အခန်း (၂၉) - လုံရှောင်းယောင်

​တောင်ကြား၏ အပြင်ဘက်စွန်းတွင်ရှိသော ‘မြရောင်နဂါး နဝမအဆင့်ပန်း’ သည်လည်း ဝိညာဉ်သားရဲ တစ်ကောင် ဖြစ်ပေသည်။ 

၎င်းသည် ချီလော့တူးလစ်ပန်းကို မြင်တွေ့လိုက်ရသည့်အခါတွင်မူ ထူထပ်လှသော အဆိပ်မြူခိုးများကို ဖယ်ရှားပေးလိုက်ပြီး လမ်းကြောင်းတစ်ခု ဖန်တီးပေးခဲ့သည်။

​ထိုလမ်းကြောင်းက အပြင်ဘက်ဆီသို့ တိုက်ရိုက် ဦးတည်နေခဲ့ချေသည်။

​သို့သော်လည်း ချီလော့မှာမူ မျှော်လင့်မထားဘဲ “ဟင်...” ဟု ရုတ်တရက် အာမေဍိတ်သံ ထွက်ပေါ်လာခဲ့ရသည်။ 

အပြင်ဘက် ပတ်လမ်းတွင်ရှိသော ‘မြရောင်နဂါး သတ္တမအဆင့်ပန်း’ က ‘နဝမအဆင့်ပန်း’ အဖြစ်သို့ တိုးတက်ပြောင်းလဲသွားခဲ့သည့် အချက်က သူ၏ မျှော်လင့်ချက်များကို တကယ့်ကို ကျော်လွန်နေခဲ့သောကြောင့် ဖြစ်သည်။

​“ထူးဆန်းလိုက်တာ... မင်းတို့တွေ အဆင့်တက်ဖို့အတွက် နောက်ထပ် နှစ်ပေါင်းတစ်သောင်းလောက်အထိ အချိန်ယူရဦးမှာ မဟုတ်ဘူးလား"

​သူသည် အပင်များအချင်းချင်း အပြန်အလှန် ဆက်သွယ်ပြောဆိုကြသည့် နည်းလမ်းဖြင့် ၎င်းတို့ကို မေးခွန်းထုတ်လိုက်ခြင်း ဖြစ်သည်။

​“ဘာ... လွန်ခဲ့တဲ့ အချိန်အနည်းငယ်တုန်းက တစ်စုံတစ်ရာသော စွမ်းအားတွေကို ရုတ်တရက် ရရှိခဲ့ပြီး အဆင့်တက်သွားခဲ့တာ ဟုတ်လား...”

​ချီလော့ မိမိ၏ မျက်ခုံးကို အနည်းငယ် တွန့်လိုက်မိသည်။ ဝိညာဉ်သားရဲတစ်ကောင်ကို နှစ်ပေါင်းသောင်းချီ ကြာမြင့်မည့် ကြီးထွားမှုသံသရာကာလတစ်ခုကို တိုက်ရိုက် ကျော်ဖြတ်သွားစေနိုင်လောက်အောင် မည်သည့်စွမ်းအားက စွမ်းဆောင်ပေးနိုင်ခဲ့သလဲဆိုသည်ကို သူ လုံးဝ စိတ်ကူးမယဉ်နိုင်လောက်အောင် ဖြစ်ရပေသည်။

​မကြာမီအချိန်အတွင်းမှာပင် သူတို့နှစ်ဦး အဆိပ်မြူခိုးများထဲမှနေ၍ အောင်မြင်စွာ ထွက်ခွာလာခဲ့ကြသည်။

​လမ်းခရီးတစ်လျှောက်တွင် ယွီဝူယီအနေဖြင့် ချီလော့၏ စွမ်းအားများက တဖြည်းဖြည်းချင်း အားနည်းလာနေခဲ့သည်ကို အထင်အရှား ခံစားမိလိုက်ရသည်။ 

၎င်းတို့သည် ရေခဲနှင့်မီးတောက် ယင်ယန်စမ်းရေတွင်းကို အမှီပြု၍ ကြီးပြင်းလာခဲ့ကြရခြင်းဖြစ်တာမို့... ၎င်းနေရာမှနေ၍ ထွက်ခွာလာခဲ့သည်နှင့်အမျှ ၎င်းတို့၏ စွမ်းအားများက ဆက်လက်၍ ကျဆင်းသွားရဦးမည် ဖြစ်သည်။

​၎င်းတို့၏ စွမ်းအားက အနှစ်တစ်သောင်းတန်း ဝိညာဉ်သားရဲတစ်ကောင်၏ အဆင့်အထိ ကျဆင်းသွားမည် မဟုတ်သော်လည်း... ၎င်းကား အသက်တစ်သိန်းတန်း ဝိညာဉ်သားရဲများအကြားတွင်တော့ သံသယဝင်စရာမလိုဘဲ အားအနည်းဆုံး ဖြစ်သွားရပေလိမ့်မည်။

​“ဘယ်လိုလဲ... အဆင်ပြေရဲ့လား"

​ချီလော့၏ ပုံစံမှာ အတော်လေး နေမကောင်းဖြစ်နေပုံရတာမို့ ယွီဝူယီ ဂရုတစိုက်ဖြင့် မေးမြန်းလိုက်သည်။

​ချီလော့ကတော့ အဆင်ပြေပါသည်ဟူသော သဘောဖြင့် မိမိ၏ ဦးခေါင်းကို ခါယမ်းပြလိုက်ရင်း ပြောလိုက်သည်...။

​“ကျွန်တော် ဤနေရာကနေ တစ်ခါမှ မထွက်ခွာဖူးလို့ပါ.. ပြီးတော့ စွမ်းအားတွေ ဆုံးရှုံးသွားတာကြောင့် အနည်းငယ် အားနည်းသွားရုံပါပဲ လူကြီးမင်းအနေနဲ့ စိုးရိမ်မနေပါနဲ့"

​ရေခဲနှင့်မီးတောက် ယင်ယန်စမ်းရေတွင်းမှ ထွက်ခွာလာပြီးနောက်ပိုင်းတွင် မိမိကိုယ်မိမိ ပိုမိုအားနည်းလာလိမ့်မည်ဟု သူ ကြိုတင်တွေးတောထားခဲ့သော်လည်း... ဤမျှလောက်အထိ အားအင်ချိနဲ့သွားမည့် ခံစားချက်မျိုးကတော့ သူ၏ မျှော်လင့်ချက်များကို ကျော်လွန်နေခဲ့ဆဲပင် ဖြစ်သည်။

​ထို့အပြင် သူ ယွီဝူယီကိုလည်း အနည်းငယ် အားကျမိလိုက်ရသည်။ အပင်အခြေပြု ဝိညာဉ်သားရဲများသည် သဘာဝအတိုင်း လွတ်လပ်စွာ ရွှေ့ပြောင်းသွားလာနိုင်ခြင်း မရှိကြပါချေ.. ၎င်းတို့ အမြစ်တွယ်ရာအရပ်သည် ၎င်းတို့၏ အိမ်ဂေဟာပင် ဖြစ်သည်။ 

အသက်တစ်သိန်းတန်း ဝိညာဉ်သားရဲအဆင့်အထိ ကျင့်ကြံနိုင်မှသာလျှင်... လူသားအသွင်သို့ ပြောင်းလဲနိုင်ပြီး လွတ်လပ်စွာ သွားလာလှုပ်ရှားနိုင်မည့် စွမ်းရည်ကို ရရှိနိုင်ကြမည် ဖြစ်သည်။

​သို့သော်လည်း အပင်အခြေပြု ဝိညာဉ်သားရဲများသည် အခြားသော ဝိညာဉ်သားရဲများနှင့် နှိုင်းယှဉ်လျှင် သဘာဝအတိုင်း အားနည်းကြတာမို့... ၎င်းတို့တွင် ထွက်ခွာသွားနိုင်မည့် စွမ်းရည်များ ရှိနေကြသည့်တိုင်အောင် ထွက်ခွာသွားမည့်သူဟူ၍ အလွန်ပင် ရှားပါးလှပေသည်။ 

ဤအချက်က ရေခဲနှင့်မီးတောက် ယင်ယန်စမ်းရေတွင်း၏ အနီးအနားတွင် မွေးဖွားလာခဲ့ကြသည့် နတ်ပန်းဆေးပင်များအတွက် ပိုမို၍ မှန်ကန်လှပေသည်။

​“မင်း လေထဲမှာ ဆက်ပြီး ပျံသန်းနိုင်သေးရဲ့လား…အကယ်၍ မပျံသန်းနိုင်တော့ဘူးဆိုရင်လည်း ငါတို့တွေ လမ်းလျှောက်ပြီး သွားကြတာပေါ့"

​ယွီဝူယီ စေတနာဖြင့် အကြံပြုလိုက်သည်။ ဤသို့ဆိုလျှင် မူလက သဘောတူထားခဲ့သည့် အချိန်ထက် ပိုမိုကြာမြင့်သွားနိုင်ပေသည်။ 

သို့သော်လည်း ယခုအချိန်တွင် ပိုမိုအရေးကြီးသည်မှာ ချီလော့၏ ကျန်းမာရေးအခြေအနေပင် ဖြစ်သည်.. အပင်တစ်ပင်၏ အသက်ကလည်း အရေးကြီးသည် မဟုတ်ပါလား။

​“ကျွန်တော် အဆင်ပြေပါတယ် ဤနေရာကို စောစောရောက်လေလေ... အရာအားလုံးက စောစောပြီးဆုံးသွားလေလေ ဖြစ်မှာပါ" ချီလော့ အသက်ကို ပြင်းပြင်းရှူလိုက်မိသည်။

​ဤကဲ့သို့သော အားအင်ချိနဲ့နေသည့် ခံစားချက်ကြီးက တကယ့်ကို မနှစ်မြို့ဖွယ်ကောင်းလှတာမို့... သူ ဤခံစားချက်မျိုးကို နောက်ထပ်တစ်ကြိမ် ထပ်မံ၍ ခံစားလိုတော့မည် မဟုတ်ပါချေ။ 

သူ၏ ဝိညာဉ်စွမ်းအားများ ပေါက်ကွဲထွက်ပေါ်လာခဲ့ပြီးနောက် လေထဲသို့ ပျံတက်လိုက်တော့သည်။

​ယွီဝူယီ ခေါင်းညိတ်လိုက်သည်။ တစ်ဖက်လူက ဆုံးဖြတ်ချက်ချပြီးသားဖြစ်တာမို့ သူလည်း ဘာမှ ထပ်မံပြောဆိုမနေတော့ပါချေ။ 

မိမိ၏ ခြေဖဝါးအောက်ရှိ တွန်းကန်အားပေးစနစ် များကို စတင်ဖွင့်လှစ်လိုက်ပြီးနောက် လမ်းညွှန်ပြသရန်အတွက် အရှေ့ဆုံးမှနေ၍ ဦးဆောင်ပျံသန်းသွားလိုက်တော့သည်။

​ချီလော့၏ အခြေအနေကို ထောက်ထားသောအားဖြင့် ယွီဝူယီသည် သူ ဤနေရာသို့ လာခဲ့စဉ်ကထက် များစွာ နှေးကွေးသောအရှိန်ဖြင့်သာ သွားလာခဲ့သည်။ 

သို့သော်လည်း မည်သို့ပင်ဖြစ်စေဦးတော့ အခြားတစ်ဖက်လူက အသက်တစ်သိန်းတန်း ဝိညာဉ်သားရဲတစ်ကောင်ဖြစ်တာမို့... သာမန်ပျံသန်းမှုမျှဖြင့်တော့ သူ၏ ဝိညာဉ်စွမ်းအားများ ကုန်ခမ်းသွားစရာ အကြောင်းမရှိပါချေ။ 

သူတို့နှစ်ဦးစလုံး အလောတကြီးမရှိဘဲ မိမိတို့၏ ကိုယ်ပိုင်အရှိန်နှုန်းဖြင့်သာ ရှေ့သို့ ဆက်လက်ချီတက်ခဲ့ကြသည်။

​သို့သော်လည်း သူတို့ လမ်းခရီး၏ တစ်ဝက်ခန့်သို့ ရောက်ရှိလာခဲ့ချိန်တွင်မူ မျှော်လင့်မထားသော ဖြစ်ရပ်တစ်ခု ရုတ်တရက် ပေါ်ပေါက်လာခဲ့ရတော့သည်။

​သူတို့၏ တည့်တည့်အရှေ့ ကောင်းကင်ယံတွင် ဆံပင်နှင့် မုတ်ဆိတ်မွေးများ ဖြူဖွေးနေသော အဖိုးအိုတစ်ဦးက လေထဲတွင် တိတ်ဆိတ်စွာ ပျံသန်းလျက် ရှိနေခဲ့သည်။ 

သို့သော်လည်း သူ၏ ခန္ဓာကိုယ်ထံမှနေ၍ ဝိညာဉ်စွမ်းအားများ ထွက်ပေါ်နေသည့် အရိပ်အယောင်မျိုးကိုတော့ လုံးဝ မတွေ့ရှိရပါချေ။

​ယွီဝူယီ လက်ကို ဆန့်ထုတ်ကာ ချီလော့ကို တားဆီးလိုက်ပြီးနောက် ခေါင်းလှည့်ကာ ပြောလိုက်သည်...။

​“မင်း အရင်ဆုံး နောက်ကို ဆုတ်နေလိုက်ပါ။ အကယ်၍ ခဏနေရင် တိုက်ပွဲတစ်ခု ဖြစ်ပွားလာခဲ့မယ်ဆိုရင်... ဘေးကင်းတဲ့နေရာမှာ ပုန်းကွယ်နေဖို့ မမေ့နဲ့ဦး"

​သူတို့၏ အရှေ့မှောက်ရှိ ဆန်းကြယ်လှသော အဖိုးအိုကို ကြည့်ရင်း... ချီလော့အနေဖြင့် ထိုပုဂ္ဂိုလ်ကလည်း အဆင့်မြင့်မားလှသော ထိပ်သီးပညာရှင်ကြီးတစ်ဦး ဖြစ်ရပေမည်ဟု ကောင်းစွာ ရိပ်မိလိုက်သည်။ 

ထို့ကြောင့်ပင် သူ လိမ္မာသိတတ်စွာဖြင့် နောက်သို့ ဆုတ်ခွာလိုက်ပြီး လျင်မြန်စွာပင် ဝေးရာသို့ ရွှေ့ပြောင်းသွားခဲ့တော့သည်။

​ယွီဝူယီ မိမိ၏ ရှေ့မှောက်ရှိ အဖိုးအိုကို အလွန်ပင် စိတ်ဝင်စားစရာကောင်းသောအမူအရာဖြင့် ကြည့်ရှုလိုက်သည်။ 

အမှန်အတိုင်း ပြောရလျှင် ဤပုဂ္ဂိုလ်ကြီးနှင့် ဤနေရာတွင် ဆုံတွေ့ရလိမ့်မည်ဟု သူ လုံးဝ မျှော်လင့်မထားခဲ့မိပါချေ။

​အမည်: လုံရှောင်းယောင် 

​အသက်: ၂၆၁ နှစ်

​ကျင့်ကြံမှုအဆင့်: ၉၉ အဆင့်

​ဝိညာဉ်: အမှောင်ဝိညာဉ်နဂါး 

ဝိသေသလက္ခဏာ: နဂါးဧကရာဇ် ဘွဲနှင်းခံ သန့်ရှင်းသောဝိညာဉ်ဂိုဏ်း ၏ မဟာပုရောဟိတ်ချုပ်။

​အမှန်စင်စစ်ပင်... သူတို့၏ ရှေ့မှောက်တွင် ရောက်ရှိနေသော အဖိုးအိုကား အခြားသူမဟုတ်ဘဲ ကမ္ဘာပေါ်တွင် အစွမ်းထက်ဆုံးသော သက်ရှိပုဂ္ဂိုလ်ကြီးများထဲမှ တစ်ဦးဖြစ်ပြီး.. ‘အဆုံးစွန်သုန့်လော် အဆင့်ရှိ ကျင့်ကြံခြင်းစွမ်းအားကို ပိုင်ဆိုင်ထားသည့် ‘လုံရှောင်းယောင်’ ပင် ဖြစ်ချေတော့သည်။

​လုံရှောင်းယောင်သည် အခြားသူများ၏ ရှေ့မှောက်တွင် အလွယ်တကူ ပေါ်ထွက်လာတတ်သူမျိုး မဟုတ်ပါချေ။ 

အခြားတစ်ဖက်လူက သူတို့ သွားရမည့် တစ်ခုတည်းသော လမ်းကြောင်းပေါ်တွင် ပေါ်ထွက်လာခဲ့ခြင်းဖြစ်တာမို့... သူတို့၏ထံသို့ ဦးတည်ချက်ထား၍ လာရောက်ခြင်း ဖြစ်ရပေမည်။

​“လူကြီးမင်း... တစ်ခုခု လိုအပ်လို့ပါလား"

​ယွီဝူယီ ဆမ်ဝတ်စုံ၏ အေးစက်စက်နိုင်လှသော စက်ရုပ်အသံဖြင့် မေးမြန်းလိုက်သည်။

​လုံရှောင်းယောင်ကလည်း မိမိ၏ ရှေ့မှောက်ရှိ ဖြူဖွေးလှသော စက်ဝတ်စုံကြီးကို အကဲခတ်အကဲဖြတ်လို့နေခဲ့သည်။ 

‘ရဲရှီးရွှေ’ နှင့်အတူ ရှိနေခဲ့စဉ်က... သူသည် ဝိညာဉ်ကရိယာ များနှင့် ပတ်သက်၍ အချို့သော နားလည်မှုများကို ရရှိခဲ့ဖူးသည်။ 

သို့သော်လည်း လူသားတစ်ဦး၏ ခန္ဓာကိုယ်တစ်ခုလုံးကို အပြည့်အဝ ဖုံးလွှမ်းထားနိုင်သည့် ဤကဲ့သို့သော စက်မှု ဝတ်စုံမျိုးကိုတော့ သူ တစ်ခါမျှ မမြင်တွေ့ဖူးခဲ့ပါချေ။

​“ဟဟ... မင်းအနေနဲ့ ဒီလောက်အထိ သတိကြီးမနေပါနဲ့.. ငါက ဒီအတိုင်း လမ်းကြုံလို့ ဖြတ်သန်းသွားရုံသက်သက်ပါပဲ"

​နောက်နေတာလား...

​ယွီဝူယီ ဤအကြောင်းပြချက်ကို လုံးဝ မယုံကြည်ပါချေ။

​“အို... တိုက်ကြီးပေါ်ကနေ အချိန်အတော်ကြာ ပျောက်ကွယ်သွားခဲ့တဲ့ နဂါးဧကရာဇ်ဘွဲ့နှင်းခံ ...” လုံရှောင်းယောင်လို လူမျိုးက... ဘယ်လိုလုပ်ပြီး အခြားလူတစ်ယောက်ရဲ့ ရှေ့မှောက်ကနေ ဒီအတိုင်းကြီး လက်ပိုက်ကြည့်ပြီး အေးအေးဆေးဆေး ဖြတ်သန်းသွားနိုင်မှာလဲ။

​သူသည် အခြားတစ်ဖက်လူ၏ ဝိသေသလက္ခဏာကို တိုက်ရိုက်ပင် ထုတ်ဖော်ပြောဆိုလိုက်တော့သည်။

​တည်ငြိမ်လှသော လုံရှောင်းယောင် မိမိ၏ မျက်ခုံးကို အနည်းငယ် ပင့်လိုက်မိပြီး.. အခြားတစ်ဖက်လူက မိမိ၏ ဝိသေသလက္ခဏာကို ချက်ချင်း မှတ်မိသွားသည့်အတွက် အနည်းငယ် အံ့အားသင့်သွားခဲ့ရသည်။

​“ကြည့်ရတာ မင်းရဲ့ ဝိသေသလက္ခဏာကလည်း သာမန်တော့ မဟုတ်ပုံရဘူး"

​မိမိ၏ ဝိသေသလက္ခဏာကို တစ်ချက်ကြည့်ရုံဖြင့် သိရှိနိုင်သည်ဆိုပါက... အခြားတစ်ဖက်လူသည် မိမိ သိကျွမ်းထားဖူးသည့်သူ ဖြစ်ရပေလိမ့်မည်။

​“ကျွန်တော်လည်း ထို့အတူပါပဲ"

​ယွီဝူယီ တည်ငြိမ်စွာ ပြောလိုက်သည်။

​သို့သော်လည်း ဤရိုးရှင်းလှသော အဖြေစကားက လုံရှောင်းယောင်၏ မျက်ဝန်းများကို အနည်းငယ် ကျဉ်းမြောင်းသွားစေခဲ့ရသည်။ တစ်ဖက်လူ၏ စကားလုံးများက... သူတို့ တစ်ခုခုကို ကောင်းစွာ သိရှိထားကြောင်း အရိပ်အယောင် ပြသနေသည့်အလား ရှိနေခဲ့သည်။

​သူသည် အစပိုင်းတွင် ဤနယ်မြေကို လမ်းကြုံ၍ ဖြတ်သန်းသွားခဲ့ခြင်းသာ ဖြစ်သော်လည်း.. ရုတ်တရက် ပေါက်ကွဲထွက်ပေါ်လာခဲ့သော ကြီးမားလှသည့် စွမ်းအင်လှိုင်းကြီးက သူ၏ အာရုံစိုက်မှုကို ဆွဲဆောင်သွားခဲ့ခြင်း ဖြစ်သည်။ သူ စွမ်းအင်၏ မြစ်ဖျားခံရာကို မရှာဖွေနိုင်သေးခင်မှာတင် ထိုစွမ်းအင်များက ပြန်လည်ပျောက်ကွယ်သွားခဲ့ရသည်။

​စူးစမ်းလိုစိတ်ကြောင့် သူ ဤနေရာတွင် ခေတ္တမျှ စောင့်ဆိုင်းနေခဲ့ခြင်းဖြစ်ပြီး.. သူ၏ မျှော်လင့်ချက်အတိုင်း အမှန်တကယ်ပင် ဆုံတွေ့ခွင့် ရရှိခဲ့ခြင်း ဖြစ်သည်။

​လုံရှောင်းယောင် ချီလော့၏ မူလအသွင်သဏ္ဍာန်ကို ကြည့်ကာ ၎င်းကား ‘ချီလော့ တူးလစ်ပန်း’ ဖြစ်ကြောင်း တစ်ချက်ကြည့်ရုံဖြင့် မှတ်မိလိုက်သည်။ 

သို့သော်လည်း သူတို့၏ အရှေ့မှောက်ရှိ ဖြူဖွေးသော စက်ဝတ်စုံကြီး၏ နောက်ခံမြစ်ဖျားခံရာကိုတော့ လုံးဝ ခွဲခြားသိမြင်နိုင်ခြင်း မရှိပါချေ။

​ယခုအခါတွင် ဤဖြူဖွေးသော စက်ဝတ်စုံကြီးသည် မိမိ၏ ဝိသေသလက္ခဏာကို သိရှိရုံတင်မကဘဲ... ပိုမိုနက်ရှိုင်းလှသော အကြောင်းအရာအချို့ကိုပါ သိရှိထားသည့်အလား ရှိနေခဲ့ချေပြီ။

​“မင်းက ဘယ်သူလဲဆိုတာ ငါ့ကို ပြောပြနိုင်မလား...”

​သူ စကားပြောဆိုနေစဉ်မှာတင်... သူ၏ နောက်ကျောဘက်တွင် ရှိနေသော လက်ဖဝါးများက စတင်လှုပ်ရှားလာခဲ့ကြပြီး.. တစ်ဖက်လူက အရာအားလုံးကို တကယ်ပဲ သိရှိထားသည့်အလား ရှိနေခဲ့သည်။ သူသည် အစွန်းရောက်လှသော နည်းလမ်းအချို့ကို အသုံးပြုရန်အတွက် ပြင်ဆင်နေခဲ့ချေပြီ။

​ယွီဝူယီ လုံရှောင်းယောင်၏ လှုပ်ရှားမှုများကို မမြင်တွေ့နိုင်သော်လည်း.. တစ်ဖက်လူ ဘာတွေးတောနေသည်ကိုတော့ အကြမ်းဖျင်းအားဖြင့် ခန့်မှန်းနိုင်ပေသည်။ 

ထိုစကားလုံးများက လုံရှောင်းယောင်အတွက် မည်မျှအထိ အဓိပ္ပာယ်သက်ရောက်မှု ရှိသည်ကို သူ ကောင်းစွာ သိရှိထားသည်။

​“ဝူယီ အထွအထွေထွေ ၀န်ဆောင်မှုလုပ်ငန်း” လုံရှောင်းယောင် မိမိ၏ မှတ်ဉာဏ်ထဲတွင် ‘ဝူယီ အထွေထွေအလုပ်အကိုင်အေဂျင်စီ’ ဟု အမည်ရသော မည်သည့် အဓိက အဖွဲ့အစည်းကြီး ရှိသလဲဆိုသည်ကို အဆက်မပြတ် စဉ်းစားတွေးတောလိုက်မိသည်။ 

သို့သော်လည်း အချိန်အတော်ကြာ စဉ်းစားပြီးသည့်တိုင်အောင် ထိုအမည်ဖြင့် ကျော်ကြားလှသော မည်သည့်အင်အားစုမျှ မရှိကြောင်း သူ သဘောပေါက်သွားခဲ့ရသည်။

​တစ်ဖက်လူက မိမိ၏ ဝိသေသလက္ခဏာကို တစ်ချက်ကြည့်ရုံဖြင့် သိရှိနိုင်သည်ဆိုပါက... သူတို့သည် သာမန်အဖွဲ့အစည်းတစ်ခုမှ ဖြစ်ရမည် မဟုတ်ပါချေ။ တစ်နည်းအားဖြင့် ပြောရလျှင် ဤတိုက်ကြီးကြီးပေါ်တွင် မိမိ လုံးဝ သတိမပြုမိသေးသည့် လျှို့ဝှက်ဆန်းကြယ်လှသော အင်အားစုကြီးတစ်ခု ရှိနေခြင်းပင် ဖြစ်သည်။

​၎င်းအပြင်... ဤအင်အားစုကြီးသည် ‘သန့်ရှင်းသောဝိညာဉ်ဂိုဏ်း’  တည်ရှိနေခြင်းကိုပါ သိရှိထားနိုင်ခြေ ရှိပေသည်။

​လုံရှောင်းယောင် မျက်ဝန်းများကို ကျဉ်းမြောင်းလိုက်ရင်း နောက်ဆုံးမေးခွန်းတစ်ခုကို မေးမြန်းရန် ပြင်ဆင်လိုက်စဉ်မှာတင်... သူ၏ စကားလုံးများက ဖြတ်တောက်ခြင်း ခံလိုက်ရတော့သည်...။

​“သန့်ရှင်းသောဝိညာဉ်ဂိုဏ်းရဲ့ မဟာပုရောဟိတ်ချုပ်... ဟုတ်တယ်မလား"

​ထိုအခိုက်အတန့်တွင်ပင်... သာမန်လူသားတစ်ဦးကဲ့သို့ တည်ငြိမ်နေခဲ့သော လုံရှောင်းယောင်၏ ခန္ဓာကိုယ်ထံမှနေ၍ အတိုင်းအဆမဲ့ ကြီးမားလှသော ဖိအားလှိုင်းကြီးတစ်ခု ရုတ်တရက် ပေါက်ကွဲထွက်ပေါ်လာခဲ့ပြီး ယွီဝူယီ၏ ခန္ဓာကိုယ်တစ်ခုလုံးကို လွှမ်းခြုံချုပ်ကိုင်သွားခဲ့တော့သည်...

​တစ်ပြိုင်နက်တည်းမှာပင်... သူ၏ ခန္ဓာကိုယ်ပတ်ပန်းကျင်တွင် ဝိညာဉ်ကွင်း ကိုးကွင်း ဖြစ်ကြသော - အဝါ.. အဝါ.. ခရမ်း.. ခရမ်း.. အနက်.. အနက်.. အနက်.. အနီ.. အနီ - ဟူ၍ မည်သည့် ဖုံးကွယ်ထားမှုမျိုးမျှမရှိဘဲ တောက်ပလှစွာဖြင့် ထွက်ပေါ်လာခဲ့ကြချေပြီ။

​သူသည် အသက်တစ်သိန်းတန်း ဝိညာဉ်ကွင်း အနီရောင် နှစ်ကွင်းစလုံးကိုပင် ပိုင်ဆိုင်ထားခြင်း ဖြစ်သည်။

​“မင်း ငါ ဘယ်သူလဲဆိုတာကို သိနေရက်သားနဲ့... ဘာဖြစ်လို့ အဲဒါကို ထုတ်ပြောဖို့ သတ္တိရှိနေရတာလဲ ဤကဲ့သို့ လုပ်ဆောင်ခြင်းရဲ့ နောက်ဆက်တွဲ အကျိုးဆက်တွေကို မင်း ကောင်းကောင်း သိထားသင့်ပါတယ်"

​လုံရှောင်းယောင် စက်မှု ဝတ်စုံ၏ မျက်နှာဖုံးကို စိုက်ကြည့်လိုက်မိပြီး.. ထိုမျက်နှာဖုံး၏ နောက်ကွယ်တွင် မည်ကဲ့သို့သော မျက်နှာအမူအရာမျိုး ရှိနေမည်ကို သူ အလွန်ပင် သိရှိလိုလှပေသည်။

​မိမိက နဂါးဧကရာဇ်ဘွဲခံ ဖြစ်ကြောင်း သိရှိထားသည့်တိုင်အောင်.. သန့်ရှင်းသောဝိညာဉ်ဂိုဏ်း တည်ရှိနေခြင်းကို သိရှိထားသည့် မည်သူ့ကိုမျှ မိမိအနေဖြင့် အသက်ရှင်လျက် လွှတ်ပေးမည်မဟုတ်ကြောင်း ကောင်းစွာ သိရှိထားသည့်တိုင်အောင်...

​သူ ဘာဖြစ်လို့ ဤမျှလောက်အထိ ရဲရဲဝံ့ဝံ့ကြီး ထုတ်ဖော်ပြောဆိုရဲရတာလဲ။

​ယွီဝူယီ ပြုံးလိုက်မိပြီး.. အကြောင်းပြချက်ကတော့ အလွန်ပင် ရိုးရှင်းလှပေသည်။

​သူသည် ၆၀ ရာခိုင်နှုန်းသို့ ရောက်ရှိနေသော ဆမ်ဝတ်စုံ၏ အစွမ်းသတ္တိများက မည်မျှအထိ သန်မာထက်မြက်နေပြီလဲဆိုသည်ကို တကယ့်ကို လက်တွေ့စမ်းသပ်ကြည့်ချင်နေခဲ့သောကြောင့် ဖြစ်သည်။

​ထို့ကြောင့်ပင်... သူ လုံရှောင်းယောင်နှင့် လက်ရည်စမ်းရန်အတွက် မစောင့်ဆိုင်းနိုင်လောက်အောင် ဖြစ်ပေါ်လို့နေခဲ့ချေပြီ...