အခန်း (၁၁) - စင်မြင့်ထက်သို့ လှမ်းတက်ခြင်း
တျန်းဟုန်းအင်ပါယာ.. တျန်းဒိုမြို့တော်.. ရတနာကိုးပါး ကျောင်းတော်။
ခန့်ညားထည်ဝါလှသော အဆောက်အအုံများနှင့် အဆောင်ဆောင်သော မဏ္ဍပ်ကြီးများက မြင့်မားစွာ မတ်တပ်ရပ်နေကြပြီး လူအများအပြားသည် ဒီရေအလား စီးဆင်းလှုပ်ရှားနေကြသည်။
သုန့်လော်တိုက်ကြီးတစ်ခုလုံးတွင် အသန်မာဆုံးသော ပံ့ပိုးမှုစနစ် ဝိညာဉ်သခင်ဂိုဏ်း ဖြစ်သည်နှင့်အညီ အကူအညီလာရောက်တောင်းခံကြသည့် လူပေါင်းမြောက်မြားစွာကြောင့် ဤနေရာသည် အမြဲတမ်းပင် စည်ကားသိုက်မြိုက်လို့နေသည်။
အမြင့်ဆုံးသော မဏ္ဍပ်ကြီး၏ ထိပ်ဆုံးအလွှာတွင်မူ ရွှေချည်ထိုးဝတ်စုံကို ဝတ်ဆင်ထားသည့် သေးငယ်သော မိန်းကလေးတစ်ဦးသည် ဝေးကွာလှသော မိုးကုတ်စက်ဝိုင်းဆီသို့ ငေးမောကြည့်ရှုနေခဲ့သည်။
“အဲဒီနေ့ကစပြီး အခုဆိုရင် တစ်လတောင် ကုန်လွန်သွားခဲ့ပြီပဲ… ဝူယီ အထွေထွေလုပ်ငန်း ဆိုင်ရဲ့ ဆိုင်ရှင် လေးက အခုအချိန်မှာ ဘာတွေလုပ်နေမလဲ မသိဘူး...”
နင်းတျန်း ၏ စိတ်အာရုံထဲတွင် ဆံပင်ဖြူနှင့် ကွဲပြားခြားနားသော မျက်ဝန်းအစုံရှိသည့် လူငယ်လေး၏ ပုံရိပ်က ဖျတ်ခနဲ ပေါ်ပေါက်လာခဲ့သည်။
သူ၏ ယဉ်ကျေးသိမ်မွေ့ပြီး ခန့်ညားလှသော ပုံပန်းသဏ္ဍာန်က သူမ၏ နှလုံးသားထဲတွင် နက်ရှိုင်းစွာ စွဲထင်ကျန်ရစ်နေခဲ့ပြီ ဖြစ်သည်။
လွန်ခဲ့သော တစ်လခန့်က နင်းတျန်း ဘေးကင်းစွာ ပြန်လည်ရောက်ရှိလာပြီးကတည်းက ဂိုဏ်း၏ ဆက်ခံသူသခင်မလေး ပြန်လည်ရောက်ရှိလာသည့် သတင်းက ရတနာကိုးပါးဂိုဏ်းတစ်ခုလုံးသို့ ပျံ့နှံ့သွားခဲ့သည်။
သို့သော်လည်း သူမကို လာရောက်တိုက်ခိုက်ခဲ့သည့် နောက်ကွယ်က အင်အားစုကို အသေအချာ မစုံစမ်းရသေးမီအချိန်အထိ ဂိုဏ်းချုပ် နင်းယွန်းယဲ့ က သူမ၏ ဘေးကင်းလုံခြုံရေးအတွက် ဂိုဏ်းနယ်မြေအတွင်းမှ အပြင်သို့ ပေးမထွက်ဘဲ ယာယီပိတ်ပင်ထားခဲ့သည်။
တစ်ချိန်တည်းမှာပင် နင်းတျန်းသည် ယွီဝူယီမှ သူမကို မည်သို့မည်ပုံ ကယ်တင်ခဲ့သည်ဟူသော ဖြစ်စဉ်တစ်ခုလုံးကိုလည်း ဂိုဏ်း၏ လူကြီးမင်းများကို အသေးစိတ် ပြန်လည်ပြောပြထားခဲ့သည်။
“ယွီဝူယီ...”
ထိုနေ့က သူမကို ကယ်တင်ပြီးသည်နှင့် မည်သည့်တွန့်ဆုတ်မှုမျှမရှိဘဲ လှည့်ထွက်သွားခဲ့သည့် လူငယ်လေးကို တွေးမိလိုက်ရင်း နင်းတျန်းက သူမ၏ နှုတ်ခမ်းလေးကို အလိုလို မကျေမနပ် စူအောင့်လိုက်မိသည်။
ရတနာကိုးပါးဂိုဏ်း၏ ဆက်ခံသူသခင်မလေး ပြန်လည်ရောက်ရှိလာသည့် သတင်းအပြင်... တျန်းဒိုမြို့တော်နှင့် ဝေးကွာလှသော ကျူးယွဲ့မြို့တော် တွင်လည်း ထိတ်လန့်တုန်လှုပ်စရာကောင်းလှသော အဖြစ်အပျက်တစ်ခု ဖြစ်ပွားခဲ့သေးသည်။
သခင်မလေး ပြန်လည်ရောက်ရှိလာပြီး ဒုတိယမြောက်နေ့မှာတင်... ကျူးယွဲ့မြို့တော်တွင် အကြီးမားဆုံးဖြစ်သည့် ‘လေလံရုံ’ ၏ အဆင့်မြင့်လူကြီးမင်းများအားလုံး တစ်ညတာအတွင်းမှာတင် အလောင်းအဖြစ် ပြောင်းလဲသွားခဲ့ကြသည်။
ထိုလေလံရုံ၏ ပိုင်ရှင်ဖြစ်သူ ဝိညာဉ်သုန့်လော်အဆင့် စွမ်းအားရှင်ကြီးပင်လျှင် ချွင်းချက်မရှိ သေဆုံးသွားခဲ့ရသည်။
ထိုပိုင်ရှင်ကြီးသည် ‘အနက်ရောင်ကင်းမြီးကောက်’ ဟူသော ကြောက်မက်ဖွယ်ကောင်းလှသည့် အမည်ပြောင်ဖြင့် ကျော်ကြားသူတစ်ဦး ဖြစ်သည်။
လူအများစုက ဤအဖြစ်အပျက်သည် ရတနာကိုးပါးဂိုဏ်း၏ သခင်မလေး ပျောက်ဆုံးသွားခဲ့သည့် ကိစ္စနှင့် ဆက်စပ်မှုရှိမရှိကို အငြင်းပွားဖွယ်ရာ ဆွေးနွေးနေကြသည်။ ဘာပဲဖြစ်ဖြစ် ဤအဖြစ်အပျက်နှစ်ခုလုံး ဖြစ်ပွားခဲ့သည့် အချိန်ကာလက တိုက်ဆိုင်လွန်းလှသည် မဟုတ်ပါလား။
“ဟတ်ချိုး...”
ဝေးကွာလှသော ရှီလိုင်ခဲ့အကယ်ဒမီတွင်မူ ယွီဝူယီသည် ချစ်စဖွယ်ကောင်းသော နှာချေသံတစ်ခုကို ပြုလုပ်လိုက်မိပြီး မိမိ၏ နှာခေါင်းလေးကို ပွတ်သပ်လိုက်သည်။
‘ဘယ်သူကများ ငါ့ကို လွမ်းနေလို့လဲ မသိဘူး...’ သူက ဝေခွဲမရစွာ တိုးတိုးလေး ရေရွတ်လိုက်မိသည်။
ယခုအချိန်တွင် သူသည် ရှီလိုင်ခဲ့အကယ်ဒမီ၏ အမွန်မြတ်ဆုံးသော နယ်မြေဖြစ်သည့် ပင်လယ်နတ်ဘုရားမျှော်စင်၏ အစည်းအဝေးခန်းမ၌ ထိုင်နေခြင်း ဖြစ်သည်။
သူ၏ ဝဲယာဘက်တွင် ပင်လယ်နတ်ဘုရားမျှော်စင်၏ အကြီးအကဲများ ရှိနေကြပြီး... အဓိကထိုင်ခုံတွင်မူ ဆံပင်ဖြူအဘိုးအိုကြီးတစ်ဦးက လဲလျောင်းခုံပေါ်တွင် မှီတင်းရင်း အလွန်ပင် ကြင်နာတတ်သော ပုံစံဖြင့် စိုက်ကြည့်နေသည်။
“စိတ်မလှုပ်ရှားပါနဲ့ ကလေးလေးရယ် ငါတို့ကို သာမန်အဘိုးကြီးတွေလိုပဲ သဘောထားပြီး... သမီးရဲ့ ကိုယ်ရေးအချက်အလက်ကို မိတ်ဆက်ပေးပါဦး” မူအန်းက ပြုံးလျက် ပြောဆိုလာသည်။
‘သာမန်အဘိုးကြီးတွေ ဟုတ်လား... ဒီလူတွေထဲက တစ်ယောက်ယောက်သာ အပြင်လောကကို ထွက်သွားရင် တိုက်ကြီးတစ်ခုလုံးကို တုန်ဟုန်သွားစေနိုင်တဲ့ အရှိန်အဝါမျိုး ရှိနေတာကို’ ယွီဝူယီက စိတ်ထဲကနေ တိတ်တဆိတ် တွားကုပ်လိုက်မိသည်။
“နှုတ်ခွန်းဆက်သပါတယ် လူကြီးမင်းတို့ရှင့် သမီးရဲ့အမည်က လျူယင် ဖြစ်ပါတယ်... ဝူယီ အထွေထွေလုပ်ငန်းဆိုင်ရဲ့ အမှုဆောင်တစ်ယောက်ပါ”
(အခုက လျူယင် ပုံဖြစ်နေတာ)
သူသည် နောင်အနာဂတ်တွင် လုပ်ငန်းအပ်နှံမှုများကို ပိုမိုလွယ်ကူစွာ လက်ခံရရှိနိုင်ရန်အတွက် ဝူယီ အထွေထွေလုပ်ငန်းဆိုင်၏ အမည်နာမကို တမင်သက်သက် ထုတ်ဖော်ပြောဆိုလိုက်ခြင်း ဖြစ်သည်။
တစ်ချိန်တည်းမှာပဲ... အင်အားကြီးမားလှသော နောက်ခံတစ်ခု၏ အရေးပါမှုကိုလည်း သူ ကောင်းစွာ သဘောပေါက်ထားသည်။ အခုအချိန်မှာ သူသည် မိမိ၏ ဆိုင်ကို ဆန်းကြယ်လှသော လျှို့ဝှက်အင်အားစုတစ်ခုအဖြစ် ပုံဖော်ထားနိုင်မှသာ... နောင်တစ်ချိန်တွင် လာရောက်နှောင့်ယှက်မည့်သူများကို ကြိုတင်သတိပေးတားဆီးနိုင်မည် ဖြစ်သည်။
စတင်ပျိုးထောင်ခါစ အင်အားစုတစ်ခုအတွက် အကြီးမားဆုံးသော လက်နက်မှာ လျှို့ဝှက်ဆန်းကြယ်မှုပင် ဖြစ်သည်။
ယွီဝူယီသည် ပုံမှန်အချိန်တွင် အလွန်ပင် ဆော့ကစားတတ်သူဖြစ်သော်လည်း... အရေးကြီးသည့်အချိန်တွင် ဘယ်လိုလုပ်ဆောင်ရမလဲဆိုတာကို ကောင်းစွာ သိရှိသည်။
မိမိ၏ အသက်ကို လောင်းကြေးထပ်မည့်သူမှာ လူမိုက်သက်သက်သာ ဖြစ်ပေလိမ့်မည်။
“အော်... ဒီလိုအင်အားစုမျိုးကို ငါတစ်ခါမှ မကြားဖူးပါလား…အဲဒီအဖွဲ့အစည်းအကြောင်းကို အနည်းငယ်လောက် ရှင်းပြပေးလို့ ရမလား”
မူအန်းသည်လည်း စိတ်ဝင်စားသွားရသည်။ သူက အနားယူနေပြီဖြစ်ပြီး လောကီရေးရာများကို ဂရုမစိုက်တော့ဘူးဆိုသော်လည်း ကျောင်းတော်အတွင်း၌ မကြာခဏ လှည့်လည်သွားလာတတ်သူ ဖြစ်သည်။
သို့သော်လည်း ဝူယီ အထွေထွေလုပ်ငန်း၀န် ဆောင်မှုဆိုင်ဟူသော အမည်ကိုမူ သူ တစ်ခါမှ မကြားဖူးခဲ့ပါ။ ယွီဝူယီ့ထံတွင် ရှိနေသော ဆန်းပြားလှသည့် ဝိညာဉ်စက်မှုနည်းပညာများကို ကြည့်ခြင်းအားဖြင့် ဤအဖွဲ့အစည်းသည် လူမသိသူမသိ အင်အားစုတစ်ခု မဖြစ်နိုင်ပါ။
“သမီးတို့အဖွဲ့အစည်းရဲ့ အသေးစိတ်အချက်အလက်တွေကို အများကြီး ထုတ်ဖော်မပြောနိုင်တာကို လူကြီးမင်းတို့ ခွင့်လွှတ်ပေးပါရှင်…ဒါပေမဲ့ အခြေခံအချက်အလက်အချို့ကိုတော့ ရှင်းပြပေးလို့ ရပါတယ်”
“ရိုးရိုးရှင်းရှင်းပြောရရင်တော့... သမီးတို့က ဖောက်သည်တွေရဲ့ လုပ်ငန်းအပ်နှံမှုတွေကတစ်ဆင့် သူတို့ရဲ့ ရည်မှန်းချက်တွေကို အောင်မြင်အောင် ကူညီပေးတဲ့ အဖွဲ့အစည်းတစ်ခု ဖြစ်ပါတယ်”
“သတ်မှတ်ထားတဲ့ လုပ်ငန်းခ သို့မဟုတ် အဖိုးအခကို ပေးဆောင်နိုင်သရွေ့... ဖောက်သည်တွေရဲ့ တောင်းဆိုချက်အများစုကို သမီးတို့ဘက်က ဖြည့်ဆည်းပေးနိုင်ပါတယ်ရှင်”
‘အော်... ဒီလိုမျိုး ဂုဏ်သတ္တိရှိတဲ့ အင်အားစုတစ်ခုလား’ မူအန်း ပိုမိုစိတ်ဝင်စားသွားရသည်။
ဤကဲ့သို့သော လုပ်ဆောင်ချက်မျိုးရှိသည့် အဖွဲ့အစည်းများကို အပြင်လောကတွင် အများအားဖြင့် ‘လုပ်ကြံရေးအဖွဲ့အစည်း’ ဟု ခေါ်ဆိုကြသည်။
သူတို့က အဖိုးအခကို အခြေခံပြီး အလုပ်လုပ်ကြခြင်းဖြစ်ရာ ငွေကြေးပေးဆောင်နိုင်သရွေ့ သူတို့ မသတ်ရဲသည့်လူဟူ၍ မရှိကြပါ။
ယွီဝူယီကလည်း မူအန်း ဘာကို တွေးတောနေလဲဆိုတာကို ချက်ချင်း ရိပ်မိလိုက်သည်။ အကြောင်းမှာ ဤနှစ်ခုက အမှန်တကယ်ပင် ဆင်တူလွန်းသောကြောင့် ဖြစ်သည်။
“အကြီးအကဲမူအန်းအနေနဲ့... သမီးတို့အဖွဲ့အစည်းက အမှောင်ထုထဲမှာ ပုန်းအောင်းနေတဲ့ အဲဒီအဖွဲ့အစည်းတွေနဲ့ ဘာကွာခြားလဲဆိုတာကို သိချင်နေတာ မဟုတ်လားရှင်”
မူအန်းက မည်သို့မျှ ဖုံးကွယ်မနေဘဲ ခေါင်းငြိမ့်ပြလိုက်သည်။
“ဒါဆိုရင်တော့... အကြီးအကဲအနေနဲ့ သမီးတို့အဖွဲ့အစည်းကို အထင်သေးရာ ရောက်ပါလိမ့်မယ်…အဲဒီအဖွဲ့အစည်းအများစုက မရိုးသားတဲ့ လုပ်ရပ်တွေနဲ့ လူသတ်မှုကိုပဲ အဓိကလုပ်ဆောင်ကြတာပါ”
“ဒါပေမဲ့ သမီးတို့ကတော့ မတူပါဘူး။ သမီးတို့က ပေါ်ပေါ်ထင်ထင်နဲ့ တရားမျှတစွာ အလုပ်လုပ်တာပါ... အဲဒီအထဲမှာ လူသတ်မှု ပါဝင်နေရင်တောင်မှပေါ့”
“ဒါတင်မကသေးပါဘူး... သမီးတို့ လုပ်ဆောင်နိုင်တဲ့အရာက ဒါတင်ပဲ မကပါဘူး။ စောစောက သမီးပြောခဲ့သလိုပဲ... သတ်မှတ်ထားတဲ့ အဖိုးအခကို ပေးဆောင်နိုင်သရွေ့... ဒီသုန့်လော်တိုက်ကြီးပေါ်ကနေ နိုင်ငံတစ်ခုလုံးကို ပျောက်ကွယ်သွားအောင်အထိ သမီးတို့ လုပ်ဆောင်ပေးနိုင်ပါတယ်ရှင်”
ယွီဝူယီက စကားကို အပိုပြောနေခြင်းလား။
ဤကမ္ဘာမြေပေါ်က လူသားများအတွက်မူ ဒါက အလွန်အမင်း အပိုပြောခြင်း ဖြစ်ပေလိမ့်မည်။
အဘယ်ကြောင့်ဆိုသော် လက်ရှိ သုန့်လော်တိုက်ကြီးပေါ်တွင် တျန်းဟုန်း.. ဒိုလင်း.. စတားလို နှင့် နေလမင်း ဟူ၍ နိုင်ငံကြီး လေးနိုင်ငံသာ ရှိသောကြောင့် ဖြစ်သည်။
ထိုနိုင်ငံတိုင်းတွင် မိမိတို့၏ လျှို့ဝှက်လက်နက်များနှင့် အင်အားကြီးပညာရှင်များ ရှိကြရာ... အဆုံးစွန်သုန့်လော်တစ်ဦးပင်လျှင် နိုင်ငံတစ်ခုကို အလွယ်တကူ ဖျက်ဆီးပစ်နိုင်သည်ဟု မပြောရဲကြပါ။
သို့သော် ယွီဝူယီအတွက်မူ ဒါက အမှန်တရား ဖြစ်သည်။ သူ၏ လက်ရှိတွက်ချက်မှုအရ... ၂၀% ဇာတ်ကောင်သရုပ်ဆောင်မှုနှုန်းရှိသော ဆမ်၏ စွမ်းအားသည် ဘွဲ့နှင်းသုန့်လော်အဆင့်တွင် ရှိနေပြီး.. ဒုတိယအဆင့် မီးတောက်အခြေအနေသို့ ဝင်ရောက်လိုက်ပါက သာလွန်သုန့်လော်အဆင့်အထိ ရောက်ရှိနိုင်သည်။
ထို့ပြင် ၎င်း၏ အထက်တွင် အပြည့်အဝ မီးတောက်အခြေအနေဟူ၍လည်း ရှိနေသေးသည် မဟုတ်ပါလား။
လက်ရှိတွင်မူ သူသည် ထိုဒုတိယအဆင့် အခြေအနေကို အချိန်အကြာကြီး မထိန်းသိမ်းနိုင်သေးခြင်းသာ ဖြစ်သည်။
ထို့ပြင် သူ ၎င်းကို စိုးရိမ်နေစရာမလိုပါ။ အကြောင်းမှာ စနစ်သည် သူ့ကို လုပ်ငန်းအပ်နှံမှုများ ပြီးမြောက်သည့်အခါ ဆုလာဘ်ပေးရန်သာ တာဝန်ရှိပြီး... ဖောက်သည်များထံမှ တောင်းခံမည့် အဖိုးအခကိုမူ သူကိုယ်တိုင် စိတ်ကြိုက် သတ်မှတ်နိုင်သောကြောင့် ဖြစ်သည်။
တစ်နည်းအားဖြင့် ပြောရလျှင်... အကယ်၍ သူ အလိုရှိပါက မည်သည့်အဖိုးအခမျှ မယူဘဲ အလကားပင် ကူညီပေးနိုင်သည်။
သို့သော် သူ ထိုသို့ လုပ်ဆောင်မည် မဟုတ်ပါ။ မျှတသော ပေးဆပ်မှုရှိမှသာ မျှတသော ရလဒ်ကို ရရှိနိုင်မည်ဟူသော အသိစိတ်က ယွီဝူယီ့စိတ်ထဲတွင် နက်ရှိုင်းစွာ စွဲထင်နေသောကြောင့် ဖြစ်သည်။ ဤအချက်ကြောင့်ပင် စနစ်က သူ့ကို ရွေးချယ်ခဲ့ခြင်း ဖြစ်နိုင်ပေသည်။
ဒါနဲ့... နိုင်ငံတစ်ခုလုံးကို ကမ္ဘာမြေပေါ်ကနေ ဖျက်ဆီးပစ်ဖို့အတွက် ဘယ်လောက်အထိ ကြီးမားတဲ့ အဖိုးအခကို ပေးဆောင်ရမယ်လို့ ထင်ပါသလဲ။
ယွီဝူယီ့ရဲ့ အတွေးအခေါ်အရ... ဒါက နိုင်ငံတစ်ခုလုံးကို တိုက်ရိုက်ယဇ်ပူဇော်ရတာနဲ့ မထူးခြားလှပါ။
ဒါကြောင့် ဤစကားကို ပြောဆိုခြင်းမှာ မိမိ၏ အင်အားစုတွင် မည်မျှအစွမ်းရှိသည်ကို ထုတ်ဖော်ပြသခြင်း သက်သက်သာ ဖြစ်ပြီး... မည်သူကမှ ထိုကဲ့သို့သော အခြေအနေမျိုးအထိ တောင်းဆိုလာကြလိမ့်မည် မဟုတ်ပါ။ အနည်းဆုံးတော့ အခုအချိန်အထိပေါ့။
“ကလေးမလေး... မင်းရဲ့ စကားတွေက တကယ့်ကို မသေးလှပါလား…ဒါက အင်အားစုတစ်ခုတည်းနဲ့ လုပ်ဆောင်နိုင်တဲ့အရာလို့ မင်း ထင်နေတာလား”
ချန်တျိုးတျိုးက ရုတ်တရက် ကြားဖြတ်ပြောဆိုလာပြီး.. ယွီဝူယီ့ကို လူမိုက်တစ်ယောက်အလား အထင်သေးသော မျက်ဝန်းများဖြင့် စိုက်ကြည့်လိုက်သည်။
“ငါ မင်းကို အသေအချာ ပြောပြလိုက်မယ်... မင်းရဲ့ မျက်စိရှေ့မှာ ရှိနေတဲ့ လူတွေထဲမှာ.. ငါအပါအဝင် သာလွန်သုန့်လော် စုစုပေါင်း ခုနစ်ယောက် ရှိတယ်။ ပြီးတော့ အဘိုးမူကဆိုရင် အဆုံးစွန်သုန့်လော်အဆင့် အမြင့်ဆုံးစွမ်းအားရှင်ကြီးပဲ”
“ငါတို့က အဲဒီလို မလုပ်ချင်လို့ပဲဖြစ်ဖြစ်... ငါတို့ကိုယ်တိုင်တောင်မှ နိုင်ငံတစ်ခုကို အလွယ်တကူ ဖျက်ဆီးပစ်နိုင်တယ်လို့ မပြောရဲဘူး… မင်းရဲ့ အဲဒီဝူယီ အထွေထွေလုပ်ငန်းအပ်ဆိုင်က ငါတို့ထက် ပိုပြီး သန်မာတယ်လို့ မင်း ထင်နေတာလား”
ရှီလိုင်ခဲ့က ကျောင်းတော်တစ်ခုသာ ဖြစ်သည်ဆိုသော်လည်း... ၎င်း၏ အထက်တန်းစား စွမ်းအားရှင် အရေအတွက်က မည်သည့်နိုင်ငံကိုမဆို ယှဉ်ပြိုင်နိုင် သို့မဟုတ် ကျော်လွန်နိုင်သည်။
ထိုကဲ့သို့သော အခြေအနေမျိုးမှာပင် သူတို့ကိုယ်တိုင် မပြောရဲသည့်အရာကို... ဘယ်ကမှန်းမသိတဲ့ အမည်မသိ အင်အားစုတစ်ခုက လုပ်နိုင်တယ် ဟုတ်လား။ ချန်တျိုးတျိုးအနေဖြင့် ဘယ်လိုမှ မယုံကြည်နိုင်ပါ။
ချန်တျိုးတျိုး၏ စကားက အနည်းငယ် ရဲတင်းလွန်းလှသည်ဆိုသော်လည်း... ကျန်ရှိနေသည့် အသက်ကြီးလှသော အကြီးအကဲ အများအပြားကလည်း ထောက်ခံသည့်အနေဖြင့် ခေါင်းငြိမ့်ပြကြသည်။
သို့သော်လည်း... ထို့နောက်တွင် ထွက်ပေါ်လာသည့် အဖြေစကားကြောင့် အစည်းအဝေးခန်းမတစ်ခုလုံး ခေတ္တမျှ ဆွံ့အငြိမ်သက်သွားခဲ့ရတော့သည်။
“ဟုတ်ပါတယ်ရှင့်”
ယွီဝူယီ့ရဲ့ အဖြေက အလွန်ပင် တည်ငြိမ်အေးဆေးလှပြီး... အမှန်တရားတစ်ခုကို ရိုးရိုးရှင်းရှင်း ပြောပြနေသလိုမျိုး ခံစားရစေသည်။
သို့သော် ဤစကားသည် ပင်လယ်နတ်ဘုရားမျှော်စင်၏ အကြီးအကဲအားလုံး၏ နှလုံးသားထဲတွင် ကြီးမားလှသော လှိုင်းလုံးကြီးများကို ဖြစ်ပေါ်စေခဲ့သည်။
မူအန်း၏ မျက်နှာအမူအရာပင်လျှင် အလွန်အမင်း တည်ကြည်လေးနက်သွားရသည်။
အဘယ်ကြောင့်ဆိုသော် သူသည် စိတ်စွမ်းအားပိုင်းတွင် အတုမရှိ ထိပ်သီးပညာရှင်တစ်ဦးဖြစ်တာမို့... လူတစ်ယောက် စကားပြောရာတွင် လိမ်ညာနေခြင်း ရှိမရှိကို ကောင်းစွာ အာရုံခံနိုင်သည်။
သို့သော်လည်း ယွီဝူယီ့ထံမှ မည်သည့် လိမ်ညာလိုစိတ် အရိပ်အယောင်မျှ သူ အာရုံခံမိခြင်း မရှိပါ။ တစ်နည်းအားဖြင့် ပြောရလျှင်... ဤကလေးမလေးသည် အမှန်တရားကိုသာ ပြောဆိုနေခြင်း ဖြစ်ပေသည်။