အခန်း (၁၈) နှစ်လေးထောင် သက်တမ်းရှိ တိမ်မြူ လက်ဖက်ပင်

ငါ မင်းကိုပဲ ရွေးလိုက်ပြီ၊ နှစ်တစ်ထောင် သက်တမ်းရှိ သွေးနီမြက်။

အနည်းငယ် တုံ့ဆိုင်းပြီးနောက် လုချန်က နောက်ဆုံးတွင် ဆုံးဖြတ်ချက်ချလိုက်၏။

ရဲရင့်သူက ချမ်းသာပြီး သတ္တိကြောင်သူက ငတ်မွတ်တတ်သည်။

နှစ်တစ်ထောင် သက်တမ်းရှိ ကျားကြီးကို လက်ဗလာဖြင့် အနိုင်ယူနိုင်သော သူ၏ ကြောက်မက်ဖွယ် ခန္ဓာကိုယ်နှင့်ဆိုလျှင် နှစ်တစ်ထောင် ဝိညာဉ်ကွင်းဆက်ကို မစုပ်ယူနိုင်ဘူးဆိုသည်ကို လုချန် လုံးဝ မယုံကြည်ပေ။

ဆုံးဖြတ်ချက်ချပြီးနောက် လုချန်က နှစ်တစ်ထောင် သက်တမ်းရှိ သွေးနီမြက်အနီးသို့ လျှောက်သွားကာ အနက်ရောင် သံမဏိတံစဉ်ကို လွှဲခုတ်လိုက်ပြီး သုံးမီတာရှည်လျားသော သွေးနီမြက်နှင့် ၎င်း၏ အမြစ်များကို နှစ်ပိုင်းပြတ်သွားအောင် ခုတ်ဖြတ်လိုက်လေသည်။

တောက်၊ တောက်၊ တောက်၊ တောက်။

သွေးနီမြက်၏ ပြတ်တောက်သွားသော အမြစ်များမှ အနီရောင် အရည်များ စီးကျလာရာ သွေးများနှင့် အတိအကျ တူညီသော်လည်း ထူးခြားသော ရနံ့တစ်ခု ပါဝင်နေခဲ့သည်။

အပင် ဝိညာဉ်သားရဲတစ်ခုအနေဖြင့် နှစ်တစ်ထောင် သက်တမ်းရှိ သွေးနီမြက်သည် အလွန် ပြင်းထန်သော သက်စောင့်အသက်သွေး စွမ်းအားကို ပိုင်ဆိုင်ထားသော်လည်း ၎င်း၏ အမြစ်များနှင့် ပင်စည်များ ပြတ်တောက်သွားပြီးနောက် ၎င်း၏ အသက်မှာ အဆုံးသတ်သွားပြီဖြစ်၏။

နှစ်တစ်ထောင် သက်တမ်းရှိ သွေးနီမြက်က တုန်ယင်သွားပြီး ၎င်း၏ အမြစ်များ၊ ပင်စည်များနှင့် အရွက်များမှ တောက်ပသော ခရမ်းရောင် အလင်းတန်းများ ထွက်ပေါ်လာခဲ့သည်။

အကြိမ်ကြိမ် အသွင်ပြောင်းပြီးနောက် နောက်ဆုံးတွင် ၎င်းက ခရမ်းရောင် ဝိညာဉ်ကွင်းတစ်ခုအဖြစ် စုစည်းသွားလေသည်။

ခရမ်းရောင် ဝိညာဉ်ကွင်း၊ နှစ်တစ်ထောင် သက်တမ်းရှိ ဝိညာဉ်ကွင်း။

၎င်းမှာ မူလက ဝိညာဉ်စွမ်းအား အဆင့် ၃၀ သို့ ရောက်ရှိမှသာ စုပ်ယူနိုင်သော အစွမ်းထက်သည့် ဝိညာဉ်ကွင်းဖြစ်သော်လည်း သူ၏ ခန္ဓာကိုယ်ခွန်အားကို ယုံကြည်သော လုချန်က ၎င်းကို သူ၏ ပထမဆုံး ဝိညာဉ်ကွင်းအဖြစ် အသုံးပြုရန် ဆုံးဖြတ်ခဲ့၏။

အခြားသော ဝိညာဉ်သခင်များက သူတို့၏ ပထမဆုံး ဝိညာဉ်ကွင်းအဖြစ် ဆယ်စုနှစ် ဝိညာဉ်ကွင်းနှင့် နှစ်တစ်ရာ ဝိညာဉ်ကွင်းကိုသာ စုပ်ယူနေကြချိန်တွင် ဖြစ်သည်။

လုချန်က သူ၏ ပထမဆုံး ဝိညာဉ်ကွင်းအဖြစ် နှစ်တစ်ထောင် ဝိညာဉ်ကွင်းဆက်ကို အသုံးပြုလိုခြင်းမှာ သာမန်အသိဉာဏ်ကို ဖီဆန်ရန် ကြိုးစားခြင်းဖြစ်ကြောင်း သေချာလှသည်။

ထို့နောက် လုချန်က နှစ်တစ်ထောင် သက်တမ်းရှိ သွေးနီမြက်ကို ပခုံးပေါ်သို့ တင်ကာ တောင်ကြားထဲမှ ထွက်ရန် လှည့်ထွက်လာခဲ့သည်။

သူက ဝိညာဉ်ကွင်းကို စုပ်ယူနေစဉ်အတွင်း လွတ်လပ်စွာ မလှုပ်ရှားနိုင်မည်ကို စိုးရိမ်သောကြောင့် ဤနေရာတွင် ဝိညာဉ်ကွင်းကို စုပ်ယူရန် မဝံ့ရဲပေ။

သူ ဝိညာဉ်ကွင်းကို စုပ်ယူနေစဉ်အတွင်း ကျားကြီးက ပြန်ပြေးလာပါက သူက လွတ်လပ်စွာ မလှုပ်ရှားနိုင်သဖြင့် သူ သေချာပေါက် သေဆုံးရမည်ဖြစ်၏။

ဝိညာဉ်ကွင်းများကို စုပ်ယူရန် လုံခြုံသော နေရာတစ်ခုကို ရှာဖွေရန် လိုအပ်သေးပေသည်။

နှစ်တစ်ထောင် သက်တမ်းရှိ သွေးနီမြက်ကို သယ်ဆောင်ကာ လုချန်က ပတ်ဝန်းကျင်ကို သတိထား၍ ကြည့်ရှုရင်း ဝိညာဉ်သားရဲ၏ ရုတ်တရက် တိုက်ခိုက်မှုကို သတိထားကာ ဝိညာဉ်ကွင်းဆက်ကို စုပ်ယူရန် နေရာတစ်ခု ရှာဖွေရင်း အလျင်အမြန် ရှေ့သို့ ဆက်သွားခဲ့သည်။

နာရီဝက်ခန့် အကြာတွင် လုချန်သည် အခေါင်းပေါက်ပါသော အလွန်မြင့်မားသည့် သစ်ပင်ကြီးတစ်ပင်ကို ရှာတွေ့ခဲ့ပြီး ၎င်းမှာ ဝိညာဉ်သားရဲ တစ်ကောင်ကောင်၏ စွန့်ပစ်ထားသော အသိုက်တစ်ခုနှင့် တူနေခဲ့သည်။

လုချန်က သစ်ပင်ပေါ်သို့ တက်ကာ စမ်းကြည့်လိုက်၏။ သူက ကိုယ်ကို ကွေးထားမည်ဆိုပါက သူ၏ ခန္ဓာကိုယ်နှင့် ကွက်တိဖြစ်နေသဖြင့် ဤနေရာတွင် ဝိညာဉ်ကွင်းကို စုပ်ယူရန် ဆုံးဖြတ်လိုက်ခေသည်။

သူက သစ်ခေါင်းပေါက်ထဲတွင် ကိုယ်ကို ကွေးထားကာ ဝင်ပေါက်ကို သူ၏ ခရီးဆောင်အိတ်ဖြင့် တင်းကျပ်စွာ ပိတ်ထားလိုက်လေသည်။

သေချာ ပြင်ဆင်မှုများ လုပ်ပြီးနောက် လုချန်က မျက်လုံးများကို မှိတ်ကာ တရားထိုင်ခြင်းနည်းလမ်းကို အသက်သွင်းလိုက်ပြီး ငွေပြာမြက် သိုင်းဝိညာဉ်နှင့် ဆက်သွယ်ကာ နှစ်တစ်ထောင် သက်တမ်းရှိ သွေးနီမြက်၏ ခရမ်းရောင် ဝိညာဉ်ကွင်းကို စတင် စုပ်ယူလိုက်လေသည်။

ဆင့်ခေါ်ပြီးနောက် ခရမ်းရောင် ဝိညာဉ်ကွင်းက လုချန်ဆီသို့ ရုတ်တရက် လွင့်မျောလာပြီး သူ၏ လက်ဖဝါးထဲရှိ ငွေပြာမြက်ပေါ်သို့ ကျဆင်းလာကာ မြက်ပင်ထဲသို့ ပေါင်းစပ်သွားသည်အထိ အလျင်အမြန် ကျုံ့ဝင်သွားခဲ့သည်။

မျက်စိတစ်မှိတ်အတွင်းမှာပင် ပြင်းထန်ပြီး တက်ကြွသော ဝိညာဉ်စွမ်းအားများ ပြန့်နှံ့သွားခဲ့သည်။ ထိုဝိညာဉ်စွမ်းအား၏ အာဟာရဖြည့်တင်းမှုအောက်တွင် လုချန်၏ ငွေပြာမြက် သိုင်းဝိညာဉ်က ညင်သာစွာ တုန်ယင်သွားပြီး မျက်စိဖြင့် မြင်နိုင်သော အမြန်နှုန်းဖြင့် ပိုမို ရှည်လျား၊ ပိုမို သန်မာကာ ပိုမို တက်ကြွလာလေသည်။

ထိုကြီးမားလှသော ဝိညာဉ်စွမ်းအားများကလည်း ငွေပြာမြက် သိုင်းဝိညာဉ်မှတစ်ဆင့် လုချန်၏ ခန္ဓာကိုယ်ထဲသို့ စီးဝင်လာခဲ့သည်။

ကြီးမားသော ဝိညာဉ်စွမ်းအားများက သူ၏ လမ်းကြောင်းကြီးများမှတစ်ဆင့် စီးဆင်းလာပြီး နောက်ဆုံးတွင် ဒန်တျန်သို့ ရောက်ရှိလာကာ အရာအားလုံးကို ဖျက်ဆီးပစ်တော့မည့်အလား ဖြစ်နေသော်လည်း လုချန်၏ ဒန်တျန်ထဲတွင် စိတ်ကူးမယဉ်နိုင်လောက်အောင် ကြီးမားသော ဝိညာဉ်စွမ်းအားများ ရှိနေခဲ့သည်။

ဤကြီးမားလှသော ဝိညာဉ်စွမ်းအား၏ ဖိနှိပ်မှုအောက်တွင် နှစ်တစ်ထောင် သက်တမ်းရှိ သွေးနီမြက်၏ ဝိညာဉ်ကွင်း စွမ်းအားမှာ ကြောင်ကိုမြင်သော ကြွက်တစ်ကောင်ကဲ့သို့ နာခံမှုရှိပြီး ဟိုဟိုဒီဒီ ပြေးလွှားရန် မဝံ့ရဲတော့ပေ။

လုချန်၏ ငွေပြာမြက် သိုင်းဝိညာဉ်၏ စုပ်ယူမှုနှင့် သန့်စင်မှုအောက်တွင် ပြင်ပ ဝိညာဉ်စွမ်းအားမှာ နောက်ဆုံးတွင် လုံးဝ ပြန့်ကျဲသွားပြီး သူ၏ ကိုယ်ပိုင် ဝိညာဉ်စွမ်းအားထဲသို့ ပေါင်းစပ်သွားလေသည်။

လုပ်ငန်းစဉ်တစ်ခုလုံးမှာ ထူးထူးခြားခြား ချောမွေ့သွားခဲ့သည်။

လုချန်က နှစ်တစ်ထောင် ဝိညာဉ်ကွင်းကို စုပ်ယူခြင်းမှာ အနည်းငယ် အန္တရာယ်များသော်လည်း ရလဒ်ကတော့ သူ မျှော်လင့်ထားသည်ထက် ပိုကောင်းနေခဲ့၏။ မည်သည့် ဒဏ်ရာမျှ မရရှိဘဲ သူက ဝိညာဉ်ကွင်းကို စုပ်ယူနိုင်ခဲ့သည်။

ဝိညာဉ်ကွင်း စုပ်ယူသည့် လုပ်ငန်းစဉ်မှာ မိနစ်လေးဆယ်ခန့် ကြာမြင့်ခဲ့ပြီးနောက် လုချန်၏ ဝိညာဉ်ကွင်းဆက် စုပ်ယူခြင်းမှာ အဆုံးသတ်သွားခဲ့၏။

သစ်ခေါင်းပေါက်ထဲတွင် လုချန်က မျက်လုံးများ ဖွင့်လိုက်ရာ ပျော်ရွှင်မှုများ တောက်ပနေခဲ့ရသည်။ သူ၏ နှုတ်ခမ်းထောင့်များက အပေါ်သို့ ကွေးတက်သွားပြီး ဖုံးကွယ်မထားနိုင်သော အပြုံးတစ်ခုကို ပြသနေသည်။

သူက အလွန် ဝမ်းသာပျော်ရွှင်သွားပြီး သူ့စိတ်ထဲတွင် တွေးလိုက်၏။

‘နှစ်တစ်ထောင် ဝိညာဉ်ကွင်းကို စုပ်ယူရတာ ဒီလောက် လွယ်ကူလိမ့်မယ်လို့...။ ငါ့ခန္ဓာကိုယ်ကို ငါ အထင်သေးသွားခဲ့တာပဲ။ ပထမဆုံး ဝိညာဉ်ကွင်းကို စုပ်ယူပြီးနောက် ငါ့ရဲ့ ဝိညာဉ်စွမ်းအားက အဆင့် နှစ်ဆယ်အထိ ထိုးတက်သွားပြီ။ အခု ငါ လိုအပ်နေတဲ့ ဒုတိယ ဝိညာဉ်ကွင်းကို ရှာရမယ့်အချိန် ရောက်ပြီ’

‘ငါ့ရဲ့ ပထမဆုံး ဝိညာဉ်ကွင်းက သွေးနီမြက်ကနေ ရလာတဲ့ နှစ်တစ်ထောင် ဝိညာဉ်ကွင်းဖြစ်ပြီး ဒီစွမ်းရည်ကို ငါ အရမ်း ကျေနပ်တယ်’

ငွေပြာ ပြန်လည်သက်သာခြင်း : ပထမ ဝိညာဉ်စွမ်းရည်ကို အသုံးပြုပြီးနောက် အပြာရောင် အလင်းမြူတစ်ခုကို ထုတ်လွှတ်ပေးသည်။ ဤအလင်းမြူနှင့် ထိတွေ့သူတိုင်း သူတို့၏ ဒဏ်ရာများမှ အလျင်အမြန် ပြန်လည်သက်သာလာနိုင်ပေသည်။

ပထမဆုံး ဝိညာဉ်ကွင်းကို စုပ်ယူပြီးနောက် လုချန်သည် သစ်ခေါင်းပေါက် အဝင်ဝကို ပိတ်ထားသော အိတ်ကို ဖယ်ရှားလိုက်ပြီး ကျဉ်းမြောင်းသော အပေါက်ထဲမှ တွားသွားထွက်ကာ မြင့်မားသော သစ်ပင်ကြီးပေါ်မှ မြေပြင်သို့ ခုန်ဆင်းလိုက်သည်။

အတွေးတစ်ချက်ဖြင့် သူက ငွေပြာမြက် သိုင်းဝိညာဉ်ကို ဆင့်ခေါ်လိုက်ရာ သူ၏ လက်ဖဝါးအထက် လေဟာနယ်ထဲမှ ငွေပြာမြက်တစ်ခု ထွက်ပေါ်လာခဲ့သည်။

ပြီးတော့ သူ၏ ခြေထောက်အောက်တွင် ခမ်းနားသော ခရမ်းရောင် ဝိညာဉ်ကွင်းတစ်ခု ပေါ်ထွက်လာလေသည်။

သူ၏ မူလ ဝိညာဉ်နှင့် နှိုင်းယှဉ်ပါက ဤငွေပြာမြက်မှာ ပိုမိုရှည်လျား၊ ပိုမိုသန်မာပြီး ပိုမိုတက်ကြွနေခဲ့သည်။ ငွေပြာမြက်၏ အရွက်များပေါ်တွင် သွေးကဲ့သို့ နီရဲနေသော ပုံစံများက သွေးကြောများနှင့် တူနေကြောင်း မြင်တွေ့နိုင်၏။

ဤသည်မှာ ဆင့်ကဲပြောင်းလဲမှု တစ်ကြိမ် ပြီးမြောက်ပြီးနောက် ငွေပြာမြက်ပင်။

လုချန်က သူသည် အပင်ဝိညာဉ်သားရဲများ၏ ဝိညာဉ်ကွင်းဆက်ကိုသာ ဆက်လက် စုပ်ယူနေသရွေ့ သူ၏ ငွေပြာမြက်သည် မျိုးဗီဇပြောင်း ငွေပြာဧကရာဇ်အဖြစ်သို့ နောက်ဆုံးတွင် သေချာပေါက် ဆင့်ကဲပြောင်းလဲသွားနိုင်မည်ဟု ယုံကြည်ထားပေသည်။

လုချန်က ရယ်မောကာ ပြောလိုက်၏။

“ငါ့ရဲ့ ငွေပြာမြက်က ဆင့်ကဲပြောင်းလဲသွားပြီ။ သူ စုပ်ယူခဲ့တဲ့ ပထမဆုံး ဝိညာဉ်ကွင်းက ငါ မျှော်လင့်ထားတဲ့အတိုင်းပဲ။ ဒီပြန်လည်သက်သာခြင်း စွမ်းရည်နဲ့ဆိုရင် ရှင်းတို မဟာတောအုပ်ကြီးထဲမှာ တိုက်ပွဲဝင်တဲ့အခါ ဒဏ်ရာရမှာကို ငါ စိုးရိမ်စရာ မလိုတော့ဘူး”

စကားပြောပြီးသည်နှင့် လုချန်က ငွေပြာမြက် သိုင်းဝိညာဉ်ကို ပြန်သိမ်းလိုက်ပြီး သူ၏ အိတ်ကို ပြန်ယူကာ ကျပန်း လားရာတစ်ခုကို ရွေးချယ်၍ ရှေ့သို့ လျှောက်သွားရင်း လိုအပ်နေသော ဒုတိယ ဝိညာဉ်ကွင်းကို ရှာဖွေရန် ပြင်ဆင်လိုက်၏။

...

ကျယ်ပြောလှသော ရှင်းတို မဟာတောအုပ်ကြီးထဲတွင် သင့်လျော်သော ဝိညာဉ်သားရဲကို ရှာဖွေခြင်းက လွယ်ကူသော အလုပ်တစ်ခု မဟုတ်ချေ။

သွေးနီမြက်၏ နှစ်တစ်ထောင် ဝိညာဉ်ကွင်းကို နောက်ဆုံး စုပ်ယူပြီးကတည်းက တစ်လကျော် အချိန်ကုန်လွန်သွားခဲ့ပြီဖြစ်၏။

လုချန်သည် ရှင်းတို မဟာတောအုပ်ကြီး၏ အပြင်ဘက်ဇုန်များတွင် မမောမပန်းဘဲ ရှာဖွေရင်း တစ်လကျော် အချိန်ကုန်လွန်ခဲ့သည်။

အပင်ဝိညာဉ်သားရဲများစွာကို တွေ့ခဲ့ရသော်လည်း ၎င်းတို့ထဲမှ မည်သည့်အရာကမျှ သူနှင့် မကိုက်ညီခဲ့ပေ။ မျိုးစိတ် မကိုက်ညီခြင်း သို့မဟုတ် သက်တမ်း မကိုက်ညီခြင်းတို့ကြောင့် ဖြစ်သည်။

တစ်လတိတိ ပင်ပန်းဆင်းရဲစွာ ရှာဖွေပြီးနောက် လုချန်မှာ အလွန် ပင်ပန်းနွမ်းနယ်နေဆလပြီ။ ယနေ့ သူက ရေကန်တစ်ခုအနီးသို့ ရောက်ရှိလာပြီး မျက်နှာသစ်ကာ စိတ်ကို ငြိမ်သက်စေရန် စီစဉ်လိုက်၏။

ရေကန်အနီးသို့ ရောက်သောအခါ လုချန်သည် ရေကန်အလယ်ရှိ ကျွန်းလေးကို မျက်လုံးပြူးကာ စိုက်ကြည့်နေမိခဲ့သည်။

ရေကန်အလယ်ရှိ ကျွန်းလေးပေါ်တွင် စိမ်းလန်းစိုပြေသော အရွက်များနှင့်အတူ ကြီးမားလှသော လက်ဖက်ပင်ကြီးတစ်ပင် ပေါက်ရောက်နေခဲ့သည်။ လက်ဖက်ရနံ့သင်းသင်းလေးက လွင့်ပျံလာပြီး လုချန်ကို လန်းဆန်းသွားစေခဲ့သည်။

လုချန်က အံ့သြတကြီး ပြောလိုက်၏။

“တိမ်မြူ လက်ဖက်ပင်။ ငါက တိမ်မြူ လက်ဖက်ပင်ကို တကယ်ကြီး ရှာတွေ့သွားတာပဲ။ ပြီးတော့ သူ့ရဲ့ အရွယ်အစားကို ကြည့်ရတာ နှစ်လေးထောင်လောက်တော့ သက်တမ်းရှိလောက်တယ်။ ဒါက တကယ့်ကို ကံကောင်းခြင်းတစ်ခုပဲ”

တိမ်မြူ လက်ဖက်ပင်၏ လက်ဖက်ရွက်များက အထက်တန်းစား အသိုင်းအဝိုင်းများတွင် ထိပ်တန်း ဇိမ်ခံပစ္စည်းတစ်ခုအဖြစ် သတ်မှတ်ခံရသည်။ ၎င်းကို နှပ်ထားသော လက်ဖက်ရည်က ပင်ပန်းနွမ်းနယ်မှုများကို ပြေပျောက်စေပြီး ခွန်အားများကို ပြန်လည်ဖြည့်တင်းပေးနိုင်သည့် မှတ်သားလောက်စရာ အကျိုးသက်ရောက်မှု ရှိသည်ဟု ဆိုကြ၏။

အထက်တန်းစား အသိုင်းအဝိုင်းများတွင် လက်ဖက်တစ်အောင်စက ရွှေတစ်အောင်စနှင့် တန်သည် ဟူသော ဆိုရိုးစကားတစ်ခု ရှိပေသည်။

လုချန်သာ တိမ်မြူလက်ဖက်ပင်ကို အကောင်းပကတိအတိုင်း ပြန်သယ်သွားမည်ဆိုပါက မြို့တော်မှ မင်းမျိုးမင်းနွယ်များက ၎င်းကို ဝယ်ယူရန် ငွေကြေးများစွာ အကုန်အကျခံကြမည်ဖြစ်သည်။

နှစ်လေးထောင် သက်တမ်းရှိ တိမ်မြူလက်ဖက်ပင်ကို ရွှေပြား လေးသိန်းထက်မနည်းသော စျေးဖြင့် ကမ်းလှမ်းကြမည်ဖြစ်၏။

သို့သော်လည်း လုချန် ယခု လိုအပ်နေသည်မှာ ရွှေပြား မဟုတ်ဘဲ သူနှင့် ကိုက်ညီသော ဒုတိယ ဝိညာဉ်ကွင်းသာ ဖြစ်လေသည်။

အခန်း ၁၈ပြီး