အခန်း (၁၆၀) တကယ့်ပွဲကောင်းက အခုမှစတာ

"ငါ့အစ်ကိုက ဘယ်လိုလုပ်ပြီး ဒီလိုအခြေအနေမျိုးအထိ ကျဆင်းသွားရတာလဲ"

ယွီလော့မြန်သည် အဝေးမှ ရင်းနှီးသလိုလိုနှင့် သူစိမ်းဆန်နေသော ထိုလူရိပ်ကို ကြည့်ရင်း မယုံကြည်နိုင်ခြင်းများစွာနှင့် မှင်သက်နေမိသည်။

ကာလရှည်ကြာစွာ မြင့်မားသော ရာထူးကို ဆုပ်ကိုင်ထားပြီး အာဏာစက် ပြင်းထန်လှသော သူ၏အစ်ကိုကြီးသည် တကယ်ပဲ တံခါးစောင့်တစ်ယောက် ဖြစ်သွားရတာလား

ယွီလော့မြန်အတွက်တော့ ပထမဆုံးအကြိမ်အဖြစ် လက်တွေ့လောကကြီးသည် အလွန်အမင်း စိတ်ကူးယဉ်ဆန်နေသကဲ့သို့ ခံစားလိုက်ရသည်။

ယွီယွမ်ကျန့်အနေနှင့် ဤမျှ ကြီးမားလှသော ကွာခြားချက်ကို မည်သို့ သည်းခံနိုင်မည်နည်းဆိုသည်ကို သူ စဉ်းစား၍ပင် မရပေ; ယွီလော့မြန်သာဆိုလျှင် ယခုကဲ့သို့သော ရိုက်ခတ်မှုကို သေချာပေါက် တောင့်ခံနိုင်မည်မဟုတ်ဟု သူ ခံစားမိသည်။

ယွီလော့မြန်သည် ရှေ့သို့ တက်လှမ်းရန် ပြင်လိုက်သည်ကို မြင်သောအခါ ဖလန်းဒါးသည် တစ်ဖက်လူ၏ အဆင့်အတန်းကို ဂရုမစိုက်နိုင်တော့ဘဲ သူ့ကို အမြန်ဆွဲတားလိုက်သည်။

"စီနီယာ... စီနီယာ စိတ်အေးအေးထားပါ။ ယွီဂိုဏ်းချုပ်တောင်မှ တာလီတော်ဝင်အကယ်ဒမီရဲ့ ပြိုင်ဘက်မဟုတ်ပါဘူး။ အခု စီနီယာက ဂိုဏ်းချုပ်ကို သွားကယ်ဖို့ ကြိုးစားရင် စီနီယာပါ အသတ်ခံရနိုင်ပါတယ်"

သူ၏မျက်နှာမှာ တွန့်လိပ်အိုမင်းနေသော်လည်း ယွီရှောင်ကန်းမှာမူ သားဖြစ်သူပီပီ ဦးလေးဖြစ်သူ ယွီလော့မြန်ထက်ပင် ပို၍ တည်ငြိမ်နေပြီး စိတ်လိုက်မာန်ပါ လုပ်မည့် အရိပ်အယောင်လည်း မပြပေ။

သူသည် အသက်ကြီးသွား၍ တုံ့ပြန်မှု နှေးကွေးသွားခြင်းအပြင် ယွီရှောင်ကန်းတွင် သတ္တိမရှိခြင်းကြောင့်လည်း ပါဝင်သည်။

သူသည် သတ္တိကို မနည်းမွေးပြီး ဤနေရာသို့ လာကာ တာလီတော်ဝင်အကယ်ဒမီကို အဝေးမှ လှမ်းကြည့်နိုင်ခြင်းကပင် သူ၏ အကြီးမားဆုံးသော စွမ်းဆောင်ချက် ဖြစ်နေပြီဖြစ်သည်။

အကယ်၍ ယွီလော့မြန်သာ မပါလျှင် သူသည် မည်သို့ပင်ဖြစ်စေ ဤနေရာသို့ လာရဲမည်မဟုတ်ပေ။

သူ့တွင် ယွီယွမ်ကျန့်ကို ကယ်တင်ရန် စွမ်းရည်လည်းမရှိသလို သတ္တိလည်းမရှိပေ။

ဖလန်ဒါ၏ ဆွဲတားမှုကြောင့် ယွီလော့မြန် စိတ်အေးသွားခဲ့သည်။

ယွီယွမ်ကျန့်သည် ဤအခြေအနေသို့ ရောက်နေပြီဖြစ်ရာ အကယ်၍ သူပါ ပါဝင်ပတ်သက်သွားလျှင် အပြာရောင်လျှပ်စီး နဂါးဘုရင်မျိုးနွယ်စုသည် ပို၍ပင် အန္တရာယ်ကြီးမားသွားပေလိမ့်မည်။

"ဒါတွေအားလုံး မင်းကြောင့်ပဲ မင်းလို အသုံးမကျတဲ့ကောင်သာ မရှိရင် ငါ့အစ်ကိုက ကောင်းကင်မြို့တော်ကို ဘာလို့ လာမှာလဲ တာလီတော်ဝင်အကယ်ဒမီနဲ့ရော ဘာလို့ ထိပ်တိုက်တွေ့မှာလဲ အခုလို နိမ့်ကျတဲ့ တံခါးစောင့်တစ်ယောက် ဘာလို့ ဖြစ်သွားရမှာလဲ"

ယွီယွမ်ကျန့်ကို မကယ်တင်နိုင်သဖြင့် ယွီလော့မြန်သည် သူ၏ဒေါသများကို ယွီရှောင်ကန်းအပေါ်၌သာ ပုံချလိုက်တော့သည်။

သံဝေဂရစရာမှာ သူသည် ယခင်က ယွီရှောင်ကန်း အလွန်အမင်း အိုမင်းသွားသည်ကို မြင်ကာ သနားစိတ် အနည်းငယ် ဝင်ခဲ့ဖူးပြီး ယွီရှောင်ကန်းအပေါ်ထားရှိသော ရန်လိုမှုများမှာလည်း လျော့ပါးသွားခဲ့ဖူးသည်။

မထင်မှတ်ဘဲ ယွီရှောင်ကန်းသည် အပြာရောင်လျှပ်စီး နဂါးဘုရင်မျိုးနွယ်စုအတွက် ကြီးမားလှသော ပြဿနာကို ဖန်တီးခဲ့ပြန်သည်။ အပြာရောင်လျှပ်စီး နဂါးဘုရင်မျိုးနွယ်စုတွင် ယွီယွမ်ကျန့်တစ်ဦးတည်းသာ တိုက်တန်တုန့်လော့အဖြစ် ရှိခြင်းဖြစ်ပြီး အခုတော့ သူက ဒီမှာ ပိတ်မိနေပြီဖြစ်သည်။ ယွီရှောင်ကန်းသည် အပြာရောင်လျှပ်စီး နဂါးဘုရင်မျိုးနွယ်စု၏ ထာဝရအပြစ်သားပင် ဖြစ်တော့သည်။

"မင်းကိုယ်တိုင် လူမကယ်နိုင်ရင် ရှောင်ကန်းကို လာပြီး အော်မနေနဲ့။ အဲဒါက မင်းကို ပိုပြီး အရည်အချင်းမရှိသလို ဖြစ်စေတယ်"

လျူအာလုံတစ်ဦးတည်းသာ ဤသို့သော စကားမျိုးကို ပြောရဲသည်။

ယွီလော့မြန်က ယွီရှောင်ကန်းကို ဝေဖန်သည်ကို မြင်သောအခါ လျူအာလုံသည် သည်းမခံနိုင်ဘဲ ယွီရှောင်ကန်းဘက်မှ ရပ်တည်ကာ ယွီလော့မြန်၏ စွပ်စွဲချက်များကို ပြန်လည်ချေပလိုက်သည်။

"မင်း..."

ယွီလော့မြန်၏ ဝိညာဉ်စွမ်းအားများမှာ တုန်ရီနေတော့သည်။

ထိုလူယုတ်မာ ယွီရှောင်ကန်းက လျူအာလုံကို ဘယ်လို ဂါထာတွေ မန္တန်တွေ တိုက်ထားတာလဲ သူက ဒီလောက်တောင် အိုမင်းနေတာကို အာလုံက သူ့ဘက်ကနေ ကာကွယ်ပေးနေတုန်းပဲ။

ပဋိပက္ခတစ်ခု ဖြစ်တော့မည်ကို မြင်သောအခါ ဖလန်ဒါက အမြန်ပင် ကြားဝင်စေ့စပ်ပေးလိုက်သည်။

"စီနီယာ... ကျေးဇူးပြုပြီး စိတ်အေးအေးထားပါ။ အာလုံက စိတ်ပူလို့ ပြောလိုက်တာပါ။ အခု အရေးကြီးဆုံးက ယွီဂိုဏ်းချုပ်ကို ကယ်တင်ဖို့... ပြန်လည်ရွေးထုတ်နိုင်ဖို့ နည်းလမ်းရှာဖို့ပါ။ ဒါဟာ ဘယ်သူမှားတယ် ဘယ်သူမှန်တယ်ဆိုတာကို ငြင်းခုံနေရမယ့် အချိန်မဟုတ်ပါဘူး"

ဖလန်ဒါသည် အစက ယွီယွမ်ကျန့်ကို ကယ်တင်ရန်အကြံပြုချင်သော်လည်း သူတို့ဘက်နှင့် တာလီတော်ဝင်အကယ်ဒမီ၏ အင်အားကွာခြားချက်ကို ထည့်သွင်းစဉ်းစားလိုက်သောအခါ "ကယ်တင်ခြင်း" ဆိုသော စကားလုံးမှာ အနည်းငယ် ရဲတင်းလွန်းသလို ဖြစ်နေသည်။

ယွီယွမ်ကျန့်ကို ပြန်လည်ရွေးထုတ်နိုင်ခြင်း ရှိ မရှိ ဆိုသည်မှာပင် တာလီတော်ဝင်အကယ်ဒမီ၏ စိတ်သဘောထားအပေါ်တွင်သာ မူတည်နေပေသည်။

ယွီလော့မြန်သည် ယွီရှောင်ကန်းကို ဒေါသတကြီး စိုက်ကြည့်လိုက်ပြီးနောက် သူမ၏အကြည့်ကို ဖလန်ဒါထံသို့ လွှဲလိုက်သည်။

ဖလန်ဒါ ယွီရှောင်ကန်းနှင့် လျူအာလုံတို့သည် တစ်ချိန်က ရွှေရောင်တြိဂံအဖွဲ့ဝင်များ ဖြစ်ခဲ့ကြသည်ကို သူ သိသော်လည်း ဖလန်ဒါကိုမူ သူ ဘယ်တုန်းကမှ ဂရုမစိုက်ခဲ့ဖူးပေ။

အခု ပြန်စဉ်းစားကြည့်လျှင် ဖလန်ဒါတွင် အားကိုးရမည့် နောက်ခံအာဏာ မရှိသော်လည်း အကယ်၍ လျူအာလုံသာ ထိုစဉ်က ဖလန်ဒါကို ရွေးချယ်ခဲ့မည်ဆိုလျှင် အခုလို ခေါင်းကိုက်စရာ ကိစ္စမျိုး ကြုံတွေ့ရမည်မဟုတ်ပေ။

"မင်းက တာလီတော်ဝင်အကယ်ဒမီအကြောင်းကို ငါ့ထက် ပိုသိတယ်နော်။ ပြောစမ်းပါဦး ငါ့အစ်ကိုကို ကယ်ဖို့ ငါတို့ ဘာလုပ်နိုင်မလဲ"

ယွီရှောင်ကန်းက အသုံးမကျသလို လျူအာလုံကလည်း အနည်းငယ် ထိလိုက်ရုံနှင့် ပေါက်ကွဲတတ်သော ယမ်းအိုးတစ်လုံး ဖြစ်နေမှန်း ယွီလော့မြန် သိလိုက်သည်; အမှန်တကယ် အကြံဉာဏ်ပေးနိုင်မည့်သူမှာ ဖလန်ဒါ တစ်ဦးတည်းသာ ရှိသည်။

"ဒါကတော့..."

ဖလန်ဒါတွင်လည်း ကောင်းမွန်သော ဖြေရှင်းနည်း မရှိပေ။

ငွေကြေးဓနနှင့် လူအင်အား အပိုင်းတွင် ကြည့်လျှင် သူတို့၌ တာလီတော်ဝင်အကယ်ဒမီနှင့် ယှဉ်နိုင်သော အရာ တစ်ခုမှ မရှိပုံရပေ။

...

"အရှင်မင်းကြီး... ဟိုမှာ ယွီယွမ်ကျန့်ရဲ့ ညီနဲ့ သားပဲ မဟုတ်လား သူတို့ကြည့်ရတာ ယွီယွမ်ကျန့်ကို ကယ်ဖို့ ရည်ရွယ်ချက်ရှိပုံ မရဘူးနော်"

လင်းချီသည် အကယ်ဒမီထဲမှ ထွက်မလာခဲ့ဘဲ အကယ်ဒမီတံတိုင်းအတွင်းရှိ မြင့်မားသော အဆောက်အဦးတစ်ခုပေါ်သို့ တက်ကာ ပြင်ပလောကကို အပေါ်စီးမှ ငုံ့ကြည့်နေသည်။

ချင်းရန်ရွှယ်သည် သူ၏နောက်ကွယ်မှ လိုက်ပါလာပြီး သူ၏နှုတ်ခမ်းဖျားတွင် အပြုံးတစ်ခု ရှိနေသည်။

ဝိညာဉ်နန်းတော်၏ ယခင်အစီအစဉ်အရ ထိပ်သီးဂိုဏ်းကြီး ၃ ဂိုဏ်းသည် တုန့်လော့တိုက်ကြီးကို စည်းလုံးညီညွတ်အောင် လုပ်ဆောင်ရာတွင် အခက်ခဲဆုံးသော အတားအဆီး ၃ ခု ဖြစ်သည်။

အခု တာလီတော်ဝင်အကယ်ဒမီသည် ထိပ်သီးဂိုဏ်းကြီး ၃ ဂိုဏ်းဝင်ဖြစ်သော အပြာရောင်လျှပ်စီး နဂါးဘုရင်မျိုးနွယ်စုကို ရူးသွပ်လုနီးပါး ဖြစ်အောင် အလွယ်တကူ နှိပ်စက်နေနိုင်သည်။ ဝိညာဉ်နန်းတော်သည်လည်း အင်အားနည်းသည်မဟုတ်သော်လည်း ကာလရှည်ကြာစွာ စီစဉ်ပြီးသည့်တိုင်အောင် ဘာမှပင် မစတင်နိုင်သေးပေ။

လင်းချီသည် ပို၍ ဝေးကွာသော နေရာတစ်ခုသို့ လှမ်းကြည့်လိုက်သည်။

"တကယ့် ပွဲကောင်းက အခုမှ စတာ"

"ဟင် အရှင်မင်းကြီး... ပွဲကောင်း ဆိုတာ ဘာကို ဆိုလိုတာလဲ..."

မကြာမီမှာပင် ရတနာခုနစ်ပါး မှန်ကူကွက်ဂိုဏ်းမှ နင်ဖုန်းကျစ်နှင့် ဓားတုန့်လော့တို့ ရောက်ရှိလာသည်ကို ချင်းရန်ရွှယ် သိလိုက်ရသည်။

ယွီယွမ်ကျန့်၏ ဒုက္ခအခြေအနေကို သူတို့ထံသို့ အပြေးအလွှား ပြန်လာသော ချန်ဖုန်းနှင့် နင်ရုန်ရုန် တို့ထံမှ သိလိုက်ရသလို နင်ရုန်ရုန်၏ သူရဲကောင်းဆန်သော လုပ်ရပ်ကိုလည်း သိလိုက်ရသည်။ ထို့ကြောင့် သူတို့သည် အခြေအနေကို ကိုယ်တိုင်လာရောက် ကြည့်ရှုရန် ချက်ချင်း ဆုံးဖြတ်ခဲ့ကြခြင်းဖြစ်သည်။

လင်ချင်း၏ ဒဏ်ရာပေးခြင်းကို ခံရပြီးနောက်ပိုင်း ၎င်းတို့ ကောင်းကင်မြို့တော်သို့ ပထမဆုံးအကြိမ် လာရောက်ခြင်း ဖြစ်သည်။

သူတို့ ကိုယ်တိုင် မလာရောက်ဖြစ်သော်လည်း ရတနာခုနစ်ပါး မှန်ကူကွက်ဂိုဏ်းသည် ကောင်းကင်မြို့တော်၏ အခြေအနေကို အခြေခံအားဖြင့် နားလည်ထားပြီးသားဖြစ်သည်။

ဘယ်ကမှန်းမသိ ပေါ်လာသော တာလီတော်ဝင်အကယ်ဒမီသည် ကာလရှည်ကြာစွာ လူမြင်ကွင်းမှ ပျောက်ကွယ်နေခဲ့သော လင်ညီအစ်ကိုများ၏ နောက်ခံဖြစ်ကြောင်း နင်ဖုန်းကျစ် အကြမ်းဖျင်း ခန့်မှန်းမိလိုက်သည်။

ဤမျှ အစွမ်းထက်သော အင်အားစုတစ်ခုသည် ကောင်းကင်မြို့တော်တွင် အခြေစိုက်လိုက်ပြီး အပြာရောင်လျှပ်စီး နဂါးဘုရင်မျိုးနွယ်စု၏ မျိုးနွယ်စုခေါင်းဆောင်ကိုပင် သူ၏ကျွန်အဖြစ် ဖမ်းဆီးထားသည်။ ဤကဲ့သို့သော ဗိုလ်ကျစိုးမိုးလွန်းသည့် ချဉ်းကပ်ပုံက နင်ဖုန်းကျစ်ကို ကျောချမ်းသွားစေသည်။

ရတနာခုနစ်ပါး မှန်ကူကွက်ဂိုဏ်းသည် အပြာရောင်လျှပ်စီး နဂါးဘုရင်မျိုးနွယ်စုထက် ပို၍ အင်အားတောင့်တင်းသော်လည်း ပုဆိန်ကိုင်ထားသော ထိုလူကို တွေးမိသောအခါ နင်ဖုန်းကျစ်တွင် မည်သည့် ယုံကြည်ချက်မျှ မရှိတော့ပေ။

သူတို့နှင့် ရန်သူဖြစ်ရန်မှာ မသင့်တော်ပေ ထို့ကြောင့် သူတို့နှင့် မိတ်ဆွေဖြစ်အောင် ကြိုးစားကြည့်ရန်သာ ရှိတော့သည်။

မိတ်ဆွေ မဖြစ်နိုင်ရင်တောင်မှ အနည်းဆုံးတော့ ရန်သူအဖြစ် အသတ်မှတ်မခံရဘဲ ယွီယွမ်ကျန့်လိုမျိုး အဆုံးမသတ်ဖို့ လိုသည်။

"သူလား"

နင်ဖုန်းကျစ်နှင့် ဓားတုန့်လော့တို့ကို မြင်လိုက်ရသောအခါ ယွီလော့မြန်၏ မျက်နှာသည် ပို၍ပင် ပျက်သွားတော့သည်။

ထိပ်သီးဂိုဏ်းကြီး ၃ ဂိုဏ်းစလုံးသည် ဝိညာဉ်နန်းတော်၏ ကြီးမားလှသော ဖိအားများကို ရင်ဆိုင်နေရသော်လည်း ၎င်းမှာ ဂိုဏ်း ၃ ခုလုံးသည် တစ်ဦးနှင့်တစ်ဦး အပြန်အလှန် ထောက်ခံနေကြသည် သို့မဟုတ် ဆက်ဆံရေး ကောင်းမွန်နေကြသည်ဟု မဆိုလိုပေ။

ဆန့်ကျင်ဘက်အနေနှင့် သမိုင်းတစ်လျှောက်တွင် ထိပ်သီးဂိုဏ်းကြီး ၃ ဂိုဏ်းကြား၌ သဘောထားကွဲလွဲမှုများစွာ ရှိခဲ့သည်။

ယခုအချိန်သည် အပြာရောင်လျှပ်စီး နဂါးဘုရင်မျိုးနွယ်စုအတွက် အရှက်ရဆုံးသော အချိန်ဖြစ်သည်။ ရတနာခုနစ်ပါး မှန်ကူကွက်ဂိုဏ်းမှ လူများက သူတို့ကို လာရောက် လှောင်ပြောင်ခြင်းမှာ ဒဏ်ရာပေါ်ကို ဆားနှင့် ပက်လိုက်သကဲ့သို့ပင်။

နင်ရုန်ရုန်၏ သူရဲကောင်းဆန်သော လုပ်ရပ်ကိုသာ ယွီလော့မြန် သိခဲ့မည်ဆိုလျှင် သူသည် ပို၍ပင် ဒေါသထွက်နေပေလိမ့်မည်။

ယွီလော့မြန် မသိသော်လည်း ယွီယွမ်ကျန့်မှာမူ နင်ရုန်ရုန်၏ အော်ဟစ်သံကို အလွန်ရှင်းလင်းစွာ မှတ်မိနေသည်။

အကယ်၍ ထိုကလေးစုတ်သာ မရှိလျှင် သူသည် လူအမှတ်မိမခံရဘဲ နောက်ထပ် အချိန်အနည်းငယ်လောက်အထိ ငြိမ်ငြိမ်လေး နေနိုင်ဦးမည်ဖြစ်သည်။

နင်ဖုန်းကျစ်က ယဉ်ကျေးစွာ ပြောလိုက်သည်  "ကျေးဇူးပြုပြီး အထဲကို သတင်းပို့ပေးပါဦး။ ရတနာခုနစ်ပါး မှန်ကူကွက်ဂိုဏ်းမှ နင်ဖုန်းကျစ် တွေ့ဆုံခွင့် တောင်းခံပါတယ်"

ခေါင်းငုံ့ထားပြီး လူမြင်မခံဘဲ နေခဲ့သော ယွီယွမ်ကျန့်သည် ထိုအသံကို ကြားလိုက်ရသောအခါ ရုတ်တရက် ခေါင်းမော့လာသည်။

"နင်ဖုန်းကျစ် မင်း တကယ်ပဲ လာတာကိုး။ မင်းတို့ ရတနာခုနစ်ပါး မှန်ကူကွက်ဂိုဏ်းဟာ နောက်ဆုံးတော့ ငါ့ရဲ့ အပြာရောင်လျှပ်စီး နဂါးဘုရင်မျိုးနွယ်စု အရှက်ရတာကို ကြည့်ရမယ့်နေ့ကို စောင့်ခဲ့ကြတာ မဟုတ်လား"

ယွီယွမ်ကျန့်၏ မျက်လုံးများထဲတွင် သွေးဆူနေသကဲ့သို့ နီရဲနေသည်။

နင်ရုန်ရုန်၏ အော်ဟစ်သံကြောင့် တာလီတော်ဝင်အကယ်ဒမီအပေါ်ထားရှိသော သူ၏ဒေါသများသည် ရတနာခုနစ်ပါး မှန်ကူကွက်ဂိုဏ်းဘက်သို့ များစွာ ကူးပြောင်းသွားခဲ့သည်။

သူ၏ ကံဆိုးမှုမှာ တာလီတော်ဝင်အကယ်ဒမီကြောင့် ဖြစ်ခဲ့ရသော်လည်း တာလီတော်ဝင်အကယ်ဒမီ၏ အင်အားကြောင့် မျှော်လင့်ချက်မဲ့နေသော ယွီယွမ်ကျန့်သည် မည်သူ့ကို အပြစ်တင်နိုင်ပါဦးမည်နည်း

နှိုင်းယှဉ်ကြည့်လျှင် ရင်းနှီးပြီးသားဖြစ်သော ရတနာခုနစ်ပါး မှန်ကူကွက်ဂိုဏ်းသည် အပြာရောင်လျှပ်စီး နဂါးဘုရင်မျိုးနွယ်စုထက် ပို၍ အင်အားတောင့်တင်းသော်လည်း သူ့ကို မျှော်လင့်ချက်မဲ့သွားစေလောက်အောင်တော့ အင်အားမကြီးလှပေ။

"ယွီ... ယွီဂိုဏ်းချုပ် မတွေ့ရတာ ကြာပြီနော်"

နင်ဖုန်းကျစ်၏ ခိုင်မာလှသော စိတ်ဓာတ်နှင့်တောင်မှ ယွီယွမ်ကျန့်၏ ယိုင်နဲ့နေသော အခြေအနေကို မြင်လိုက်ရသောအခါ သူ၏ စိတ်ခံစားချက်များကို မနည်းထိန်းချုပ်လိုက်ရသည်။

နင်ရုန်ရုန်နှင့် အခြားသူများထံမှ ဤအကြောင်းကို ကြားသိခဲ့ရသော်လည်း ကြားသိရခြင်းမှာ မိမိမျက်စိနှင့် ကိုယ်တိုင် မြင်တွေ့ရခြင်းနှင့် မည်သို့မျှ မနှိုင်းယှဉ်နိုင်ပေ။

ဒါဟာ အရင်က အစွမ်းထက်ပြီး ဗိုလ်ကျစိုးမိုးခဲ့တဲ့ ယွီဂိုဏ်းချုပ် တကယ်ပဲ ဟုတ်ရဲ့လား

"တောက် နင်ဖုန်းကျစ် ဟန်ဆောင်မနေနဲ့တော့ မင်းသာ မရှိရင် ငါဟာ ဘယ်လိုလုပ်ပြီး အခုလို အရှက်ရစရာမျိုးတွေ ကြုံတွေ့ရပါ့မလဲ"