အခန်း ၃၂ ကျင့်ကြံခြင်းပစ်မှတ် တိုးပွားလာခြင်း

လွန်ခဲ့သောညက ဖလန်းဒါးနှင့် ချင်မင်တို့သည် အများအပြား ဆွေးနွေးခဲ့ကြပြီး နောက်ဆုံးတွင်မူ အကယ်ဒမီ၏ ဘဏ္ဍာရေး ဖိအားများကြောင့် လူတိုင်းကို ခေါ်ဆောင်၍ ကောင်းကင် တော်ဝင်အကယ်ဒမီသို့ သွားရောက်ရန် သူ ဆုံးဖြတ်ချက် ချလိုက်တော့သည်။

"မင်းတို့လည်း အကယ်ဒမီရဲ့ အခြေအနေကို သိကြတဲ့အတိုင်းပါပဲ။ ငါ လူတိုင်းကိုခေါ်ပြီး ကောင်းကင် တော်ဝင်အကယ်ဒမီကို သွားရောက်ပူးပေါင်းဖို့ ဆုံးဖြတ်လိုက်ပြီ။ မင်းတို့ရဲ့ သဘောထားတွေကိုလည်း လွတ်လွတ်လပ်လပ် ပြောနိုင်ပါတယ်"

ထန်ဆန်းက ပထမဦးစွာ ဝင်ရောက်ပြောဆိုခဲ့သည်  "ဆရာ ရှိတဲ့နေရာမှာ ကျွန်တော် ရှိနေမှာပါ"။ ရှောင်ဝူကမူ ထုံးစံအတိုင်း ထန်ဆန်းနောက်သို့သာ လိုက်ပါမည် ဖြစ်သည်။

မာဟုန်ကျွင်းနှင့် အော့စကာတို့ကလည်း ဖလန်းဒါးနှင့်အတူသာ ရှိနေမည်ဖြစ်ကြောင်း ပြောကြားခဲ့ကြသည် အဘယ်ကြောင့်ဆိုသော် သူတို့နှစ်ဦးစလုံးသည် ရှရက်ခ်အကယ်ဒမီတွင်သာ ကြီးပြင်းလာခဲ့ကြသူများဖြစ်ပြီး ရှရက်ခ်အကယ်ဒမီသာ မရှိလျှင် သူတို့လည်း ရှိလာလိမ့်မည်မဟုတ်ဟု ဆိုနိုင်သည်။

တိုက်မုပိုင်ကလည်း ရှရက်ခ်အကယ်ဒမီတွင်သာ ဆက်လက်ရှိနေမည်ဖြစ်ကြောင်း ပြောဆိုခဲ့သည် သူသည် ရှန့်လော့အင်ပါယာမှ ထွက်ခွာလာကတည်းက ဤနေရာ၌သာ ရှိနေခဲ့ခြင်းဖြစ်ပြီး အကယ်ဒမီအပေါ် ထူးခြားသော သံယောဇဉ်တစ်ခု ဖြစ်တည်နေခဲ့သောကြောင့် ဖြစ်သည်။

ထန်ဆန်းနှင့် အခြားသူ လေးယောက်တို့ သူတို့၏ သဘောထားများကို ဖော်ပြပြီးနောက် ဖလန်းဒါးသည် သူ၏ အကြည့်များကို နင်ရုန်ရုန် ကျူးကျူးချင်းနှင့် ယန်ရှောင်တို့ထံသို့ ရွှေ့ပြောင်းလိုက်သည်။

နင်ရုန်ရုန်အတွက်မူ သူမ၏ အိမ်သည် ကောင်းကင်အင်ပါယာတွင် ရှိနေခြင်းဖြစ်သည်။ ကောင်းကင်အကယ်ဒမီသို့ သွားခြင်းမှာ အိမ်ပြန်ရသကဲ့သို့ပင် ထူးမခြားနားလှချေ။ ထို့အပြင် သူမသည် ယန်ရှောင်နှင့်အတူ ရှိနေရခြင်းကို ပို၍ နှစ်သက်သည်။ ယန်ရှောင်နှင့်အတူ ရှိနေရခြင်းက အိမ်တွင် ရှိနေရသည်ထက်ပင် ပိုမို စိတ်သက်သာရာရစေသည်ဟု သူမ ခံစားရသည်။ ထို့အပြင် ခုနစ်ပါးရတနာမျှော်စင်ဂိုဏ်းသည် အလုပ်ကိစ္စ အလွန်များပြားသော ဂိုဏ်းကြီးတစ်ခုဖြစ်သဖြင့် သူမ၏ ဖခင်မှာ သူမနှင့်အတူ အမြဲတမ်း ရှိမနေပေးနိုင်ချေ။ အရေးကြီးဆုံးအချက်မှာ ယန်ရှောင်ဆီတွင် ရှိနေသော ဆေးလုံးများမှာ သူမ၏ ကျင့်ကြံခြင်းအတွက် မရှိမဖြစ် လိုအပ်နေခြင်းကြောင့် ဖြစ်သည် သူမ၏သိုင်းဝိညာဉ်ဖြစ်သော ခုနစ်ပါးရတနာမျှော်စင် ၏ မူလကျင့်ကြံခြင်း လုပ်ငန်းစဉ်မှာ အလွန်တရာ နှေးကွေးလွန်းလှသည်။

ကျူးကျူးချင်းကမူ ယန်ရှောင် ရှိသည့်နေရာတိုင်းသို့ လိုက်ပါမည် ဖြစ်သည် အဘယ်ကြောင့်ဆိုသော် သူမသည် ယန်ရှောင်အပေါ် ထူးခြားသော ခံစားချက်များ ရှိနေခဲ့ပြီဖြစ်ပြီး အထူးသဖြင့် ယန်ရှောင်သည် သူမ၏ အသက်သခင်ကျေးဇူးရှင်ဖြစ်ကာ ဤလောကတွင် သူမအပေါ် အကြင်နာဆုံးသောသူ ဖြစ်နေသောကြောင့် ဖြစ်သည်။

ယန်ရှောင်က ခေတ္တမျှ စဉ်းစားလိုက်သည်။ သူနှင့် ကျူးကျူးချင်းတို့အကြားတွင် အပြန်အလှန် ယုံကြည်မှု တည်ဆောက်ပြီးသားဖြစ်၍ အကယ်ဒမီတွင် ဆက်လက်နေထိုင်ရန် မလိုအပ်တော့ချေ။ အကယ်ဒမီ၏ ချုပ်ချယ်မှုများ မရှိတော့ပါက သူတို့၏ အင်အားမှာ ပိုမို လျင်မြန်စွာ တိုးတက်လာနိုင်ပြီး အခြားသူများ မိမိတို့၏ လျှို့ဝှက်ချက်ကို သိရှိသွားမည်ကိုလည်း စိုးရိမ်နေရန် မလိုတော့ပေ။

"ကျွန်တော် ကျူးကျူးချင်းကို ခေါပြီး တစ်နေရာရာမှာ ခေတ္တမျှ သွားရောက်ကျင့်ကြံဖို့ အစီအစဉ်ရှိပါတယ် ထို့နောက်မှ နောက်ထပ် အဆင့်တွေကို ဆက်ပြီး စဉ်းစားပါမယ်။ ကျောင်းအုပ်ကြီးအနေနဲ့ ကျွန်တော်တို့အတွက် စိုးရိမ်မနေပါနဲ့"

ယန်ရှောင်၏ စကားကို ကြားရသောအခါ ဖလန်းဒါးမှာ အထူးတလည် အံ့သြမနေခဲ့ချေ။ ယန်ရှောင်အတွက်မူ အကယ်ဒမီ၏ သင်ကြားမှုများသည် သူ၏ တိုးတက်မှုအတွက် နောက်ထပ် အထောက်အကူ မပြုနိုင်တော့ချေ ထို့အပြင် ယန်ရှောင်၏ လမ်းညွှန်မှုအောက်တွင် ကျူးကျူးချင်းသည် ခြောက်လအတွင်း အဆင့်ဆယ်ဆင့်အထိ တဟုန်ထိုး တိုးတက်လာခဲ့သည်ကို ကြည့်ခြင်းအားဖြင့် သူမသည်လည်း အကယ်ဒမီတွင် ဆက်လက်နေရန် မလိုတော့ချေ။ ကျောင်းအုပ်ကြီးတစ်ဦးအနေဖြင့် ဖလန်းဒါး အဓိက စိုးရိမ်သည်မှာ မိမိ၏ အကယ်ဒမီက ကျောင်းသားများကို နောက်ထပ် ဘာတွေ သင်ကြားပေးနိုင်ဦးမလဲ ဆိုသည့်အချက်သာ ဖြစ်ပြီး ပါရမီရှင်များကို မည်သို့ ဆွဲထားရမလဲ ဆိုသည်ကို မဟုတ်ချေ။ အဘယ်ကြောင့်ဆိုသော် သူ တည်ထောင်ခဲ့သည်မှာ အကယ်ဒမီတစ်ခုသာ ဖြစ်ပြီး ဂိုဏ်းတစ်ခု မဟုတ်သောကြောင့် ဖြစ်သည်။ ၎င်းအပြင် ယန်ရှောင်နှင့် မဟာဆရာကြီးတို့အကြားတွင် ရှိနေသော ပဋိပက္ခများကို ထောက်ထား၍လည်းကောင်း မဟာဆရာကြီး၏ မိတ်ဆွေတစ်ဦး ဖြစ်သည့်အတွက်ကြောင့်လည်းကောင်း မဟာဆရာကြီးအနေဖြင့် အလားအလာရှိသော ဤဝိညာဉ်ဆရာသခင်ကို နောက်ထပ် ရန်မစမိစေရန် သူ အလိုရှိသည်။

ယန်ရှောင်၏ အသက်အရွယ်ထက် ပိုမိုရင့်ကျက် တည်ငြိမ်နေသော အသက်တစ်ဆယ့်ငါးနှစ်အရွယ် မျက်နှာလေးကို ကြည့်ရင်း ဖလန်းဒါး နောက်ထပ် ဘာမျှ မပြောတော့ချေ။ သူက ရိုးရှင်းစွာပင် "ယန်ရှောင်... မင်းက အခုဆိုရင် ဝိညာဉ်ဘုရင် အဆင့်ကို ရောက်နေပြီ။ ငါတို့ မင်းကို ဘာမှ ထပ်ပြီး မသင်ပေးနိုင်တော့ဘူး။ ဒါပေမဲ့ မှတ်ထားပါ... မင်းဟာ အမြဲတမ်း ရှရက်ခ်ရဲ့ အစိတ်အပိုင်းတစ်ခု ဖြစ်နေမှာပါ။ မင်းလို ထူးချွန်တဲ့ ကျောင်းသားတစ်ယောက် ရှိခဲ့တဲ့အတွက် ငါ အလွန် ဂုဏ်ယူပါတယ်" ဟု ဆိုလိုက်သည်။

ယန်ရှောင်သည် ဖလန်းဒါး၏ စကားကို ဘာမျှမပြောဘဲ နားထောင်နေခဲ့သည်။ သူသည် ရှရက်ခ်တွင် ခြောက်လမျှသာ နေထိုင်ခဲ့ရသော်လည်း ဖလန်းဒါး၏ မျှတမှန်ကန်သော စိတ်ဓာတ်ကိုမူ သူ လေးစားမိသည်။

ယန်ရှောင်က ကျူးကျူးချင်းကို ခေါ်ဆောင်၍ အခြားနေရာများသို့ သွားရောက်ကျင့်ကြံမည့် အစီအစဉ်များကို နားထောင်ရင်း တိုက်မုပိုင်သည် မိမိ၏ စေ့စပ်ထားသူမှာ မိမိထံမှ တဖြည်းဖြည်း ပို၍ ဝေးကွာသွားသကဲ့သို့ ခံစားလိုက်ရသည်။

ထိုစဉ် နင်ရုန်ရုန်က ဝင်ပြောလိုက်သည် "အစ်ကိုရှောင်... ငါလည်း မင်းနဲ့အတူ လိုက်ပြီး ကျင့်ကြံလို့ ရမလား"

နင်ရုန်ရုန်၏ တည်ကြည်သော မျက်နှာလေးကို ယန်ရှောင် ကြည့်နေစဉ်မှာပင် သူ၏ စိတ်ထဲ၌ စနစ်၏ အသံတစ်ခု ချက်ချင်း ထွက်ပေါ်လာခဲ့သည်။

[ဒေါင်... စနစ်မှ စမ်းသပ်တွေ့ရှိချက်အရ နင်ရုန်ရုန်သည် ပိုင်ရှင်၏ ကျင့်ကြံခြင်းပစ်မှတ်အဖြစ် ပါဝင်ရန် မိမိသဘောဆန္ဒအလျောက် တောင်းဆိုလာပါသည်။ ပိုင်ရှင်အနေဖြင့် လက်ခံရန် သို့မဟုတ် ငြင်းပယ်ရန် ရွေးချယ်နိုင်ပါသည်]

[လက်ခံပါက ပိုင်ရှင်အား ကတ်လှန်ခွင့် ၁၀ ကြိမ် ပေးအပ်ပါမည်။ ငြင်းပယ်ပါက ပိုင်ရှင်ထံမှ နှစ်တစ်သောင်းသက်တမ်းရှိ ဟင်းလင်းပြင်သားရဲ၏ ညာဘက်ခြေထောက်အရိုး ကို ပြန်လည်ရုပ်သိမ်းပါမည်]

စနစ်၏ အသံကို ကြားလိုက်ရသောအခါ ယန်ရှောင် စိတ်ထဲမှ အလွန်အမင်း ဝမ်းသာသွားခဲ့ရသည်။ ဒီကောင်စုတ် စနစ်ကတော့ တကယ့်ကို လူမဆန်ဘူးပဲ။ ငါ့ကို အတင်းအကျပ် လက်ခံခိုင်းနေတာပဲ။ ဟားဟားဟား... ကတ်လှန်ခွင့် ၁၀ ကြိမ်တောင်ဆိုတော့ ဘယ်လို ရတနာကောင်းတွေ ရမလဲ မသိဘူး

[ဒေါင်... စနစ်ကို စော်ကားမော်ကား ပြောဆိုခဲ့ကြောင်း စနစ်မှ စမ်းသပ်တွေ့ရှိပါသည်။ နင်ရုန်ရုန်ကို ကျင့်ကြံခြင်းပစ်မှတ်အဖြစ် လက်ခံခြင်းအတွက် ရရှိမည့် ဆုလာဘ်ကို တစ်ဝက် လျှော့ချပါမည်။ အကယ်၍ ပိုင်ရှင်က ငြင်းပယ်ရန် ရွေးချယ်ပါက ပိုင်ရှင်၏ အသက်သက်တမ်း နှစ်တစ်သောင်းကို ရုပ်သိမ်းမည့်အပြင် နှစ်တစ်သောင်းသက်တမ်းရှိ ဟင်းလင်းပြင်သားရဲ၏ ခြေထောက်အရိုး နှင့် နှစ်တစ်သောင်းသက်တမ်းရှိ ကောင်းကင်ပြာနဂါးနွားသိုး၏ ညာဘက်လက်မောင်းအရိုး တို့ကိုပါ ပြန်လည်သိမ်းဆည်းပါမည်]

မင်းကတော့ တကယ့် အောက်တန်းစား စနစ်ပဲ။ ဆုလာဘ်တွေကိုတောင် တစ်ဝက် ဖြတ်တောက်ရဲတယ်ပေါ့။ ငါ မင်းကို မဆော်ကစားဝံ့ပါဘူး... မင်းနဲ့ ဝေးဝေးနေလို့ မရဘူးလား

ယန်ရှောင်၏ မျက်နှာအမူအရာမှာ တစ်ပြောင်းလဲလဲ ဖြစ်နေသည်ကို မြင်သောအခါ နင်ရုန်ရုန်က သူ ဘာဖြစ်နေတာလဲ။ ငါကိုယ်တိုင် တောင်းဆိုနေတာကို သူ ငြင်းပယ်တော့မှာ မဟုတ်ဘူးမလား ဟု တွေးတောကာ စိုးရိမ်နေမိသည်။

တကယ်တမ်းတွင် နင်ရုန်ရုန်အနေဖြင့် ယန်ရှောင်နောက်သို့ လိုက်ပါလိုသည့် အဓိက အကြောင်းရင်းမှာ ယန်ရှောင်တွင် ထူးခြားဆန်းပြားသော ဆေးလုံးနှစ်မျိုး ရှိနေသောကြောင့် ဖြစ်သည် ၎င်းတို့မှာ ဝိညာဉ်တက်လှမ်းဆေးလုံး နှင့် နက်ရှိုင်းသောရေဆေးလုံး တို့ ဖြစ်ကြသည်။ ခုနစ်ပါးရတနာမျှော်စင်ဂိုဏ်း၏ ဝိညာဉ်ကျင့်ကြံခြင်းအတွက် ထိုဆေးလုံးနှစ်မျိုးစလုံးကို အမြောက်အမြား လိုအပ်လှသည်။ ပြီးခဲ့သော အကြိမ်က သူမ ပြန်လည်ပေးပို့ခဲ့သော ဆေးလုံးများသည် ခုနစ်ပါးရတနာမျှော်စင်ဂိုဏ်းမှ ထူးချွန်သော တပည့်အချို့ကို နှစ်ပေါင်းများစွာ ပိတ်ဆို့နေခဲ့သော ကျင့်ကြံခြင်း အတားအဆီးများကို အောင်မြင်စွာ ကျော်ဖြတ်နိုင်ရန် ကူညီပေးနိုင်ခဲ့သဖြင့် သူမ၏ ဖခင်ဖြစ်သူက ထိုဆေးလုံးများ ထပ်မံရှိသေးသလားဟု သူမအား အကြိမ်ကြိမ် မေးမြန်းနေခဲ့ခြင်း ဖြစ်သည်။

ယန်ရှောင်သည် စနစ်အတွင်းမှ ပြန်လည်ထွက်ခွာလာပြီး နင်ရုန်ရုန်ကို ကြည့်ကာ "မင်း ငါ့နောက်ကို လိုက်လို့ရပါတယ် ဒါပေမဲ့ ကိစ္စရပ်တိုင်းမှာ ငါ့ရဲ့ စကားကိုပဲ နားထောင်ရမယ်... မဟုတ်ရင်တော့ မင်းကို ငါ့ဘေးနားကနေ အချိန်မရွေး မောင်းထုတ်ပစ်မယ်" ဟု ဆိုလိုက်သည်။

ယန်ရှောင်၏ စကားကို ကြားရသောအခါ နင်ရုန်ရုန်မှာ အစပိုင်းတွင် ဆွံ့အသွားခဲ့ရသည်။ ထို့နောက်မှ ထိုဆေးလုံးနှစ်မျိုးအတွက်ကြောင့် မတတ်သာသည့်အဆုံး အလျှော့ပေးကာ သဘောတူလိုက်ရတော့သည်။

မာဟုန်ကျွင်း၏ ဘေးတွင် မတ်တတ်ရပ်နေသော အော့စကာသည် နင်ရုန်ရုန်က ယန်ရှောင်နောက်သို့ လိုက်ပါရန် ရွေးချယ်လိုက်သည်ကို ကြားလိုက်ရသောအခါ သူ၏ နှလုံးသားမှာ တစ်ချက် တုန်လှုပ်သွားခဲ့ရပြီး မိမိ၏ နှလုံးသားထဲမှ အဖိုးတန်အရာတစ်ခု ဆုံးရှုံးသွားခဲ့ရသည့်အလား ခံစားလိုက်ရသည်။

ဖလန်းဒါးသည် နင်ရုန်ရုန်ကလည်း ယန်ရှောင်နှင့်အတူ လိုက်ပါ၍ ကျင့်ကြံရန် ရွေးချယ်လိုက်သည်ကို မြင်သော်လည်း ဘာမျှ ဝင်ရောက်မပြောခဲ့ချေ။ သူက "အားလုံးပဲ မိမိတို့ရဲ့ အခန်းတွေကို ပြန်ပြီး ပစ္စည်းပစ္စယတွေ သိမ်းဆည်းကြပါ။ ငါတို့ ဒီနေ့ပဲ အကယ်ဒမီကို ပြန်ကြမယ် ပြီးရင် နောက် ရက်အနည်းငယ်အတွင်း ကောင်းကင် တော်ဝင်အကယ်ဒမီကို ထွက်ခွာကြမယ်" ဟုသာ ဆိုလိုက်တော့သည်။

လူတိုင်း သူတို့၏ အခန်းများသို့ ပြန်ကာ ပစ္စည်းများကို အလျင်အမြန် သိမ်းဆည်းခဲ့ကြသည်။ မကြာမီမှာပင် အားလုံး သိမ်းဆည်းပြီးစီးသွားကြသဖြင့် ဟိုတယ်တံခါးဝတွင် ပြန်လည်စုစည်းမိကြသည်။

လူစုံပြီဖြစ်၍ ဖလန်းဒါးသည် ၎င်းတို့ကို ဦးဆောင်ကာ ဆိုတိုမြို့မှ ထွက်ခွာ၍ အကယ်ဒမီသို့ ပြန်လည်ဦးတည်ခဲ့ကြသည်။ သူတို့ အကယ်ဒမီသို့ ပြန်လည်ရောက်ရှိချိန်တွင်မူ ညနေစောင်းနေခဲ့ပြီ ဖြစ်သည်။ အကယ်ဒမီသို့ ရောက်သည်နှင့် လူတိုင်း မိမိတို့၏ အဆောင်များသို့ ပြန်ကာ ကျင့်ကြံခြင်းများကို အသီးသီး ပြုလုပ်ခဲ့ကြသည်။

ထိုညတွင် ကျူးကျူးချင်းသည် ယန်ရှောင်၏ အခန်းတံခါးဝသို့ လာရောက်ကာ တံခါးခေါက်ခဲ့သည်။ ယန်ရှောင်သည် သူ၏ တရားထိုင်ခြင်းမှ နိုးထလာပြီး "ဘယ်သူလဲ" ဟု မေးလိုက်သည်။

"ငါပါ"

ကျူးကျူးချင်း၏ အသံကို ကြားရသဖြင့် ယန်ရှောင် ထကာ တံခါးကို ဖွင့်ပေးလိုက်သည်။

"ဒီလောက် ညဉ့်နက်ကြီးမှာ ဘာကိစ္စရှိလို့လဲ"

"ဒီနေ့ နင်ရုန်ရုန်ရဲ့ တောင်းဆိုချက်ကို မင်း သဘောတူလိုက်တာ... ဘာကို ရည်ရွယ်တာလဲ"

"ငါ ဘာမှ မရည်ရွယ်ပါဘူး။ အဲဒီကောင်မလေးက တကယ်ကို စိတ်အားထက်သန်နေပုံရလို့ သဘောတူလိုက်ရုံပါပဲ"

"ဟုတ်လို့လား"

"ဒါမှမဟုတ်ရင် အခြား ဘာရှိဦးမှာလဲ"

ယန်ရှောင်ထံမှ ထပ်မံ၍ ထူးခြားသော အဖြေကို မရရှိသဖြင့် ကျူးကျူးချင်းသည် ယန်ရှောင်ကို တစ်ချက် စောင်းငဲ့ကြည့်ကာ လှည့်ထွက်သွားခဲ့တော့သည်။

ကျူးကျူးချင်း ထွက်ခွာသွားပြီးနောက် ယန်ရှောင် တံခါးကို ပြန်လည်ပိတ်လိုက်သည်။ ယန်ရှောင်တစ်ယောက် သူ၏ ကျင့်ကြံခြင်းကို ဆက်လက်လုပ်ဆောင်ရန် ပြင်ဆင်နေစဉ်မှာပင် တံခါးခေါက်သံ နောက်တစ်ကြိမ် ထပ်မံထွက်ပေါ်လာခဲ့သည်။

ယန်ရှောင်သည် ကျူးကျူးချင်း ပြန်လာသည်ဟု ထင်မှတ်ကာ တံခါးကို ထပ်မံဖွင့်လိုက်ရာ ယခုတစ်ကြိမ် ရောက်ရှိလာသူမှာ ထန်ဆန်း ဖြစ်နေသည်ကို တွေ့လိုက်ရသည်။

ယန်ရှောင်သည် ထန်ဆန်းအပေါ် မည်သည့် မိတ်ဆွေစိတ်မျိုးမျှ မရှိသဖြင့် အေးစက်စွာပင် "ဘာကိစ္စလဲ" ဟု မေးလိုက်သည်။

ထန်ဆန်းက မိမိထက် နှစ်နှစ်ခန့် ပိုမိုကြီးရင့်သော ယန်ရှောင်ကို ကြည့်ကာ "ကျွန်တော် မင်းနဲ့ တိုက်ခိုက်ချင်တယ် ကျွန်တော်တို့နှစ်ယောက်ကြားက ကွာဟချက်က ဘယ်လောက်အထိ ရှိနေလဲဆိုတာ အသေအချာ သိချင်လို့ပါ" ဟု ဆိုလိုက်သည်။

ယန်ရှောင်သည် တည်ကြည်သော မျက်နှာအမူအရာ ရှိနေသည့် ထန်ဆန်းကို ကြည့်ကာ "မင်း ငါနဲ့ တိုက်ခိုက်ဖို့ သေချာလို့လား" ဟု မေးလိုက်သည်။

"ဟုတ်ပါတယ်... ကျွန်တော်တို့ကြားမှာ ကွာဟချက် အလွန်ကြီးမားမှန်း ကျွန်တော် သိပါတယ် ဒါပေမဲ့ အဲဒီကွာဟချက်က ဘယ်လောက်အထိ ကြီးမားနေလဲဆိုတာကို ကျွန်တော် ကိုယ်တိုင် သိချင်မိလို့ပါ"

"ကောင်းပြီလေ... မင်းရဲ့ ဆန္ဒကို ငါ ဖြည့်ဆည်းပေးမယ်"

ပြောပြီးနောက်သူနှင့်ထန်ဆန်းတို့သည်အကယ်ဒမီ၏လေ့ကျင့်ရေးကွင်းပြင်ဆီသို့ဦးတည်ကာလမ်းလျှောက်ထွက်ခွာခဲ့ကြတော့သည်။