အခန်း (၂၆) ငွေပြာ ကောင်းချီး

လုချန်၏ အပြည့်အဝ ထိန်းချုပ်မှုအောက်တွင် ယခုအခါ ဝိညာဉ်ကွင်းလေးခု ထည့်သွင်းထားပြီး ဆင့်ကဲပြောင်းလဲမှု လေးကြိမ် ဖြတ်သန်းခဲ့ရသော ငွေပြာမြက် သိုင်းဝိညာဉ်သည် အလွန် ပြင်းထန်သော ခံနိုင်ရည်ကို ပြသနေခဲ့သည်။

မြွေများနှင့် စပါးကြီးမြွေများကဲ့သို့ ထူထဲသော အကိုင်းအခက်များက မိစ္ဆာဝိညာဉ်သစ်ပင်ကို တင်းကျပ်စွာ ချည်နှောင်ထားပြီး ငွေပြာ သန့်စင်ခြင်း၏ သန့်စင်ခြင်းစွမ်းအားဖြင့် အားနည်းသော အခြေအနေသို့ ရောက်သည်အထိ ဖိနှိပ်ထားလေသည်။

လုချန်က ဤအခွင့်အရေးကို အသုံးချကာ သူ၏ ကိုယ်ပိုင် ဖန်တီးထားသော ဝိညာဉ်စွမ်းရည် ပေါက်ကွဲခြေလှမ်းကို ပြသလိုက်၏။ ခုန်ပျံမှု အနည်းငယ် အကြာတွင် သူက သစ်ပင်၏ အရှေ့တည့်တည့်သို့ ရောက်ရှိသွားပြီး ညာဘက်လက်ကို မြှောက်ကာ လက်သီးဆုပ်လိုက်ပြီး သူ၏ ခွန်အားအားလုံးကို ထုတ်လွှတ်ကာ မိစ္ဆာဝိညာဉ်သစ်ပင်ဆီသို့ ထိုးချလိုက်ခေသည်။

“အမြောက်လက်သီး”

အစွမ်းထက်သော ဝိညာဉ်စွမ်းအားများက လက်သီးဆီသို့ စီးဝင်သွားပြီး အပြင်းအထန် ဖိသိပ်ခံရပြီးနောက် ၎င်းက ကြောက်မက်ဖွယ်ကောင်းသော အငွေ့အသက်တစ်ခုကို ထုတ်လွှတ်လိုက်သည်။

လုချန်က မိစ္ဆာဝိညာဉ်သစ်ပင်ကို လက်သီးဖြင့် ထိုးလိုက်သည်နှင့် ကြောက်မက်ဖွယ်ကောင်းသော စွမ်းအင်လှိုင်းတစ်ခု ပြန့်ထွက်သွားပြီး သစ်ပင် ပင်စည်ပေါ်တွင် နက်ရှိုင်းသော လက်သီးရာတစ်ခုကို ချန်ရစ်ခဲ့သည်။

ထို့အပြင် စွမ်းအင်လှိုင်းများက မိစ္ဆာဝိညာဉ်သစ်ပင်၏ ခန္ဓာကိုယ်ထဲသို့ ထိုးဖောက်ဝင်ရောက်သွားပြီး အတွင်း၌ ဖျက်ဆီးမှုများ ပြုလုပ်နေခဲ့လေသည်။ သစ်ပင် ပင်စည်မှာ ပြင်းထန်စွာ တုန်ယင်သွားပြီး ကျွီကျွီမြည်သံများ ဆက်တိုက် ထွက်ပေါ်လာရာ ၎င်း၏ ခံနိုင်ရည်မရှိတော့သော ဖိအားကို ရှင်းလင်းစွာ ဖော်ပြနေခဲ့၏။

“ကောင်းတယ် မိစ္ဆာဝိညာဉ်သစ်ပင်။ ငါက မင်းကို လက်သီးတစ်ချက်တည်းနဲ့ မချိုးဖျက်နိုင်မှတော့ မင်း ကျိုးသွားတဲ့အထိ ဆယ်ကြိမ်၊ အကြိမ်တစ်ရာလောက် ထိုးမယ်”

လုချန်၏ မျက်လုံးများက တောက်ပနေခဲ့သည်။ စကားပြောပြီးသည်နှင့် သူက မိစ္ဆာဝိညာဉ်သစ်ပင်၏ ပင်စည်ကို လက်သီးဖြင့် တစ်ချက်ပြီးတစ်ချက် စတင် ထိုးနှက်လေတော့သည်။

ဘုန်း...ဘုန်း.. ဘုန်း...ဘုန်း...

လုချန်၏ လက်သီးမှာ သွေးထွက်သံယို ဖြစ်လာပြီး အနောက်သို့ ကန်ထွက်လာသော အားကြောင့် သူ၏ လက်ချောင်းများနှင့် လက်ရိုးများတွင် အက်ကွဲကြောင်းငယ်များ စတင် ပေါ်လာသည့်တိုင်အောင် သစ်ပင်ပင်စည်ကို ဝင်တိုက်သော လက်သီး၏ တုံးအအ မြည်သံမှာ ရပ်တန့်မသွားခဲ့ပေ။

နာကျင်မှုက သူ၏ ခေါင်းထိပ်အထိ ဆောင့်တက်သွားရသည်။ သူက အစွမ်းကုန် ဖိနှိပ်ထားရန် ကြိုးစားသော်လည်း သူ၏ မျက်လုံးများက အခါအားလျော်စွာ တွန့်လိမ်သွားပြီး ရုပ်ပိုင်းဆိုင်ရာ နာကျင်မှုကို ဖိနှိပ်ရန် မလွယ်ကူကြောင်း ပြသနေခဲ့သည်။

ထိုသို့ဖြစ်လင့်ကစား လုချန်က လက်သီးများ ဆက်တိုက် ထိုးနေခဲ့ပြီး သူ၏ လက်များက တစ်စက္ကန့်မျှပင် ရပ်တန့်မသွားခဲ့ပေ။

နာကျင်မှုက သူ၏ စိတ်ကို ရှင်းလင်းသွားစေခဲ့သည်။

အမုန်းတရားက သူ၏ တွန်းအားကို လောင်ကျွမ်းစေခဲ့သည်။

ဤမိစ္ဆာဝိညာဉ်သစ်ပင်သည် ယနေ့တွင် ကျရှုံးရမည်ဖြစ်ပြီး ၎င်းက သူ၏ ပဉ္စမ ဝိညာဉ်ကွင်း ဖြစ်လာရမည်။

မည်သူကမျှ ၎င်းတို့ကို မတားဆီးနိုင်ပေ။

လုချန်က လက်သီး ဒါဇင်ပေါင်းများစွာ သို့မဟုတ် ရာပေါင်းများစွာ ထိုးခဲ့သလားဆိုတာ မရေတွက်ထားခဲ့ပေ။

သို့သော် သူ၏ မညှာမတာ တိုက်ခိုက်မှုများအောက်တွင် မိစ္ဆာဝိညာဉ်သစ်ပင်မှာ နောက်ဆုံးတွင် ဖိအားဒဏ်ကို မခံနိုင်တော့ဘဲ ၎င်း၏ ပင်စည်မှာ ကျွီခနဲ အသံနှင့်အတူ ကျိုးပဲ့သွားပြီး မိုးခြိမ်းသံကဲ့သို့ ဟိန်းဟောက်သံကြီးတစ်ခုနှင့်အတူ မြေပြင်ပေါ်သို့ ပြိုကျသွားခဲ့ရသည်။

နှစ်ပေါင်း နှစ်သောင်းခွဲ ကျင့်ကြံထားသော ဤမိစ္ဆာဝိညာဉ်သစ်ပင်သည် ငွေပြာသန့်စင်ခြင်း၏ ဖိနှိပ်မှုကြောင့် အားနည်းနေပြီဖြစ်သည်။ ယခုအခါ ပင်စည် ကျိုးပဲ့သွားသဖြင့် ၎င်းသည် နောက်ဆုံးတွင် သေဆုံးသွားလေပြီ။

ထို့နောက် မိစ္ဆာဝိညာဉ်သစ်ပင်၏ ပင်စည်မှ ကြီးမားလှသော အနက်ရောင် အလင်းတန်းတစ်ခု ထွက်ပေါ်လာပြီး ၎င်း၏ ထူးဆန်းပြီး မကောင်းဆိုးဝါးဆန်သော စွမ်းအင်က လေထုကိုပင် စေးကပ်သွားစေသည်။

၎င်း ထုတ်လွှတ်လိုက်သော စွမ်းအင်လှိုင်းများက လူများကို ပိုမို ဖိနှိပ်သကဲ့သို့ ခံစားရစေပေသည်။

အနက်ရောင် အလင်းတန်းက အကြိမ်ကြိမ် ပြောင်းလဲသွားသည်နှင့်အမျှ ၎င်းက နောက်ဆုံးတွင် အနက်ရောင် ဝိညာဉ်ကွင်းတစ်ခုအဖြစ် စုစည်းသွားခဲ့၏။

ယင်းကိုမြင်သောအခါ လုချန်မှာ နောက်ဆုံးတွင် စိတ်လျော့သွားနိုင်ခဲ့သည်။ ဇွဲလုံ့လက အကျိုးကျေးဇူးများ ဖြစ်ထွန်းစေခဲ့ပြီး သူက နောက်ဆုံးတွင် မိစ္ဆာဝိညာဉ်သစ်ပင်ကို သတ်ဖြတ်နိုင်ခဲ့သည်။

သူ၏ လက်သီးများမှာ သွေးထွက်သံယို ဖြစ်နေပြီး အနောက်သို့ ကန်ထွက်လာသော အားကြောင့် လက်ချောင်းများနှင့် လက်များတွင် အက်ကွဲကြောင်းငယ်များ ရှိနေပြီး သူ၏ လက်သီးများမှာ စုတ်ပြတ်နေဆဲဖြစ်သည်။

ကံကောင်းထောက်မစွာဖြင့် ဒါတွေအားလုံးက တန်ပေသည်။

“ပထမ ဝိညာဉ်စွမ်းရည်၊ ငွေပြာ ပြန်လည်သက်သာခြင်း”

“ဒုတိယ ဝိညာဉ်စွမ်းရည်၊ ငွေပြာ ကျေးဇူးတော်”

လုချန်က သူ၏ ပထမနှင့် ဒုတိယ ဝိညာဉ်စွမ်းရည်များကို ထုတ်လွှတ်လိုက်ရာ သူ၏ ပတ်လည်ရှိ ငွေပြာမြက်များက ညင်သာစွာ ယိမ်းနွဲ့လာပြီး အပြာရောင် အလင်းမြူလေးများကို ထုတ်လွှတ်ပေးလိုက်၏။

အပြာရောင် အလင်းမြူလေးများထဲတွင် ရေချိုးပြီးနောက် လုချန်၏ အက်ကွဲနေသော လက်ချောင်းများနှင့် လက်ရိုးများမှာ အလျင်အမြန် သက်သာလာပြီး သူ၏ စုတ်ပြတ်နေသော လက်သီးမှာ အနာဖေးတက်ကာ အလျင်အမြန် ပြန်ကောင်းလာခဲ့သည်။

တစ်ချိန်တည်းမှာပင် စိတ်ပိုင်းဆိုင်ရာနှင့် ရုပ်ပိုင်းဆိုင်ရာ ပင်ပန်းနွမ်းနယ်မှုများမှာ ငွေပြာ ကျေးဇူးတော်၏ နှစ်သိမ့်ပေးသော အကျိုးသက်ရောက်မှုကြောင့် ကြီးမားစွာ လျော့ကျသွားပြီး သူက အထွတ်အထိပ် အခြေအနေသို့ တဖြည်းဖြည်း ပြန်လည်ရောက်ရှိသွားလေသည်။

အေးမြပြီး လန်းဆန်းသော ခံစားချက်က နောက်ဆုံးတွင် လောင်ကျွမ်းနေသော နာကျင်မှုကို ဖိနှိပ်ပေးလိုက်သည်။ လုချန်က ရယ်မောကာ ပြောလိုက်၏။

“ငါ ရွေးချယ်ခဲ့တဲ့ ဝိညာဉ်သားရဲက တကယ်ကို ကောင်းတာပဲ။ ငွေပြာ ပြန်လည်သက်သာခြင်းနဲ့ ငွေပြာ ကျေးဇူးတော် နှစ်ခုစလုံးက တော်တော်လေး အသုံးဝင်တဲ့ စွမ်းရည်တွေပဲ”

“ဒီမိစ္ဆာဝိညာဉ် သစ်ပင်က ငါ့ကို စိတ်ပျက်အောင် မလုပ်ဘဲ ငါ မျှော်လင့်ထားတဲ့ စွမ်းရည်တစ်ခု ပေးစွမ်းနိုင်ဖို့ ငါ မျှော်လင့်တယ်”

လုချန်က တဖြည်းဖြည်း ပြန်လည်သက်သာလာသည်နှင့်အမျှ သူ၏ ပဉ္စမ ဝိညာဉ်ကွင်းကို စုပ်ယူရန် ပြင်ဆင်လိုက်၏။

ယင်းမတိုင်မီ လုချန်က မြေပြင်ပေါ်တွင် ကျင်းတစ်ခုကို အရင်တူးလိုက်သည်။ သူ ပိုတူးလေလေ ပို၍ ရွံရှာဖွယ်ကောင်းလာလေလေဖြစ်သည်။ ထိုနေရာတွင် မြေအောက်၌ ဝိညာဉ်သားရဲ အရိုးစုများ အထပ်ထပ် စုပုံနေသည်ကို တွေ့လိုက်ရသည်။

လုချန် တူးလိုက်သည်နှင့်အမျှ ဝိညာဉ်သားရဲများ၏ အရိုးစုများ အားလုံး ပေါ်လာပြီး ပုပ်ဟောင်နေသော အနံ့က အသက်ရှူရပင် ခက်ခဲလာစေခဲ့သည်။ လုချန်က တူးနေစဉ် တစ်ချိန်လုံး မျက်မှောင်ကြုတ်နေခဲ့လေသည်။

ရွံရှာဖွယ်ကောင်းပုံရသော်လည်း ၎င်းမှာ လုံခြုံရေး အကြောင်းပြချက်များကြောင့် ဖြစ်သည်။

လုချန်က နက်ရှိုင်းသော ကျင်းထဲသို့ ခုန်ဆင်းကာ တင်ပျဉ်ခွေထိုင်လိုက်ပြီးနောက် ငွေပြာမြက် အကိုင်းအခက်များကို ဆွဲကိုင်ရန် လက်လှမ်းလိုက်ရုံမှလွဲ၍ အခြားရွေးချယ်စရာ မရှိတော့ပေ။

၎င်းက မိစ္ဆာဝိညာဉ်သစ်ပင်၏ ခန္ဓာကိုယ်နှင့် တင်းကျပ်စွာ ချည်နှောင်ထားပြီး ကျင်းကြီးကို လုံးဝ ပိတ်ဆို့ရန် ပင်စည်ကို ဆွဲယူလိုက်သည်။

ဤအရာအားလုံးက လုံခြုံရေးအတွက်ဖြစ်ပြီး ဝိညာဉ်ကွင်းကို စုပ်ယူနေစဉ်အတွင်း ရုတ်တရက် ပေါ်လာသော ဝိညာဉ်သားရဲ၏ အနှောင့်အယှက်ပေးခြင်းကို ရှောင်ရှားရန်ဖြစ်၏။

သေချာ ပြင်ဆင်မှုများ လုပ်ပြီးနောက် လုချန်က မျက်လုံးများကို မှိတ်ကာ တရားထိုင်ခြင်းနည်းလမ်းကို အသက်သွင်းလိုက်ပြီး ငွေပြာမြက် သိုင်းဝိညာဉ်နှင့် ဆက်သွယ်ကာ နှစ်ပေါင်း နှစ်သောင်းခွဲ သက်တမ်းရှိ မိစ္ဆာဝိညာဉ်သစ်ပင်၏ ဝိညာဉ်ကွင်းကို စတင် စုပ်ယူလိုက်သည်။

နောက်တစ်စက္ကန့်တွင် ဝိညာဉ်ကွင်းက အောက်သို့ လွင့်မျောလာပြီး သူ၏ ငွေပြာမြက် သိုင်းဝိညာဉ်ပေါ်သို့ ကျဆင်းကာ အလျင်အမြန် ကျုံ့ဝင်သွားပြီး ဝိညာဉ်ထဲသို့ ပေါင်းစပ်သွားခဲ့သည်။

မကောင်းဆိုးဝါး၊ ဖိနှိပ်ခံရမှု၊ သွေးထွက်သံယို၊ အညစ်အကြေး...

လုချန် မျက်မှောင်ကြုတ်လိုက်၏။

ဤဝိညာဉ်ကွင်းက သူ့ကို အလွန် ဆိုးရွားသော ခံစားချက်တစ်ခု ပေးစွမ်းနေခဲ့သည်။

ဝိညာဉ်ကွင်းကို စုပ်ယူနေစဉ်အတွင်း ဤကဲ့သို့သော ခံစားချက်မျိုး ယခင်က သူ တစ်ခါမှ မကြုံခဲ့ဖူးပေ။

သို့သော် မြှားတစ်စင်း လွှတ်လိုက်ပြီးသည်နှင့် နောက်ပြန်ဆုတ်ရန် မဖြစ်နိုင်တော့ချေ။ ထို့ကြောင့် လုချန်က သူ၏ ကိုယ်ပိုင်ဝိညာဉ်စွမ်းအားကို စုစည်းကာ မိစ္ဆာဝိညာဉ်သစ်ပင်၏ ဝိညာဉ်ကွင်းကို သူ၏ ခွန်အားအကုန်သုံး၍ စတင် ဖိနှိပ်ရန်မှလွဲ၍ အခြားရွေးချယ်စရာ မရှိတော့ပေ။

ထို့အပြင် ငွေပြာမြက် သိုင်းဝိညာဉ်အနေဖြင့် ၎င်း၏ အစွမ်းထက်သော ပါဝင်ပေါင်းစပ်နိုင်စွမ်းနှင့်အတူ မိစ္ဆာဝိညာဉ်သစ်ပင်၏ ဝိညာဉ်ကွင်းရှိ မကောင်းဆိုးဝါးများကို ဖျက်သိမ်းပြီး ပျက်ပြယ်သွားစေခဲ့သည်။

ကံကောင်းထောက်မစွာဖြင့် သူက နှစ်တစ်သောင်း ဝိညာဉ်ကွင်းကို စုပ်ယူရာတွင် အတွေ့အကြုံ ရှိနှင့်ပြီးဖြစ်၏။

၎င်းက နှစ်ပေါင်း နှစ်သောင်းခွဲ သက်တမ်းရှိ မိစ္ဆာဝိညာဉ်သစ်ပင်၏ ဝိညာဉ်ကွင်းကို စုပ်ယူခြင်းဖြစ်ရာ သူ့ကို ကြီးမားသော ဖိအားများ ပေးခဲ့သော်လည်း စုပ်ယူမှု လုပ်ငန်းစဉ်မှာ အတော်လေး ချောမွေ့သွားခဲ့သည်။

နောက်ဆုံးတွင် ငွေပြာမြက်၏ အစွမ်းထက်သော ပါဝင်ပေါင်းစပ်နိုင်စွမ်းကြောင့် ၎င်းက မိစ္ဆာဝိညာဉ်သစ်ပင်၏ ဝိညာဉ်ကွင်းရှိ မကောင်းဆိုးဝါး သဘာဝကို တဖြည်းဖြည်း နှင်ထုတ်လိုက်ပြီး ၎င်းအတွင်း ပါဝင်သော ကြီးမားလှသည့် ဝိညာဉ်စွမ်းအားများနှင့် သက်စောင့်အသက်သွေး ဝိညာဉ်သားရဲ၏ အနှစ်သာရကို စတင် စုပ်ယူလ်ုက်လေသည်။

အရာအားလုံးက ချောမွေ့စွာ အဆင်ပြေနေခဲ့သည်။

မိစ္ဆာဝိညာဉ်သစ်ပင်၏ ဝိညာဉ်နာကြည်းမှုက တန်ပြန်တိုက်ခိုက်မှု တစ်ခုကို စတင်ခဲ့သော်လည်း လုချန်၏ အာရုံစူးစိုက်နေသော စိတ်အပေါ်တွင် မည်သည့် အကျိုးသက်ရောက်မှုမျှ မရှိခဲ့ဘဲ ဝိညာဉ်မှာ နောက်ဆုံးတွင် လုံးဝ ပျောက်ကွယ်သွားရသည်။

နှစ်ပေါင်း နှစ်သောင်းခွဲ သက်တမ်းရှိ မိစ္ဆာဝိညာဉ် သစ်ပင်၏ ဝိညာဉ်ကွင်းကို တစ်နာရီကျော်ကြာ စုပ်ယူပြီးနောက်... နောက်ဆုံးတွင် ၎င်းက လုချန်၏ ပဉ္စမ ဝိညာဉ်ကွင်းအဖြစ်သို့ ပြောင်းလဲသွားလေသည်။

ဝိညာဉ်ကွင်းကို အောင်မြင်စွာ စုပ်ယူပြီးနောက် လုချန်က ချက်ချင်း မျက်လုံးဖွင့်လိုက်၏။ သူက မိစ္ဆာဝိညာဉ်သစ်ပင်၏ ပင်စည်ကို သူ၏ ခေါင်းပေါ်မှ ရွှေ့ရန် ငွေပြာမြက်၏ အကိုင်းအခက်များကို ကြိုးကိုင်လိုက်ပြီးနောက် ကျင်းထဲမှ ခုန်ထွက်လာခဲ့လိုက်သည်။

လုချန်က လတ်ဆတ်သော လေကို ရှူရှိုက်လိုက်ပြီး သူ၏ နှလုံးသား အောက်ခြေမှစ၍ သက်သာရာရသွားသလို ခံစားလိုက်ရသည်။

ထိုပုပ်ဟောင်နေသော ကျင်းကြီးကြောင့် သူ ရွံရှာသွားခဲ့ရသည်။ လုံခြုံရေး အကြောင်းပြချက်များကြောင့်သာ မဟုတ်လျှင် ထိုနေရာတွင် သူ ပုန်းအောင်းနေခဲ့မည် မဟုတ်ပေ။

သူ၏ ဆုပ်ကိုင်ထားမှုကို အနည်းငယ် ဖြေလျော့လိုက်ပြီးနောက် လုချန်က သူ၏ ငွေပြာမြက် သိုင်းဝိညာဉ်ကို စတင် စောင့်ကြည့်လိုက်သည်။

ဒါက တော်တော်ကို အံ့သြစရာပင်။

သူ၏ လက်ရှိ ငွေပြာမြက် သိုင်းဝိညာဉ်မှာ ကြည်လင်တောက်ပနေပြီး အပင်တစ်ပင်နှင့် မတူတော့ဘဲ ကျောက်စိမ်းတုံး တစ်တုံးနှင့် ပိုတူနေခဲ့သည်။

လုချန်မှာ အလွန် ဝမ်းသာပျော်ရွှင်သွားရသည်။

“နှစ်တစ်ထောင် ဝိညာဉ်ကွင်း သုံးခုနဲ့ နှစ်တစ်သောင်း ဝိညာဉ်ကွင်း နှစ်ခုကို စုပ်ယူပြီးတော့ ငါ့ရဲ့ ငွေပြာမြက် သိုင်းဝိညာဉ်က သာမန် ငွေပြာမြက်တစ်ခု သေချာပေါက် မဟုတ်တော့ဘူး။ ငွေပြာဘုရင်အဖြစ်ကို ဆင့်ကဲမပြောင်းလဲသေးရင်တောင်မှ ငွေပြာဘုရင်ဖြစ်လာဖို့ အဆုံးအစမရှိ နီးစပ်နေသင့်တယ်”

“အဆင်ပြေပုံရပါတယ်။ မိစ္ဆာဝိညာဉ်သစ်ပင်ကနေ ဝိညာဉ်ကွင်းကို စုပ်ယူပြီးတာတောင် ငါ့ရဲ့ ငွေပြာမြက်ကို မကောင်းဆိုးဝါး ဖြစ်မသွားစေဘူး။ သူက အေးချမ်းငြိမ်သက်နေတုန်းပဲဖြစ်ပြီး ပေါများလှတဲ့ သက်စောင့်အသက်သွေး စွမ်းအားတွေကို ထုတ်လွှတ်နေတယ်”

“အခု ငါ့ရဲ့ ဝိညာဉ်စွမ်းအားက အဆင့် ခြောက်ဆယ်အထိ ထိုးတက်သွားပြီဖြစ်ပြီး ဆဋ္ဌမ ဝိညာဉ်ကွင်းကိုတောင် စုပ်ယူနိုင်နေပြီ။ ဟားဟား... အသက် ကိုးနှစ်ကျော်လေးပဲ ရှိသေးပြီး ဆယ်နှစ်တောင် မပြည့်သေးတဲ့ ကွင်းခြောက်ခု ဝိညာဉ်ဧကရာဇ်၊ ဘယ်သူက ယုံမှာလဲ”

“ငါ့ကို အသက်ရှူတိုင်း ပိုသန်မာလာစေတဲ့ အထူးစွမ်းရည်နဲ့ဆိုရင် ငါ အသက် ဆယ့်ငါးနှစ် မတိုင်ခင် ဘွဲ့ခံတိုလော ဖြစ်လာနိုင်ပြီး အသက် နှစ်ဆယ် မတိုင်ခင် လောကမှာ အသန်မာဆုံးသူ ဖြစ်လာနိုင်မယ်လို့ ငါ ယုံကြည်တယ်”

“နတ်ဘုရား ရာထူးအတွက်ကတော့ ငါ့ရဲ့ အထူးစွမ်းရည်နဲ့ဆိုရင် နတ်ဘုရားဖြစ်လာဖို့က သေချာပေါက်ပဲ”

“ငါ့ရဲ့ ပဉ္စမ ဝိညာဉ်ကွင်းနဲ့ ပတ်သက်ပြီး ပြောရရင် တကယ်ကို ကြီးကျယ်တဲ့ ဝိညာဉ်စွမ်းရည်တစ်ခုဖြစ်တဲ့ ငွေပြာ ကောင်းချီးကို ပေးစွမ်းတယ်။ သူက သက်စောင့်အသက်သွေး စွမ်းအားကို ငါ့ခန္ဓာကိုယ်ထဲကို လမ်းညွှန်ပေးပြီး အရည်အသွေးအားလုံးကို ရာခိုင်နှုန်း ၁၀၀ တိုးလာစေနိုင်တယ်။ တိုက်ခိုက်မှု၊ ကာကွယ်မှု၊ အမြန်နှုန်း၊ ခွန်အား... ပြည့်စုံတဲ့ မြှင့်တင်မှုတစ်ခုပါပဲ။ ဒါက လူတစ်ယောက်ရဲ့ ခွန်အားကို နှစ်ဆနီးပါး တိုးလာစေနိုင်တယ်”

“နှစ်ပေါင်း နှစ်သောင်းခွဲ သက်တမ်းရှိ ဝိညာဉ်ကွင်းနဲ့ ထိုက်တန်ပါတယ်။ သူက မိစ္ဆာဝိညာဉ်သစ်ပင်ရဲ့ စွမ်းအားကို ပြီးပြည့်စုံစွာ အမွေဆက်ခံထားပေမယ့် မိစ္ဆာဝိညာဉ်သစ်ပင်ရဲ့ မကောင်းဆိုးဝါးကြောင့် ယိုယွင်းမသွားခဲ့ပါဘူး။ အရမ်းကောင်းတယ်... ငါ အရမ်း ကျေနပ်တယ်”

အခန်း ၂၆ပြီး