အခန်း (၂၆) - အပြန်အလှန် အကျိုးစီးပွားများ
“အားနာစရာမလိုပါဘူး ဂိုဏ်းချုပ်နင်... မင်းရဲ့ စိတ်ထဲမှာ ရှိနေတဲ့ စကားတွေကို ပွင့်ပွင့်လင်းလင်းသာ ပြောပြနိုင်ပါတယ်ဗျာ"
ယွီဝူယီသည် အသင့်ပြင်ဆင်ပြီးသွားသော ကိတ်မုန့်ကို ပန်းကန်ပြားတစ်ခုပေါ်သို့ တင်လိုက်ပြီး နင်ထျန်း၏ ရှေ့သို့ ညင်သာစွာ တွန်းပေးလိုက်သည်။
နင်ထျန်း၏ မျက်ဝန်းလေးများ ချက်ချင်းပင် တောက်ပသွားခဲ့ရပြီး.. သူမသည် ၎င်းကို အားရပါးရ လှမ်းယူလိုက်ကာ ခက်ရင်းကို အသုံးပြု၍ သွားရည်ကျစရာ ကိတ်မုန့်ကို အလွန်အရသာရှိစွာဖြင့် စတင်သုံးဆောင်တော့သည်။
သူမ ကိတ်မုန့်စားရင်း နင်သွားမည်ကို စိုးရိမ်လှတာမို့ ယွီဝူယီသည် သူမ၏ ပန်းကန်ပြားဘေးတွင် နွေးထွေးလှသော လက်ဖက်ရည်ပူပူတစ်ခွက်ကိုပါ အလိုက်တသိဖြင့် ထပ်မံချပေးလိုက်သေးသည်။
နင်ယွန်ယဲ့သည် ဤမြင်ကွင်းအားလုံးကို ကြည့်ရင်း သူ၏ စိတ်ထဲတွင် အတွေးသစ်တစ်ခု တဖြည်းဖြည်းချင်း ပုံဖော်လာခဲ့မိသည်။
“ဆိုင်ရှင်က တကယ့်ကို ပွင့်လင်းပြတ်သားတဲ့ ပုဂ္ဂိုလ်တစ်ဦးပဲ ဒါဆိုရင်လည်း... ယွန်ယဲ့ကပဲ ပွင့်ပွင့်လင်းလင်း ပြောပါရစေ"
“ငါတို့ ရတနာကိုးပါးဂိုဏ်းအဖွဲ့အတွက်... ‘ဝူယီ အထွေထွေလုပ်ငန်း၀န်ဆောင်မှု ဆိုင် ဘက်ကနေ ‘ချီလော့ တူးလစ်ပန်း’ ကို သွားရောက်ရှာဖွေပေးနိုင်လိမ့်မယ်လို့ ငါ မျှော်လင့်ပါတယ်"
အို... ဟုတ်လား။
ယွီဝူယီ သူ၏ မျက်နှာထက်တွင် အလွန်စိတ်ဝင်စားဖွယ်ကောင်းလှသော အမူအရာတစ်ခုကို ထုတ်ဖော်လိုက်မိသည်။ တစ်ဖက်လူ အပ်နှံမည့် ဤ၀န်ဆောင်ခတာဝန်က အဖွဲ့အစည်းတစ်ခုလုံးနှင့် သက်ဆိုင်မည့် ကြီးမားလှသော ၀န်ဆောင်ခအလုပ် ဖြစ်လာနိုင်ကြောင်း သူ ကြိုတင်တွေးတောထားခဲ့သော်လည်း...
နင်ယွန်ယဲ့ကိုယ်တိုင်က ရတနာကိုးပါးဂိုဏ်းအဖွဲ့ကြီးတစ်ခုလုံး၏ အမည်ကို အသုံးပြုပြီး ‘ဝူယီ အထွေထွေလုပ်ငန်း၀န်ဆောင်မှု ဆိုင် ထံသို့ တိုက်ရိုက် ၀န်ဆောင်ခလာရောက်အပ်နှံလိမ့်မည်ဟုတော့ သူ လုံးဝ ထင်မထားခဲ့မိပါချေ။
သို့သော်လည်း နောက်ဆုံးရလဒ်ကတော့ အတူတူပဲဖြစ်တာမို့ သူ့အတွက် မည်သည့်ထိခိုက်မှုမျှ မရှိပါချေ။
မကြာမီအချိန်အတွင်းမှာတင် လျိုယင်၏ သရုပ်ဆောင်မှုရာခိုင်နှုန်းကို အမြင့်မားဆုံးအဆင့်အထိ မြှင့်တင်နိုင်တော့မည်ဖြစ်ပြီး.. စနစ်၏ ၀န်ဆောင်ခသတ်မှတ်ချက်များအောက်တွင် ပိတ်မိနေစရာမလိုတော့ဟု တွေးတောမိရင်း သူ၏ နှလုံးသားတစ်ခုလုံး ဝမ်းသာပီတိဖြစ်လို့နေခဲ့ချေပြီ။
သို့သော်လည်း နင်ယွန်ယဲ့ကိုယ်တိုင် လူကိုယ်တိုင် ရောက်ရှိလာခြင်းဖြစ်တာမို့ သူ၏ ရည်ရွယ်ချက်က ဤမျှလောက်နှင့်တင် ရိုးရှင်းနေမည်မဟုတ်ကြောင်း ထင်ရှားလှပေသည်။
“ဂိုဏ်းချုပ်နင်းရဲ့ ရည်ရွယ်ချက်က... ဤမျှလောက်တင် မကသေးဘူး မဟုတ်လား"
နင်ယွန်ယဲ့ သူ၏ စိတ်ထဲတွင် တကယ့်ကို အසරံမရှိ ခံစားလိုက်ရရှာသည်။ တစ်ဖက်တွင် ရတနာကိုးပါးဂိုဏ်းအဖွဲ့ကြီး၏ ဘုန်းကြီးလှသော အနာဂတ် ရှိနေပြီး.. အခြားတစ်ဖက်တွင်မူ ရတနာကိုးပါးဂိုဏ်းအဖွဲ့ကြီး၏ ‘လွတ်လပ်ခွင့်’ ရှိနေသည် မဟုတ်ပါလား။
“ဒါက တကယ့်အမှန်တရားပါပဲ"
“ငါ ယနေ့ ဒီနေရာကို လာရခြင်းရဲ့ အဓိက ရည်ရွယ်ချက်ကတော့... ၀န်ဆောင်ခတာဝန်ရဲ့ စည်းကမ်းချက်တွေကို ပြန်လည်ညှိနှိုင်းဆွေးနွေးချင်လို့ ဖြစ်ပါတယ်"
“ချီလော့ တူးလစ်ပန်းက ငါတို့ ရတနာကိုးပါးဂိုဏ်းအဖွဲ့အတွက် တကယ့်ကို အရေးကြီးလှတာ အမှန်ပဲဖြစ်ပေမဲ့... ၎င်းရဲ့ တန်ဖိုးက အဖွဲ့အစည်းကြီးတစ်ခုလုံးရဲ့ လွတ်လပ်ခွင့်ထက်တော့ အနည်းငယ် လျော့နည်းပါသေးတယ်"
“ဒါကြောင့်မို့လို့... ငါ ဆိုင်ရှင်နဲ့ ၀န်ဆောင်ခရဲ့ စည်းကမ်းချက်အချို့ကို ပြန်လည်ဆွေးနွေးခွင့်ရလိမ့်မယ်လို့ မျှော်လင့်ပါတယ်"
‘စကားလုံးတွေကို လှပအောင် အသုံးချတတ်သားပဲ...’ ဟု ယွီဝူယီ သူ၏ စိတ်ထဲကနေ ခပ်ပြုံးပြုံး တွေးတောလိုက်မိသည်။
သူ၏ စကားလုံးများ၏ ဆိုလိုရင်းမှာ - ချီလော့ တူးလစ်ပန်းက မည်မျှပင် အဖိုးတန်လှသော မသေမျိုးဆေးပင်တစ်ပင် ဖြစ်နေပါစေဦးတော့.. ၎င်းကား ဆေးပင်တစ်ပင်သာ ဖြစ်ပြီး.. ရတနာကိုးပါးဂိုဏ်းအဖွဲ့ကြီးအတွင်း၌မူ မရေမတွက်နိုင်သော လူသားမြောက်မြားစွာ ရှိနေကြတာမို့ ထိုအရာနှစ်ခုကို အညီအမျှ နှိုင်းယှဉ်၍ မရနိုင်ပါဟူ၍ ဖြစ်သည်။
၎င်းကား ယွီဝူယီ တောင်းဆိုလိုက်သော တန်ဖိုးအဖိုးအခသည် ရတနာကိုးပါးဂိုဏ်းအဖွဲ့ကြီး ပေးဆပ်ရမည့်အရာနှင့် မျှတမှုမရှိကြောင်း သွယ်ဝိုက်၍ ကန့်ကွက်လိုက်ခြင်းပင်။
ယွီဝူယီ တဟဟ ရယ်မောပစ်လိုက်ချင်စိတ်ပင် ပေါ်ထွက်လာခဲ့မိသည်။ ချီလော့ တူးလစ်ပန်းက ရတနာကိုးပါးဂိုဏ်းအဖွဲ့ကြီးကို မည်မျှလောက်အထိ အဆင့်မြှင့်တင်ပေးနိုင်သလဲဆိုတဲ့ အချက်ကိုကျတော့ တစ်ဖက်လူက လုံးဝ ထည့်သွင်းပြောဆိုခြင်း မပြုခဲ့ပါချေ။
အကယ်၍ ဤမသေမျိုးဆေးပင်က သူတို့အတွက် တကယ်ပဲ မရေးကြီးဘူးဆိုရင်... နင်ယွန်ယဲ့တစ်ယောက် ဤမျှလောက်အထိ ဝေးလံလှသောနေရာဆီသို့ ဘာဖြစ်လို့ လူကိုယ်တိုင် လာရောက်နေရဦးမှာလဲ။
သူ ကန့်ကွက်ချင်နေသည့် တစ်ခုတည်းသော အချက်မှာ ၀န်ဆောင်ခစည်းကမ်းချက်ထဲရှိ ၄၀ ရာခိုင်နှုန်းသော ဆုံးဖြတ်ပိုင်ခွင့်အာဏာ ဖြစ်လိမ့်မည်။
အကယ်၍ သူက ၁၀ ရာခိုင်နှုန်းမျှသာ တောင်းဆိုခဲ့လျှင်ပင် ကျန်ရှိနေသေးသော စည်းကမ်းချက်များက သူတို့၏ လွတ်လပ်ခွင့်ကို ဆုံးရှုံးစေလိမ့်မည်ဟု တစ်ဖက်လူက ထင်မှတ်နေခြင်း ဖြစ်သည်။ မည်သို့ပင်ဖြစ်စေ ရတနာကိုးပါးဂိုဏ်းအဖွဲ့ကြီးက သူ၏ ကိုယ်ပိုင်အပိုင်နယ်မြေ မဟုတ်ပါလား။
နင်ယွန်ယဲ့ လူကိုယ်တိုင် လာရောက်ရန် ဆုံးဖြတ်ခဲ့သည့် အချိန်ကတည်းက... ယွီဝူယီအနေဖြင့် သူ၏ ရည်ရွယ်ချက်အများစုကို ကြိုတင်ခန့်မှန်းထားခဲ့ပြီးသား ဖြစ်သည်။
တစ်ဖက်လူက ဤကဲ့သို့ ပြောဆိုနေခြင်းမှာ မိမိအတွက် အကျိုးစီးပွား အများဆုံးရရှိအောင် ကြိုးစားပွတ်သပ်နေခြင်းသာ ဖြစ်ပေသည်။
“ချီလော့ တူးလစ်ပန်းက ရတနာကိုးပါးဂိုဏ်းအဖွဲ့အတွက် အရေးကြီးလား.. မရေးကြီးဘူးလားဆိုတဲ့ အဖြေကိုတော့... ဂိုဏ်းချုပ်နင်ကိုယ်တိုင် အသိဆုံး ဖြစ်မှာပါ"
“၎င်းအပြင်... ငါ စီနီယာရန်ကိုလည်း ပြောပြထားခဲ့ပြီးသားဖြစ်ပါတယ်.. ငါ့ရဲ့ ၀န်ဆောင်ခစည်းကမ်းချက်တွေက အလုပ်အပ်နှံသူကို ရွေးချယ်ခွင့်ပေးတာပဲဖြစ်ပြီး အတင်းအကျပ် လက်ခံခိုင်းတာ မဟုတ်ပါဘူး"
“အကယ်၍ ဂိုဏ်းချုပ်နင်းအနေနဲ့ ဤစည်းကမ်းချက်ကို လက်ခံဖို့ တကယ့်ကို ခက်ခဲနေတယ်လို့ ခံစားရရင်တော့... အခြားသော နည်းလမ်းတွေကိုပဲ စဉ်းစားတွေးတောနိုင်ပါတယ်"
“ဒါပေမဲ့... ငါနဲ့ စီနီယာရန် ပေးထားခဲ့တဲ့ သတိပေးချက်တွေကိုတော့ စိတ်ထဲမှာ အမြဲတမ်း မှတ်သားထားဖို့ မျှော်လင့်ပါတယ်"
တိတ်ဆိတ်ခြင်း...
ဦးဆောင်နိုင်စွမ်းအာဏာက တစ်ဖက်လူ၏ လက်ထဲတွင် ရှိနေသည့် အခါမျိုးတွင်မူ... ဆွဲဆောင်စည်းရုံးရေး နည်းဗျူဟာ မြောက်မြားစွာမှာ အသုံးမဝင်သော အရာများအဖြစ်သို့ ပြောင်းလဲသွားရတတ်စမြဲပင်။
တစ်ဖက်လူက ချီလော့ တူးလစ်ပန်းသည် သူတို့အတွက် မည်မျှလောက်အထိ အရေးကြီးမှန်း ကောင်းစွာ သိရှိနေသလို.. နောက်ဆက်တွဲ ဖြစ်ပေါ်လာမည့် အကျိုးဆက်အားလုံးကိုလည်း ကောင်းစွာ သဘောပေါက်ထားခဲ့သည်။
နင်ယွန်ယဲ့အနေဖြင့် မိမိထက် အသက်ဝက်ကျော်မျှ ငယ်ရွယ်လှသော ဤလူငယ်လေး၏ စကားလုံးများအောက်တွင် မိမိကိုယ်မိမိ လုံးဝ အရေးနိမ့်နေရပြီဖြစ်ကြောင်း ဝန်ခံလိုက်ရရှာသည်။
တစ်ဖက်လူက သူ၏ စိတ်ထဲတွင် ရှိနေသော အတွေးအားလုံးကို ကောင်းစွာ ဖတ်ရှုနိုင်ရုံတင်မကဘဲ... သူတို့ ရတနာကိုးပါးဂိုဏ်းအဖွဲ့ကြီးတစ်ခုလုံးမှာပင် တစ်ဖက်လူ၏ ‘သတင်းအချက်အလက် လျှို့ဝှက်ထားရမည်’ ဆိုသည့် စည်းကမ်းချက်ကို ချိုးဖောက်ရန် သတ္တိမရှိကြပါချေ။
အခြေအနေက ဤအဆင့်သို့ ရောက်ရှိလာခဲ့ပြီဖြစ်တာမို့... သူ၏ နောက်ဆုံး လျှို့ဝှက်ကတ်ပြားကို ထုတ်ဖော်အသုံးပြုရန်မှလွဲ၍ အခြားရွေးချယ်စရာ လမ်းကြောင်း မရှိတော့ပါချေ။ အကယ်၍ ဤနည်းလမ်းဖြင့်ပင် မည်သည့်အကျိုးအမြတ်မျှ မရရှိခဲ့ပါက... သူ ဤကိစ္စကို ပိုမို၍ သေချာပေါက် စဉ်းစားရပေလိမ့်မည်။
သူသည် ‘ဝူယီ အထွေထွေလုပ်ငန်း၀န်ဆောင်မှု ဆိုင် ၏ စစ်မှန်သော ရပ်တည်ချက်ကို မသိရှိရသေးတာမို့... အကယ်၍ သူသာ ဆုံးဖြတ်ချက်တစ်ခုကို မဆင်မခြင် အလွယ်တကူ ချမှတ်လိုက်မည်ဆိုပါက တစ်ဖွဲ့အစည်းလုံးကို အမှောင်ချောက်နက်ကြီးအတွင်းသို့ ဆွဲခေါ်သွားသကဲ့သို့ ဖြစ်ပေါ်သွားနိုင်ပေသည်။ ချီလော့ တူးလစ်ပန်းက အရေးကြီးသော်လည်း စိုးရိမ်တကြီး စုန်းစုန်းစူးစူး လုပ်ဆောင်နေစရာ မလိုပါချေ။
“အကယ်၍... ငါတို့က ဆိုင်ရှင်ကို ဤ ‘ချီလော့ တူးလစ်ပန်း’ ကို သောက်သုံးမယ့်သူက ရှောင်ထျန်းလေး ဖြစ်ပါတယ်လို့ ပြောရင်ကော...”
ဤစကားကို ကြားလိုက်ရသည့် အခါတွင်မူ... ကိတ်မုန့်စားခြင်းတွင် အာရုံစိုက်နေခဲ့သော နင်ထျန်းလေး၏ လှုပ်ရှားမှုများ ချက်ချင်းပင် ရပ်တန့်သွားခဲ့ရပြီး.. သူမ၏ ဖခင်ဖြစ်သူကို အံ့ဩစူးစမ်းလှသော မျက်ဝန်းများဖြင့် လှမ်းကြည့်လိုက်မိတော့သည်။ ဤကိစ္စကြီးက သမီးနဲ့ ဘာဖြစ်လို့ ရုတ်တရက် ပတ်သက်သွားရတာလဲ...
နင်ယွန်ယဲ့ သူမအား စိတ်အေးအေးထားရန် မျက်ရိပ်ပြလိုက်ပြီးနောက်... ယွီဝူယီကို ကြည့်ကာ ဆက်လက်ဆိုလိုက်သည် -
“ငါ မြင်တာတော့... ဆိုင်ရှင်နဲ့ ငါ့ရဲ့ သမီးလေးကြားက ဆက်ဆံရေးက တော်တော်လေး ကောင်းမွန်ပုံရပါတယ်။ အကယ်၍ ဤအချက်ကို အခြေခံပြီးတော့ ရတနာကိုးပါးဂိုဏ်းအဖွဲ့အတွက် အထူးအခွင့်အရေး စည်းကမ်းချက်အချို့ကို ပြောင်းလဲပေးလို့ ရနိုင်မလား"
စိတ်ဝင်စားစရာပဲ...
ဤအဖြေက ယွီဝူယီကို တကယ့်ကို အံ့အားသင့်သွားစေခဲ့ရပြီး.. သူ နင်ယွန်ယဲ့ကို အထင်ကြီးလေးစားလှသော မျက်လုံးများဖြင့် အသစ်တစ်ဖန် ပြန်လည်စိုက်ကြည့်လိုက်မိတော့သည်။
၎င်းကား သုန့်လော်တိုက်ကြီး၏ နံပါတ်တစ် ပံ့ပိုးမှုစနစ်ဝင် အဖွဲ့အစည်းကြီးတစ်ခု၏ ဂိုဏ်းချုပ်ပီသပေသည်.. ဤမျှလောက်တိုတောင်းလှသော အချိန်အတွင်းမှာတင် ဤကဲ့သို့သော အပြန်အလှန် အကျိုးရှိစေမည့် စေ့စပ်ညှိနှိုင်းမှုနည်းလမ်းကို တွေးတောနိုင်ခဲ့သည်ကိုး။
သူ၏ လက်ကို တစ်ချက်ဝေ့ယမ်းလိုက်သည်နှင့်အတူ ယွီဝူယီ၏ လက်ထဲတွင် အပြာရောင် ၀န်ဆောင်ခစာချုပ် ချက်ချင်း ပေါ်ထွက်လာခဲ့သည်။
“ငါ ပြောရမယ်ဆိုရင်တော့... ဂိုဏ်းချုပ်နင်က တကယ့်ကို ‘ဉာဏ်ပညာကြီးမားပြီး အမျှော်အမြင်ရှိတဲ့’ ပုဂ္ဂိုလ်ကြီးတစ်ဦးပါပဲ။
အခြေအနေက ဒီလိုဆိုရင်တော့... ငါ စည်းကမ်းချက်အချို့ကို သေချာပေါက် ပြောင်းလဲပြင်ဆင်ပေးနိုင်ပါတယ်"
“ပထမအချက် - ရတနာကိုးပါးဂိုဏ်းအဖွဲ့ကြီးတစ်ခုလုံးဟာ ‘ဝူယီ အထွေထွေလုပ်ငန်း၀န်ဆောင်မှု ဆိုင် ရဲ့ လက်အောက်ခံအဖွဲ့အစည်းတစ်ခု ဖြစ်လာရမယ်ဆိုတဲ့ အချက်ကတော့ ပြောင်းလဲမှာ မဟုတ်ပါဘူး"
“ဒုတိယအချက် - ‘ဝူယီ အထွေထွေလုပ်ငန်း၀န်ဆောင်မှု ဆိုင် မှာ ရတနာကိုးပါးဂိုဏ်းအဖွဲ့က ချမှတ်လိုက်တဲ့ မည်သည့်ဆုံးဖြတ်ချက်ကိုမဆို ပယ်ဖျက်ပစ်နိုင်ခွင့် ရှိရပါမယ်... ဆိုတဲ့အချက်ကိုတော့ - ‘ဝူယီ အထွေထွေလုပ်ငန်း၀န်ဆောင်မှု ဆိုင် မှာ ရတနာကိုးပါးဂိုဏ်းအဖွဲ့က ချမှတ်လိုက်တဲ့ ‘ကြီးမားလွန်းလှတဲ့ အဓိက ဆုံးဖြတ်ချက်ကြီးတွေ’ ကိုသာ ပယ်ဖျက်ပစ်နိုင်ခွင့် ရှိရပါမယ်... လို့ ပြောင်းလဲပြင်ဆင်ပေးပါ့မယ်"
“တတိယအချက် - ‘ဝူယီ အထွေထွေလုပ်ငန်း၀န်ဆောင်မှု ဆိုင် မှာ ရတနာကိုးပါးဂိုဏ်းအဖွဲ့ကြီးတစ်ခုလုံးအပေါ် ၄၀ ရာခိုင်နှုန်းသော ဆုံးဖြတ်ပိုင်ခွင့်အာဏာ ရှိရပါလိမ့်မယ်... ဆိုတဲ့အချက်ကိုတော့ - ‘ဝူယီ အထွေထွေလုပ်ငန်း၀န်ဆောင်မှု ဆိုင် အနေနဲ့ ရတနာကိုးပါးဂိုဏ်းအဖွဲ့ရဲ့ မည်သည့်ကိစ္စရပ်တွေအပေါ်မှာမျှ ဆုံးဖြတ်ချက် ချမှတ်မှာမဟုတ်ပါဘူး.. တစ်နည်းအားဖြင့် ပြောရမယ်ဆိုရင်တော့ ရတနာကိုးပါးဂိုဏ်းအဖွဲ့ရဲ့ နေ့စဉ်ကိစ္စရပ်တွေအပေါ်မှာ ငါတို့ဘက်ကနေ မည်သည့်စွက်ဖက်မှုမျိုးမျှ တက်ကြွစွာ လုပ်ဆောင်မှာ မဟုတ်ပါဘူး... လို့ ပြောင်းလဲပြင်ဆင်ပေးပါ့မယ်"
“ကဲ... ဤအချက်တွေနဲ့ပတ်သက်ပြီးတော့ ဂိုဏ်းချုပ်နင်း အနေနဲ့ ဘယ်လိုထင်ပါသလဲ"
ဘေးပတ်ပန်းကျင်မှနေ၍ တိတ်ဆိတ်စွာ နားထောင်နေခဲ့သော ရန်ကျန့်ဝေတစ်ယောက် ကြောင်အမ်းအမ်း ဖြစ်သွားခဲ့ရပြီး ဘာတွေ ဖြစ်ပျက်ကုန်မှန်း လုံးဝ နားမလည်တော့ပါချေ။
စောစောကတင် အလွန်အမင်း တင်းခံနေခဲ့သော ဆိုင်ရှင်ငယ်လေးသည်... ရှောင်ထျန်း၏ အမည်ကို ပြောလိုက်ရုံမျှဖြင့် ဘာဖြစ်လို့ ရုတ်တရက်ကြီး ဤမျှလောက်အထိ လိုက်လျောပေးလိုက်ရတာလဲ။
နင်ထျန်းလေးသည်လည်း သူမ၏ ဖခင်ဖြစ်သူ၏ စကားလုံးများကြောင့် အံ့ဩနေရဆဲဖြစ်ရာမှ ယွီဝူယီ၏ နောက်ဆက်တွဲ စကားလုံးများကြောင့် ပိုမို၍ ကြောင်အမ်းသွားခဲ့ရပြန်သည်။
ဟင်... သမီးရဲ့ အမည်ကို ပြောလိုက်တိုင်းမှာ သူတို့က ဘာဖြစ်လို့ ဤကဲ့သို့သော အမူအရာမျိုးတွေ ဖြစ်ကုန်ကြရတာလဲ။
သူတို့၏ ဦးခေါင်းထက်တွင် ကြီးမားလှသော ‘Loading’ သင်္ကေတကြီးတစ်ခု ပေါ်ထွက်လာခဲ့သည့်အလား သူတို့ သုံးယောက်စလုံး လုံးဝ တွေဝေဝေ ဖြစ်ပေါ်ကုန်ကြတော့သည်။
နင်ယွန်ယဲ့ တစ်ဦးတည်းသာလျှင် သိနားလည်လှသော အပြုံးတစ်ခုကို ထုတ်ဖော်လိုက်မိသည်။
ဤနည်းလမ်းက နှစ်ဦးနှစ်ဖက်စလုံးအတွက် တကယ့်ကို အကျိုးရှိစေမည့် နည်းလမ်းကောင်းတစ်ခု ဖြစ်ချေသည်။
သူသည် ယွီဝူယီ၏ စိတ်ထဲတွင် ရှိနေသော အတွေးက မိမိနှင့် ထပ်တူညီနေလိမ့်မည်ဟု လောင်းကြေးထပ်ခဲ့ခြင်းဖြစ်ပြီး.. အခုကြည့်ရတာ သူ လောင်းကြေးထပ်တာ မှန်ကန်သွားခဲ့ချေပြီ။
“ဆိုင်ရှင်ဘက်ကနေ ဤမျှလောက်အထိ ကြီးမားလှတဲ့ လိုက်လျောမှုတွေကို ပြုလုပ်ပေးခဲ့ပြီပဲ။ ငါတို့ဘက်ကနေ ဆက်ပြီး တောင်းဆိုနေဦးမယ်ဆိုရင်တော့... တကယ့်ကို လောဘကြီးရာ ရောက်သွားပါလိမ့်မယ်"
ယွီဝူယီ ပြုံးလိုက်မိရင်း ဘာမှထပ်မံပြောဆိုခြင်းမပြုတော့ဘဲ ၀န်ဆောင်ခစာချုပ်ကို သူ၏ ရှေ့သို့ ကမ်းပေးလိုက်သည်။
“အခြေအနေက ဒီလိုဆိုရင်တော့... ဂိုဏ်းချုပ်နင်းအနေနဲ့ ဤစာချုပ်ပေါ်မှာ လက်မှတ်ရေးထိုးနိုင်ပါပြီ"
ရန်ကျန့်ဝေ ထိုအကြောင်းကို သူ့အား ကြိုတင်ပြောပြထားခဲ့ဖူးတာမို့... နင်ယွန်ယဲ့သည် မိမိ၏ လက်ဗွေရာကို စာချုပ်ထက်တွင် ဖိနှိပ်လိုက်ရင်း ၀န်ဆောင်ခတာဝန်ကို တရားဝင် အတည်ပြုလိုက်တော့သည်။
နင်ယွန်ယဲ့၏ လက်ဗွေရာ နှိပ်ပြီးသွားခဲ့ပြီးနောက် ယွီဝူယီသည် ၀န်ဆောင်ခစာချုပ်ကို ပြန်လည်သိမ်းဆည်းလိုက်ရင်း ဆိုလိုက်သည် -
“ဒါဆိုရင်... ဂိုဏ်းချုပ်နင်းအနေနဲ့ နောက်ထပ် နှစ်ရက် ကြာပြီးတဲ့အခါကျမှ ဤနေရာကို ပြန်လာခဲ့ပါတော့ အဲဒီအချိန်ကျရင် ငါ ‘ချီလော့ တူးလစ်ပန်း’ ကို မင်းတို့ရဲ့ လက်ထဲကို အရောက်ယူဆောင်လာပေးပါ့မယ်"
“ဒါဆိုရင်တော့... ဆိုင်ရှင်ကိုပဲ ဒုက္ခပေးရတော့မှာပဲ"
ပြောပြီးသည်နှင့် နင်ယွန်ယဲ့သည် ယွီဝူယီကို အရိုအသေပေးလိုက်ပြီးနောက် ကျန်ရှိနေသေးသော သူတို့နှစ်ဦးကို ခေါ်ဆောင်ကာ ဆိုင်ပြင်သို့ ပြန်လည်ထွက်ခွာသွားခဲ့တော့သည်။
နင်ထျန်းလေးသည် ဆိုင်ပြင်သို့ ထွက်ခွာသွားသည့်တိုင်အောင် သူမ အကုန်စားပစ်လိုက်သဖြင့် အပြစ်အနာအဆာမရှိ ပြောင်စင်နေသော ပန်းကန်ပြားအလွတ်လေးကို နှမြောတသစွာဖြင့် လှည့်ကြည့်လှည့်ကြည့် လုပ်နေခဲ့သေးသည်။
သူတို့ သုံးယောက်စလုံး လမ်းမထက်သို့ ရောက်ရှိလာခဲ့ကြသည့် အခါတွင်မူ...
ရန်ကျန့်ဝေက အကြံပြုလာခဲ့သည် -
“ယွန်ယဲ့... အချိန်က နှစ်ရက်ပဲ ကြာမှာဆိုတော့.. ငါတို့ ဤမြို့တော်ထဲမှာပဲ ခေတ္တမျှ တည်းခိုပြီး စောင့်ဆိုင်းကြမလား"
နင်ယွန်ယဲ့က ခေါင်းညိတ်လိုက်သည်.. နှစ်ရက်တာ အချိန်ကာလကို စောင့်ဆိုင်းရန်အတွက် သူတို့တွင် အချိန်အလုံအလောက် ရှိကြပေသည်။
ထိုအခိုက်အတန့်၌ပင် နင်ထျန်းလေးက စူးစမ်းလိုစိတ်ဖြင့် ရုတ်တရက် မေးမြန်းလိုက်မိတော့သည် -
“ဖေဖေ... ဖေဖေက သမီးရဲ့ အမည်ကို ပြောလိုက်ရုံနဲ့ အဲဒီဆိုင်ရှင်က ဘာဖြစ်လို့ စည်းကမ်းချက်တွေကို ရုတ်တရက်ကြီး ပြောင်းလဲပေးလိုက်ရတာလဲဟင်"
ရန်ကျန့်ဝေသည်လည်း စူးစမ်းလိုလှသော မျက်လုံးများဖြင့် ကြည့်လာခဲ့သည်။
နင်ယွန်ယဲ့ သူတို့နှစ်ဦးကို ဖုံးကွယ်ထားရန် စိတ်ကူးမရှိတာမို့ ပြုံးရင်းဖြင့်ပင် ရှင်းပြပေးလိုက်သည် -
“အကြောင်းရင်းက... တကယ့်ကို ရိုးရှင်းပါတယ် ရှောင်ထျန်းလေးရဲ့"
“ဆိုင်ရှင်က စည်းကမ်းချက်တွေကို ပြောင်းလဲပေးလိုက်ရခြင်းက သမီးနဲ့ ဆက်ဆံရေးကောင်းမွန်တာအပြင်... အခြားသော ပိုမိုပြီး အရေးကြီးလှတဲ့ အကြောင်းရင်းတစ်ခု ရှိနေသေးလို့ပါ"
“အဲဒါကတော့... သမီးရဲ့ ‘မည်သူမည်ဝါဖြစ်ကြောင်း သတ်မှတ်ချက်’ ကြောင့်ပဲ"
နင်ထျန်း ခေတ္တမျှ တွေးတောလိုက်မိရင်း...
“သမီးရဲ့ မည်သူမည်ဝါဖြစ်ကြောင်း သတ်မှတ်ချက် ဟုတ်လား... ရတနာကိုးပါးဂိုဏ်းအဖွဲ့ရဲ့ ဂိုဏ်းချုပ်ငယ်လေး ဖြစ်နေလို့လား"
နင်ယွန်ယဲ့ စိတ်ကျေနပ်စွာဖြင့် ခေါင်းညိတ်လိုက်သည် -
“သမီးရဲ့ လက်ရှိရာထူးက ဂိုဏ်းချုပ်ငယ်လေး ဖြစ်နေတာ အမှန်ပဲ.. ဒါပေမဲ့ အကယ်၍ သမီးရဲ့ ဝိညာဉ်က ‘ရတနာကိုးပါးဂိုဏ်းမျှော်စင်’ အဖြစ်ကို တကယ့်ကို အဆင့်မြင့်တက်သွားခဲ့မယ်ဆိုရင်တော့... သမီးဟာ အနာဂတ်ရဲ့ ဂိုဏ်းချုပ်ကြီး ဖြစ်လာဖို့ ရာနှုန်းပြည့် သေချာသွားခဲ့ပြီ"
“ဤကိစ္စရပ် ပြီးဆုံးသွားခဲ့ပြီးနောက်မှာ ရတနာကိုးပါးဂိုဏ်းအဖွဲ့ကြီးတစ်ခုလုံးက ‘ဝူယီ အထွေထွေလုပ်ငန်း၀န်ဆောင်မှု ဆိုင် ရဲ့ လက်အောက်ခံ ဖြစ်လာတော့မှာဆိုတော့... အဖွဲ့အစည်းနှစ်ခုကြားက ဆက်ဆံရေးက ပိုမိုပြီးတော့ နီးကပ်သွားရလိမ့်မယ်"
“အဲဒီအချိန်ကျရင်... ဆိုင်ရှင်နဲ့ ဆက်ဆံရေး အကောင်းဆုံးဖြစ်တဲ့ သမီးကပဲ.. သူနဲ့ မကြာခဏဆိုသလို ထိတွေ့ဆက်ဆံမှုတွေကို ပြုလုပ်ရလိမ့်မယ်"
“သူက သမီးရဲ့ အသက်ကို ကယ်တင်ပေးခဲ့ဖူးတဲ့ ကယ်တင်ရှင်ဖြစ်နေတဲ့ အချက်ကို အခြေခံပြီးတော့... သူ ချမှတ်လိုက်တဲ့ ဆုံးဖြတ်ချက် တော်တော်များများအပေါ်မှာ သမီးဘက်ကနေ ယုံကြည်မှုတွေ ရှိနေလိမ့်မယ်"
“အထူးသဖြင့်... အဲဒီဆုံးဖြတ်ချက်က ငါတို့ အဖွဲ့အစည်းအတွက်ပါ အကျိုးရှိစေမယ့် အခါမျိုးကျရင်ပေါ့"
“သမီးကိုယ်တိုင်ကလည်း အနာဂတ်ရဲ့ ဂိုဏ်းချုပ်ကြီး ဖြစ်လာမှာဆိုတော့... ဆိုင်ရှင်ဘက်ကနေ ၄၀ ရာခိုင်နှုန်းသော ဆုံးဖြတ်ပိုင်ခွင့်အာဏာကို ကိုင်ဆောင်ထားတာထက်.. သမီးကိုယ်တိုင် ချမှတ်လိုက်တဲ့ ဂိုဏ်းချုပ်တစ်ဦးရဲ့ ဆုံးဖြတ်ချက်က... လူအများအတွက် ပိုမိုပြီးတော့ ဆွဲဆောင်မှုရှိစေသလို.. ပိုမိုပြီးတော့လည်း လေးနက်မှု ရှိစေလိမ့်မယ်"
“ဒါကြောင့်မို့လို့... ဤအခြေအနေက သူ့အတွက်တော့ ဆုံးရှုံးမှုမရှိဘဲ အကျိုးကျေးဇူးတွေ ပိုမိုများပြားလှပါတယ်"
နင်ယွန်ယဲ့ စကားကို ခေတ္တမျှ ဖြတ်လိုက်ပြီးနောက်မှ ဆက်လက်ဆိုလိုက်သည် -
“ငါတို့ ရတနာကိုးပါးဂိုဏ်းအဖွဲ့ရဲ့ ဘက်ကနေ ပြန်ကြည့်ကြရအောင်"
“သမီးက ငါ့ရဲ့ သမီးဖြစ်တာမို့... သမီးအနေနဲ့ အဖွဲ့အစည်းကို ထိခိုက်ပျက်စီးစေမယ့် မည်သည့်ဆုံးဖြတ်ချက်မျိုးကိုမျှ ချမှတ်လိမ့်မယ်မဟုတ်ကြောင်း ငါ အသေအချာ ယုံကြည်တယ်"
“ဆိုင်ရှင်ရဲ့ မူလစည်းကမ်းချက်ထဲက ၄၀ ရာခိုင်နှုန်းသော ဆုံးဖြတ်ပိုင်ခွင့်အာဏာဆိုတာ... အနာဂတ်မှာ ဘယ်လိုမျိုး ဖြစ်ပေါ်လာမလဲဆိုတာ မသေချာလှဘူး.. ငါတို့ အဖွဲ့အစည်းအပေါ် ဘယ်လိုဆုံးဖြတ်ချက်မျိုး သက်ရောက်လာမလဲဆိုတာ မသိနိုင်သလို.. ၎င်းက ကောင်းကျိုးဖြစ်မလား.. ဆိုးကျိုးဖြစ်မလားဆိုတာကိုလည်း ဘယ်သူမှ ကြိုတင်မသိနိုင်ကြပါဘူး"
“ဒါပေမဲ့... အခုတော့ ထို ၄၀ ရာခိုင်နှုန်းသော ဆုံးဖြတ်ပိုင်ခွင့်အာဏာက သမီးရဲ့ လက်ထဲကို ထိရောက်စွာ ရောက်ရှိသွားခဲ့ပြီဖြစ်တာမို့... အနည်းဆုံးတော့ ငါတို့အဖွဲ့အစည်းက ဆိုးဝါးတဲ့ လမ်းကြောင်းဆီကို ရောက်ရှိသွားတော့မှာ မဟုတ်ပါဘူး"
“ဤနည်းလမ်းအားဖြင့်... နှစ်ဦးနှစ်ဖက်စလုံး အပြန်အလှန် အကျိုးရှိစေမည့် အကောင်းဆုံးသော နောက်ဆုံးရလဒ်တစ်ခုကို စွမ်းဆောင်နိုင်ခဲ့တာ ဖြစ်ပါတယ်"
၎င်းအပြင်... ထုတ်ဖော်ပြောဆိုရန် မသင့်တော်လှသော အခြားသော အကြောင်းရင်းများစွာ ရှိနေသေးတာမို့ သူ သမီးဖြစ်သူအား အရာအားလုံးကို တစ်ပြိုင်နက်တည်း အကုန်လုံး ပြောပြ၍ မရနိုင်ပါချေ။
“အခုလောလောဆယ် သမီးသိထားဖို့ လိုအပ်တာကတော့... ဆိုင်ရှင်နဲ့ ငါနဲ့က ဤအချက်တွေကို အပြန်အလှန် တွေးတောမိခဲ့ကြလို့သာ ဆွေးနွေးပွဲက ဤမျှလောက်အထိ ချောချောမွေ့မွေ့နဲ့ ပြီးဆုံးသွားခဲ့ရတာ ဖြစ်ပါတယ်"
အသက်တစ်ဆယ်အရွယ်သာ ရှိသေးသော နင်ထျန်းလေးတွင်မူ ဤမျှလောက်အထိ နက်ရှိုင်းရှုပ်ထွေးလှသော နိုင်ငံရေးဦးနှောက်မျိုး မရှိတာမို့... သူမသည် သူမ၏ ဖခင်ဖြစ်သူ၏ ရှုပ်ထွေးလှသော ရှင်းပြချက်များကြောင့် လုံးဝကို ကြောင်အမ်းအမ်း ဖြစ်ပေါ်လို့နေခဲ့ရရှာတော့သည်။
နင်ယွန်ယဲ့ သူမ၏ အမူအရာကို ကြည့်ကာ ပြုံးလိုက်မိရင်း ဘာမှထပ်မံပြောဆိုခြင်း မပြုတော့ပါချေ။