အခန်း (၂၂) - အကျပ်အတည်း၏ ပထမဆုံး အငွေ့အသက်များ
သို့သော်လည်း... ထိုဖြူဖွေးလှသော သံချပ်ကာပုံရိပ်ကြီးကမူ မီးတောက်များကို ဖောက်ထွက်ကာ မည်သည့်အရှိန်အဟုန်မျှ လျော့နည်းသွားခြင်းမရှိဘဲ ၎င်းထက်သို့ တရှိန်ထိုး ထိုးနှက်တိုက်ခိုက်လာခဲ့ချေပြီ။
ဒါ... ဘယ်လိုလုပ် ဖြစ်နိုင်မှာလဲ။
ဘုရင်နီတစ်ယောက် အလွန်အမင်း ထိတ်လန့်တုန်လှုပ်သွားခဲ့ရသော်လည်း တုံ့ပြန်မှုကမူ မြန်ဆန်လှပေသည်။ ဤလူသား၏ လက်သီးချက်သည် စောစောက လက်သီးချက်နှင့် လုံးဝ အဆင့်အတန်းချင်း ကွာခြားလှကြောင်း သူ အသေအချာ အာရုံခံမိနေသည်။
ထိုအခိုက်အတန့်၌ပင်... နီရဲပြီး ကတ္တရာစေးကဲ့သို့ နက်မှောင်လှသော မီးတောက်များ ၎င်း၏ ခန္ဓာကိုယ်ထက်မှနေ၍ အရှိန်အဟုန်ပြင်းစွာ ပေါက်ကွဲထွက်လာခဲ့ပြီး ၎င်း၏ ခန္ဓာကိုယ်ကြီးမှာလည်း မီတာရှစ်မီတာကျော်အထိ ချက်ချင်းပင် ဖောင်းကားကြီးထွားလာခဲ့တော့သည် -
နီရဲသော ချောက်နက်မိစ္ဆာခန္ဓာ …
ဒါတင်... မကသေးပါချေ။
“ဟိန်း…”
ရှေးဟောင်းကမ္ဘာဆီမှနေ၍ လာခဲ့သည့်အလား ထစ်ချုန်းလှသော ဟောက်သံကြီးနှင့်အတူ... ဘုရင်နီ၏ ခန္ဓာကိုယ်ကြီးမှာ ထပ်မံ၍ ဖောင်းကားကြီးထွားလာခဲ့ပြီး.. အံ့ဩစရာကောင်းလောက်အောင်ပင် မီတာတစ်ဆယ့်နှစ်မီတာအထိ ရောက်ရှိသွားခဲ့တော့သည်။
စစ်မှန်သော နဂါးမင်း၏ ကောင်းချီးပေးခြင်း ၎င်းကား မိမိ၏ ခန္ဓာကိုယ်အတွင်းရှိ စစ်မှန်သော နဂါးသွေးအရှိန်အဝါကို အမြင့်မားဆုံးအဆင့်အထိ လှုံ့ဆော်ပေးနိုင်စွမ်းရှိသည့် သွေးလိုင်းဆိုင်ရာ စွမ်းရည်ကြီးတစ်ခု ဖြစ်ချေသည်။
ဤအခိုက်အတန့်တွင် ၎င်းထုတ်ဖော်လိုက်သော စွမ်းအားသည် စောစောကထက် နှစ်ဆမက ပိုမို၍ ပြင်းထန်လှပေသည်။
အနက်ရောင်နှင့် အနီရောင် မီးတောက်များက ၎င်း၏ ခန္ဓာကိုယ်ဘေးပတ်ပန်းကျင်တွင် ရစ်ခွေနေခဲ့ပြီး ၎င်း၏ ခြေလက်အင်္ဂါများထက်တွင်လည်း ကြွက်သားကြီးများ ဖောင်းကြွလာကာ သွေးအရှိန်အဝါများ ပြင်းထန်စွာ ပန်းထွက်လို့နေခဲ့သည်။
၎င်းကား ဘုရင်နီ၏ အစွမ်းကုန် ထုတ်ဖော်လိုက်သော အခြေအနေပင် ဖြစ်ချေတော့သည်။
၎င်းနှင့် နှိုင်းယှဉ်လိုက်မည်ဆိုပါက မီတာနှစ်မီတာမျှသာ ရှိသော ဆမ်၏ သံချပ်ကာ ခန္ဓာကိုယ်ငယ်လေးက အလွန်ပင် သေးငယ်လွန်းလှသည်ဟု ထင်မှတ်ရသည်။
သို့သော် ဤသေးငယ်လှသော ခန္ဓာကိုယ်ကြီးသည် မယုံကြည်နိုင်စရာကောင်းလောက်အောင် မြန်ဆန်လှသော အရှိန်အဟုန်ဖြင့် မီးတောက်ကြယ်ပျံတစ်စင်းအလား ရှေ့သို့ တိုးဝင်လာခဲ့သည်။
နောက်ဆုံးတွင်မူ... သူသည် ဘုရင်နီ၏ ရင်ဘတ်တည့်တည့်သို့ အားသွန်ခွန်စိုက် ထိုးနှက်ပစ်လိုက်တော့သည် -
ကျွတ်...
အချိန်ကာလကြီးတစ်ခုလုံး ခေတ္တမျှ ရပ်တန့်သွားခဲ့ရသလို ခံစားလိုက်ရပြီးနောက်... ကမ္ဘာပျက်မတတ် ပြင်းထန်လှသော ထစ်ချုန်းသံကြီး ထွက်ပေါ်လာခဲ့တော့သည်...။
ဘုန်း...
ဘုန်း...
ဘုန်း...
ဘုရင်နီ၏ မီတာတစ်ဆယ့်နှစ်မီတာအထိ မြင့်မားလှသော ကြီးမားလှသည့် ခန္ဓာကိုယ်ကြီးမှာ... မထင်မှတ်ဘဲ နောက်သို့ လွင့်စင်ထွက်ခွာသွားခဲ့ရရှာသည်။
ဧရာမ မီးတောက်လျှံစွမ်းအင်တိုင်ကြီးက ယပ်တောင်ပုံသဏ္ဌာန်အလား ၎င်း၏ ရင်ဘတ်ကို ဖောက်ထွက်သွားခဲ့ပြီး ကီလိုမီတာအတော်အတန်အထိ ပြင်းထန်စွာ ဆန့်တန်းသွားခဲ့တော့သည်။
“ဟူး...”
ထိုလက်သီးချက်ကို အပြည့်အဝ ထိုးနှက်ပြီးသွားခဲ့ပြီးနောက် ယွီဝူယီသည် သက်ပြင်းအရှည်ကြီးတစ်ချက်ကို ချလိုက်မိသည်။
ဤကွက်ကွင်းက ဆမ်၏ တစ်ပိုင်းမီးလောင်ကျွမ်းခြင်းအခြေအနေတွင် အသုံးပြုနိုင်သော နောက်ဆုံး အန္တိမစွမ်းရည်ကြီး ဖြစ်ပေသည်။
စူပါနိုဗာ ဝန်ပိုသက်ရောက်ခြင်း ၎င်းကား စွမ်းအင်အားလုံးကို လက်သီးချက်တစ်ခုတည်းအဖြစ် စုစည်းကာ ပေါက်ကွဲပစ်လိုက်သည့် စွမ်းရည်တစ်ခု ဖြစ်သည်။
၎င်း၏ အားနည်းချက်မှာ ကောင်းကင်မှ ကျဆင်းလာသော ဥက္ကာပျံကြီးတစ်ခုကဲ့သို့ ကျယ်ပြန့်လှသော ဧရိယာအလိုက် ဖျက်ဆီးနိုင်စွမ်းမျိုး မရှိခြင်းပင်။
သို့သော် ၎င်း၏ အားသာချက်မှာမူ စွမ်းအင်အားလုံးကို တစ်ချက်တည်း.. တစ်နေရာတည်းသို့ စုစည်းထားခြင်းဖြစ်တာမို့ ဥက္ကာပျံကျဆင်းခြင်းထက်ပင် ပိုမိုပြင်းထန်လှသော တစ်ကိုယ်ရေ သတ်ဖြတ်နိုင်စွမ်းနှင့် ဖောက်ထွက်ဖျက်ဆီးနိုင်စွမ်းကို ပိုင်ဆိုင်ထားခြင်း ဖြစ်ပေသည်။
သို့သော်လည်း ဤကဲ့သို့သော တိုက်ခိုက်မှုမျိုးက သူ၏ လက်ရှိခန္ဓာကိုယ်အပေါ်တွင် ကြီးမားလှသော ဝန်ထုပ်ဝန်ပိုးဖြစ်စေသည်။
မီးကျွမ်းပြာကျသွားခဲ့သော လမ်းကြောင်း၏ အဆုံးတွင်မူ... ဘုရင်နီ၏ ခန္ဓာကိုယ်တစ်ခုလုံး ဒဏ်ရာအမြောက်အမြားဖြင့် ပြည့်နှက်နေခဲ့ပြီး ၎င်း၏ ရင်ဘတ်ထက်တွင်မူ မီးကျွမ်းနေသော ကျင်းပေါက်ကြီးတစ်ခု ဖြစ်ပေါ်နေခဲ့ချေပြီ။ ဤလက်သီးချက်က ၎င်းအား အပြင်းအထန် ဒဏ်ရာရရှိသွားစေခဲ့သည်မှာ ထင်ရှားလှပေသည်။
အကယ်၍ ဆက်လက်၍ တိုက်ခိုက်မည်ဆိုပါက ၎င်းအား မြန်မြန်ဆန်ဆန် သတ်ဖြတ်နိုင်လိမ့်မည်ဟု သူ ယုံကြည်သည်။
သို့သော်လည်း ယွီဝူယီအတွက်မူ အခုက အချိန်မဟုတ်ပါချေ။
ဤလက်သီးချက်၏ ပြင်းထန်လှသော စွမ်းအင်ကြောင့် သားရဲဘုရင် (ဒီထျန်း)အနေဖြင့် တစ်စုံတစ်ခုကို သေချာပေါက် သတိပြုမိသွားခဲ့ချေပြီ။
သားရဲဘုရင် (ဒီထျန်း)သည် လေဟာနယ်ဆိုင်ရာ စွမ်းရည်များကို ပိုင်ဆိုင်ထားတာမို့ သူ၏ ဟင်းလင်းပြင်အကာကွယ် စွမ်းအားကိုပင် ဖောက်ထွက်လာနိုင်စွမ်း ရှိပေသည်။
အခုအချိန်တွင် ၎င်းနှင့် တည့်တည့်ရင်ဆိုင်ရခြင်းက ပညာရှိရာမကျပါချေ။ ချောင်းမြောင်းတိုက်ခိုက်ခံရမှုအတွက် ကောင်းစွာ ကလဲ့စားချေပြီးပြီဖြစ်ရာ ထွက်ခွာရန် အချိန်တန်ချေပြီ။
သို့သော်လည်း မထွက်ခွာမီမှာတင် ယွီဝူယီသည် ဆမ်၏ စက်ရုပ်ဆန်ဆန် အသီးအံသံဖြင့် အေးစက်စွာ ဆိုလိုက်သည် -
“နောက်တစ်ကြိမ် ငါတို့ ပြန်ဆုံတဲ့နေ့က... မင်းရဲ့ သေနေ့ပဲ"
ထိုအသံက အဝေးကြီးအထိ ပဲ့တင်ထပ်သွားခဲ့ပြီး ဘုရင်နီ၏ နားထဲသို့ တည့်တည့်မတ်မတ် ရောက်ရှိသွားခဲ့သည်။
ပေါက်ကွဲအားဖြင့် ရှေ့သို့တွန်းကန်ခြင်း…
ပြောပြီးသည်နှင့် ယွီဝူယီသည် တောအုပ်အတွင်းမှနေ၍ အဝေးသို့ ပျံသန်းထွက်ခွာသွားခဲ့တော့သည်။ သို့
သော် သူသည် ကောင်းကင်ထက်သို့ ပျံတက်ခြင်းမပြုဘဲ တောအုပ်အတွင်း သစ်ပင်များကြားမှသာ ပျံသန်းရန် လိမ္မာပါးနပ်စွာ ရွေးချယ်ခဲ့သည်။
ကောင်းကင်ကြီးက အလွန်ပင် ဟာလာဟင်းလင်း ဖြစ်နေတာမို့ သားရဲဘုရင် (ဒီထျန်း)၏ စွမ်းအားနှင့်ဆိုပါက သူ့ကို အလွယ်တကူ ရှာဖွေတွေ့ရှိသွားနိုင်သည်။
တော်သေးတာပေါ့... လမ်းခရီးတစ်လျှောက်တွင် မည်သည့်အတားအဆီးမျှ မရှိခဲ့ဘဲ ယွီဝူယီသည် တောအုပ်ကြီးအတွင်းမှ မကြာမီမှာပင် ပျံသန်းထွက်ခွာနိုင်ခဲ့သည်။
ထို့နောက် လမ်းကြောင်းပြောင်းလဲလိုက်ပြီး ‘ထျန်းဟုန်းအင်ပါယာ’ ဆီသို့ တည့်တည့် ဦးတည်ပျံသန်းခဲ့တော့သည်။
ယွီဝူယီ ထွက်ခွာသွားပြီး မကြာမီအချိန်၌ပင်... ကောင်းကင်ကြီးတစ်ခုလုံးကို ကွယ်ပျောက်သွားစေနိုင်သော ကြီးမားလှသည့် ကတ္တရာစေးကဲ့သို့ နက်မှောင်လှသော အရိပ်မည်းကြီးတစ်ခု ကောင်းကင်ထက်မှ သက်ဆင်းလာခဲ့တော့သည်...
၎င်းသည် မီးကျွမ်းပြာကျနေသော မြေပြင်ကြီးနှင့် ပျက်စီးယိုယွင်းမှုများကို ငုံ့ကြည့်လိုက်ပြီးနောက်... အပြင်းအထန် ဒဏ်ရာရရှိထားသော ဘုရင်နီကို စိုက်ကြည့်လိုက်သည်။ ဤနေရာတွင် ကြီးမားလှသော တိုက်ပွဲတစ်ခု ဖြစ်ပွားခဲ့ပြီး နောက်ဆုံးတွင် ဘုရင်နီ အရေးနိမ့်သွားခဲ့ရကြောင်း ထင်ရှားလှပေသည်။
“ဘုရင်နီ... ဘာတွေ ဖြစ်ခဲ့တာလဲ"
၎င်းသည် ဘုရင်နီကို မိမိ၏ ကြီးမားလှသော ရွှေရောင် ဒေါင်လိုက်မျက်ဝန်းကြီးများဖြင့် စိုက်ကြည့်ရင်း တစ်ဖက်လူ၏ အဖြေကို စောင့်ဆိုင်းလိုက်သည်။
ဘုရင်နီသည် မိမိ၏ ရင်ဘတ်အတွင်းမှ ပြင်းထန်လှသော နာကျင်မှုကို အတင်းအကျပ် ဖိနှိပ်ထားခဲ့ရင်း ခက်ခက်ခဲခဲပင် စကားဆိုလာခဲ့သည် -
“သူက... သံချပ်ကာ ဝတ်ဆင်ထားတဲ့ လူသားတစ်ယောက်ဗျာ ငါ သူ့ကို လျှော့တွက်မိသွားလို့ အခုလို အပြင်းအထန် ဒဏ်ရာရသွားခဲ့ရတာ"
သားရဲဘုရင် (ဒီထျန်း) မျက်မှောင်ကြုတ်လိုက်မိရင်း ဘေးပတ်ပန်းကျင်ရှိ တိုက်ပွဲခြေရာလက်ရာများကို လေ့လာလိုက်သည်။
တိုက်ပွဲက အချိန်အကြာကြီး မကြာမြင့်ခဲ့ပါချေ။ တစ်နည်းအားဖြင့် ပြောရမယ်ဆိုရင်... ထိုလူသားက သက်တမ်းသုံးသိန်းကျော် ဝိညာဉ်သားရဲကြီးဖြစ်သော ဘုရင်နီကို အလွန်တိုတောင်းလှသော အချိန်အတွင်းမှာတင် ဤမျှလောက်အထိ အပြင်းအထန် ဒဏ်ရာရရှိအောင် စွမ်းဆောင်နိုင်ခဲ့ခြင်း ဖြစ်သည်။
“တစ်ဖက်လူက ‘အဆုံးစွန်သုန့်လော်’ လား...”
သားရဲဘုရင် (ဒီထျန်း) ဤဖြစ်နိုင်ချေကို တွေးတောလိုက်မိသည်။ အကယ်၍ ‘သာလွန်သုန့်လော်’ မျှသာ ဆိုပါက ဘုရင်နီကို ဤမျှတိုတောင်းသော အချိန်အတွင်း ဤကဲ့သို့ ဖြစ်သွားအောင် တိုက်ခိုက်နိုင်စွမ်း ရှိလိမ့်မည် မဟုတ်ပါချေ။
ဘုရင်နီက ခေါင်းယမ်းလိုက်ရင်း ပြန်လည်ဖြေကြားလိုက်သည် -
“ငါလည်း ထိုလူသားရဲ့ ကျင့်ကြံခြင်းအဆင့်ကို အသေအချာ မခွဲခြားနိုင်ခဲ့ဘူး.. ဒါပေမဲ့ သူက ‘အဆုံးစွန်သုန့်လော်’ တော့ မဖြစ်နိုင်လောက်ဘူး။ မဟုတ်ရင် ငါ အခုအချိန်မှာ အသက်ရှင်နေတော့မှာ မဟုတ်ဘူး"
သူ၏ အဖြေကို ကြားပြီးနောက် သားရဲဘုရင် (ဒီထျန်း)၏ မျက်မှောင်ကြုတ်မှုက ပိုမို၍ နက်ရှိုင်းသွားခဲ့ရတော့သည်။ အဆုံးစွန်သုန့်လော် မဟုတ်ဘူး ဟုတ်လား။ လူသားတွေက ဤမျှလောက်အထိ အစွမ်းထက်လာကြပြီလား။
ဘေးပတ်ပန်းကျင်တွင် မည်သည့်လူသားအရှိန်အဝါမျှ ကျန်ရှိမနေတော့ပါချေ.. တစ်ဖက်လူက ဝေးလံသောနေရာဆီသို့ ရောက်ရှိသွားခဲ့ချေပြီ။
“ထားလိုက်တော့"
တစ်ဖက်လူက ထွက်ခွာသွားပြီဖြစ်တာမို့ ဆက်လက်တွေးတောနေခြင်းက အဓိပ္ပာယ်မရှိပါချေ။
ကောင်းကင်ကြီးကို ဖုံးလွှမ်းထားသော အရိပ်မည်းကြီးသည် ပြန်လည်ပျံတက်သွားခဲ့ပြီး အပြင်းအထန် ဒဏ်ရာရရှိထားသော ဘုရင်နီကိုပါ အတူတကွ ခေါ်ဆောင်သွားခဲ့တော့သည်။
သားရဲဘုရင် (ဒီထျန်း)အနေဖြင့် ၎င်းအား အူတိုင်အဝန်းအဝိုင်းဆီသို့ ပြန်လည်ခေါ်ဆောင်သွားပြီး ‘ပိကျီ’ အား ကုသပေးစေချင်သောကြောင့် ဖြစ်သည်။
သို့သော်လည်း ပျက်စီးယိုယွင်းသွားခဲ့သော ဤတိုက်ပွဲမြေပြင်ကြီး မူလအခြေအနေသို့ ပြန်လည်ရောက်ရှိရန်အတွက် အချိန်မည်မျှကြာမြင့်ဦးမည်လဲဆိုတာကတော့... မေးခွန်းတစ်ခုပင် ဖြစ်ချေတော့သည်။
ထျန်းဟုန်အင်ပါယာ အတွင်း၌မူ...
မိမိ၏ အမြင့်ဆုံးအရှိန်အဟုန်ဖြင့် ပျံသန်းလာခဲ့ခြင်းကြောင့် ယွီဝူယီသည် ခဏချင်းအတွင်းမှာပင် ထျန်းဟုန်အင်ပါယာ၏ နယ်နိမိတ်အတွင်းသို့ ပြန်လည်ရောက်ရှိလာခဲ့ပြီ ဖြစ်သည်။
ဤနှုန်းအတိုင်းဆိုပါက သူသည် ‘ထွေထွေလုပ်ငန်း၀န်ဆောင်မှုဆိုင်’ တည်ရှိရာ ကျူယွဲ့မြို့တော် ဆီသို့ မကြာမီမှာပင် ပြန်လည်ရောက်ရှိတော့မည် ဖြစ်သည်။
“ဒီ လုပ်ငန်း တစ်ခုတည်းတင် တစ်လတိတိ ကြာမြင့်လိမ့်မယ်လို့ ငါ ထင်မထားခဲ့မိဘူး"
ပထမတော့ သူ ထင်မှတ်ထားခဲ့သည်မှာ ၎င်းကား တစ်ခေါက်တည်းနှင့် ပြီးဆုံးသွားမည့် ရိုးရှင်းလှသော အလုပ်တစ်ခုဟူ၍ ဖြစ်သည်။ ဤအချိန်ကာလအတွင်းမှာ ဤမျှလောက်အထိ များပြားလှသောအရာများ ဖြစ်ပွားလိမ့်မည်ဟု သူ လုံးဝ ထင်မထားခဲ့မိပါ။
ဖြစ်ပွားခဲ့သမျှ အရာအားလုံးကို ပြန်လည်တွေးတောမိရင်း ယွီဝူယီတစ်ယောက် မရည်ရွယ်ဘဲ တဟဟ ရယ်မောလိုက်မိသည်။
【သတိပေးချက် အဆင့်မြင့်အတိုင်းအတာရှိသော ဖြစ်တည်မှု တစ်ခုက အိမ်ရှင် ကို ချောင်းမြောင်းစောင့်ကြည့်နေပါသည်】
【မည်သူမည်ဝါဖြစ်ကြောင်း စစ်ဆေးအတည်ပြုခြင်းကို လုပ်ဆောင်နေပါသည်...】
【စစ်ဆေးမှု ပြီးဆုံးပါပြီ! ချောင်းမြောင်းစောင့်ကြည့်သူ၏ အချက်အလက်များကို ထုတ်ဖော်ပြသနေပါသည်!】
【စောင့်ကြည့်သူ - အဆင့် (၁) နတ်ဘုရားအဆင့် · ပင်လယ်နတ်ဘုရား · ထန်ဆန်း 】
【သတိပေးချက်! ထိုစောင့်ကြည့်သူသည် အိမ်ရှင်အပေါ်တွင် မကောင်းသော ရည်ရွယ်ချက်များကို သိမ်းဆည်းထားပါသည်!】
ဘာ... ဘာလဲ။
ရုတ်တရက် ဖြစ်ပွားလာခဲ့သော အခြေအနေကြောင့် ယွီဝူယီ၏ ပုံရိပ်ကြီး လေထုထဲတွင် ချက်ချင်းပင် ရပ်တန့်သွားခဲ့ရပြီး.. စနစ်၏ စာတန်းများကို မယုံကြည်နိုင်စရာကောင်းလောက်အောင် စိုက်ကြည့်လိုက်မိတော့သည်။
“ဘာတွေ ဖြစ်နေတာလဲ...”
“ထန်ဆန်းက... ငါ့ကို ကြည့်နေတယ် ဟုတ်လား"
【အိမ်ရှင်သည် အန္တရာယ်ရှိသော အခြေအနေတွင် ရှိနေကြောင်း စနစ်က ရှာဖွေတွေ့ရှိသဖြင့်... ဆန်းကြယ်လှသော စည်းကမ်းချက်များကို အသက်သွင်းလိုက်ပါပြီ!】
【ဆန်းကြယ်လှသော စည်းကမ်းချက် - မည်သည့်အရာကမျှ အိမ်ရှင်၏ တည်ရှိမှုကို ရှာဖွေစုံစမ်းနိုင်ခြင်း မရှိစေရ။ (၎င်းအတွက် တစ်လလျှင် ဒင်္ဂါးပြား ၁၀ ပြား စားသုံးပါမည်)】
【စောင့်ကြည့်သူသည် အိမ်ရှင်၏ ပုံရိပ်မြင်ကွင်းကို လုံးဝ ဆုံးရှုံးသွားခဲ့ပါပြီ】
ဒါက ချက်ချင်းပဲ ဖြေရှင်းပြီးသွားတာလား။ စနစ်ဆိုတာ တကယ့်ကို အားကိုးထိုက်တာပဲ။ သို့သော်လည်း ယွီဝူယီအနေဖြင့် ပျော်ရွှင်ရန် အချိန်မရလိုက်မီမှာတင် စနစ်၏ နောက်ထပ် သတိပေးချက်စာတန်းကြောင့် သူ၏ နှလုံးသားကြီး ပြင်းထန်စွာ တုန်ခါသွားခဲ့ရပြန်သည် -
【သတိပေးချက်! ချောင်းမြောင်းစောင့်ကြည့်သူသည် အိမ်ရှင်၏ ပုံရိပ်ကို ဆုံးရှုံးသွားခဲ့ရသဖြင့် ကြီးမားလှသော စိတ် အာရုံခံစားမှုကို ခံစားနေရပါသည်】
【ချောင်းမြောင်းစောင့်ကြည့်သူသည်... နောက်ထပ် (၁၆) လအတွင်းမှာတင် သုန့်လော်တိုက်ကြီး ဆီသို့ စိတ်ဝိညာဉ်ပုံသဏ္ဌာန် အဖြစ် ဆင်းသက်လာပါလိမ့်မည်】
【အိမ်ရှင်၏ ရှင်သန်ခြင်းအခက်အခဲက အလွန်မြင့်မားနေကြောင်း စနစ်က ရှာဖွေတွေ့ရှိသဖြင့် စနစ်၏ စည်းကမ်းချက်များကို ပြောင်းလဲပြင်ဆင်နေပါသည်...】
【ကိုယ်ပိုင်၀န်ဆောင်ခများနှင့် အဖွဲ့အစည်းဆိုင်ရာ ၀န်ဆောင်ခအသစ်များကို ထပ်မံဖြည့်စွက်လိုက်ပါပြီ】
【အပြောင်းအလဲ (၁) - ကိုယ်ပိုင်၀န်ဆောင်ခများ၏ ၀န်ဆောင်ခအဖိုးအခ ဆုလာဘ်များကို ၁၀၀ ရာခိုင်နှုန်း မြှင့်တင်လိုက်ပြီး.. သရုပ်ဆောင်မှု ရာခိုင်နှုန်းကိုတော့ ၂၀ ရာခိုင်နှုန်းအဖြစ် ပုံသေ သတ်မှတ်လိုက်ပါသည်။】
【အပြောင်းအလဲ (၂) - အဖွဲ့အစည်းဆိုင်ရာ ၀န်ဆောင်ခများ၏ ၀န်ဆောင်ခငွေကြေး ဆုလာဘ်များကို ၁၀၀၀ ရာခိုင်နှုန်းအထိ အဆမတန် မြှင့်တင်လိုက်ပြီး.. သရုပ်ဆောင်မှု ရာခိုင်နှုန်းကိုတော့ ၅၀ ရာခိုင်နှုန်းအဖြစ် ပုံသေ သတ်မှတ်လိုက်ပါသည်။】
【အပြောင်းအလဲ (၃) - သက်တမ်းဆယ်စုနှစ်.. သက်တမ်းရာချီနှင့် သက်တမ်းသောင်းချီ ဝိညာဉ်ကွင်းများ၏ အဆင့်မြှင့်တင်မှုများအတွက် ၀န်ဆောင်ခဒင်္ဂါးပြားများ ထပ်မံပေးဆောင်ရန် မလိုအပ်တော့ပါချေ။ သက်တမ်းတစ်သိန်းကျော် ဝိညာဉ်ကွင်းအတွက်ကိုမူ ၀န်ဆောင်ခဒင်္ဂါးပြား ၅၀ ပြားသာ လိုအပ်ပါတော့သည်။】
ဤမျှလောက်အထိ ရုတ်တရက်ဆန်ပြီး ကြီးမားလှသော အပြောင်းအလဲကြီးကြောင့် ယွီဝူယီတစ်ယောက် တွေးတောရခက်လို့နေခဲ့ချေပြီ။
ဘာဖြစ်လို့ ထန်ဆန်းက သူ့ကို ရုတ်တရက် ရှာဖွေတွေ့ရှိသွားခဲ့တာလဲ။ ရှာတွေ့ရုံတင်မကဘဲ မကောင်းတဲ့ ရည်ရွယ်ချက်တွေပါ ရှိနေသေးတယ် ဟုတ်လား။
နောက်ထပ် ပြဿနာတစ်ခုကတော့ စနစ်၏ ရုတ်တရက်ဆန်လှသော ပြောင်းလဲမှုကြီးပင်။ မိမိ၏ လုံခြုံရေးအတွက် စနစ်၏ ဆုလာဘ်များ အဆမတန် မြင့်တက်သွားသည်ကို မြင်တွေ့လိုက်ရသော်လည်း ယွီဝူယီ၏ ပထမဆုံး ခံစားချက်က စိတ်လှုပ်ရှားခြင်း မဟုတ်ဘဲ အံ့ဩတုန်လှုပ်ခြင်းသာ ဖြစ်သည်။
ပြဿနာတစ်ခုခု ကြုံတွေ့ရသည့် အခါတိုင်းတွင် စနစ်က သူ့အတွက် အလိုအပ်ဆုံးအရာများကို အမြဲတမ်း ပေးသနားတတ်ကြောင်း သူ ယခင်ကတည်းက ရှာဖွေတွေ့ရှိထားခဲ့ဖူးသည်။
လက်ရှိ ပြောင်းလဲမှုများစွာက ဤအချက်ကို ထပ်မံ၍ သက်သေပြလို့နေခဲ့ချေပြီ။ တစ်ဖက်လူက ပြန်လည်ဖြေကြားပေးရန် အခွင့်အရေး မနည်းလှမှန်း သိထားသော်လည်း...
ယွီဝူယီသည် နောက်ဆုံးတွင် မိမိ၏ စိတ်ထဲ၌ ရှိနေသော အတွေးကို မေးမြန်းလိုက်မိတော့သည် -
“စနစ်... ဘာဖြစ်လို့လဲ"
သို့သော် ယွီဝူယီ အံ့ဩသွားရသည်မှာ... စနစ်သည် ယခုအကြိမ်တွင် အမှန်တကယ်ပင် ပြန်လည်ဖြေကြားပေးခဲ့ခြင်းပင် ဖြစ်သည်။
【စနစ်၏ လုပ်ဆောင်ချက်များနှင့် တုံ့ပြန်မှုများအားလုံးသည် တွက်ချက်မှုများမှ ထွက်ပေါ်လာခဲ့သော နောက်ဆုံးရလဒ်များသာ ဖြစ်ပါသည်။】
【အိမ်ရှင်၏ မေးခွန်းအတွက် အဖြေမှာ - စနစ်၏ ရည်ရွယ်ချက်မှာ အိမ်ရှင်ကို အလုပ်အကျွေးပြုရန်ဖြစ်ပြီး.. အိမ်ရှင်၏ အကျိုးစီးပွားသည် ကျန်ရှိနေသေးသော အရာအားလုံးထက် သာလွန်မြင့်မားလှပါသည်။】
စနစ်အနေဖြင့် ဤမျှလောက်အထိ စကားအမြောက်အမြား ပြောဆိုလာခဲ့ခြင်းက ဒါဟာ ပထမဆုံးအကြိမ် ဖြစ်တာမို့ သူ အနည်းငယ် ဝမ်းသာပီတိဖြစ်သွားခဲ့ရသည်။ သို့သော်လည်း မည်သည့်အကြောင်းကြောင့်ရယ်မသိ... မေးခွန်းတစ်ခုက သူ၏ ဦးနှောက်ထဲသို့ ရုတ်တရက် ပေါ်ထွက်လာခဲ့သဖြင့် သူ ဘာမှမတွေးတောဘဲ ပါးစပ်မှ မေးမြန်းလိုက်မိတော့သည် -
“စနစ်... မင်းမှာ ယောက်ျား.. မိန်းမ ဆိုတဲ့ လိင်ကွဲပြားမှု ရှိလား"
【လူသားတို့၏ နားလည်မှုသဘောတရားအရ... စနစ်၏ လိင်အမျိုးအစားမှာ ‘အမျိုးသမီး’ ဖြစ်ပါသည်