အခန်း ၄၀ အရောင်းအဝယ် အောင်မြင်စွာ ပြီးဆုံးခြင်း

ရွှေချင်းဟော်၏ စိတ်လှုပ်ရှားနေသော အသံ ထွက်ပေါ်လာသောအခါ ယန်ရှောင်က သူ့ကို ကြည့်ကာ "စိတ်မကောင်းပါဘူး အိမ်ရှေ့မင်းသားအရှင်... ဝိညာဉ်အဆင့်တက်ဆေးလုံး ငါးရာနဲ့ နက်ရှိုင်းသောရေဆေးလုံး ငါးရာစလုံးကို ကျွန်တော် ဦးလေးနင်ဆီ အားလုံး ရောင်းချပေးလိုက်ပါပြီ" ဟု ဆိုလိုက်သည်။

ယန်ရှောင်၏ စကားကို ကြားရသောအခါ ရွှေချင်းဟော်က ကမန်းကတန်းပင် "ညီလေး ယန်ရှောင်... တစ်လုံးမှတောင် မကျန်တော့ဘူးလား" ဟု ထပ်မံ မေးမြန်းလိုက်သည်။

"တစ်လုံးမှ မကျန်တော့ပါဘူး"

ယန်ရှောင်၏ ပြတ်သားသော စကားကြောင့် ရွှေချင်းဟော်၏ မျက်နှာတွင် စိတ်ပျက်ရိပ်များ ယှက်သန်းသွားခဲ့သည်။ သူက နင်ဖုန်းကျစ်ဘက်သို့ လှည့်ကာ "ဆရာ... ခုနစ်ပါးရတနာမျှော်စင်ဂိုဏ်းဆီကနေ ဆေးလုံးအချို့ကို ကောင်းကင်အင်ပါယာဆီ ပြန်လည်မျှဝေရောင်းချပေးလို့ မရဘူးလားခင်ဗျာ။ ဆရာလည်း သိတဲ့အတိုင်း... ကောင်းကင်အင်ပါယာရဲ့ ဝိညာဉ်ဆရာတွေကလည်း သူတို့ရဲ့ ကျင့်ကြံခြင်းကို မြှင့်တင်ဖို့ လိုအပ်နေတာမို့လို့ပါ" ဟု ဆိုလေသည်။

ရွှေချင်းဟော်က နင်ဖုန်းကျစ်ထံမှ ဆေးလုံးများကို ခွဲတမ်းတောင်းခံနေသည်ကို ကြည့်ပြီး ယန်ရှောင် စိတ်ထဲမှ အံ့သြမိသည်။ အခြားသူများ မသိသော်လည်း... ယန်ရှောင်မူ ရွှေချင်းဟော်၏ တကယ့်အထောက်အထားကို ကောင်းကောင်းသိသည်။ သူက ဝိညာဉ်နန်းတော် ၏ အဓိပတိချုပ်၏ သမီး ဖြစ်သည်။ ထို့ကြောင့် ရွှေချင်းဟော်သည် ဤဆေးလုံးများကို ဝယ်ယူပြီးပါက ကောင်းကင်အင်ပါယာမှ ဝိညာဉ်ဆရာများအတွက် အသုံးပြုမည်မဟုတ်ဘဲ ဝိညာဉ်နန်းတော်ဆီသို့သာ သေချာပေါက် ပေးပို့လိမ့်မည်ဟု ယန်ရှောင် အခိုင်အမာ သံသယဝင်မိသည်။

ထို့အပြင် ယန်ရှောင်သည် လက်ရှိတွင် ဝိညာဉ်နန်းတော်၏ လိုက်လံဖမ်းဆီးခြင်းကို ခံနေရသူ ဖြစ်သည်။ အကယ်၍ ရွှေချင်းဟော်သာ မိမိတွင် ဤကဲ့သို့သော ဆေးလုံးများ ထုတ်လုပ်နိုင်သည့် လျှို့ဝှက်ချက်ရှိကြောင်း ဝိညာဉ်နန်းတော်သို့ သတင်းပေးပို့လိုက်ပါက ဝိညာဉ်နန်းတော်သည် သူ့ကို မည်သည့်တန်ဖိုးပဲပေးရပေးရ အသေအလဲ လိုက်လံလုပ်ကြံလိမ့်မည် ဖြစ်သည်။ ဤအချက်ကို တွေးမိသောအခါ ယန်ရှောင် ကျောချမ်းသွားခဲ့ရသည်။ သူသည် ကျူးကျူးချင်းနှင့် နင်ရုန်ရုန်တို့ကို ကျင့်ကြံခြင်းအမြန်မြှင့်တင်ရန် တိုက်တွန်းရတော့မည် ဖြစ်ကြောင်း သို့မဟုတ်ပါက ဝိညာဉ်နန်းတော်က လိုက်မီလာလျှင် သူ သေချာပေါက် အန္တရာယ်ကြုံရမည်ဖြစ်ကြောင်း သဘောပေါက်သွားသည်။

ထို့ကြောင့် ယန်ရှောင်သည် ခုနစ်ပါးရတနာမျှော်စင်ဂိုဏ်းနှင့် အရောင်းအဝယ်ကိစ္စ ပြီးပြတ်သည်နှင့်တစ်ပြိုင်နက် ကောင်းကင်မြို့တော်မှ ချက်ချင်းထွက်ခွာပြီး ပါရမီရှင်များကို ပျိုးထောင်ရန် အခြားနေရာတစ်ခုသို့ ပြောင်းရွှေ့ရန် စီစဉ်လိုက်တော့သည်။

ယန်ရှောင်တစ်ယောက် မြို့တော်မှထွက်ခွာပြီးနောက် မည်သည့်နေရာသို့ သွားရမည်ကို အတွေးပွားနေစဉ် နင်ဖုန်းကျစ်က ရွှေချင်းဟော်ကို ကြည့်ကာ "ချင်းဟော်... ဆရာ့အနေနဲ့ ဒီဆေးလုံးတွေကို ခွဲပြီး မင်းကို မရောင်းပေးနိုင်တာကို မင်းလည်း နားလည်ပေးရမယ်။ ငါတို့ ခုနစ်ပါးရတနာမျှော်စင်ဂိုဏ်းရဲ့ ခုနစ်ပါးရတနာမျှော်စင် ဝိညာဉ်ဆရာတွေဟာ ဝိညာဉ်စွမ်းအား တိုးတက်ဖို့အတွက် အခြားဂိုဏ်းသားတွေထက် ပိုပြီးတော့တောင် ခက်ခဲလွန်းလို့ပါ" ဟု ဆိုလိုက်သည်။

နင်ဖုန်းကျစ်၏ ငြင်းဆိုမှုကို ကြားသောအခါ ရွှေချင်းဟော် ဘာမျှထပ်မပြောတော့ချေ။ ခုနစ်ပါးရတနာမျှော်စင်ဂိုဏ်းသည် အဖွဲ့အစည်းကြီးတစ်ခုဖြစ်ပြီး ၎င်းတို့ကိုယ်တိုင်ပင် ဤဆေးလုံးများကို အကြီးအကျယ် လိုအပ်နေသည်ကို သူ သိထားသောကြောင့် ဖြစ်သည်။ သူက မတတ်သာဘဲ ယန်ရှောင်ဘက်သို့ ပြန်လှည့်ကာ "ညီလေး ယန်ရှောင်... မင်းဆီမှာ အဲဒီဆေးလုံးမျိုးတွေ နောက်ထပ် မရှိတော့ဘူးလား" ဟု ထပ်မံ စမ်းသပ်မေးမြန်းလိုက်သည်။

ရွှေချင်းဟော်၏ မေးခွန်းကို ရင်ဆိုင်ရသောအခါ ယန်ရှောင်က "လောလောဆယ် ကျွန်တော့်လက်ထဲမှာတော့ ဒီလောက်ပဲ ရှိပါသေးတယ်။ အကယ်လို့ အိမ်ရှေ့မင်းသားအရှင်က တကယ်ပဲ အလိုရှိတယ်ဆိုရင်တော့... ကျွန်တော် နောက်ပိုင်းကျရင် နည်းလမ်းရှာပြီး အရှင်မင်းသားအတွက် ပြင်ဆင်ပေးဖို့ ကြိုးစားကြည့်ပါ့မယ်" ဟု လိမ္မာပါးနပ်စွာ အဖြေပေးလိုက်သည်။

ယန်ရှောင်၏ အဖြေကို ကြားရသောအခါ ရွှေချင်းဟော်သည် ယန်ရှောင်က တိုက်ရိုက်လည်း မငြင်းသလို အတည်လည်း မပြုသည့်အတွက် သူ၏လက်ထဲတွင် ထိုဆေးလုံးများ နောက်ထပ် ရှိနေသေးသည် ထို့အပြင် အမြောက်အမြားပင် ရှိနိုင်သော်လည်း မိမိနှင့် တိုက်ရိုက်အရောင်းအဝယ်မလုပ်ရဲသေးခြင်းသာ ဖြစ်လိမ့်မည်ဟု ခံစားလိုက်ရသည်။

လူတိုင်း ကိုယ့်အတွေးနှင့်ကိုယ် ရှိနေကြစဉ် အရိုးတုန့်လော့သည် သူ၏ ဝိညာဉ်အသုံးအဆောင်ပစ္စည်းထဲမှ ရွှေဒင်္ဂါးပေါင်း ၁၀ သန်းကို ထုတ်ယူလိုက်သည်။ မြေပြင်ပေါ်တွင် တောင်တစ်လုံးကဲ့သို့ ပုံကျလာသော ရွှေဒင်္ဂါးတောင်ကြီးကို မြင်လိုက်ရသောအခါ အခန်းထဲရှိ လူအားလုံး အသက်ရှူမှားမတတ် ဖြစ်သွားကြရသည်။ ဘာပဲဖြစ်ဖြစ် ဤမျှများပြားလှသော ရွှေပုံကြီးကို မြင်လျှင် မည်သူမျှ စိတ်မလှုပ်ရှားဘဲ မနေနိုင်ချေ။ ငွေကြေးအလွန်အမင်း ချမ်းသာကြွယ်ဝလှသော ခုနစ်ပါးရတနာမျှော်စင်ဂိုဏ်းမှ လူများပင်လျှင် ရင်သပ်ရှုမော ဖြစ်သွားကြရသည်။

"ယန်ရှောင်... ဒင်္ဂါးအရေအတွက် မှန်မမှန် စစ်ဆေးကြည့်ပါဦး။ အကယ်လို့ မှန်ကန်တယ်ဆိုရင်တော့ ငါတို့ ကုန်ပစ္စည်းနဲ့ ငွေ တိုက်ရိုက်လဲလှယ်ကြတာပေါ့"

နင်ဖုန်းကျစ်၏ စကားသံကြောင့် ယန်ရှောင်သည် ရွှေဒင်္ဂါးပုံကြီးဆီမှ အကြည့်ကို လွှဲလိုက်ပြီး "ဦးလေးနင်... ကျွန်တော် ခုနစ်ပါးရတနာမျှော်စင်ဂိုဏ်းရဲ့ ဂုဏ်သိက္ခာကို ယုံကြည်ပါတယ်။ ဒါ့အပြင် ရုန်ရုန်ကလည်း ကျွန်တော့်နောက်လိုက်ပြီး ကျင့်ကြံရဦးမှာဆိုတော့... အကယ်လို့ ငွေလိုတာရှိရင် သူမဆီကပဲ အကြွေးပြန်တောင်းလိုက်ရုံပါပဲ ဟားဟားဟား..." ဟု စနောက်လိုက်သည်။

ယန်ရှောင်၏ ပြက်လုံးကို ကြားသောအခါ နင်ဖုန်းကျစ်က "မင်း ရဲရဲလုပ်ကြည့်လေ။ အကယ်လို့ ရုန်ရုန်ရဲ့ ဆံပင်တစ်ပင်ပဲ ထိခိုက်ကြည့်... မင်း နောင်တရစေရမယ် ဟားဟားဟား..." ဟု ရယ်မောကာ ပြန်လည်ချေပလိုက်သည်။

ဘေးတွင် မတ်တတ်ရပ်နေသော နင်ရုန်ရုန်သည် မိမိဖခင်နှင့် ယန်ရှောင်တို့က မိမိအား အုပ်စုဖွဲ့၍ စနောက်နေကြသည်ကို မြင်သောအခါ ချက်ချင်းပင် မျက်နှာတစ်ခုလုံး နီမြန်းသွားခဲ့ရသည်။ သူမက ယန်ရှောင်နှင့် နင်ဖုန်းကျစ်တို့ကို မျက်စောင်းထိုးကာ "သမီး ရှင့်တို့ကို လုံးဝ အဖက်မလုပ်တော့ဘူး" ဟု ဆိုကာ အခန်းထဲမှ ဝုန်းဒိုင်းကြဲ၍ ပြေးထွက်သွားခဲ့တော့သည်။

နင်ရုန်ရုန် ရှက်ကိုးရှက်ကန်းဖြင့် အခန်းထဲမှ ပြေးထွက်သွားသည်ကို ကြည့်ကာ အခန်းထဲရှိ လူအားလုံး သဘောကျစွာ ဝါးလုံးကွဲ ရယ်မောလိုက်ကြသည်။

ရယ်မောပြီးနောက် ယန်ရှောင်သည် မြေပြင်ပေါ်ရှိ ရွှေဒင်္ဂါးအားလုံးကို သူ၏ ဝိညာဉ်အသုံးအဆောင်ပစ္စည်းထဲသို့ အရင်ဆုံး ထည့်သွင်းလိုက်ပြီး စနစ်အတွင်းရှိ စနစ်ဒင်္ဂါးများအဖြစ် ချက်ချင်း လဲလှယ်လိုက်သည်။ အကြောင်းမှာ သူ၏လက်ထဲတွင် ထိုဆေးလုံးနှစ်မျိုးကို လဲလှယ်ရန် စနစ်ဒင်္ဂါး လုံလောက်စွာ မရှိသေးသောကြောင့် ဖြစ်သည်။ ဆေးလုံးများကို လဲလှယ်ပြီးနောက် ယန်ရှောင်သည် ကြိုတင်ဝယ်ယူထားသော ဆေးပုလင်းများထဲသို့ ဆေးလုံးများကို အညီအမျှ ထည့်သွင်းလိုက်ပြီး ၎င်းတို့ကို အပြင်သို့ ထုတ်ယူလိုက်တော့သည်။

မြေပြင်ပေါ်တွင် စီစီရီရီ ရှိနေသော ဆေးပုလင်းများကို မြင်လိုက်ရသောအခါ နင်ဖုန်းကျစ်၏ အသက်ရှူသံများ မြန်ဆန်လာခဲ့သည်။ ဤဆေးလုံးများသည် ခုနစ်ပါးရတနာမျှော်စင်ဂိုဏ်း၏ အလုံးစုံအင်အားကို နောက်တစ်ဆင့်သို့ မြှင့်တင်ပေးနိုင်မည့် အဓိကသော့ချက်များ မဟုတ်ပါလား။

ယန်ရှောင်က နင်ဖုန်းကျစ်ကို ကြည့်ကာ "ဦးလေးနင်... ဒီမှာ စုစုပေါင်း ဆေးပုလင်း ၁၀၀ ရှိပါတယ်။ အဲဒီထဲမှာ ဝိညာဉ်အဆင့်တက်ဆေးလုံး ၅၀ ပုလင်းနဲ့ နက်ရှိုင်းသောရေဆေးလုံး ၅၀ ပုလင်း ပါဝင်ပါတယ်။ ပုလင်းတစ်ပုလင်းချင်းစီမှာ ဆေးလုံး ၁၀ လုံးစီ ပါဝင်တဲ့အတွက်... ကျေးဇူးပြုပြီး ရေတွက်ကြည့်ပေးပါဦး" ဟု ဆိုလိုက်သည်။

ဆေးပုလင်း တစ်ရာကို ကြည့်ကာ နင်ဖုန်းကျစ်သည် မိမိဘေးရှိ အရိုးတုန့်လော့နှင့် ဓားတုန့်လော့တို့ဘက်သို့ လှည့်ကြည့်လိုက်သည်။ တိုက်တန်တုန့်လော့ ဆရာကြီးနှစ်ဦးက နင်ဖုန်းကျစ်ကို ခေါင်းညိတ်ပြလိုက်သဖြင့် နင်ဖုန်းကျစ်က ယန်ရှောင်ဘက်သို့ ပြန်လှည့်ကာ "မိတ်ဆွေငယ် ယန်ရှောင်... ဆရာလည်း မင်းကို ယုံကြည်ပါတယ်" ဟု ပြောလိုက်သည်။

ထို့နောက် သူက အရိုးတုန့်လော့ကို ခေါင်းညိတ်ပြလိုက်ရာ... အရိုးတုန့်လော့က ရှေ့သို့လှမ်းလာပြီး ဆေးပုလင်း ၁၀၀ စလုံးကို သူ၏ ဝိညာဉ်အသုံးအဆောင်ပစ္စည်းထဲသို့ သိမ်းဆည်းလိုက်သဖြင့် အရောင်းအဝယ်ကိစ္စသည် အောင်မြင်စွာ ပြီးဆုံးသွားခဲ့တော့သည်။

အရောင်းအဝယ် ပြီးမြောက်သွားပြီးနောက် နင်ဖုန်းကျစ်သည် အရိုးတုန့်လော့ထံမှ ဆေးပုလင်း နှစ်ပုလင်းကို ပြန်လည်ထုတ်ယူကာ ရွှေချင်းဟော်ထံသို့ ကမ်းပေးလိုက်သည်။

"ချင်းဟော်... ဒီဆေးလုံး အလုံး ၂၀ ကို မင်းအတွက် ပေးတာပါ။ ဆရာ့အနေနဲ့ အများကြီး ခွဲမပေးနိုင်ပေမဲ့ ဒီအလုံး ၂၀ ကို မင်းကိုယ်တိုင် ကျင့်ကြံဖို့နဲ့ မင်းဘေးနားက လူတွေကို ပျိုးထောင်ဖို့အတွက် သိမ်းထားလိုက်ပါ။ မင်းရဲ့ ကျင့်ကြံခြင်းအဆင့်က မတိုးတက်တာ တော်တော်ကြာနေပြီဆိုတာ ဆရာ သတိထားမိလို့ပါ"

ရွှေချင်းဟော်သည် နင်ဖုန်းကျစ်၏ ဆေးလုံးများကို လက်ခံရရှိသောအခါ အလွန်ဝမ်းမြောက်သွားပြီး "ကျေးဇူးတင်ပါတယ် ဆရာ... ကျွန်တော် ဆရာ့ကို စိတ်ပျက်စေမှာ မဟုတ်ပါဘူး" ဟု ရိုသေစွာ ဂါရဝပြုလိုက်သည်။

ယန်ရှောင်သည် ရွှေချင်းဟော်နှင့် နင်ဖုန်းကျစ်တို့အကြားရှိ နက်ရှိုင်းလှသော ဆရာတပည့်သံယောဇဉ်ကို ဘေးမှကြည့်ကာ စိတ်ထဲမှ တွေးနေမိသည် — ဒီလောက်နက်ရှိုင်းတဲ့ ဆရာတပည့်သံယောဇဉ်ကို နင်ဖုန်းကျစ်တစ်ယောက် နောက်ပိုင်းကျမှပဲ သဘောပေါက်ပါလိမ့်မယ်။ ရွှေချင်းဟော်ရဲ့ တကယ့်အထောက်အထားကို သိသွားတဲ့အချိန်ကျရင်တော့ သူ သေချာပေါက် နောင်တအကြီးအကျယ် ရရပါလိမ့်မယ်။

"ချင်းဟော်... မင်းအနေနဲ့ အခုအချိန်မှာ အင်ပါယာအတွင်းမှာရှိတဲ့ အင်အားကြီး ဝိညာဉ်ဆရာတွေကို မင်းဘက်ပါလာအောင် စည်းရုံးသိမ်းသွင်းဖို့ အဓိကအာရုံစိုက်ရမယ်။ ဒါမှသာ မင်း အနာဂတ်မှာ ကောင်းကင်အင်ပါယာရဲ့ ရာဇပလ္လင်ကို ချောချောမွေ့မွေ့ ဆက်ခံနိုင်မှာ ဖြစ်တယ်"

နင်ဖုန်းကျစ်သည် ယန်ရှောင်နှင့် ကျူးကျူးချင်းတို့ ရှိနေသည်ကိုပင် ဂရုမထားမိတော့ဘဲ ရွှေချင်းဟော်ကို ပွင့်ပွင့်လင်းလင်းပင် ဆုံးမစကား ဆိုနေတော့သည်။

"အခုလောလောဆယ် အကိုင်တွယ်ရ အခက်ခဲဆုံးလူကတော့ အဲဒီစီနီယာကြီးပါပဲ။ အကယ်လို့ ကျွန်တော်သာ သူ့ကို ကျွန်တော့်ဘက်ပါအောင် လုပ်နိုင်ရင် ကျန်တဲ့သူတွေက ကျွန်တော့်အတွက် သိပ်ပြီး ခြိမ်းခြောက်မှု မဖြစ်တော့ပါဘူး။ ဘာပဲဖြစ်ဖြစ် ကျွန်တော့်ရဲ့ စတုတ္ထမြောက်ညီက တစ်နေ့ကုန် ပျော်ပါးသောက်စားဖို့ပဲ သိတဲ့ အသုံးမကျတဲ့လူတစ်ယောက်မို့လို့ပါ"

ရွှေချင်းဟော်၏ စကားကို ကြားရသောအခါ နင်ဖုန်းကျစ်က "အဲဒီလူက တကယ်ပဲ အကိုင်တွယ်ရ နည်းနည်းခက်ခဲပါတယ် ဒါပေမဲ့ မင်း အရမ်း စိုးရိမ်မနေပါနဲ့။ ဆရာ့အနေနဲ့ မင်းကို ကျောထောက်နောက်ခံပေးဖို့ အဘိုးအရိုးနဲ့ အဘိုးဓားတို့ကို ခေါ်လာပေးမှာမို့လို့... အဲဒီလူလည်း ဘာပြဿနာမှ ရှာနိုင်မှာ မဟုတ်ပါဘူး" ဟု ဆိုလိုက်သည်။

ထိုစဉ် ယန်ရှောင်တစ်ယောက် အတွေးနက်နေသည်ကို နင်ဖုန်းကျစ် မြင်သောအခါ သူက ယန်ရှောင်ကို စူးစမ်းလိုစိတ်ရှိနေသည်ဟု ထင်မှတ်ကာ "ယန်ရှောင်... မင်း ဒါကို သိချင်မှ သိလိမ့်မယ်။ လောကကနေ အနားယူသွားတဲ့ ကောင်းကင်ကွဲကြောင်းဂိုဏ်းနဲ့ ဖုံးကွယ်နေတဲ့ တိုက်တန်တုန့်လော့တွေကို ဖယ်လိုက်ရင်... လက်ရှိ ကောင်းကင်အင်ပါယာထဲမှာ ပေါ်ပေါ်ထင်ထင် ရှိနေတဲ့ တိုက်တန်တုန့်လော့တွေကတော့ အဘိုးဓား အဘိုးအရိုးနဲ့ အဆိပ် လို့ တိုက်တန်တဲ့ အဆိပ်တုန့်လော့တို့ပဲ ရှိတာပါ" ဟု ရှင်းပြလိုက်သည်။

တွေးတောနေသော ယန်ရှောင်သည် နင်ဖုန်းကျစ်၏ စကားကို ကြားလိုက်ရသည်နှင့်တစ်ပြိုင်နက် သူတို့အဖွဲ့၏ နောက်ထပ်ဦးတည်ရာနေရာကို ချက်ချင်း သဘောပေါက်သွားခဲ့သည်။

ဩော်... ငါ ဒီနေရာကို ဘယ်လိုတောင် မေ့သွားရတာလဲ။ နင်ရုန်ရုန်အတွက် ကိုးပါးရတနာကျူးလစ်ပန်းပြဿနာကို စနစ်ကနေ ဝယ်ယူပြီး ဖြေရှင်းပေးနိုင်တယ်ဆိုပေမဲ့... ငါကိုယ်တိုင်လည်း နေဝင်ချိန်သစ်တောထဲမှာရှိတဲ့ ရေခဲနှင့်မီး ယင်ယန်စမ်းရေတွင်းကို လိုချင်နေတာပဲဟာ။

ယန်ရှောင် ရုတ်တရက် သဘောပေါက်သွားသည့် အမူအရာကို မြင်သောအခါ နင်ဖုန်းကျစ်က မိမိ၏ အဆိပ်တုန့်လော့အကြောင်း ရှင်းပြချက်ကြောင့် ယန်ရှောင် နားလည်သွားခြင်းဖြစ်သည်ဟု ထင်မှတ်ကာ ပြုံးလိုက်မိသည်။

"ဦးလေးနင်... ကျေးဇူးတင်ပါတယ်"

ယန်ရှောင်၏ ကျေးဇူးတင်စကားကြောင့် နင်ဖုန်းကျစ်သည် မိမိ၏ လမ်းညွှန်မှုကြောင့် ယန်ရှောင် အသိပညာတိုးသွားခြင်း ဖြစ်သည်ဟု ပိုမိုယုံကြည်သွားကာ သူ၏နှုတ်ခမ်းဖျားတွင် အပြုံးတစ်ခု ပေါ်လွင်လာခဲ့သည်။

နင်ဖုန်းကျစ်၏ အပြုံးကို မြင်သောအခါ ယန်ရှောင်က ချက်ချင်းပင် "အခု မွန်းတည့်ဖို့ နီးနေပြီဆိုတော့... ကျွန်တော်တို့ အတူတူ နေ့လယ်စာ သွားစားကြရအောင်။ ကျူးချင်း... ရုန်ရုန်ကို သွားရှာလိုက်ဦး" ဟု ဆိုလိုက်သည်။

ကျူးကျူးချင်းသည် ခေါင်းညိတ်ကာ အခန်းထဲမှ လှည့်ထွက်သွားခဲ့သည်။ ထိုအချိန်တွင် ဓားတုန့်လော့က ဂိုဏ်း၏ အရေးကြီးကိစ္စရပ်များကို စောင့်ကြပ်ရန် ခုနစ်ပါးရတနာမျှော်စင်ဂိုဏ်းသို့ ပြန်လည်ထွက်ခွာရန် လိုအပ်ကြောင်း ပြောဆိုခဲ့ပြီး... ရွှေချင်းဟော်သည်လည်း အခြားလုပ်ဆောင်စရာ ကိစ္စရပ်များ ရှိနေသေးသည့်အတွက် အရင်ဆုံး နှုတ်ဆက်ကာ ထွက်ခွာသွားခဲ့တော့သည်။