အခန်း (၃၈) ငြင်းပယ်ခြင်း

လုချန်က စတင်၍ နှုတ်ဆက်လိုက်ပြီးနောက်တွင် ရွှယ်ချင်းဟယ်က အနည်းငယ် ချောင်းဟလိုက်ကာ နင်းဖုန်းကျီအား မျက်ရိပ်ပြလိုက်သည်။ သူတို့သည် ပဋိပက္ခကို ဖြေရှင်းရန် လာခဲ့ခြင်းဖြစ်ရာ ဤဖြစ်ရပ်က လက်ရှိ တင်းမာမှုများကို ပိုမိုဆိုးရွားသွားစေရန် မလိုလားချေ။

ရွှယ်ချင်းဟယ်၏ အဓိပ္ပာယ်ပါသော အကြည့်ကို ရရှိပြီးနောက် နင်းဖုန်းကျီက အကူအညီမဲ့နေသည့်အလား ဟန်ဆောင်ကာ ပြောလိုက်၏။

“အရိုးတိုလော”

နင်းဖုန်းကျီ၏ စကားအပြီးတွင် ကုရုံက အနည်းငယ် ညည်းတွားလိုက်ပြီးနောက် သူ၏ သတ်ဖြတ်လိုသော အငွေ့အသက်များကို ပြန်လည် ရုပ်သိမ်းလိုက်လေသည်။ သူက ခြေလှမ်းလိုက်ပြီး ဘေးဘက်ရှိ ကုလားထိုင်တစ်ခုပေါ်သို့ ပစ်ချလိုက်သကဲ့သို့ ထိုင်လိုက်သည်။

သူက လုချန်၏ အချက်အလက်များကို မှတ်သားထားလိုက်ပြီဖြစ်သည်။ လုချန်သည် အသွင်ပြောင်းလဲထားပြီး မျက်နှာမှာ အတုဖြစ်နိုင်သော်လည်း အချက်အလက်များက အတုမဟုတ်နိုင်ပေ။ ယနေ့ လုချန်၏ လျှို့ဝှက်ချက်များကို မှတ်မိထားလိုက်ပြီး တစ်နေ့နေ့တွင် သူ့ကို သတ်ဖြတ်၍ နှုတ်ပိတ်ရပေလိမ့်မည်။

ကုရုံက သတ်ဖြတ်လိုသော အငွေ့အသက်များကို ရုပ်သိမ်းလိုက်မှသာ လုချန်သည် မကောင်းသော ရည်ရွယ်ချက်များဖြင့် ဝန်းရံခံထားရသည့် ခံစားချက်မှ လွတ်မြောက်သွားခဲ့သည်။

ယခု လုချန်သည် ဝိညာဉ်ဧကရာဇ် ဖြစ်လာပြီဖြစ်သော်လည်း ဘွဲ့ခံတိုလောတစ်ဦး၏ သတ်ဖြတ်လိုသော အငွေ့အသက်က သူ့ကို အသက်ရှူကျပ်စေဆဲဖြစ်သည်။ သူသည် ငွေပြာနယ်ပယ်ကို အသုံးပြု၍ ခုခံခြင်း မရှိပါက ၎င်းကို ရင်ဆိုင်ရန် နည်းလမ်းကောင်း မရှိပေ။

ဤအချိန်တွင် ရွှယ်ချင်းဟယ်က မတ်တပ်ရပ်လိုက်ပြီး ရိုကျိုးကာ ယဉ်ကျေးသော အမူအရာဖြင့် တောင်းပန်စကား ဆိုလိုက်၏။

“ဆရာ လန်ချန်... ကျွန်တော်နဲ့ ဆရာက ဒီနေ့ ဒီကို လာခဲ့တာက သခင်နဲ့ ဆရာကြားက ပဋိပက္ခကို ကြားဝင်စေ့စပ်ပေးဖို့ ဖြစ်ပါတယ်။ ဒါမှ ဆရာက ဘာကိုမှ ဖုံးကွယ်စရာ မလိုတော့ဘဲ တကယ့်မျက်နှာ၊ တကယ့်နာမည်နဲ့ တိုက်ကြီးပေါ်မှာ ပွင့်ပွင့်လင်းလင်း လျှောက်လှမ်းနိုင်မှာပါ”

“ဆရာ့ရဲ့ ပါရမီနဲ့ အရည်အချင်းက တိုက်ကြီးတစ်ခုလုံးမှာ အကောင်းဆုံးတွေထဲက တစ်ခုဖြစ်ပြီး ဆရာ့ကို အဆင့်အတန်း၊ ချမ်းသာကြွယ်ဝမှုနဲ့ ဂုဏ်သိက္ခာကို ယူဆောင်လာပေးဖို့ လုံလောက်ပါတယ်။ ဒီနေ့ ကောင်းကင်အင်ပါယာ တော်ဝင်မိသားစု ကိုယ်စား ဆရာ လန်ချန်ကို ကျွန်တော်တို့ရဲ့ ဂုဏ်သရေရှိ အဖွဲ့ဝင်အဖြစ် ပါဝင်ဖို့ ဖိတ်ခေါ်ပါတယ်”

၎င်းကို ကြားပြီးနောက် လုချန်က အမူအရာမဲ့စွာ ပြန်ဖြေလိုက်သည်။

“ပဋိပက္ခကို ကြားဝင်စေ့စပ်ပေးတာလား... သူတို့က ကျွန်တော့်ကို ခြိမ်းခြောက်ဖို့ လာတာလို့ ကျွန်တော် ထင်နေတာ”

“အခုနက လူက ဘုံခုနစ်ဆင့် ပြဿာဒ်ဂိုဏ်းရဲ့ အစောင့်အရှောက်တိုလော နှစ်ဦးထဲက တစ်ဦးဖြစ်တဲ့ နာမည်ကြီး အရိုးတိုလော ဖြစ်မယ်ထင်တယ်။ သူက တကယ်ကို နက်နဲပြီး ကြောက်မက်ဖွယ် ကောင်းလှပါတယ်”

“ပဋိပက္ခလား... ကျွန်တော်လို အရေးမပါတဲ့သူက ဘုံခုနစ်ဆင့်ပြဿာဒ်ဂိုဏ်း နဲ့ ဘယ်လိုလုပ် ပဋိပက္ခ ဖြစ်ရဲပါ့မလဲ အိမ်ရှေ့စံမင်းသား... အိမ်ရှေ့စံမင်းသား နားလည်မှု လွဲနေတာ ဖြစ်ပါလိမ့်မယ်”

ရွှယ်ချင်းဟယ်က “ငါ အရာအားလုံး သိပြီးပြီ” ဆိုသည့် အမူအရာဖြင့် စိတ်ပါဝင်စားစွာ ပြောလိုက်၏။

“ဆရာ လန်ချန်... ကျေးဇူးပြုပြီး ခေါင်းမာမနေပါနဲ့တော့။ ပွင့်ပွင့်လင်းလင်းပဲ ပြောကြရအောင်”

“ဆရာက အသက် သုံးဆယ်လောက်ပဲ ရှိသေးပေမဲ့ ဝိညာဉ်စွမ်းအား အဆင့် ၆၉ ရှိပြီး အထောက်အကူပြု ဝိညာဉ်သခင် တစ်ဦး ဖြစ်နေတယ်။ ဆရာ ဘယ်ဂိုဏ်းကိုပဲ သွားသွား နွေးထွေးစွာ ကြိုဆိုကြမှာပါ”

“ဒါပေမဲ့ အခု ဆရာက အသွင်ပြောင်းပြီး ကိုယ်ပိုင်လက္ခဏာကို ဖုံးကွယ်ထားရတယ်။ တကယ့်မျက်နှာ၊ တကယ့်နာမည်ကို မသုံးရဲဘူး။ ဒီအချက်က တစ်ခုတည်းကိုပဲ ဆိုလိုတာပါ.. ဆရာက ကျွန်တော့်ဆရာနဲ့ ပဋိပက္ခ ဖြစ်နေတာပဲ”

“ဒီနေ့ ကျွန်တော် ကောင်းကင်အင်ပါယာ တော်ဝင်မိသားစုကိုယ်စား ဆရာ့ဆီ လာခဲ့တာက ပဋိပက္ခကို ဖြေရှင်းပေးဖို့နဲ့ ကောင်းကင်အင်ပါယာ တော်ဝင်မိသားစုရဲ့ ဝတ်ပြုသူအဖြစ် ပါဝင်ဖို့ ဖိတ်ခေါ်ဖို့ပါပဲ”

“ဘဝဆိုတာ ရှည်လျားပါသေးတယ်။ ဆရာ လန်ချန် အတိတ်မှာပဲ နစ်မွန်းမနေသင့်ပါဘူး။ အနာဂတ်ကို ကြည့်ပြီး ရှေ့ဆက်မယ့်အရာတွေကို စဉ်းစားသင့်ပါတယ်”

လုချန် ထိုအခါမှသာ ဖြစ်ပျက်နေသည်များကို သဘောပေါက်သွားခဲ့သည်။

သူက သူ၏ တကယ့်အဖြစ်ကို ဖုံးကွယ်ထားရာမှ ဤလူများက သူသည် ဘုံခုနစ်ဆင့် ပြဿာဒ်ဂိုဏ်း နှင့် ပဋိပက္ခဖြစ်နေသည်ဟု နားလည်မှု လွဲမှားနေခြင်း ဖြစ်သည်။ အထောက်အကူပြု ဝိညာဉ်သခင်များ ဖြစ်ကြသည့်အတွက် နင်းဖုန်းကျီ၏ ဖိနှိပ်ခြင်းကို ခံရသည်ဟု သူတို့ အားလုံးက ယုံကြည်နေခဲ့ကြသည်။

နင်းဖုန်းကျီ... အို နင်းဖုန်းကျီ...

ကောင်းကင်အင်ပါယာမှာ မင်းရဲ့ ဂုဏ်သတင်းက တကယ်ကို ကောင်းလှချည်လား။

သူသည် ရှောင်ရှီးတောင်မှ ဒွမ်ကျန်းချွန်း နှင့် ယှဉ်နိုင်လောက်သည်။ ရှောင်ရှီးတောင်တွင် ရှူကျူး၏ မိခင်က ရှူကျူး၏ ဖခင်မှာ မည်သူဖြစ်ကြောင်း မဖော်ထုတ်ခဲ့သဖြင့် လူတိုင်းက ဒွမ်ကျန်းချွန်းကိုသာ ကြည့်ခဲ့ကြသည်။

ယခု လုချန်သည်လည်း အထောက်အကူပြု ဝိညာဉ်သခင် တစ်ဦးအနေဖြင့် အသွင်ပြောင်းကာ ပုန်းအောင်းနေသည့်အတွက် နင်းဖုန်းကျီ၏ ဖိနှိပ်ခြင်း ခံရသည်ဟု ယူဆခံထားရသည်။ နင်းဖုန်းကျီတွင် အလွန် ခိုင်မာသော ဂုဏ်သတင်းရှိသည်ဟု ဆိုရပေမည်။

လုချန် တိတ်ဆိတ်သွားခဲ့သည်။ သူသည် ဘုံခုနစ်ဆင့် ပြဿာဒ်ဂိုဏ်း နှင့် အတိတ်က ပဋိပက္ခ မရှိခဲ့။ သို့သော် ယခုမူ ရှိသွားပြီဖြစ်၏။ သူ၏ ပါရမီကို ပြသလိုက်မိသည့်အတွက် နင်းဖုန်းကျီက သူ့ကို လွှတ်ပေးမည် မဟုတ်ပေ။ ကုရုံကို ခေါ်လာခြင်းမှာပင် ၎င်း၏ သက်သေပင်။

ရွှယ်ချင်းဟယ်ကလည်း ဤအရာကို သိရှိသွားပုံရသည်။ အကယ်၍ ရွှယ်ချင်းဟယ်၏ စကားကို နားမထောင်ဘဲ ကောင်းကင်အင်ပါယာ တော်ဝင်မိသားစုသို့ မဝင်ရောက်ပါက ဘုံခုနစ်ဆင့် ပြဿာဒ်ဂိုဏ်း၏ မရပ်မနား တိုက်ခိုက်မှုများကို ရင်ဆိုင်ရမည် ဖြစ်သည်။

လုချန် ဒေါသထွက်သွားရသည်။ ဤလူတွေက သူ့ကို ဘာများ ထင်နေကြတာလဲ။ သူတို့ စိတ်ကြိုက် လည်ပတ်နိုင်သည့် အရုပ်တစ်ရုပ်လား။ သူသည် ကောင်းကင်အင်ပါယာ တော်ဝင်မိသားစုသို့ ဝင်ရောက်ကာ သူတို့၏ လည်ပတ်ရာ အရုပ်ဖြစ်ရန် ဆန္ဒမရှိပေ။ သူ၏ ပါရမီနှင့်ဆိုလျှင် အနာဂတ်တွင် တိုက်ကြီးကို အုပ်စိုးရန် ကံကြမ္မာပါပြီးဖြစ်ရာ သူများ၏ ထိန်းချုပ်မှုကို မခံလိုပေ။

ရွှယ်ချင်းဟယ်နှင့် နင်းဖုန်းကျီတို့အား ရင်ဆိုင်ရင်း လုချန်က ဖြည်းညင်းစွာ ပြောလိုက်၏။

“တောင်းပန်ပါတယ် အိမ်ရှေ့စံမင်းသား... ကျွန်တော်က လွတ်လပ်စွာ နေထိုင်ရတာကို ကျင့်သားရနေပြီ... အခုအချိန်မှာ ဘယ်ဂိုဏ်းကိုမှ မဝင်ချင်သေးပါဘူး”

“ဂိုဏ်းချုပ်နင်း နဲ့ ပဋိပက္ခနဲ့ ပတ်သက်ရင်တော့ အားလုံး နားလည်မှု လွဲနေကြတာပါ။ ဂိုဏ်းချုပ် နင်း နဲ့ ကျွန်တော့်ကြားမှာ ဘာပဋိပက္ခမှ မရှိပါဘူး”

“ကျွန်တော်က အရေးမပါတဲ့ သူတစ်ယောက်ပါ။ ဂိုဏ်းချုပ်နင်း နဲ့ တစ်ခါမှ မတွေ့ဖူးသလို သူနဲ့ ဘယ်လိုလုပ် ပဋိပက္ခ ဖြစ်နိုင်ပါ့မလဲ?”

“ဒါပေမဲ့ အိမ်ရှေ့စံမင်းသားရဲ့ ဖိတ်ခေါ်မှုကို ကျေးဇူးတင်ပါတယ်။ ညီအစ်ကို တူကူနဲ့ စကားပြောရတာ အလွန် ပျော်ရွှင်ရပြီး ကျွန်တော်တို့ ညီအစ်ကိုလို ဆက်ဆံနေကြပါပြီ။ အကယ်၍ ကျွန်တော် အခက်အခဲ တစ်ခုခု ကြုံရရင် ညီအစ်ကို တူကူက ကူညီပေးမှာ သေချာပါတယ်”

ဘန်း...

လုချန် စကားဆုံးသည်နှင့် ကုရုံက စားပွဲကို လက်ဖြင့် ပုတ်လိုက်၏။ သူ၏ မှိုင်းညို့သော မျက်လုံးများက လုချန်ကို စူးစိုက်ကြည့်ကာ အတင်းပြုံး၍ ပြောလိုက်လေသည်။

“ဟေ့... မင်းရဲ့ ကံကောင်းမှုကို အလွဲသုံးစား မလုပ်နဲ့။ ငါတို့ ဒီနေ့ ဒီကို လာခဲ့တာက မင်းကို အထင်ကြီးလို့ ပဋိပက္ခကို ဖြေရှင်းပေးဖို့ လာတာ”

“ငါ မင်းကို ရွေးချယ်ခွင့် ပေးထားတာ... မင်း အဲ့ဒါကို လက်ခံသင့်တယ်။ ဘယ်လိုလုပ် ငြင်းရဲတာလဲ... မင်းက အကြောင်းပြချက်ကို နားမထောင်ရင် အကျိုးဆက်ကို ခံစားရလိမ့်မယ်။ ငါ မင်းကို တကယ်ပဲ သတ်ချင်ရင် အဲ့ဒီ အဆိပ်အိုကြီးက ငါ့ကို မတားနိုင်ဘူး”

“အဲ့ဒီ အဆိပ်အိုကြီးကို မှီခိုနေရုံနဲ့ မင်း ဘေးကင်းမယ်လို့ မထင်နဲ့။ မင်းကို ချေမှုန်းဖို့ဆိုတာ ငါ့အတွက် ပုရွက်ဆိတ် တစ်ကောင်ကို ချေမှုန်းသလောက် လွယ်တယ်...”

ကုရုံ၏ ပွင့်လင်းသော ခြိမ်းခြောက်မှုကို ကြားရသောအခါ လုချန်၏ မျက်နှာမှာ အေးစက်သွားရသည်။ သူက ခေါင်းကို ငုံ့လိုက်ပြီး ဒေါသကြောင့် တောက်လောင်နေသော မျက်လုံးများဖြင့် ကြည့်လိုက်၏။

အဖြစ်အပျက်တွေက ထပ်ဖြစ်ပြန်ပြီ။

ဤဘွဲ့ခံတိုလောတို့က အလွန်တရာ မြင့်မားပြီး မောက်မာကြ၏။ ထိုစဉ်က တန်ဟောက် ဖြစ်စေ၊ ယခု ကုရုံဖြစ်စေ အားလုံး အတူတူပင်။ သူတို့က သူတို့ကိုယ်သူတို့ အစွမ်းထက်သည်ဟု ထင်မှတ်ကာ အခြားသူများကို မောက်မာစွာဖြင့် အနိုင်ကျင့်နေခဲ့ကြသည်။

လုချန်က စိတ်ထဲတွင် ဆိုးရွားစွာ တွေးလိုက်၏။

‘တန်ဟောက်... ထန်ဆန်း တို့ သားအဖနဲ့ ရန်ငြိုးကိုတောင် ငါ မချေဖျက်ရသေးဘူး.. အခု ကုရုံကပါ ထပ်ပါလာပြန်ပြီ’

‘ကောင်းတယ်... အရမ်းကောင်းတယ်။ အနာဂတ်မှာ ငါ အစွမ်းထက်လာရင် သူတို့အားလုံးကို တစ်ယောက်ပြီး တစ်ယောက် လက်စားချေမယ်’

‘ခွန်အား... နောက်ဆုံးမှာတော့ ငါ့ရဲ့ ခွန်အား မလုံလောက်လို့ပဲ’

လုချန်က သည်းခံရန် ဆုံးဖြတ်လိုက်ချိန်တွင်။

အပြင်ဘက် ဝင်းထဲမှ ပြင်းထန်သော အသက်ရှူသံတစ်ခုက အထဲသို့ အရှိန်အဟုန်ဖြင့် ရောက်ရှိလာခဲ့သည်။ ထိုသူကား အခြားသူမဟုတ် တူကူပိုပင်။

တူကူပိုက လျှောက်လှမ်းဝင်လာပြီး ရွှယ်ချင်းဟယ်နှင့် နင်းဖုန်းကျီတို့အား တစ်ချက်ကြည့်ကာ နောက်ဆုံးတွင် ကုရုံ၏ မျက်လုံးများနှင့် ဆုံတွေ့သွားခဲ့သည်။ သူက ကုရုံကို စူးစိုက်ကြည့်ကာ အေးစက်သော အသံဖြင့် ပြောလိုက်၏။

“အရိုးအိုကြီး... ငါမရှိတုန်းမှာ ငါ့ရဲ့ ညီအစ်ကိုကို အနိုင်ကျင့်ရဲတယ်ပေါ့လေ... ဒါက ငါ့ကို လုံးဝ မလေးစားတာပဲ”

“မင်းက အစွမ်းထက်တယ်ဆိုတာ ငါ ဝန်ခံပါတယ်။ ဒါပေမဲ့ ငါကလည်း အလွယ်တကူ အနိုင်ကျင့်ခံမယ့်သူ မဟုတ်ဘူး။ ငါ့ညီအစ်ကိုကို သတ်ချင်ရင် ငါ့ကို အရင် ကျော်ဖြတ်သွားမှ ရမယ်”

“ငါ မင်းရဲ့ ဘုံခုနစ်ဆင့် ပြဿာဒ်ဂိုဏ်းကို အဆိပ်ခတ်တာကို မမြင်ချင်ဘူး မဟုတ်လား..”

တူကူပိုသည်လည်း သက်စောင့်အသက်သွေး စွမ်းအင် ပိုင်ရှင်ဖြစ်သည်။ သူသည် မြေးမလေးကို ကျောင်းလိုက်ပို့လိုက်ရုံနှင့် အခြားသူများ၏ အနိုင်ကျင့်မှုကို ခံရလိမ့်မည်ဟု တစ်ခါမျှ မထင်ထားခဲ့ပေ။ ဤလူများက သူ၏ အိမ်သို့ လာကာ သူ၏ ဧည့်သည်ကို အနိုင်ကျင့်နေခဲ့ကြသည်။ သူတို့က တူကူပိုကို လုံးဝ မလေးစားကြပေ။

တူကူပိုသည် ဝိညာဉ်စွမ်းအား အဆင့် ၉၁ သာ ရှိသော်လည်း ဂုဏ်သိက္ခာနှင့် ခိုင်မာသော စိတ်ဓာတ်ကို ပိုင်ဆိုင်ထားသည့် ဘွဲ့ခံတိုလော တစ်ဦးဖြစ်ပြီး ပြန်လည် မတိုက်ခိုက်ဘဲ အနိုင်ကျင့်ခံနေမည့်သူ မဟုတ်ပေ။

ထို့အပြင် တူကူပိုသည် အဆိပ်ဖြေရန်အတွက် လုချန်ကို မှီခိုနေရသဖြင့် လုချန် ထိခိုက်နစ်နာသွားသည်ကို လုံးဝ မကြည့်ရက်နိုင်ချေ။ မည်သူမဆို လုချန်ကို ထိခိုက်စေရန် ကြိုးစားပါက တူကူပိုက သူတို့နှင့် အသက်ပေး တိုက်ခိုက်မည်ဖြစ်၏။

အခန်း ၃၈ပြီး