အခန်း (၃၈) - ကျွန်မ အခုလေးတင် ဘယ်သူ့ကို သတိရလိုက်လဲ မှန်းကြည့်ပါဦး

"ဒါကလည်း နတ်ဆေးမြက်တစ်မျိုးပဲလားဟင်"

ချန်ရန်ရွှဲသည် ကျောက်တုံးမည်းကြီးတွင် အမြစ်တွယ်နေသော အဖြူရောင် ပန်းပွင့်လေးကို ကြည့်ရှုရင်း တိုးညင်းစွာ မေးမြန်းလိုက်သည်။

"ဟုတ်တယ်... ဒီပန်းကိုတော့ 'တောင့်တဆွေးမြည့်သော အသည်းကွဲအနီရောင်ပန်း' လို့ ခေါ်တယ်၊ သမီးရဲ့ အခြေခံအုတ်မြစ်ကို မြှင့်တင်ပေးဖို့ ကူညီပေးနိုင်လိမ့်မယ်။ ဒါပေမဲ့ နတ်ဆေးမြက်တွေရဲ့ ဆေးစွမ်းက အလွန်ပြင်းထန်ပြီး ရေရှည်ခံတယ်။ တစ်ခါ သုံးစွဲပြီးသွားရင် ဆရာ အစောကပြောတဲ့ 'မိစ္ဆာမီးဖီးနစ်' မြက်ပင်ကို ထပ်ပြီး သုံးစွဲလို့မရတော့ဘူး"

ချန်ရန်ရွှဲက ထိုစကားကို ကြားသောအခါ ခေါင်းညိတ်ပြလိုက်ရင်း "ဒါဆို... ဒါကို တိုက်ရိုက်ပဲ စားရမှာလားဟင်"

"..."

ခေတ္တမျှ တိတ်ဆိတ်သွားပြီးနောက် စုချန်က စကားဆိုသည် -

"ဒီပန်းကို ခူးဆွတ်နိုင်ဖို့ဆိုရင် သမီးချစ်ရတဲ့သူအပေါ် ထားရှိတဲ့ စိတ်ရင်းမှန်ရှိဖို့ လိုအပ်သလို သမီးရဲ့ ရင်သွေးစက်နဲ့လည်း အာဟာရကျွေးရလိမ့်မယ်။ သမီးရဲ့ အချစ်က စစ်မှန်တယ်ဆိုရင်တော့ ဒီပန်းကို ခူးဆွတ်နိုင်လိမ့်မယ်"

အမှန်အတိုင်းပြောရလျှင် သူသည်လည်း ဤပန်းကို ခူးဆွတ်ရခြင်း၏ နောက်ကွယ်က သဘောတရားများကို အပြည့်အစုံ နားလည်သည်တော့ မဟုတ်ပါချေ။ သို့သော်လည်း သဘာဝတရားက ဖန်တီးပေးထားသည့် ကောင်းကင်အဆင့် နတ်ဆေးမြက်များ ဖြစ်နေသည့်အပြင် စမ်းသပ်ကြည့်ရန် အလားတူ အခြားမြက်ပင်မျိုးလည်း မရှိသဖြင့် စာအုပ်ထဲကအတိုင်းသာ ပြောဆိုလိုက်ရခြင်း ဖြစ်သည်။ သို့မဟုတ်ပါက သူကိုယ်တိုင်ပင် ဤ 'တောင့်တဆွေးမြည့်သော အသည်းကွဲအနီရောင်ပန်း' ကို သုံးစွဲကြည့်ချင်မိသည်။ ဆေးဖက်ဝင် ဂုဏ်သတ္တိပိုင်းအရ ကြည့်လျှင် ဤဝိညာဉ်ပန်းဘုရင်သည် အလွန်ပင် နူးညံ့သိမ်မွေ့ပြီး ခန္ဓာကိုယ်တွင် မည်သည့် ဘေးထွက်ဆိုးကျိုးမျှ ချန်ထားခဲ့မည်မဟုတ်ရာ သူ အဓိက လက်ခံနိုင်သည့် တစ်ခုတည်းသော နတ်ဆေးမြက်လည်း ဖြစ်သည်။

"ဒီလိုလား..."

သူ့စကားကို နားထောင်ရင်း ချန်ရန်ရွှဲသည် မိမိရှေ့ရှိ အဖြူရောင် ပန်းပွင့်လေးကို ငေးမောကြည့်ရှုလိုက်ပြီးနောက် စုချန်ကို တစ်ချက် လှမ်းကြည့်လိုက်သည်။ သူမ၏ အကြည့်ကြောင့် စုချန်၏ မျက်ခုံးများ အနည်းငယ် တွန့်သွားခဲ့ရသည်။

"သမီး စမ်းကြည့်လို့ရတယ်၊ အဆင်မပြေဘူးဆိုရင်တော့ ဟို 'မိစ္ဆာမီးဖီးနစ်' မြက်ပင်ကိုပဲ သွားစားပေါ့"

သူ့စကားပင် မဆုံးသေးမီမှာတင် တောက် ခနဲ အသံတစ်သံ ထွက်ပေါ်လာသည်။ စုချန် မော့ကြည့်လိုက်သောအခါ သွေးတစ်စက်သည် အဖြူရောင်ပန်းပွင့်လေးပေါ်သို့ ကျရောက်သွားခဲ့ပြီ ဖြစ်သည်။ သူ သတိမမူမိခင်မှာတင် 'တောင့်တဆွေးမြည့်သော အသည်းကွဲအနီရောင်ပန်း' သည် ကျောက်တုံးမည်းကြီးပေါ်မှ တိတ်တဆိတ် ကွာကျလာပြီး ချန်ရန်ရွှဲ၏ လက်ထဲသို့ ကျရောက်သွားခဲ့တော့သည်။

"..."

သူမ၏ လက်ဖဝါးထဲတွင် အသာအယာ လှုပ်ခတ်နေသော အဖြူရောင်ပန်းပွင့်လေးကို ကြည့်ရင်း မိန်းကလေး၏ နှုတ်ခမ်းဖျားတွင် မှိန်ဖျော့သော အပြုံးတစ်ခု ပေါ်လာခဲ့သည်။ ၎င်းသည် သိမ်မွေ့သော်လည်း အလွန်ပင် ရိုးသားစစ်မှန်လှသည်။ စုချန် ဝိညာဉ်မြို့တော်မှ ထွက်ခွာသွားသည့် အချိန်မှစ၍ ယခုအချိန်အထိ ဤအခိုက်အတန့်သည် သူမအတွက် အပျော်ရွှင်ဆုံး အချိန် ဖြစ်ပေလိမ့်မည်။

ရုတ်တရက် ချန်ရန်ရွှဲသည် စုချန်ဘက်သို့ လှည့်ကြည့်လိုက်ရာ သူမ၏ မျက်ဝန်းများက တောက်ပနေခဲ့သည်။

"ဆရာ... သမီး အခုလေးတင် ဘယ်သူ့ကို သတိရလိုက်လဲ မှန်းကြည့်ပါဦး"

"..."

သူမ၏ စကားကြောင့် စုချန်သည် နောက်တစ်ကြိမ် တိတ်ဆိတ်သွားရပြန်သည်။ သူ အစောပိုင်းက ဝေခွဲမရဖြစ်ခဲ့ရခြင်းမှာလည်း ဤအချက်ကြောင့်ပင်။ ယခုကဲ့သို့ အတိုင်းအတာတစ်ခုအထိ စိတ်အာရုံရှိသော နတ်ဆေးမြက်များသည် ၎င်းတို့၏ အရှင်သခင်နှင့် အပြန်အလှန် ရွေးချယ်တတ်ကြသည်။ ဤသို့ ကိုင်တွယ်ဖြေရှင်းလိုက်ခြင်းက တစ်ဖက်လူ၏ စိတ်ထဲတွင် လက်တွေ့မကျသော အတွေးများကို ပိုမိုပြင်းထန်လာစေနိုင်သည်။

သို့သော်လည်း အမှန်တကယ်တွင်တော့ ဤအရာသည် အကောင်းဆုံး ရလဒ်ပင် ဖြစ်သည်။ အကယ်၍ ချန်ရန်ရွှဲအနေဖြင့် နက်ရှိုင်းသော အစွမ်းများကို စုဆောင်းထားပြီး ဝိညာဉ်နှစ်ခုပိုင်ဆိုင်ထားသည့် ရခ်ရှာဆာနတ်ဘုရား ဘီဘီတုန်းကို အနိုင်ယူလိုပါက သာမန်ကျင့်ကြံမှုမျှဖြင့် မလုံလောက်နိုင်ပါချေ။ ထို့အပြင် ရခ်ရှာဆာနတ်ဘုရား၏ စွမ်းအားသည် သဘာဝအရ ကောင်းကင်တမန်နတ်ဘုရားကို ဖိနှိပ်နိုင်စွမ်းရှိရာ စွမ်းအားကွာဟချက်ကို ပိုမိုကြီးမားသွားစေသည်။

"မြန်မြန်ပဲ သုံးစွဲလိုက်ပါ" စုချန်က သူမ၏ အကြည့်ကို ရှောင်လွှဲရင်း မေးခွန်းကို ပြန်မဖြေဘဲ ပြောလိုက်သည်။

"ကျွန်မ..." ချန်ရန်ရွှဲက လက်ထဲက ပန်းလေးကို ကြည့်ရင်း ဝေခွဲမရဖြစ်နေရှာသည်။

"မိုက်မဲမနေနဲ့ဦး၊ ဒါက သမီးရဲ့ စွမ်းအားတွေ တိုးတက်ဖို့အတွက်ပဲ ကူညီပေးမယ့် မြက်ပင်တစ်ပင်သက်သက်ပါ။ သမီး အဲဒီတုန်းက ဖြစ်ပျက်ခဲ့တဲ့ အမှန်တရားကို မသိချင်တော့ဘူးလား"

သူ့စကားကို ကြားလိုက်ရသောအခါ ချန်ရန်ရွှဲ၏ စိတ်ပိုင်းဖြတ်မှုက ခိုင်မာသွားခဲ့သည်။ သူမသည် အရေးကြီးသောအရာကို ခွဲခြားမသိတတ်သူ မဟုတ်ရာ မှန်ကန်သော ရွေးချယ်မှုကို မည်သို့ပြုလုပ်ရမည်ကို သဘာဝကျကျပင် နားလည်သည်။ နှမြောတသဖြစ်နေသော်လည်း သူမသည် 'တောင့်တဆွေးမြည့်သော အသည်းကွဲအနီရောင်ပန်း' ကို မြိုချလိုက်တော့သည်။

ဤသည်ကို မြင်မှသာ စုချန်သည် သက်ပြင်းအသာ ချနိုင်တော့သည်။ သူမ ရုတ်တရက် ခေါင်းမာပြီး နတ်ဆေးမြက်ကို သုံးစွဲရန် ငြင်းဆန်နေမည်ကို သူ စိုးရိမ်ခဲ့ခြင်း ဖြစ်ရာ ထိုသို့ဆိုလျှင် သူ၏ ကြိုးပမ်းမှုများအားလုံး အချည်းနှီး ဖြစ်သွားပေလိမ့်မည်။

သူမ၏ ခန္ဓာကိုယ်အတွင်း၌ လှည့်ပတ်စီးဆင်းနေသော ဆေးစွမ်းအင်များကို ကြည့်ရင်း စုချန်က စိတ်ထဲကနေ ခေါင်းညိတ်မိသည်။ ဤအခြေအနေအတိုင်းဆိုလျှင် ချန်ရန်ရွှဲအနေဖြင့် အဆင့် ၅၀ ၏ အတားအဆီးကို ကျော်ဖြတ်ရန် အချိန်အကြာကြီး လိုအပ်တော့မည် မဟုတ်ချေ။

...

ရက်အနည်းငယ် ကြာပြီးနောက်...

မျှော်လင့်မထားသော ဧည့်သည်ကြောင့် ယွဲ့ကွမ်းသည် အံ့အားသင့်သွားပြီး ပြုံးလိုက်သည် - "မစ္စတာစု... ဒီနေ့ ဘယ်လိုအကြောင်းကိစ္စမျိုးကြောင့် ရောက်လာရတာလဲဗျာ"

"ဒီတိုင်းပဲ ခင်ဗျားဆီ လာလည်ရင်း လမ်းကြုံလို့ အခွင့်အရေးတစ်ခု ပေးမလို့ပါ"

သူတို့နှစ်ဦးသည် အဆင်ပြေပြေ ရှိကြသဖြင့် စုချန်က အားနာခြင်းမရှိဘဲ ပွင့်ပွင့်လင်းလင်းပင် ပြောလိုက်သည်။

"အော်..." ယွဲ့ကွမ်းက စိတ်ဝင်တစားဖြင့် တွေးတောရင်း "ဒီအခွင့်အရေးက ခင်ဗျားရဲ့ သုတေသနတွေနဲ့ ပတ်သက်နေတာလား"

"ကျွန်တော့်ရဲ့ သုတေသနက ခင်ဗျားအတွက် သိပ်ပြီး အထောက်အကူဖြစ်မှာ မဟုတ်ပါဘူး" စုချန်က ခေါင်းခါယမ်းလိုက်ရင်း သူ၏ ဝိညာဉ်သိုလှောင်ပစ္စည်းထဲမှ ကြီးမားသော ဂန္ဓမာပန်းတစ်ပွင့်ကို ထုတ်ယူလိုက်သည်။

ထိုဂန္ဓမာပန်းသည် တောက်ပသော ခရမ်းရောင်အသွင် ရှိပြီး ပွင့်ချပ်တစ်ခုချင်းစီက ပွပွလေးနှင့် ချစ်စရာကောင်းလှသည်။ ပန်းပွင့်တစ်ခုလုံးသည် တစ်ဆက်တည်းဖြစ်နေပြီး မည်သည့် အမွှေးနံ့မျှ ထွက်ပေါ်မနေသော်လည်း အလယ်က ပွင့်ဝတ်ဆံမှာမူ ပွင့်ချပ်များထက် လက်မဝက်ခန့် ထွက်ပြူနေပြီး မှိန်ဖျော့သော ရွှေရောင်အလင်းတန်းများ ဖြာထွက်နေသည်။

"ဒါကို တစ်ချက်လောက် ကြည့်လိုက်ပါဦး"

ထိုဂန္ဓမာပန်းကို ကြည့်ရင်း ယွဲ့ကွမ်းသည် မှင်တက်သွားခဲ့ရသည်။ "ဒါ... ဒါက..."

သူသည် မသိစိတ်အရပင် မိမိ၏ သိုင်းဝိညာဉ်ကို ဆင့်ခေါ်လိုက်ရာ မိမိရှေ့ရှိ ထူးခြားသော ပန်းပွင့်ကြီးနှင့် ပုံသဏ္ဌာန်ချင်း ထပ်တူကျနေပြီး လက်တွေ့နှင့် စိတ်ကူးယဉ်မှုတို့ ဆုံတွေ့သွားသကဲ့သို့ ဆွဲဆောင်မှုရှိသော မြင်ကွင်းတစ်ခု ဖြစ်ပေါ်လာခဲ့သည်။

"ရတနာခုနစ်ပါး.. မဟုတ်ဘူး၊ ဒါက 'ထူးခြားဆန်းပြားသော ဂန္ဓမာပန်း' ပဲ"

မိမိ၏ သိုင်းဝိညာဉ်နှင့် ပုံသဏ္ဌာန်ချင်း ထပ်တူကျနေသော ဤထူးဆန်းသည့် ပန်းပွင့်ကြီးကို ယွဲ့ကွမ်းအနေဖြင့် မည်ကဲ့သို့ မမှတ်မိဘဲ နေနိုင်ပါမည်နည်း။

ယွဲ့ကွမ်းသည် တုန်တုန်ရင်ရင်ဖြင့် မေးလိုက်မိသည် - "မစ္စတာစု... ဒါက..." သူ၏ တံတွေးကို အသာမြိုချလိုက်မိပြီး အသံများပင် အနည်းငယ် တုန်ယင်နေခဲ့သည်။

"ဟုတ်ပါတယ်၊ ဒါက ခင်ဗျားအတွက်ပါပဲ" စုချန်က ခေါင်းအသာညိတ်ပြလိုက်ရင်း ယွဲ့ကွမ်းအား ယူနိုင်ကြောင်း အရိပ်အယောင် ပြလိုက်သည်။

သူ့ရှေ့မှောက်ရှိ အမြဲလိုလို နူးညံ့သောအပြုံးကို ဆင်မြန်းထားတတ်သည့် ဝိညာဉ်မဟာဧကရာဇ်သည် ယခုအခါတွင်မူ ထူးထူးခြားခြား လေးနက်တည်ငြိမ်နေခဲ့သည်။

"ခင်ဗျား ဘာဖြစ်လို့ ဒီလိုလုပ်ရတာလဲ မစ္စတာစု" ယွဲ့ကွမ်းသည် ချက်ချင်း လက်ဆန့်ပြီး မယူသေးဘဲ လေးနက်စွာ မေးမြန်းလိုက်သည်။

နတ်ဆေးမြက်များ၏ တန်ဖိုးကြီးမားမှုကို အခြားသူများ ကောင်းကောင်းမသိနိုင်သော်လည်း ယွဲ့ကွမ်းကတော့ အသေအချာ သိရှိသူ ဖြစ်သည်။ ဘွဲ့အမည်ရဒိုလော် ယွဲ့ကွမ်းသည် ပန်းပင်များကို စိုက်ပျိုးခြင်းနှင့် ငေးမောကြည့်ရှုခြင်းတို့တွင် အကြီးမားဆုံး ပျော်ရွှင်မှုကို ရှာဖွေတတ်သူဖြစ်ရာ နတ်ဆေးမြက်များနှင့် ပတ်သက်၍ နားလည်မှု အလွန်နက်ရှိုင်းသည်။ မိမိရှေ့ရှိ ကောင်းကင်သို့ လှမ်းမိုးနိုင်သော ဤထူးခြားသည့် ဂန္ဓမာပန်းသည် မိမိနှင့် အကိုက်ညီဆုံး ဖြစ်သည်မှာ အမှန်ပင်ဖြစ်သော်လည်း အခြားသူများနှင့် မကိုက်ညီဟုတော့ မဆိုနိုင်ပါချေ။

ဤပန်းသည် ကြားနေ ဂုဏ်သတ္တိရှိသော နတ်ဆေးမြက်တစ်မျိုး ဖြစ်သည်။ ၎င်းကို သုံးစွဲခြင်းဖြင့် လူတစ်ဦး၏ တက်ကြွမှုကို မြှင့်တင်ပေးနိုင်ပြီး သွေးလှည့်ပတ်မှုကို ကောင်းမွန်စေကာ ခန္ဓာကိုယ်နှင့် နောင်အနာဂတ် ကျင့်ကြံမှုတို့အတွက် အကျိုးရှိစေသည်။ တစ်နည်းအားဖြင့်ဆိုရသော် စုချန်ကိုယ်တိုင် သုံးစွဲလျှင်လည်း ရနိုင်ပြီး သူ၏ ဓားသိုင်းဝိညာဉ်အတွက်လည်း အလားတူ ကိုက်ညီမှု ရှိပေသည်။

"နောင်အနာဂတ်ကျရင် ကျွန်တော်ဟာ ခင်ဗျားနဲ့ ခင်ဗျားရဲ့ အဖော်ဟောင်းကြီးတို့ဆီကနေ အကူအညီတစ်ခု လိုအပ်လိမ့်မယ်" စုချန်က မိမိ၏ ရည်ရွယ်ချက်ကို ဖုံးကွယ်မထားဘဲ ပွင့်ပွင့်လင်းလင်းပင် ပြောလိုက်သည်။ "ဒါပေမဲ့ ခင်ဗျားတို့ကို အကျပ်ရိုက်စေမယ့် အရာမျိုးတော့ မဟုတ်ပါဘူး။ ဒါတင်မကသေးပါဘူး..."

ထိုသို့ပြောရင်းဖြင့် သူသည် မိမိ၏ ဝိညာဉ်သိုလှောင်ပစ္စည်းထဲမှ နောက်ထပ် နတ်ဆေးမြက်တစ်ပင်ကို ထုတ်ယူလိုက်ပြန်သည်။

ယွဲ့ကွမ်း၏ မျက်ဝန်းများ ပြူးကျယ်သွားရသည်။ "'နတ်ပန်းသားရေရိုး' ပါလား..."

သူသည် အခြားသူ၏ လက်ထဲတွင် နောက်ထပ် နတ်ဆေးမြက်တစ်ပင် ရှိနေဦးမည်ဟု လုံးဝ မျှော်လင့်မထားခဲ့မိချေ။

"ခင်ဗျားအနေနဲ့ ဒီ 'ထူးခြားဆန်းပြားသော ဂန္ဓမာပန်း' ကို ယူထားနိုင်ပါတယ်။ ဒီ 'နတ်ပန်းသားရေရိုး' ကိုတော့ နောက်ဆုံး လုပ်အားခအဖြစ် သတ်မှတ်ပေးပါမယ်" စုချန်က တည်ငြိမ်စွာ ပြောလိုက်သည်။ "အချိန်တန်ရင် ဒါကို ခင်ဗျားရဲ့ အဖော်ဟောင်းကြီးကို ပေးလို့ရပါတယ်၊ ဒါပေမဲ့ အဲဒါကိုတော့ အလုပ်ပြီးမြောက်တဲ့ အခါကျမှပဲ ဆွေးနွေးကြတာပေါ့"

ယွဲ့ကွမ်းနှင့် ကွေ့မေတို့သည် ညီအစ်ကိုအရင်းအချာများကဲ့သို့ပင် သေအတူရှင်အမျှ အခက်အခဲများကို အတူတကွ ဖြတ်သန်းခဲ့ကြသူများ ဖြစ်သည်။ ဤအရာကို နောက်ဆုံးလုပ်အားခအဖြစ် ကမ်းလှမ်းခြင်းမှာ လုံလောက်သည်ထက်ပင် ပိုနေပါသေးသည်။

"ဒီကိစ္စကိုတော့ ဝိညာဉ်နန်းတော်သခင်မရဲ့ ဘက်အပါအဝင် ဘယ်သူ့ကိုမျှ မသိစေဘဲ လျှို့ဝှက်ထားရပါမယ်။ ဘာပဲဖြစ်ဖြစ် နန်းတော်သခင်မကလည်း ခင်ဗျားတို့ကို ဘာအကျိုးအမြတ်မှ ပေးထားတာ မရှိဘူး မဟုတ်လား။ လူဆိုတာ ကိုယ့်ရဲ့ ကိုည်ပိုင်အကျိုးစီးပွားကိုလည်း ထည့်သွင်းစဉ်းစားရတာပေါ့" စုချန်က ထပ်လောင်းပြောကြားလိုက်သည်။

ဤစကားကို ကြားလိုက်ရသောအခါ ယွဲ့ကွမ်း၏ မျက်ဝန်းများ အနည်းငယ် တွန့်သွားပြီး စုချန်ကို နက်နက်နဲနဲ တစ်ချက် စိုက်ကြည့်လိုက်သည်။

"ကျွန်တော် နားလည်ပါပြီ" သူက ပြောလိုက်ရင်း လက်ကို ဆန့်ထုတ်ကာ 'ထူးခြားဆန်းပြားသော ဂန္ဓမာပန်း' ကို လှမ်းယူလိုက်သည်။ "အချိန်တန်ရင် ဖြစ်လာမယ့် ကိစ္စကတော့ လွယ်ကူမှာမဟုတ်ဘူးလို့ ကျွန်တော် ထင်ပါတယ်။ ဒါပေမဲ့ စိတ်ချပါ၊ ကျွန်တော့်ရဲ့ ကျင့်ဝတ်စည်းကမ်းတွေကို မထိခိုက်သရွေ့တော့ ခင်ဗျားအတွက် ကျွန်တော်တို့ အစွမ်းကုန် ကူညီပေးပါ့မယ်"

"ခင်ဗျားရဲ့ ဂုဏ်သိက္ခာကို ကျွန်တော် ယုံကြည်ပါတယ်၊ ပြီးတော့ ကျွန်တော့်ရဲ့ ကတိကဝတ်ကလည်း အစစ်အမှန်ပါပဲ" စုချန်က မပြုံးဘဲ မနေနိုင်ခဲ့ချေ။ "ကျွန်တော် ခင်ဗျားတို့ကို အကျပ်မရိုက်စေပါဘူးလို့ ပြောခဲ့ပြီးသားပဲ၊ အဲဒီအတိုင်းလည်း ကတိတည်ပါ့မယ်။ ဒါတင်မကဘဲ ခင်ဗျားဟာ နတ်ဆေးမြက်တစ်ပင်ကို အလကားရလိုက်တာ ဖြစ်တဲ့အတွက် ဘယ်လိုပဲဖြစ်ဖြစ် ရှုံးစရာတော့ မရှိပါဘူး"

"တကယ်ပါပဲ..." ယွဲ့ကွမ်းက သက်ပြင်းချလိုက်ရင်း အခြားသူပြောသည်မှာ အကျိုးအကြောင်းရှိကြောင်း သဘောပေါက်သွားသည်။

သို့သော်လည်း မိမိရှေ့ရှိ ဤလူသည် အစွမ်းနည်းပါးသော်လည်း သူ့အတွက်တော့ ပိုမို၍ ခန့်မှန်းရခက်ခဲသောသူတစ်ဦး ဖြစ်လာခဲ့ရတော့သည်။