အခန်း (၂၆) အင်အားများ ဘက်စုံမြင့်တက်လာခြင်း
လင်းဖန်သည် ကျင့်ကြံခြင်းအထောက်အကူပြု လင့်စင်္ကြံရှစ်ခုကို ဆင့်ခေါ်ကာ စမ်းရေအိုင်၏ ဘေးတစ်ဖက်တစ်ချက်စီတွင် ထိုးစိုက်လိုက်ပြီး ၎င်းတို့၏ တွန်းကန်အားကို အသုံးပြု၍ ကုန်းဘောင်ပေါ်သို့ ခုန်တက်လိုက်သည်။
သူသည် ရေခဲနှင့်မီး ခန္ဓာကိုယ်ကျင့်ကြံခြင်းမှ ရရှိလာသော အကျိုးကျေးဇူးများကို ပြန်လည်သုံးသပ်ရန် ကမ်းစပ်ရှိ ကျောက်တုံးကြီးတစ်တုံးပေါ်တွင် ချက်ချင်းပင် တင်ပလ္လင်ခွေ ထိုင်လိုက်သည်။
"ငါ အဆိပ်၊ ရေခဲနဲ့ မီး ဆိုတဲ့ ဓာတ်သုံးပါးလုံးကို မတိုးတဲ့ စွမ်းရည် ရသွားပြီပဲ။ အဆိပ်မတိုးတာက အရင်ကတည်းက ရှိပြီးသားဆိုပေမဲ့ ရေခဲနဲ့ မီးမတိုးတဲ့ စွမ်းရည်ရဲ့ အကျိုးအာနိသင်က တော်တော်လေး ကောင်းတယ်"
ရေခဲနှင့်မီး ခန္ဓာကိုယ်ကျင့်ကြံခြင်း၏ အဓိက လုပ်ဆောင်ချက်မှာ ခန္ဓာကိုယ်ကြံ့ခိုင်မှုကို မြှင့်တင်ပေးခြင်း ဖြစ်သည်။ လင်းဖန်သည် ယခင်က ပုံသေဖြစ်နေပြီဖြစ်သော သူ၏ အရိုးတည်ဆောက်ပုံမှာ ပြောင်းလဲသွားပြီး အရပ် ငါးစင်တီမီတာခန့် ပိုရှည်လာကြောင်း သတိပြုမိလိုက်သည်။
သူ၏ သာမန်ရုပ်ပိုင်းဆိုင်ရာ ခွန်အားမှာလည်း နှစ်ဆကျော် မြင့်တက်လာခဲ့သည်။
သူ၏ ဝိညာဉ်စွမ်းအားမှာလည်း တစ်ဆင့် တိုးလာပြီး အဆင့် ၉၃ ဘွဲ့ခံဒိုလော့အဆင့်သို့ ရောက်ရှိသွားခဲ့သည်။ သူ၏ ဝိညာဉ်စွမ်းအားမှာ မကြာသေးမီကမှ မြင့်တက်ထားခြင်း ဖြစ်ရာ ယခုအချိန်တွင် နောက်ထပ် တစ်ဆင့် ထပ်မံတိုးတက်နိုင်ခြင်းမှာ အတော်လေး ကောင်းမွန်လှသည်။
ဘာပဲဖြစ်ဖြစ် လင်းဖန်ကိုယ်တိုင်က ဘွဲ့ခံဒိုလော့တစ်ဦး ဖြစ်ပြီး ဤမျှ မြင့်မားသောအဆင့်တွင် ဝိညာဉ်စွမ်းအား တစ်ဆင့်တိုးရန်အတွက် အလွန်ကြီးမားသော ဝိညာဉ်စွမ်းအား ပမာဏ လိုအပ်သည်။ သဘာဝကျကျပင် သူသည် မသေဆေးပင်များကို စားသုံးပြီးနောက် ဝိညာဉ်စွမ်းအား ငါးဆင့်၊ ခြောက်ဆင့်ခန့် ဗုန်းကနဲ တိုးတက်သွားကြသည့် ရွှေဝံပုလွေခုနစ်ဖော်တို့ကဲ့သို့ ဖြစ်ရန် မဖြစ်နိုင်ချေ။
ရေခဲနှင့်မီး ခန္ဓာကိုယ်ကျင့်ကြံခြင်းက ဆောင်ကြဉ်းပေးသော ပြောင်းလဲမှုများကို ခံစားပြီးနောက် လင်းဖန်သည် သူ၏ လင့်စင်္ကြံရှစ်ခုထံသို့ အကြည့်ကို ပြောင်းလိုက်သည်။
မူလက ခရမ်းနက်ရောင် ရှိသော လင့်စင်္ကြံရှစ်ခုမှာ ပြာနီရောင်သို့ ပြောင်းလဲသွားပြီး တစ်ကိုယ်လုံးတွင် ပို၍ ရှည်လျားကာ ကြီးမားလာခဲ့သည်။ ထိုဝိညာဉ်အရိုး၏ သက်တမ်းမှာလည်း အနှစ်နှစ်သောင်းကျော်အထိ ပင် မြင့်တက်သွားခဲ့သည်။
"ပင့်ကူလှံဝိညာဥ်အရိုးရှစ်ခုကလည်း ငါ့ရဲ့ ခန္ဓာကိုယ်နဲ့အတူ ဆင့်ကဲပြောင်းလဲသွားတာပဲ။ ရေခဲနဲ့မီး မသေဆေးပင် နှစ်ပင်မှာ ပါတဲ့ အဆိပ်အတောက်တွေကို စုပ်ယူလိုက်တာကြောင့် သူတို့ရဲ့ အဆိပ်ပြင်းအားက မျက်နှာလူသား မြေသရဲပင့်ကူထက်တောင် သာလွန်သွားပြီ"
"ဝိညာဉ်အရိုးရဲ့ သက်တမ်းက အနှစ်နှစ်သောင်းအထိ တိုးလာသလို ပြင်ပဝိညာဉ်အရိုးကို ထုတ်လွှတ်လိုက်ရင် ရရှိမယ့် ဘက်စုံစွမ်းရည် မြှင့်တင်မှုကလည်း အရင်က အစိတ်ခိုင်နှုန်းကနေ အခု သုံးဆယ်ခိုင်နှုန်းအထိ တိုးသွားပြီ"
လင်းဖန်သည် မသေဆေးပင်များက ဆောင်ကြဉ်းပေးသော ဘက်စုံအကျိုးကျေးဇူးများအပေါ် အလွန် ကျေနပ်မိသည်။ ဘက်စုံမြင့်တက်လာမှုမှာ အပြစ်ပြောစရာ မရှိအောင် ပြည့်စုံလှသည်။
လင်းဖန်သည် ယခုအခါ အဆင့် ၉၃ ဝိညာဉ်စွမ်းအားသာ ရှိသေးသော်လည်း အဆင့် ၉၅ ဘွဲ့ခံဒိုလော့တစ်ဦးနှင့်ပင် ယှဉ်ပြိုင်နိုင်သည်ဟု သူ ခံစားနေရသည်။
တစ်ရက်နှင့် တစ်ည ကုန်လွန်သွားသော်လည်း လင်းဖန်သည် ယခုလေးတင် မြင့်တက်လာသော အင်အားများကို တည်ငြိမ်အောင် ပြုလုပ်ရင်း ကျောက်တုံးကြီးပေါ်တွင် ဆက်လက် ထိုင်နေခဲ့သည်။
"ခန္ဓာကိုယ် ပြုပြင်မွမ်းမံမှုက ပြီးဆုံးသွားပြီဆိုတော့ ငါ့ရဲ့ ဝိညာဉ်အရည်အသွေးကို မြှင့်တင်ရမယ့်အချိန်ပဲ" လင်းဖန်သည် ထူးဆန်းသော ပန်းများနှင့် မြက်ပင်များအကြောင်း သူ၏ အသိပညာကို ပြန်လည်တွေးတောလိုက်သည်။
ထို့အပြင် သူ၏ ဝိညာဉ်မှာ ဓားအမျိုးအစား လက်နက်ဝိညာဉ် ဖြစ်သောကြောင့် အားကိုးရသည့် ကောင်းကင်လှုပ်ခတ်တူနှင့် မတူဘဲ ထက်မြက်မှုနှင့် တိုက်ခိုက်မှု ပြင်းအားကို လိုအပ်သည်။
မသေဆေးပင်များအကြောင်း မိတ်ဆက်ချက်များစွာကို ဖတ်ရှုပြီးနောက် သူ၏ ကိုယ်ပိုင် ဓားဝိညာဉ်၏ ဝိသေသလက္ခဏာများနှင့် ပေါင်းစပ်ကာ လင်းဖန်၏ အကြည့်သည် မင်ကျောက်စိမ်း နတ်ဝါးပင် ဟု ခေါ်သော မသေဆေးပင်တစ်ပင်ပေါ်သို့ ကျရောက်သွားခဲ့သည်။
မင်ကျောက်စိမ်း နတ်ဝါးပင်တွင် အလွန် ထက်မြက်လှသော လှံစွပ်ပုံစံ သေးသွယ်သော အရွက်များ ရှိသည်။ ၎င်း၏ ပင်စည်မှာ နှစ်စင်တီမီတာတိုင်းတွင် အဆစ်တစ်ခုစီ ရှိပြီး အလျား နှစ်ဆယ်စင်တီမီတာကျော် ရှည်လျားကာ ဆီးနှင်းကဲ့သို့ ဖြူဆွတ်သော ပန်းများ ပွင့်လန်းလျက် ရှိသည်။
၎င်း၏ ပင်စည်မှာ မင်ရောင်ကျောက်စိမ်းတုံးတစ်ခုကဲ့သို့ ကြည်လင်တောက်ပနေပြီး အလွန်အမင်း မာကျောလှသည်။
မင်ကျောက်စိမ်း နတ်ဝါးပင်ကို စုပ်ယူခြင်းက ဝိညာဉ်ကို ပိုမိုခိုင်မာတောင့်တင်းလာစေနိုင်ပြီး ဝိညာဉ်၏ ကိုယ်ပိုင်တိုက်ခိုက်ရေးစွမ်းအားကို များစွာ မြှင့်တင်ပေးနိုင်သည်။
"ကောင်းပြီ... ဒီမင်ကျောက်စိမ်း နတ်ဝါးပင်ကိုပဲ ရွေးရမှာပဲ" မင်ကျောက်စိမ်း နတ်ဝါးပင်၏ မိတ်ဆက်ချက်ကို ဖတ်ပြီးနောက် လင်းဖန်သည် သူ၏ ဝိညာဉ်အရည်အသွေးကို မြှင့်တင်ရန်အတွက် ၎င်းကို အသုံးပြုရန် ချက်ချင်း ဆုံးဖြတ်လိုက်သည်။
လင်းဖန်သည် ကျောက်တုံးကြီးပေါ်မှ ခုန်ဆင်းကာ စမ်းရေအိုင်ဘေးပတ်ပတ်လည်တွင် မင်ကျောက်စိမ်း နတ်ဝါးပင်ကို လိုက်လံရှာဖွေခဲ့သည်။
မကြာမီမှာပင် လင်းဖန်သည် ကျောက်ဆောင်အက်ကွဲကြောင်းများကြားတွင် အမြင့် နှစ်ဆယ်စင်တီမီတာနီးပါး ရှိသော မင်ကျောက်စိမ်း နတ်ဝါးပင်တစ်ပင်ကို တွေ့ရှိပြီး ၎င်းကို အမြစ်မှ ဆွဲနှုတ်လိုက်သည်။
မင်ကျောက်စိမ်း နတ်ဝါးပင်၏ အရေးကြီးဆုံးအပိုင်းမှာ သံသယဖြစ်ဖွယ်မရှိဘဲ ၎င်း၏ အမြစ်များ ဖြစ်ပြီး၊ ထို့နောက်တွင်မှ ပြင်ပသို့ ပေါ်နေသော ပင်စည်နှင့် အရွက်များ ဖြစ်ကြသည်။
ဤနတ်ဝါးပင်ကို စားသုံးရန်မလိုဘဲ ဝိညာဉ်စွမ်းအားဖြင့် အရည်ကျိုကာ ဝိညာဉ်က စုပ်ယူရခြင်း ဖြစ်ပြီး၊ ထိုသို့ပြုလုပ်မှသာ နတ်ဝါးပင်၏ ဝိသေသလက္ခဏာများက အာနိသင်ပြမည် ဖြစ်သည်။
လင်းဖန်သည် မင်ကျောက်စိမ်း နတ်ဝါးပင်ကို ယူဆောင်ကာ ကမ်းစပ်ရှိ ကျောက်တုံးကြီးပေါ်သို့ ပြန်လာပြီး တင်ပလ္လင်ခွေ ထိုင်လိုက်ကာ အပြာရောင်အရိပ်ဓားကို ဆင့်ခေါ်လိုက်သည်။
လက်တစ်ဖက်တွင် မင်ကျောက်စိမ်း နတ်ဝါးပင်ကို ကိုင်ထားပြီး အခြားလက်တစ်ဖက်တွင် အပြာရောင်အရိပ်ဓား ဝိညာဉ်ကို ကိုင်ကာ ၎င်းကို အရည်ကျို၍ စုပ်ယူခြင်း လုပ်ငန်းစဉ်ကို စတင်လိုက်တော့သည်။
တီ
အပြာရောင်အရိပ်ဓားသည် ကြည်လင်သော တုန်ခါသံတစ်ခုကို ထုတ်လွှတ်လိုက်ပြီး ဓားသွားပေါ်ရှိ အစိမ်းရောင်အလင်းတန်းများ ပွင့်လန်းလာခဲ့သည်။ လင်းဖန်သည် ၎င်းထံမှ ဝမ်းမြောက်လှိုက်လှဲသော ခံစားချက်တစ်ခုကို အံ့ဩဖွယ်ရာ အာရုံခံမိလိုက်သည်။
သုံးနာရီခန့် ကြာပြီးနောက် သူ၏ လက်ထဲရှိ မင်ကျောက်စိမ်း နတ်ဝါးပင်မှာ အစိမ်းရင့်ရောင် အဖတ်များအဖြစ် ပြောင်းလဲသွားပြီး ၎င်းတွင် ပါဝင်သော ဆေးစွမ်းအားအားလုံးကို အပြာရောင်အရိပ်ဓားက စုပ်ယူသွားခဲ့လေပြီ။
[အိမ်ရှင်သည် မသေဆေးပင်၏ ဆေးစွမ်းအားကို စုပ်ယူစဉ် သေဘေးမှ သီသီလေး လွတ်မြောက်ခဲ့ပြီး အပြာရောင်အရိပ်ဓား ဝိညာဉ်ကို ထိပ်တန်းအရည်အသွေးသို့ ဆင့်ကဲပြောင်းလဲစေခဲ့သည့်အတွက် ဂုဏ်ယူပါသည်၊ တာဝန် ပြီးမြောက်ပါပြီ]
[တာဝန်၏ ဆုလာဘ် - အပြာရောင်အရိပ်ဓား၏ မူလ ဒုတိယမြောက် ဝိညာဉ်ကွင်းကို အနှစ်ထောင်ချီ ဝိညာဉ်ကွင်းအဖြစ် အဆင့်မြှင့်တင်ပေးခြင်းနှင့် ဝိညာဉ်ပညာရှင်အဆင့်တွင် ဝိညာဉ်စွမ်းအား တစ်ဆင့် မြင့်တက်ခြင်း]
"တာဝန်အသစ်က ဘယ်တုန်းက ထုတ်ပြန်လိုက်တာလဲ။ ငါ ဘာလို့ မသိရတာလဲ" စနစ်၏ အသံကို ကြားလိုက်ရသောအခါ လင်းဖန် ဆွံ့အသွားခဲ့ရသည်။ သူသည် မိမိဘာမှ မသိလိုက်ဘဲ တာဝန်တစ်ခုကို ပြီးမြောက်အောင်မြင်သွားခြင်း ဖြစ်သည်။
ချက်ချင်းပင် လင်းဖန်သည် အချက်အလက်စာမျက်နှာကို စစ်ဆေးကြည့်လိုက်ရာ စနစ်၏ တာဝန်အသစ်မှာ သူ ရေခဲနှင့်မီး ရေအိုင် စမ်းရေထဲတွင် မိမိကိုယ်ကိုယ် မေ့လျော့ကာ ခန္ဓာကိုယ်ကို ကျင့်ကြံနေစဉ်အတွင်း ထုတ်ပြန်ခဲ့ခြင်း ဖြစ်ကြောင်း သိလိုက်ရသည်။
ထို့အပြင် လင်းဖန် ကုန်းပေါ်သို့ ရောက်ရောက်ချင်းမှာပင် ရေခဲနှင့်မီး ခန္ဓာကိုယ်ကျင့်ကြံခြင်း၏ အကျိုးသက်ရောက်မှုများကို စစ်ဆေးရန် စိတ်အားထက်သန်နေခဲ့သဖြင့် စနစ်၏ တာဝန်အသစ်ကို ချက်ချင်း သတိမပြုမိခဲ့ခြင်း ဖြစ်သည်။
စနစ်၏ တာဝန်အကြောင်းအရာမှာ လင်းဖန်အား မသေဆေးပင်တစ်ပင်ကို စားသုံးစေပြီး သူ၏ ပထမဆုံး ဝိညာဉ်ဖြစ်သော အပြာရောင်အရိပ်ဓားကို တစ်ကြိမ် ဆင့်ကဲပြောင်းလဲစေရန် ဖြစ်သည်။
"စနစ်... ဆုလာဘ်တွေက သိပ်ပြီး အထင်ကြီးစရာ မကောင်းသေးပေမဲ့ ဒုတိယမြောက် ဝိညာဉ်ကွင်းကို အနှစ်ထောင်ချီအဆင့်အထိ အဆင့်မြှင့်တင်ပေးတာက အနည်းဆုံးတော့ အသုံးဝင်တာပေါ့"
သူ၏ ဒုတိယမြောက် ဝိညာဉ်စွမ်းရည် ဖြစ်သော 'ဓားဆွဲထုတ် ပိုင်းချက်' သည် အနှစ်ထောင်ချီအဆင့်သို့ ရောက်ရှိသွားပြီးနောက် ၎င်း၏ ရုတ်တရက် ပေါက်ကွဲထွက်လာသော တိုက်ခိုက်ရေးစွမ်းအားမှာ သုံးရာခိုင်နှုန်းအထိ ရောက်ရှိသွားကြောင်း လင်းဖန် သတိပြုမိလိုက်သည်။
အပြာရောင်အရိပ်ဓားက ထိပ်တန်းဝိညာဉ်အဖြစ် ဆင့်ကဲပြောင်းလဲသွားခြင်းနှင့် ပေါင်းစပ်လိုက်သောအခါ သူ၏ ဝိညာဉ်စွမ်းရည်အားလုံး၏ အကျိုးအာနိသင်များမှာ နှစ်ဆ မြင့်တက်သွားခဲ့သည်။
"ငါ့ရဲ့ ခန္ဓာကိုယ်၊ ဝိညာဉ်စွမ်းအားနဲ့ ဝိညာဉ်တွေ အားလုံး မြင့်တက်သွားပြီပဲ၊ ငါ့ရဲ့ စိတ်ဝိဉာဉ်စွမ်းအားက နောက်ကျကျန်နေလို့ ဘယ်ဖြစ်မလဲ"
လင်းဖန်သည် စိတ်ဝိဉာဉ်စွမ်းအားကို မြှင့်တင်ပေးနိုင်သော 'ဆောင်းဦးရေပြင်ကို ဖြတ်ကျော်ကြည့်ရှုခြင်း ဆီးနှင်းရေစက်' ဟု လူသိများသည့် မသေဆေးပင်ကို ချက်ချင်း ရှာဖွေလိုက်သည်။
မသိလိုက်ဘဲနှင့် လင်းဖန် ရေခဲနှင့်မီး ရေအိုင်တွင် နေထိုင်ခဲ့သည်မှာ လဝက်ခန့် ကုန်လွန်သွားခဲ့ပြီ ဖြစ်သည်။
ဆယ်ရက်ခန့် တည်ငြိမ်အောင် ပြုလုပ်ပြီးနောက် လင်းဖန်၏ အင်အားမှာ ယခုတစ်ကြိမ်တွင် တကယ့်ကို ဘက်စုံ မြင့်တက်လာခဲ့ခြင်း ဖြစ်သည်။
ခန္ဓာကိုယ်၊ ဝိညာဉ်စွမ်းအား၊ ဝိညာဉ်နှင့် စိတ်ဝိဉာဉ်စွမ်းအား ရှုထောင့်များမှ ကြည့်လျှင် သူသည် ရေခဲနှင့်မီး ရေအိုင်သို့ မဝင်ရောက်မီက အခြေအနေနှင့် လုံးဝ နှိုင်းယှဉ်၍ မရနိုင်တော့ချေ။
"ငါ့ရဲ့ အင်အားကို မြှင့်တင်ပေးနိုင်တဲ့ မသေဆေးပင်တွေအားလုံးကို ငါ စားသုံးပြီးပြီပဲ။ ဒီလဝက်အတွင်း ဆေးစွမ်းတွေကို အစာခြေပြီး ကိုယ့်ကိုယ်ကိုယ် တည်ငြိမ်အောင် လုပ်ပြီးတဲ့နောက်မှာ ငါ အဆင့် ၉၄ ဝိညာဉ်စွမ်းအားကို ရောက်လိမ့်မယ်လို့ မထင်ထားဘူး"
"ဒါပေမဲ့ ဒီမသေဆေးပင်တွေကို ငါ ဘယ်လို ယူသွားရမလဲ"
လင်းဖန်သည် မြေပြင်တစ်ခုလုံးတွင် ဖုံးလွှမ်းနေသော မသေဆေးပင်များကို ကြည့်ရင်း ရုတ်တရက် စိတ်ရှုပ်သွားခဲ့သည်။
"စနစ်... မင်းရဲ့ အာကာသဟင်းလင်းပြင်ထဲမှာ ဒါတွေကို သိမ်းထားလို့ ရမလား" လင်းဖန်က စနစ်ကို မေးလိုက်သည်။
လင်းဖန် မျက်တောင်ခတ်ရင်း အကြာကြီး စောင့်ဆိုင်းနေခဲ့သော်လည်း မည်သည့် အသံမျှ ထွက်မလာခဲ့ချေ။
"ကောင်းပြီ... အဲဒီနည်းလမ်းက အဆင်မပြေဘူးပေါ့" လင်းဖန်က သက်ပြင်းချရင်း ပြောလိုက်သည်။
တန်ပြန်တိုက်ခိုက်ရေးစနစ်က တာဝန်များ ထုတ်ပြန်ခြင်းကလွဲ၍ အခြားအရာများကို ဂရုမစိုက်ချေ။
"ဟေး... ငါ ဒူကုပိုင်ကို ဘယ်လိုလုပ် မေ့သွားရတာလဲ။ သူ့လက်ထဲမှာ သက်ရှိအရာတွေကို သိမ်းဆည်းနိုင်တဲ့ ရတနာအိတ်တစ်လုံး ရှိနေသင့်တယ်"
"ဒါပေမဲ့ အချိန်က စောပါသေးတယ်၊ နောက်ထပ် တစ်နှစ်လောက် လိုသေးတာပဲ။ မသေဆေးပင်တွေအတွက်တော့ ဒီနေရာမှာ တစ်နှစ်လောက် ကြီးထွားတာက ပြင်ပထက် အဆတစ်ထောင် ဒါမှမဟုတ် တစ်သောင်းလောက် ပိုမြန်တယ်"
"ဒါတွေကို လောလောဆယ် ဒီမှာပဲ ထားခဲ့လိုက်ဦးမယ်။ ရွှေဝံပုလွေကျောင်းတော် ကောင်းကင်ဒေါဝ်မြို့တော်ကို ရောက်လာတဲ့အခါကျမှ ဒီမသေဆေးပင်တွေကို သိမ်းဖို့ ငါ ပြန်လာခဲ့မယ်"
လင်းဖန်သည် မသေဆေးပင်များကို သိမ်းဆည်းရန် နည်းလမ်းတစ်ခုကို တွေးမိသော်လည်း သေသေချာချာ စဉ်းစားပြီးနောက် လောလောဆယ် မခူးဆွတ်ရန် ဆုံးဖြတ်လိုက်သည်။
ဒူကုပိုင် ဤနေရာသို့ ပြန်လာလျှင်ပင် မသေဆေးပင်များကို မှတ်မိလိမ့်မည် မဟုတ်ချေ။ အလွန်ဆုံးရှိလျှင် သူ၏ အဆိပ်အတောက်များ ဖောက်ပြန်လာသောအခါ ၎င်းတို့ကို နှိမ်နင်းရန် ဤနေရာသို့ လာရောက်ခြင်းသာ ဖြစ်လိမ့်မည်။
"အခုတော့ စနစ်ရဲ့ တာဝန်အသစ်ကို ပြီးမြောက်အောင် လုပ်ရမယ့်အချိန်ပဲ" လင်းဖန်က အချက်အလက်စာမျက်နှာကို ကြည့်လိုက်သည်။
စနစ်က လွန်ခဲ့သော ရက်အနည်းငယ်က တာဝန်အသစ်တစ်ခု ထုတ်ပြန်ခဲ့သော်လည်း လင်းဖန်သည် သူ၏ ကျင့်စဉ်ကို တည်ငြိမ်အောင် ပြုလုပ်ရန် အလုပ်ရှုပ်နေခဲ့သဖြင့် ၎င်းကို လျစ်လျူရှုထားခဲ့ခြင်း ဖြစ်သည်။
[တာဝန်အသစ် ထုတ်ပြန်ချက် - အိမ်ရှင်သည် မသေဆေးပင်များကို စားသုံးခဲ့ပြီး မကြာသေးမီက အင်အားများ အရှိန်အဟုန်ဖြင့် မြင့်တက်လာခြင်းနှင့်အတူ သူ၏ စိတ်နှလုံးသဘောထားက လိုက်မမှီနိုင် ဖြစ်နေသည်။ ထို့အပြင် သတ်ဖြတ်ခြင်းဓား ဝိညာဉ်ကို ပိုင်ဆိုင်ထားခြင်းက သူ့ကို စုန်းချက်ကျကျ လမ်းလွဲခြင်းသို့ ပိုမိုလွယ်ကူစေသည်။ ကျေးဇူးပြု၍ သင်၏ စိတ်နှလုံးသဘောထားကို မြှင့်တင်ရန်အတွက် ကောင်းကင်ဒေါဝ်မြို့တော်ရှိ လမင်းဆောင်သို့ သွားရောက်ကာ ယဉ်ကျေးမှုနှင့် ဂီတအတတ်ပညာများကို သင်ယူပါ]
[ဤတာဝန်သည် အိမ်ရှင်၏ နောက်ဆက်တွဲ နတ်ဘုရားဖြစ်လာမည့် လမ်းကြောင်းအပေါ် သက်ရောက်မှုရှိသဖြင့် စွန့်လွှတ်၍ မရပါ]
[ဆုလာဘ် - စတုတ္ထမြောက် ဝိညာဉ်ကွင်း၏ သက်တမ်းကို အနှစ်ငါးထောင် တိုးမြှင့်ပေးခြင်း၊ ဦးခေါင်းအတွက် အနှစ်သောင်းချီ ပညာဉာဏ် ဝိညာဉ်အရိုးတစ်ခုနှင့် လျှို့ဝှက်နယ်မြေ မြေပုံအပိုင်းအစတစ်ခု]
"ထန်ယွဲ့ဟွာ" လင်းဖန်က စိတ်ပျက်လက်ပျက် ပြုံးလိုက်သည်။
ရိုးရိုးသားသားပြောရလျှင် လင်းဖန်သည် ဤတာဝန်ကို တကယ်ပဲ စွန့်လွှတ်ချင်သော်လည်း စနစ်က စွန့်လွှတ်၍ မရကြောင်း ကြိုတင်သတ်မှတ်ထားပြီး ဖြစ်သလို၊ လင်းဖန်သည် လျှို့ဝှက်နယ်မြေ မြေပုံအပိုင်းအစကိုလည်း အတော်လေး စိတ်ဝင်စားနေသည်။
ထို့အပြင် စနစ်က ဤတာဝန်သည် သူ၏ နောက်ဆက်တွဲ နတ်ဘုရားဖြစ်လာမည့် လမ်းကြောင်းအပေါ် သက်ရောက်မှုရှိသည်ဟုလည်း ပြောထားသေးသည်။
ဤအချက်များအားလုံး ပေါင်းစပ်လိုက်သောအခါ လင်းဖန်အနေဖြင့် တာဝန်ကို ပြီးမြောက်အောင် လုပ်ဆောင်ရန်မှတစ်ပါး အခြားရွေးချယ်စရာ မရှိတော့ချေ။
မကြာမီမှာပင် လင်းဖန်သည် မသေဆေးပင်တစ်ပင်ကို ခူးဆွတ်ကာ ရေခဲနှင့်မီး ရေအိုင်မှ ထွက်ခွာသွားခဲ့တော့သည်။