အခန်း (၁၄) ထန်စန်း၏ ကံကောင်းခြင်းများ အလုခံရခြင်းနှင့် သွေးအန်ခြင်း

ရွှေရောင်နတ်ဘုရားအလင်းတန်းများကလက်ဆုပ်လက်ကိုင် ပြနိုင်လောက်အောင် သိပ်သည်းလွန်းလှသဖြင့် တစ်ခန်းလုံးကို ခမ်းနားထည်ဝါပြီး မြင့်မြတ်လှသော နတ်ဘုရား နယ်ပယ် တစ်ခုအဖြစ် ပြောင်းလဲပေးထားသည်။

ထန်စန်းသည် ထိုနတ်ဘုရားအလင်းတန်းများ၏ ဗဟိုတည့်တည့်တွင် တင်ပျဉ်ခွေထိုင်နေပြီး သူ၏ရှေ့တည့်တည့်တွင် ပင်လယ်နတ်ဘုရားသုံးခွလှံက လွင့်မျောနေသည်။ သုံးခွလှံ၏ ဓားသွားထက်တွင် နတ်ဘုရားအရှိန်အဝါများ စီးဆင်းနေပြီး သူ၏ခန္ဓာကိုယ်ပတ်ပတ်လည်တွင် ဟုန်းဟုန်းတောက်နေသော ဝိညာဉ်စွမ်းအားများနှင့် အပြန်အလှန် ပဲ့တင်ထပ်နေကြသည်။

ပင်လယ်နတ်ဘုရား၏ ရှစ်ခုမြောက် စမ်းသပ်မှုက အရေးကြီးဆုံး အခိုက်အတန့်သို့ ရောက်ရှိနေပြီ ဖြစ်သည်။

သူ့ခန္ဓာကိုယ်ထဲရှိ ဝိညာဉ်စွမ်းအားများသည် မကြုံစဖူးသော အရှိန်နှုန်းဖြင့် လည်ပတ်နေပြီး စိမ်းပြာငွေ မင်းသားသိုင်းဝိညာဉ်နှင့် ကောင်းကင်လှုပ်ခတ်တူ သိုင်းဝိညာဉ် တို့၏ မူလအစစွမ်းအားများကလည်း အစွမ်းကုန် ပေါက်ကွဲ ထွက်ပေါ်နေသည်။

သို့သော်လည်း သူက မိမိခန္ဓာကိုယ်ထဲရှိ စွမ်းအားအားလုံးကို စုစည်းကာ နောက်ဆုံးအတားအဆီးကို အပြီးသတ် ချေမှုန်းရန် ပြင်ဆင်လိုက်သည့် အခိုက်အတန့်မှာပင် မမျှော်လင့်ထားသော ပြင်းထန်လှသည့် ရင်တုန်ပန်းတုန်ဖြစ်မှုကြီးက မည်သည့်နိမိတ်မှမရှိဘဲ သူ၏နှလုံးသားကို ရုတ်တရက် ဖမ်းဆုပ်လိုက်တော့သည်။

ထိုအရာက ဝိညာဉ်စွမ်းအား နောက်ပြန်ကန်ခြင်းကြောင့် ဖြစ်ရသည့် စူးရှသော နာကျင်မှုမျိုး မဟုတ်သလို စိတ်ဝိညာဉ်စွမ်းအား အလွန်အမင်း ကုန်ခမ်းသွားခြင်းကြောင့် ဖြစ်ရသည့် အားနည်းမှုမျိုးလည်း မဟုတ်ပေ။

ထိုခံစားချက်က ဝိညာဉ်၏ အနက်ရှိုင်းဆုံးနေရာမှ ပေါ်ထွက်လာသည့် စကားလုံးဖြင့် ဖော်ပြရန်ခက်ခဲသော ကြီးမားလှသည့် ဗလာဖြစ်သွားခြင်းမျိုးပင်။

သူ့ခန္ဓာကိုယ်ထဲတွင် မွေးရာပါပါရှိနေပြီး သူ့ကံကြမ္မာနှင့် ဆက်နွှယ်နေကာ ဘဝတစ်ခုလုံး၏ အခြေခံအုတ်မြစ် ဖြစ်နေသော အရာတစ်ခုခုကို အဆုံးမရှိသော အချိန်နှင့် အာကာသကို ကျော်လွန်ကာ ရောက်ရှိလာသည့် မျက်မြင်မရသော လက်ကြီးတစ်ဖက်က အတင်းအဓမ္မ ဆွဲထုတ်သွားသကဲ့သို့ ခံစားလိုက်ရသည်။

"ဝေါ့ "

ထန်စန်း၏ ခန္ဓာကိုယ်ကြီး ပြင်းထန်စွာ တုန်ယင်သွားပြီး ရွှေရောင်သန်းနေသော သွေးတစ်လုပ်ကို ထိန်းမနိုင်သိမ်းမရ အန်ထုတ်လိုက်ရာ သွေးများက ရှေ့မှောက်က မြေပြင်ပေါ်သို့ စင်ဟုန်သွားပြီး မာကျောလှသော ကျောက်ပြားများကို ချက်ချင်း လောင်ကျွမ်းစေကာ အပေါက်ငယ်လေးများ ဖြစ်သွားစေသည်။

သူ့ခန္ဓာကိုယ်ထဲတွင် ချောမွေ့စွာ စီးဆင်းနေသော အစွမ်းထက်သည့် ဝိညာဉ်စွမ်းအားများသည် ရုတ်တရက် ထိန်းချုပ်မှု ကင်းမဲ့သွားပြီး ဇက်ကြိုးပြတ်သွားသော မြင်းရိုင်းတစ်ကောင်ကဲ့သို့ ချီသွေးကြောများထဲတွင် ရူးသွပ်စွာ သောင်းကျန်းတော့သည်။

သွေးလေရူးသွပ်ခြင်း ဘေးဒုက္ခက ချက်ချင်း ပေါက်ကွဲထွက်ပေါ်တော့မည့် အခြေအနေသို့ ဆိုက်ရောက်သွားခဲ့ပြီ။

"မကောင်းတော့ဘူး"

ထန်စန်း အလွန်အမင်း ထိတ်လန့်သွားသည်။ သူက ဝိညာဉ်တစ်ခုလုံးကို ဆွဲဆုတ်နေသကဲ့သို့ ခံစားရစေသည့် ဗလာဖြစ်မှုကို အတင်းအကြပ် ဖိနှိပ်လိုက်ပြီး ထိန်းချုပ်မှု ကင်းမဲ့နေသော ဝိညာဉ်စွမ်းအားများကို ပြန်လည်ထိန်းချုပ်နိုင်ရန် အစွမ်းကုန် ကြိုးစားလိုက်သည်။

သူက မိမိ၏ လျှာဖျားကို ပြင်းထန်စွာ ကိုက်လိုက်ရာ စူးရှသော နာကျင်မှုက သူ့ကို ချက်ချင်း သတိပြန်ဝင်လာစေသည်။

သူသည် အတားအဆီးကို ဆက်လက်တိုက်ခိုက်ရန် မဝံ့ရဲတော့ဘဲ ထိုကြမ်းတမ်းလှသော စွမ်းအားများကို ခန္ဓာကိုယ်ထဲတွင် လှည့်ပတ်စီးဆင်းစေကာ ပြန်လည်ငြိမ်သက်သွားစေရန် ခက်ခဲစွာ လမ်းညွှန်ပေးလိုက်ရသည်။

ဤလုပ်ငန်းစဉ်က သူယခင်က တိုက်ခိုက်ခဲ့ဖူးသမျှသော မည်သည့်တိုက်ပွဲထက်မဆို ပိုမိုအန္တရာယ်များလှသည်။

အချိန်မည်မျှ ကုန်ဆုံးသွားမှန်း မသိရဘဲ ကြမ်းတမ်းနေသော ဝိညာဉ်စွမ်းအားများသည် နောက်ဆုံးတွင် ငြိမ်သက်သွားပြီး ဒန်တျန်ဆီသို့ ပြန်လည်ရောက်ရှိသွားသည်။

ကျင့်ကြံခြင်း အခန်းထဲရှိ ရွှေရောင်နတ်ဘုရား အလင်းတန်းများမှာလည်း အတော်အတန် မှေးမှိန်သွားခဲ့ပြီ ဖြစ်သည်။

ထန်စန်း၏ မျက်နှာက ပြာနှမ်းနေပြီး ခန္ဓာကိုယ်တစ်ခုလုံးလည်း အေးစက်သော ချွေးများဖြင့် ရွှဲနစ်နေကာ ရေထဲမှ ဆွဲတင်လိုက်သည့် လူတစ်ယောက်ကဲ့သို့ အသက်ကို ပြင်းထန်စွာ ရှူသွင်းနေရသည်။

သူသည် မိမိ၏ အတွင်းဒဏ်ရာများကို ကုသရန်ပင် အချိန်မပေးနိုင်ဘဲ စိတ်ကို ချက်ချင်း ပြန်လည်တည်ငြိမ်စေကာ ခန္ဓာကိုယ်ကို အသည်းအသန် ဆန်းစစ်လိုက်သည်။

ချီသွေးကြောများ ထိခိုက်ဒဏ်ရာရသွားသော်လည်း ပြင်းထန်ခြင်းမရှိပေ။ ဝိညာဉ်စွမ်းအားများစွာ ကုန်ခမ်းသွားသော်လည်း အခြေခံအုတ်မြစ်က ထိခိုက်ပျက်စီးသွားခြင်း မရှိပါ။

စိတ်အာရုံပင်လယ်ပြင်က လှုပ်ခတ်သွားသော်လည်း လျင်မြန်စွာပင် ပြန်လည်တည်ငြိမ်သွားခဲ့သည်။

အရာရာတိုင်းက သွေးလေရူးသွပ်ခြင်း မဖြစ်ပွားမီ ကြုံတွေ့ရတတ်သည့် ပုံမှန်တုံ့ပြန်မှုမျိုးသာ ဖြစ်ပုံရသည်။

ဒါပေမဲ့... ဒါက မဟုတ်သေးဘူး။

အဲဒီခံစားချက် အဲဒီဗလာဖြစ်သွားတဲ့ ခံစားချက် မိမိရဲ့ ဝိညာဉ်အစိတ်အပိုင်းတစ်ခု အတင်းအဓမ္မ ဆွဲဆုတ်ခံလိုက်ရတဲ့ ခံစားချက်က သူ့ရဲ့ နှလုံးသားထဲမှာ အခုထိ ရှိနေတုန်းပဲ အလွန်ကို ရှင်းလင်းနေပြီး အလွန်ကို စစ်မှန်လွန်းနေတယ်။

ထန်စန်း တုန်ယင်နေသော လက်ကို မြှောက်ကာ မိမိ၏ လက်ဖဝါးကို ကြည့်လိုက်မိသည်။ သူသည် ဤလောကအပေါ် ခံစားရသည့် ရင်းနှီးကျွမ်းဝင်မှု လောကကြီးက သူ့ကို ဗဟိုပြုပြီး လည်ပတ်နေသကဲ့သို့ ခံစားရသည့် ထိုသိမ်မွေ့လှသော ခံစားချက်ကြီးက မျက်စိရှေ့တွင်တင် လျင်မြန်စွာ ပျောက်ကွယ်သွားနေသည်ကို ထိတ်လန့်ဖွယ် တွေ့ရှိလိုက်ရသည်။

ယခင်က သူကျင့်ကြံသည့် အချိန်တိုင်းတွင် ကောင်းကင်နှင့် မြေကြီး၏ ဝိညာဉ်စွမ်းအင်များက သူ့ထံသို့ အလိုအလျောက် စုစည်းရောက်ရှိလာတတ်သည်။

သူ အန္တရာယ်နှင့် ကြုံတွေ့ရသည့် အခါတိုင်းတွင်လည်း အကြောင်းပြချက်မရှိဘဲ ဘေးကင်းရာသို့ အမြဲတမ်း လွတ်မြောက်နိုင်ခဲ့သည်။

သာမန်လူများ ဘယ်လိုမှ မရရှိနိုင်သော အခွင့်အရေးများနှင့် ရတနာများကိုလည်း သူက အမြဲတမ်း အလွယ်တကူ ရရှိခဲ့သည်။ သူက ဒါတွေအားလုံးကို မိမိရဲ့ ပါရမီကြောင့် မိမိရဲ့ ကြိုးစားအားထုတ်မှုကြောင့်လို့ အမြဲ ယုံကြည်ခဲ့သည်။

ဒါပေမဲ့ အခု မျက်မြင်မရတဲ့ အရှိန်အဝါ အလင်းကွင်းကြီး အတင်းအဓမ္မ အလုခံလိုက်ရတဲ့ အချိန်မှာမှ ဒါက ပါရမီကြောင့် မဟုတ်ဘဲ ပိုပြီးတော့ ဒြပ်မဲ့လှပေမယ့် တကယ်ရှိနေတဲ့ အရာတစ်ခု ဖြစ်ကြောင်းကို ထိတ်လန့်စွာ နားလည်သွားခဲ့ရသည်

သူ့မှာ မွေးရာပါ ပါရှိနေတဲ့ ထူးခြားဆန်းပြားလှတဲ့ ကံကောင်းခြင်းတွေက အတင်းအဓမ္မ လုယူခြင်းကို ခံလိုက်ရတာပဲ။

ဤနားလည်မှုက ကောင်းကင်ကိုးထပ်မှ ထွက်ပေါ်လာသည့် မိုးကြိုးတစ်ချက်ကဲ့သို့ သူ၏ ဦးခေါင်းကို ပြင်းထန်စွာ ထုနှိုက်လိုက်သဖြင့် သူတစ်ယောက် လုံးဝ ကြောင်အမ်းသွားခဲ့ရသည်။

ဒါက ဘယ်လိုလုပ် ဖြစ်နိုင်မှာလဲ။ ကံကောင်းခြင်းလိုမျိုး အရာကို လူသားတစ်ယောက်ရဲ့ စွမ်းအားနဲ့ အတင်းအဓမ္မ လုယူတာ ဒါမှမဟုတ် ဖိနှိပ်တာမျိုး ဘယ်လိုလုပ် လုပ်နိုင်မှာလဲ။

"မဟုတ်ဘူး... ဒါက မဖြစ်နိုင်ဘူး"

ထန်စန်း မိမိဘာသာ ကြောင်တောင်တောင်ဖြင့် ရေရွတ်မိနေပြီး မျက်ဝန်းများထဲတွင် မယုံနိုင်စရာ ကောင်းလောက်အောင် ထိတ်လန့်ကြောက်ရွံ့မှုများ ပြည့်နှက်နေသည်။

သူက ရုတ်တရက် ခေါင်းကို မော့လိုက်ပြီး မိမိရှေ့တွင် လွင့်မျောနေသော ပင်လယ်နတ်ဘုရားသုံးခွလှံကို လှမ်းဖမ်းလိုက်သည်။ ဒါက ပင်လယ်နတ်ဘုရား ချန်ထားခဲ့တဲ့ နတ်ဘုရားလက်နက် ဖြစ်ပြီး သူ့ရဲ့ အကြီးမားဆုံး အားကိုးရာပဲ။

သို့သော်လည်း သူ့လက်က သုံးခွလှံကို ဖမ်းဆုပ်လိုက်သည့် အခိုက်အတန့်မှာပင် သုံးခွလှံထံမှ ပြင်းထန်လှသော တုန်ခါမှုကြီးတစ်ခု ထွက်ပေါ်လာခဲ့သည်။

ဝှီး.... ဝှီး ....

ယခင်က သူ့စကားကို အမြဲ နားထောင်ပြီး ခေါ်ရလွယ်ကူလှသော နတ်ဘုရားလက်နက်ကြီးက ယခုအခါတွင်မူ သဘာဝရန်သူရဲ့ အရှိန်အဝါကို ခံစားလိုက်ရတဲ့ ထောင်ချောက်မိနေတဲ့ သားရဲတစ်ကောင်လို သူ့လက်ထဲမှာ ပြင်းထန်စွာ တုန်ခါနေပြီး စိုးရိမ်ပူပန် တုန်လှုပ်နေတဲ့ မြည်ဟီးသံတွေကို ထုတ်လွှတ်နေသည်။

သုံးခွလှံထက်ရှိ စူးရှတောက်ပသော နတ်ဘုရားအလင်းတန်းများမှာလည်း မှိတ်တုတ်မှိတ်တုတ် ဖြစ်လာပြီး အလွန်အမင်း မတည်မငြိမ် ဖြစ်နေခဲ့ပြီ။ ပင်လယ်နတ်ဘုရားသုံးခွလှံ၏ တုံ့ပြန်မှုက ထန်စန်း၏ နောက်ဆုံး စိတ်ဓာတ်ကာကွယ်ရေးစည်းကို လုံးဝ ရိုက်ချိုးဖျက်ဆီးပစ်လိုက်သည်။

နတ်ဘုရားလက်နက်ကတောင် သတိပေးချက်တွေ ထုတ်ပြန်နေပြီ။သူ့ရဲ့ ကံကောင်းခြင်းတွေ တကယ်ပဲ ပြဿနာတက်သွားခဲ့ပြီ။

"စန်းလေး ဘာဖြစ်တာလဲ"

ကွက်တိပင် ကျင့်ကြံခြင်းအခန်း၏ တံခါးက ရုတ်တရက် အတင်းတွန်းဖွင့်ခြင်း ခံလိုက်ရပြီး စိုးရိမ်ပူပန်နေသော လူရိပ်တစ်ခု ပြေးဝင်လာခဲ့သည်။

ကျင့်ကြံခြင်းအခန်းထဲက လှုပ်ရှားမှုတွေကို ကြားလိုက်ရသဖြင့် ယွီရှောင်ကန်းတစ်ယောက် တစ်ခုခု မှားယွင်းနေပြီဆိုတာကို ရိပ်မိပြီး ချက်ချင်း ပြေးဝင်လာခဲ့ခြင်း ဖြစ်သည်။

သူ ထန်စန်း၏ စိတ်ပျက်အားလျော့ကာ သေလုမတတ် ဖြူဖျော့နေသော ရုပ်သွင်ကို မြင်လိုက်ရသည့်အခါ ချက်ချင်း ထိတ်လန့်သွားတော့သည်။

"ဆရာ..."

ထန်စန်း ဖြည်းညှင်းစွာ ခေါင်းကို မော့ပြီး သူ့ရဲ့ ဆရာဖြစ်သူကို ကြည့်လိုက်သည်။ အမြဲတမ်း ယုံကြည်မှုနဲ့ ပြတ်သားမှုတွေ ပြည့်နှက်နေခဲ့တဲ့ အဲဒီမျက်ဝန်းတွေထဲမှာ အခုတော့ အဆုံးမရှိတဲ့ ဝေခွဲမရမှုတွေနဲ့ ကြောက်ရွံ့မှုတွေပဲ ပြည့်နှက်နေခဲ့ပြီ။

"ဘာဖြစ်တာလဲ မင်းရဲ့ ဒဏ်ရာက"

ယွီရှောင်ကန်း အလျင်အမြန် ရှေ့သို့ လျှောက်လှမ်းသွားပြီး မြေပြင်ပေါ်က ရွှေရောင်သွေးကွက်ကြီးကို ကြည့်ကာ ရင်ထဲမှာ နာကျင်သွားရသည်။ ထန်စန်း ပြန်မဖြေပေ။ သူက ပင်လယ်နတ်ဘုရားသုံးခွလှံကိုသာ လက်ထဲတွင် တင်းကျပ်စွာ ဆုပ်ကိုင်ထားပြီး အားစိုက်လွန်းလှသဖြင့် လက်ဆစ်များပင် ဖြူလျော့နေကာ လက်ဖမိုးပေါ်က အကြောပြာကြီးများလည်း ထောင်ထနေခဲ့သည်။

သူက သွားကို တင်းတင်းကြိတ်ထားပြီး စကားလုံးတစ်လုံးချင်းစီကို သွားကြားထဲကနေ အတင်းညှစ်ထုတ်နေသကဲ့သို့ ပြောလိုက်ရာ သူ၏ အသံက ဝင်အက်နေပြီး လူသံနဲ့ပင် မတူတော့ပေ။

"ကျွန်တော့်ရဲ့ ကံကောင်းခြင်းတွေ ဖိနှိပ်ခံလိုက်ရပြီ"

"ဘာ"

ဒီစကားကို ကြားလိုက်ရသည့်အခါ ယွီရှောင်ကန်းတစ်ယောက် လုံးဝ ဆွံ့အသွားပြီး ထိုနေရာမှာတင် တောင့်တင်းသွားခဲ့သည်။ သူက ထန်စန်းကို မျက်လုံးအဝိုင်းသားဖြင့် စိုက်ကြည့်နေမိပြီး မိမိနားကြား မှားသွားတာလားဆိုပြီး မယုံနိုင်အောင် ဖြစ်နေမိသည်။

ကံဇာတာကို ဖိနှိပ်တာလား

ရှေးဟောင်းဒဏ္ဍာရီတွေထဲမှာပဲ ရှိတတ်တဲ့ အဲဒီလိုမျိုးအရာက တကယ်ပဲ ဖြစ်ပျက်လာနိုင်တာလား

ဒါပေမဲ့ သူ ထန်စန်း၏ မျှော်လင့်ချက်မဲ့ကာ လုံးဝပြိုလဲလုနီးပါး ဖြစ်နေသော အမူအရာနှင့် သူ့လက်ထဲတွင် တုန်ရီလျက် မြည်တမ်းနေသော ပင်လယ်နတ်ဘုရားသုံးခွလှံကို မြင်လိုက်ရသည့်အခါတွင်မူ ဝိညာဉ်မြို့တော်ဆီမှ မကြာသေးမီကမှ ရောက်ရှိလာခဲ့ပြီး သူကိုယ်တိုင်လည်း အဓိပ္ပာယ်မရှိဘူးဟု သတ်မှတ်ထားခဲ့သော သတင်းတစ်ခုက သူ့စိတ်ထဲတွင် ရုတ်တရက် ပေါ်လာခဲ့သည်။

ရွှေရောင် မင်္ဂလာစာလွှာ... ရှေးဟောင်းနတ်‌ဆရာတစ်ဆယ့်ရှစ်ဆင့်သော ကောင်းကင်ဘုံ မင်္ဂလာစေ့စပ်လက်ဆောင် ယွီရှောင်ကန်း၏ မျက်နှာက ထန်စန်းထက်ပင် ပိုမိုဖြူဖျော့သွားခဲ့ပြီး နှုတ်ခမ်းများ တုန်ယင်လျက် အသံကလည်း တုန်ယင်နေခဲ့သည်

"ဒါက... ဒါက အဲဒီဆန်းကြယ်တဲ့ နတ်‌ဆရာရဲ့... ဒုတိယမြောက် မင်္ဂလာစေ့စပ်လက်ဆောင်ကြောင့်လား"

ဂျိန်း....

ယွီရှောင်ကန်း၏ ခန့်မှန်းချက်က မီးပွားတစ်ခုကဲ့သို့ ထန်စန်း၏ နှလုံးသားထဲက ကြောက်ရွံ့မှု ယမ်းပုလင်းကို ချက်ချင်း ရှို့မြိုက်လိုက်သဖြင့် ၎င်းက အပြည့်အဝ ပေါက်ကွဲသွားပြီး ကောင်းကင်တုန်ဟည်းမတတ် ပြင်းထန်လှသော သတ်ဖြတ်လိုစိတ်များအဖြစ် ပြောင်းလဲသွားတော့သည်။

"နတ်‌ဆရာ ရှန်ရိချန်"

ဒီအမည်က တစ်ခါပြန်ပေါ်လာပြန်ပြီ။

အော်... ဒါကြောင့်ကိုး။ ဒါတွေအားလုံးရဲ့ မြစ်ဖျားခံရာက အမှန်တကယ်တော့ အဲဒီတစ်ခါမှ မတွေ့ဖူးတဲ့လူက ဟူလီနာ့ကို ပေးလိုက်တဲ့ ဒုတိယမြောက် မင်္ဂလာစေ့စပ်လက်ဆောင်ကြောင့် ဖြစ်နေတာကိုး။

"အား...."

ထန်စန်း ရုတ်တရက် ရိုင်းစိုင်းလှသော သားရဲတစ်ကောင်လို အော်ဟစ်မြည်ဟီးလိုက်ပြီး သူ၏ မျက်ဝန်းများထဲတွင် သွေးကြောမျှင်များ ချက်ချင်း နီရဲလာကာ အဆုံးမရှိသော သတ်ဖြတ်လိုစိတ်များနှင့် နာကျည်းမှုများက သူ့ခန္ဓာကိုယ်ထဲမှ ရူးသွပ်စွာ ပေါက်ကွဲထွက်ပေါ်လာတော့သည်။ သူ့မှာ ဘာအရည်အချင်း ရှိလို့လဲ။

အဲဒီ နတ်‌ဆရာ ရှန်ရိချန်ဆိုတဲ့ကောင်က ဘာမို့လို့လဲ။ ဘာဖြစ်လို့ သူတို့က မင်္ဂလာစေ့စပ်လက်ဆောင်လို့ ခေါ်တဲ့အရာတစ်ခုတည်းနဲ့တင် မိမိတို့ရဲ့ ရပိုင်ခွင့်ရှိတဲ့ အရာအားလုံးကို လုယူသွားရမှာလဲ။

"မင်း ဘယ်သူပဲဖြစ်ဖြစ် မင်း ဘယ်လောက်ပဲ သန်မာသန်မာ"

ထန်စန်းသည် လက်ထဲက ပင်လယ်နတ်ဘုရားသုံးခွလှံကို တင်းကျပ်စွာ ဆုပ်ကိုင်ထားပြီး ဒေါသစိတ်ကြောင့် မျက်နှာတစ်ခုလုံး ပုံပျက်ပန်းပျက် ဖြစ်နေကာ ရူးသွပ်မှုများနှင့် ရက်စက်ကြမ်းကြုတ်မှုများ ပြည့်နှက်နေသည်

"မင်းက ဖိုခနောက်အစုတ်တစ်ခုနဲ့ ငါ့ရဲ့ ကံကြမ္မာကို ဖိနှိပ်ချင်တာလား မင်းက ငါ့ရဲ့ နတ်ဘုရားဖြစ်မယ့်လမ်းကြောင်းကို ဖြတ်တောက်ချင်တာလား"

"အိပ်မက်ပဲ"

"ငါ ထန်စန်းရဲ့ ကံကြမ္မာက ငါ့လက်ထဲမှာပဲ ရှိတယ် ဘယ်သူမှ ငါ့လမ်းကို လာပိတ်လို့မရဘူး လာပိတ်တဲ့ နတ်ဘုရားရှိရင် နတ်ဘုရားကို သတ်မယ် ဗုဒ္ဓရှိရင် ဗုဒ္ဓကို သတ်မယ်"

သူက လက်ထဲက ပင်လယ်နတ်ဘုရားသုံးခွလှံကို မိမိရှေ့က မြေပြင်ပေါ်သို့ ပြင်းထန်စွာ စိုက်ချလိုက်တော့သည်။ စူးရှလှသော သတ္တုချင်း ရိုက်ခတ်မိသည့် အသံကြီးနှင့်အတူ အလွန်အမင်း မာကျောလှသော နန်းတော်ကြမ်းပြင်ကြီးက သုံးခွလှံ၏ စွမ်းအားကြောင့် ပေါက်ကွဲသွားပြီး ပင့်ကူအိမ်သဏ္ဌာန် အက်ကြောင်းကြီးများ ထွက်ပေါ်လာခဲ့သည်။ မည်သည့်ခံစားချက်မျှ မပါရှိဘဲ အရိုးထဲအထိ အေးစိမ့်သွားစေမည့် သတ်ဖြတ်လိုစိတ် အရှိန်အဝါများက ထန်စန်းကို ဗဟိုပြုပြီး အပြင်ဘက်သို့ လှိုင်းလုံးကြီးတစ်ခုကဲ့သို့ ပြန့်နှံ့သွားတော့သည်။

တစ်ခန်းလုံး၏ အပူချိန်မှာလည်း ထိုအခိုက်အတန့်တွင် ရေခဲမှတ်အထိ ရုတ်တရက် ကျဆင်းသွားခဲ့တော့သည်။