အခန်း ၃၉ ရွှေချင်းဟော်

ဓားတုန့်လော့နှင့် နင်ရုန်ရုန်တို့၏ အသံကို ကြားရသောအခါ နင်ဖုန်းကျစ်သည် စိတ်လှုပ်ရှားနေမှုများကို ထိန်းချုပ်ကာ တည်ငြိမ်လိုက်ပြီး ယန်ရှောင်ကို ကြည့်၍ "မိတ်ဆွေငယ်... မင်း ဒါကို စနောက်ပြီး ပြောနေတာတော့ မဟုတ်ဘူးမလား။ ငါတို့ ခုနစ်ပါးရတနာမျှော်စင်ဂိုဏ်းဟာ ကမ္ဘာ့ဒုတိယအကြီးဆုံး ဂိုဏ်းကြီးအဖြစ် ကျော်ကြားသလို... ကောင်းကင်ကွဲကြောင်းဂိုဏ်း လောကကနေ အနားယူသွားကတည်းက ဆိုရင်တော့ ငါတို့က အကောင်းဆုံးဂိုဏ်းလို့တောင် သတ်မှတ်လို့ရတယ်။ ငါတို့မှာ မရေမတွက်နိုင်တဲ့ ရွှေငွေရတနာတွေ ရှိတာတောင် ဒီပြဿနာအတွက် ဘာနည်းလမ်းမှ ရှာမတွေ့ခဲ့သေးဘူး" ဟု ဆိုလိုက်သည်။

နင်ဖုန်းကျစ်၏ သံသယဝင်နေသော စကားများကို ကြားရပြီး မိမိ၏ တစ်ဆယ့်ငါးနှစ်အရွယ် သက်တမ်းကို ပြန်ကြည့်ကာ နင်ဖုန်းကျစ်အနေဖြင့် မိမိကို အလွယ်တကူ ယုံကြည်လိမ့်မည်မဟုတ်ကြောင်း ယန်ရှောင်လည်း သိရှိထားသည်။ ထို့ကြောင့် ယန်ရှောင်က "ဂိုဏ်းချုပ်နင်... ခင်ဗျား ကျွန်တော့်ကို မယုံကြည်တာ မဆန်းပါဘူး ဒါပေမဲ့ ကျွန်တော် ရဲရဲကြီး အာမခံရဲပါတယ်။ ရုန်ရုန်ရဲ့ ခုနစ်ပါးရတနာမျှော်စင် ဝိညာဉ်ကို ကိုးပါးရတနာမျှော်စင် ဝိညာဉ်အဖြစ် သေချာပေါက် အဆင့်မြှင့်တင်ပေးပါ့မယ်။ အကယ်လို့ ကျွန်တော်သာ မလုပ်နိုင်ခဲ့ရင် ခင်ဗျား စိတ်ကြိုက် အပြစ်ပေးတာကို ခံယူဖို့ အသင့်ပါပဲ" ဟု ဆိုလိုက်သည်။

ယန်ရှောင်သည် ဤသို့ အာမခံချက်ပေးလိုက်သော်လည်း စိတ်ထဲမှမူ လှောင်ပြုံး ပြုံးနေမိသည်။ စနစ်အတွင်း၌ တူလစ်ပန်းကို ဝယ်ယူရန် စနစ်ဒင်္ဂါး တစ်သန်းမျှသာ ကုန်ကျမည်ဖြစ်ရာ အလွန်အမင်း တန်ဖိုးနည်းပါးလှသည်။ ခုနစ်ပါးရတနာမျှော်စင်ဂိုဏ်းထံမှ ရွှေဒင်္ဂါး ၁၀ သန်း ရောက်ရှိလာသည်နှင့် ခုနစ်ပါးရတနာမျှော်စင်ကို ကိုးပါးရတနာမျှော်စင်အဖြစ် အဆင့်မြှင့်တင်ရန်မှာ သူ၏အတွက် အလွန်လွယ်ကူသော ကိစ္စတစ်ခုမျှသာ ဖြစ်သည်။

တစ်ဖက်တွင်မူ နင်ဖုန်းကျစ်က အကယ်၍ ယန်ရှောင်အနေဖြင့် နင်ရုန်ရုန်၏ ဝိညာဉ်အဆင့်မြှင့်တင်ရေး ပြဿနာကို မဖြေရှင်းနိုင်ခဲ့လျှင်ပင် ကိစ္စမရှိဟု တွေးတောနေသည်။ အကြောင်းမှာ ယန်ရှောင်က နင်ရုန်ရုန်ကို လက်ထပ်ယူမည်ဟု ကတိပေးထားပြီးသား ဖြစ်သလို မိမိသမီးကိုယ်တိုင်ကလည်း ယန်ရှောင်ကို သဘောကျနေသောကြောင့် ဖြစ်သည်။ ထို့အပြင် ယန်ရှောင်ကို ခုနစ်ပါးရတနာမျှော်စင်ဂိုဏ်းထဲသို့ ဝင်ရောက်စေခြင်းဖြင့် ဓားတုန့်လော့နှင့် အရိုးတုန့်လော့ဟူသော တိုက်တန်တုန့်လော့ ဆရာကြီးနှစ်ဦး ကွယ်လွန်သွားသည့်တိုင်အောင် ဂိုဏ်းကြီးအား နောင်နှစ်ပေါင်း ရာစုနှစ်များစွာအထိ ဆက်လက် တိုးတက်စည်ပင်စေမည် ဖြစ်သည်။

ဘာပဲဖြစ်ဖြစ် အသက်တစ်ဆယ့်ငါးနှစ်အရွယ်နှင့် ဝိညာဉ်ဘုရင်အဆင့်သို့ ရောက်ရှိနေသော ယန်ရှောင်၏ ကျင့်ကြံခြင်းအရှိန်အဟုန်အရ သူသာ အချိန်မတိုင်မီ သေဆုံးမသွားခဲ့လျှင် သေချာပေါက် တိုက်တန်တုန့်လော့ တစ်ဦး ဖြစ်လာမည်ဖြစ်ပြီး ဓားတုန့်လော့နှင့် အရိုးတုန့်လော့တို့ထက်ပင် သန်မာသော တိုက်တန်တုန့်လော့ တစ်ဦး ဖြစ်လာလိမ့်မည် ဖြစ်သည်။

"ကောင်းပြီ... မင်းရဲ့ အာမခံချက် ရှိနေမှတော့ ရုန်ရုန် အသက်သုံးဆယ်မပြည့်ခင်မှာ တိုက်တန်တုန့်လော့အထိ ကျင့်ကြံပေးနိုင်မယ်ဆိုတာရယ်... ရုန်ရုန်ရဲ့ သိုင်းဝိညာဉ်ကို ခုနစ်ပါးရတနာမျှော်စင်ကနေ ကိုးပါးရတနာမျှော်စင်အဖြစ် အဆင့်မြှင့်တင်ပေးနိုင်မယ်ဆိုတာကို ငါ ယုံကြည်လိုက်မယ်"

နင်ဖုန်းကျစ်၏ စကားသံ ထွက်ပေါ်လာချိန်တွင် ဓားတုန့်လော့သည် နင်ရုန်ရုန်ကို ကြည့်ကာ မတတ်သာဟန် ပြုံးလိုက်မိပြီး စိတ်ထဲမှ ရေရွတ်လိုက်သည်  ဒီအူတူတူမလေးကတော့... မိမိအရင်းခေါက်ခေါက် ဖခင်ဖြစ်သူက ပြန်ရောင်းစားနေတာကိုတောင် မသိဘဲ လူအတစ်ယောက်လို သွားဖြဲပြီး ပြုံးနေတုန်းပဲ။

ဓားတုန့်လော့ မိမိကို စိုက်ကြည့်နေသည်ကို မြင်သောအခါ နင်ရုန်ရုန်က "အဘိုးဓား... သမီးကို ဘာလို့ အဲဒီလိုကြီး ကြည့်နေတာလဲ။ သမီးကို လှောင်နေတဲ့အတိုင်းပဲ" ဟု လှမ်းမေးလိုက်သည်။

နင်ရုန်ရုန်၏ ရုတ်တရက် မေးခွန်းကြောင့် ဓားတုန့်လော့က ကပျာကယာပင် "သမီးတော်လေး... ဘာတွေ လျှောက်တွေးနေတာလဲ။ အဘိုးက အဲဒီလိုလူမျိုး ဟုတ်ပါ့မလား" ဟု ပြန်ဖြေလိုက်ရသည်။

"ပုံစံကတော့ အဲဒီအတိုင်းပဲ"

"ရုန်ရုန်... သမီးက အဘိုးကို မချစ်တော့ဘူးလား။ အဲဒီလို စကားမျိုး ဘယ်လိုလုပ် ပြောရက်တာလဲ။ အဘိုးတော့ စိတ်မကောင်းဖြစ်ရပါပြီ"

"ကဲပါ... သမီး အဘိုးဓားကို ခွင့်လွှတ်လိုက်ပါ့မယ်"

နင်ရုန်ရုန်သည် နင်ဖုန်းကျစ်နှင့် အခြားသူများဘက်သို့ အကြည့်လွှဲသွားသည်ကို ကြည့်ရင်း ဓားတုန့်လော့မှာ ကျောချမ်းသွားခဲ့ရသည်။ အကယ်၍ နင်ရုန်ရုန်သာ အမှန်တရားကို သိရှိသွားပါက သူ၏မုတ်ဆိတ်မွှေးများကို အမြစ်ကနေ ဆွဲနုတ်ပစ်လောက်သည်။ သူ၏ ကျဲတောက်နေသော မုတ်ဆိတ်မွှေးများကို ကြည့်ကာ ဓားတုန့်လော့သည် ပို၍ပင် တန်ဖိုးထားစောင့်ရှောက်ရတော့မည်ဟု တွေးလိုက်မိသည်။ မုတ်ဆိတ်မွှေးများ ဘာကြောင့် ဤမျှ ကျဲတောက်နေရသလဲဟု မမေးပါနှင့် အားလုံးမှာ နင်ရုန်ရုန် ငယ်စဉ်ကလေးဘဝတုန်းက ဆွဲနုတ်ခြင်း ခံခဲ့ရသောကြောင့် ဖြစ်သည်။

တစ်ဖက်တွင်မူ ယန်ရှောင်သည် နင်ဖုန်းကျစ် မိမိကို ယုံကြည်သွားခြင်းအပေါ် မည်သည့်မျက်နှာအမူအရာမျှ မပြဘဲ တည်ငြိမ်စွာပင် စောင့်ကြည့်နေခဲ့သည်။ ၎င်းမှာ သူ မျှော်လင့်ထားသည့်အတိုင်းပင် ဖြစ်သည်။ ဘာပဲဖြစ်ဖြစ် ခုနစ်ပါးရတနာမျှော်စင်ဂိုဏ်းမှ မည်သူမျှ ခုနစ်ပါးရတနာမျှော်စင် ဝိညာဉ်ကို ကိုးပါးရတနာမျှော်စင်အဖြစ် အဆင့်မြှင့်တင်နိုင်မည့် အခွင့်အရေးကို ငြင်းပယ်လိမ့်မည်မဟုတ်ချေ။

ယန်ရှောင်၏ တည်ငြိမ်လှသော မျက်နှာထားကို မြင်ရသောအခါ နင်ဖုန်းကျစ်သည် ပို၍ပင် သန္နိဋ္ဌာန်ခိုင်မာသွားခဲ့သည်။ ယန်ရှောင်သည် နင်ရုန်ရုန်၏ ဝိညာဉ်ကို အဆင့်မြှင့်တင်ပေးနိုင်လိမ့်မည်ဟု သူ ပို၍ ယုံကြည်သွားကာ "မိတ်ဆွေငယ် ယန်ရှောင်... မင်း ငါတို့ကို စိတ်ပျက်စေမှာမဟုတ်ဘူးလို့ ငါ ယုံကြည်ပါတယ်" ဟု ဆိုလိုက်သည်။

"ဂိုဏ်းချုပ်နင်... ခင်ဗျား စိတ်ပျက်ရမှာ မဟုတ်ပါဘူး"

ယန်ရှောင်က မိမိကို ဂိုဏ်းချုပ်နင်ဟု ဆက်လက်ခေါ်ဆိုနေသည်ကို ကြားသောအခါ နင်ဖုန်းကျစ်က ချက်ချင်းပင် "ဘာလို့ ငါ့ကို ဂိုဏ်းချုပ်နင်လို့ ခေါ်နေသေးတာလဲ။ အဲဒါက အရမ်း စိမ်းကားလွန်းပါတယ်။ မင်းအနေနဲ့ စိတ်မရှိဘူးဆိုရင်... မင်းကော မင်းဘေးက မိန်းကလေးကော နှစ်ယောက်စလုံး ငါ့ကို ဦးလေးနင်လို့ပဲ ခေါ်ကြပါ" ဟု ဆိုသည်။

နင်ဖုန်းကျစ်က ဦးလေးနင်ဟု ခေါ်ရန် ပြောသောအခါ ယန်ရှောင်သည်လည်း "ဦးလေးနင်" ဟု ပြောင်းလဲခေါ်ဆိုလိုက်သည်။

"အဲဒါမှ ဟုတ်တာပေါ့ ဟားဟားဟား..." ယန်ရှောင်၏ အခေါ်အဝေါ်ကြောင့် နင်ဖုန်းကျစ်လည်း အလွန်အမင်း ဝမ်းမြောက်သွားခဲ့ရသည်။

ကွက်တိပင် ထိုအချိန်၌ တံခါးခေါက်သံ ထွက်ပေါ်လာခဲ့သည်။ ကျူးကျူးချင်း တံခါးသွားဖွင့်ပေးလိုက်ရာ... ပြန်လည်ရောက်ရှိလာသော အရိုးတုန့်လော့နှင့်အတူ လူငယ်တစ်ဦး ပါလာသည်ကို တွေ့လိုက်ရသည်။

နင်ဖုန်းကျစ်သည် ထိုလူငယ်ကို မြင်သောအခါ ဝမ်းသာအားရဖြင့် "ချင်းဟော်... မင်း ဘာကိစ္စရှိလို့ ဒီကို ရောက်လာတာလဲ" ဟု ရေရွတ်လိုက်သည်။

"ကျွန်တော် ဘဏ်ကို သွားရင်းနဲ့ အရိုးတုန့်လော့ စီနီယာနဲ့ တိုက်တိုက်ဆိုင်ဆိုင် ဆုံခဲ့တာပါ။ စီနီယာက ဆရာလည်း ဒီမှာရှိနေတယ်လို့ ပြောတာနဲ့... ဆရာ့ဆီကို ဂါရဝပြုဖို့ အတူတူ လိုက်လာခဲ့တာပါ"

ရောက်ရှိလာသူမှာ အခြားသူမဟုတ် ကောင်းကင်အင်ပါယာ၏ လက်ရှိအိမ်ရှေ့မင်းသား ရွှေချင်းဟော် ပင် ဖြစ်သည်။

နင်ဖုန်းကျစ်သည် ရွှေချင်းဟော်ကို ကြည့်ကာ ယန်ရှောင်၏ ဘေးနားသို့ ခေါ်ဆောင်လာပြီး "ချင်းဟော်... မင်းကို ပါရမီရှင်တစ်ယောက်နဲ့ မိတ်ဆက်ပေးမယ်။ ဒီမိတ်ဆွေငယ်ရဲ့ အမည်က ယန်ရှောင် လို့ ခေါ်တယ်။ သူက အသက်တစ်ဆယ့်ငါးနှစ်ပဲ ရှိသေးပေမဲ့ ဝိညာဉ်ဘုရင်အဆင့်ကို ရောက်ရှိနေပြီ။ သူ့ဘေးက မိန်းကလေးကတော့ ကျူးကျူးချင်း တဲ့။ ယန်ရှောင်... သူကတော့ ကောင်းကင်အင်ပါယာရဲ့ လက်ရှိအိမ်ရှေ့မင်းသား ရွှေချင်းဟော် အရှင်မင်းသား ပဲ ဖြစ်တယ်" ဟု မိတ်ဆက်ပေးလိုက်သည်။

နင်ဖုန်းကျစ်၏ မိတ်ဆက်ပေးမှုကို ကြားရသောအခါ ရွှေချင်းဟော်သည် အနည်းငယ် မှင်တက်သွားပြီး ယန်ရှောင်ကို သတ္တဝါဆန်းတစ်ခုကို ကြည့်သကဲ့သို့ စိုက်ကြည့်နေမိသည်။ အကယ်၍ ယန်ရှောင်၏ ဝိညာဉ်ဘုရင်အဆင့် အင်အားက ရွှေချင်းဟော်ကို အံ့သြစေခြင်းမရှိလျှင်ပင်... အသက်တစ်ဆယ့်ငါးနှစ်အရွယ်နှင့် ဝိညာဉ်ဘုရင် ဖြစ်နေခြင်းကမူ သေချာပေါက် အံ့အားသင့်စေသည်မှာ အမှန်ပင် ဖြစ်သည်။

ယန်ရှောင်ကမူ ရွှေချင်းဟော်ကို တိတ်တဆိတ် စောင့်ကြည့်နေရင်း စိတ်ထဲမှ ရေရွတ်လိုက်မိသည်  ဒါက ဟို ချန်းရင်ရွှယ်ပေါ့လေ။

ကူးပြောင်းလာသူဖြစ်သော ယန်ရှောင်သည် မိမိရှေ့မှ ရွှေချင်းဟော်၏ မည်သူမည်ဝါဖြစ်ကြောင်းကို သဘာဝအတိုင်း သိရှိထားပြီး ဖြစ်သည်။

နင်ဖုန်းကျစ်အနေဖြင့် ယန်ရှောင်ကို ရွှေချင်းဟော်နှင့် မိတ်ဆက်ပေးရခြင်း၏ ရည်ရွယ်ချက်မှာ ရွှေချင်းဟော်အတွက် ပါရမီရှင်တစ်ဦးကို လမ်းညွှန်ပေးလိုခြင်း ဖြစ်သည်။ ဘာပဲဖြစ်ဖြစ် ရွှေချင်းဟော် အနာဂတ်တွင် ကောင်းကင်အင်ပါယာ၏ ရာဇပလ္လင်ကို ဆက်ခံမည့်အချိန်၌ ယန်ရှောင်ကဲ့သို့သော သူတစ်ဦး ဘေးနားတွင် ရှိနေခြင်းက အလွန်အထောက်အကူဖြစ်စေလိမ့်မည် ဖြစ်သည်။ ထို့အပြင် နင်ဖုန်းကျစ်သည် ရွှေချင်းဟော်၏ ဆရာဖြစ်ရာ ရွှေချင်းဟော် ရာဇပလ္လင်ကို ဆက်ခံနိုင်ပါက ကောင်းကင်အင်ပါယာအတွင်း ခုနစ်ပါးရတနာမျှော်စင်ဂိုဏ်း၏ တိုးတက်ပြန့်ပွားရေးအတွက်လည်း အကျိုးရှိစေမည် ဖြစ်သည်။

"မင်္ဂလာပါ ယန်ရှောင်... မင်္ဂလာပါ မိန်းကလေး ကျူးကျူးချင်း"

ရွှေချင်းဟော်က မိမိအား နှုတ်ဆက်သည်ကို မြင်သောအခါ ယန်ရှောင်က "မင်္ဂလာပါ အိမ်ရှေ့မင်းသားအရှင်... တွေ့ရတာ ဝမ်းသာပါတယ်" ဟု ပြန်လည်နှုတ်ဆက်လိုက်သည်။

နှစ်ဖက်စလုံး နှုတ်ဆက်ပြီးနောက် ရွှေချင်းဟော်က နင်ဖုန်းကျစ်ဘက်သို့ လှည့်ကာ "ဆရာ... ဆရာတို့ ကောင်းကင်မြို့တော်ကို လာတာတောင် ကျွန်တော့်ကို အကြောင်းမကြားဘူး။ အကြောင်းကြားရင် ကျွန်တော် ကောင်းကောင်းမွန်မွန် ဧည့်ခံကျွေးမွေးလို့ ရတာပေါ့" ဟု ဆိုသည်။

"မင်းက အမြဲတမ်း အလုပ်များနေတာလေ ပြီးတော့ ဒါက မင်းရဲ့ အဖိုးတန်အချိန်တွေကို ဖြုန်းတီးရာကျမှာစိုးလို့ ဆရာ အကြောင်းမကြားခဲ့တာပါ"

ထို့နောက် ရွှေချင်းဟော်က ဆက်လက်၍ "ဒါနဲ့... မနေ့က ဓားတုန့်လော့ စီနီယာ ကောင်းကင်မြို့တော်ထဲမှာ ဘယ်သူနဲ့ တိုက်ခိုက်ခဲ့တာလဲ။ မနေ့က ပြန်လာတဲ့ တော်ဝင်အစောင့်တွေက အခြေအနေကို သဲသဲကွဲကွဲ မပြောပြတတ်ကြလို့ပါ" ဟု မေးမြန်းလိုက်သည်။

ဓားတုန့်လော့သည် ရွှေချင်းဟော်က မနေ့က ယန်ရှောင်နှင့် မိမိတို့ တိုက်ခိုက်ခဲ့သည့် ကိစ္စကို မေးမြန်းနေသည်ကို မြင်သောအခါ "အိမ်ရှေ့မင်းသားအရှင်... ကျွန်တော် မနေ့က တိုက်ခိုက်ခဲ့တဲ့သူက အဝေးကြီးမှာ မဟုတ်ပါဘူး အခု အရှင်မင်းသားရဲ့ မျက်စိရှေ့တည့်တည့်မှာတင် ရှိနေပါတယ်" ဟု ပြန်ဖြေလိုက်ရတော့သည်။

သူက ပြောပြီးနောက် ယန်ရှောင်ဘက်သို့ လှည့်ကြည့်လိုက်ရာ ရွှေချင်းဟော်လည်း အလွန်အံ့အားသင့်သွားခဲ့ရသည်။ မနေ့က ဓားတုန့်လော့နှင့် ယှဉ်ပြိုင်တိုက်ခိုက်ခဲ့သူမှာ မိမိရှေ့မှ ဤလူငယ်လေး ဖြစ်နေလိမ့်မည်ဟု သူ လုံးဝ မျှော်လင့်မထားခဲ့ချေ။

နင်ဖုန်းကျစ်က ရွှေချင်းဟော်ကို ကြည့်ပြီးနောက် ယန်ရှောင်ဘက်သို့ ပြန်လှည့်ကာ "ဘယ်လိုလဲ... မမျှော်လင့်ထားဘူး မဟုတ်လား။ ဆရာ မင်းကို ပြောပြရဦးမယ်... ယန်ရှောင် ပေးနိုင်တဲ့ အံ့သြမှုတွေက ဒါတင်တင် မကသေးဘူး။ ဒီနေ့ ငါတို့ ခုနစ်ပါးရတနာမျှော်စင်ဂိုဏ်းက ဘဏ်ကို သွားပြီး ဒီလောက်အထိ များပြားတဲ့ ငွေတွေကို ဘာဖြစ်လို့ သွားထုတ်ရသလဲဆိုတာ မင်း သိလား" ဟု ဆိုသည်။

"အရိုးတုန့်လော့ စီနီယာ ပြောတာတော့... တစ်စုံတစ်ဦးနဲ့ စီးပွားရေးအရ အရောင်းအဝယ် လုပ်ဖို့လို့ ကြားပါတယ်။ ဒါဆို... အဲဒီအရောင်းအဝယ်က ညီလေး ယန်ရှောင်နဲ့ လုပ်တာလား"

"ဟားဟား... မင်း ခန့်မှန်းတာ ကွက်တိပဲ။ ငါတို့ ခုနစ်ပါးရတနာမျှော်စင်ဂိုဏ်းက ညီလေး ယန်ရှောင်နဲ့ အရောင်းအဝယ် လုပ်နေတာ ဖြစ်တယ်။ မင်း သိတဲ့အတိုင်းပဲ... လွန်ခဲ့တဲ့ ရက်ပိုင်းက ခုနစ်ပါးရတနာမျှော်စင်ဂိုဏ်းက ဆေးလုံးနှစ်မျိုး ရရှိခဲ့တယ်လေ မင်းကိုလည်း ဆရာ ပေးခဲ့ဖူးတယ် မဟုတ်လား။ အဲဒီ ဆေးလုံးတွေကို ညီလေး ယန်ရှောင်ဆီကနေ ဝယ်ယူခဲ့တာပေါ့"

နင်ဖုန်းကျစ်၏ စကားကို ကြားရသောအခါ ရွှေချင်းဟော်သည် ထပ်မံ၍ အံ့အားသင့်သွားရပြန်ပြီး ယန်ရှောင်ဘက်သို့ ကမန်းကတန်း လှည့်ကာ "မိတ်ဆွေငယ် ယန်ရှောင်... မင်းဆီမှာ အဲဒီ ဆေးလုံးနှစ်မျိုး ကျန်သေးလား။ ဘယ်လောက်အထိ ရှိသေးလဲ။ ကောင်းကင်အင်ပါယာ ကိုယ်စား... ငါ အားလုံးကို ဝယ်ယူချင်ပါတယ်" ဟု အလောတကြီး ဆိုလိုက်တော့သည်။