အခန်း (၅၄) တူကူပိုနှင့် လုချန်တို့၏ ပူးပေါင်းဆောင်ရွက်မှု
“ငွေပြာနယ်ပယ်ကို သုံးတတ်တာ မင်းတစ်ယောက်တည်းလို့ မထင်နဲ့”
လုချန်က စကားပြောပြီးသည်နှင့် သူ၏ ငွေပြာနယ်ပယ်ကို ထုတ်လွှတ်လိုက်ရာ မမြင်ရသော လှိုင်းများက အရပ်မျက်နှာ အားလုံးသို့ အလျင်အမြန် ပျံ့နှံ့သွားခဲ့သည်။
နယ်ပယ်နှစ်ခုမှာ တစ်ခုနှင့်တစ်ခု ထပ်တူကျသွားပြီး အလွန် ပြင်းထန်သော တိုက်ပွဲတစ်ခုကို ဆင်နွှဲလိုက်ကြသည်။ ၎င်းတို့ နှစ်ခုစလုံးမှာ တိုက်ခိုက်ရေး နယ်ပယ်များ မဟုတ်သောကြောင့် အထင်ရှားဆုံး သက်ရောက်မှုများကို ပတ်ဝန်းကျင်ရှိ ငွေပြာမြက်ပင်များအပေါ်တွင် တွေ့ရလေသည်။
သူတို့ ပတ်ဝန်းကျင်ရှိ များပြားလှသော ငွေပြာမြက်ပင်များသည် တစ်ခါတစ်ရံတွင် ငွေပြာဘုရင်၏ ထိန်းချုပ်မှုအောက်၌ မြွေများကဲ့သို့ ရွေ့လျားလာပြီး တူကူပို၊ လုချန်နှင့် တူကူရန်တို့ဆီသို့ ရစ်ပတ် တိုက်ခိုက်လာကြသည်။
တစ်ခါတစ်ရံတွင် လုချန်က ၎င်းတို့ကို လုယူထိန်းချုပ်လိုက်ပြီး ငွေပြာဘုရင်ကို ပြန်လည် တိုက်ခိုက်စေလိုက်သည်။
သို့သော် ၎င်းတို့က ငွေပြာဘုရင်ကို မထိခိုက်နိုင်မီမှာပင် ငွေပြာဘုရင်က ပြန်လည် ထိန်းချုပ်သွားပြန်လေသည်။
ထိုသို့ဖြင့် ပတ်ဝန်းကျင်ရှိ ငွေပြာမြက်ပင်များမှာ အချင်းချင်း တိုက်ခိုက်နေကြလေတော့သည်။
ငွေပြာမြက်ပင်များ အားလုံးက အုပ်စုနှစ်စု ကွဲသွားကြသည်။ တစ်စုက ငွေပြာဘုရင်ကို နာခံပြီး အခြားတစ်စုက လုချန်ကို နာခံကြသည်။ ထို ငွေပြာမြက်ပင် အုပ်စုနှစ်စုမှာ ပြင်းထန်စွာ တိုက်ခိုက်နေကြလေသည်။
လုချန်၏ အမူအရာက တင်းမာနေပြီး သူ၏ စိတ်ပိုင်းဆိုင်ရာ စွမ်းအားများကို ငွေပြာနယ်ပယ်ထဲသို့ အဆက်မပြတ် ထည့်သွင်းပေးကာ ငွေပြာမြက်ပင်များအပေါ် သူ၏ ထိန်းချုပ်နိုင်စွမ်းကို မြှင့်တင်နေခဲ့သည်။
၎င်းက ငွေပြာမြက်ပင်များအပေါ် ငွေပြာဘုရင်၏ ထိန်းချုပ်မှုကို လုံးဝ မဖြတ်တောက်နိုင်သော်လည်း ငွေပြာတောအုပ်အတွင်းရှိ များပြားလှသော ငွေပြာမြက်ပင်များ၏ စွမ်းအားကို ဆွဲယူအသုံးပြုခြင်းမှလည်း တားဆီးပေးနိုင်ခဲ့သည်။
ခရီးမထွက်မီ လုချန်သည် ဆောင်းဦးနှင်းရည်ကို စားသုံးထားခဲ့သောကြောင့် သူ၏ စိတ်ပိုင်းဆိုင်ရာ စွမ်းအားအဆင့်မှာ ဘွဲ့ခံတိုလောအဆင့်သို့ ရောက်ရှိနေပြီ ဖြစ်၏။
၎င်းက ငွေပြာဘုရင်ကို ဖိနှိပ်ရန် ငွေပြာနယ်ပယ်ကို အသုံးပြုနိုင်စွမ်းအပေါ် ယုံကြည်မှု ရှိစေခဲ့သည်။ သို့မဟုတ်ပါက သူ၏ ငွေပြာနယ်ပယ်မှာ ငွေပြာဘုရင်၏ ငွေပြာနယ်ပယ်ကြောင့် ဖိနှိပ်ခံရရန် သေချာသလောက်ပင်။
ဤအခွင့်အရေးကို အသုံးချ၍ တူကူပိုကလည်း တိုက်ခိုက်မှုကို စတင်လိုက်လေသည်။ သက်တမ်း ၈၅,၀၀၀ ကျင့်ကြံထားသော ငွေပြာဘုရင်ကို ရင်ဆိုင်ရာတွင် သူ၏ နှစ်ရာတန် ဝိညာဉ်စွမ်းရည်နှင့် နှစ်ထောင်တန် ဝိညာဉ်စွမ်းရည်များမှာ လုံးဝ အသုံးမဝင်ကြောင်း သူ သိထားခဲ့သည်။
ထို့ကြောင့် သူသည် သူ၏ ထာဝရ ဆဋ္ဌမမြောက် ဝိညာဉ်စွမ်းရည်ကို တိုက်ရိုက် အသုံးပြုလိုက်၏။
“ဆဋ္ဌမ ဝိညာဉ်စွမ်းရည်... မြစိမ်းရောင် မြွေအင်ပါယာ ဖြိုခွဲခြင်း”
တူကူပို၏ ဆဋ္ဌမမြောက် ဝိညာဉ်ကွင်းက အလွန် နက်မှောင်သော အလင်းရောင်ဖြင့် တောက်ပလာပြီး သူ၏ အဆက်မပြတ် ထည့်သွင်းနေသော ဝိညာဉ်စွမ်းအားများနှင့်အတူ အနက်ရောင် အဆိပ်ပြင်း စွမ်းအင်ဘောလုံးတစ်ခုက သူ၏ လက်ဝါးနှစ်ဖက်ကြားတွင် စုစည်းလာခဲ့သည်။
အချိန်တိုလေးအတွင်းမှာပင် မူလက လက်သီးဆုပ်ခန့်သာရှိသော အဆိပ်ပြင်း စွမ်းအင်ဘောလုံးမှာ အချင်း နှစ်မီတာခန့်ရှိသော ဧရာမ အဆိပ်ပြင်း စွမ်းအင်ဘောလုံးကြီး အဖြစ်သို့ ကျယ်ပြန့်လာခဲ့ာ။
ကြောက်မက်ဖွယ်ကောင်းသော စွမ်းအင်လှိုင်းများကြောင့် ပတ်ဝန်းကျင်ရှိ လေထုမှာပင် ပျစ်ချွဲလာသကဲ့သို့ ဖြစ်သွားရသည်။
တစ်ချိန်တည်းမှာပင် ထိုအဆိပ်ပြင်း စွမ်းအင်ဘောလုံးမှ မှေးမှိန်သော ညှီစော်များ ထွက်ပေါ်နေပြီး ရှူမိရုံဖြင့် မည်သူ့ကိုမဆို မူးဝေသွားစေနိုင်သည်။
“သွားစမ်း”
တူကူပိုက ရုတ်တရက် အော်ဟစ်လိုက်ပြီး သူ၏ လက်ထဲရှိ ဧရာမ အဆိပ်ပြင်း စွမ်းအင်ဘောလုံးကြီးကို ငွေပြာဘုရင်၏ ပင်မကိုယ်ထည်ဆီသို့ အရှိန်ပြင်းပြင်း ပစ်လွှတ်လိုက်လေသည်။
ငွေပြာဘုရင်သည် အန္တရာယ်ကို အာရုံခံမိသော်လည်း ကံမကောင်းစွာဖြင့် လုချန်က ငွေပြာနယ်ပယ်ကို အသုံးပြု၍ ၎င်းကို အာရုံလွှဲထားသဖြင့် စဉ်းစားရန် အချိန်သိပ်မရခဲ့ပေ။ ၎င်းက ကာကွယ်ရန်အတွက် ၎င်း၏ ကိုယ်ပိုင် အကိုင်းအခက်များဖြင့် ဒိုင်းလွှားတစ်ခုကို ကပျာကယာ ရက်လုပ်လိုက်ရ၏။
ရွှီး..ရွှီး...
နောက်တစ်ခဏတွင် အဆိပ်ပြင်း စွမ်းအင်ဘောလုံးကြီးက ဒိုင်းလွှားကို ဝင်တိုက်မိသွားပြီး ၎င်းတွင် ပါဝင်သော တိုက်စားစေသည့် အဆိပ်များက ငွေပြာနွယ်ပင်များကို လျင်မြန်စွာ စတင် တိုက်စားလေတော့သည်။
ငွေပြာနွယ်ပင်များမှ ဖြူဖွေးသော အခိုးအငွေ့များ ထွက်ပေါ်လာပြီး တစ်ချိန်တည်းမှာပင် ငွေပြာနွယ်ပင်များမှာ မျက်စိရှေ့တွင်ပင် ညှိုးနွမ်းလာကာ ပုပ်သိုးလာသည်ကို မြင်တွေ့လိုက်ရသည်။
ဤ မြစိမ်းရောင် မြွေအင်ပါယာ ဖြိုခွဲခြင်း၏ တိုက်စားနိုင်မှုနှင့် အဆိပ်ပြင်းမှု သဘာဝမှာ တကယ်ကို ကြောက်မက်ဖွယ် ကောင်းလှ၏။
ဆယ်စက္ကန့်ပင် မကြာမီမှာပင် ငွေပြာနွယ်ပင်များဖြင့် ရက်လုပ်ထားသော ဒိုင်းလွှားမှာ တိုက်စားခံရပြီး အပေါက်ကြီး တစ်ပေါက် ဖြစ်သွားခဲ့သည်။
အလွန် နက်မှောင်သော အဆိပ်ပြင်း အလင်းဘောလုံး မြစိမ်းရောင် မြွေအင်ပါယာ ဖြိုခွဲခြင်းက တိုက်စားမှုကြောင့် ဖြစ်ပေါ်လာသော အပေါက်ကြီးမှတစ်ဆင့် ထိုးဖောက်ဝင်ရောက်သွားပြီး ငွေပြာဘုရင်၏ ပင်မကိုယ်ထည်ကို ဝင်တိုက်မိသွားလေသည်။
“အာ...”
ချက်ချင်းဆိုသလိုပင် ငွေပြာဘုရင်ထံမှ စူးရှသော အော်ဟစ်သံကြီး တစ်ခု ထွက်ပေါ်လာခဲ့ရသည်။ အနက်ရောင် အဆိပ်ပြင်း ဘောလုံးမှ တိုက်စားစေသော အဆိပ်များက ၎င်း၏ ပင်စည်၊ အကိုင်းအခက်များနှင့် အရွက်များကို လျင်မြန်စွာ တိုက်စားသွားသဖြင့် ၎င်း၏ ခန္ဓာကိုယ်မှ ဖြူဖွေးသော အခိုးအငွေ့များ ထွက်ပေါ်လာဆလသည်။
ထိုကဲ့သို့ ပြင်းထန်သော ဖိအားအောက်တွင် ငွေပြာဘုရင်သည် ၎င်း၏ ငွေပြာနယ်ပယ်ကို ဆက်လက် မထိန်းသိမ်းထားနိုင်တော့ချေ။
ဤအခွင့်အရေးကောင်းကို အသုံးချ၍ လုချန်က သူ၏ စွမ်းအားများကို အလျင်အမြန် ထုတ်လွှတ်လိုက်ပြီး သူ၏ ကိုယ်ပိုင် ငွေပြာနယ်ပယ်ကို အသုံးပြုကာ ငွေပြာဘုရင်၏ ငွေပြာနယ်ပယ်ကို အတင်းအကျပ် ချိုးဖျက်လိုက်ပြီးနောက် ပတ်ဝန်းကျင်ရှိ ငွေပြာမြက်ပင်များ အားလုံးကို ထိန်းချုပ်လိုက်၏။
ငွေပြာတောအုပ်ထဲတွင် ရှိနေဆဲ ဖြစ်သော်လည်း ငွေပြာဘုရင်သည် အထီးကျန် ဖြစ်သွားခဲ့ရသည်။ အဘယ်ကြောင့်ဆိုသော် ၎င်း၏ လက်အောက်ငယ်သား ငွေပြာမြက်ပင်များ အားလုံးကို လုချန်က ငွေပြာနယ်ပယ်မှတစ်ဆင့် သိမ်းပိုက်လိုက်သောကြောင့်ပင်။
သူ့ပတ်ဝန်းကျင်ရှိ ငွေပြာမြက်ပင်များ အားလုံး၊ နှစ်တစ်ရာသက်တမ်းရှိ ငွေပြာမြက်ပင်ဖြစ်စေ၊ နှစ်တစ်ထောင်သက်တမ်းရှိ ငွေပြာမြက်ပင်ဖြစ်စေ အားလုံးက လုချန်ရှိရာသို့ ဘုရားဖူးနေသည့်အလား အနည်းငယ် ယိမ်းနွဲ့နေခဲ့ကြသည်။
ငွေပြာဘုရင်မှာ အဆိပ်ကြောင့် ပြင်းထန်စွာ နာကျင်ခံစားနေရပြီး ယခုအခါ ၎င်း၏ လူများ အားလုံး လုချန်ထံသို့ ခေါင်းငုံ့သွားကြသည်ကို မြင်လိုက်ရသည်။
၎င်းမှာ အကူအညီမဲ့စွာဖြင့် ဒေါသထွက်လွန်းသဖြင့် သွေးအန်မတတ် ဖြစ်သွားခဲ့ရသည်။
ယခင် တိုက်ခိုက်မှုတွင် ငွေပြာဘုရင်သည် သေချာပေါက် ရှုံးနိမ့်သွားခဲ့သည်။ သို့သော် သက်တမ်း ၈၅,၀၀၀ ရှိသော ငွေပြာဘုရင် တစ်ပါးအနေဖြင့် ၎င်း၏ ကျင့်ကြံမှုမှာ အလွန် နက်ရှိုင်းပြီး ၎င်း၏ သက်စောင့်အသက်သွေး စွမ်းအင်မှာ အလွန် အားကောင်းလှလေသည်။
အချိန်တိုအတွင်းမှာပင် ၎င်းသည် ခန္ဓာကိုယ်ထဲသို့ ဝင်ရောက်လာသော တိုက်စားစေသည့် အဆိပ်များကို ၎င်း၏ အားကောင်းသော သက်စောင့်အသက်သွေး စွမ်းအင်များဖြင့် တဖြည်းဖြည်း မှေးမှိန်စေကာ ပြိုကွဲသွားစေခဲ့သည်။
ထို့အပြင် ငွေပြာဘုရင်၏ ခန္ဓာကိုယ်ပေါ်တွင် တိုက်စားခံရသော အပေါက်များမှာလည်း သက်စောင့်အသက်သွေး စွမ်းအင်များ၏ အာဟာရကြောင့် လျင်မြန်စွာ ကျက်လာနေပြီး မကြာမီ မူလအခြေအနေသို့ ပြန်လည်ရောက်ရှိသွားမည် ဖြစ်သည်ကို မြင်တွေ့နိုင်လေသည်။
ငွေပြာဘုရင်၏ သက်စောင့်အသက်သွေး စွမ်းအင်က ၎င်းကို သေနိုင်လောက်တဲ့ ဒဏ်ရာ မရဘူးဆိုရင် အလွန် မြန်ဆန်စွာ ပြန်လည် ကောင်းမွန်လာနိုင်စွမ်း ရှိစေပေသည်။
ငွေပြာဘုရင်က ဒေါသတကြီး ဟိန်းဟောက်လိုက်၏။
“ငါ့လူတွေ အားလုံးကို မင်း ထိန်းချုပ်ထားနိုင်ရုံနဲ့ ငါက မင်းကို ဘာမှ မလုပ်နိုင်ဘူးလို့ မထင်နဲ့”
“ငွေပြာ အာဏာရှင်လှံ”
ချက်ချင်းဆိုသလိုပင် ကြောက်မက်ဖွယ်ကောင်းသော စွမ်းအင်လှိုင်းတစ်ခုက ငွေပြာဘုရင်၏ ခန္ဓာကိုယ်မှ ပေါက်ကွဲထွက်လာပြီး တောက်ပသော အပြာရောင် အလင်းတန်းတစ်ခုနှင့်အတူ အရွယ်အစား သုံးမီတာရှိသော အပြာရောင်လှံတစ်လက် အလျင်အမြန် ဖြစ်ပေါ်လာခဲ့သည်။
ယင်းကို အဝေးမှ မြင်လိုက်ရသောအခါ လုချန်က သူ၏ တတိယ ဝိညာဉ်စွမ်းရည် ဖြစ်သော ငွေပြာ ကာကွယ်ခြင်းကို ချက်ချင်း ထုတ်လွှတ်လိုက်လေသည်။
ထို့အပြင် သူသည် ငွေပြာနယ်ပယ်မှတစ်ဆင့် ပတ်ဝန်းကျင်ရှိ ငွေပြာမြက်ပင်များ အားလုံးကို ထိန်းချုပ်ကာ အုပ်စုလိုက် ငွေပြာ ကာကွယ်ခြင်းကို ထုတ်လွှတ်လိုက်၏။
ပတ်ဝန်းကျင်ရှိ ငွေပြာမြက်ပင်များအားလုံးမှ တောက်ပသော အပြာရောင် အလင်းတန်းတစ်ခု ထွက်ပေါ်လာပြီး နောက်ဆုံးတွင် အထူ ပေဝက်ခန့်ရှိသော အပြာရောင် ဒိုင်းလွှားကြီး တစ်ခုအဖြစ် ပေါင်းစည်းသွားခဲ့သည်။
ထိုအပြာရောင် ဒိုင်းလွှားကြီးက ငွေပြာဘုရင် နှင့် တူကူပို၊ လုချန်၊ တူကူရန်တို့ကြားတွင် ရပ်တည်နေခဲ့သည်။
ထူထဲသော အပြာရောင် ဒိုင်းလွှားကြီးကို မြင်သောအခါ တူကူပိုနှင့် တူကူရန်တို့ နှစ်ဦးစလုံး အံ့အားသင့်သွားကြသော်လည်း စိတ်သက်သာရာ ရသွားကြလေသည်။
ထိုစဉ်မှာပင် ငွေပြာဘုရင် စုစည်းထားသော ငွေပြာ အာဏာရှင်လှံက ၎င်း၏ အရာအားလုံးကို ဖျက်ဆီးနိုင်သော ထက်မြက်သည့် အစွန်းဖြင့် လေထုကို ဆုတ်ဖြဲကာ တူကူပိုရှိရာသို့ အရှိန်ပြင်းပြင်း ထိုးစိုက်လိုက်သည်။
ချလွမ်....
နားကွဲမတတ် ကျယ်လောင်သော ဟိန်းဟောက်သံကြီးနှင့်အတူ ငွေပြာ အာဏာရှင်လှံက အပြာရောင် ဒိုင်းလွှားကို ဝင်တိုက်မိသွားရာ လေပြင်းများနှင့် ကြောက်မက်ဖွယ်ကောင်းသော စွမ်းအင်လှိုင်းများက အရပ်မျက်နှာ အားလုံးသို့ ပျံ့နှံ့သွားခဲ့၏။
ငွေပြာအာဏာရှင်လှံ၏ ထက်မြက်သော အစွန်းအောက်တွင် အပြာရောင် ဒိုင်းလွှားပေါ်၌ အက်ကွဲကြောင်းများ နောက်ဆုံးတွင် ပေါ်လာခဲ့သည်။ သေးငယ်သော အက်ကွဲကြောင်းလေးများ ဖြစ်သည်။
ဤအုပ်စုလိုက် ငွေပြာ ကာကွယ်ခြင်းသည် လက်ရှိတွင် လုချန်၏ အစွမ်းထက်ဆုံး ကာကွယ်ရေး နည်းလမ်းပင်။
သို့သော် ငွေပြာဘုရင်သည် သက်တမ်း ၈၅,၀၀၀ ရှိသော ထိပ်တန်း အပင်အမျိုးအစား ဝိညာဉ်သားရဲ တစ်ကောင်ရာ ၎င်းက အစွမ်းကုန် ထုတ်လွှတ်လိုက်သော ငွေပြာ အာဏာရှင်လှံကို ခံနိုင်ရည်ရှိရန် မလွယ်ကူလှပေ။
သို့သော် အပြာရောင်ဒိုင်းလွှားမှာ အချိန်တိုအတွင်း ကျိုးပျက်သွားမည် မဟုတ်ပေ။
ဤအချိန်ကို အခွင့်ကောင်းယူ၍ လုချန်သည် သူ၏ ပဉ္စမမြောက် ဝိညာဉ်စွမ်းရည် ဖြစ်သော ငွေပြာ ကောင်းချီးပေးခြင်းကို ထုတ်လွှတ်လိုက်သည်။
အလားတူပင် သူသည် ငွေပြာနယ်ပယ်မှတစ်ဆင့် ပတ်ဝန်းကျင်ရှိ ငွေပြာမြက်ပင်များ အားလုံးကို ထိန်းချုပ်ကာ အုပ်စုလိုက် ငွေပြာ ကောင်းချီးပေးခြင်း ကို ထုတ်လွှတ်လိုက်၏။
ပတ်ဝန်းကျင်ရှိ ငွေပြာမြက်ပင်များ အားလုံးမှာ တောက်ပသော အလင်းရောင်များ ထွက်ပေါ်လာပြီး ၎င်းတို့က တူကူပို၏ ခန္ဓာကိုယ်ပေါ်သို့ စုစည်းသွားကြလေသည်။
ထိုတောက်ပသော အလင်းရောင်အတွင်းတွင် အားကောင်းသော သက်စောင့်အသက်သွေး စွမ်းအင်များ စုစည်းနေခဲ့သည်။ ထိုသက်စောင့်အသက်သွေး စွမ်းအင်များ သူ၏ ခန္ဓာကိုယ်ထဲသို့ ဝင်ရောက်လာသောအခါ တူကူပိုသည် သူ၏ အရည်အသွေးများ အားလုံး ၁၀၀ ရာခိုင်နှုန်းကျော် တိုးလာသည်ကို တွေ့ရှိရပြီး ဝမ်းသာအံ့သြ ဖြစ်သွားခဲ့ရသည်။
တိုက်ခိုက်မှု၊ ကာကွယ်မှု၊ ခွန်အား၊ အမြန်နှုန်း... အရည်အသွေး အမျိုးမျိုး၏ တိုးတက်မှု အာနိသင်များက ၁၀၀ ရာခိုင်နှုန်းကို ကျော်လွန်နေခဲ့သည်။
လုချန်၏ မူလ ပဉ္စမ ဝိညာဉ်စွမ်းရည်ဖြစ်သော ငွေပြာ ကောင်းချီးပေးခြင်းသည် အရည်အသွေးများ အားလုံးကို ၁၀၀ ရာခိုင်နှုန်း တိုးစေခြင်း ဖြစ်သည်။
သို့သော် ငွေပြာနယ်ပယ်မှတစ်ဆင့် သဘာဝထဲရှိ ငွေပြာမြက်ပင်များကို ထိန်းချုပ်ကာ အုပ်စုလိုက် ငွေပြာ ကောင်းချီးပေးခြင်း ကို ထုတ်လွှတ်လိုက်သောအခါ အရည်အသွေးများ အားလုံးကို ၁၀၀ ရာခိုင်နှုန်းကျော် တိုးသွားစေခဲြလေသည်။
ငွေပြာတောအုပ်တွင် ငွေပြာမြက်ပင်များ ပေါများလွန်းသောကြောင့် အုပ်စုလိုက် ငွေပြာ ကောင်းချီးပေးခြင်း ၏ အာနိသင်မှာ ၃၀၀ ရာခိုင်နှုန်းအထိပင် ရောက်ရှိသွားခဲ့ရသည်။
လုချန်က ချက်ချင်း အော်ဟစ်လိုက်၏။
“ညီအစ်ကို တူကူ... အခု ညီအစ်ကို့ အပေါ်မှာပဲ မူတည်တော့တယ်”
တူကူပိုသည် သူ့အတွင်း၌ ခွန်အားများ ပေါက်ကွဲထွက်လာသည်ကို ခံစားလိုက်ရပြီး ရယ်မောကာ ပြောလိုက်လေသည်။
“ညီအစ်ကို လန်ချန်... မင်းရဲ့ မြှင့်တင်ပေးမှုက ကြောက်စရာကောင်းတာပဲ။ ငါ အခု အဆင့် ၉၅ ဘွဲ့ခံတိုလော တစ်ယောက်ကိုတောင် ရင်ဆိုင်နိုင်မယ် ထင်တယ်”
“မင်း စောင့်ကြည့်နေလိုက်.. အဲဒီ ငွေပြာဘုရင်ကို မင်းအတွက် ငါ သေချာပေါက် ဖြေရှင်းပေးမယ်”