အခန်း (၁၇) နှစ်တစ်ထောင် သက်တမ်းရှိ သွေးနီမြက်

ရှင်းတို မဟာတောအုပ်ကြီး၏ အပြင်ဘက်ဇုန် အစွန်အဖျားတွင်။

ကျောပိုးအိတ်ကို လွယ်ထားသော လုချန်သည် ဖြစ်လာနိုင်သော အန္တရာယ်မှန်သမျှကို အမြဲတမ်း သတိထားရင်း တောအုပ်ထဲတွင် ဂရုတစိုက် လျှောက်သွားနေခဲ့သည်။

သူ၏ ညာဘက်လက်ထဲတွင်လည်း ဒုတိယသိုင်းဝိညာဉ်ဖြစ်သော အနက်ရောင် သံမဏိတံစဉ်ကို ကိုင်ဆောင်ထားခဲ့ဆလသည်။

လက်ကိုင်ရိုးမှာ နှစ်ပေခန့် ရှည်လျားပြီး လက်နှစ်ချောင်းစာခန့် တုတ်ခိုင်၏။ လက်ကိုင်ရိုး၏ ထိပ်တွင် အရှည် တစ်ပေခန့်နှင့် အကျယ် လက်သုံးချောင်းစာခန့်ရှိသော လခြမ်းပုံသဏ္ဍာန် တံစဉ်တစ်ခု ရှိပြီး ယခုအခါတွင် အန္တရာယ်ပေးမည့် အလင်းရောင်များ တောက်ပနေသော အသွားတစ်ဖက်ပါ ဓားသွားတစ်ခု ရှိနေခဲ့သည်။

သူ၏ ပထမဝိညာဉ် ငွေပြာမြက်နှင့် နှိုင်းယှဉ်ပါက သူ၏ ဒုတိယသိုင်းဝိညာဉ် အနက်ရောင် သံမဏိတံစဉ်မှာ လယ်ယာသုံး ကိရိယာတစ်ခုမျှသာ ဖြစ်သော်လည်း တိုက်ခိုက်ရေး စွမ်းရည်အချို့ကို ပိုင်ဆိုင်ထားလေသည်။

အထူးသဖြင့် ၎င်းမှာ လုချန်၏ ဝိညာဉ်ဖြစ်ပြီး လုချန်၏ ကြီးမားလှသော ဝိညာဉ်စွမ်းအားကို ခံနိုင်ရည်ရှိသည်။ သူ၏ ကြီးမားသော ဝိညာဉ်စွမ်းအားကို ထည့်သွင်းလိုက်မှုအောက်တွင် အနက်ရောင် သံမဏိတံစဉ်၏ ထက်မြက်မှုမှာ သန့်စင်ထားသော သံနှင့် သံမဏိတို့ဖြင့် ဖန်တီးထားသည့် လက်နက်များထက်ပင် များစွာ သာလွန်ပေသည်။

ရှင်းတို မဟာတောအုပ်ကြီးထဲတွင် အနက်ရောင် သံမဏိတံစဉ်ကို ကိုယ်ပိုင်ကာကွယ်ရေးအတွက်သာမက လမ်းရှင်းရန်အတွက်ပါ ကျယ်ကျယ်ပြန့်ပြန့် အသုံးပြုနိုင်၏။

ဤရှေးဟောင်း တောအုပ်ကြီးများတွင် မြက်များနှင့် နွယ်ပင်များက ပိတ်ဆို့နေပြီး ၎င်းတို့ကြားတွင် မြွေများ၊ အင်းဆက်များနှင့် ကြွက်များ ပုန်းအောင်းနေနိုင်သဖြင့် ပိုမို ဂရုစိုက်ရန် လိုအပ်လေသည်။

လုချန်၏ အနက်ရောင် သံမဏိတံစဉ်မှာ မူလက ဂျုံနှင့် စပါးများကို ရိတ်သိမ်းရန် ဖန်တီးထားခြင်းဖြစ်သော်လည်း ၎င်းက မြက်များနှင့် နွယ်ပင်များကို ခုတ်ထွင်ရန်အတွက်လည်း ပြီးပြည့်စုံစွာ အလုပ်လုပ်ပေးနိုင်ခဲ့သည်။

ထိုစဉ် တရှဲရှဲ အသံတစ်ခု ထွက်ပေါ်လာပြီး အနီးနားရှိ သစ်ပင်ပေါ်မှ အမည်းရောင် အရိပ်တစ်ခုက လုချန်ဆီသို့ တည့်မတ်စွာ ပြေးဝင်လာခဲ့သည်။

၎င်းက မည်သည့် သတ္တဝါမျိုးဖြစ်ကြောင်းကို လုချန် မမြင်ရသေးခင်မှာပင် သူ၏ ခန္ဓာကိုယ်က အလိုအလျောက် တုံ့ပြန်လိုက်ပြီး အနက်ရောင် သံမဏိတံစဉ်ကို အလျင်အမြန် လွှဲခုတ်လိုက်သည်။

လေထဲတွင် ထက်ရှပြီး အေးစက်သော အလင်းရောင်တစ်ခု လက်ခနဲ ဖြစ်သွားသည်နှင့် ပြေးဝင်လာသော အမည်းရောင် အရိပ်မှာ ချက်ချင်းပင် နှစ်ပိုင်းပြတ်သွားရသည်။

ကျယ်လောင်သော သစ်တုံးကျသံ နှစ်သံ။

လုချန် နှစ်ပိုင်းခုတ်ဖြတ်လိုက်သော သတ္တဝါ၏ ခေါင်းနှင့် ခန္ဓာကိုယ်မှာ မြေပြင်ပေါ်သို့ လဲကျသွားပြီး သွေးများ လျင်မြန်စွာ စီးကျလာကာ မြေပြင်ကို အနီရောင်အဖြစ် ဆေးဆိုးလိုက်သည်။

ထိုအခါမှသာ လုချန်က ထိုသတ္တဝါ၏ အစစ်အမှန် ပုံစံကို မြင်လိုက်ရ၏။ ၎င်းမှာ အလွန် အဆိပ်ပြင်းသော မြွေတစ်ကောင်ဖြစ်သည့် ဝိညာဉ်သားရဲပင်။

အကယ်၍ ၎င်းကသာ သင့်ကို ကိုက်လိုက်ပါက သင်သည် ရှင်းတို မဟာတောအုပ်ကြီးထဲမှ ထွက်ခွာနိုင်မည် မဟုတ်ချေ။

လုချန်က သက်ပြင်းချကာ မပြောဘဲ မနေနိုင်တော့ပေ။

“ဒီရှင်းတို မဟာတောအုပ်ကြီးက တကယ်ကို အန္တရာယ်တွေနဲ့ ပြည့်နှက်နေတာပဲ။ ဒီအပြင်ဘက်ဇုန်ရဲ့ အစွန်အဖျားမှာတောင် ရွှေရောင် အဆိပ်ပြင်းမြွေလို ဝိညာဉ်သားရဲမျိုးတွေ ရှိနေတာပဲ”

နောက်တစ်စက္ကန့်တွင် ရွှေရောင် အဆိပ်ပြင်းမြွေ၏ အလောင်းပေါ်မှ ထွက်ပေါ်လာသော အဝါရောင် အလင်းတန်းတစ်ခုက အကြိမ်ကြိမ် အသွင်ပြောင်းပြီးနောက် တဖြည်းဖြည်းနှင့် အဝါရောင် ဝိညာဉ်ကွင်းတစ်ခုအဖြစ် စုစည်းသွားခဲ့သည်။

ဤအရောင်စုံ အဆိပ်ပြင်းမြွေမှာ အမှန်တကယ်ပင် နှစ်တစ်ရာ သက်တမ်းရှိ ဝိညာဉ်သားရဲတစ်ကောင်ပင်။

လုချန်က အဝါရောင် ဝိညာဉ်ကွင်းကို တစ်ချက်ကြည့်လိုက်သော်လည်း သူက ၎င်းကို စုပ်ယူရန် ရည်ရွယ်ချက်မရှိသဖြင့် အကြည့်ကို အမြန်လွှဲလိုက်၏။

သူက ခြေထောက်ကို မြှောက်ကာ ခေါင်းကို နင်းလိုက်ပြီးနောက် ကိုင်းညွတ်ကာ သိမ်းဆည်းလိုက်သည်။ သူက နောက်မှ ၎င်းကို ကင်ပြီး နေ့လည်စာအတွက် ခြောက်သွေ့သော ရိက္ခာများနှင့်အတူ စားသုံးရန် စီစဉ်ထားသည်။

ထိုအရာအားလုံးကို လုပ်ဆောင်ပြီးနောက် လုချန်သည် အနောက်သို့ လှည့်မကြည့်တော့ဘဲ ရှေ့သို့ ဆက်လျှောက်သွားခဲ့သည်။ သူ ရှာဖွေနေသည့်အရာမှာ အပင်ဝိညာဉ်သားရဲဖြစ်ပြီး အထူးသဖြင့် အထောက်အကူပြု အကျိုးသက်ရောက်မှုများ ပါဝင်သော ဝိညာဉ်သားရဲပင်။

ရှင်းလင်းသော ရည်မှန်းချက်တစ်ခုနှင့်ဆိုလျှင် သဘာဝကျကျပင် တုံ့ဆိုင်းမှု ရှိမည်မဟုတ်ပေ။

...

သူကိုယ်တိုင်ပင် မသိလိုက်ဘဲ လုချန်သည် ရှင်းတို မဟာတောအုပ်ကြီးထဲတွင် ဆယ်ရက်ကျော် ကြာမြင့်နေပြီဖြစ်ပြီး သူ၏ စိတ်ရောကိုယ်ပါ ကြီးမားသော စမ်းသပ်မှုတစ်ခုကို ဖြတ်သန်းခဲ့ရ၏။

နေ့စဉ်နီးပါး လုချန်သည် ဝိညာဉ်သားရဲများ၏ တိုက်ခိုက်မှု အကြိမ်အနည်းငယ်နှင့် ကြုံတွေ့ခဲ့ရသည်။ သူ၏ သတိထားမှုကြောင့် အကြိမ်တိုင်းတွင် အန္တရာယ်မှ လွတ်မြောက်နိုင်ခဲ့သော်လည်း ၎င်းက သူ့ကို အမြဲတမ်း တင်းမာနေစေပြီး ကောင်းစွာ အိပ်စက်ခွင့် မရခဲ့ချေ။

ဝိညာဉ်သားရဲကို အမဲလိုက်ခြင်းက တကယ်ကို အန္တရာယ်များသော အလုပ်တစ်ခုပင်ဖြစ်၏။

ထိုနေ့တွင် လုချန်သည် အနက်ရောင် သံမဏိတံစဉ်ကို ကိုင်ဆောင်ကာ သူ၏ လမ်းကို ပိတ်ဆို့နေသော မြက်များနှင့် နွယ်ပင်များကို ခုတ်ထွင်နေခဲ့သည်။ အချိန်အနည်းငယ် ကြာပြီးနောက် နောက်ဆုံးတွင် သူက လမ်းကြောင်းတစ်ခုကို ရှင်းလင်းနိုင်ခဲ့လေသည်။

သူ၏ အမြင်အာရုံက ရုတ်တရက် ပွင့်လင်းသွားပြီး ရှေ့တွင် တောင်ကြားတစ်ခုကို မြင်လိုက်ရကာ ထိုနေရာ၌ အနီရောင် အပင်အုပ်စုကြီးတစ်ခု ပေါက်ရောက်နေခဲ့သည်။

လုချန်၏ မျက်လုံးများ ကျဉ်းမြောင်းသွားပြီး သူ၏ မျက်နှာပေါ်တွင် အံ့အားသင့်မှု အရိပ်အယောင်တစ်ခု ပေါ်လာသည်။

“သွေးနီမြက်”

သွေးပြန်မြက်ဟုလည်း ခေါ်သော သွေးနီမြက်သည် ကြိတ်ချေလိုက်သောအခါ သွေးကဲ့သို့ တောက်ပသော အနီရောင် အရည်များ ထွက်လာပြီး ပြင်ပဒဏ်ရာများကို ကုသရာတွင် အလွန် အစွမ်းထက်သော အကျိုးသက်ရောက်မှု ရှိသည်။

ကြီးမားသော သွေးနီမြက်ခင်းကြီးကို မြင်သောအခါ လုချန်မှာ အစပိုင်းတွင် ဝမ်းသာအံ့သြ ဖြစ်သွားခဲ့သော်လည်း အလျင်အမြန်ပင် သတိထားလိုက်၏။

ဒဏ်ရာများကို ကုသပေးနိုင်သော သွေးနီမြက်ကဲ့သို့ အပင်များနှင့် ဝိညာဉ်သားရဲများက များသောအားဖြင့် အခြား ဝိညာဉ်သားရဲများနှင့် အတူယှဉ်တွဲ နေထိုင်တတ်ကြလေသည်။

ဝိညာဉ်သားရဲများ၏ လောကသည် အလွန် ရက်စက်လှသည်။ တိုက်ပွဲတွင် ဒဏ်ရာရရှိပြီး သွေးထွက်လွန်သဖြင့် အားနည်းသော အခြေအနေသို့ ကျရောက်သွားသည်နှင့် သင်သည် အခြား သားရဲများ၏ ပစ်မှတ်ထားခြင်းကို ခံရမည်ဖြစ်သည်။

သွေးနီမြက်က ဒဏ်ရာများကို ကုသပေးနိုင်ပြီး အစွမ်းထက်သော ဝိညာဉ်သားရဲအချို့နှင့် အပြန်အလှန် အကျိုးပြုသော ဆက်ဆံရေးတစ်ခုကို အလွယ်တကူ တည်ဆောက်နိုင်သည်။

ထို့ကြောင့် သွေးနီမြက်ကို မြင်သည်နှင့် လုချန်သည် ချက်ချင်း သတိထားလိုက်ပြီး သူ၏ အကြည့်များက လျှပ်စီးကဲ့သို့ ထက်မြက်သွားကာ သူ၏ မျက်လုံးများက တောက်လောင်နေလျက် သွေးနီမြက်ခင်းကြီးကို လှည့်ပတ်ကြည့်ရှုလိုက်၏။

မျှော်လင့်ထားသည့်အတိုင်းပင် အစင်းကျားတစ်ကောင်က တောင်ကြားထဲမှ ဖြည်းညင်းစွာ ထွက်ပေါ်လာသည်။ ၎င်းက လုချန်ကို မြင်သွားပြီး သွေးဆာနေသော မျက်လုံးများက သူ့ကို မျက်တောင်မခတ်ဘဲ စိုက်ကြည့်နေခဲ့သည်။

လုချန်၏ နှလုံးသား လေးလံသွားရသည်။ ၎င်းမှာ ကျားဘုရင်ဖြစ်ပြီး အလွန် ကြီးစိုးသော နာမည်တစ်ခုဖြစ်သော်လည်း တစ်ဖက်လူက ထိုနာမည်နှင့် သေချာပေါက် ထိုက်တန်ပေသည်။

တောအုပ်၏ ဘုရင်ဖြစ်သော ကျားဘုရင်သည် ကြောက်မက်ဖွယ်ကောင်းသော ခွန်အားနှင့် ခံနိုင်ရည်ကို ပိုင်ဆိုင်ထားခဲ့သည်။ ၎င်းသည် မွေးရာပါ မုဆိုးတစ်ကောင်ဖြစ်ပြီး ဟိန်းဟောက်သံ တစ်ချက်ကပင် အားနည်းသော ဝိညာဉ်သားရဲအချို့ကို သတ်ဖြတ်ရန် လုံလောက်ပေသည်။

လုချန်က အသက်ပြင်းပြင်းရှူလိုက်ပြီးနောက် ကြောက်ရွံ့မှုမရှိဘဲ ရှေ့သို့ လျှောက်သွားခဲ့သည်။ သူ၏ ပထမဆုံး ဝိညာဉ်ကွင်းအတွက် ဘုရင်ကျားကြီးနှင့် ရင်ဆိုင်ရသည့်တိုင်အောင် သူ ဘယ်တော့မှ နောက်ဆုတ်မည်မဟုတ်ပေ။

“ဂါး”

လုချန်က ရှေ့သို့ လျှောက်လာဝံ့သေးသည်ကို မြင်သောအခါ ဘုရင်ကျားကြီးက ဟိန်းဟောက်လိုက်ပြီးနောက် လောင်ကျွမ်းနေသော အဖြူရောင် စွမ်းအင်ဘောလုံးတစ်ခုက ၎င်း၏ ပါးစပ်ထဲမှ ထွက်ပေါ်လာကာ လုချန်ရှိရာနေရာသို့ ပစ်လွှတ်လိုက်၏။

ယင်းကိုမြင်သောအခါ လုချန်၏ မျက်လုံးများ ပြူးကျယ်သွားသော်လည်း ကံကောင်းထောက်မစွာဖြင့် သူ၏ တုံ့ပြန်မှုက မြန်ဆန်နေခဲ့သည်။ သူက ချက်ချင်း မြေပြင်ပေါ် လဲချလိုက်ပြီး လိမ့်ကာ စွမ်းအင်ဘောလုံးကို ရှောင်တိမ်းလိုက်သည်။

ဤအခွင့်အရေးကို အသုံးချကာ ကျားကြီးက ပြင်းထန်သော တိုက်ခိုက်မှုကို စတင်လိုက်လေသည်။ ၎င်းက လုချန်အနီးသို့ အလျင်အမြန် ရောက်ရှိလာပြီး လေထဲသို့ ခုန်တက်ကာ သွေးကဲ့သို့ နီရဲနေသော ပါးစပ်ကြီးကို ဟလျက် လုချန်၏ ခေါင်းကို ကိုက်ရန် ပြင်လိုက်သည်။

လုချန်က မြေပြင်ပေါ်တွင် ဒူးထောက်နေပြီး ကြီးမားလှသော ကျား၏ ပါးစပ်ကြီး သူ့အနီးသို့ ရောက်လာသည်ကို မြင်လိုက်ရသည်။ သူ၏ နှလုံးခုန်သံများ မြန်ဆန်လာသည်။ မမျှော်လင့်ဘဲ သူက ကြောက်ရွံ့မှုကို မခံစားရဘဲ တိုက်ခိုက်လိုစိတ်နှင့် သတ်ဖြတ်လိုစိတ်များသာ ပြင်းပြလာခဲ့ရသည်။

လုချန်က အံကြိတ်လိုက်ပြီး သူ၏ ကြွက်သားများက တင်းမာသွားကာ ခြေထောက်များကို အားပြု၍ ကျားကြီး၏ ဝမ်းဗိုက်အနီးသို့ အကွာအဝေးကို ကျဉ်းလိုက်သည်။ သူက အနက်ရောင် သံမဏိတံစဉ်ကို ညာဘက်လက်ဖြင့် လွှဲလိုက်ပြီး ဝိညာဉ်စွမ်းအားများကို ဆက်တိုက် ထည့်သွင်းလိုက်ရာ အနက်ရောင် သံမဏိတံစဉ်မှာ ယခင်က တစ်ခါမှ မရှိခဲ့ဖူးသော ထက်မြက်မှုများဖြင့် တောက်ပနေခဲ့လေသည်။

ရွှမ်း။

အသားများ စုတ်ပြဲသွားသည့် အသံတစ်ခုနှင့်အတူ ဝိညာဉ်ကွင်းတစ်ခုမျှပင် မရှိသော လုချန်၏ အနက်ရောင် သံမဏိတံစဉ်က ကျားကြီး၏ ဝမ်းဗိုက်ကို ပြင်းထန်သော လွှဲခုတ်မှုတစ်ခုဖြင့် အမှန်တကယ်ပင် ခွဲခြမ်းလိုက်သည်။

တောက်၊ တောက်၊ တောက်။

သွေးများ ပန်းထွက်လာပြီး ကျားကြီးက နာကျင်စွာ အော်ဟစ်လိုက်၏။ နာကျင်မှုက ၎င်း၏ ရက်စက်ကြမ်းကြုတ်မှုကို ပိုမို လောင်ကျွမ်းစေပြီး ၎င်း၏ သားရဲမျက်လုံးများတွင် သတ်ဖြတ်လိုစိတ်များ ပြည့်နှက်လာခဲ့သည်။

သို့သော်လည်း လုချန်က မကြောက်ခဲ့ချေ။ သူက မြေပြင်မှ ထရပ်ကာ လှည့်၍ ကျားကြီးကို ကြည့်လိုက်၏။ သူက ပါးစပ်ကို ဟကာ ဟိန်းဟောက်လိုက်ပြီး ကျားကြီး၏ မျက်လုံးများကို တည့်တည့် စိုက်ကြည့်ရင်း သေသည်အထိ တိုက်ခိုက်မည့် ဟန်ကို ပြသလိုက်လေသည်။

“အီး”

သင်က ဝိညာဉ်သားရဲကို ပိုကြောက်လေလေ ၎င်းက ပိုမို ရန်လိုလာလေလေပင်။ ပြောင်းပြန်အားဖြင့် သင်က ပိုမို ရန်လိုလေလေ ၎င်းက ပိုမို ကြောက်ရွံ့လာလေလေဖြစ်သည်။

လုချန်၏ အညှာအတာကင်းမဲ့သော လိုက်လံတိုက်ခိုက်မှုနှင့် ရင်ဆိုင်ရသည့်အခါ ကျားကြီးက လုချန်နှင့် သေသည်အထိ မတိုက်ခိုက်ချင်တော့ဘဲ ညည်းတွားသံတစ်ခု ထုတ်လွှတ်လိုက်ပြီး နောက်ဆုံးတွင် အမြီးကို ကုပ်ကာ ထွက်ပြေးရန် လှည့်ထွက်သွားလိုက်သည်။

ယင်းကိုမြင်သောအခါ လုချန်လည်း သက်ပြင်းချနိုင်သွားခဲ့သည်။ မည်သို့ပင်ဆိုစေကာမူ သူတွင် ဝိညာဉ်ကွင်း မရှိသေးဘဲ သူ၏ ကြီးမားလှသော ခွန်အားတစ်ခုတည်းကိုသာ အားကိုးရသဖြင့် ကျားကြီးကို အနိုင်ယူနိုင်မည်ဟု လုံးဝ ယုံကြည်မှု မရှိခဲ့ပေ။

ယခုအခါ ကျားဘုရင် ထွက်ပြေးသွားပြီဖြစ်ရာ လုချန်သည် သူ၏ အကျိုးအမြတ်များကို စစ်ဆေးကြည့်သင့်ပြီဖြစ်သည်။

သူက တောင်ကြားထဲသို့ လှည့်ဝင်သွားပြီး ကျယ်ပြန်လှသည့် သွေးနီမြက်ခင်းကြီးကို ကြည့်လိုက်သည်။

ဆယ်နှစ် သက်တမ်းရှိ သွေးနီမြက်။

နှစ်တစ်ရာ သက်တမ်းရှိ သွေးနီမြက်။

နှစ်တစ်ထောင် သက်တမ်းရှိ သွေးနီမြက်။

ဤတောင်ကြား၏ နက်ရှိုင်းသော နေရာတွင် နှစ်တစ်ထောင် သက်တမ်းရှိ သွေးနီမြက်ပင် ရှိနေခဲ့သည်။ လုချန်၏ မျက်လုံးများ ကျဉ်းမြောင်းသွားပြီး သူ၏ မျက်နှာပေါ်တွင် တုံ့ဆိုင်းမှု အရိပ်အယောင်တစ်ခု ပေါ်လာခဲ့သည်။

အခန်း ၁၇ပြီး