဤမျှ ငယ်ရွယ်သော ဝိညာဉ်သူတော်စင်တစ်ဦးအပေါ် သူကိုယ်တိုင်ပင် မကောင်းသော ရည်ရွယ်ချက်များ ထားရှိမိမည့် အန္တရာယ်မှ ရှောင်လွှဲနိုင်မည် မဟုတ်ပေ။
တစ်ချိန်တည်းမှာပင် လုချန်က ငွေပြာဘုရင်၏ ဝိညာဉ်ကွင်းကို စုပ်ယူသည့် လုပ်ငန်းစဉ်မှာ ဆက်လက် ဖြစ်ပေါ်နေဆဲ ဖြစ်သည်။
အချိန်များ ကုန်ဆုံးလာသည်နှင့်အမျှ ငွေပြာဘုရင်၏ ဝိညာဉ်ကွင်းရဲ့ ကြီးမားလှသော စွမ်းအင်များကို လုချန်၏ ငွေပြာဘုရင်ဝိညာဉ်က တဖြည်းဖြည်း မျိုချ သန့်စင်သွားနိုင်ခဲ့သည်။
ဘောလုံးကြီး တစ်လုံးကဲ့သို့ ဖောင်းကားနေသော လုချန်၏ ခန္ဓာကိုယ်မှာ သူ၏ မူလ အရွယ်အစားသို့ ပြန်လည် ရောက်ရှိသွားခဲ့လေသည်။
ယခုအခါ ငွေပြာအင်ပါယာ ရာဇပလ္လင်မှာ လစ်လပ်နေပြီဖြစ်၏။
လုချန်၏ ငွေပြာဘုရင်ဝိညာဉ်သည် ငွေပြာဘုရင် ဝိညာဉ်သားရဲ၏ ဝိညာဉ်ကွင်းကို စုပ်ယူပြီးနောက် ၎င်း၏ သွေးမျိုးဆက်၊ အခြေခံနှင့် အရင်းအမြစ်များကို ပြီးပြည့်စုံအောင် လုပ်ဆောင်နိုင်ခဲ့ကာ အတားအဆီးကို အောင်မြင်စွာ ကျော်ဖြတ်ပြီး ငွေပြာအင်ပါယာအဆင့်သို့ တက်လှမ်းသွားနိုင်ခဲ့သည်။
ငွေပြာအင်ပါယာဝိညာဉ်နှင့် ပတ်သက်လာလျှင် ၎င်းသည် အစွမ်းအထက်ဆုံး မဟုတ်နိုင်သော်လည်း ရုပ်ရည် ပြုပြင်ပြောင်းလဲရေး နယ်ပယ်တွင်မူ လုံးဝ ပြိုင်ဘက်ကင်း ဖြစ်သည်။
လုချန် ငွေပြာအင်ပါယာအဖြစ် နန်းတက်လာသည်နှင့်အမျှ ငွေပြာအင်ပါယာသွေးမျိုးဆက်၏ ပြုပြင်ပြောင်းလဲမှုများကြောင့် သူ၏ အသွင်အပြင်မှာ သိမ်မွေ့သော အပြောင်းအလဲများ ဖြစ်ပေါ်လာခဲ့သည်။
သူ၏ မူလ အနက်ရောင်ဆံပင်များမှာ ယခုအခါ ငွေပြာမြက်ပင် နှင့် အရောင်တူသော အပြာရောင် အဖြစ်သို့ လုံးဝ ပြောင်းလဲသွားခဲ့လေသည်။
သူ၏ အသွင်အပြင်မှာ သိပ်ပြီး မပြောင်းလဲသွားပေမဲ့ အနည်းငယ်တော့ ပြုပြင် ပြောင်းလဲမှုများ ရှိခဲ့သည်။
သို့သော် ထိုအနည်းငယ်သော ပြုပြင် ပြောင်းလဲမှုက သူ၏ အလုံးစုံ ရုပ်ရည်ကို အဆရာပေါင်းများစွာ ပိုမို ကောင်းမွန်သွားစေခဲ့သည်။
သူ၏ အရပ်မှာ ပိုမို ရှည်ထွက်လာပြီး ၁.၉ မီတာ ကျော်လွန်ကာ ၂ မီတာ နီးပါးအထိ ရောက်ရှိသွားသော်လည်း အလွန်အမင်း တုတ်ခိုင်နေခြင်းမျိုး မရှိပေ။ ဆန့်ကျင်ဘက်အနေဖြင့် သူ၏ အချိုးအစားများကြောင့် သူသည် အရပ်ရှည်ပြီး သွယ်လျနေပုံပေါ်နေခဲ့သည်။
အခြားအရာများကို ဘေးဖယ်ထားလျှင် ငွေပြာအင်ပါယာ ဝိညာဉ်သည် ရုပ်ရည် ပြုပြင်ပြောင်းလဲရေး နယ်ပယ်တွင် တကယ်ကို ထူးချွန်ပြောင်မြောက်ပြီး မြင်တွေ့ရသူတိုင်းက လက်မထောင်ပြရမည် ဖြစ်သည်။
( အဲ့လိုဟာလေး ဘယ်စျေးပေးရမလဲ လိုချင်လို့ ...)