အခန်း (၂၃) - မမျှော်လင့်ဘဲ ရောက်ရှိလာသော ဧည့်သည်တော်

​ထိုအဖြစ်အပျက်ပြီးနောက် နောက်ထပ် တစ်လတာ အချိန်ကာလ ကုန်ဆုံးသွားခဲ့ပြန်သည်။

​ယွီဝူယီ ထင်မှတ်ထားခဲ့သည့်အတိုင်းပင် ဤတစ်လအတွင်း စနစ်က ‘၀န်ဆောင်ခရမည့်အလုပ်’ ဟု သတ်မှတ်နိုင်လောက်မည့် မည်သည့်တာဝန်မျိုးကိုမျှ ထုတ်ဖော်မပေးခဲ့ပါချေ။ သို့သော်လည်း အရာအားလုံးက ဆိုးဝါးနေသည်တော့ မဟုတ်ပါ။

​အနည်းဆုံးတော့ လတ်တလောတွင် မည်သည့်အန္တရာယ်မှ မရှိတာမို့ ယွီဝူယီအနေဖြင့် ဘေးကင်းရေးကို စိုးရိမ်စရာမလိုဘဲ လွတ်လပ်စွာ သွားလာလှုပ်ရှားနိုင်သည်။ 

၎င်းအပြင် သူ၏ ‘ထွေထွေလုပ်ငန်း၀န်ဆောင်မှုဆိုင်’  တွင် ရောင်းချသော ထူးခြားဆန်းသစ်သည့် အချိုပွဲများနှင့် ဖျော်ရည်များကြောင့် ဆိုင်သို့ လာရောက်အနားယူအပန်းဖြေကြသူများ တစ်နေ့ထက်တစ်နေ့ ပိုမို၍ များပြားလာခဲ့သည်။

​‘ဝူယီ အထွေထွေလုပ်ငန်း၀န်ဆောင်မှု ဆိုင်၏ တည်ရှိမှုက ကျူယွဲမြို့တော်  တစ်ခုလုံးတွင် တဖြည်းဖြည်းချင်း နာမည်ကျော်ကြားလို့လာခဲ့ပြီ ဖြစ်သည်။

​သို့သော်လည်း ယွီဝူယီ၏ စိတ်ထဲတွင်မူ ကြီးမားလှသော ဖိအားတစ်ခုက အမြဲတမ်း ကြီးစိုးလို့နေခဲ့သည်။ အကြောင်းမှာ... ထန်ဆန်း သုန့်လော်တိုက် ဆီသို့ ဆင်းသက်လာရန်အတွက် နောက်ထပ် (၁၅) လသာ အချိန်ကျန်ရှိတော့သောကြောင့် ဖြစ်သည်။

​ကြယ်တာရာတောအုပ်ကြီးမှ ပြန်လာခဲ့စဉ်က စနစ်ပေးအပ်ခဲ့သော သရုပ်ဆောင်မှုအတွေ့အကြုံ ၂၀ ရာခိုင်နှုန်းနှင့် ၀န်ဆောင်ခဒင်္ဂါးပြား ၂၀ ပြားမှလွဲ၍... သူသည် ၀န်ဆောင်ခတာဝန်ကို လှုံ့ဆော်ပေးနိုင်မည့် မည်သည့်အလုပ်မျိုးနှင့်မျှ ထပ်မံ၍ မကြုံတွေ့ရတော့ပါချေ။

​“ငါက သာမန်ကိစ္စသေးသေးလေးတွေကို လက်ခံမှာမဟုတ်ဘူး” ဆိုသည့် စည်းကမ်းချက်မှာ သူကိုယ်တိုင် သတ်မှတ်ထားခဲ့ခြင်း ဖြစ်သော်လည်း... စနစ်၏ ၀န်ဆောင်ခသတ်မှတ်ချက်ကလည်း အလွန်ပင် တင်းကျပ်လှပေသည်။

​【စနစ်၏ ၀န်ဆောင်ခသတ်မှတ်ချက် - ဤတာဝန်သည် စိန်ခေါ်မှုအပြည့် ရှိရမည်.. သို့မဟုတ် အလုပ်အပ်နှံသူက ထူးခြားသော မည်သူမည်ဝါဖြစ်ကြောင်း ရှိရမည်.. သို့မဟုတ် ပစ်မှတ်က ထူးခြားထင်ရှားသော ပုဂ္ဂိုလ်တစ်ဦး ဖြစ်ရမည်။】

​အထက်ပါ အခြေအနေများထဲမှ အနည်းဆုံး အချက်တစ်ချက်နှင့် ကိုက်ညီမှသာ စနစ်က ၎င်းကို ‘၀န်ဆောင်ခရမည့်အလုပ်’ အဖြစ် သတ်မှတ်ပြီး ဆုလာဘ်များ ပေးအပ်မည် ဖြစ်သည်။ 

အကယ်၍ သူသာ ဤအတိုင်း ဆက်လက်လည်ပတ်နေမည်ဆိုပါက... သူ၏ ‘ဝူယီ အထွေထွေလုပ်ငန်း၀န်ဆောင်မှု ဆိုင် ကြီးက မကြာမီအချိန်အတွင်း ‘ဝူယီ အချိုပွဲနှင့် ဘားဆိုင်’ အဖြစ် ပြောင်းလဲသွားရတော့မည် ဖြစ်သည်။

​ဘယ်အချိန်မှ အရေးကြီးတဲ့ ပုဂ္ဂိုလ်ကြီးတစ်ယောက်ယောက် ရောက်လာပြီး ငါ့ကို ၀န်ဆောင်ခရမဲ့အလုပ် လာအပ်နှံမှာပါလိမ့်…

ဖြစ်နိုင်ရင်တော့ ဆမ်  ၏ သရုပ်ဆောင်မှုရာခိုင်နှုန်းကို ၉၀ ရာခိုင်နှုန်းအထိ ချက်ချင်း ခုန်တက်သွားစေနိုင်မယ့် အဖွဲ့အစည်းဆိုင်ရာ တာဝန် မျိုး ဖြစ်လာရင် တကယ့်ကို အကောင်းဆုံးပဲ။

​အေးချမ်းလှသော နောက်ထပ်နေ့တစ်နေ့ ကုန်ဆုံးသွားခဲ့ပြန်ပြီ။ ညဉ့်နက်လာတာမို့ ယွီဝူယီတစ်ယောက် ဆိုင်ပိတ်ရန် ပြင်ဆင်နေစဉ်မှာပင်... လူတစ်ယောက် ဆိုင်အတွင်းသို့ အရှိန်အဟုန်ဖြင့် လှမ်းဝင်လာခဲ့သည်။

​“ဆိုင်ရှင်... ငါ့ကို ပြင်းထန်တဲ့ အရက်တစ်ခွက်လောက် ချပေးစမ်းပါ"

​ယွီဝူယီက ခေါင်းမဖော်ဘဲ ပုံမှန်အတိုင်းပင် ပြန်လည်ဖြေကြားလိုက်သည် -

​“တောင်းပန်ပါတယ် အစ်ကိုကြီး... ဆိုင်ပိတ်ချိန် ရောက်သွားပါပြီ…အကယ်၍ အရက်သောက်ချင်တယ်ဆိုရင်တော့ မနက်ဖြန်မှပဲ ပြန်လာခဲ့ပါတော့"

​ဤကဲ့သို့သော အခြေအနေမျိုးက သူ့အတွက် ရိုးအီလို့နေခဲ့ချေပြီ.. နေ့တိုင်းလိုလို ကြုံတွေ့နေရခြင်း ဖြစ်သည်။ သေချာရှင်းပြလိုက်လျှင် တစ်ဖက်လူက ပြန်လည်ထွက်ခွာသွားတတ်စမြဲပင်။

​သို့သော် သူ အံ့ဩသွားရသည်မှာ... ထိုဧည့်သည်သည် ဆိုင်ပြင်သို့ ပြန်မထွက်သွားဘဲ လေးလံလှသော ခြေလှမ်းများဖြင့် ဘားကောင်တာတွင် ဝင်ထိုင်လိုက်ခြင်းပင်။

​“ငါ ဒီနေရာကို လာတာ... အရက်သောက်ဖို့အတွက် မဟုတ်ဘူး"

​ထိုအသံက...

​ယွီဝူယီ ခေါင်းမော့ကြည့်လိုက်သည့်အခါ ဆံပင်ညိုရောင်နှင့် အသက်လတ်ပိုင်း အမျိုးသားတစ်ဦးကို မြင်တွေ့လိုက်ရသည်။ ၎င်းက... သူ ဖြစ်နေတာလား။

​“ရန်ကျန့်ဝေ .. မင်း ငါ့ဆိုင်ကို ဘာကိစ္စများ ရှိလို့ ရောက်လာရတာလဲ"

​“အို... မင်းက ငါ့ကို တကယ်ပဲ သိနေတာလား"

​ရန်ကျန့်ဝေ အနည်းငယ် အံ့ဩသွားခဲ့ရသည်။ သူသည် ဤဆိုင်၏အကြောင်းကို နင်ထျန်း ဆီကနေတစ်ဆင့်သာ ကြားသိခဲ့ရခြင်းဖြစ်ပြီး ဤနေရာသို့ တစ်ကြိမ်မျှ မလာဖူးပါချေ။ 

သို့သော်လည်း ဆိုင်ရှင်ဖြစ်သူက သူ့ကို ကြည့်ရုံမျှဖြင့် ချက်ချင်း မှတ်မိနေခဲ့သည်။ အကယ်၍ ဤဆိုင်က သတင်းအချက်အလက်အပိုင်းတွင် အလွန်အမင်း ထူးချွန်ပြောင်မြောက်ခြင်းမရှိပါက... တစ်ဖက်လူက သူ့ကို လူကိုယ်တိုင် မြင်တွေ့ဖူးခြင်းကြောင့်သာ ဖြစ်ရပေမည်။

​“မင်းက... အဲဒီတုန်းက ဝိညာဉ်ကရိယာနဲ့ လူလား"

​“စီနီယာက တကယ့်ကို အမြင်စွဲမြဲတာပဲ"

​ယွီဝူယီ ဖုံးကွယ်ရန် အစီအစဉ်မရှိသလို.. ဖုံးကွယ်နေစရာလည်း အကြောင်းမရှိပါချေ။ ‘ရတနာကိုးပါး ဂိုဏ်း ’  က သူ့ကို စုံစမ်းစစ်ဆေးရန် လူလွှတ်လိမ့်မည်ဆိုတာကို သူ ကြိုတင်သိရှိထားခဲ့ပြီးသား ဖြစ်သည်.. 

အကြောင်းမှာ သူကိုယ်တိုင်က နင်ထျန်းအား ထွေထွေလုပ်ငန်း၀န်ဆောင်မှုဆိုင်ကို မိတ်ဆက်ပေးရန် ပြောကြားခဲ့ခြင်းကြောင့် မဟုတ်ပါလား။ သူ ထင်မထားခဲ့မိသည်မှာ ၎င်းက နှစ်လတိတိ ကြာမြင့်သွားခဲ့ခြင်းပင်။

​“ရှောင်ထျန်းက မင်းရဲ့ အခြေအနေတွေကို ငါ့ကို အကုန်ပြောပြထားပြီးသားပါ။ သူမရဲ့ ကိုယ်စား ဘော့စ်ယွီကို ငါ လှိုက်လှိုက်လှဲလှဲ ကျေးဇူးတင်ပါတယ်" ရန်ကျန့်ဝေက လက်နှစ်ဖက်ကို ဆုပ်ကိုင်ရင်း သူ့ကို အရိုအသေပေးလိုက်သည်။

​“စီနီယာရန်... အဲလိုလုပ်ဖို့မလိုပါဘူး ငါနဲ့ သူမကြားက ဆက်ဆံရေးက အပြန်အလှန် အကျိုးစီးပွားအပေါ်မှာပဲ အခြေခံထားတာပါ.. မင်းထင်သလိုမျိုး မြင့်မြတ်လွန်းမနေပါဘူး"

​သို့သော် ရန်ကျန့်ဝေက ခေါင်းယမ်းလိုက်ရင်း ဆိုသည် -

​“လူတစ်ယောက်ရဲ့ မြင့်မြတ်မှုကို အတွေးနဲ့ မဆုံးဖြတ်ဘဲ လုပ်ရပ်နဲ့ပဲ ဆုံးဖြတ်ရတာပါ။ မင်း ရှောင်ထျန်းကို ကာကွယ်ပေးခဲ့တာက ငြင်းပယ်လို့မရတဲ့ အမှန်တရားဖြစ်တာမို့ မင်းအနေနဲ့ ဤကျေးဇူးတင်စကားကို ရရှိပိုင်ခွင့် ရှိပါတယ်"

​ဤကဲ့သို့သော ဖြောင့်မတ်တည်ကြည်လှသည့် စရိုက်လက္ခဏာက ယွီဝူယီကို အတော်လေး အထင်ကြီးသွားစေခဲ့သည်.. ၎င်းက သူတို့ ပထမဆုံးအကြိမ် ဆုံတွေ့စဉ်က လက်နက်ချင်း ဆွဲထုတ်ခဲ့ကြသည့် ရန်လိုသောအခြေအနေနှင့် လုံးဝ ကွာခြားလှပေသည်။ 

တစ်ဖက်လူက ဤမျှလောက်အထိ ယဉ်ကျေးပျူငှာနေမှတော့ သူကလည်း သဘာဝကျကျပင် ပြန်လည်ဆက်ဆံရပေမည်။

​“ဒါဆိုရင်လည်း... ငါကပဲ ဒီကျေးဇူးတင်စကားကို လက်ခံလိုက်ပါ့မယ်"

​“စီနီယာ... ငါ့ကို ဘော့စ်ယွီလို့ ခေါ်နေစရာမလိုပါဘူး ငါက အဲလောက်အထိ အသက်ကြီးနေလို့လား ဆိုင်ရှင်  လို့ပဲ ခေါ်ပါ"

​ရန်ကျန့်ဝေသည် မိမိ၏ ရင်ဘတ်လောက်အထိသာ မြင့်မားပြီး.. ဖြူဖွေးလှသော ဆံပင်များနှင့် ကွဲပြားခြားနားသော မျက်ဝန်းအစုံ ကို ပိုင်ဆိုင်ထားသည့် မိမိရှေ့ရှိ လူငယ်လေးကို စိုက်ကြည့်လိုက်သည်။ 

သူ၏ နုပျိုလှသော မျက်နှာသွင်ပြင်က ကလေးတစ်ယောက်ဟု ခေါ်ဆိုရန်ပင် ထိုက်တန်လှတာမို့ ‘ဘော့စ်’ ဟူသော စကားလုံးက တကယ့်ကို အဆင်မပြေလှပါချေ။

​“ဒါနဲ့... စီနီယာရန် ယနေ့ည ဤနေရာကို ရောက်လာရတဲ့ အဓိကအကြောင်းရင်းက ဘာများလဲ"

​သူမအား ကယ်တင်ခဲ့သည့်အတွက် ကျေးဇူးတင်ရန်သက်သက် လာရောက်ခြင်းဖြစ်နိုင်ချေကို ငြင်းပယ်၍မရသော်လည်း.. ယွီဝူယီ၏ အာရုံခံစားမှုကမူ ၎င်းက ဤမျှလောက်နှင့်တင် မရိုးရှင်းနိုင်ကြောင်း ပြောပြနေသည်။

 ရန်ကျန့်ဝေသည် သူ လက်ရှိ အလိုအပ်ဆုံးဖြစ်နေသော အရာကို ယူဆောင်လာပေးလိမ့်မည်ဟု သူ ပြင်းထန်စွာ အာရုံခံမိနေသည်။

​“ငါ ဒီနေ့ ဒီနေရာကို လာရခြင်းရဲ့ ပထမဆုံးအချက်က ရှောင်ထျန်းရဲ့ အသက်ကို ကယ်တင်ပေးခဲ့တဲ့အတွက် ကျေးဇူးလာတင်တာပါ"

​“ဒုတိယအချက်အနေနဲ့ကတော့... တာဝန်တစ်ခု အပ်နှံဖို့ အတွက် လာခဲ့တာ ဖြစ်ပါတယ်"

​“ရှောင်ထျန်း ပြောတာတော့... ဆိုင်ရှင်က ဘယ်လိုကိစ္စမျိုးကိုမဆို အောင်မြင်အောင် စွမ်းဆောင်ပေးနိုင်တယ်ဆို ဟုတ်လား"

​ယွီဝူယီက ပြုံးရင်း ခေါင်းယမ်းလိုက်သည် -

​“အရာအားလုံးတော့ မဟုတ်ပါဘူး... ဒါပေမဲ့ မင်းဘက်က ထိုက်တန်တဲ့ တန်ဖိုးကို ပေးချေနိုင်မယ်ဆိုရင်တော့ ငါ တော်တော်များများ ဆောင်ရွက်ပေးနိုင်ပါတယ်"

​ရန်ကျန့်ဝေ ကောင်းစွာ နားလည်သဘောပေါက်သွားခဲ့သည်.. နင်ထျန်းက အရာအားလုံးကို လုပ်ဆောင်နိုင်သည်ဟု ပြောစဉ်ကတည်းက ၎င်းက မဖြစ်နိုင်မှန်း သူ သိရှိထားခဲ့ပြီးသား ဖြစ်သည်။ 

သို့သော်လည်း တစ်ဖက်လူက နင်ထျန်း၏ ကယ်တင်ရှင်ဖြစ်နေတာမို့ စကားလုံးအချို့ ချဲ့ကားပြောဆိုခြင်းက သဘာဝကျလှပေသည်။

​သူသည် ကြီးမားလှသော မျှော်လင့်ချက်များ မထားရှိသော်လည်း မိမိ၏ ဒုတိယမြောက် ရည်ရွယ်ချက်ကို ထုတ်ဖော်ပြောဆိုလိုက်တော့သည် -

​“ဆိုင်ရှင်အနေနဲ့‘ချီလော့ တူးလစ်ပန်း’  (ရောင်စုံနှင်းပန်းဘုရင်) အကြောင်းကို ကြားဖူးပါသလား"

​ယွီဝူယီ၏ မျက်ဝန်းများ အနည်းငယ် ကျဉ်းမြောင်းသွားခဲ့ရသည်။ တစ်ဖက်လူ အပ်နှံမည့်တာဝန်က မရိုးရှင်းနိုင်မှန်း သူ ကြိုတင်တွေးတောထားခဲ့သော်လည်း... သူတို့က စတင်စတင်ချင်းမှာတင် ဤမျှလောက်အထိ ကြီးမားလှသော ကစားပွဲကြီးတစ်ခုကို ကစားလိမ့်မည်ဟု သူ ထင်မထားခဲ့မိပါ။ 

သို့သော် တစ်ဖက်လူက ရတနာကိုးပါး ဂိုဏ်းက ဖြစ်နေတာမို့ ဤအရာကို လိုအပ်နေခြင်းကလည်း အဓိပ္ပာယ်ရှိလှပေသည်။

​‘ချီလော့ တူးလစ်ပန်း’ ဆိုသည်မှာ မသေမျိုးဆေးဖက်ဝင်အပင်များ၏ ဘုရင် ဟု ကျော်ကြားလှပြီး.. ၎င်းက ကမ္ဘာပေါ်ရှိ ဆန်းကြယ်လှသော သက်ရှိဆေးပင်အားလုံး၏ စရိုက်လက္ခဏာများကို ခွဲခြားနိုင်စွမ်းရှိသည့်အပြင် ၎င်းတို့ကိုပင် အမိန့်ပေးစေခိုင်းနိုင်စွမ်း ရှိသည်။ 

မည်သည့် အပင်မျိုးစိတ်ဝင် ဝိညာဉ်သားရဲမဆို ၎င်းနှင့် ကြုံတွေ့ရပါက တိုက်ခိုက်ရေးစွမ်းရည် ထက်ဝက်ခန့် ချက်ချင်း လျော့နည်းသွားရတတ်သည်။

​၎င်းအပြင်... ၎င်းတွင် အခြားသော အဓိက လုပ်ဆောင်ချက်တစ်ခု ရှိသေးသည်.. ၎င်းကား ‘ရတနာခုနှစ်ပါးမျှော်စင်’ ဝိညာဉ်ကို ‘ရတနာကိုးပါးမျှော်စင်’ အဖြစ်သို့ အဆင့်မြှင့်တင်ပေးနိုင်ခြင်းပင်။ 

၎င်းက ဝိညာဉ်သခင်များအား ဘဝတစ်ခုလုံး ‘ (အဆင့် ၇၉) အကန့်အသတ်အတွင်း၌သာ ပိတ်မိနေမည့် ကံကြမ္မာဆိုးကြီးမှနေ၍ အပြီးအပိုင် လွတ်မြောက်သွားစေနိုင်သည်။

​ရတနာကိုးပါးဂိုဏ်းအဖွဲ့ကို ရှေးယခင်က ရတနာခုနှစ်ပါးဂိုဏ်းအဖွဲ့’ ဟု လူသိများခဲ့ကြသည်။ 

‘နင်ရုန်ရုန်’  သည် ချီလော့ တူးလစ်ပန်းကို သောက်သုံးပြီးနောက် မိမိ၏ ဝိညာဉ်ကို ရတနာကိုးပါးဂိုဏ်းမျှော်စင်အဖြစ် အဆင့်မြှင့်တင်နိုင်ခဲ့ပြီးမှသာ ၎င်းကို ရတနာကိုးပါးဂိုဏ်းအဖွဲ့ဟူ၍ အမည်ပြောင်းလဲခဲ့ခြင်း ဖြစ်သည်။

​သို့သော်လည်း... ထိုအချိန်မှစ၍ နှစ်ပေါင်းတစ်သောင်းတိုင်အောင် ရတနာကိုးပါးဂိုဏ်းအဖွဲ့အတွင်း၌ ဒုတိယမြောက် ထိုဝိညာဉ်အဆင့်သို့ တက်လှမ်းနိုင်မည့် ဝိညာဉ်သခင်တစ်ဦးမျှ ထပ်မံ၍ ထွက်ပေါ်မလာခဲ့တော့ပါချေ။ 

ချီလော့ တူးလစ်ပန်းဆိုသည်မှာ အလွန်ပင် ရှားပါးလှတာမို့ နှစ်ပေါင်းတစ်သောင်း ကြာမြင့်သွားခဲ့သည့်တိုင်အောင် ရတနာကိုးပါးဂိုဏ်းအဖွဲ့သည် ဒုတိယမြောက် အပင်တစ်ပင်၏ သတင်းအစအနကိုမျှ မရရှိခဲ့ကြပါချေ။

​ယွီဝူယီအနေဖြင့်မူ ချီလော့ တူးလစ်ပန်း မည်သည့်နေရာတွင် ရှိနေကြောင်းကို အသေအချာ သိရှိနေခဲ့သည်.. 

သို့သော် ထိုနေရာကား သာမန်လူသားများ သွားရောက်နိုင်သော နေရာမျိုး မဟုတ်ပါချေ။ 

၎င်း၏ ပြင်ပစည်းရှိ အလွန်အမင်း ပြင်းထန်လှသော အဆိပ်အတောက်များကို ထားလိုက်ဦးတော့... 

အတွင်းပိုင်းရှိ ဆန်းကြယ်လှသော ဆေးဖက်ဝင်အပင်များစွာမှာပင် သက်တမ်းတစ်သိန်းကျော် ဝိညာဉ်သားရဲကြီးများအဖြစ် ပြောင်းလဲလို့နေခဲ့ကြချေပြီ။ 

ရန်ကျန့်ဝေသည် ‘သာလွန် သုန့်လော်’ တစ်ဦး ဖြစ်နေလျှင်ပင် ထိုနေရာတွင် မည်သည့်အကျိုးအမြတ်မျှ ရရှိလိမ့်မည် မဟုတ်ပါချေ။

​ယွီဝူယီက ပထမဆုံးအနေဖြင့် ဆိုလိုက်သည် -

​“ငါက ချီလော့ တူးလစ်ပန်းအကြောင်းကို သိရုံတင်မကဘဲ... ၎င်းကို ဘယ်နေရာမှာ ရှာဖွေရမလဲဆိုတာကိုပါ အသေအချာ သိပါတယ်"

​ဝူး...

​ဤစကားကို ကြားလိုက်ရသည့် အခါတွင်မူ ရန်ကျန့်ဝေတစ်ယောက် ချက်ချင်းပင် မတ်တတ်ရပ်လိုက်မိတော့သည်…

သူသည် စမ်းသပ်ကြည့်ရုံသက်သက်သာ မေးမြန်းခဲ့ခြင်း ဖြစ်သော်လည်း တစ်ဖက်လူက အမှန်တကယ်ပင် သိရှိနေလိမ့်မည်ဟု လုံးဝ ထင်မထားခဲ့မိပါ။

​“ဒါပေမဲ့... အဲဒီနေရာက အလွန်အမင်း အန္တရာယ်များလှပါတယ်… စီနီယာရန်ကိုယ်တိုင် လူကိုယ်တိုင် သွားရောက်မယ်ဆိုရင်တောင်မှ မည်သည့်ထိခိုက်မှုမျှမရှိဘဲ ဘေးကင်းကင်းနဲ့ ပြန်လည်ထွက်ခွာလာနိုင်ဖို့ မလွယ်ကူပါဘူး"

​ဤစကားလုံးများက ရန်ကျန့်ဝေ၏ စိတ်လှုပ်ရှားနေသော နှလုံးသားကို ချက်ချင်းပင် ပြန်လည်အေးချမ်းသွားစေခဲ့သည်။ 

သာလွန် သုန့်လော် တစ်ဦးတောင် အန္တရာယ်ရှိနိုင်တယ် ဟုတ်လား... နှစ်ပေါင်းတစ်သောင်းလုံးလုံး ၎င်းနှင့်ပတ်သက်ပြီး မည်သည့်သတင်းမှ ထွက်ပေါ်မလာခဲ့ခြင်းက အံ့ဩစရာ မဟုတ်တော့ပါချေ။

​ဒါပေမဲ့ အခြေအနေက ဒီလိုဆိုရင်... ဤဆိုင်ရှင်ငယ်လေးက ထိုအချက်အလက်တွေကို ဘယ်ကနေ ရရှိခဲ့တာလဲ။ မိမိရှေ့ရှိ သေးငယ်လှသော ထွေထွေလုပ်ငန်း၀န်ဆောင်မှုဆိုင်ကြီးက သူ့အတွက် ပိုမို၍ ဆန်းကြယ်နက်ရှိုင်းလို့လာခဲ့ချေပြီ။

​“ဒါပေမဲ့... ဧည့်သည်တော်ကို ဦးစားပေးရမယ်ဆိုတဲ့ အခြေခံမူအရ.. ငါ စီနီယာရန်အတွက် ၀န်ဆောင်ခရွေးချယ်စရာ လမ်းကြောင်း နှစ်ခုကို ပေးအပ်နိုင်ပါတယ်"

​ယွီဝူယီသည် သူ၏ လက်နှစ်ဖက်ကို ဆန့်ထုတ်လိုက်ရာ... သူ၏ လက်ဖဝါးထက်တွင် ၀န်ဆောင်ခစာချုပ် နှစ်စောင် ချက်ချင်း ပေါ်ထွက်လာခဲ့သည်။ 

ဘယ်ဘက်လက်ရှိ စာချုပ်ထက်မှနေ၍ ဆန်းကြယ်လှသော အပြာနုရောင် အလင်းတန်းများ ဖြာထွက်နေပြီး.. ညာဘက်လက်ရှိ စာချုပ်ထက်မှနေ၍မူ နီရဲလှသော အလင်းတန်းများ ဖြာထွက်လို့နေခဲ့သည်။ ထိုအရောင်နှစ်မျိုးက သူ၏ ကွဲပြားခြားနားသော မျက်ဝန်းအရောင်များနှင့် အတိအကျ ကိုက်ညီလို့နေခဲ့ချေပြီ။

​“ပထမဆုံး ရွေးချယ်မှု - ချီလော့ တူးလစ်ပန်း ရှိနေတဲ့ တိကျတဲ့ တည်နေရာ သတင်းအချက်အလက်ကို ရယူခြင်း။ စီနီယာရန်အနေနဲ့ လူကိုယ်တိုင် အဖွဲ့ခေါင်းဆောင်ပြီး သွားရောက်ရှာဖွေနိုင်ပါတယ်.. ၎င်းက အဖိုးအခ ပိုမိုနည်းပါးပြီး ‘အနီရောင် ၀န်ဆောင်ခစာချုပ်’ နဲ့ ကိုက်ညီပါတယ်"

​“ဒုတိယမြောက် ရွေးချယ်မှု - ငါတို့ ‘ဝူယီ အထွေထွေလုပ်ငန်း၀န်ဆောင်မှု ဆိုင် ကပဲ ချီလော့ တူးလစ်ပန်းကို လူကိုယ်တိုင် သွားရောက်ရှာဖွေပြီး စီနီယာရန်ရဲ့ လက်ထဲကို အရောက်ပေးအပ်ခြင်း။ 

ဒါကတော့ ကြီးမားလှတဲ့ တန်ဖိုးကို ပေးချေရမှာဖြစ်ပြီး ‘အပြာရောင် ၀န်ဆောင်ခစာချုပ်’ နဲ့ ကိုက်ညီပါတယ်...”

​“ကဲ... ရွေးချယ်မှုကတော့ စီနီယာရန်ရဲ့ လက်ထဲမှာပဲ ရှိပါတော့တယ်"

​၀န်ဆောင်ခစာချုပ် နှစ်စောင်စလုံး လေထုထဲ၌ ဝဲပျံလျက် ရန်ကျန့်ဝေ၏ ရှေ့ဆီသို့ တဖြည်းဖြည်းချင်း လွင့်မျောလာခဲ့ပြီး... သူ၏ ရွေးချယ်မှုကို စောင့်ဆိုင်းနေခဲ့ကြတော့သည်...။