အခန်း (၄၀) လေလံရုံမှ ရုတ်ရုတ်သဲသဲ

အချိန်က ရေစီးကြောင်းပမာ ကုန်ဆုံးသွားခဲ့ရာ မျက်တောင်တစ်ခတ်အတွင်းမှာပင် တစ်လတာ အချိန်ကာလမှာ ကုန်လွန်သွားခဲ့ပြီ ဖြစ်သည်

ဒီတစ်လအတွင်း ချင်မင်က လင်းမူ ချမှတ်ပေးထားသော ပြင်းထန်လှသည့် လေ့ကျင့်ရေးအစီအစဉ်ကို အတိအကျ လိုက်နာခဲ့တယ်

နေ့စဉ်ရက်ဆက် ယွီထျန်းဟန်၊ ထန်ဆန်းနှင့် အခြားသူများသည် အဆင့်မြင့် ဝိညာဉ်ပြိုင်ကွင်း ပွဲစဉ် အနည်းဆုံး နှစ်ပွဲစီ၌ ပါဝင်ယှဉ်ပြိုင်ခဲ့ကြရတယ် ပြင်းထန်လှသော ဒီအစီအစဉ်က သူတို့ရဲ့ ဝိညာဉ်စွမ်းအား အဆင့်ကို မြှင့်တင်ပေးရုံသာမက တကယ့်တိုက်ပွဲများကြား၌ သူတို့ရဲ့ တိုက်ခိုက်ရေးဗီဇနှင့် ဗျူဟာအသစ်များကိုပါလုပ်ပေးနိုင်ခဲ့တယ်

စိတ်လှုပ်ရှားစရာ အကောင်းဆုံး တိုးတက်မှုမှာ ရှီမော့ နှင့် ရှီမို ညီအစ်ကိုနှစ်ဦးနှင့် သက်ဆိုင်နေတယ်

လင်းမူရဲ့ ညွှန်ကြားချက်အတိုင်း အမြဲတစေ ခွဲမရအောင် တွဲနေထိုင်ခဲ့ကြပြီးနောက် သူတို့သည် အသက်ရှူနှုန်းနှင့် ဝိညာဉ်စွမ်းအား လည်ပတ်မှုကို စတင်ညှိနှိုင်းလာနိုင်ခဲ့ကြတာ်

လွန်ခဲ့သည့် ရက်အနည်းငယ်က လေ့ကျင့်ရေးတစ်ခုအတွင်း သူတို့ရဲ့ လိပ်နက်သိုင်းဝိညာဉ်များ က ပထမဆုံးအကြိမ်အဖြစ် အပြန်အလှန် တုံ့ပြန်သက်ရောက်မှု ရှိခဲ့ပြီး တောင်တန်းကြီးတစ်ခုကဲ့သို့ လေးလံလှသော အရှိန်အဝါတစ်ခုက သူတို့နှစ်ဦးကြား၌ ထွက်ပေါ်လာခဲ့ရာ ယင်းက သိုင်းဝိညာဉ်ပေါင်းစပ်ခြင်းစွမ်းရည် စတင်အသက်ဝင်လာသည့် ထင်ရှားသော လက္ခဏာပင် ဖြစ်သည် ရာနှုန်းပြည့် မပြီးပြည့်စုံသေးသော်လည်း ဦးတည်ချက်ကတော့ မှန်ကန်နေပြီ ဖြစ်သးတယ်

လင်းမူအနေဖြင့်မူ မိမိကိုယ်ပိုင် ကျင့်ကြံခြင်းအပြင် ကျန်ရှိသည့် အချိန်များကို ယဲ့လင်းလင်းကို သင်ကြားပြသပေးရင်း ကုန်လွန်စေခဲ့တယ် သူမရဲ့ ထူးချွန်သော နားလည်သဘောပေါက်မှုနှင့် စိတ်နှစ်ကိုယ်နှစ် လေ့ကျင့်မှုတို့ကြောင့် ကောင်းကင်ကိုးထပ် ဖီးနစ်အက ရဲ့ အခြေခံခြေလှမ်းများကို တတ်မြောက်သွားခဲ့ပြီး ပံ့ပိုးကူညီရေးသမားတစ်ဦးအနေဖြင့် ရှင်သန်နိုင်စွမ်းကို သိသိသာသာ မြင့်တက်စေခဲ့တယ်

ဒါပေမဲ့ လင်းမူက ခန္ဓာကိုယ်ပိုင်းဆိုင်ရာ လေ့ကျင့်မှုသက်သက်ဖြင့် တိုက်ကြီးများဆိုင်ရာ ပြိုင်ပွဲကြီး ၌ အောင်ပွဲခံရန် မလုံလောက်သေးကြောင်း သိထားတယမ သူက အဖွဲ့ဝင်များရဲ့ ကျင့်ကြံခြင်းကို အထောက်အကူပြုစေရန် အထူးပြုလုပ်ထားသော ဆေးလုံးများ ကို ဖော်စပ်ရန် စီစဉ်ခဲ့တယ် ဒီဆေးလုံးများက ရေခဲနှင့် မီးတောက် ယင်ယန်တွင်း မှ ဒဏ္ဍာရီလာ မသေဆေးပင်များနှင့် မနှိုင်းယှဉ်နိုင်သော်လည်း သူရဲ့ ဆေးဖော်စပ်ခြင်း ပညာရပ်က အဖွဲ့ရဲ့ ကြီးထွားနှုန်းကို အရှိန်အဟုန်မြှင့်တင်ပေးရန် လုံလောက်လှတယ်

ထိုသို့သော ဆေးလုံးများ ဖော်စပ်ရန်အတွက် အရည်အသွေးမြင့်မားသော ဆေးဖက်ဝင်အပင်များ လိုအပ်ရာ

"ငါ လေလံရုံကို သွားဖို့ လိုအပ်နေပြီ ထင်တယ်" ဟု လင်းမူ တွက်ချက်လိုက်တယ် အင်ပါယာရဲ့ ဗဟိုချက်မဖြစ်သောကြောင့် ထျန်းတို မဟာလေလံရုံ သည်သာ သူလိုအပ်သည့် နှစ်တစ်ထောင်သက်တမ်းရှိ ဆေးဖက်ဝင်အပင်များကို သိုလှောင်ထားနိုင်မည့် တစ်ခုတည်းသော နေရာဖြစ်သည်

လင်းမူ ကုန်ကျစရိတ်အတွက် မစိုးရိမ်ပေ တော်ဝင်တိုက်ခိုက်ရေးအဖွဲ့ ကို မြှင့်တင်ပေးခြင်းက အကယ်ဒမီရဲ့ တာဝန်သာ ဖြစ်ရာ ကုန်ကျသမျှ ရွှေဒင်္ဂါးပြားတိုင်းကို ဘုတ်အဖွဲ့ဝင်များထံမှ ပြန်လည်တောင်းခံရန် အပြည့်အဝ ရည်ရွယ်ထားတယ်

လေ့ကျင့်ရေးကွင်းမှ ထွက်ခွာရန် ပြင်ဆင်နေစဉ်မှာပင် ရင်းနှီးသော ပုံရိပ်တစ်ခုနှင့် ဆုံတွေ့ခဲ့သည် ရွှယ်ချင်းဟယ်က သဘာဝကျပြီး နှစ်လိုဖွယ်ကောင်းသော အပြုံးဖြင့် လျှောက်လှမ်းလာကာ

"ညီနောင်လင်း၊ အပြင်သွားမလို့လား" ဟု မေးလိုက်တာ်

လင်းမူ စိတ်ထဲ၌ အားမလိုအားမရ ဖြစ်သွားရသည် လွန်ခဲ့သော တစ်လလုံးလုံး အိမ်ရှေ့မင်းသားက သူ့ထံသို့ နှစ်ရက်ခြားတစ်ခါခန့် လာရောက်လည်ပတ်လေ့ရှိပြီး လင်းမူရဲ့ လူမှုအသိုင်းအဝိုင်းထဲသို့ ဝင်ဆံ့နိုင်ရန် သိသိသာသာ ကြိုးပမ်းနေခဲ့ခြင်း ဖြစ်တယ်

"နှုတ်ခွန်းဆက်သပါတယ် အရှင်မင်းသား" ဟု လင်းမူက ကျင့်သားရနေသော သာမန်လေသံဖြင့် ပြန်လည်ဖြေကြားလိုက်တယ်

"ဆေးဖက်ဝင်အပင်အချို့ ဝယ်ယူဖို့ လေလံရုံကို သွားမလို့ပါ"

"အို... ညီနောင်လင်းက ဆေးဘက်ဝင်အပင် ပညာရပ်မှာလည်း ကျွမ်းကျင်တာပဲလား"

ရွှယ်ချင်းဟဲ စိတ်ဝင်စားသွားခဲ့တယ်

"ဒီနေ့ ငါ့မှာ အားလပ်ရက် ရှိနေတာမို့ အတူတူ လိုက်ပါခွင့်ပြုပါ ငါက လေလံရုံရဲ့ ပုံမှန်ဖောက်သည်တစ်ဦးမို့လို့ ငါ့ရဲ့ ရှိနေမှုက မလိုအပ်တဲ့ ပြဿနာတချို့ကို ကျော်လွှားနိုင်ပါလိမ့်မယ်"

လင်းမူ ငြင်းပယ်ရန် ခေတ္တစဉ်းစားမိသော်လည်း အိမ်ရှေ့မင်းသား ဘေးတွင် ရှိနေခြင်းက အထက်တန်းလွှာ လေလံပွဲလောကရဲ့ ရှုပ်ထွေးလှသော လုပ်ထုံးလုပ်နည်း အဆင့်ဆင့်ကို အမှန်တကယ် ကျော်လွှားနိုင်မည်ကို သဘောပေါက်လိုက်သဖြင့် "ဒါဆိုရင်တော့ အရှင်မင်းသားကို ဒုက္ခပေးရတော့မှာပဲ"

'ထျန်းတို မဟာလေလံရုံ'

သူတို့နှစ်ဦး မြို့လယ်ခေါင်သို့ ရောက်ရှိလာပြီး လေလံရုံရဲ့ ခမ်းနားထည်ဝါလှသော ခုံးပုံစံ အဆောက်အအုံအတွင်းသို့ ဝင်ရောက်ခဲ့ကြတာ် အတွင်းပိုင်း ခန်းမကြီးထဲတွင် မြို့တော်ရဲ့ အထက်တန်းလွှာများ၊ မှူးမတ်များနှင့် တောက်ပသော ပိုးထည်ဝတ်စုံများ ဝတ်ဆင်ထားကြသည့် အဆင့်မြင့် ဝိညာဉ်သခင်များ ဖြင့် ပြည့်နှက်နေတယ်

ရွှယ်ချင်းဟယ်က လင်းမူကို ဂုဏ်သရေရှိ အနီရောင်အခန်းရဲ့ ရှေ့ဆုံးတန်းဆီသို့ တိုက်ရိုက် ခေါ်ဆောင်သွားခဲ့တယ် လေလံပွဲ စတင်သည်နှင့် လင်းမူက သက်တမ်း တစ်ထောင်ကျော်ရှိသော ရှားပါးဆေးဖက်ဝင်အပင်များအပေါ်၌သာ အာရုံစိုက်ထားခဲ့တယ်

သူရဲ့ လုံလောက်သော စုဆောင်းငွေနှင့် ပြန်လည်တောင်းခံနိုင်မည့် ကတိကဝတ်တို့ကြောင့် အရည်အသွေးမြင့်မားသော ဆေးပင်အချို့ကို အောင်မြင်စွာ လေလံအောင်နိုင်ခဲ့တယ်

ပွဲစဉ် ပြီးဆုံးခါနီးအချိန်၌ လေလံစီစဉ်သူရဲ့ လေသံက ပိုမိုလှုံ့ဆော်မှု ဖြစ်စေသော လေသံအဖြစ် ပြောင်းလဲသွားခဲ့တယ် သူက တူဖြင့် ထုလိုက်ပြီး ဟိန်းထွက်နေသော လေသံဖြင့်

"လေးစားရပါသော ဧည့်သည်တော်တို့ခင်ဗျာ... ကျွန်တော်တို့ရဲ့ ဒီကနေ့ည ဇာတ်သိမ်းပိုင်း အခမ်းနားဆုံး အစီအစဉ်ကို ရောက်ရှိလို့ လာခဲ့ပါပြီ"

သံလှောင်အိမ်ကြီးတစ်ခုကို စင်မြင့်ပေါ်သို့ တွန်းတင်လာခဲ့ကြတယ် အတွင်း၌ ပုံပျက်ပန်းပျက် ကွေးကွေးလေး နေနေသော ပုံရိပ်တစ်ခု ရှိနေခဲ့တယ် အသက် ၁၆ နှစ်ထက် မပိုသော မိန်းကလေးငယ်တစ်ဦး ဖြစ်ပြီး တောက်ပသော ရွှေရောင်ဆံပင်များနှင့် တုန်ရီနေသော မြစိမ်းရောင်မျက်ဝန်းများကို ပိုင်ဆိုင်ထားသည် အထူးခြားဆုံးမှာ ခေါင်းပေါ်ရှိ ဖောင်းကြွနေသော မြေခွေးနားရွက်များနှင့် နောက်ကွယ်မှ သားမွေးထူထူ အမြီးတို့ ဖြစ်ကာ ယင်းက သိုင်းဝိညာဉ် ဗီဇပြောင်းလဲခြင်း ရဲ့ ရလဒ်ပင် ဖြစ်သည် သူမသည် ပါးလွှာပြီး အလင်းပေါက်သော ဝတ်ရုံကို ဝတ်ဆင်ထားရာ ဖြူလျော်သော အသားအရေက လှောင်အိမ်ရဲ့ အေးစက်သော သံတိုင်များနှင့် သိသိသာသာ ကွာခြားနေတယ်

"ဒီမိန်းကလေးက သူမရဲ့ သိုင်းဝိညာဉ်နိုးထမှုအတွင်းမှာ ရှားပါးတဲ့ ဗီဇပြောင်းလဲမှုကို ကြုံတွေ့ခဲ့ရတာပါ" ဟု လေလံစီစဉ်သူက လောဘဇောတိုက်နေသော အပြုံးဖြင့် ရှင်းပြလိုက်တယ်

"သူမက ထူးခြားတဲ့ မြေခွေးဝိသေသလက္ခဏာတွေကို ထိန်းသိမ်းထားနိုင်ပေမဲ့ ဝိညာဉ်စွမ်းအားတော့ မရှိပါဘူး သူမက သိမ်မွေ့တယ်၊ နာခံမှုရှိပြီး တစ်ဦးတည်းသော စုဆောင်းရကျိုးနပ်တဲ့ အရာတစ်ခု ဖြစ်ပါတယ်"

အခန်းထဲတွင် လှုပ်လှုပ်ရွရွ ဖြစ်သွားပြီး တိုးတိုးတိတ်တိတ် ဆွေးနွေးသံများ ထွက်ပေါ်လာခဲ့တယ်

ထျန်းတိုမြို့တော်ရဲ့ အပျော်အပါးမက်သော မှူးမတ်အသိုင်းအဝိုင်းကြား၌ ထိုသို့သော ဗီဇပြောင်းလဲမှုမျိုးကို ကြီးမားသော စျေးနှုန်းများဖြင့် လိုက်လံရှာဖွေလေ့ ရှိကြသည်

ရွှယ်ချင်းဟယ် မျက်မှောင်ကုတ်သွားပြီး မိမိရဲ့ စိတ်အမူအရာကို ပြန်လည်မထိန်းချုပ်နိုင်မီ ရွံရှာဖွယ် အမူအရာတစ်ခု ဖြတ်သန်းသွားခဲ့တယ် လင်းမူရဲ့ မျက်ဝန်းများကမူ အေးစက်သွားခဲ့သည် မိန်းကလေးရဲ့ ထိတ်လန့်မှုကို မြင်တွေ့ရသောအခါ သူရဲ့ စိတ်ထဲ၌ အေးစက်သော ဒေါသလှိုင်းတစ်ခု ထွက်ပေါ်လာခဲ့တယ်

"အရှင်မင်းသား" လင်းမူက လေသံမာမာဖြင့် တိုးတိုးကပ်၍ ပြောလိုက်တယမ

"သူမကို လေလံဆွဲဖို့ ကျွန်တော့်ကို ကူညီပေးပါ"

ရွှယ်ချင်းဟဲ အံ့အားသင့်သွားသည် သူက လင်းမူကို ကြည့်လိုက်ရာ ရာဂစိတ်ကို တွေ့ရလိမ့်မည်ဟု မျှော်လင့်ထားသော်လည်း လေးနက်တည်ကြည်မှုနှင့် ဖြောင့်မတ်သော ဒေါသအရှိန်အဝါကိုသာ တွေ့ရှိခဲ့ရတယ် သူက ချက်ချင်းပင် ခေါင်းညိတ်ပြလိုက်ကာ

"မင်း ဆန္ဒရှိတဲ့အတိုင်းပါပဲ ညီနောင်လင်း"

စျေးနှုန်းက ရွှေဒင်္ဂါးပြား ၁၂၀,၀၀၀ အထိ မြင့်တက်နေပြီ ဖြစ်ရာ

"၁၃၀,၀၀၀" ရွှယ်ချင်းဟဲရဲ့ ပြတ်သားသော လေသံက ဆူညံသံများကို ဖြတ်သန်းထွက်ပေါ်လာ

အခန်းတစ်ခုလုံး တိတ်ဆိတ်သွားခဲ့တယ် အများစုက အိမ်ရှေ့မင်းသားကို မှတ်မိကြသဖြင့် ဝင်ရောက်ယှဉ်ပြိုင်ရန် တုံ့ဆိုင်းသွားကြသည် သို့သော် ထိုအချိန်၌ ခန်းမရဲ့ အခြားတစ်ဖက်မှ ဩဇာအာဏာရှိသော လေသံတစ်ခု ထွက်ပေါ်လာခဲ့တယ်

"၁၄၀,၀၀၀"

ထိုသူကား ဧကရာဇ်ရဲ့ ညီတော်ဖြစ်ပြီး ရွှယ်ချင်းဟယ်ရဲ့ ပြင်းထန်သော နိုင်ငံရေးပြိုင်ဘက်ဖြစ်သူ မင်းသား ရွှယ်ရှင်း ပင် သူက ရှေ့တန်းဆီသို့ ပြုံးစိစိဖြင့် ကြည့်လိုက်ပြီး မိမိရဲ့ တူတော်မောင်ကို ပြဿနာရှာရန် ရည်ရွယ်ထားခြင်း ဖြစ်ကြောင်း ထင်ရှားနေတယ်

ရွှယ်ချင်းဟဲက တုံ့ဆိုင်းမနေဘဲ "၁၅၀,၀၀၀" ဟု ဆိုလိုက်ရာ

"၁၆၀,၀၀၀" ရွှယ်ရှင်းက ချက်ချင်းပင် တုံ့ပြန်လိုက်သည်

ရွှယ်ချင်းဟဲရဲ့ မျက်ဝန်းထဲတွင် အေးစက်သော သတ်ဖြတ်လိုစိတ် အရိပ်အယောင်တစ်ခု ဖြတ်ပြေးသွားခဲ့တယ်

စျေးနှုန်းကို ထပ်မံမြှင့်တင်ရန် ပြင်လိုက်စဉ်မှာပင် ခန်းမရဲ့ နောက်ဘက်မှ သိမ်မွေ့ပြီး သာယာသော လေသံတစ်ခု ထွက်ပေါ်လာခဲ့တယ်

"ရွှေဒင်္ဂါးပြား ၁၈၀,၀၀၀"

လူတိုင်း လှည့်ကြည့်လိုက်ကြသည် နောက်ဆုံးတန်းတွင် ထိုင်နေသူမှာ ယဉ်ကျေးသိမ်မွေ့သော သက်လတ်ပိုင်းအရွယ် အမျိုးသားတစ်ဦးနှင့် ဆီးနှင်းကဲ့သို့ ဖြူဖွေးသော ဆံပင်များရှိသည့် သက်ကြီးရွယ်အိုတစ်ဦးတို့ ဖြစ်ကြပြီး အသက်ကြီးသူမှာ ဓားတစ်စင်းကဲ့သို့ ဖြောင့်မတ်ထက်မြက်စွာ ထိုင်နေကြတယ်

လင်းမူရဲ့ မျက်လုံးများ ကျဉ်းမြောင်းသွားခဲ့တယ် သူတို့ မျက်နှာဖုံး စွပ်ထားကြသော်လည်း သူက အရှိန်အဝါကို ချက်ချင်း မှတ်မိလိုက်သည် ဘုံခုနှဆင့်ပြဿဒ်ရဲ့ ခေါင်းဆောင် နင်ဖုန်းကျစ် နဲ့ ဓားတုန့်လော့ ချန်ရှင်း ပင်

ရွှယ်ချင်းဟဲလည်း သူတို့အား မှတ်မိသွားသဖြင့် မျက်ဝန်းထဲတွင် အံ့အားသင့်မှုများ ဖြတ်ပြေးသွားခဲ့တယ်

တစ်ချိန်တည်းမှာပင် နင်ဖုန်းကျစ်က ရှေ့ဆုံးတန်းကို အကဲခတ်လိုက်ပြီး သူက မိမိရဲ့ တပည့်ဖြစ်သူ ရွှယ်ချင်းဟဲကို မှတ်မိသွားပြီး ဇဝေဇဝါ ဖြစ်သွားရတယ်

'ချင်းဟယ်မှာ ဒီလို... ဝါသနာမျိုး ရှိနေတာလား မဟုတ်ဘူး... သူက ဘေးမှာ ထိုင်နေတဲ့သူကြောင့် လေလံဆွဲနေတာပဲ'

နင်ဖုန်းကျစ်က လင်းမူကို ကြည့်လိုက်ရာ သူရဲ့ စိတ်ဝင်စားမှုက အထွတ်အထိပ်သို့ ရောက်ရှိသွားခဲ့တယ် 'ဒါဆို... ဒီလူငယ်က အိမ်ရှေ့မင်းသားရဲ့ အာရုံစိုက်မှုကို တစ်လလုံးလုံး ဖမ်းစားထားနိုင်ခဲ့တဲ့ ပါရမီရှင် လူငယ်ပေါ့လေ’