အခန်း (၈) ထန်ဟောက်နှင့် တိုက်ပွဲ

လင်းဖန် စကားပင် မဆုံးသေးမီမှာပင် ထန်ဟောက်က ကြားဖြတ်နှောင့်ယှက်လိုက်သည်။

ထိုအခြေအနေကို မြင်သောအခါ လင်းဖန်၏ မျက်နှာက ပို၍ ညိုမှောင်သွားပြီး "ထန်ဟောက်... မင်း လွန်လွန်းနေပြီ။ ဝိညာဉ်သားရဲတွေဆိုတာ ပိုင်ရှင်မရှိတဲ့အရာတွေပဲ။ မင်းက တကယ်ပဲ မင်းကိုယ်မင်း အဲလောက် သန်မာလှပြီလို့ ထင်နေတာလား။ ငါ့ရဲ့ အရှိန်အဟုန်နဲ့ဆိုရင် သူမကို ငါ သတ်လိုက်ရင်တောင် မင်း ငါ့ကို တားနိုင်မှာ မဟုတ်ဘူး"

"အဲဒီအချိန်ကျရင် ငါက မရရင်တောင် မင်းရဲ့ အကြံအစည်တွေ အားလုံးကတော့ လုံးဝ ပျက်စီးသွားလိမ့်မယ်"

ထန်ဟောက်က သူဆောင်းထားသော ဝါးခမောက်ကို ချွတ်လိုက်ရာ လင်းဖန်ထက်ပင် ပိုမိုရင့်ရော် ညှိုးရော်နေသော မျက်နှာကြီး ထွက်ပေါ်လာသည်။ "မင်း စမ်းကြည့်ချင်ရင် ကြိုက်သလို စမ်းကြည့်နိုင်ပါတယ်။ မင်း သူမကို အရင် သတ်နိုင်မလား ဒါမှမဟုတ် ငါက မင်းကို အရင် သတ်မလားဆိုတာ ကြည့်ကြတာပေါ့"

လင်းဖန်သည် မြရောင်ပြာ ဓားရိပ်ကို တင်းတင်းဆုပ်ကိုင်ကာ ထန်ဟောက်ဆီသို့ ဓားဦးလှည့်လိုက်သည်။ "ငါ ဘွဲ့ခံဒိုလော့အဆင့်ကို ရောက်ကတည်းက အဆင့်တူချင်း တစ်ခါမှ မတိုက်ခိုက်ဖူးသေးဘူး။ ထန်ဟောက်... မင်းမှာ အဆင့် ၉၅ ဝိညာဉ်စွမ်းအား ရှိနေပေမဲ့ လွန်ခဲ့တဲ့ တစ်ဆယ့်နှစ်နှစ်က တိုက်ပွဲကြီးတုန်းက ရခဲ့တဲ့ ဒဏ်ရာဟောင်းတွေ ရှိနေတုန်းပဲ။ အဲဒီဒဏ်ရာတွေက မင်းရဲ့ အစစ်အမှန် ခွန်အားကိုအကြီးအကျယ် ထိခိုက်စေတာ"

ထန်ဟောက်က ဖြည်းညှိုးစွာ ဆိုသည်။ "ငါ့မှာ ဒဏ်ရာဟောင်းတွေ ရှိနေတာ မှန်ပေမဲ့ ဘွဲ့ခံဒိုလော့အဆင့်ကို အခုမှ ရောက်ခါစ လူသစ်တစ်ယောက်က လာပြီး အထင်သေးလို့ရမယ့် လူစားမျိုးတော့ မဟုတ်ဘူး။ အခြေအနေက ဒီလိုဖြစ်နေမှတော့ မင်း အရှုံးမပေးမချင်း ငါကပဲ ရိုက်နှက်ဆုံးမရတော့မှာပေါ့"

"ငါ့မှာ ဒဏ်ရာဟောင်းတွေ ရှိနေတာကို သူက ဘယ်လိုလုပ် သိနေတာလဲ" ထန်ဟောက်၏ မျက်နှာပြင်က တည်ငြိမ်နေသော်လည်း စိတ်ထဲတွင်မူ အလွန်အမင်း အံ့အားသင့်သွားရသည်။ "သူက တောမှီအကျော်အမော်တစ်ယောက် မဟုတ်တာတော့ သေချာသလောက်ပဲ ဝိညာဉ်နန်းတော်က လူလည်း မဟုတ်ပုံရဘူး။ သူက ဘယ်အဖွဲ့အစည်းကများ ဖြစ်နေမလဲ"

"ပထမ ဝိညာဉ်စွမ်းရည် - မြရောင်ပြာ ပေါ်ထွန်းခြင်း" လင်းဖန်သည် သူ၏ ပထမဆုံး ဝိညာဉ်ကွင်း၏ ဝိညာဉ်စွမ်းရည်ကို ချက်ချင်း ထုတ်ဖော်လိုက်သည်။

ချက်ချင်းဆိုသလိုပင် လင်းဖန်နှင့် သူ၏ ဓားပတ်လည်တွင် ဖျော့တော့သော မြရောင်ပြာအလင်းတန်းများ ဝန်းရံသွားပြီး နံနက်ခင်း နေရောင်အောက်မှ မီးခိုးငွေ့တစ်ခုကဲ့သို့ ဖြစ်သွားသည်။ ဤစွမ်းရည်က လင်းဖန်၏ တိုက်ခိုက်မှုအရှိန်ကို သုံးဆယ်ရာခိုင်နှုန်းနှင့် တိုက်ခိုက်မှုစွမ်းအားကို မိနစ်ပိုင်းအတွင်း နှစ်ဆယ်ရာခိုင်နှုန်း တိုးမြင့်ပေးလိုက်သည်။

လင်းဖန်၏ လှုပ်ရှားမှုမှာ လျှပ်စီးလက်သကဲ့သို့ လျင်မြန်လှပြီး တိုက်ခိုက်သည့် လမ်းကြောင်းတစ်လျှောက်တွင် ပုံရိပ်အထပ်ထပ်ကို ချန်ရစ်ကာ ထန်ဟောက်ကို စတင် ထိုးနှက်ခုတ်ပိုင်းတော့သည်။

"ပထမ ဝိညာဉ်စွမ်းရည် - ခွန်အားတိုးမြှင့်ခြင်း" ထန်ဟောက်က ဟောက်ထျန်းတူကို တင်းတင်းဆုပ်ကိုင်လိုက်သည်။ "ဟောက်ထျန်း ခန္ဓာကိုယ် ကာကွယ်ခြင်း"

"သူ့ရဲ့ တိုက်ခိုက်မှု အကြိမ်ရေက ငါ့ထက် ပိုမြန်တာတော့ မှန်တယ်။ ဒါပေမဲ့ ဒီလောက် တိုက်ခိုက်မှုမျိုးနဲ့တော့ ငါ့ရဲ့ ဟောက်ထျန်း ခန္ဓာကိုယ် ကာကွယ်ခြင်းကို ဖျက်ဆီးဖို့ မလုံလောက်သေးဘူး"

လင်းဖန်၏ တိုက်ခိုက်မှုများမှာ ထန်ဟောက်၏ ကာကွယ်ရေး အလွှာပေါ်တွင် အရာမထင်သကဲ့သို့ ဖြစ်နေသည်။ သို့သော်လည်း လင်းဖန်က လက်မလျှော့ဘဲ အရပ်မျက်နှာအနှံ့မှ ဆက်တိုက် တိုက်ခိုက်ကာ ထန်ဟောက်၏ ကာကွယ်ရေး အားနည်းချက်ကို ရှာဖွေနေခဲ့သည်။ ထို့အပြင် ထန်ဟောက်၏ ပေါက်ကွဲအားမှာ ပြင်းထန်သော်လည်း ရေရှည်ခံနိုင်ရည် အားနည်းကြောင်း လင်းဖန် သိထားသည်။

ထို့ကြောင့် ထန်ဟောက်ကို အနိုင်ယူရန်အတွက် ထိပ်တိုက်ရင်ဆိုင်၍ မရဘဲ ရေရှည်ဆွဲကာ တိုက်ခိုက်ရမည် ဖြစ်သည်။

"သူက ငါ့ရဲ့ ခန္ဓာကိုယ် အခြေအနေကို သိနေတာပဲ။ ဒီလို အနာအဆာမရှိတဲ့ တိုက်ခိုက်မှုတွေက ငါ့ကို အချိန်ဆွဲပြီး နွမ်းလျအောင် လုပ်ဖို့ ကြံစည်နေတာပဲ။ ဟွန့်... ငါ့ကို အထင်သေးလွန်းတယ်။ ငါက သူ့ကို အဲဒီလို အခွင့်အရေးမျိုး ပေးလိမ့်မယ်လို့ တကယ်ပဲ ထင်နေတာလား" ခေတ္တမျှ စောင့်ကြည့်ပြီးနောက် ထန်ဟောက်က အခြေအနေကို ချက်ချင်း ရိပ်မိသွားသည်။

"ဓားရိပ်... မင်း ငါ့ကို အထင်သေးလွန်းပြီး မင်းကိုယ်မင်း အထင်ကြီးလွန်းနေပြီ။ အချိန်ဆွဲပြီး တိုက်ခိုက်ဖို့ အခွင့်အရေးကို ငါက မင်းကို ပေးလိမ့်မယ်လို့ ထင်နေသလား"

"လေခွဲမုန်တိုင်း တူသိုင်း" ထိုသို့ပြောပြီးသည်နှင့် ထန်ဟောက်က သူ၏ ဟောက်ထျန်းတူကို ချက်ချင်း လွှဲယမ်းကာ အခွင့်အရေးကို အရယူလျက် လင်းဖန်ဆီသို့ ပြင်းထန်စွာ ထုနှက်လိုက်တော့သည်။

"ဒါကို ထိပ်တိုက် ရင်ဆိုင်လို့မဖြစ်ဘူး" အခြေအနေကို မြင်သောအခါ လင်းဖန်က တိုက်ကွက်ကို ချက်ချင်းပြောင်းလဲလိုက်ပြီး မြရောင်ပြာ ဓားအလင်းတန်းတစ်ခု ဖြတ်သန်းသွားသည်။ "ဒုတိယ ဝိညာဉ်စွမ်းရည် - ဓားထုတ် ခုတ်ပိုင်းခြင်း"

ဝုန်း...

ဓားနှင့် တူတို့ ပြင်းထန်စွာ ထိတွေ့မိသော အရှိန်ကြောင့် လင်းဖန်နှင့် ထန်ဟောက် နှစ်ဦးစလုံး နောက်သို့ ခြေလှမ်းအနည်းငယ် ဆုတ်သွားရပြီး ပတ်ဝန်းကျင်ရှိ မြက်ရိုင်းပင်များနှင့် သစ်ပင်များပင် လွင့်စင်ပျက်စီးကုန်သည်။ ထိုအချိန်မှာပင် လင်းဖန်က ထန်ဟောက်ထက် နောက်ထပ် ခြေတစ်လှမ်း ပို၍ ဆုတ်လိုက်ရသည်။

တိုက်ကွက်ချင်း ထိပ်တိုက်တွေ့ဆုံမှုတွင် လင်းဖန်က အနည်းငယ် အားနည်းနေခဲ့သည်။ လင်းဖန်၏ ဓားထုတ် ခုတ်ပိုင်းခြင်း ဝိညာဉ်စွမ်းရည်က ဓားထုတ်လိုက်သည့် အချိန်တွင် တိုက်ခိုက်မှုစွမ်းအားကို နှစ်ရာရာခိုင်နှုန်းအထိ တိုးမြင့်ပေးနိုင်သော်လည်း ထန်ဟောက်၏ မွေးရာပါ ခွန်အားကြမ်းကိုမူ မယှဉ်နိုင်သေးချေ။

ထန်ဟောက်ကတော့ တည်ငြိမ်သော မျက်နှာပေးဖြင့် သူ၏ တူကို ဆက်တိုက် လွှဲယမ်းနေခဲ့သည်။ လေခွဲမုန်တိုင်း တူသိုင်း၏ တိုက်ကွက်များမှာ သူ နောက်သို့ ခြေလှမ်းအနည်းငယ် ဆုတ်သွားရရုံမျှဖြင့် ရပ်တန့်သွားခြင်း မရှိပေ။

ထန်ဟောက်ကို ထိပ်တိုက်ရင်ဆိုင်၍ မရနိုင်ကြောင်း သိသဖြင့် လင်းဖန်သည် အနှစ်သောင်းချီ ဝိညာဉ်ကွင်း ဖြစ်သော သူ၏ ပဉ္စမမြောက် အနက်ရောင် ဝိညာဉ်ကွင်းကို ချက်ချင်း လင်းထိန်စေလိုက်သည်။

"ပဉ္စမ ဝိညာဉ်စွမ်းရည် - ဓားရိပ် ခွဲထွက်ခြင်း" လင်းဖန်သည် သူ၏ စစ်မှန်သော တိုက်ခိုက်မှုစွမ်းအား ရှစ်ဆယ်ရာခိုင်နှုန်းရှိပြီး သူ၏ ပထမဆုံး ဝိညာဉ်စွမ်းရည် လေးခုကို အသုံးပြုနိုင်သော ဓားရိပ်ခွဲတူ ခန္ဓာကိုယ်ငါးခုကို ချက်ချင်း ဖန်တီးလိုက်သည်။

လင်းဖန်နှင့် သူ၏ ခွဲထွက်ခန္ဓာကိုယ် ငါးခုတို့သည် အတူတကွ ပူးပေါင်းတိုက်ခိုက်နိုင်ပြီး ကိုယ်ပိုင်ဖန်တီးထားသော ဝိညာဉ်စွမ်းရည်တစ်ခုကဲ့သို့ ဖြစ်သည့် 'ဝေဝါးဓားကခုန်ခြင်း' နည်းစနစ်ကိုပင် ပေါင်းစပ်အသုံးပြုနိုင်သည်။ ဤဝိညာဉ်စွမ်းရည်၏ စွမ်းပကားမှာ အနှစ်ငါးသောင်းအဆင့်ရှိသော ဝိညာဉ်စွမ်းရည်ထက် မနည်းဟု ဆိုနိုင်သည်။

ဟုတ်ပေသည် ဤသည်မှာ လင်းဖန်အနေဖြင့် ဝိညာဉ်မုဆိုးလောကနှင့် ပတ်သက်၍ ကြိုတင်အမြော်အမြင်ရှိပြီး သူ၏ ဝိညာဉ်အမျိုးအစား ဝိသေသလက္ခဏာများအပေါ် အခြေခံကာ သေချာစွာ လေ့လာစူးစမ်းပြီးမှသာ သင့်တော်မည့် ဝိညာဉ်သားရဲများကို ရွေးချယ်သတ်ဖြတ်ကာ ဝိညာဉ်ကွင်းများကို စုပ်ယူခဲ့ခြင်းကြောင့် ဖြစ်သည်။ လင်းဖန်သည် ဝိညာဉ်သားရဲများက သူ၏ ဝိညာဉ်စွမ်းရည်အပေါ် မည်သို့ လွှမ်းမိုးမှုရှိသည်ကို သေသေချာချာ လေ့လာခဲ့ခြင်း ဖြစ်သည်။ ထိုစဉ်က လင်းဖန်သည် ဤကိစ္စရပ်အတွက် အင်မတန် အားထုတ်ခဲ့ရသည်။

"မင်းတို့လို ဝိညာဉ်ဆရာတွေက လှည့်ကွက်တွေ သိပ်များတာပဲ။ ဒီလိုမျိုး အပေါ်ယံပဲ လှပပြီး အသုံးမဝင်တဲ့ ဝိညာဉ်စွမ်းရည်တွေကို ဖန်တီးနေတာက တကယ်ပဲ အသုံးဝင်မှာမလို့လား" မိမိကိုယ်ကိုယ် လင်းဖန်နှင့် သူ၏ ဓားရိပ်ခွဲတူ ငါးခုတို့က ဝန်းရံထားပြီး ဘယ်သူက အစစ်မှန်း ခွဲခြားမရအောင် ဖြစ်နေသည်ကို ကြည့်ကာ ထန်ဟောက် အနည်းငယ် စိတ်ရှုပ်လာခဲ့သည်။

"တကယ် အသုံးဝင်လား မဝင်ဘူးလားဆိုတာ မင်းကိုယ်တိုင် စမ်းကြည့်လိုက်ရင် သိမှာပေါ့" လင်းဖန် စကားပြောပြီးသည်နှင့် သူနှင့် ခွဲထွက်ခန္ဓာကိုယ် ငါးခုတို့သည် ဒုတိယ ဝိညာဉ်စွမ်းရည် ဖြစ်သော 'ဓားထုတ် ခုတ်ပိုင်းခြင်း' ကို ချက်ချင်း အတူတကွ ထုတ်ဖော်လိုက်ကြသည်။

"ဟောက်ထျန်း ခန္ဓာကိုယ် ကာကွယ်ခြင်း"

"ဓားထုတ် ခုတ်ပိုင်းခြင်း"

အခြားနည်းလမ်း မရှိချေ ပထမ ဝိညာဉ်စွမ်းရည် ငါးခုအနက် သူ၏ ဒုတိယ ဝိညာဉ်ကွင်းမှ ရရှိသော ဓားထုတ် ခုတ်ပိုင်းခြင်းသည် ပေါက်ကွဲအား အပြင်းထန်ဆုံး တိုက်ခိုက်မှု ဖြစ်သည်။ ခွဲထွက်ခန္ဓာကိုယ်များမှာ ပထမ ဝိညာဉ်စွမ်းရည် လေးခုကိုသာ အသုံးပြုနိုင်သဖြင့် ၎င်းတို့သည်လည်း ဓားထုတ် ခုတ်ပိုင်းခြင်းကိုသာ သုံးစွဲနိုင်သည်။

ထန်ဟောက်၏ ဟောက်ထျန်း ခန္ဓာကိုယ် ကာကွယ်ခြင်းမှာ အလွန်အမင်း မာကျောလှသော်လည်း လင်းဖန်နှင့် ခွဲထွက်ခန္ဓာကိုယ် ငါးခုတို့၏ တစ်ပြိုင်နက်တည်း တိုက်ခိုက်မှုကိုမူ ကြာရှည် တောင့်မခံနိုင်တော့ချေ။ ဓားချက်တစ်ချက် အပြင်းအထန် ကျရောက်လာပြီးနောက် ဟောက်ထျန်း ခန္ဓာကိုယ် ကာကွယ်ခြင်း အလွှာမှာ ပျက်စီးသွားခဲ့ရသည်။

"သူ့ရဲ့ ခွဲထွက်ခန္ဓာကိုယ်တွေက တကယ်ပဲ တိုက်ခိုက်နိုင်တာလား။ ဒါဆို ဒါက ရိုးရိုးမျက်လှည့် မဟုတ်ဘူးပဲ။ ဒီဝိညာဉ်စွမ်းရည်က မဆိုးဘူး"

ထန်ဟောက်သည် သူ၏ ကာကွယ်ရေးအလွှာ ပျက်စီးသွားသည့် တစ်ပြိုင်နက်တည်းမှာပင် အခွင့်အရေးကို အရယူကာ သူ၏ တူကြီးဖြင့် မြေပြင်ကို ပြင်းထန်စွာ ထုနှက်လိုက်ရာ မြေပြင်တစ်ခုလုံး ပြင်းထန်စွာ တုန်ခါသွားခဲ့သည်။ လင်းဖန်မှအပ ကျန်ရှိသော ခွဲထွက်ခန္ဓာကိုယ်များ အားလုံး မြေပြင်ပေါ်သို့ လဲကျပျက်စီးသွားကြတော့သည်။

လင်းဖန်သည် ချက်ချင်းပင် ခွဲထွက်ခန္ဓာကိုယ်များကို သူ၏ အနားသို့ ပြန်လည်ခေါ်ယူကာ လခြမ်းပုံစံ နေရာယူလိုက်သည်။ မြရောင်ပြာ ဓားရိပ်ကို ကိုင်ဆောင်လျက် တစ်ပြိုင်နက်တည်း လွှဲယမ်းလိုက်ကြရာ ထွက်ပေါ်လာသော ဓားလှိုင်းစွမ်းအင်များမှာ လခြမ်းပုံစံ၏ ဗဟိုချက်တွင် လာရောက် စုဆုံကြသည်။ လင်းဖန်၏ ကိုယ်ပိုင် ဓားလှိုင်းနှင့်ပါ ပေါင်းစပ်သွားသောအခါ ငါးမီတာနီးပါးခန့် ရှည်လျားသော ဓားလှိုင်းကြီးတစ်ခု ဖြစ်ပေါ်လာခဲ့သည်။

"ဝေဝါးဓားကခုန်ခြင်း"

"လေခွဲမုန်တိုင်း တူသိုင်း - ကိုးခုမြောက် တူချက်"

ဓားလှိုင်းစွမ်းအင်မှာ သက်တံတစ်ခုကဲ့သို့ လှပဆန်းကြယ်နေပြီး တူ၏ အရှိန်အဝါမှာလည်း တောင်ကြီးတစ်လုံးကဲ့သို့ လေးလံလှပေသည်။ ၎င်းတို့ နှစ်ခု ထိပ်တိုက် တိုးမိသွားကြသောအခါ ကောင်းကင်နှင့် မြေကြီးကိုပင် တုန်ဟီးသွားစေလောက်သည့် ပြင်းထန်လှသော စွမ်းအင်လှိုင်းများ ပေါက်ကွဲထွက်ပေါ်လာခဲ့သည်။

"တကယ့်ကို ပြင်းထန်တဲ့ စွမ်းအင်လှိုင်းပဲ။ တောင်နောက်ကွယ်က တောအုပ်ထဲမှာ ဘာတွေ ဖြစ်ပျက်နေတာလဲ"

ဖလန်းဒါး ပြန်ရောက်လာခဲ့ပြီး ကျောက်ဝူကျိမှာလည်း တစ်ကိုယ်လုံး ဖူးယောင်ညိုမည်းလျက် သတိပြန်လည်လာခဲ့ပြီ ဖြစ်သည်။ ရှီလိုင်ခဲကျောင်းတော်မှ ဆရာငါးဦးစလုံး အခန်းတစ်ခန်းထဲတွင် စုဝေးကာ လင်းဖန်အကြောင်းကို ဆွေးနွေးနေကြခြင်း ဖြစ်သည်။

တောင်နောက်ဘက်မှ ထွက်ပေါ်လာသော ပြင်းထန်သည့် စွမ်းအင်လှိုင်းကို ခံစားလိုက်ရသဖြင့် ၎င်းတို့ ငါးဦးစလုံး၏ မျက်နှာများမှာ လေးနက်တည်ကြည်သွားကြသည်။

"ဒါက ဘွဲ့ခံဒိုလော့ ဓားရိပ်ကြောင့် ဖြစ်တာများလား။ သူနဲ့ ဘယ်သူက တိုက်ခိုက်နေတာလဲ" ဖလန်းဒါးက သူ၏ မျက်မှန်ကို ပင့်တင်ရင်း အံ့သြတကြီး မေးလိုက်သည်။

"ဘွဲ့ခံဒိုလော့ ဓားရိပ်နဲ့ ယှဉ်ပြိုင်ပြီး ဒီလောက်ပြင်းထန်တဲ့ စွမ်းအင်လှိုင်းကို ထုတ်ဖော်နိုင်တယ်ဆိုရင် တစ်ဖက်လူကလည်း သေချာပေါက် ဘွဲ့ခံဒိုလော့ပဲ ဖြစ်ရမယ်" ကျောက်ဝူကျိက သူ မှန်ကန်ကြောင်း သက်သေပြချင်သည့်ပုံစံဖြင့် ပြောလိုက်သည်။

"အဓိပ္ပာယ်မရှိတာ အကယ်၍ ဘွဲ့ခံဒိုလော့ မဟုတ်ရင် မင်းလို ဝိညာဉ်သူတော်စင်တစ်ယောက်ကို အရိုက်အနှက်ခံရအောင် လုပ်ဖို့ ဒီလောက်ပြင်းထန်တဲ့ ဝိညာဉ်စွမ်းအားကို ထုတ်သုံးစရာ လိုမလား" လူချီပင်းက ဖူးယောင်နေသော ကျောက်ဝူကျိကို ကြည့်ကာ ပြတ်ပြတ်သားသား ပြန်ပြောလိုက်သည်။

"လောက်လူ... မင်းက ဘာသဘောလဲ။ ငါနဲ့ လက်ရည်စမ်းချင်လို့လား။ ငါကတော့ အချိန်မရွေး အဆင်သင့်ပဲနော်" ကျောက်ဝူကျိ အရှက်ရသွားသဖြင့် သူ၏ လက်သီးဆစ်များကို အသံမြည်အောင် ချိုးလိုက်သည်။

"ဟွန့်... ပြီးတော့ လူအိုလီ... မင်းတို့ နှစ်ယောက်စလုံး တန်ခိုးရှင် ဓားရိပ်ကြီး ငါ့ဆီ လာနေတာကို ကောင်းကောင်းသိရဲ့သားနဲ့ ငါ့ကို လာပြီး သတိမပေးကြဘူး။ အလကားနေရင်း သက်သက်မဲ့ အထုခံလိုက်ရတယ်" ထို့နောက် ကျောက်ဝူကျိက လီယုဆုန်းကို ဒေါသတကြီးဖြင့် စိုက်ကြည့်လိုက်ပြန်သည်။

"ကျောက်ဝူကျီ... ဒိုင်မုပိုင် ပြောပြတာတော့ မင်းကိုယ်တိုင်က မောက်မာပြီး ဘွဲ့ခံဒိုလော့ ဓားရိပ်ကို သွားပြီး စိန်ခေါ်ခဲ့တာဆို။ သူ့ကို အရင် လက်သီးတစ်ချက် ထိုးခွင့်ပေးတယ်လို့တောင် ပြောခဲ့သေးတယ်ဆို" ဖလန်းဒါးက ကျောက်ဝူကျိကို ကြည့်ကာ ရယ်ချင်စိတ်ကို မနည်းအောင့်ထားရသည်။ ထိုအဖြစ်အပျက်ကို စဉ်းစားမိတိုင်း ဖလန်းဒါးတစ်ယောက် တကယ်ကို မအောင့်နိုင်တော့ချေ။

"တောက်... ဖလန်းဒါး... မင်းက ရယ်နေသေးတယ်ပေါ့။ လျော်ကြေးပေးစမ်း မင်း ငါ့ကို လျော်ကြေးအများကြီး ပေးရမယ် ဒါက တာဝန်ထမ်းဆောင်ရင်း ထိခိုက်ဒဏ်ရာရတာ" ကျောက်ဝူကျိ ဆက်ပြီး အောင့်မခံနိုင်တော့ဘဲ မတ်တတ်ထရပ်လိုက်သည်။

"အစကတည်းက စတုတ္ထမြောက် စစ်ဆေးမှုကို ဒိုင်မုပိုင် လုပ်ဖို့ ငါ စီစဉ်ထားတာလေ မင်းက ကြီးကြပ်တဲ့ ဆရာအဖြစ်ပဲ နေရမှာကို ဘယ်သူက မင်းကို ကိုယ်တိုင် ဝင်ပါခိုင်းလို့လဲ"

"ပိုက်ဆံတော့ မရှိဘူး။ အလုပ်ထဲမှာ ထိခိုက်ဒဏ်ရာရလို့ လျော်ကြေးလိုချင်ရင် မင်းကို ရိုက်ခဲ့တဲ့ လူဆီမှာပဲ သွားတောင်းတော့" ဖလန်းဒါးကတော့ ကျောက်ဝူကျိအပေါ် ချက်ချင်းပင် ကပ်စေးနဲကြီးအဖြစ် ပြောင်းလဲသွားတော့သည်။

"ဟင်း... မင်းနဲ့ စကားပြောရတာ အချိန်ကုန်တယ်"

တောအုပ်ထဲတွင်တော့ လင်းဖန်နှင့် ထန်ဟောက်တို့ နှစ်ဦးစလုံး အပြန်အလှန် အကဲခတ်လျက် ရပ်နေကြသည်။

ထန်ဟောက်က အေးစက်စွာ ပြောလိုက်သည်။ "မင်း ဆက်ပြီး တိုက်ချင်သေးတာလား"

လင်းဖန် တစ်စုံတစ်ခုကို ပြန်ပြောရန် ပြင်လိုက်စဉ်မှာပင် စနစ်က တာဝန်အသစ်တစ်ခုကို ထပ်မံထုတ်ပြန်လိုက်လေသည်။