အခန်း (၂၄၁) အစကောင်းရသလို အဆုံးလည်းကောင်းရမည်

"အရှင်မင်းကြီး... သတင်းကောင်းပါပဲ ကြွက်စုတ်တွေ ခေါင်းပြူထွက်လာကြပြီ"
ကျိန်စာရုပ်သေးမှတစ်ဆင့် ထန်ဟောင်၏ တည်နေရာကို အာရုံခံမိပြီးသည်နှင့် လင်းချင်သည် လင်းချီထံသို့ ချက်ချင်း လာရောက်သတင်းပို့လေသည်။
ငါးများကို အစာကျွေးနေသော လင်းချီက သူ၏လက်များကို ပုတ်ခါလိုက်ပြီး မေးမြန်းလိုက်သည်မှာ
"ဘယ်နေရာမှာလဲ"
"ထန်ဂိုဏ်းရဲ့ အပျက်အစီးတွေရှိတဲ့နေရာမှာပါ"
မှန်ပေသည် ထန်ဂိုဏ်းအသစ်သည်ပင်လျှင် ပျက်စီးခြင်းသို့ ရောက်ရှိသွားခဲ့သည်မှာ ကြာမြင့်လှပြီဖြစ်သည်။
လင်းချီအနေဖြင့် ထန်ဆန်းနှင့် ထန်ဟောင်တို့အား အသုံးချရန် အစီအစဉ် ရှိကောင်းရှိနိုင်သော်လည်း ၎င်းမှာ ထန်ဂိုဏ်းတစ်ခုလုံးကို ချန်ထားမည်ဟု ဆိုလိုခြင်းမဟုတ်ပေ။
ထန်ဟောင်နှင့် သူ၏သား ထန်ဆန်းတို့မှလွဲ၍ ထန်ဂိုဏ်း၏ အမွေအနှစ်မှာ လုံးဝ ပြတ်တောက်သွားခဲ့ပြီဟု ဆိုနိုင်သည်။
"အရှင်မင်းကြီး... ကျွန်တော်မျိုး ဒီနှစ်တွေအတွင်းမှာ အဲဒီကြွက်စုတ်ရဲ့ တည်နေရာကို ကျိန်စာရုပ်သေးကနေတစ်ဆင့် အာရုံခံလို့ မရခဲ့ပါဘူး။ အခုလို ရုတ်တရက် ပေါ်လာတာက သေချာပေါက် ထောင်ချောက်တစ်ခု ဖြစ်ရပါမယ်"
ထန်ဟောင်နှင့် ထန်ဆန်းတို့က လင်းချင်ကို ကြွက်သားသာရှိပြီး ဦးနှောက်မရှိသူဟု ထင်မှတ်ထားကြကာ သူတို့ရှိနေသည်ကို သိသည်နှင့် စိတ်လှုပ်ရှားစွာဖြင့် ချက်ချင်း ပြေးလာလိမ့်မည်ဟု တွေးခဲ့ကြသည်။
သူတို့နှစ်ဦးစလုံးသည် အထူးတလည် လိမ္မာပါးနပ်သူ သို့မဟုတ် ဗျူဟာမြောက်သူများ မဟုတ်ကြချေ။
ထန်ဟောင်အကြောင်းမူ ပြောနေရန်ပင် မလိုပါ အကယ်၍ သူ၏ အလွန်အမင်း အစွမ်းထက်လှသော ဝိညာဉ်ကွင်းပေါက်ကွဲခြင်းစွမ်းရည်သာ မရှိခဲ့ပါက သူသည် အကြိမ်ပေါင်းများစွာ သေဆုံးသွားခဲ့ပြီး ဖြစ်လိမ့်မည်။
ထန်ဆန်းမှာမူ ထက်မြက်ပြီး ကောက်ကျစ်သူဟု ထင်ရသော်လည်း ၎င်းမှာ အကာအကွယ်အလင်းတန်းကြောင့်သာ ဖြစ်သည်။
သို့သော် ဇာတ်လိုက်အလင်းတန်း ချင်း ပြိုင်ဆိုင်ရမည်ဆိုလျှင် လင်းချီနှင့် ယှဉ်ရန် သူ၌ ဘာရှိပါသနည်း
"အရာအားလုံးကို အဆုံးသတ်ရမယ့် အချိန်ရောက်ပြီ"
"အရှင်မင်းကြီး... ကျွန်မ အရှင်မင်းကြီးကို ကူညီပါရစေ"
ဆံပင်ကို သပ်ရပ်စွာ ထုံးနှောင်ထားပြီး ရိုးရှင်းစွာ ဝတ်ဆင်ထားသော ချင်းရန်ရွှယ်သည် နတ်ဘုရားတစ်ပါးနှင့် လုံးဝ မတူဘဲ သာမန်လူတစ်ဦးကဲ့သို့ ဖြစ်နေသည်။
"အရင်ဆုံး ယုံကြည်မှုနယ်ပယ်ထဲကို ပြန်သွားလိုက်ပါဦး။ မင်းရဲ့အကူအညီ လိုအပ်တဲ့အခါကျမှ အပြင်ကို လွှတ်ပေးမယ်"
နတ်ဘုရားတစ်ပါး ဖြစ်လာပြီးနောက် လူသားလောကတွင် အချိန်အကြာကြီး နေထိုင်၍မရပေ။
သို့သော် ယုံကြည်မှုနယ်ပယ်ထဲတွင်မူ ထိုသို့သော စိုးရိမ်ပူပန်မှုမျိုး ရှိစရာမလိုချေ။
ချင်းရန်ရွှယ်သည် ထွက်ခွာသွားရန် အနည်းငယ် ဝန်လေးနေပုံရသည်။
"ကောင်းပါပြီ... ကျွန်မ အရှင့်ကို စောင့်နေပါ့မယ်"
ယုံကြည်မှုနယ်ပယ်သို့ သွားရာလမ်းကြောင်း ပွင့်လာသည့်အခါတွင် ယုံကြည်မှုစွမ်းအားအပြင် အလွန်ပြင်းထန်သော မိုးကြိုးလျှပ်စီး စွမ်းအားတစ်ခုလည်း ပေါ်ထွက်လာသည်။
လင်းချီ ဖွင့်လှစ်လိုက်သော လမ်းကြောင်းထဲမှ နွယ်ပင်တစ်ပင် ထွက်ပေါ်လာခဲ့သည်။
"ဒါက တကယ်ပဲ မိုးကြိုးနတ်ဘုရားလား"
လင်းချင်က အနားသို့ တိုးကပ်လာပြီး စူးစမ်းလိုစိတ်ဖြင့် မေးမြန်းလိုက်သည်။
မိုးကြိုးငရဲနွယ်ပင်ဟု ခေါ်သော ဤနွယ်ပင်သည် ချင်းရန်ရွှယ် နတ်ဘုရားဖြစ်လာပြီးနောက် ရရှိခဲ့သော ဆုလာဘ်တစ်ခု ဖြစ်သည်။
 မိုးကြိုးငရဲနွယ်ပင်  သံသရာမှ ပြန်လည်မွေးဖွားခြင်း

ယခင်က ၎င်းသည် ဖိနှိပ်ခြင်းခံထားရသဖြင့် မိုးကြိုးနတ်ဘုရား ရာထူးကို ပြန်လည် မရယူနိုင်ခဲ့ချေ။
လင်းချီထံသို့ ဆုလာဘ်အဖြစ် ရောက်ရှိလာပြီးနောက် သူသည် ယုံကြည်မှုနယ်ပယ်အတွင်း၌ နတ်ဘုရားရာထူးကို လျင်မြန်စွာ စုစည်းပေးခဲ့ရာ ယခုအခါ ပြီးဆုံးလုနီးပါး ဖြစ်နေပြီဖြစ်သည်။
သို့သော် ၎င်းသည် မိုးကြိုးနတ်ဘုရား၏ ရာထူးကို ခံယူပြီးသည့်တိုင်အောင် ယခင်ဘဝက မိုးကြိုးနတ်ဘုရား မဟုတ်တော့ဘဲ အသစ်စက်စက်နှင့် အပြစ်ကင်းစင်သော သက်ရှိပုံစံသစ်တစ်ခုကဲ့သို့ ဖြစ်နေသည်။
"ပြန်သွားလိုက်ဦး။ မင်း မိုးကြိုးနတ်ဘုရားရဲ့ ရာထူးကို အပြည့်အဝ စုစည်းပြီးသွားရင် ငါ မင်းကို အပြင်ထွက်ပြီး ဆော့ဖို့ ခေါ်သွားမယ်"
ထို့သို့ပြောပြီးနောက် လင်းချီသည် မိုးကြိုးငရဲနွယ်ပင်ကို ယုံကြည်မှုနယ်ပယ်ထဲသို့ ပြန်လည် တွန်းပို့လိုက်သည်။
"သွားကြစို့"

ထန်ဂိုဏ်း တည်ရှိရာနေရာ။
သူဆိတ်ပြီး လူသူကင်းမဲ့နေသော ဂိုဏ်း၏ အပျက်အစီးများကို ကြည့်ရင်း ထန်ဟောင်၏ မျက်လုံးများတွင် မျက်ရည်များ ပြည့်လျှံလာခဲ့သည်။
"ထန်ဟောင်ဟာ ဂိုဏ်းကို မကာကွယ်နိုင်ခဲ့တဲ့အတွက် မိဘတ္တရား မစောင့်သိရာ ရောက်ခဲ့ပါပြီ။ ထန်ဂိုဏ်းရဲ့ ဘိုးဘေးတွေကို ကျွန်တော် မျက်နှာပျက်စေခဲ့ပါပြီ"
ထိုစဉ်က သူသည် ဝိညာဉ်နန်းတော်ကို ပြစ်မှားမိခဲ့သော်လည်း ၎င်းက ထန်ဂိုဏ်းကို တံခါးပိတ် နေထိုင်စေရုံသာ ဖြစ်စေခဲ့သည်။
သို့သော် ယခုအခါတွင်မူ ထန်ဂိုဏ်းသည် အတိတ်က အရာတစ်ခုသာ ဖြစ်ကျန်ရစ်တော့သည်။
"အဖေ... ဒါ အဖေ့အပြစ် မဟုတ်ပါဘူး။ ဒါတွေအားလုံးက လင်းချီနဲ့ လင်းချင်ကြောင့် ဖြစ်ရတာပါ။ ထန်ဂိုဏ်းမှာ တိုက်တုန်တုန့်လော့တစ်ယောက်မှ မကျန်တော့တာတောင် သူတို့က အကုန်လုံးကို သတ်ဖြတ်ခဲ့ကြတယ်။ သူတို့တွေက လူလို့ ခေါ်ဖို့တောင် မတန်ပါဘူး"
ထန်ဆန်းသည် ထန်ဟောင်၏ ဘေးတွင် ဒူးထောက်လိုက်သည်။
ထန်ဟောင်နှင့် နှိုင်းယှဉ်ပါက ထန်ဆန်း၏ ထန်ဂိုဏ်းအပေါ် ထားရှိသော သံယောဇဉ်မှာ ထိုမျှ မနက်နဲလှပေ။
သို့သော် လင်းချီအပေါ် ထားရှိသော သူ၏ မုန်းတီးမှုမှာမူ ဂိုဏ်းပျက်စီးခြင်းအပေါ်တွင် မှီခိုနေရန် မလိုဘဲ အမြင့်ဆုံးအဆင့်သို့ ရောက်ရှိနေပြီးသား ဖြစ်သည်။
"မှန်တယ်... ဒါတွေအားလုံးက တာ့လီမင်းဆက်ရဲ့ အပြစ်တွေပဲ"
ထန်ဟောင်က သူ၏ မျက်ရည်များကို သုတ်လိုက်သည်။
"ငါ ထန်ဟောင် သစ္စာဆိုတယ်... တာလီမင်းဆက်ကို ဒီအသွေးအသား ကြွေးမြီတွေအတွက် ပြန်လည် ပေးဆပ်စေရမယ်။ တာလီမင်းဆက်ရဲ့ သွေးသားမှန်သမျှကို ငါ အကုန်သတ်ပစ်မယ်"
ထန်ဟောင်၏ စကား ဆုံးရုံတင်ရှိသေးသည် သူ၏ စိတ်ထဲတွင် စွဲထင်နေသော အသံတစ်သံ ထွက်ပေါ်လာခဲ့သည်။
"တောက် မင်းတို့ ကြွက်စုတ်တွေက ဘယ်တုန်းကမှ အရှက်မရှိကြဘူးပဲ။ ထန်ဂိုဏ်း ပျက်စီးသွားရတာက မင်းတို့ သားအဖနှစ်ယောက်ရဲ့ လက်ချက်ကြောင့်ပဲ မဟုတ်လား"
"လင်းချင်"
ထန်ဟောင်နှင့် ထန်ဆန်းတို့သည် ချက်ချင်း ထရပ်လိုက်ကြပြီး အဝေးတွင် ဖြည်းညှင်းစွာ ပွင့်လာသော ဟင်းလင်းပြင်ဝင်ပေါက်ကို ကြည့်လိုက်ကြသည်။
သူတို့ ဒီလောက်မြန်မြန် ရောက်လာကြလိမ့်မယ်လို့ မထင်ထားခဲ့ဘူး
ထန်ဟောင်နှင့် ထန်ဆန်းတို့သည် သူတို့၏ ယခင်အတွေ့အကြုံဟောင်းများအရ မှားယွင်းစွာ တွက်ချက်မိခဲ့ကြသည်။
သူတို့၏ ခန့်မှန်းချက်အရ လင်းချင်က သူတို့ကို ရှာဖွေနိုင်သည့် အရှိန်အဟုန်အရဆိုလျှင် ပင်လယ်နတ်ဘုရား၏ အလင်းမှ ကျိန်စာကို ဖယ်ရှားလိုက်သည့် အချိန်မှစ၍ လင်းချင် ရောက်ရှိလာရန် အနည်းဆုံး နာရီပေါင်းများစွာ ကြာမြင့်ရမည်ဖြစ်သည်။
သို့သော် နာရီဝက်ပင် မပြည့်သေးမီမှာပင် လင်းချင်က ရောက်ရှိနေပြီ ဖြစ်သည်။
လင်းချီသည် ဟင်းလင်းပြင် စွမ်းအားကို မည်မျှအထိ ကျွမ်းကျင်ပိုင်နိုင်နေပြီလဲ ဆိုသည်ကို သူတို့ လုံးဝ မသိကြချေ။ ဤမျှ ဝေးကွာသော အကွာအဝေးမှာ လင်းချီအတွက် ဓားတစ်ချက် အသာအယာ ဝှေ့ယမ်းလိုက်ရုံမျှသာ ဖြစ်သည်။
လင်းချင်သည် ဟင်းလင်းပြင် ဖြတ်သန်းခြင်းလမ်းကြောင်းမှတစ်ဆင့် ဆင်းသက်နိုင်ခဲ့ပြီ ဖြစ်ရာ တာ့လီမင်းဆက်၏ အခြားသော တိုက်တုန်တုန့်လော့များလည်း လျင်မြန်စွာ ရောက်ရှိလာနိုင်ပေသည်။
အခြေအနေက သူတို့ မျှော်လင့်ထားသည့်အတိုင်း အတိအကျ ဖြစ်မလာခဲ့သော်လည်း ထန်ဟောင်နှင့် ထန်ဆန်းတို့သည် သူတို့၏ လက်ရှိအင်အားအရ တိုက်ရိုက် ရင်ဆိုင်ရန် မကြောက်ရွံ့ကြပေ။
"ဆန်းအာ... မတွေ့ရတာ ကြာပြီပဲ။ မင်း တော်တော်လေး တိုးတက်လာပုံရတယ်နော်"
ထန်ဟောင်က လင်းချင်၏ အသံကို ကြားလိုက်ရသကဲ့သို့ပင် လင်းချီ၏ အသံ ထွက်ပေါ်လာသောအခါ ထန်ဆန်းတွင်လည်း စိတ်ဒဏ်ရာကြောင့် တုံ့ပြန်မှုတစ်ခု ဖြစ်ပေါ်လာခဲ့သည်။
သူ၏ အသက်ရှူသံမှာ ချက်ချင်း ပြင်းထန်လာခဲ့ပြီး ပင်လယ်နတ်ဘုရား၏ နတ်ဘုရားစမ်းသပ်မှုကြောင့် မူလအရောင်သို့ ပြန်လည် ပြောင်းလဲသွားခဲ့သော သူ၏ မျက်လုံးများသည် နောက်တစ်ကြိမ် နီမြန်းလာမည့် လက္ခဏာများ ပြသလာခဲ့သည်။
"လင်းချီ ~"
ထန်ဆန်း၏ အသံမှာ အက်ကွဲနေပြီး ပြင်းထန်လှသော သတ်ဖြတ်လိုစိတ်များဖြင့် ပြည့်နှက်နေသည်။
"မင်း အခုထိ နတ်ဘုရား မဖြစ်သေးဘူးပဲ ဒါက တကယ်ကို စိတ်ပျက်ဖို့ကောင်းတယ်"
ထန်ဆန်းကို မြင်လိုက်ရသောအခါ လင်းချီသည် သူ စစ်မှန်သော ပင်လယ်နတ်ဘုရား မဖြစ်သေးကြောင်း သိလိုက်ရသည်။
ထန်ဆန်းက လှောင်ပြုံး ပြုံးလိုက်သည်။
သူသည်လည်း လင်းချီ နတ်ဘုရား မဖြစ်သေးကြောင်း ခံစားမိသည်။
ထိုသို့ဆိုလျှင် လင်းချီအနေဖြင့် မည်သည့်အရာကို ဤမျှ ဂုဏ်ယူနေသနည်းဆိုသည်ကို သူ နားမလည်နိုင်တော့ချေ။
ထန်ဆန်းသည် အင်အားနှင့် ကျင့်ကြံခြင်း အရှိန်အဟုန် နှစ်ခုစလုံးတွင် လင်းချီ၏ နောက်၌ အမြဲတမ်း ပြတ်ကျန်ခဲ့ရသည်။
သို့သော် ယခုမူ သူသည် အမီလိုက်နိုင်ခဲ့ပြီဖြစ်သည်။
နတ်ဘုရားစမ်းသပ်မှုတွင် မည်သို့သော ဖြတ်လမ်းနည်းများကို အသုံးပြုခဲ့သည်ဖြစ်စေ အဓိကမှာ သူ အမီလိုက်နိုင်ခဲ့ခြင်း ဖြစ်သည်။
လင်းချီ၏ ပေါ်ထွက်လာမှုသည် သူတို့၏ ယခင်အစီအစဉ်များကို လုံးဝ ပျက်ပြားသွားစေခဲ့သည်။
လင်းချီနှင့် လင်းချင်တို့အပြင် မင်းဆက်၏ ကိုယ်ရံတော် ခုနစ်ဦးနှင့် ပညာရှိ အချို့လည်း ပါဝင်လာခဲ့ကြသည်။
ဤအခြေအနေမျိုးတွင် လင်းချင်ကို အရင်ဆုံး ဝိုင်းရံသတ်ဖြတ်ပြီး နတ်ဘုရားအဆင့်သို့ တက်လှမ်းရန် ဟူသော အစီအစဉ်မှာ မဖြစ်နိုင်တော့ချေ။
"လင်းချီ... မင်း သိလား မင်းရဲ့ မာနထောင်လွှားတဲ့ အပြုအမူတွေကြောင့် မင်းကို ငါ ထိုးနှက်ချင်နေခဲ့တာ ကြာပြီ"
ထန်ဆန်းသည် ကိုယ်ကို လှုပ်ရှားလိုက်ပြီး ပင်လယ်နတ်ဘုရား သုံးခွလှံကို ဝှေ့ယမ်းကာ လင်းချီထံသို့ ဟိန်းဟောက်လျက် ခုတ်ပိုင်းလိုက်သည်။
ဒေါင်
လင်းချင်က ဘေးသို့ တစ်လှမ်း တိုးလိုက်ပြီး သူ၏ ပုဆိန်ကို လွှဲကာ ထန်ဆန်း၏ ပင်လယ်နတ်ဘုရား သုံးခွလှံကို ရိုက်ထုတ်ပစ်လိုက်သည်။
"အဲဒီ ပင်လယ်နတ်ဘုရား အဘိုးကြီးက တကယ်ကို ရက်ရက်ရောရော ပေးခဲ့တာပဲ။ မင်းရဲ့ စွမ်းအားက ပင်လယ်နတ်ဘုရားရဲ့ ထိန်းချုပ်မှုကို ခံထားရတဲ့ ပိုစိုက်ရှီးထက်တောင် ပိုပြီး အားကောင်းနေပြီ"
"လင်းချီ... မင်း ငါ့ကို အနိုင်ယူပြီးတိုင်း ဟန်ဆောင်ကောင်းတဲ့ မျက်နှာဖုံးကို စွပ်ထားလေ့ရှိတယ် မဟုတ်လား ဘာလဲ... အခုကျတော့ မင်းရဲ့ လက်အောက်ငယ်သားတွေရဲ့ နောက်ကွယ်မှာပဲ ပုန်းနေတော့မှာလား"
လင်းချင်၏ စွမ်းအားက ထန်ဆန်းကို ထိတ်လန့်သွားစေခဲ့သည်။
သူက လင်းချင်သည် နတ်ဘုရား မဖြစ်သေးသည့်အတွက် သူ၏ စွမ်းအားမှာ အလွန်ဆုံးရှိလှ မိမိနှင့် အဆင့်တူလောက်သာ ရှိလိမ့်မည်ဟု ထင်မှတ်ထားခဲ့သည်။
သို့သော် ပထမဆုံး အကြိမ် ရင်ဆိုင်တွေ့ဆုံမှုမှာပင် သူ၏ စွမ်းအားမှာ လုံးဝ ဖိနှိပ်ခြင်း ခံလိုက်ရသည်။
ဒါက ထန်ဆန်းကို အလွန် မကောင်းသော ခံစားချက်တစ်ခု ပေးစွမ်းလိုက်သည်။
ယခုတစ်ကြိမ်တွင်လည်း ယခင်ကကဲ့သို့ပင် သနားစရာကောင်းသော အခြေအနေမျိုးဖြင့် အဆုံးသတ်သွားရဦးမည်လော
ကြောက်ရွံ့မှုက ထန်ဆန်းကို လွှမ်းမိုးသွားခဲ့ပြီး လင်းချင်ကို အလျင်အမြန် သတ်ဖြတ်ကာ နတ်ဘုရား ဖြစ်လာမည့် အစီအစဉ်ကို စွန့်လွှတ်လိုက်ပြီး အဆိုးရွားဆုံးသော အခြေအနေအတွက်သာ ပြင်ဆင်လိုက်တော့သည်။
၎င်းမှာ လင်းချီကို အနည်းဆုံး တစ်ကြိမ်မျှ တစ်ကြိမ်တည်းဆိုလျှင်ပင် အနိုင်ယူရမည်ဟူသော အစီအစဉ် ဖြစ်သည်။
ထန်ဟောင်ကလည်း အနားသို့ ရောက်ရှိလာပြီး ထန်ဆန်း၏ ဘေးတွင် ရပ်လိုက်သည်။
"လင်းချင်... ငါက မင်းရဲ့ ပြိုင်ဘက်ပဲ"
လင်းချင်က နှာခေါင်းရှုံ့လိုက်ပြီး
"အခြေအနေတွေက တကယ်ကို ပြောင်းလဲသွားတာပဲ။ ကြွက်ကြီးနဲ့ ကြွက်သေးတွေက လူတွေကို မကြောက်ကြတော့ဘူးပဲ။ သူတို့တွေ အတိတ်က အရိုက်ခံခဲ့ရတာတွေကို မမှတ်မိကြတော့ဘူး ထင်တယ်"
လင်းချင်က လင်းချီကို ပြောလိုက်သည်မှာ
"အရှင်မင်းကြီး... အရှင်မင်းကြီးအနေနဲ့ လက်တစ်ချောင်းမှ လှုပ်ရှားစရာ မလိုပါဘူး ကျွန်တော်မျိုးတို့ပဲ သူတို့ကို ရှင်းလင်းပေးပါ့မယ်"
လင်းချီက သူ၏ လက်ကို မြှောက်လိုက်သည်။
"လူဆိုတာ အစကောင်းရင် အဆုံးလည်း ကောင်းရမယ်။ ငါက ထန်ဆန်းကို သူ့ရဲ့ ပထမဆုံးသော ရှုံးနိမ့်မှုကို ပေးခဲ့တာဆိုတော့ သူ့ရဲ့ နောက်ဆုံးသော ရှုံးနိမ့်မှုကိုလည်း ငါပဲ ပေးလိုက်ပါ့မယ်"
လင်းချင်ကလည်း ပြုံးလိုက်ပြီး
"အရှင်မင်းကြီး မိန့်ကြားတာ မှန်လှပါပေတယ်။ ဒါဆိုရင် ကျွန်တော်မျိုးကလည်း ထန်ဟောင်ကို သူ့ရဲ့ နောက်ဆုံးခရီးအတွက် လိုက်ပါပို့ဆောင်ပေးပါ့မယ်"