အခန်း ၃၈ နင်ဖုန်းကျစ် တည်ငြိမ်မှု ထပ်မံပျက်ပြားခြင်း

နောက်တစ်နေ့သည် လျင်မြန်စွာ ရောက်ရှိလာခဲ့သည်။ နင်ဖုန်းကျစ် အရိုးတုန့်လော့နှင့် ဓားတုန့်လော့တို့သည် နင်ရုန်ရုန်၏ ဦးဆောင်မှုဖြင့် ယန်ရှောင်နှင့် ကျူးကျူးချင်းတို့ တည်းခိုနေသည့် ဟိုတယ်အခန်းသို့ ရောက်ရှိလာကြသည်။ နင်ရုန်ရုန် တံခါးခေါက်လိုက်သည်နှင့် တစ်ပြိုင်နက် ယန်ရှောင်က အတွင်းမှ တံခါးဖွင့်ပေးခဲ့သည်။

တံခါးဝတွင် လူလေးဦးကို မြင်လိုက်ရသဖြင့် ယန်ရှောင်က "ဝင်ခဲ့ကြပါ" ဟု ခပ်တိုးတိုးဆိုကာ အခန်းထဲသို့ လှည့်ဝင်သွားခဲ့သည်။

နင်ရုန်ရုန်သည် ဘာမျှတွေးမနေဘဲ အခန်းထဲသို့ လှမ်းဝင်သွားခဲ့ပြီး တံခါးဝ၌ရှိသော နင်ဖုန်းကျစ်သည်လည်း သူမနှင့် အကြည့်ချင်းဖလှယ်ကာ နောက်မှ လိုက်ဝင်လာခဲ့သည်။ အခန်းထဲသို့ ရောက်သောအခါ ကျူးကျူးချင်းသည် ထောင့်တစ်နေရာတွင် အတွေးပွားလျက် မတ်တတ်ရပ်နေသည်ကို သူတို့ တွေ့ရှိလိုက်ရသည်။

နင်ဖုန်းကျစ်နှင့် အခြားသူနှစ်ဦး နေရာတကျ ထိုင်မိကြပြီးနောက် ယန်ရှောင်က စကားစတင်လိုက်သည်  "ဂိုဏ်းချုပ်နင်... မနေ့က ဓားတုန့်လော့ရဲ့ လုပ်ရပ်အတွက် ကျွန်တော် ရှင်းလင်းချက်တစ်ခု လိုချင်ပါတယ်"

ယန်ရှောင်၏ အေးစက်တည်ငြိမ်သော အသံက ထွက်ပေါ်လာခဲ့သည်။ နင်ဖုန်းကျစ်က ယန်ရှောင်၏ ငယ်ရွယ်သော မျက်နှာကို ကြည့်ကာ "မိတ်ဆွေငယ်... စိတ်မကောင်းပါဘူး ဒါပေမဲ့ မင်းက ရုန်ရုန်ကို မင်းနဲ့အတူ ခေါ်သွားချင်တယ်ဆိုတော့ ငါတို့ကို စမ်းသပ်ဖို့ စဉ်းစားမိတာကလည်း နားလည်ပေးလို့ ရနိုင်ပါတယ်" ဟု ဆိုလိုက်သည်။

"ခွင့်လွှတ်ပါ ဂိုဏ်းချုပ်နင်... နင်ရုန်ရုန်ကို ခေါ်ပြီး ကျင့်ကြံဖို့ဆိုတာ ကျွန်တော့်ရဲ့ အတ္တဆန္ဒ မဟုတ်ပါဘူး။ သူမရဲ့ ကြီးမားလှတဲ့ ပါရမီတွေ လေလွင့်သွားမှာကို မလိုလားရုံသက်သက်ပါ။ အကယ်လို့ ခင်ဗျားတို့ဘက်က ရှင်းလင်းချက်မပေးနိုင်ရင်တော့ ကျွန်တော်တို့ရဲ့ ဆွေးနွေးမှုကို ဒီမှာတင် အဆုံးသတ်ရပါလိမ့်မယ်။ ကျူးချင်း... ဧည့်သည်တွေကို လိုက်ပို့လိုက်ပါ"

ကျူးကျူးချင်းသည် ထောင့်စွန်းမှ လျှောက်လှမ်းလာပြီး ခုနစ်ပါးရတနာမျှော်စင်ဂိုဏ်းမှ လူများကို ကြည့်ကာ "စီနီယာတို့... ကျေးဇူးပြုပြီး" ဟု ဆိုလိုက်တော့သည်။

နင်ရုန်ရုန်သည် ကျူးကျူးချင်းက မိမိတို့အား နှင်ထုတ်လိုသည်ကို ကြားရလျှင် ချက်ချင်းပင် ကန့်ကွက်လိုက်ပြီး နင်ဖုန်းကျစ်ဘက်သို့ လှည့်ကာ "ဖေဖေ... မနေ့က ဘာတွေလုပ်ခဲ့တာလဲ။ အစ်ကိုရှောင်ကို ဒီလောက်တောင် ဒေါသထွက်အောင် လုပ်ရလား။ ဖေဖေ သူ့ကို တောင်းပန်ရမယ်" ဟု ဆိုလိုက်သည်။

ထို့နောက် သူမက ယန်ရှောင်ဘက်သို့ ပြန်လှည့်ကာ "အစ်ကိုရှောင်... သမီးကို မနှင်ထုတ်ပါနဲ့နော် ဟုတ်ပြီလား။ သမီး ဖေဖေ့ကို တောင်းပန်ခိုင်းပါ့မယ်" ဟု ဆိုလေသည်။

မိမိ၏ သမီးဖြစ်သူက သူစိမ်းတစ်ယောက်ဘက်မှ အထင်အရှား ဘက်လိုက်နေသည်ကို မြင်ရသဖြင့် နင်ဖုန်းကျစ်မှာ မတတ်သာဘဲ သက်ပြင်းချကာ "မိတ်ဆွေငယ်... မနေ့က ဖြစ်ရပ်က တကယ်ပဲ ငါတို့ရဲ့ အမှားပါ ဒါကြောင့် မင်းကို ဒီနေရာမှာတင် တောင်းပန်ပါတယ်" ဟု ဆိုလိုက်ရတော့သည်။

သူက ပြောပြောဆိုဆိုဖြင့် မတ်တတ်ရပ်ကာ ယန်ရှောင်ကို အနည်းငယ် ဦးညွှတ်၍ တောင်းပန်လိုက်သည်။ အရိုးတုန့်လော့နှင့် ဓားတုန့်လော့တို့သည် နင်ဖုန်းကျစ်၏ ဦးညွှတ်မှုကို မြင်သောအခါ "ဂိုဏ်းချုပ်... မင်းက..." ဟု မြည်တမ်းလိုက်ကြသည်။

နင်ရုန်ရုန်သည်လည်း မိမိဖခင်၏ တောင်းပန်မှုကို မြင်ပြီး မှင်တက်သွားခဲ့ရသည်။ ကမ္ဘာ့ဒုတိယအကြီးဆုံး ဂိုဏ်းကြီး၏ ဂိုဏ်းချုပ်ဖြစ်သော မိမိဖခင်က ယန်ရှောင်ကို အမှန်တကယ် ဦးညွှတ်တောင်းပန်လိမ့်မည်ဟု သူမ တစ်ခါမျှ မမျှော်လင့်ထားခဲ့ချေ။ မိမိဖခင်သည် ကောင်းကင်အင်ပါယာ၏ ဧကရာဇ်နှင့် တွေ့ဆုံချိန်၌ပင် ခေါင်းညိတ်ရုံမျှသာ နှုတ်ဆက်တတ်သည်ကို သူမ သိထားသောကြောင့် အလွန်အံ့အားသင့်သွားခဲ့ရသည်။

နင်ဖုန်းကျစ်အနေဖြင့်မူ မိမိသမီး၏ အနာဂတ်နှင့် ဂိုဏ်းတိုးတက်ပြန့်ပွားရေးအတွက် ဤသို့လုပ်ဆောင်ရန်မှတစ်ပါး အခြားရွေးချယ်စရာ မရှိခဲ့ချေ။

နင်ဖုန်းကျစ် မတ်တတ်ရပ်ကာ အနည်းငယ်ဦးညွှတ်၍ တောင်းပန်သည်ကို မြင်ရသဖြင့် ယန်ရှောင်က "ဂိုဏ်းချုပ်နင်... ဤကဲ့သို့အရာမျိုး နောက်ဘယ်တော့မှ ထပ်မဖြစ်လာဖို့ မျှော်လင့်ပါတယ်။ အကယ်လို့ မနေ့ကလိုမျိုး ကိစ္စရပ်တစ်ခုခု ထပ်ဖြစ်လာရင်တော့... ကျူးချင်းဖြစ်စေ ရုန်ရုန်ဖြစ်စေ သူတို့ရဲ့ ဘေးကင်းလုံခြုံမှုအတွက် ကျွန်တော် တတ်နိုင်သမျှ အစွမ်းကုန် လုပ်ဆောင်သွားမှာပါ။ ခင်ဗျားအနေနဲ့ ကျွန်တော့်ရဲ့ စရိုက်ကို ယုံကြည်ပေးရပါမယ်" ဟု ဆိုလိုက်သည်။

ယန်ရှောင်၏ စကားကို ကြားရသောအခါ နင်ဖုန်းကျစ်က "မနေ့က ငါတို့ ရိုင်းပျမိသွားတာပါ။ မိတ်ဆွေငယ်... ဤကဲ့သို့အရာမျိုး ဘယ်တော့မှ ထပ်မဖြစ်စေရဘူးလို့ ငါ အာမခံပါတယ်" ဟု ဆိုသည်။

နင်ဖုန်းကျစ်၏ အာမခံချက်ကို ရရှိမှသာ ယန်ရှောင်က "နောက်တစ်ခုအနေနဲ့ ဆေးလုံးတွေနဲ့ ရုန်ရုန်ရဲ့ ကိစ္စကို ဆွေးနွေးကြတာပေါ့။ လောလောဆယ် ကျွန်တော်တို့ဘက်က ဝိညာဉ်အဆင့်တက်ဆေးလုံး ၅၀၀ နဲ့ နက်ရှိုင်းသောရေဆေးလုံး ၅၀၀ ပံ့ပိုးပေးနိုင်ပါတယ်။ နင်ရုန်ရုန်နဲ့ ကျွန်တော် အစောပိုင်းက သဘောတူထားတဲ့ ဈေးနှုန်းအတိုင်း ဆေးလုံးတစ်လုံးကို ရွှေဒင်္ဂါး ၁၀,၀၀၀ နှုန်းနဲ့ ဆိုရင်... စုစုပေါင်း ရွှေဒင်္ဂါး ၁၀ သန်း ကျသင့်မှာ ဖြစ်ပါတယ်။ ပြီးတော့ ကျွန်တော်က ရွှေဒင်္ဂါးအစစ်နဲ့ပဲ လက်ခံမှာပါ" ဟု ပြောလိုက်သည်။

ယန်ရှောင်၏ စကားကို ကြားရသောအခါ နင်ဖုန်းကျစ်က "မိတ်ဆွေငယ်... ငါတို့ဂိုဏ်းမှာ ရွှေဒင်္ဂါး ၁၀သန်းအထိ အင်မတန်များပြားတဲ့ ရွှေဒင်္ဂါးအစစ်တွေ အဆင်သင့် မရှိသေးဘူး။ မင်းကို ရွှေဝိညာဉ်ကတ်ပြားတစ်ခု ပေးရင်ကော ဘယ်လိုလဲ။ မင်း ဒါကို ကောင်းကင်အင်ပါယာထဲက ဘယ်ဘဏ်မှာမဆို သွားရောက်လဲလှယ်လို့ ရပါတယ်" ဟု ဆိုသည်။

"ကျွန်တော် ရွှေဒင်္ဂါးအစစ်ကိုပဲ လိုချင်တာပါ အဲဒီလို ရှုပ်ရှုပ်ထွေးထွေး ကိစ္စတွေကို မလိုလားပါဘူး။ ကျွန်တော့်ကို ရွှေဒင်္ဂါးတွေပဲ တိုက်ရိုက်ပေးပါ"

ယန်ရှောင်က အခိုင်အမာ ငြင်းဆိုသည်ကို ကြားရသဖြင့် နင်ဖုန်းကျစ်က "ဒါဆိုရင်တော့ မိတ်ဆွေငယ်... ငါတို့ သွားရောက်ပြင်ဆင်နိုင်ဖို့ ခဏလောက် စောင့်ပေးပါဦး" ဟုသာ ပြောနိုင်ခဲ့တော့သည်။

ယန်ရှောင်ကို ပြောပြီးနောက် နင်ဖုန်းကျစ်သည် မိမိဘေးတွင် ထိုင်နေသော အရိုးတုန့်လော့ဘက်သို့ လှည့်ကာ "ဦးလေးအရိုး... ကျေးဇူးပြုပြီး ဂိုဏ်းကို တစ်ခေါက်လောက် သွားပြီး ရွှေဒင်္ဂါးတွေကို ပြင်ဆင်ပြီး ဒီကို ယူဆောင်လာပေးလို့ ရမလား" ဟု ဆိုလိုက်သည်။

နင်ဖုန်းကျစ်၏ စကားကို ကြားရသောအခါ အရိုးတုန့်လော့သည် ချက်ချင်းပင် အခန်းထဲမှ ထွက်ခွာသွားခဲ့တော့သည်။

အရိုးတုန့်လော့ ထွက်သွားသည်ကို ကြည့်ပြီးနောက် နင်ဖုန်းကျစ်က ယန်ရှောင်ဘက်သို့ လှည့်ကာ "မိတ်ဆွေငယ် ယန်ရှောင်... အခု ရုန်ရုန် မင်းနောက်လိုက်ပြီး ကျင့်ကြံမယ့် ကိစ္စကို ဆွေးနွေးကြတာပေါ့" ဟု ဆိုသည်။

နင်ရုန်ရုန်သည် နင်ဖုန်းကျစ်က မိမိ ယန်ရှောင်နောက်လိုက်ပြီး ကျင့်ကြံမည့် ကိစ္စကို ဆွေးနွေးရန် ပြောသည်ကို ကြားရသောအခါ မကျေမနပ်ဖြင့် "ဖေဖေ... ဒါက ဆွေးနွေးနေဖို့ လိုသေးလို့လား။ သမီးက အစ်ကိုရှောင်ကို ယုံကြည်ပြီးသားပဲဟာ" ဟု ကြားဖြတ်ပြောဆိုလိုက်သည်။

နင်ရုန်ရုန်၏ စကားကို ကြားလိုက်ရသဖြင့် နင်ဖုန်းကျစ်မှာ မိမိ၏ အဖိုးတန်သမီးလေးသည် တစ်ဖက်လူဘက်သို့ အမြဲတမ်း ပါဝင်နေသည်ဟု ခံစားလိုက်ရတော့သည်။

ယန်ရှောင်သည် နင်ဖုန်းကျစ်နှင့် သမီးဖြစ်သူ နင်ရုန်ရုန်တို့၏ စကားပြောဆိုမှုကို ကြည့်ကာ "ဂိုဏ်းချုပ်နင်... ရုန်ရုန်ကို ကျွန်တော့်နောက်လိုက်ပြီး ကျင့်ကြံခွင့်ပြုပါ သူမ အသက်သုံးဆယ်မပြည့်ခင်မှာ တိုက်တန်တုန့်လော့ တစ်ဦး ဖြစ်လာစေရမယ်လို့ ကျွန်တော် အာမခံနိုင်ပါတယ်" ဟု ဆိုလိုက်သည်။

ယန်ရှောင်၏ စကားကို ကြားရသောအခါ ဓားတုန့်လော့က နှာခေါင်းရှုံ့လိုက်ပြီး "ဘယ်လောက်တောင် ကြွားဝါလိုက်သလဲ။ ငါတို့ ခုနစ်ပါးရတနာမျှော်စင်ဂိုဏ်းရဲ့ သမိုင်းတစ်လျှောက်မှာ ခုနစ်ပါးရတနာမျှော်စင် ဝိညာဉ်ရှိတဲ့ တိုက်ရိုက်မျိုးဆက်တွေထဲက တိုက်တန်တုန့်လော့အဆင့်အထိ တက်လှမ်းနိုင်ခဲ့သူ တစ်ယောက်မှ မရှိဖူးဘူး။ ကောင်လေး... ငါ မင်းကို အတိုင်းအတာတစ်ခုအထိ မယုံကြည်ဘူးဆိုရင် မင်းကို ဒီနေရာကနေ အဝေးကြီးလွင့်သွားအောင် ရိုက်ထုတ်ပစ်လိုက်ပြီ" ဟု ဆိုလိုက်တော့သည်။

ယန်ရှောင်သည် ဓားတုန့်လော့၏ သရော်မှုကို တုံ့ပြန်ခြင်းမရှိဘဲ နင်ဖုန်းကျစ်ဘက်သို့သာ လှည့်ကာ "ခင်ဗျားတို့ ခုနစ်ပါးရတနာမျှော်စင်ဂိုဏ်းရဲ့ သမိုင်းတစ်လျှောက်မှာ ခုနစ်ပါးရတနာမျှော်စင် ဝိညာဉ်ပိုင်ဆိုင်တဲ့ ဝိညာဉ်ဆရာတွေထဲက တိုက်တန်တုန့်လော့ အဆင့်အထိ ကျင့်ကြံနိုင်ခဲ့သူ မရှိဘူးဆိုတာကို ကျွန်တော် သိပါတယ်။ ဒါပေမဲ့ အခြားသူတွေ မလုပ်နိုင်တာက... ယန်ရှောင် မလုပ်နိုင်ဘူးလို့ မဆိုလိုပါဘူး" ဟု ပြတ်သားစွာ ဆိုလိုက်သည်။

ယန်ရှောင်၏ အသံကို ကြားရသောအခါ နင်ဖုန်းကျစ်သည် မတတ်သာဘဲ ခေါင်းကို ခါယမ်းလိုက်ပြီး ယန်ရှောင်ကို ကြည့်ကာ "မိတ်ဆွေငယ်... ဒါက ကမ္ဘာ့နံပါတ်တစ် အထောက်အပံ့ပေးရေး ကိရိယာဝိညာဉ် ဖြစ်နေပါရက်နဲ့ ငါတို့ ခုနစ်ပါးရတနာမျှော်စင်ဂိုဏ်းဟာ ဘာဖြစ်လို့ တိုက်တန်တုန့်လော့ ဝိညာဉ်ဆရာကို မမွေးထုတ်နိုင်ခဲ့တာလဲဆိုတဲ့ အကြောင်းရင်းကို မင်း သိလို့လား" ဟု မေးမြန်းလိုက်သည်။

နင်ဖုန်းကျစ်၏ စကားကို ကြားရလျှင် ယန်ရှောင်က "ခင်ဗျားတို့ ခုနစ်ပါးရတနာမျှော်စင်ဂိုဏ်းရဲ့ ခုနစ်ပါးရတနာမျှော်စင်ဟာ ဝိညာဉ်ရဲ့ ကန့်သတ်ချက်ကြောင့် ဝိညာဉ်အာဇာနည်အဆင့်အထိပဲ ကျင့်ကြံနိုင်ပြီး ထပ်ပြီး တိုးတက်လို့မရတော့တာ မဟုတ်ဘူးလား။ ဂိုဏ်းချုပ်နင်... ကျွန်တော် ပြောတာ မှန်တယ်မလား" ဟု မေးလိုက်သည်။

ယန်ရှောင်၏ အဖြေကို ကြားရသောအခါ နင်ဖုန်းကျစ်သည် မတတ်သာဘဲ သက်ပြင်းချကာ "မင်းပြောတာ မှန်ပါတယ်။ ငါတို့ ခုနစ်ပါးရတနာမျှော်စင်ဂိုဏ်းရဲ့ အမွေအနှစ် ဝိညာဉ်ဖြစ်တဲ့ ခုနစ်ပါးရတနာမျှော်စင်ဟာ ဝိညာဉ်အာဇာနည်အဆင့်အထိပဲ ကျင့်ကြံနိုင်လို့ပါ ဒါကြောင့်လည်း ဦးလေးကျန့်က မင်းကို စကားကြီးစကားကျယ် ပြောတယ်လို့ ဆိုတာပေါ့" ဟု ပြောလေသည်။

"အကယ်လို့... ခင်ဗျားတို့ ခုနစ်ပါးရတနာမျှော်စင်ဂိုဏ်းရဲ့ အမွေအနှစ် ဝိညာဉ်ဖြစ်တဲ့ ဝိညာဉ်အာဇာနည်အဆင့် ကန့်သတ်ချက်ကို ဖြေရှင်းနိုင်မယ့် နည်းလမ်း ကျွန်တော့်မှာ ရှိတယ်လို့ ပြောရင်ကော..."

ယန်ရှောင်၏ စကားကို ကြားလိုက်ရသဖြင့် နင်ဖုန်းကျစ်သည် ရုတ်တရက် ထရပ်လိုက်ပြီး ယန်ရှောင်ကို စိုက်ကြည့်ကာ "မိတ်ဆွေငယ်... မင်း ဆိုလိုတာက..." ဟု မေးလိုက်တော့သည်။

"ခုနစ်ပါးရတနာမျှော်စင် ဝိညာဉ်ဟာ ကိုးပါးရတနာမျှော်စင်အဖြစ် ဆင့်ကဲပြောင်းလဲသွားမယ်ဆိုရင် အဲဒီ ပြဿနာက ပြေလည်သွားမှာ မဟုတ်ဘူးလား။ ဂိုဏ်းချုပ်နင်... ကျွန်တော် ပြောတာ ဟုတ်မဟုတ် စဉ်းစားကြည့်ပါဦး"

ယန်ရှောင်၏ နှုတ်မှ ခုနစ်ပါးရတနာမျှော်စင်ကို ကိုးပါးရတနာမျှော်စင်အဖြစ် အဆင့်မြှင့်တင်နိုင်သည်ဟူသော စကားကို ကြားရသောအခါ နင်ဖုန်းကျစ်သည် စိတ်လှုပ်ရှားစွာဖြင့် ယန်ရှောင်ကို "မိတ်ဆွေငယ်... မင်းဆီမှာ ခုနစ်ပါးရတနာမျှော်စင်ကို ကိုးပါးရတနာမျှော်စင်အဖြစ် အဆင့်မြှင့်တင်နိုင်မယ့် နည်းလမ်း အမှန်တကယ် ရှိတာလား။ အကယ်လို့ ရှိတယ်ဆိုရင်တော့... မင်းဟာ ငါတို့ ခုနစ်ပါးရတနာမျှော်စင်ဂိုဏ်းရဲ့ ကျေးဇူးရှင်ကြီး ဖြစ်ပါပြီ" ဟု ကမူးရှူးထိုး မေးမြန်းလိုက်တော့သည်။

နင်ဖုန်းကျစ်၏ စိတ်လှုပ်ရှားနေသော အသံကို ကြားရသဖြင့် ယန်ရှောင်က "ဂိုဏ်းချုပ်နင်... ကျွန်တော့်မှာ ခုနစ်ပါးရတနာမျှော်စင်ကို ကိုးပါးရတနာမျှော်စင်အဖြစ် အဆင့်မြှင့်တင်နိုင်မယ့် နည်းလမ်း အမှန်တကယ် ရှိပါတယ်။ ဒါဟာ ရုန်ရုန် အသက်သုံးဆယ်မပြည့်ခင်မှာ တိုက်တန်တုန့်လော့ အဆင့်အထိ ကျင့်ကြံနိုင်စေရမယ်လို့ ကျွန်တော် ရဲရဲကြီး အာမခံနိုင်တဲ့ အခြေခံအကြောင်းရင်းပါပဲ" ဟု ဆိုလိုက်သည်။

ယန်ရှောင်၏ အတည်ပြုချက်ကို ကြားရသောအခါ နင်ဖုန်းကျစ်သည် အလွန်အမင်း စိတ်လှုပ်ရှားစွာဖြင့် ဟစ်အော်လိုက်တော့သည်  "မိတ်ဆွေငယ်... အကယ်လို့ မင်းက ခုနစ်ပါးရတနာမျှော်စင်ကို ကိုးပါးရတနာမျှော်စင်အဖြစ် အဆင့်မြှင့်တင်နိုင်မယ့် ပြဿနာကို ဖြေရှင်းပေးနိုင်မယ်ဆိုရင်... ရုန်ရုန်ကို မင်းနောက်လိုက်ပြီး ကျင့်ကြံခွင့်ပြုရုံတင်မကဘူး ငါကိုယ်တိုင်တောင် မင်းနောက်လိုက်ပြီး ကျင့်ကြံဦးမယ် ဟားဟားဟား..."

နင်ရုန်ရုန်သည် မိမိဖခင်၏ စကားကို ကြားရသောအခါ "ဖေဖေ... ဘာတွေလုပ်နေတာလဲ" ဟု လှမ်းမေးလိုက်သည်။

ဘေး၌ မတ်တတ်ရပ်နေသော ဓားတုန့်လော့သည်လည်း အံ့အားသင့်စွာဖြင့် "ဂိုဏ်းချုပ်... မင်း တည်ငြိမ်မှု ထပ်ပြီး ပျက်ပြားနေပြန်ပြီ" ဟု သတိပေးလိုက်ရတော့သည်။