အခန်း (၄၈) - အသွင်ပြောင်းလဲခြင်း

"ရှူး..."

စုချန် သတိပြန်လည်ရရှိလာပြီးနောက် မအောင့်နိုင်ဘဲ နာကျင်စွာ ညည်းတွားလိုက်မိသည်။ သူ၏ ဦးခေါင်းတစ်ခုလုံး ပေါက်ကွဲလုမတတ် ခံစားနေရသည်။ ၎င်းက ထပ်တိုးလာသော အမှတ်တရများကြောင့် မဟုတ်ချေ။ လူသားတို့၏ ဦးနှောက်တွင် ကိုယ်ပိုင်ကာကွယ်ရေး ယန္တရား ရှိသဖြင့် အမှတ်တရများပြားလွန်းရုံဖြင့် ဝန်ပိသွားခြင်းမျိုး မရှိနိုင်ပါ။

အဓိကအကြောင်းရင်းမှာ ‘ဓားအသိစိတ်’ ကြောင့် ဖြစ်သည်။ ဓားအသိစိတ်သည် လူတစ်ဦး၏ စိတ်ဆန္ဒအတိုင်း လှုပ်ရှားပြီး မွေးရာပါ ပါရမီ သို့မဟုတ် အရည်အချင်းတို့၏ ကန့်သတ်မှုကို မခံရဘဲ သဘာဝအတိုင်း ရုပ်လုံးပေါ်လာတတ်သည်။ သို့သော် သူ၏ လက်ရှိ ခန္ဓာကိုယ်ကြံ့ခိုင်မှုနှင့် စိတ်ဝိညာဉ်အင်အား စုဆောင်းမှုတို့ဖြင့်မူ ထိုမျှ ပြင်းထန်သော ဓားအသိစိတ်ကို မထိန်းချုပ်နိုင်ချေ။

ဒါက သူ၏ နောက်ဆုံးအဆင့် ဓားအသိစိတ် ရုပ်ကလပ်ကြီး မဟုတ်တော့ပါချေ။ ထိုပြင်းထန်လှသော ဓားစွမ်းပကားလှိုင်းလုံးကြီးမှာ လွန်ခဲ့သောအချိန်ကတည်းက လုံးဝ ကုန်ခမ်းသွားခဲ့ပြီ ဖြစ်သည်။ ၎င်းအပြင် ထိုကဲ့သို့သော စွမ်းအင်ရုပ်ကလပ်မျိုးကို လက်တွေ့ကမ္ဘာသို့ ယူဆောင်လာ၍လည်း မရနိုင်ချေ။ ဤအရာသည် အတုယူဖန်တီးထားသော ကမ္ဘာတွင် သူ ဓားသိုင်းပညာအပေါ် ထိုးထွင်းသိမြင်ခဲ့မှုကြောင့် ဖြစ်ပေါ်လာသည့် ထက်မြက်လှသော အရှိန်အဝါမျှသာ ဖြစ်သည်။ သူ မည်မျှပင် ဖိနှိပ်ရန် ကြိုးစားပါစေ၊ လွတ်ထွက်လာသည့် အနည်းငယ်သော အကြွင်းအကျန် လှိုင်းထန်မှုများကပင် သူ့ကို တောင့်ခံနိုင်ရန် ခက်ခဲစေသည်။

မျက်စိတစ်မှိတ်အတွင်းမှာပင် သူ၏ မျက်စိ၊ နား၊ နှာ၊ ပါးစပ်စသည့် ခန္ဓာကိုယ်အပေါက် ခုနစ်ပေါက်မှ သွေးများ ပန်းထွက်လာခဲ့သည်။ သူ၏ သိစိတ်သည် မိမိ၏ ကိုယ်ပိုင်ဓားအသိစိတ်ကြောင့်ပင် မကြာမီ အပိုင်းပိုင်း ပြတ်တောက်သွားတော့မည်ကို စိုးရိမ် ထိတ်လန့်နေမိသည်။

ကံကောင်းထောက်မစွာဖြင့် ထိုအခိုက်အတန့်တွင်ပင် အမည်မသိ အရပ်မျက်နှာတစ်ခုဆီမှ နွေးထွေးသော လျှပ်စီးကြောင်းတစ်ခု ထွက်ပေါ်လာပြီး သူ၏ ခန္ဓာကိုယ်နှင့် သိစိတ်တို့ကို စဉ်ဆက်မပြတ် ပြန်လည်ပြုပြင်ကာ ဖြည့်တင်းပေးခဲ့သည်။

[ အဓိက တာဝန် ပြီးမြောက်မှု - ခန္ဓာကိုယ် အရည်အချင်း မြှင့်တင်ပေးခြင်း။ ]

[ အဓိက တာဝန် ပြီးမြောက်မှု - သိုင်းဝိညာဉ် ပါရမီ မြှင့်တင်ပေးခြင်း။ ]

အချက်ပေးစာသား နှစ်ခု ပေါ်လာခဲ့သည်။ စုချန်သည် လူသားခန္ဓာကိုယ်အကြောင်းကို နက်နက်ရှိုင်းရှိုင်း နားလည်ထားသူဖြစ်ရာ သူ၏ ပြောင်းလဲမှုများကို ချက်ချင်း ခံစားမိလိုက်သည်။

"ဒါက သာမန် ခန္ဓာကိုယ် ကြံ့ခိုင်လာရုံတင် မဟုတ်ဘူး"

"အရိုးတွေရဲ့ ဖွဲ့စည်းပုံ၊ အမျှင်ဓာတ်တွေရဲ့ သိပ်သည်းဆနဲ့ သွေးကြောတွေရဲ့ ရုန်းကန်နိုင်စွမ်းတွေ အားလုံး ပြောင်းလဲသွားတာပဲ။ ဒါက ဆဲလ်အဆင့်အထိ သန်မာလာတာ"

"အရေးအကြီးဆုံးကတော့ အချို့သော သွေးကြောမှတ်တွေနဲ့ အရိုးတည်နေရာတွေက အလွန်တရာ သိမ်မွေ့စွာ ပြောင်းလဲသွားပြီး အားထုတ်နိုင်စွမ်းနဲ့ ပြောင်းလွယ်ပြင်လွယ်ရှိမှုကို အများကြီး မြှင့်တင်ပေးလိုက်တာပဲ"

ဒါကို ခန္ဓာကိုယ်တစ်ခုလုံး၏ ဘက်စုံအဆင့်မြှင့်တင်မှုဟု သတ်မှတ်နိုင်ပြီး ခွန်အား၊ အမြန်နှုန်း၊ တုံ့ပြန်မှုနှင့် လှုပ်ရှားမှုအမြင်အာရုံတို့မှာ အတိုင်းအတာတစ်ခုအထိ မြင့်မားလာခဲ့သည်။

သေချာသည်မှာ အရေးအကြီးဆုံးအချက်ကတော့ အလားအလာ အဆင့်မြင့်မားလာခြင်း ဖြစ်သည်။ အကျိုးသက်ရောက်မှုက ချက်ချင်း လက်ငင်း သိသာထင်ရှားခြင်း မရှိသော်လည်း ရေရှည်အကျိုးကျေးဇူး အရဆိုလျှင် နတ်ဆေးပင်များထက် အဆပေါင်းများစွာ သာလွန်နိုင်ပြီး ဆေးအဆိပ်အတောက်များ စုပုံလာခြင်းမျိုးလည်း ရှိမည်မဟုတ်ချေ။

တစ်ချိန်တည်းမှာပင် ငါးရောင်ခြယ် သက်တံရောင်စဉ် အလင်းတန်းတစ်ခု သူ၏ ဘေးတွင် ပေါ်လာပြီး ဓားရှည်သိုင်းဝိညာဉ်တစ်ခုသည် သူ၏ ထိန်းချုပ်မှုပြင်ပ၌ ပေါ်ထွက်လာကာ ပတ်ပတ်လည်တွင် ဓားချီများ ဝဲပျံနေခဲ့သည်။

"ပါရမီနယ်ပယ်"

[ အဓိက တာဝန် ဆုလာဘ် တွက်ချက်မှု (အပိုဆုကြေး - ၂၆၅% အပါအဝင်) - ဝိညာဉ်လက်နက်နှစ်ခု နိုးထခြင်းနှင့် ထပ်ဆောင်း သိုင်းဝိညာဉ် ခွန်အား မြှင့်တင်ပေးခြင်း။ ]

စုချန်သည် သက်ပြင်းတစ်ချက်ကို ညင်သာစွာ ချလိုက်ပြီး နောက်ဆုံးတွင် သူ၏ သိစိတ်ကို တည်ငြိမ်စေကာ ပြန်လည်ကောင်းမွန်လာခဲ့သည်။ သူ၏ စိတ်ထဲတွင် သက်ပြင်းချရင်း စိတ်အေးသွားမိသည်။ လတ်တလော ဖြစ်ပျက်သွားသော အလှည့်အပြောင်းက သူ့ကို လုံးဝ အလစ်အငိုက် မိသွားစေခဲ့ခြင်း ဖြစ်သည်၊ ဓားအသိစိတ်ကြောင့် ခန္ဓာကိုယ်အပေါ် သက်ရောက်လာမည့် ဖိအားက ဤမျှ ပြင်းထန်လိမ့်မည်ဟု သူ မမျှော်လင့်ထားခဲ့ချေ။

ယခုအချိန်အထိပင် သူသည် ဓားအသိစိတ်၏ ထက်မြက်မှုကို အတတ်နိုင်ဆုံး ဖိနှိပ်ထားရဆဲ ဖြစ်သော်လည်း ရံဖန်ရံခါတွင်မူ စူးခနဲ နာကျင်မှုများ ရှိနေဆဲ ဖြစ်သည်။ သူ၏ လက်ရှိ ခွန်အားက အလွန် အားနည်းလွန်းနေသေးပြီး စိတ်ဝိညာဉ်စွမ်းအားကလည်း မြှင့်တင်ခြင်း မခံရသေးချေ။ ဝိညာဉ်ကွင်းကို စုပ်ယူပြီး ဆေးဝါးအချို့ကို အချိန်အတိုင်းအတာတစ်ခုအထိ မှီဝဲပြီးနောက်တွင်မူ သူသည် ပုံမှန်အခြေအနေသို့ ပြန်လည်ရောက်ရှိသွားနိုင်လောက်သည်။

သူ၏ လက်ချောင်းများဖြင့် နဖူးကို ညင်သာစွာ ဖိရင်း စုချန်က သက်ပြင်းချလိုက်သည်။

"ဒါပေမဲ့ နောက်ပိုင်းမှာ သိုင်းဝိညာဉ်မှာ ပထမဆုံး ဝိညာဉ်ကွင်းကို တပ်ဆင်လိုက်ရင်တောင် နောက်ထပ် ပုံတူကူးခြင်း ကို ချက်ချင်း စတင်နိုင်ဦးမှာ မဟုတ်ဘူး။ ပုံတူကူးယူခြင်းစနစ်ကို စွမ်းအင် အရင်စုဆောင်းခိုင်းထားတာက ပိုကောင်းလိမ့်မယ်"

တခြားနည်းလမ်း မရှိပါချေ၊ သူ၏ အခြေခံအုတ်မြစ်က ယခုအချိန်တွင် အလွန် အားနည်းလွန်းနေသည်။ အကယ်၍ ဤကဲ့သို့သော ဖြစ်ရပ်မျိုး ထပ်မံ ဖြစ်ပွားခဲ့လျှင် သူ ယနေ့ကဲ့သို့ ကံကောင်းပါဦးမည်လောဆိုသည်မှာ ပြောရန် ခက်ခဲလှသည်။ ဖြစ်နိုင်လျှင် စုချန်အနေဖြင့် စွန့်စားမှုများ မလုပ်လိုပါချေ၊ အထူးသဖြင့် သူ၏ ပထမဆုံး အတုယူခြင်းမှ ရရှိခဲ့သော အကျိုးအမြတ်များမှာပင် အချိန်အတိုင်းအတာတစ်ခုအထိ အစာခြေဖျက် (လေ့ကျင့်) ရန် လုံလောက်နေသောကြောင့် ဖြစ်သည်။

"ဒါပေမဲ့..."

သူသည် သူ၏ ညာဘက်လက်ကို ဆန့်ထုတ်လိုက်ရာ ဓားရှည်တစ်စင်း သူ၏ လက်ထဲတွင် ပေါ်လာခဲ့သည်။

"အပိုဆုကြေး တွက်ချက်မှုက မျှော်လင့်ထားတာထက် အများကြီး ပိုမြင့်နေတယ်။ အမြင့်ဆုံး ဆုလာဘ်ရဖို့ ၃၅% ပဲ လိုတော့တာပဲ"

သူ၏ မူလ မျှော်လင့်ချက်အရ ဆိုလျှင် ဆုလာဘ်တွက်ချက်မှုသည် ၂၅၀% ကျော်အထိ ရောက်ရှိနိုင်သည်။ အကြောင်းမှာ သူသည် တတိယမြောက်ကွင်း၏ ဆုလာဘ်များကို အပြည့်အဝ မရရှိခဲ့သလို၊ စတုတ္ထမြောက်ကွင်းအတွက် အခက်ခဲဆုံး တာဝန်ကိုလည်း မရွေးချယ်ခဲ့သောကြောင့် ဖြစ်သည်။ ၎င်းအပြင် သူ၏ အမြင်အရ ဆိုလျှင် နောက်ဆုံးတွင် ချန်းရန်ရွှဲသည် သေဆုံးသွားခဲ့ခြင်း မရှိချေ။

မျက်လုံးများကို ပိတ်ကာ ခဏမျှ တရားမှတ်ပြီးနောက် စုချန်သည် သူ၏ လက်ရှိ အခြေအနေကို ခံစားကြည့်လိုက်သည်။ သူ၏ တစ်ကိုယ်လုံးရှိ သွေးကြောများမှာ စွမ်းအင်များဖြင့် ပြည့်နှက်နေပြီး နွေးထွေးသော ခံစားမှုတစ်ခုက ခန္ဓာကိုယ်အနှံ့ စီးဆင်းနေခဲ့သည်၊ ၎င်းက မွေးရာပါ ဝိညာဉ်စွမ်းအား အဆင့် ၀.၅ သာ ရှိခဲ့စဉ်က ခံစားချက်နှင့် လုံးဝ ခြားနားလှသည်။

ယခုအခါ သူသည် မွေးရာပါ အမြင့်ဆုံး ဝိညာဉ်စွမ်းအား အဆင့်သို့ ရောက်ရှိသွားခဲ့ပြီ ဖြစ်သည်။ မဟုတ်သေးပါ၊ မွေးရာပါ အမြင့်ဆုံး ဝိညာဉ်စွမ်းအား အဆင့်သို့ ရောက်ရုံတင်မကဘဲ လက်တွေ့တွင်မူ ထိုအဆင့်ထက်ပင် အနည်းငယ် ပိုနေသေးသည်။ သို့သော်လည်း ပထမဆုံး ဝိညာဉ်ကွင်းကို မတပ်ဆင်ရသေးသရွေ့ မည်မျှ ပိုနေသည်ကို သူ အတိအကျ မဆုံးဖြတ်နိုင်သေးချေ။

ထို့နောက် သူသည် မိမိလက်ထဲက သိုင်းဝိညာဉ်ကို ကြည့်လိုက်သည်။ ၎င်းကို မြှင့်တင်ရန်အတွက် ‘လျှို့ဝှက်ဆန်းကြယ်သောကောင်းကင်ကျဉ့်စဉ်’ ကဲ့သို့သော ကျင့်စဉ်မျိုး မရှိလျှင် မွေးရာပါ ဝိညာဉ်စွမ်းအားသည် သိုင်းဝိညာဉ်၏ ခွန်အားကို ကိုယ်စားပြုသည်။

"ဒါက ‘ထာဝရဓား’ ဖြစ်လာလိမ့်မယ်လို့ ငါ ထင်မထားခဲ့ဘူး"

ဤအခိုက်အတန့်တွင် စုချန်၏ လက်ထဲ၌ လွင့်မျောနေသော ဓားသိုင်းဝိညာဉ်သည် အတုယူဖန်တီးထားသော ကမ္ဘာတွင် သူ့ထံ၌ အချိန်အကြာကြီး အဖော်ပြုခဲ့သော ဓားရှည်ပုံသဏ္ဌာန်ပင် ဖြစ်သည်။

"ဒါက ငါ့အတွက် ‘ဓားကြီးငါးပါး သံသရာ’ကို ပြန်လည်တည်ဆောက်ရာမှာ ဒုက္ခအများကြီး သက်သာစေတယ်။ ပြီးတော့ ဒီပါရမီနယ်ပယ် ကျတော့လည်း..."

သူ့ဘေးက ငါးရောင်ခြယ် သက်တံရောင်စဉ် အလင်းတန်းကို စစ်ဆေးကြည့်လိုက်ရာ ယခင်က သူ ထင်မှတ်ထားခဲ့သော ‘ဓားနယ်ပယ်’ မဟုတ်ဘဲ ‘ဓာတ်ကြီးငါးပါး နယ်ပယ်’ ဖြစ်နေသည်ကို တွေ့ရသည်။ သဘာဝအတိုင်းပင် ဒါက ကောင်းသောအချက် ဖြစ်သည်။ ဓားနယ်ပယ်သည် သူ၏ ဝိညာဉ်စွမ်းရည် အသွင်ပြောင်းလဲမှု ဖြစ်သဖြင့် နောင်တွင် သူ ပြန်လည် တည်ဆောက်နိုင်သည်။ အပြန်အလှန်အားဖြင့် စဉ်ဆက်မပြတ် ဖြည့်တင်းပေးနိုင်သော ပံ့ပိုးမှု သဘောသဘာဝ ရှိသည့် ဓာတ်ကြီးငါးပါး နယ်ပယ်ကမူ ပါရမီနယ်ပယ်အဖြစ် ရှိနေရန် ပိုမို သင့်လျော်ပေသည်။

နယ်ပယ်ကို ပြန်လည် ရုပ်သိမ်းလိုက်ပြီးနောက် စုချန်သည် အသစ်နိုးထလာသော ပံ့ပိုးမှုအမျိုးအစား သိုင်းဝိညာဉ်ကို ဆင့်ခေါ်ရန် သူ၏ ညာဘက်လက်ကို ဆန့်ထုတ်လိုက်သည်။ ၎င်းက အင်းကွက်အမျိုးအစား သိုင်းဝိညာဉ်တစ်ခု ဖြစ်နေပြီး -

"မွေးရာပါ အင်းကွက်လား"

သူ၏ ဘယ်ဘက်လက်ပေါ်တွင် လွင့်မျောနေသော ရိုးရှင်းသော်လည်း နက်နဲလှသည့် စွမ်းအင်အင်းကွက်ကို ကြည့်လိုက်ပြီးနောက် သူ၏ ညာဘက်လက်ထဲက ထာဝရဓားကို လှမ်းကြည့်ရင်း စုချန်၏ စိတ်ထဲတွင် ရုတ်တရက် အတွေးအချို့ ပေါ်လာခဲ့သည်။ သို့သော်လည်း သိုင်းဝိညာဉ်များအပေါ် သူ၏ သုတေသနပြုမှုမှာ ယခုထိ အလွန် နုနယ်သေးသဖြင့် ဒုတိယ သိုင်းဝိညာဉ်ကို တိုးတက်အောင် လုပ်ရန် အလောတကြီး မလိုသေးပါချေ။ သူသည် ထာဝရဓားကို မြှင့်တင်ရန်အတွက်သာ အရင်ဆုံး အာရုံစိုက်မည် ဖြစ်သည်။

ဤသို့ တွေးတောရင်း သူသည် စိတ်ကို တည်ငြိမ်စေလိုက်သည်။

"ငါ အရင်ဆုံး နော့ဒင်းမြို့မှာ ဝိညာဉ်မဟာဆရာသခင် အဆင့်အထိ တက်လှမ်းပြီးမှ ဘယ်အဆင့်မြင့် အကယ်ဒမီကို တက်ရရင် အဆင်ပြေမလဲဆိုတာ ကြည့်ရမယ်"

သူသည် ကုန်းမြေတိုက်ကြီးတစ်ခုလုံးရှိ အဆင့်မြင့် ဝိညာဉ်ဆရာသခင် အကယ်ဒမီများ၏ ထိပ်သီးပြိုင်ပွဲ တွင် ပါဝင်ဆင်နွှဲရန် အသင့်ပြင်ဆင်ထားပြီးဖြစ်သည်။ ထို့နောက် ချန်ပီယံဆုကို ဆွတ်ခူးပြီး ဤအခွင့်အရေးကို အသုံးပြုကာ ဝိညာဉ်နန်းတော်သို့ ဝင်ရောက်မည် ဖြစ်သည်။

"အလင်းနတ်ဘုရား အမွေအနှစ်..."

နတ်ဘုရားအဆင့်အတန်း အမွေဆက်ခံခြင်းဆိုသည်မှာ သူ ဆက်လက် သုတေသနပြုရမည့် အရာဖြစ်သည်။ အတုယူဖန်တီးထားသော ကမ္ဘာတွင် ချန်တောက်လျိူသည် သူ့အပေါ် အချို့သော အချက်များကို ဖုံးကွယ်ထားခဲ့သလို၊ ထိုအချိန်က သူ၏ မည်သူမည်ဝါဖြစ်ကြောင်း အဆင့်အတန်းမှာ ထင်သာမြင်သာ ရှိလွန်းသဖြင့် ဝိညာဉ်နန်းတော်တွင် အာရုံစိုက်မှုကို ခံခဲ့ရကာ အလင်းနတ်ဘုရား စမ်းသပ်ချက်အနားသို့ ချဉ်းကပ်ရန် ခက်ခဲခဲ့သည်။

အခြားသော နတ်ဘုရား အမွေအနှစ်များ ဖြစ်ကြသည့် ရခ်ရှာဆာနတ်ဘုရား အမွေအနှစ်ကိုမူ ဘီဘီတုန်းက ဖွင့်လှစ်ထားပြီးဖြစ်သလို၊ အသူရာနတ်ဘုရားနှင့် ပင်လယ်နတ်ဘုရားတို့၏ အမွေအနှစ်များကိုမူ သူ တို့ထိရန်ပင် မလိုလားပါချေ။ ထိုနတ်ဘုရား နှစ်ပါးသည် သူတို့၏ အမွေဆက်ခံသူများကို အလွန်အကျွံ အာရုံစိုက်တတ်ကြရာ ယခုအချိန်တွင် သူက အလွန် အားနည်းလွန်းနေသေးသဖြင့် နတ်ဘုရားလောက၏ အာရုံစိုက်မှုကို မခံယူလိုပါချေ။

ဤအမြင်အရ ဆိုလျှင် ကောင်းကင်တမန်နတ်ဘုရားသည် အကောင်းဆုံး ရွေးချယ်မှု ဖြစ်သည်။

၎င်းအပြင် စုချန်တွင် အခြားသော ရည်ရွယ်ချက်တစ်ခုလည်း ရှိသေးသည်။ သူသည် ဤကောင်းကင်တမန်နတ်ဘုရား အမွေအနှစ်တွင် တရားမဝင် ခြယ်လှယ်ထားမှုများ ရှိမရှိ စစ်ဆေးလိုသည်။ ဖြစ်နိုင်လျှင် သူသည် ဤကမ္ဘာရှိ ချန်းရန်ရွှဲကို ကူညီပေးချင်ပြီး အနည်းဆုံးတော့ သူမကို တကယ့် ကိုယ်ပိုင်ဘဝတစ်ခု ပိုင်ဆိုင်ခွင့် ပေးလိုသည်။ နှစ်ဖက်စလုံးရှိ ချန်းရန်ရွှဲတို့သည် လူတစ်ယောက်တည်း မဟုတ်ကြောင်း သူ၏ စိတ်ထဲက သိရှိနေသော်လည်း ဖြစ်သည်။

တစ်လကြာပြီးနောက်။

စုချန်သည် ရွာလူကြီး ဝမ်ဖန်းနှင့်အတူ နော့ဒင်းမြို့သို့ ရောက်ရှိလာခဲ့သည်။ ပတ်ဝန်းကျင်ကို လေ့လာရင်း သူသည် ဝမ်ဖန်း၏ အသေးစိတ် ရှင်းပြချက်များကို စိတ်ရှည်လက်ရှည် နားထောင်နေခဲ့သည်။ အတုယူဖန်တီးထားသော ကမ္ဘာတွင် သူ စူးစမ်းလေ့လာခဲ့မှုများကြောင့် ဤနေရာအကြောင်းကို ပိုမို နက်နက်ရှိုင်းရှိုင်း နားလည်ထားပြီး ဖြစ်သော်လည်း ဖြစ်သည်။

လွန်ခဲ့သော တစ်လတာအတွင်း စုချန်သည် သူ၏ ခန္ဓာကိုယ်ကို လုံးဝ ပြန်လည်ကောင်းမွန်အောင် လုပ်ဆောင်နိုင်ခဲ့ပြီး အသွင်ပြောင်းလဲသွားသော ခန္ဓာကိုယ် တည်ဆောက်ပုံနှင့်လည်း ပြည့်ပြည့်စုံစုံ လိုက်လျောညီထွေ ဖြစ်အောင် နေသားတကျ ရှိခဲ့ပြီ ဖြစ်သည်။

မကြာမီမှာပင် သူတို့သည် နော့ဒင်းရှိ အခြေခံ ဝိညာဉ်ဆရာသခင် အကယ်ဒမီ၏ သုံးဆောင်ဝင်ပေါက်ရှေ့သို့ ရောက်ရှိလာခဲ့ကြသည်။

"ဟင်?"

ခပ်လှမ်းလှမ်းရှိ နေရာတစ်ခုတွင် သက်ကြီးရွယ်အို အမျိုးသားတစ်ဦးနှင့် ကလေးငယ်တစ်ဦးတို့သည် အကယ်ဒမီ ဝင်ပေါက်ရှိ တံခါးစောင့်၏ နှောင့်ယှက်စော်ကားမှုကို ခံနေရသည့် မြင်ကွင်းကို သတိပြုမိလိုက်သဖြင့် စုချန်၏ မျက်ဝန်းများ ကျဉ်းမြောင်းသွားခဲ့လေသည်။