အခန်း (၂၄၉) တုကူးပေါ် ပြန်လာခြင်း

လင်းချီသည် အခွင့်အရေးကို အမိအရ အရယူရန် ကြိုးပမ်းနေသည့် အသူရာနတ်ဘုရားကို လျစ်လျူရှုလိုက်ပြီး ဒုစရိုက်နတ်ဘုရားနှင့် ကရုဏာနတ်ဘုရားတို့ထံသို့သာ လှမ်းကြည့်လိုက်သည်။
"မင်းတို့နှစ်ယောက်က နတ်ဘုရားလောက ကော်မတီရဲ့ အမြင့်ဆုံး ဆုံးဖြတ်ချက်ချမှတ်သူတွေ မဟုတ်ဘူးလား တခြားလူတွေ ပြဇာတ်ကပြနေတာကို ထိုင်ကြည့်မနေဘဲ မင်းတို့ရဲ့ သဘောထားကို ထုတ်ပြကြစမ်းပါဦး ဟုတ်လား မဟုတ်ဘူးလား"
ဒုစရိုက်နတ်ဘုရားနှင့် ကရုဏာနတ်ဘုရားတို့၏ မျက်လုံးထဲတွင်မူ လင်းချီသည် မိမိဘာသာကိုယ်တိုင် နတ်ဘုရားရာထူးကို ဖန်တီးနိုင်ခဲ့သည့် အလားအလာရှိသော နတ်ဘုရားသစ်တစ်ပါး လုံးဝ မဟုတ်တော့ချေ။
သူသည် လုံးဝဥဿုံ ပြဿနာရှာဖွေသူ ကောင်တစ်ကောင်သာ ဖြစ်သည်။
အကယ်၍ ၎င်းတို့အနေဖြင့် လင်းချင်နှင့် လင်းချီတို့၏ ပုန်ကန်လိုသော စရိုက်လက္ခဏာများကို မနှိမ်နင်းဘူးဆိုလျှင် နတ်ဘုရားလောကသည် နောင်တွင် တည်ငြိမ်အေးချမ်းမှုကို ထိန်းသိမ်းနိုင်ပါဦးမည်လော
လင်းချီနှင့် နှိုင်းယှဉ်လျှင် လင်းချီကြောင့် အကြီးအကျယ် ပျက်စီးဆုံးရှုံးခဲ့ရသည့် နတ်ဘုရားသစ်ဖြစ်သော ထန်ဆန်းကပင် ၎င်းတို့၏ စိတ်ကြိုက်နှင့် ပိုမို ကိုက်ညီနေသေးသည်။
သူသည် မာနထောင်လွှားခြင်းလည်းမရှိ စိတ်မရှည်ခြင်းလည်းမရှိဘဲ ဇွဲလုံ့လရှိသည့်အပြင် စည်းမျဉ်းများကို မည်သို့ အသုံးချရမည်ကိုလည်း သိရှိကာ အလွန်အမင်း ခေါင်းမာပြီး ရှေးရိုးစွဲဆန်သူလည်း မဟုတ်ချေ။
ဤကဲ့သို့သော နတ်ဘုရားမျိုးသည်သာ နတ်ဘုရားလောကအတွက် အမှန်တကယ် လိုအပ်သော နတ်ဘုရားမျိုး ဖြစ်သည်။
"မင်း နတ်ဘုရားလောကထဲကို ရောက်လာတာနဲ့အမျှ အရာအားလုံးကို နတ်ဘုရားလောကရဲ့ စည်းမျဉ်းတွေအတိုင်းပဲ လုပ်ဆောင်ရမယ်။"
"ထန်ဆန်းက အခုဆိုရင် အသစ်စက်စက် ပင်လယ်နတ်ဘုရားနဲ့ အသူရာနတ်ဘုရား ဖြစ်နေပြီ ဒါ့အပြင် နတ်ဘုရားလောက ကော်မတီရဲ့ ဥပဒေစိုးမိုးရေးနတ်ဘုရားလည်း ဖြစ်လာလိမ့်မယ်။ မင်းတို့ရဲ့ လူသားလောကက ရန်ငြိုးတွေကိုတော့ အပြတ်ရှင်းလိုက်လို့ ရပြီ။"
ဒုစရိုက်နတ်ဘုရားနှင့် ကရုဏာနတ်ဘုရားတို့သည် ကိစ္စရပ်များကို ဖုံးဖိညှိနှိုင်းပေးရန် ထပ်မံ၍ ကြိုးပမ်းမနေတော့ချေ။
လင်းချီက ၎င်းတို့ကို ဤမေးခွန်းကို မေးမြန်းလိုက်သည့်အခါ ၎င်းတို့သည် မိမိတို့၏ သဘောထား ရပ်တည်ချက်ကို ပြတ်သားစွာ ထုတ်ဖော်ပြောဆိုလိုက်ခြင်း ဖြစ်သည်။
ပြောရလျှင် နတ်ဘုရားလောက၌ မျိုးရိုးလိုက် ဆက်ခံခြင်း အလေ့အထတစ်ခု ရှိပေသည်။
နတ်ဘုရားတစ်ပါးသည် နတ်ဘုရားလောကသို့ အသစ်စက်စက် ရောက်ရှိလာသူ ဖြစ်လင့်ကစား သူ ဆက်ခံရရှိသော နတ်ဘုရားရာထူး၏ အမွေအနှစ်မှာ မြင့်မားလှပါက သူသည် အခြားသော နတ်ဘုရားများစွာကို တစ်လှမ်းတည်းဖြင့် ကျော်လွန်ကာ အခြားနတ်ဘုရားများ၏ အထက်တွင် ရပ်တည်နိုင်မည်ဟု အဓိပ္ပာယ်ရပေသည်။
ထန်ဆန်းသည် ထိုသို့သော နမူနာပုံစံတစ်ခု ဖြစ်သည်။
သူသည် အသူရာနတ်ဘုရားထံမှ နတ်ဘုရားရာထူးကို ဆက်ခံရရှိခဲ့ပြီး နတ်ဘုရားလောက၏ အသစ်စက်စက် ဥပဒေစိုးမိုးရေးနတ်ဘုရားအဖြစ် သတ်မှတ်ခြင်း ခံခဲ့ရကာ နတ်ဘုရားလောက ကော်မတီ၏ အဖွဲ့ဝင်တစ်ဦးနှင့် အာဏာပိုင် အနည်းငယ်ထဲမှ တစ်ဦး ဖြစ်လာခဲ့သည်။
ဒုစရိုက်နတ်ဘုရားနှင့် ကရုဏာနတ်ဘုရားတို့ ထွက်ခွာသွားကြပြီးနောက်တွင်မူ ကိစ္စရပ်များက ပိုမို၍ပင် ရှုပ်ထွေးသွားခဲ့ရတော့သည်။
၎င်းနေရာတွင် အဆင့်မြင့်မားလှသော ဝါရင့်နတ်ဘုရားဘုရင် နှစ်ပါးဖြစ်သည့် ဖျက်ဆီးခြင်းနတ်ဘုရားနှင့် သက်ရှိနတ်ဘုရားမတို့ သိသိသာသာ ရှိနေခဲ့ကြသည်။
သို့သော်လည်း ၎င်းတို့သည် နတ်ဘုရားလောက၏ အနှစ်သာရဗဟိုချက်ကို ထိန်းချုပ်ခွင့်အား ထန်ဆန်းထံသို့ တမင်သက်သက် လွှဲပြောင်းပေးအပ်ခဲ့ကြပြီး ထန်ဆန်းအား နတ်ဘုရားလောက၏ အမည်ခံ အကြီးအကဲအဖြစ် သတ်မှတ်ပေးခဲ့ကြသည်။
ထန်ဆန်း နတ်ဘုရားဖြစ်လာခဲ့သည်မှာ ဘယ်လောက်တောင် ကြာမြင့်ခဲ့ပြီမလို့လဲ
ထိုနှစ်ယောက်သည် မျက်စိကန်းနေကြခြင်း သို့မဟုတ် ဦးနှောက်မရှိကြခြင်း ဖြစ်ပေလိမ့်မည်။
"အလွန်ကောင်းတယ် ငါ့အမြင်တော့ ငါတို့ ပုဆိန်နဲ့ပဲ ဒီငှက်နတ်ဘုရားဘုရင်တွေရဲ့ ခေါင်းတွေကို ပိုင်းဖြတ်ပစ်ပြီး အဲ့ဒီ အဓိပ္ပာယ်မရှိတဲ့ ကော်မတီတွေကိုပါ ရိုက်ခွဲပစ်သင့်တာ။ တခြားလူတွေက နတ်ဘုရားလောကရဲ့ ရာထူးကို ရယူထားနိုင်ရင် ငါ့ရဲ့ အရှင်မင်းကြီးကကော ဘာလို့ မရနိုင်ရမှာလဲ"
လင်းချင်သည် ခြေထောက်ကို ပြင်းထန်စွာ စောင့်လိုက်ပြီး ဒုစရိုက်နတ်ဘုရားနှင့် အခြားသူများကို ဘေးတိုက် စူးစိုက်ကြည့်လိုက်သည်။
"အင်း... မင်းက ဒီလိုမျိုး ပုန်ကန်လိုတဲ့ စကားတွေကိုတောင် ပြောဝံ့နေတာပဲ။ ငါက နတ်ဘုရားရာထူးနဲ့ ယခင် ဥပဒေစိုးမိုးရေးနတ်ဘုရားရဲ့ တာဝန်တွေကို လွှဲပြောင်းပေးအပ်ခဲ့ပြီးပြီ ဆိုပေမဲ့ မင်းရဲ့ ရိုင်းစိုင်းမှုကိုတော့ သည်းခံနေမှာ မဟုတ်ဘူး။"
အသူရာနတ်ဘုရားသည် လက်ကို ဝှေ့ယမ်းလိုက်ရာ အသူရာနတ်ဆိုးဓားသည် ထန်ဆန်း၏ ခန္ဓာကိုယ်အတွင်းမှ လွင့်ပျံထွက်လာခဲ့ပြီး သူ၏ လက်အတွင်းသို့ ပြန်လည်ရောက်ရှိသွားခဲ့သည်။
အသူရာနတ်ဘုရားသည် အခြားသော နတ်ဘုရားဘုရင်များ ရှိနေသောကြောင့်သာ ဤမျှအထိ သည်းခံနေခဲ့ခြင်း ဖြစ်သည်။
မဟုတ်ပါက သူသည် လင်းချီနှင့် လင်းချင်တို့ကို လွန်ခဲ့သော အချိန်ကတည်းကပင် ဖယ်ရှားပစ်လိုခဲ့ပြီး ဖြစ်သည်။
ယခုအခါ လင်းချီနှင့် လင်းချင်တို့သည် နတ်ဘုရားလောက ကော်မတီတစ်ခုလုံးကို စော်ကားမိသွားကြပြီ ဖြစ်ရာ ၎င်းတို့ကို အကြွင်းမဲ့ ခြေမှုန်းသုတ်သင်ပစ်ရန်အတွက် အလွန်ပင် လွယ်ကူသော ဆင်ခြေတစ်ခု ရရှိသွားခဲ့ပြီ ဖြစ်သည်။
မဟုတ်လျှင် ထန်ဆန်းကို ကာကွယ်ပေးထားနိုင်ခဲ့လျှင်ပင် နတ်ဘုရားလောကအတွင်းရှိ လင်းချီနှင့် လင်းချင်တို့သည် ထန်ဆန်းကို ထပ်မံ၍ ဆန့်ကျင်တိုက်ခိုက်ရန် ကြိုးပမ်းလာကြမည်ကို သူ စိုးရိမ်နေရလိမ့်မည်။
"အရှင်မင်းကြီး။"
လင်းချင်သည် လင်းချီ၏ ရှေ့တွင် ကာကွယ်ပေးသည့် အနေအထားဖြင့် ရပ်တန့်လိုက်ပြီး သူမ၏ ကျားကဲ့သို့သော မျက်လုံးများအတွင်း၌ ရက်စက်ကြမ်းကြုတ်မှုများ လင်းလက်နေခဲ့သည်။
သူမသည် စကားပြောခြင်း (ဆဲရေးခြင်း) ၌ အလွန်ပင် ကျွမ်းကျင်လှသော်လည်း အကယ်၍ တိုက်ခိုက်ခွင့် ရရှိမည်ဆိုပါက စကားများကို ဆက်တိုက် ပြောဆိုနေလိုတော့မည် မဟုတ်ချေ။
"ထားလိုက်ပါတော့ ငါကလည်း ဒီနတ်ဘုရားဘုရင်တွေရဲ့ စရိုက်အမှန်ကို အတိုင်းသား မြင်တွေ့လိုက်ရပြီဆိုတော့ ဘာမှ ထပ်ပြောနေဖို့ မလိုတော့ပါဘူး။"
ယခုအခါ အားလုံးက မိမိတို့၏ ရပ်တည်ချက်များကို ရွေးချယ်ပြီးကြပြီ ဖြစ်ရာ ကျန်ရှိသည်မှာ အတွင်းပိုင်း တိုက်ပွဲဆင်နွှဲရန်သာ ရှိတော့သည်။
ဆန်းကြယ်၍ နက်ရှိုင်းလှသော အရှိန်အဝါ သုံးခုသည် လင်းချီ၏ ခန္ဓာကိုယ်အတွင်းမှ ထွက်ပေါ်လာခဲ့သည်။
သူသည် ယခင်က ဓားနတ်ဘုရား၏ နတ်ဘုရားရာထူးကို စုစည်းခဲ့ပြီး အခြားသော ဓာတ်ကြီးများကို ထိန်းချုပ်ရန်အတွက် ထိုနတ်ဘုရားရာထူးကို အသုံးချခဲ့သည်။
ယခုအခါတွင်မူ သူ၏ ကံကြမ္မာခန္ဓာကိုယ် နတ်ဘုရားရာထူးသည်လည်း အောင်မြင်စွာ ဖြစ်ပေါ်လာခဲ့ပြီ ဖြစ်သည်။
ကံကောင်းခြင်းနတ်ဘုရားရာထူး ကံဆိုးခြင်းနတ်ဘုရားရာထူးနှင့် ရတနာကံနတ်ဘုရားရာထူး ဟူသော နတ်ဘုရားရာထူး သုံးခုစလုံးသည် တစ်ပြိုင်နက်တည်း စုဆုံသွားခဲ့ကြသည်။
"ဘာလဲ"
အရှိန်အဝါ သုံးခုနှင့်အတူ နတ်ဘုရားရာထူးအသစ်များ ထွက်ပေါ်လာခြင်းသည် အခြားသော နတ်ဘုရားများကိုသာမကဘဲ ဒုစရိုက်နတ်ဘုရားနှင့် ကရုဏာနတ်ဘုရားတို့ကိုပါ အကြီးအကျယ် တုန်လှုပ်ခြောက်ချားသွားစေခဲ့သည်။
လူသားတစ်ယောက်တည်းက နတ်ဘုရားရာထူး လေးခုကို တစ်ပြိုင်နက်တည်း ပိုင်ဆိုင်ထားနိုင်ရုံတင်မကဘဲ ၎င်းတို့အားလုံးမှာ မိမိဘာသာ အလိုအလျောက် ဖြစ်ပေါ်လာခဲ့ခြင်း ဖြစ်သည်။
နတ်ဘုရားလောက တည်ရှိလာခဲ့သည့် သက်တမ်းတစ်လျှောက်တွင် ၎င်းတို့သည် ဤကဲ့သို့သော အရာမျိုးကို တစ်ကြိမ်တစ်ခါမျှ မမြင်ဖူးခဲ့ကြချေ။
တကယ့်ကို နှမြောစရာကောင်းလှပေစွ။
ဒုစရိုက်နတ်ဘုရားနှင့် ကရုဏာနတ်ဘုရား နှစ်ဦးစလုံးသည် ဤအတွေးကို တူညီစွာ တွေးတောမိကြသည်။
အကယ်၍ လင်းချီသာ ပိုမို၍ နူးညံ့သိမ်မွေ့ကာ လိမ္မာပါးနပ်ပြီး အခြားသူများနှင့် မည်သို့ လိုက်လျောညီထွေဖြစ်အောင် နေထိုင်ရမည်ကို သိရှိကာ အခြားသူများအပေါ် ပိုမို ကြင်နာတတ်ခဲ့ပါက အခြေအနေများက ဤအဆင့်အထိ ရောက်ရှိလာလိမ့်မည် မဟုတ်ချေ။
၎င်းတို့ နတ်ဘုရားရာထူးကို လွှဲပြောင်းပေးအပ်ပြီးနောက်တွင်မူ လင်းချီသည် နတ်ဘုရားလောကအတွက် မရှိမဖြစ်လိုအပ်သော နတ်ဘုရားတစ်ပါး ဖြစ်လာနိုင်ပေသည်။
အသူရာနတ်ဘုရား၏ မျက်လုံးများအတွင်းရှိ သတ်ဖြတ်လိုသော အာသီသကိုမူ မည်သို့မျှ ဖုံးကွယ်ထားနိုင်ခြင်း မရှိတော့ချေ။
လင်းချီက ပါရမီထူးချွန်လေလေ သူက ပိုမို၍ ခြိမ်းခြောက်မှုကို ခံစားရလေလေ ဖြစ်သည်။
၎င်းမှာ ထန်ဆန်းအတွက် ခြိမ်းခြောက်မှုတစ်ခု ဖြစ်ရုံတင်မကဘဲ သူ့အတွက်ပါ ကြီးမားလှသော ခြိမ်းခြောက်မှုတစ်ခု ဖြစ်ပေသည်။
သူ နတ်ဘုရားလောကမှ ထွက်ခွာသွားခဲ့လျှင်ပင် လင်းချီသာ သေဆုံးမသွားပါက လင်းချီ၏ စရိုက်အရ တစ်နေ့နေ့တွင် သူ့ကို လိုက်လံရှာဖွေကာ ကလဲ့စားချေလာနိုင်ခြေ အလွန်ပင် မြင့်မားလှသည်။
သို့သော် အတိအကျပင် ထိုအချိန်၌ ရေတွက်၍မရနိုင်သော ဝိညာဉ်အရှိန်အဝါများစွာသည် နတ်ဘုရားလောကအတွင်း ထွက်ပေါ်လာခဲ့သည်။
ထိုမြင့်မြတ်လှသော ဝိညာဉ်ရေးရာ စွမ်းအင်များသည် တစ်ခဏချင်းအတွင်း ပေါ်ပေါက်လာခဲ့ခြင်း ဖြစ်ရာ ဒုစရိုက်နတ်ဘုရားနှင့် ကရုဏာနတ်ဘုရားတို့ပင်လျှင် ကြိုတင်၍ အာရုံခံမိခြင်း မရှိခဲ့ကြချေ။
"မိုးကြိုးနတ်ဘုရား ကောင်းကင်တမန်နတ်ဘုရား ရေခဲနတ်ဘုရား..."
ချင်းရန်ရွှယ်နှင့် မိုးကြိုးနတ်ဘုရားတို့သည် လင်းချီ၏ ကိုးကွယ်ယုံကြည်မှု ဟင်းလင်းပြင်အတွင်းမှ ထွက်ခွာလာခဲ့ကြသည်။
နဂါးနတ်ဘုရားစစ်ပွဲအတွင်း သေဆုံးပျက်စီးသွားခဲ့ကြသော ပထမမျိုးဆက် ဓာတ်ကြီးနတ်ဘုရား လေးပါးနှင့်အတူ ရေခဲနတ်ဘုရားနှင့် အခြားသော နတ်ဘုရားများစွာတို့သည် မိမိတို့ဘာသာကိုယ်တိုင် ပေါ်ထွက်လာခဲ့ကြခြင်း ဖြစ်သည်။
ဆုလာဘ်များအားလုံးကို မင်း၏ အကောင့်ထဲသို့ ထည့်သွင်းပေးပြီး ဖြစ်သည်။
"ဒါက ဘယ်လိုလုပ်ပြီး ဖြစ်နိုင်မှာလဲ"
နတ်ဘုရားဘုရင် လေးပါးစလုံးသည် နတ်ဘုရားလောက စစ်ပွဲအတွင်း လွန်ခဲ့သော အချိန်ကတည်းက သေဆုံးပျက်စီးသွားခဲ့ကြပြီဖြစ်သော ဤနတ်ဘုရားများကို မယုံကြည်နိုင်လောက်အောင် စူးစိုက်ကြည့်နေမိကြသည်။
"ပူးပေါင်းကြံစည်မှုပဲ ဒါက နတ်ဘုရားလောကကို ဆန့်ကျင်တဲ့ ပူးပေါင်းကြံစည်မှုတစ်ခု ဖြစ်ရမယ်။"
အသူရာနတ်ဘုရားသည် ဤအရာက ဘာကြောင့် ဖြစ်ပေါ်လာရသည်ကို မသိရှိသော်လည်း အရာအားလုံးကို လင်းချီ၏ ပူးပေါင်းကြံစည်မှုအဖြစ်သာ ပုံချလိုက်တော့သည်။
အခြားသော နတ်ဘုရားဘုရင်များကလည်း လင်းချီကို အသေအချာ စူးစိုက်ကြည့်လိုက်ကြသည်။
၎င်းမှာ ပူးပေါင်းကြံစည်မှု ဟုတ်မဟုတ်ဆိုသည်ကို ပြောရန် ခဲယဉ်းလှသော်လည်း ဤကိစ္စသည် လင်းချီနှင့် လုံးဝ သက်ဆိုင်နေသည်မှာ အမှန်ပင်ဖြစ်သည်။
ဤပြန်လည်ရောက်ရှိလာသော နတ်ဘုရားများမှာ အရေအတွက်အားဖြင့် များပြားလှပြီး ၎င်းတို့အားလုံးသည် လက်ရှိ နတ်ဘုရားလောက၏ ရန်သူများ ဖြစ်ကြလင့်ကစား ၎င်းတို့သည် ယခင် နဂါးနတ်ဘုရားကဲ့သို့ စွမ်းအားကြီးမားခြင်း မရှိပါက နတ်ဘုရားလောက၏ အလုံးစုံသော အခြေအနေကို လှုပ်ခါနိုင်လိမ့်မည် မဟုတ်ချေ။
"အဆိပ်အဖိုးကြီး... ငါ့ကို အသူရာနတ်ဘုရားနဲ့ နည်းနည်းလောက် ပိုနီးကပ်တဲ့နေရာဆီ ခေါ်သွားပေးစမ်းပါ။"
အခြေအနေများ ရုတ်တရက် ပြောင်းလဲသွားခြင်းသည် ထန်ဆန်းအား မကောင်းသော အငွေ့အသက်တစ်ခုကို ခံစားမိစေသည်။
တောက်... လင်းချီက နတ်ဘုရားလောကထဲမှာတောင် အခြေအနေတွေကို ပြောင်းပြန်လှန်ပစ်နိုင်သေးတာလား
ဒီလိုမျိုး ကျပန်းနတ်ဘုရားတွေအားလုံးက ဘယ်ကနေ ထွက်လာကြတာလဲ
တုကူးပေါ်က ခပ်တိုးတိုး ရယ်မောလိုက်သည်။
"စိတ်မပူပါနဲ့ ငါ မင်းကို ကာကွယ်ပေးပါ့မယ်။"
ထန်ဆန်း”.....”
သူသည် မိမိအပေါ် တုကူးပေါ်၏ သစ္စာရှိမှုကို သံသယမဖြစ်သော်လည်း တုကူးပေါ်၏ စွမ်းဆောင်ရည်ကိုမူ အလွန်ပင် သံသယဖြစ်မိသည်။
ဒီနေရာက ဘယ်လိုနေရာမျိုးမလို့လဲ
နတ်ဘုရားတွေက မြေပြင်ပေါ်မှာ အလွန်အကျွံ ရှိနေကြပြီး နတ်ဆရာတွေက ခွေးတွေထက်တောင် တန်ဖိုးနည်းလှတဲ့ နေရာမျိုးပဲ။ အဆင့် ၉၉ ရှိတဲ့ စူပါတုန့်လော့တစ်ယောက်တောင် မဟုတ်တဲ့ မင်းလို စွမ်းအားရှင် ဝိညာဉ်သခင်တစ်ယောက်က ဘာအခန်းကဏ္ဍကနေ ပါဝင်နိုင်မှာမလို့လဲ
"အဆိပ်အဖိုးကြီး... ဟိုဘက်ကို နည်းနည်းလောက် သွားရအောင်။"
"ကောင်းပြီ။"
တုကူးပေါ် လှုပ်ရှားလိုက်သည်။
ထန်ဆန်း၏ ထိတ်လန့်ချောက်ချားဖွယ် အကြည့်အောက်တွင် သူသည် တုကူးပေါ်၏ ခေါ်ဆောင်မှုဖြင့် လင်းချီ၏ ဘေးနားသို့ ရောက်ရှိသွားခဲ့ရတော့သည်။
"အရှင်မင်းကြီး... တုကူးပေါ် တာဝန် ပြီးဆုံးပါပြီ။"
တုကူးပေါ်သည် ထန်ဆန်းကို လင်းချီ၏ ခြေဖဝါးအောက်သို့ လွှဲပြောင်းပစ်ချလိုက်သည်။
ထန်ဆန်း”.....”
အသူရာနတ်ဘုရား “......”
ပင်လယ်နတ်ဘုရား “...........”
မရှိစွမ်းလှသော သာမန်လူသားတစ်ဦးမျှသာ ဖြစ်သည့် တုကူးပေါ်သည် နတ်ဘုရားအမြောက်အမြား၏ အာရုံစိုက်မှုကို ဆွဲဆောင်နိုင်ခဲ့သည်။
ဒီနေရာမှာ ဘာတွေ ဖြစ်ပျက်နေတာလဲ
အထူးသဖြင့် ထန်ဆန်း ဖြစ်သည်။
သူ၏ နှလုံးသားအတွင်း၌ တုကူးပေါ်သည် သူ့ကို အကူအညီအပေးနိုင်ဆုံးသော ပုဂ္ဂိုလ်ဖြစ်ပြီး မည်သည့် ချွင်းချက်မျှ မရှိခဲ့ချေ။
သူသည် အန္တရာယ်များမှ အကြိမ်ကြိမ် ကယ်တင်ခြင်း ခံခဲ့ရဖူးပြီး ယခုအကြိမ်တွင်လည်း တုကူးပေါ်သာ မရှိခဲ့ပါက သူသည် သတိပြန်လည်ရရှိလာလိမ့်မည် မဟုတ်ချေ။
ထို့ကြောင့် တုကူးပေါ်က သူ့ကို လင်းချီ၏ ခြေဖဝါးအောက်သို့ ပစ်ချလိုက်သည့် အခါတွင် သူသည် ထိတ်လန့်ရန်ပင် အချိန်မရလိုက်ဘဲ သူ၏ စိတ်ထဲတွင် လုံးဝ ဗလာကျင်းသွားခဲ့ရတော့သည်။
"အဆိပ်... အဆိပ်အဖိုးကြီး... မင်းက..."
နောက်ဆုံးတွင်မှ အခြေအနေမှန်ကို သတိပြုမိလိုက်သော ထန်ဆန်းသည် လုံးဝ စိတ်ပျက်အားလျော့ပျက်စီးလုနီးပါး ဖြစ်သွားခဲ့ရသည်။
သူသည် ရှရှိက်ခ်ကာမှ အဖော်များက သူ့ကို စွန့်ပစ်သွားနိုင်သည်ဟု တွေးတောဖူးခဲ့သော်လည်း တုကူးပေါ်က သူ့အပေါ် သစ္စာဖောက်လိမ့်မည်ဟုမူ လုံးဝ မျှော်လင့်မထားခဲ့ချေ။
မဟုတ်သေး ဒါက သစ္စာဖောက်ခြင်း မဟုတ်ဘဲ အစကတည်းကပင် လုံးဝဥဿုံ လှည့်စားခြင်း ခံခဲ့ရခြင်း ဖြစ်သည်။
"အင်း... တော်တော်လေး ကောင်းကောင်း လုပ်နိုင်ခဲ့တယ်။" လင်းချီသည် ပထမဆုံးအနေဖြင့် တုကူးပေါ်ကို ချီးမွမ်းလိုက်သည်။
"လင်းချင်။"
"ရှိပါတယ် အရှင်။"
"ထန်ဆန်းရဲ့ ခွေးခေါင်းကို ဖြတ်ပစ်ပြီး အောင်ပွဲအတွက် ယဇ်ပူဇော်လိုက်စမ်း။"
"ဟုတ်ကဲ့ပါ အရှင်။"
လူသားလောကတွင် ထန်ဆန်းကို သတ်ဖြတ်ခြင်းသည် အသူရာနတ်ဘုရား၏ မျက်နှာစာ ရှေ့မှောက်တွင် သူ့ကို ထပ်မံ၍ သတ်ဖြတ်ပြခြင်းနှင့် နှိုင်းယှဉ်လျှင် ဘာမျှ မဟုတ်တော့ချေ။
မင်းက ဖျက်ဆီးခြင်းနတ်ဘုရား ကမ္ဘာ၏ စည်းမျဉ်းများကိုပင် ဆန့်ကျင်လျက် ထန်ဆန်းကို မင်း၏ အမွေအနှစ်အဖြစ် သတ်မှတ်ရန် အစွမ်းကုန် ကြိုးပမ်းခဲ့တယ် မဟုတ်လား
ဒါဆိုရင်တော့ ထန်ဆန်းက ဘယ်လိုမျိုး အကြွင်းမဲ့ သေဆုံးပျက်စီးသွားရလဲဆိုတာကို မင်းရဲ့ မျက်စိနဲ့တင် ကိုယ်တိုင် သေချာ ကြည့်ရှုလိုက်စမ်းပါ။
"မင်း ရဲတင်းလှချည်လား"
အသူရာနတ်ဘုရားသည် ဒေါသကြောင့် မျက်လုံးများ ပြူးကျယ်သွားခဲ့ရသည် ၎င်းမှာ သူ၏ ဆက်ခံသူကို သတ်ဖြတ်ရန် ကြိုးပမ်းခြင်း ဖြစ်ရုံတင်မကဘဲ သူ၏ မျက်နှာကို ဗြောင်ကျကျ ရိုက်နှက်လိုက်ခြင်းလည်း ဖြစ်ပေသည်။
အသူရာနတ်ဆိုးဓားသည် ကောင်းကင်ယံကို ထိုးဖောက်မည့်အလား နီရဲသော အလင်းတန်းများနှင့်အတူ ထန်ဟောင်နှင့် ထန်ဆန်းတို့၏ လက်ထဲတွင် ရှိစဉ်ကထက် အဆပေါင်းများစွာ ပိုမိုပြင်းထန်လှသော စွမ်းအားများဖြင့် လင်းချီထံသို့ အရှိန်အဟုန်ပြင်းစွာ ပြေးဝင်လာခဲ့တော့သည်။