အခန်း (၂၈) - အစွမ်းပြ ခြိမ်းခြောက်ခြင်း

​ယွီဝူယီ နီးကပ်စွာ မချဉ်းကပ်နိုင်သေးခင်မှာတင် ရေခဲနှင့်မီးတောက် ယင်ယန်စမ်းရေတွင်း၏ မီးဓာတ်သဘာဝရှိသော ကန်မကြီးထဲမှနေ၍ ရေပန်းပွင့်ပေါင်း ရာနှင့်ချီ၍ ရုတ်တရက် ပေါက်ကွဲထွက်ပေါ်လာခဲ့သည်။

​၎င်းတို့သည် ဟာလာဟင်းလင်းပြင်ကြီးကိုပင် အရည်ပျော်မတတ် ဖြစ်စေနိုင်သော ကြောက်မက်ဖွယ် အပူရှိန်များကို သယ်ဆောင်လာရင်း သူ၏ထံသို့ အလွန်မြင့်မားလှသောအရှိန်နှုန်းဖြင့် ပြေးဝင်လာကြတော့သည်။

​“ဟင်... ငါ့ကို ရိပ်မိသွားတာပဲ"

​သူ ၎င်းကို တစ်ချက်ကြည့်ရုံမျှဖြင့် ချီလော့ တူးလစ်ပန်း ၏ လက်ရာမွန်ဖြစ်ကြောင်း ချက်ချင်းပင် မှတ်မိလိုက်သည်။

​ဤရေပန်းပွင့်လေးများကို အထင်သေး၍ မရပါချေ။ ရေခဲနှင့်မီးတောက် ယင်ယန်စမ်းရေတွင်း၏ ကန်ရေပြင်သည် အစွန်းရောက်လှသော သဘာဝဂုဏ်သတ္တိနှစ်ခုကို ပိုင်ဆိုင်ထားကြောင်း လူတိုင်းသိကြသည်။ 

တစ်နည်းအားဖြင့် ပြောရလျှင် ပြေးဝင်လာသော ရေပန်းပွင့်တစ်ပွင့်ချင်းစီတိုင်းသည် အစွန်းရောက်မီးဓာတ် ၏ တိုက်ခိုက်မှုများကို ကိုယ်စားပြုနေခြင်းပင် ဖြစ်သည်။

​သို့သော်လည်း မီးဓာတ်နှင့် ပတ်သက်လာလျှင်မူ... ၎င်းကား ဆမ် ၏ ပွဲတော်ကြီးပင် ဖြစ်ချေတော့သည်။

​ဆမ် ၏ ရှေ့မှောက်တွင် မီးဓာတ်ဖြင့် လာရောက်ကစားပြရန် ကြိုးစားခြင်းက... ၎င်းသည် အစွန်းရောက်မီးဓာတ် ဖြစ်နေပါစေဦးတော့.. ကျွမ်းကျင်သူ၏ ရှေ့မှောက်တွင် ဆရာလာလုပ်နေသလို သို့မဟုတ် ငါးကို ရေကူးသင်ပေးနေသကဲ့သို့ပင် ဖြစ်ပေလိမ့်မည်။

​၎င်းအပြင် ဆမ်၏ ယခုလက်ရှိ စွမ်းအားမှာ သင်းပျံ့ရနံ့ ချီလော့ တူးလစ်ပန်း များစွာ သာလွန်လွန်းလှသည်။ သူ၏ ဟင်းလင်းပြင်နယ်‌မြေ  ၏ အကာအကွယ်ကို မသုံးစွဲဘဲနေလျှင်ပင်... သူ့ထံသို့ ရိုက်ခတ်လာမည့် ကန်ရေပန်းများမှာ ကလေးကစားစရာ ရေပြွတ်သေနတ်ထဲမှ နွေးထွေးသော ရေနွေးနွေးလေးဖြင့် အပက်ခံရသကဲ့သို့သာ ရှိပေလိမ့်မည်။

​ထို့ကြောင့်ပင် ယွီဝူယီသည် သာမန်သန်မာသူများပင် တွေဝေခြင်းမရှိဘဲ ရှောင်ရှားကြမည့် ဤအစွန်းရောက်မီးဓာတ်လှိုင်းကို အားစိုက်ခွန်းစိုက်ဖြင့် တိုးဝှေ့ဖြတ်သန်းသွားလိုက်ပြီး... ရေခဲနှင့်မီးတောက် ယင်ယန်စမ်းရေတွင်း၏ အထက်သို့ ဆင်းသက်လိုက်တော့သည်။

​ထိုအခိုက်အတန့်တွင်ပင်... သူ့ထံသို့ ဦးတည်လာနေသည့် မတူညီသော အရွယ်အစားရှိ ရန်လိုသည့် တိုက်ခိုက်မှုလှိုင်းပေါင်း ဆယ်ခုထက်မနည်းကို သူ ချက်ချင်းပင် အာရုံခံမိလိုက်ရသည်။ 

မလွဲမသွေပင်... ဤရန်လိုသော သက်ရှိများ၏ အရှင်သခင်များမှာ နှစ်တစ်သိန်း အရွယ်ရှိကြသည့် ဝိညာဉ်သားရဲ  များပင် ဖြစ်ကြပေလိမ့်မည်။

​ဤအခြေအနေက ယွီဝူယီကို အနည်းငယ် မျှော်လင့်မထားဘဲ အံ့အားသင့်သွားစေခဲ့သည်။ 

ဤနေရာရှိ နှစ်တစ်သိန်း ဝိညာဉ်သားရဲများမှာ အပင်အခြေပြု ရက်စက်ကြမ်းကြုတ်သော သားရဲကြီး ခြောက်ကောင် မျှသာ ကန့်သတ်မနေကြောင်း သူ သိရှိထားသော်လည်း... ဤမျှလောက်အထိ များပြားလိမ့်မည်ဟုတော့ လုံးဝ ထင်မှတ်မထားခဲ့မိပါချေ။ 

အမှန်အတိုင်း ပြောရလျှင် ဤနေရာရှိ အသက်တစ်သိန်းတန်း ဝိညာဉ်သားရဲ အရေအတွက်မှာ ကြယ်တာရာတောအုပ်ကြီးတစ်ခုလုံး တွင် ရှိနေသည့် အရေအတွက်ထက်ပင် ပိုမို၍ များပြားနေနိုင်ပေသည်။ 

သို့သော်လည်း ၎င်းတို့၏ စုစုပေါင်းစွမ်းအားကတော့ နှိုင်းယှဉ်၍ ရနိုင်မည် မဟုတ်ပါချေ။

​“ကျေးဇူးပြုပြီး အားလုံးပဲ စိတ်အေးအေးထားကြပါ.. ကျွန်တော့်မှာ ဘာမကောင်းတဲ့ ရည်ရွယ်ချက်မှ မရှိပါဘူး"

​သူ၏ ယခုလက်ရှိ စွမ်းအားဖြင့်ဆိုလျှင်ပင် ၎င်းတို့ကို အင်အားသုံး၍ အသာစီးရအောင် တိုက်ခိုက်ရန်မှာ မလွယ်ကူလှပါချေ။ 

၎င်းအပြင် စီးပွားရေးသမားတစ်ဦးအနေဖြင့်... ကျွန်ုပ်တို့သည် အကြမ်းဖက်မှုများကို အသုံးချမည့်အစား ငြိမ်းချမ်းသော နည်းလမ်းဖြင့် ကိစ္စရပ်များကို ဖြေရှင်းခြင်းဟူသော မူဝါဒကို သဘာဝအတိုင်း လိုက်နာစောင့်ထိန်းသင့်ပေသည်။

​“မင်းမှာ မကောင်းတဲ့ ရည်ရွယ်ချက်မရှိဘူးဆိုရင်... ဘာဖြစ်လို့ ဒီလောက်အမြင့်ကြီးကနေ ပျံသန်းလာရတာလဲ"

​ထိုအသံမှာ ကန်နှစ်ခု ဆုံတွေ့ရာ ကမ်းစပ်ဘက်ဆီမှနေ၍ ထွက်ပေါ်လာခဲ့ခြင်း ဖြစ်သည်။

​ထိုနေရာတွင် ရိုးတံအလျား ဆယ်ပေနီးပါးခန့် ရှည်လျားပြီး.. ပန်းပွင့်ကိုယ်ထည်မှာ သုံးပေထက်မက ကျယ်ပြန့်ကာ... ဖန်သားပြင်ကဲ့သို့ ကြည်လင်ပြတ်သားလှသော ပန်းပွင့်ချပ်များ ရှိနေသည့် ဖျော့တော့သော ပန်းရောင်ပန်းပွင့်ကြီးတစ်ပွင့် ရှိနေချေသည်။ 

သူမ၏ ပန်းပွင့်ချပ်များက အနည်းငယ် လှုပ်ခတ်သွားခဲ့ပြီးနောက် အခြားသောအသံတစ်ခု ထပ်မံထွက်ပေါ်လာခဲ့ပြန်သည်...။

​“နင် တကယ်သတ္တိရှိရင် အောက်ကိုဆင်းလာပြီး စကားပြောစမ်း"

​သူမ စကားပြောဆိုပြီးသွားခဲ့သည်နှင့်အမျှ... သူမ၏ ပန်းပွင့်ချပ်များက စည်းချက်ညီညီဖြင့် စတင်လှုပ်ခတ်လာခဲ့ပြီး.. မီးဓာတ်ကန်ကြီးမှာလည်း ထပ်မံ၍ လှုပ်ခတ်သက်ဝင်လာခဲ့ပြန်သည်။ 

စောစောက တိုက်ခိုက်မှုကို သူမကပဲ စတင်ဖန်တီးခဲ့ခြင်း ဖြစ်ကြောင်း ထင်ရှားလှပေသည်။

​၎င်းကို မြင်လိုက်ရသည့်အခါတွင်မူ ယွီဝူယီ မိမိ၏ ဦးခေါင်းကို မတတ်နိုင်သလိုဖြင့် ခါယမ်းလိုက်မိတော့သည်။

​မူရင်းဇာတ်လမ်းကို ဖတ်ရှုဖူးထားတာမို့... ဤနေရာရှိ နတ်ပန်းဆေးပင်  များသည် သဘာဝအရ ဗီဇမဆိုးကြသော်လည်း.. အများစုမှာ အလွန်ပင် လှည့်ပတ်ဉာဏ်များပြီး အကွက်စိပ်ကြကြောင်း သူ ကောင်းစွာ သိရှိထားသည်။ 

အကယ်၍ မင်းက သူတို့ထက် အားနည်းနေမယ်ဆိုရင်... သူတို့က မင်းကို အန္တရာယ်မပြုချင်ရင်တောင်မှ ကိစ္စရပ်တွေကို ခက်ခဲအောင် လုပ်ကြပေလိမ့်မည်။ 

သူတို့ကို လိမ္မာသိတတ်လာအောင် လုပ်နိုင်မည့် တစ်ခုတည်းသော နည်းလမ်းမှာ... အရာရာကို လွှမ်းမိုးချုပ်ကိုင်နိုင်မည့် အဆမတန် ကြီးမားလှသော စွမ်းအားကြီးကို ထုတ်ဖော်ပြသလိုက်ခြင်းပင် ဖြစ်သည်။

​ဝူး...

​ဆမ်ဝတ်စုံဆီမှနေ၍ ပုံမှန်မဟုတ်သော အသံတစ်သံ ထွက်ပေါ်လာခဲ့ပြီး.. အဆက်မပြတ် မြင့်မားတိုးတက်လာနေသော စွမ်းအင်စုဆောင်းသံကြီးက တစ်ခုခု ဖြစ်ပျက်တော့မည်ကို နိမိတ်ပြနေသည့်အလား ရှိနေခဲ့သည်။ 

ရေခဲနှင့်မီးတောက် ယင်ယန်စမ်းရေတွင်း၏ ဘေးတွင်ရှိနေကြသော နတ်ပန်းဆေးပင်များအားလုံး၏ စိတ်ထဲတွင် အတွေးတစ်ခုတည်းသာ တူညီစွာ ဖြစ်ပေါ်လာခဲ့ကြသည်...

​သူ ဘာလုပ်မလို့လဲ...

​ယွီဝူယီကတော့ သူတို့၏ မေးခွန်းများကို လက်တွေ့ကျသော လှုပ်ရှားမှုဖြင့်သာ အဖြေပေးလိုက်တော့သည်။ စုဆောင်းထားသော စွမ်းအင်များ အထွတ်အထိပ်သို့ ရောက်ရှိသွားခဲ့သည့် ထိုအခိုက်အတန့်တွင်ပင်...

​နတ်ပန်းဆေးပင်များအားလုံး၏ မျက်စိရှေ့မှောက်တွင် ရုတ်တရက် ဖြူဖွေးလှသော အလင်းတန်းကြီးတစ်ခု ပေါ်ထွက်လာခဲ့ပြီး.. ထို့နောက်တွင်မူ နားကွဲမတတ် ပြင်းထန်လှသော ပေါက်ကွဲသံကြီးတစ်ခု ထွက်ပေါ်လာခဲ့တော့သည်...

​ဒိန်း...

​ချက်ချင်းဆိုသလိုပင်... တောင်ကြားလျှိုမြောင်ကြီးတစ်ခုလုံး ပြင်းထန်စွာ တုန်ခါသွားခဲ့ရပြီး ကြောက်မက်ဖွယ်ကောင်းလှသော အပူလှိုင်းကြီးက တောင်ကြားတစ်ခုလုံးကို လွှမ်းခြုံတိုက်ခတ်သွားခဲ့တော့သည်။ 

၎င်းကား... ရေခဲနှင့်မီးတောက် ယင်ယန်စမ်းရေတွင်း၏ အထက်ကောင်းကင်ယံတွင် နေမင်းတစ်စင်း ရုတ်တရက် ပေါ်ထွက်လာခဲ့သည့်အလားပင်။

​အထက်ကောင်းကင်ယံရှိ သက်တံရောင် ခုနစ်သွယ် အဆိပ်တိမ်တိုက်ကြီးသည် ထိုကြောက်မက်ဖွယ် အပူရှိန်ကြောင့် ဖောက်ထွင်းခံလိုက်ရပြီး ဟာလာဟင်းလင်းပြင် အပေါက်ကြီးတစ်ခုအဖြစ် ဖြစ်ပေါ်သွားခဲ့ရသည်။ 

နတ်ပန်းဆေးပင်များ သတိပြန်လည်လာပြီး အပေါ်သို့ မော့ကြည့်လိုက်ကြသည့် အခါတွင်မူ... ကြောက်မက်ဖွယ် မီးလျှံများအကြားတွင် ရစ်ဝိုင်းနေသည့် ဖြူဖွေးသော လူသားရိပ်ကြီးတစ်ခုကိုသာ လှမ်းမြင်လိုက်ကြရတော့သည်။

​ထိုမီးတောက်များက သူ့အား အပြင်ဘက် ဝတ်ရုံကြီးတစ်ခုကဲ့သို့ လွှမ်းခြုံပေးထားခဲ့ချေပြီ။

​“ကဲ... အခုဆိုရင် ငါတို့တွေ သေသေချာချာ စကားပြောလို့ ရကြပြီ မဟုတ်လား"

​ယွီဝူယီ ပြုံးလျက် ပြောဆိုလိုက်သည်။

​ဤအရာကား ၆၀ ရာခိုင်နှုန်းသို့ ရောက်ရှိနေသော ဆမ်ဝတ်စုံ၏ ‘ဒုတိယအဆင့် မီးလောင်ကျွမ်းခြင်း စနစ်’ ပင် ဖြစ်ပြီး.. ၎င်းကို စတင်ဖွင့်လှစ်လိုက်ရုံမျှဖြင့် ဤမျှလောက်အထိ ကြောက်မက်ဖွယ်ကောင်းသော စွမ်းအားများကို ပိုင်ဆိုင်ထားခြင်း ဖြစ်သည်။ 

၎င်းအပြင် သူသည် စွမ်းအင်အများစုကို အထက်ကောင်းကင်ယံဆီသို့ တိုက်ရိုက် လွှဲပြောင်းပေးခဲ့ပြီး.. နတ်ပန်းဆေးပင်များအနေဖြင့် ဤအရာက စိတ်ကူးယဉ်အိမ်မက်တစ်ခု မဟုတ်ကြောင်း သိရှိစေရန်အတွက် စွမ်းအင်အနည်းငယ်မျှကိုသာ ချန်ထားခဲ့ခြင်း ဖြစ်သည်။ 

ဤအချက်ကပင် သက်တံရောင် အဆိပ်တိမ်တိုက်ကြီးကို အပေါက်ကြီးတစ်ခု ဖြစ်သွားစေခဲ့ရသည့် အကြောင်းရင်းပင် ဖြစ်သည်။

​“ရပါပြီ... ရပါပြီ... ငါတို့ ကောင်းကောင်း စကားပြောကြတာပေါ့… နင်က ဒီလိုပုံစံကြီးနဲ့ဆို တကယ့်ကို ကြောက်စရာကြီးပါ.. အရင်ပုံစံအတိုင်း ပြန်ပြောင်းပေးလို့ ရမလား...”

​ချီလော့ တူးလစ်ပန်း၏ ပန်းပွင့်ချပ်များက ကြောက်ရွံ့မှုကြောင့် နောက်သို့ တွန့်ဆုတ်သွားခဲ့ကြပြီး.. သူမ၏ လေသံမှာလည်း အစောပိုင်းကကဲ့သို့ ခက်ထန်မနေတော့ပါချေ။

​ယွီဝူယီ ဒုတိယအဆင့် မီးလောင်ကျွမ်းခြင်းစနစ်ကို ပိတ်သိမ်းလိုက်ပြီးနောက် ရေခဲနှင့်မီးတောက် ယင်ယန်စမ်းရေတွင်း၏ အထက်ကောင်းကင်ယံမှာ ချက်ချင်းပင် ပြန်လည်ကြည်လင်သွားခဲ့ရသည်။ 

စိတ်အေးသက်သာရာ ရသွားသည့်အလား ချီလော့ တူးလစ်ပန်း၏ ပန်းပွင့်ချပ်များက ဖြည်းညှင်းစွာ ပြန်လည်ပွင့်လန်းလာခဲ့သည်။

​ဒီလူက အသက်ရှင်နေတဲ့ ဘယ်လိုသတ္တဝါမျိုးလဲ... ဘာဖြစ်လို့ သူဘေးက မီးတောက်တွေက အစွန်းရောက်မီးဓာတ်ထက်တောင် ပိုပြီး ပြင်းထန်နေရတာလဲ...

​လေလယ်တွင် ရှိနေသော ယွီဝူယီ တစ်ခုခု ပုံမှန်မဟုတ်သည်ကို သတိပြုမိလိုက်သည်.. စောစောက ဖြစ်ပေါ်ခဲ့သော ဒုတိယအဆင့် မီးလောင်ကျွမ်းခြင်းစနစ်ကြောင့် တောင်ကြားတစ်ခုလုံး၏ အပူချိန်မှာ သိသိသာသာ မြင့်တက်သွားခဲ့ရသည်။ 

မီးတောက်များ ပျောက်ကွယ်သွားခဲ့သည့်တိုင်အောင် ဤမျှလောက် မြင့်မားသောအပူချိန်ကို တိုတောင်းလှသော အချိန်ကာလအတွင်း မူလအခြေအနေသို့ ပြန်လည်ရောက်ရှိရန်မှာ ခက်ခဲလှပေလိမ့်မည်။

​ဤအချက်ကပင် တောင်ကြားအတွင်းရှိ ရေခဲဓာတ်သဘာဝရှိသော နတ်ပန်းဆေးပင်များကို နုံးချိသွားစေခဲ့ပြီး ညှိုးရော်ကိုင်းညွတ်သွားစေခဲ့ရသည်။

​“အင်း... ဒီလိုဆိုရင်တော့ မဖြစ်သေးပါဘူး.. ၎င်းက နောက်ဆက်တွဲ စကားပြောဆိုမှုတွေကို ထိခိုက်စေနိုင်တယ်"

​ဝူး...

​အေးမြလှသော လေပြင်းတစ်ချက် တိုက်ခတ်သွားခဲ့သည်နှင့်အမျှ... ယွီဝူယီသည် ဖြူဖွေးသော ဆမ်ဝတ်စုံမှနေ၍ နက်ပြာရောင် ရှိသော ‘ကေဆာ’ အဖြစ်သို့ ပြောင်းလဲလိုက်တော့သည်။

​သူ မိမိ၏ လက်မောင်းနှစ်ဖက်ကို ဆန့်တန်းလိုက်ရာ... တောင်ကြားတစ်ခုလုံးဆီသို့ အေးစက်လှသော လေပြင်းလှိုင်းကြီးတစ်ခု ချက်ချင်းပင် လှစ်ခနဲ ဖြတ်သန်းတိုက်ခတ်သွားခဲ့တော့သည်။ 

မူလက မြင့်မားနေသော အပူချိန်မှာ မျက်စိဖြင့် မြင်တွေ့နိုင်လောက်သော နှုန်းထားဖြင့် ချက်ချင်းပင် ကျဆင်းသွားခဲ့ရပြီး မူလအခြေအနေသို့ လျင်မြန်စွာ ပြန်လည်ရောက်ရှိသွားခဲ့သည်။

​သို့သော်လည်း ဤလုပ်ရပ်က သင်းပျံနတ်ဆေးပန်း ကို တကယ့်ကို ထိတ်လန့်တုန်လှုပ်သွားစေခဲ့ရတော့သည်...

​အစွန်းရောက်ရေခဲဓာတ် လား... မဟုတ်ဘူး... ၎င်းက ပိုတောင် သန်မာဦးမယ်...

​သူ့ရဲ့ စောစောက မီးတောက်တွေက အစွန်းရောက်မီးဓာတ်ထက် ပိုသန်မာနေခဲ့တာဆိုတော့... သူ့ရဲ့ ရေခဲဓာတ်ကလည်း အားနည်းနေမှာ မဟုတ်ဘူး...

​ဒီလူသားက... လုံးဝ ဆန့်ကျင်ဘက်ဖြစ်နေတဲ့ စွမ်းရည်နှစ်ခုကို တစ်ပြိုင်နက်တည်း ပိုင်ဆိုင်ထားရုံတင်မကဘဲ... အဲဒီအရာနှစ်ခုစလုံးက သူတို့ရဲ့ အစွန်းရောက်အဆင့်ကိုတောင် ကျော်လွန်နေကြတာပဲ...

​“ဘုရားသခင်... ငါတို့တွေ ဘယ်လို သတ္တဝါကြီးနဲ့ လာတိုးနေကြတာလဲ...”

​ဤအရာအားလုံးကို လုပ်ဆောင်ပြီးနောက်တွင်မူ ယွီဝူယီ ဆမ်ဝတ်စုံအဖြစ် ပြန်လည်ပြောင်းလဲလိုက်ပြီး.. သင်းပျံ့နတ်ဆေးပန်း၏ ဘေးနားသို့ ညင်သာစွာ ဆင်းသက်လိုက်တော့သည်။ 

သင်းပျံ့နတ်ဆေးပန်းမှာ တစ်ဖက်လူက သူမကို တိုက်ခိုက်လာမည်ကို စိုးရိမ်စိတ်ဖြင့် သိသိသာသာ တုန်လှုပ်လို့နေခဲ့သည်။

​သူမ ကြောက်ရွံ့တုန်လှုပ်လှသော လေသံဖြင့်သာ တိုးညင်းစွာ မေးမြန်းလိုက်မိတော့သည်...

​“နင် စောစောက... နင့်မှာ ဘာမကောင်းတဲ့ ရည်ရွယ်ချက်မှ မရှိဘူးလို့ ပြောခဲ့တာ.. အဲဒါ တကယ်ပဲလား"

​ယွီဝူယီ ခေါင်းညိတ်ပြလိုက်ရင်း ပြောလိုက်သည်...

​“ဒါပေါ့... ငါ ဒီကိုလာတာ နတ်ပန်းဆေးပင်တစ်ပင်ကို လာတွေ့တာပါ.. အကယ်၍ သူ ငါနဲ့အတူ လိုက်ခဲ့မယ်ဆိုရင်... ငါ ဤနေရာက ပန်းတစ်ပွင့်.. မျက်က်တစ်ပင်ကိုမျှ ထိခိုက်အောင် လုပ်မှာမဟုတ်ဘူးလို့ ကတိပေးပါတယ်"

​တစ်ဖက်လူက တိုက်ခိုက်မည့် အမူအရာ မရှိသည်ကို မြင်တွေ့လိုက်ရသည့် အခါမှသာ သင်းပျံ့နတ်ဆေးပန်း စိတ်အနည်းငယ် ပြန်လည်တည်ငြိမ်သွားခဲ့ပြီး ကြောက်ရွံ့စွာဖြင့် ထပ်မံမေးမြန်းလိုက်သည်...

​“ဒါဆိုရင် နင်က ဘယ်နတ်ပန်းဆေးပင်ကို လာရှာတာလဲ... ငါ့ကိုတော့ မဟုတ်ပါဘူးနော်...”

​ယွီဝူယီ တစ်ဖက်လူ၏ ထိတ်လန့်တုန်လှုပ်နေသော အမူအရာလေးကို ကြည့်ကာ မရယ်ဘဲ မနေနိုင်လောက်အောင် ဖြစ်သွားခဲ့ရသည်။ သူမ၏ လှည့်ပတ်ဉာဏ်များတတ်သော စရိုက်ကို ခေတ္တဖယ်ထားလျှင်... ဤကောင်မလေးက တကယ့်ကို ချစ်စဖို့ကောင်းလှပေသည်။

​“စိတ်အေးအေးထားပါ.. ငါ ဒီတစ်ခေါက် လာရှာတာ မင်းကို မဟုတ်ပါဘူး"

​နောက်တစ်ခေါက်ကျရင်တော့ အခြေအနေက တူချင်မှ တူလိမ့်မယ်...

​“ကျေးဇူးပြုပြီး ‘ချီလော့ တူးလစ်ပန်း’ ကို ထွက်လာပေးဖို့ ပြောပေးလို့ ရမလား"

​ထို့ကြောင့်ပင် သူတို့က ချီလော့ကို လာရောက်ရှာဖွေခြင်း ဖြစ်ကြောင်း သိသွားခဲ့ရသည်။

​ချီလော့ တူးလစ်ပန်း စိတ်သက်သာရာရစွာဖြင့် သက်ပြင်းတစ်ချက် ချလိုက်မိပြီးနောက်... အချို့သော အရပ်မျက်နှာဆီသို့ လှမ်း၍ အော်ဟစ်လိုက်တော့သည်။

​“ချီလော့... ဒီလူက နင့်ကို လာရှာတာတဲ့...”

​ယွီဝူယီ ထိုအရပ်မျက်နှာဆီသို့ လှမ်းကြည့်လိုက်မိသည်။ ဝတ်ရုံခရမ်းရောင်ကို ဆင်မြန်းထားသော လူသားတစ်ဦးသည် ဖြည်းညှင်းစွာ လျှောက်လှမ်းလာခဲ့ပြီးနောက် သူ့အား ဦးညွှတ်အရိုအသေပြုလိုက်သည်။

​“ကျွန်တော်က ခင်ဗျားရှာနေတဲ့ ချီလော့ တူးလစ်ပန်းပါပဲ.. ကျွန်တော့်ကို ချီလော့လို့ပဲ ခေါ်နိုင်ပါတယ် လူကြီးမင်းအနေနဲ့ ကျွန်တော့်ကို ဘာများ လုပ်ဆောင်ပေးဖို့ လိုအပ်လို့ပါလဲ"

​သူ၏ လေသံမှာ အလွန်ပင် ယဉ်ကျေးပျူငှာလှသော်လည်း... ၎င်း၏ စကားလုံးများအကြားတွင်တော့ စိုးရိမ်ထိတ်လန့်မှု အရိပ်အယောင်အချို့ ကိန်းအောင်းနေခဲ့သည်။ 

ထင်ရှားလှသည်မှာ ယွီဝူယီ၏ စောစောက စွမ်းအားထုတ်ဖော်ပြသမှုကြီးက နတ်ပန်းဆေးပင် အဖွဲ့ဝင်များအားလုံးကို အပြည့်အဝ ခြိမ်းခြောက်လွှမ်းမိုးသွားခဲ့ခြင်း ဖြစ်သည်။ 

ဤအချက်ကပင် ၎င်းတို့အား ခုခံတော်လှန်လိုသော စိတ်ကူးစိတ်သန်းများကိုပင် လုံးဝ ပျောက်ကွယ်သွားစေခဲ့ရသည်။

​ယွီဝူယီ သူ့အား စိတ်သက်သာရာရစေရန်အတွက် ညင်သာစွာဖြင့် နှစ်သိမ့်စကား ပြောကြားလိုက်သည်...

​“သိပ်ပြီးတော့ စိုးရိမ်မနေပါနဲ့.. ငါ မင်းကို ငါနဲ့အတူ လိုက်ခဲ့ပေးဖို့ပဲ လိုအပ်တာပါ"

​“ပြီးတော့ ဤအချိန်အတောအတွင်းမှာ မင်းရဲ့ အသက်အန္တရာယ်ကို လုံးဝ ဘေးကင်းစိတ်ချရစေရမယ်လို့ ငါ အာမခံပါတယ်.. ဒါပေမဲ့ မင်းဘက်ကလည်း ငါ့ကို အကူအညီတစ်ခုတော့ ပြန်ပြီး လုပ်ဆောင်ပေးဖို့ လိုအပ်လိမ့်မယ်"

​“ဒါပေါ့... ငါ မင်းကို အလကားသက်သက် အသုံးချမှာတော့ မဟုတ်ပါဘူး ဤကိစ္စ ပြီးဆုံးသွားခဲ့ရင်... ငါ မင်းကို ကတိတစ်ခု ပေးနိုင်ပါတယ်"

​“အကယ်၍ မင်းတို့တွေ နောင်တစ်ချိန်မှာ တစ်စုံတရက်သော ဘေးအန္တရာယ်နဲ့ ရင်ဆိုင်ရမယ်ဆိုရင်... မင်း ငါ့ဆီကို တိုက်ရိုက် လာရောက်အကူအညီတောင်းနိုင်ပြီး.. ငါ မင်းအတွက် အဲဒီကိစ္စကို ဖြေရှင်းပေးပါ့မယ်"

​“မင်း ဘယ်လိုထင်လဲ...”

​“ကောင်းပါပြီ...” ချီလော့ တူးလစ်ပန်း တွေဝေတုံ့ဆိုင်းနေခြင်းမရှိဘဲ ခေါင်းညိတ်ကာ သဘောတူလိုက်တော့သည်။

​သူ ယွီဝူယီ၏ စွမ်းအားကို စောစောကတင် လက်တွေ့မျက်မြင် ကြုံတွေ့ခဲ့ရပြီးဖြစ်ရာ... တစ်ဖက်လူ၏ စွမ်းပကားမှာ ငြင်းပယ်၍မရလောက်အောင် အလွန်ပင် တန်ခိုးကြီးမားလှပေသည်။ 

၎င်းအပြင် အခြားတစ်ဖက်ကလည်း သူ၏ ဘေးကင်းလုံခြုံရေးကို ကာကွယ်ပေးမည်ဟု အာမခံထားသေးသည်။ ဤကဲ့သို့သော အစွမ်းထက်လှသည့် ပုဂ္ဂိုလ်ကြီးတစ်ဦး၏ အကာအကွယ်ကို ရယူထားခြင်းက... မိမိတို့၏ ဘေးကင်းရေးအတွက် ဘာဖြစ်လို့ ငြင်းပယ်ရမည်နည်း။

​အရေးကြီးဆုံးအချက်မှာ... အကယ်၍ သူ သဘောမတူခဲ့ဘူးဆိုလျှင်ပင်.. ဤမျှလောက်အထိ အစွမ်းထက်လှသော ပုဂ္ဂိုလ်ကြီးတစ်ဦးအနေဖြင့် သူ့အား အတင်းအဓမ္မ ဖမ်းဆီးခေါ်ဆောင်သွားရန်မှာ အလွန်ပင် လွယ်ကူလှပေသည်။ 

တစ်ဖက်လူက စနစ်တကျဖြင့် ကျိုးကြောင်းဆင်ခြင် စကားပြောဆိုပေးနေခြင်းကပင် မိမိတို့အတွက် တကယ့်ကို ကံကောင်းလှသည်ဟု ပြောရပေမည်။

​၎င်းအပြင်... သူတို့က အပြန်အလှန်အားဖြင့် အကျိုးခံစားခွင့်များကိုပါ ပေးအပ်ထားသေးသည် မဟုတ်ပါလား။