အခန်း (၃၀) - တုန်လှုပ်ချောက်ချားဖွယ် ပဋိပက္ခ
“ငါ... ပင်လယ်ပြင်ကြီးတစ်ခုလုံးကို မီးရှို့ပစ်မယ်"
ဒိန်း...
ကြောက်မက်ဖွယ်ကောင်းလှသော အပူရှိန်လှိုင်းကြီးက ပတ်ဝန်းကျင်တစ်ခွင်ဆီသို့ ချက်ချင်းဆိုသလိုပင် လွှမ်းခြုံတိုက်ခတ်သွားခဲ့သည်။
ရေခဲနှင့်မီးတောက် ယင်ယန်စမ်းရေတွင်း၏ အထက်ကောင်းကင်ယံတွင် ပေါ်ထွက်ခဲ့ဖူးသော နေမင်းတစ်စင်းကဲ့သို့ ပြင်းထန်လှသော စွမ်းအားကြီးက ဤနေရာတွင် မည်သည့်ဖုံးကွယ်ထားမှုမျိုးမျှမရှိဘဲ ထပ်မံ၍ ပေါ်ထွက်လာခဲ့ပြန်ချေပြီ။
ဆမ်ဝတ်စုံအပေါ်သို့ ဖိနှိပ်ထားသော လုံရှောင်းယောင်၏ အသက်ရှူကျပ်မတတ် ပြင်းထန်လှသည့် ဖိအားကြီးမှာ မျက်စိတစ်မှိတ်အတွင်းမှာတင် ပျောက်ကွယ်သွားခဲ့ရပြီး... ပြောင်းပြန်အနေဖြင့် လုံရှောင်းယောင်ကသာ ထိုအပူရှိန်ကြောင့် ပြန်လည်၍ ဖိနှိပ်ခြင်းကို ခံလိုက်ရတော့သည်။
တစ်ဖက်လူ၏ စွမ်းအားက လုံရှောင်းယောင်၏ မျှော်လင့်ချက်များကို တကယ့်ကို ကျော်လွန်နေခဲ့သည်။
မိမိ စောစောက လိုက်လံရှာဖွေနေခဲ့သော စွမ်းအင်လှိုင်းကြီးက မိမိရှေ့တွင်ရှိနေသော ဤပုဂ္ဂိုလ်၏ထံမှနေ၍ ထွက်ပေါ်လာခဲ့ခြင်း ဖြစ်လိမ့်မည်ဟု သူ လုံးဝ ထင်မှတ်မထားခဲ့မိပါချေ။
သူ၏ သတ္တမမြောက် ဝိညာဉ်ကွင်းက ရုတ်တရက် တောက်ပလာခဲ့သည်။
သတ္တမ ဝိညာဉ်စွမ်းရည် - အမှောင်ဝိညာဉ်နဂါး စစ်မှန်သောအသွင်သဏ္ဍာန်
လုံရှောင်းယောင်သည် ကောင်းကင်ယံတစ်ခုလုံးကို ဖုံးလွှမ်းသွားစေနိုင်လောက်သော ဧရာမ အမှောင်နဂါးကြီးတစ်ကောင်အဖြစ်သို့ ချက်ချင်းပင် ပြောင်းလဲသွားခဲ့ပြီး... ပေရာချီ၍ ရှည်လျားလှသော သူ၏ တောင်ပံကြီးနှစ်ဖက်ကို ဖြည်းညှင်းစွာ ဖြန့်ကြက်လိုက်တော့သည်။
သူ၏ ကြီးမားလှသော ခန္ဓာကိုယ်ကြီးနှင့် နှိုင်းယှဉ်လိုက်လျှင်မူ... ဆမ်ဝတ်စုံမှာ ပုရွက်ဆိတ်တစ်ကောင်ကဲ့သို့ပင် အလွန်တရာ သေးငယ်လွန်းလို့နေခဲ့သည်။
တစ်ပြိုင်နက်တည်းမှာပင် လုံရှောင်းယောင်၏ အဋ္ဌမမြောက်နှင့် နဝမမြောက် ဝိညာဉ်ကွင်းနှစ်ကွင်းစလုံးက တစ်ပြိုင်နက်တည်း တောက်ပလာခဲ့ပြန်သည်...။
အဋ္ဌမ ဝိညာဉ်စွမ်းရည် (ပထမပိုင်း) - အမှောင်ထုနှင့် ပရမ်းပတာဖြစ်တည်မှု
နဝမ ဝိညာဉ်စွမ်းရည် (ပထမပိုင်း) - နဂါးခန္ဓာကိုယ်ကို ထုဆစ်ရန် အစွန်းရောက်ကောင်းကင် သွေးသန့်စင်ခြင်း
ဧရာမ အမှောင်နဂါးကြီး၏ ခန္ဓာကိုယ်မှာ မူလအရွယ်အစားထက် နှစ်ဆထက်မက ပိုမိုကြီးမားလာခဲ့သည်။
အစွန်းရောက်လှသော အမှောင်ဝိညာဉ်စွမ်းအားများ က ချက်ချင်းပင် ပေါက်ကွဲထွက်ပေါ်လာခဲ့ပြီး... ဆမ်ဝတ်စုံ၏ မီးတောက်များနှင့် ယှဉ်ပြိုင်နိုင်စွမ်းရှိသော ဧရာမ နယ်ပယ်တစ်ခု အဖြစ်သို့ ပြောင်းလဲသွားခဲ့တော့သည်။
အဝေးတစ်နေရာတွင် ပုန်းကွယ်နေခဲ့သော ချီလော့အနေဖြင့်မူ... အစွန်းရောက်အမှောင်ထုနှင့် အစွန်းရောက်မီးတောက်များကြောင့် ကောင်းကင်ယံကြီးတစ်ခုလုံး နှစ်ခြမ်းကွဲထွက်လုမတတ် ဖြစ်ပေါ်နေသည့် ကြောက်မက်ဖွယ် စွမ်းအားကြီးနှစ်ခု ပြင်းထန်စွာ ထိပ်တိုက်တွေ့ဆုံနေကြသည်ကိုသာ လှမ်း၍ မြင်တွေ့လိုက်ရတော့သည်။
ထိုသူနှစ်ဦးထံမှနေ၍ ထွက်ပေါ်လာသော ဖိအားလှိုင်းကြီးကြောင့် မိုင်ပေါင်းသောင်းချီသော ပတ်ဝန်းကျင်အတွင်းရှိ သက်ရှိသတ္တဝါများအားလုံးမှာ သဘာဝဘေးအန္တရာယ်ကြီးတစ်ခုနှင့် ရင်ဆိုင်နေရသည့်အလား ခံစားလိုက်ရပြီး... မြေပြင်ပေါ်တွင် ဝပ်စင်းလျက် ထိန်းမနိုင်သိမ်းမရအောင် တုန်လှုပ်ချောက်ချားလို့နေခဲ့ကြသည်။
လုံရှောင်းယောင်၏ ဧရာမ နဂါးမျက်လုံးအစုံထဲတွင် လေးနက်တည်ကြည်မှုများဖြင့် ပြည့်နှက်လို့နေခဲ့သည်။ တစ်ဖက်လူ၏ စွမ်းအားက ဤမျှလောက်အထိ ထက်မြက်လိမ့်မည်ဟု သူ ထင်မှတ်မထားခဲ့မိပါချေ။
ထိုကြောက်မက်ဖွယ် မီးတောက်များကို ခုခံနိုင်ရန်အတွက်... သူသည် အသက်တစ်သိန်းတန်း ဝိညာဉ်စွမ်းရည်နှစ်ခုကို ဆက်တိုက်ဆိုသလို အသုံးပြုခဲ့ရခြင်း ဖြစ်သည်။
သူ၏ အဋ္ဌမမြောက် ဝိညာဉ်စွမ်းရည်ဖြစ်သော အမှောင်နယ်ပယ်သည် အတိုင်းအဆမဲ့ ကြီးမားလှသော အမှောင်ဝိညာဉ်စွမ်းအားများကို ထုတ်လွှတ်ပေးနိုင်ပြီး... ရန်သူများကို အချိန်မရွေး တိုက်ခိုက်ရန်အတွက် ၎င်းကို အသုံးချနိုင်သည်။
သူ၏ နဝမမြောက် ဝိညာဉ်စွမ်းရည်ဖြစ်သော အစွန်းရောက်ကောင်းကင် သွေးသန့်စင်ခြင်း နဂါးခန္ဓာကိုယ်ကမူ... သူ၏ ခန္ဓာကိုယ်တည်ဆောက်ပုံကို များစွာ အားကောင်းစေပြီး သူ၏ အမှောင်ဝိညာဉ်စွမ်းအားကို အထွတ်အထိပ်အဆင့်အထိ မြှင့်တင်ပေးနိုင်သည်။
သို့သော်လည်း မျှော်လင့်မထားဘဲ... သူ၏ အစွန်းရောက်အမှောင်ထုသည် တစ်ဖက်လူ၏ မီးတောက်များကို ခုခံရုံမျှသာ စွမ်းဆောင်နိုင်ခဲ့ချေသည်။
ဤမျှလောက်အထိ ပြင်းထန်လှသော အစွန်းရောက်မီးဓာတ်ကို ပိုင်ဆိုင်ထားသည့် ထိပ်သီးပညာရှင်ကြီးတစ်ဦးက ဤတိုက်ကြီးကြီးပေါ်တွင် ဘယ်အချိန်တုန်းက ပေါ်ထွက်လာခဲ့တာပါလိမ့်...။
ယွီဝူယီ မိမိ၏ အရှေ့မှောက်တွင် တောင်တစ်လုံးကဲ့သို့ ကြီးမားလှသော နဂါးကြီးကို လေးစားအားကျသော မျက်ဝန်းများဖြင့် ကြည့်ရှုလိုက်မိသည်။
သူ၏ ယခုလက်ရှိ ပုံစံမှာ... မင်းသမီးလေးကို ကယ်တင်ရန်အတွက် နဂါးဆိုးကြီးကို ရင်ဆိုင်နေရသည့် သူရဲကောင်းတစ်ဦးနှင့် တူညီလို့နေခဲ့သည်။
သို့မဟုတ် ဂိမ်းတစ်ခုထဲတွင် အဆန်းပြားဆုံးသော အရှင်သခင် (BOSS) ကို သွားရောက်စိန်ခေါ်နေသည့် ဇာတ်လိုက်တစ်ဦးနှင့် တူညီလို့နေခဲ့သည်။
သို့သော်လည်း... သူတို့နှစ်ဦးအနက် မည်သူက အရှင်သခင် (BOSS) ဖြစ်သလဲဆိုသည်ကိုတော့ ပြောဆိုရန် တကယ့်ကို ခက်ခဲလှပေလိမ့်မည်။
ယွီဝူယီသည် ကောင်းကင်ယံတစ်ခုလုံးကို လွှမ်းခြုံထားသော မီးတောက်များနှင့်အတူ... ဧရာမ နဂါးကြီး၏ ရင်ဘတ်ဆီသို့ မျက်စိတစ်မှိတ်အတွင်းမှာတင် ရောက်ရှိသွားခဲ့တော့သည်။
“မြန်လှချည်လား"
လုံရှောင်းယောင်၏ မျက်စိသူငယ်အိမ်များက အနည်းငယ် ကျဉ်းမြောင်းသွားခဲ့ရသော်လည်း... သူ၏ တုံ့ပြန်မှုနှုန်းမှာ အလွန်ပင် လျင်မြန်လှပေသည်။
အဋ္ဌမ ဝိညာဉ်စွမ်းရည် (ဒုတိယပိုင်း) - နေမင်းကို ဝါးမြို၍ ကောင်းကင်ယံကို မှောင်မိုက်စေခြင်း
သူ၏ ခန္ဓာကိုယ်နှင့် အရွယ်အစားတူညီလှသော ဧရာမ နဂါးကြီးတစ်ကောင်၏ ပုံရိပ်ယောင်ကြီးတစ်ခု ရုတ်တရက် ပေါ်ထွက်လာခဲ့ပြီး... ၎င်း၏ မေးရိုးကြီးများအကြားတွင် အတိုင်းအဆမဲ့ ကြီးမားလှသော ဝါးမြိုခြင်းစွမ်းအားများကို သယ်ဆောင်လာရင်း ယွီဝူယီ၏ထံသို့ အရှိန်အဟုန်ဖြင့် ပြေးဝင်လာခဲ့တော့သည်။
တစ်ပြိုင်နက်တည်းမှာပင် သူ၏ ဘယ်ဘက်လက်မောင်းဆီမှနေ၍ မှင်ရည်ကဲ့သို့ နက်မှောင်လှသော အလင်းတန်းတစ်ခု တောက်ပလာခဲ့ပြီး... သူ၏ ခန္ဓာကိုယ်မှာ နေရာရွှေ့ပြောင်းခြင်း နီးပါးခန့်ရှိသော အရှိန်နှုန်းဖြင့် နောက်သို့ ဆုတ်ခွာသွားခဲ့သည်။
အနှစ်တစ်သောင်းတန်း မှင်ရိပ်ခြင်္သေ့၏ ဘယ်ဘက်လက်မောင်းရိုး - မှင်ရိပ်အစွန်းအစမကျန် ပျောက်ကွယ်ခြင်း
ဧရာမ နဂါးကြီး၏ ပုံရိပ်ယောင်မှာ ယွီဝူယီနှင့် ပြင်းထန်စွာ ထိပ်တိုက်တွေ့ဆုံသွားခဲ့ရပြီး... ဟာလာဟင်းလင်းပြင်ကြီးတစ်ခုလုံးမှာ ထိုအခိုက်အတန့်တွင် အေးခဲသွားခဲ့သည့်အလား ရှိနေခဲ့သည်။
ဝူး... ဒိန်း...
နဂါးကြီး၏ ပုံရိပ်ယောင်မှာ နာကျင်စွာဖြင့် အော်ဟစ်မြည်တမ်းလိုက်မိပြီးနောက်... ရေတွက်၍မရနိုင်လောက်အောင် များပြားလှသော အလင်းစက်လေးများအဖြစ်သို့ ကွဲကြေပျက်စီးသွားခဲ့ရတော့သည်။
ထိုပြင်းထန်လှသော ရိုက်ခတ်မှုကြောင့် နယ်ပယ်နှစ်ခုစလုံး၏ အလယ်ဗဟိုတွင် လေဟာနယ်ကြီးတစ်ခုအဖြစ် ဖြစ်ပေါ်သွားခဲ့ရသည်။
“သူ့ရဲ့ စွမ်းအားက တကယ်ပဲ ဒီလောက်အထိ ကြီးမားတာလား...”
လုံရှောင်းယောင်၏ ခန္ဓာကိုယ်ထံမှနေ၍ မတူညီသော အလင်းတန်း သုံးခု ချက်ချင်းပင် တောက်ပထွက်ပေါ်လာခဲ့ပြန်သည်...။
ဆဋ္ဌမ ဝိညာဉ်စွမ်းရည် - နဂါးဧကရာဇ် ကြွချီခြင်း
နှစ်တစ်သိန်း နေဝါးမြို ဝံပုလွေမင်း၏ ဦးခေါင်းခွံရိုး - နေဝါးမြို ဝံပုလွေမင်း၏ သီချင်းသံ …
အနှစ်တစ်သောင်း နက်ရှိုင်းသောပင်လယ်နဂါး၏ ခန္ဓာကိုယ်အရိုး - နက်ရှိုင်းသောပင်လယ်ရေပြင်၏ လေဆင်နှာမောင်း
မျက်စိတစ်မှိတ်အတွင်းမှာတင်... စစ်တလင်းပြင်ကြီးတစ်ခုလုံး၏ အသွင်သဏ္ဍာန်မှာ တုန်လှုပ်ချောက်ချားဖွယ်ရာ ပြောင်းလဲသွားခဲ့ရတော့သည်။
လုံရှောင်းယောင်၏ နယ်ပယ်အတွင်းတွင် ရေတွက်၍မရနိုင်လောက်အောင် များပြားလှသော အမှောင်နဂါးဦးခေါင်းကြီးများ စတင်စုစည်းလာခဲ့ကြသည်။
ပေရာချီ၍ ရှည်လျားလှပြီး ရက်စက်ကြမ်းကြုတ်လှသော ဧရာမ ဝံပုလွေကြီးတစ်ကောင်မှာလည်း ဟင်းလင်းပြင်ကြီးကို ဆုတ်ဖြဲလျက် လေထဲတွင် ပေါ်ထွက်လာခဲ့ချေပြီ။
မိုးထိလုမတတ် မြင့်မားလှသော ရေပြင်းလှိုင်း လေဆင်နှာမောင်းကြီးကလည်း မြေပြင်တစ်ခုလုံးကို လွှမ်းခြုံတိုက်ခတ်သွားခဲ့ပြီး... ရေတွက်၍မရနိုင်လောက်အောင် များပြားလှသော သဲပွင့်များနှင့် သစ်ပင်ကြီးများကို ဝါးမြိုဖျက်ဆီးလို့နေခဲ့သည်။
ဤအရာကား... နဂါးဧကရာဇ်ဘွဲ့ခံ သုန့် လော်‘လုံရှောင်းယောင်’ ၏ စစ်မှန်သော စွမ်းပကားပင် ဖြစ်ချေတော့သည်။
မျက်စိတစ်မှိတ်အတွင်းမှာတင် သဘာဝဘေးအန္တရာယ်ကြီးတစ်ခုကဲ့သို့ တကယ့်ကို ထိတ်လန့်တုန်လှုပ်ဖွယ်ကောင်းလှသော မြင်ကွင်းကြီးတစ်ခု ဖြစ်ပေါ်လာခဲ့ရသည်။
ဤအရာနှင့် နှိုင်းယှဉ်လိုက်လျှင်မူ ယွီဝူယီမှာ ကောင်းကင်ယံ၏ စွမ်းတန်ခိုးကို လာရောက်စိန်ခေါ်နေသည့် သာမန်လူသားတစ်ဦးကဲ့သို့ပင် အလွန်တရာ သေးငယ်လွန်းလို့နေခဲ့သည်။
“ဟက်...”
ယွီဝူယီ ပြုံးလိုက်မိသည်။ ဘာဖြစ်လို့လဲတော့မသိ... ထိုအခိုက်အတန့်တွင် သူ၏ စိတ်ထဲ၌ အတွေးတစ်ခုတည်းသာ ဖြစ်ပေါ်လို့နေခဲ့သည်။
“ငါက သာမန်လူသားတစ်ယောက်ပဲ ဖြစ်နေပါစေဦးတော့... ငါက သဘာဝဘေးအန္တရာယ်တွေကို ဘယ်တော့မှ ဒူးထောက်အရှုံးပေးမှာ မဟုတ်ဘူး"
“ဒါတင်မကသေးဘူး... ငါကိုယ်တိုင်ကပဲ သဘာဝဘေးအန္တရာယ်ကြီး တစ်ခုဖြစ်တယ်...”
ဝူး... ဒိန်း...
ပြင်းထန်လှသော ပေါက်ကွဲသံကြီးတစ်ခု ထွက်ပေါ်လာခဲ့ပြီးနောက်... ယွီဝူယီသည် ကြောက်မက်ဖွယ်ကောင်းလှသောအရှိန်နှုန်းဖြင့် ကောင်းကင်ယံထက်ဆီသို့ ပျံတက်သွားခဲ့ရာ.. ဟာလာဟင်းလင်းပြင်ကြီးကိုပင် ဆုတ်ဖြဲသွားခဲ့ပြီး လေလှိုင်းဂယက်များကို ဖြစ်ပေါ်စေခဲ့သည်။
လုံရှောင်းယောင် ထိုဖြူဖွေးသော ပုံရိပ်ကြီးကို စူးစိုက်ကြည့်ရှုလိုက်မိသည်။ အခြားတစ်ဖက်လူ ဘာလုပ်ရန် ပြင်ဆင်နေသည်ကို သူ မသိရှိသော်လည်း... ၎င်းကား လုံးဝ ထွက်ပြေးတိမ်းရှောင်ခြင်း မဟုတ်ကြောင်းကိုတော့ သူ ကောင်းစွာ ခံစားမိလိုက်ရသည်။
အသက်ရှူကြိမ်အနည်းငယ်အတွင်းမှာတင် ယွီဝူယီသည် ပေပေါင်းသောင်းချီ မြင့်မားလှသော ကောင်းကင်ယံထက်ဆီသို့ ရောက်ရှိသွားခဲ့ပြီး... ထိုနေရာမှနေ၍ ‘သုန့် လော်ကြယ်တာရာ’ တစ်ခုလုံး၏ အသွင်သဏ္ဍာန်ကို အပြည့်အဝ လှမ်းမြင်တွေ့နေခဲ့ရချေပြီ။
ကောင်းကင်ယံ မီးလျှံစနစ်…..
ပိုမိုပြင်းထန်လှသော မီးတောက်များက ဆမ်ဝတ်စုံထံမှနေ၍ ပေါက်ကွဲထွက်ပေါ်လာခဲ့ပြီး သူ၏ ခန္ဓာကိုယ်တစ်ခုလုံးကို အပြည့်အဝ လွှမ်းခြုံသွားခဲ့သည်။
မြှင့်တင်မောင်းနှင်အား စနစ်…
သူ၏ ခန္ဓာကိုယ်ကို အောက်သို့ ပြန်လည်လှည့်လိုက်ပြီးနောက်... ဆမ် စက်ရုပ် ဝတ်စုံသည် ပိုမိုမြန်ဆန်လှသောအရှိန်နှုန်းဖြင့် အောက်ဘက်ဆီသို့ ပြန်လည်၍ ပျံသန်းဆင်းသက်လိုက်တော့သည်။
နောက်ဆုံးတွင်မူ...
[လုပ်ငန်းစဉ်အား အတည်ပြုပြီးပါပြီ။ ဖျက်ဆီးခြင်းအမိန့်အား စတင်အကောင်အထည်ဖော်နေပါပြီ။]
စူပါနိုဗာ ဝန်ပိုစနစ်…
ဝူး...
ထိုအခိုက်အတန့်တွင် ဆမ်ဝတ်စုံသည် စစ်မှန်သော နေမင်းတစ်စင်းအဖြစ်သို့ ပြောင်းလဲသွားခဲ့ပြီး... တိုက်ထုကြယ်တာရာဆီသို့ တည့်တည့်မတ်မတ်ကြီး ပျံသန်းဆင်းသက်လာခဲ့တော့သည်။
ဖျောက်...
ဟာလာဟင်းလင်းပြင်ကြီးမှာပင် ထိုစွမ်းအားကြီးကို တောင့်ခံနိုင်စွမ်းမရှိတော့သည့်အလား ပြတ်သားလှသောအသံကြီးနှင့်အတူ ကွဲအက်သွားခဲ့ရသည်။
သို့သော်လည်း ကြောက်စရာကောင်းသည်မှာ ထိုကွဲအက်သံကြီးက ရပ်တန့်သွားခြင်းမရှိသည့်အပြင်... ပိုမို၍ စိပ်လာခဲ့ခြင်းပင် ဖြစ်သည်။
ဖျောက်... ဖျောက်... ဖျောက်... ဖျောက် ဖျောက် ဖျောက်...
ဆမ်ဝတ်စုံ ဖြတ်သန်းသွားရာ လမ်းကြောင်းတစ်လျှောက်လုံးရှိ ဟာလာဟင်းလင်းပြင်ကြီးမှာ အစိတ်စိတ်အမွှာမွှာ ကွဲအက်သွားခဲ့ရပြီး.. ဟာလာဟင်းလင်းပြင် အပိုင်းအစများမှာ ပတ်ဝန်းကျင်တစ်ခွင်ဆီသို့ လွင့်စင်ထွက်ပေါ်လို့နေခဲ့သည်။
အောက်ဘက်တွင်ရှိနေသော လုံရှောင်းယောင် တစ်စုံတစ်ခုကို မရေမရာ အာရုံခံမိလိုက်ရပြီး... ထူထပ်လှသော တိမ်တိုက်ကြီးများကို ဖောက်ထွင်းလျက်.. ကွဲအက်နေသော ဟာလာဟင်းလင်းပြင်ကြီးကို သယ်ဆောင်လာရင်း မိမိထံသို့ ပြေးဝင်လာနေသည့် နေမင်းတစ်စင်းကို မြင်တွေ့လိုက်ရသည့် အချိန်ကျမှသာလျှင်... ဤတိုက်ခိုက်မှု၏ ကြောက်မက်ဖွယ်ကောင်းပုံကို သူ အပြည့်အဝ သဘောပေါက်သွားခဲ့ရတော့သည်။
“ဘယ်လိုလုပ်ပြီး ဒီလိုမျိုး ဖြစ်နိုင်ရတာလဲ...”
သူ၏ မျက်နှာထက်တွင် ထိတ်လန့်တုန်လှုပ်မှုများဖြင့် ပြည့်နှက်သွားခဲ့ရသည်။
ဘာဖြစ်လို့လဲဆိုရသော် သူ၏ အာရုံခံစားမှုအရ ဤတိုက်ခိုက်မှုသည် အဆုံးစွန်သုန့်လော် ၏ အကန့်အသတ်ကို ကျော်လွန်သွားခဲ့ပြီး... ‘နတ်ဘုရားတစ်ပိုင်း’ အဆင့်သို့ ရောက်ရှိလို့နေခဲ့သောကြောင့် ဖြစ်သည်။
ဤကဲ့သို့သော တိုက်ခိုက်မှုမျိုးကို လုပ်ဆောင်နိုင်စွမ်းရှိသည့် အစွမ်းထက်လှသော သက်ရှိပုဂ္ဂိုလ်ဟူ၍ သူ တစ်ဦးတည်းကိုသာ သိရှိထားသည်။
၎င်းကား... ကြယ်တာရာတောအုပ်ကြီး၏ အရှင်သခင်.. ရက်စက်ကြမ်းကြုတ်သော သားရဲကြီး တစ်ဆယ်ကောင်၏ ခေါင်းဆောင်ဖြစ်ပြီး... နှစ်ပေါင်းရှစ်သိန်းခွဲကျော် ကျင့်ကြံခြင်းသက်တမ်းကို ပိုင်ဆိုင်ထားကာ ဤတိုက်ကြီးပေါ်တွင် အစွမ်းထက်ဆုံးသူဖြစ်သည့် သားရဲဘုရင် ‘ဒီထျန်း’ပင် ဖြစ်သည်။
သို့သော်လည်း ယခုလက်ရှိ အခြေအနေက သူ့အား တွေးတောနေရန်အတွက် အချိန်ပေးမနေခဲ့ပါချေ။
အကယ်၍ သူ ဤတိုက်ခိုက်မှုကို တည့်တည့်မတ်မတ်ကြီး ခံလိုက်ရမည်ဆိုပါက... ၎င်းကား ကံမကောင်းရုံမျှဖြင့် ပြီးဆုံးသွားမည့် ကိစ္စရပ်မျိုး မဟုတ်ပါချေ။
လုံရှောင်းယောင်၏ ခန္ဓာကိုယ်ထံမှနေ၍ အလင်းတန်းပေါင်းများစွာ ထပ်မံ၍ တောက်ပထွက်ပေါ်လာခဲ့ပြန်ချေပြီ။
နဝမ ဝိညာဉ်စွမ်းရည် (ပထမပိုင်း) - နဂါးခန္ဓာကိုယ်ကို ထုဆစ်ရန် အစွန်းရောက်ကောင်းကင် သွေးသန့်စင်ခြင်း
နဝမ ဝိညာဉ်စွမ်းရည် (ဒုတိယပိုင်း) - အတိုင်းအဆမဲ့သော မြေပြင်ထက်တွင် ဝိညာဉ်ကို ထုဆစ်၍ နဂါးနတ်ဘုရားအဖြစ် စုစည်းခြင်း
ပထမတစ်ခုက သူ၏ ခန္ဓာကိုယ်ကို အားကောင်းစေပြီး ဂုဏ်သတ္တိများကို မြှင့်တင်ပေးနိုင်သလို... ဒုတိယတစ်ခုကမူ သူ၏ ဝိညာဉ်အဆင့်အတန်း၏ သန့်စင်မှုကို မြင့်မားစေနိုင်သည်။
ဤအရာနှစ်ခုစလုံးကို တစ်ပြိုင်နက်တည်း အသုံးပြုလိုက်ခြင်းက... လုံရှောင်းယောင်၏ အမှောင်ဝိညာဉ်နဂါးကို ‘ရွှေရောင်မျက်ဝန်းရှိသော နက်မှောင်လှသည့်နဂါး’ အဆင့်သို့ ခေတ္တမျှ တိုးတက်ပြောင်းလဲသွားစေခဲ့သည်။
သူ၏ ခန္ဓာကိုယ်မှာလည်း ထပ်မံ၍ ကြီးမားထွားကျိုင်းလာခဲ့ပြန်သည်။ သို့သော်လည်း ၎င်းက ဤမျှလောက်ဖြင့်တင် ရပ်တန့်မနေခဲ့ပါချေ။
အနှစ်တစ်သောင်းတန်း မီးဆွဲလင်းနို့၏ ဘယ်ဘက်ခြေထောက်ရိုး - အလင်းကွဲအက်၍ မီးလျှံများကို ဆွဲယူခြင်း
၎င်းသည် အလင်းနှင့် မီးဓာတ်ဂုဏ်သတ္တိများထံမှ ရရှိမည့် ထိခိုက်မှုများကို ထိရောက်စွာ လျှော့ချပေးနိုင်သည်။
ထာဝရ အမှောင်မိုးရေ နဂါးမင်း၏ ညာဘက်ခြေထောက်ရိုး - ရေဓာတ်စွမ်းအင် ပေါက်ကွဲခြင်း
အသက်တစ်သိန်းတန်း နက်ရှိုင်းသောပင်လယ်နဂါး၏ ခန္ဓာကိုယ်အရိုးကြောင့် ထွက်ပေါ်လာခဲ့သော ပင်လယ်ရေပြင် လေဆင်နှာမောင်းကြီးမှာ... ရုတ်တရက်ဆိုသလို စက်ဝိုင်းပုံသဏ္ဍာန်အဖြစ်သို့ စတင်ကျုံ့ဝင်သွားခဲ့ပြီး.. နောက်ဆုံးတွင်မူ အချင်း သုံးပေခန့်ရှိသော ရေလုံးကြီးတစ်လုံးအဖြစ်သို့ ပြောင်းလဲသွားခဲ့တော့သည်။
နက်ရှိုင်းသောပင်လယ်ရေပြင် လေဆင်နှာမောင်းကြီးတစ်ခုလုံး၏ စွမ်းအားများမှာ ၎င်း၏အတွင်း၌ စုစည်းလို့နေခဲ့ပြီး... ပတ်ဝန်းကျင်ရှိ ဟာလာဟင်းလင်းပြင်ကြီးမှာလည်း ကွဲအက်ပျက်စီးတော့မည့် အရိပ်အယောင်များ ထွက်ပေါ်လို့နေခဲ့သည်။
ဤအရာကား... လုံရှောင်းယောင် ယခုလက်ရှိအချိန်တွင် ထုတ်ဖော်ပြသနိုင်စွမ်းရှိသမျှသော အစွမ်းကုန် စွမ်းအားများပင် ဖြစ်ချေတော့သည်။
သူ၏ စိတ်ဝိညာဉ်ထိန်းချုပ်မှုအောက်တွင်... ဝိညာဉ်စွမ်းရည် တိုက်ခိုက်မှုအားလုံးသည် သူ၏ အဆမတန်ကြီးမားလှသော ခန္ဓာကိုယ်ကြီးနှင့်အတူ နေမင်းကြီး၏ထံသို့ ဦးတည်ချက်ထားလျက် အရှိန်အဟုန်ဖြင့် ပြေးဝင်သွားခဲ့ကြတော့သည်။
အခြားတစ်ဖက်တွင်မူ အစွန်းရောက်လှသော အမှောင်နယ်ပယ်ကြီး ရှိနေခဲ့ပြီး... အခြားတစ်ဖက်တွင်မူ နေမင်းကြီး၏ အစွန်းရောက်လှသော မီးတောက်များ ရှိနေခဲ့သည်။
သူတို့နှစ်ဦးအကြားရှိ အကွာအဝေးမှာ တဖြည်းဖြည်းချင်း နီးကပ်လာခဲ့သည်နှင့်အမျှ... သူတို့အကြားရှိ ဟာလာဟင်းလင်းပြင်ကြီးမှာ ထိုစွမ်းအားကြီးနှစ်ခု၏ ပြင်းထန်လှသော ရိုက်ခတ်မှုဒဏ်ကို တောင့်ခံနိုင်စွမ်းမရှိတော့ဘဲ စတင်၍ ပြိုလဲပျက်စီးသွားခဲ့ရတော့သည်။
နောက်ဆုံးတွင်မူ... ချီလော့၏ စိုးရိမ်ထိတ်လန့်လှသော မျက်ဝန်းများအောက်တွင်... ထိုစွမ်းအားကြီးနှစ်ခုသည် မြင့်မားလှသော ကောင်းကင်ယံထက်ဆီတွင် ပြင်းထန်စွာ ထိပ်တိုက်တွေ့ဆုံသွားခဲ့ကြရတော့သည်။
ထိုအခိုက်အတန့်တွင်... သုန့်လော်တိုက်ကြီး တစ်ခုလုံးတွင်ရှိကြသော သက်ရှိများအားလုံးသည် ၎င်းတို့၏ ဘဝသက်တမ်းတစ်လျှောက်လုံး ဘယ်တော့မှ မေ့ပျောက်နိုင်တော့မည်မဟုတ်သော မြင်ကွင်းကြီးတစ်ခုကို ကိုယ်တိုင်မျက်မြင် ကြုံတွေ့လိုက်ကြရတော့သည်။
ကောင်းကင်ယံတွင် နေမင်းတစ်စင်း ရှိနေခဲ့သည့်တိုင်အောင်... သုန့်လော်တိုက်ကြီး၏ အရှေ့ဘက် ကောင်းကင်ယံတွင် နောက်ထပ် နေမင်းတစ်စင်းက ထပ်မံ၍ ထိန်ထိန်လင်းအောင် ပေါ်ထွက်လာခဲ့ပြန်ချေပြီ...