အခန်း (၁) ဝိညာဉ်တော်ကျေးရွာနှင့် သိုင်းဝိညာဉ်နိုးထခြင်း

ထျန်းတူအင်ပါယာ ဝိညာဉ်တော်ကျေးရွာ။

နှစ်စဉ်ပြုလုပ်မြဲဖြစ်သော ဝိညာဉ်နိုးထခြင်းအခမ်းအနား ကျင်းပနေပြီး မျက်မမြင်တုန့်လော့တစ်ဦးဖြစ်သူ ဆူးယွင်ထောင်သည် ရွာရှိကျောင်းနေအရွယ် ကလေးငယ်တစ်ဦးချင်းစီ၏ ဝိညာဉ်ကို နိုးထပေးနေသည်။

ကလေးများထဲတွင် အဝတ်အစားနွမ်းပါးသော်လည်း ထူးခြားစွာချောမောပြီး အခြားသူများထက် ပို၍တည်ငြိမ်ပုံရသော ကောင်လေးတစ်ယောက် ပါဝင်နေသည်။

"မလောပါနဲ့ဦး ရှောင်ဆန်း သူ့အလှည့်ပြီးရင် မြေးလေးအလှည့် ရောက်မှာပါ" ရွာလူကြီးဂျက်က ပြုံးလျက် ထိုကလေးကို လှမ်းပြောလိုက်သည်။

လင်းချီသည် မိမိစိတ်လှုပ်ရှားနေသည်ကို ရွာလူကြီးက မည်သို့သိသွားသနည်းဟု နားမလည်သော်လည်း သူသည် ရွာလူကြီးကို ပြုံး၍ ခေါင်းညိတ်ပြလိုက်သည်။

လင်းချီသည် တုန့်လော့တိုက်ကြီးသို့ ကူး​ပြောင်း ရောက်ရှိလာခဲ့သည်မှာ ခြောက်နှစ်ရှိပြီ ဖြစ်သည်။ သူ၏မိဘများမှာ ငယ်စဉ်ကပင် ကွယ်လွန်သွားခဲ့ကြရာ ရွာလူကြီးဂျက်က နှစ်ပေါင်းများစွာ ကောင်းမွန်စွာ စောင့်ရှောက်ခဲ့သောကြောင့် လင်းချီမှာ ရွာလူကြီးနှင့် အလွန်ရင်းနှီးသည်။

နောက်ဆုံးတွင်တော့ နောင်တစ်ချိန်၌ နတ်ဘုရားဘုရင် ဖြစ်လာမည့်သူ နှစ်ပေါင်းထောင်ချီ စီမံကိန်း၏နောက်ကွယ်မှ ကြိုးကိုင်သူ ထန်ဆန်း၏ ဝိညာဉ်နိုးထခြင်း စတင်လေပြီ။

လင်းချီသည်လည်း မိမိ မည်သို့သောဝိညာဉ်မျိုး နိုးထလာမည်ကို သိချင်နေမိသည်။ အမှိုက်သိုင်းဝိညာဉ်တော့ ဖြစ်မည်မထင်။ သို့သော် သိုင်းဝိညာဉ်အလွန်အမင်း အစွမ်းထက်နေခြင်းမှာလည်း ကောင်းလှသည်တော့ မဟုတ်ပေ အကြောင်းမှာ ကျေးရွာထဲ၌ ထန်ဟောင်ရှိနေသောကြောင့် ဖြစ်သည်။

လင်းချီသာ ပါရမီအလွန်ကောင်းနေသည်ကို ထန်ဟောင်က မြင်လျှင် နောင်တစ်ချိန်၌ ထန်ဆန်းအတွက် ခြိမ်းခြောက်မှု ဖြစ်လာနိုင်သည်ဟု ယူဆကာ တစ်ခုခု လုပ်ဆောင်သွားနိုင်သည်ကို ခန့်မှန်းရခက်သည်။

လင်းချီသည် လွန်ခဲ့သောနှစ်များအတွင်း ထန်ဆန်းနှင့် ရင်းနှီးအောင် မည်သည့်အခါမျှ မကြိုးစားခဲ့ပေ။

"သူ့ကို တစ်ခုခု မတော်တဆ မြင်တွေ့သွားလျှင် မည်သို့ဖြစ်မည်နည်း ထန်ဂိုဏ်း သိုင်းပညာရှင်တွေနဲ့ ပုန်းကွယ်လက်နက်တွေကို ပိုင်ဆိုင်ထားတဲ့ ထန်နတ်ဘုရားဘုရင်က ငါ့ကို သေတွင်းထဲ ခြေစုံပစ်ဝင်နေတာပဲလို့ ပြောပြီး အဆုံးစီရင်သွားနိုင်တယ်"

ထန်ဆန်းသည် သူ၏ဆရာဖြစ်သူ ယွီရှောင်ကန်းအပေါ်၌ပင် သတ်ဖြတ်လိုသော စိတ်ထားဖူးရာ လင်းချီ အနေဖြင့် ထန်ဆန်းက သူ့ကို သတ် မသတ်ဆိုသည်ကို မလောင်းကြေးမထပ်ရဲပေ။

"ဘုရားရေ ဒါမွေးရာပါ အမြင့်ဆုံးဝိညာဉ်စွမ်းအားပဲ" ဆူးယွင်ထောင်က အံ့အားသင့်စွာ အာမေဍိတ်သံ ထွက်ပေါ်လာသည်။

ထန်ဆန်းနိုးထလာသော သိုင်းဝိညာဉ်မှာ ငွေပြာမြက်ဖြစ်သော်လည်း ၎င်းတွင် မွေးရာပါ အမြင့်ဆုံးဝိညာဉ်စွမ်းအား ပါဝင်နေသည်ကို တွေ့ရှိခဲ့ခြင်း ဖြစ်သည်။

ကလေးအားလုံးက ထန်ဆန်းကို အံ့သြစွာ ကြည့်နေကြသည်။ လင်းချီလည်း အံ့သြနေမိသော်လည်း သူ အံ့သြနေသည်မှာ သူ၏စိတ်ထဲတွင် ရုတ်တရက် ထွက်ပေါ်လာသော အသံကြောင့်ဖြစ်သည်။

{အစွမ်းထက်သော နောက်ခံအင်အားတစ်ခုကို ထောက်လှမ်းမိသည်။ နောက်ခံအင်အား နှိမ်နှင်းရေး စနစ်စတင် အသက်ဝင်ပါပြီ။}

"စနစ်လား"

လင်းချီသည် လွန်ခဲ့သောနှစ်များအတွင်း စနစ်ကို အကြိမ်ကြိမ် ခေါ်ယူခဲ့သော်လည်း မည်သည့်တုံ့ပြန်မှုမျှ မရရှိခဲ့သဖြင့် စနစ်ပိုင်ဆိုင်ရမည့် မျှော်လင့်ချက်ကို လက်လွှတ်ခဲ့ပြီးသား ဖြစ်သည်။

မထင်မှတ်ဘဲ ဤအချိန်ကျမှ စနစ်က အလိုအလျောက် စတင်လာခဲ့သည်။

"ဒါပေမဲ့ ဒီနောက်ခံအင်အား နှိမ်နှင်းရေးစနစ်ဆိုတာ ဘာကို ဆိုလိုတာလဲ"

{ဤစနစ်သည် ပိုင်ရှင်အတွက် အစွမ်းအထက်ဆုံးနှင့် အနက်ရှိုင်းဆုံး နောက်ခံအင်အားကို ဖန်တီးပေးရန် ရည်ရွယ်သည်။ နှိမ်နှင်းရမည့် ပစ်မှတ်တစ်ခုနှင့် ချိတ်ဆက်ပြီးနောက် ပြိုင်ဘက်က ပိုင်ရှင်ထက် သာလွန်သော နောက်ခံအင်အားကို ထုတ်ဖော်ပြသပါက ပိုင်ရှင်သည် ထိုပြိုင်ဘက်ကို နှိမ်နင်းရန် လုံလောက်သော နောက်ခံအင်အား တစ်ခုကို ဆုလာဘ်အဖြစ် အလိုအလျောက်ရရှိမည်ဖြစ်သည်။}

{အတိုချုပ်ပြောရလျှင် ဤစနစ်သည် ပိုင်ရှင်ထက် နောက်ခံအင်အား ပိုတောင့်တင်းသော မည်သည့်အရာကိုမျှ တည်ရှိခွင့်မပြုပါ။}

လင်းချီ ခေတ္တမျှ ကြောင်သွားသည်။ ဤစနစ်သည် သူ၏အစွမ်းကို တိုက်ရိုက်မြှင့်တင်ပေးခြင်း မဟုတ်ဟု ထင်ရသော်လည်း သူ၏နောက်ခံအင်အားကို မြှင့်တင်ပေးခြင်းက ပို၍အစွမ်းထက်သော အကျိုးသက်ရောက်မှု ရှိနိုင်ပြီး သွယ်ဝိုက်သောနည်းဖြင့် သူ့အစွမ်းကို တိုးတက်စေမည် ဖြစ်သည်။

{ချိတ်ဆက်ရန် သင့်တော်သော ပစ်မှတ်ကို ထောက်လှမ်းမိသည်။ ပိုင်ရှင် ယခုချက်ချင်း ချိတ်ဆက်လိုပါသလား}

"ရှောင်ချီ မင်းအလှည့် ရောက်ပြီ။" ရွာလူကြီးဂျက်က လင်းချီ၏ ပုခုံးကို ပုတ်ကာ ပြောလိုက်သည်။

ထန်ဆန်းသည် ဆူးယွင်ထောင်၏ ကမ်းလှမ်းချက်ကို ငြင်းပယ်ပြီးနောက် နောက်ကလေးတစ်ယောက်အတွက် နေရာဖယ်ပေးနေပြီ ဖြစ်သည်။

"ဟုတ်ကဲ့။"

လင်းချီသည် သူ့ထံသို့ လျှောက်လာသော ထန်ဆန်းကို ကြည့်လိုက်ရာ ထန်ဆန်း၏ ဦးခေါင်းအထက်တွင် "ချိတ်ဆက်နိုင်သည်" ဟူသော သင်္ကေတ ပေါ်လာသည်ကို သတိပြုမိလိုက်သည်။

"ချိတ်ဆက်လိုက်တော့" ဟု လင်းချီက တိုးတိုးလေး ရေရွတ်လိုက်သည်။

နောက်ခံအင်အားအပိုင်းတွင်မူ တုန့်လော့တိုက်ကြီးတစ်ခုလုံး၌ မည်သူက ထန်ဆန်းကို ယှဉ်နိုင်မည်နည်း။

သူသည် ဟောက်ထျန်းတုန့်လော့၏ သား ဟောက်ထျန်းဂိုဏ်း ဂိုဏ်းချုပ်၏တူ ဖြစ်နေခြင်းမှာပင် သူ၏ အစွမ်းထက်ဆုံး နောက်ခံမဟုတ်သေးပေ။

ထန်ဆန်းသည် ပင်လယ်နတ်ဘုရား၏ မျက်နှာသာပေးမှုကို ရရှိမည်ဖြစ်သလို တစ်ချိန်တည်းမှာပင် သတ်ဖြတ်ခြင်းနတ်ဘုရား၏ မျက်နှာသာပေးမှုကိုလည်း ရရှိဦးမည် ဖြစ်သည်။

စနစ်က ထန်ဆန်းတစ်ဦးတည်းကိုသာ နှိမ်နင်းရမည့် ပစ်မှတ်အဖြစ် ချိတ်ဆက်နိုင်လျှင်ပင် လင်းချီအတွက် တုန့်လော့တိုက်ကြီးကို စိုးမိုးရန် လုံလောက်နေပြီ ဖြစ်သည်။

"ဒီကို လာခဲ့" ဆူးယွင်ထောင်၏ လေသံမှာ အနည်းငယ် ပေါ့ပျက်ပျက် နိုင်လှသည်။

ထန်ဆန်း၏ ဝိညာဉ်နိုးထပြီးနောက် ဆူးယွင်ထောင်မှာ စိတ်ကုန်သလို ဖြစ်သွားပြီး သူ့မျက်စိထဲ ဝင်မည့် အခြားကလေးတစ်ယောက် ထပ်တွေ့ရန် မဖြစ်နိုင်တော့ဟု ယူဆနေသည်။

{ဒေါင် နှိမ်နှင်းမည့်ပစ်မှတ် ထန်ဆန်းနှင့် အောင်မြင်စွာ ချိတ်ဆက်ပြီးပါပြီ။}

{နှိမ်နင်းမည့်ပစ်မှတ် ထန်ဆန်းသည် ဝိညာဉ်နိုးထစဉ်အတွင်း ထူးခြားသောပါရမီကို ထုတ်ဖော်ပြသခဲ့သည်။ သူသည် အစွမ်းကုန် ဖုံးကွယ်ထားသော်လည်း အမြွှာဝိညာဉ်ပိုင်ဆိုင်ထားရာ လူသန်းပေါင်းများစွာတွင် တစ်ယောက်သာ ရှိသည့် ဖြစ်ရပ်မျိုးဖြစ်သည်။}

{နှိမ်နင်းမည့်ပစ်မှတ် ထန်ဆန်းတွင် လျှို့ဝှက်ဆန်းကြယ်သော နောက်ခံရှိပြီး အစွမ်းထက်သော သွေးမျိုးဆက်နှစ်ခုကို ပိုင်ဆိုင်ထားရာ ပိုင်ရှင်ထက် အဆပေါင်းများစွာ သာလွန်နေသည်။}

{နောက်ခံအင်အား နှိမ်နှင်းခြင်း စတင်အလုပ်လုပ်သည်။ ပိုင်ရှင်အား တုန့်လော့လောက၏စိတ်ဝိညာဉ်၏ မျက်နှာသာပေးမှုကို ဆုလာဘ်အဖြစ် ချီးမြှင့်လိုက်သည်}

ဘုရားရေ ထန်ဆန်းက အစွမ်းထက် သွေးမျိုးဆက်ကို ပိုင်ဆိုင်ထားသော်လည်း စနစ်က သူ့ကို ကမ္ဘာဦးစိတ်ဝိညာဉ်ရဲ့ မျက်နှာသာပေးမှုကို တိုက်ရိုက် ပေးအပ်လိုက်ခြင်း ဖြစ်သည်။

ထိုအချိန်တွင် လင်းချီ၏ ဝိညာဉ်နိုးထခြင်းလည်း ပြီးဆုံးသွားခဲ့သည်။

လင်းချီ၏ ညာဘက်လက်ထဲတွင် တုန့်လော့တိုက်ကြီးတစ်ခုလုံး၏ တောင်တန်းများ မြစ်ချောင်းများ ပထဝီဝင်အနေအထားနှင့် ထာဝရရတနာများ ထွင်းထုထားသည့်ပုံစံရှိသော ဆန်းကြယ်လှပသည့် ဓားရှည်တစ်လက် ပေါ်လာသည်။

"ဓားအမျိုးအစား သိုင်းဝိညာဉ်လား ကြည့်ရတာ အဆင်ပြေတယ် မွေးရာပါဝိညာဉ်စွမ်းအားလည်း ရှိနိုင်တယ်" ဆူးယွင်ထောင်အနည်းငယ် စိတ်ဝင်တစား ပြန်ဖြစ်လာသည်။

မလှမ်းမကမ်းတွင် ရွာလူကြီးဂျက်၏ မျက်နှာမှာ ရုတ်တရက် အပြုံးများဖြင့် ပြည့်နှက်သွားသည်။ သူသည် လင်းချီအတွက် အမှန်တကယ် ဝမ်းသာမိသည်။

ထန်ဆန်းမှာမူ မျက်မှောင် အနည်းငယ် ကြုတ်လိုက်မိသည်။ "ဒါက ဘယ်လို ဝိညာဉ်မျိုးလဲ ငါ့ရဲ့ ဖုံးကွယ်ထားတဲ့ နောက်ထပ်ဝိညာဉ်တစ်ခုကိုတောင် တုန်လှုပ်သွားစေတယ်"

ဘာကြောင့် ဤသို့ ခံစားရသည်ကို မသိသော်လည်း ထန်ဆန်းသည် လင်းချီအပေါ် အမြင်မကြည်လင်မှု စတင်ဖြစ်ပေါ်လာသည်။

နောက်တစ်ခဏတွင် လင်းချီထံမှ တောက်ပသော အလင်းတန်းတစ်ခု ရုတ်တရက် ထွက်ပေါ်လာရာ ထန်ဆန်းက မျက်လုံးကို အနည်းငယ် မှေးလိုက်ရသည်။

မျှော်လင့်ထားသည့်အတိုင်းပင် ဆူးယွင်ထောင်၏ အံ့သြတုန်လှုပ်နေသော အသံ ထွက်ပေါ်လာသည်။

"မွေးရာပါ အမြင့်ဆုံးဝိညာဉ်စွမ်းအား နောက်ထပ်တစ်ယောက်လား" ထန်ဆန်းသည်လည်း ၎င်းကို ပိုင်ဆိုင်သော်လည်း သူ၏သိုင်းဝိညာဉ်မှာ ငွေပြာမြက်ဖြစ်သောကြောင့် အလားအလာ သိပ်မရှိဟု ဆူးယွင်ထောင်က ယူဆခဲ့သည်။

သို့သော် လင်းချီ၏ ဝိညာဉ်မှာမူ အစွမ်းထက်သော တိုက်ခိုက်ရေးစွမ်းရည်ရှိသည့် ဓားဝိညာဉ်ဖြစ်သည်။ ကောင်းမွန်စွာ လေ့ကျင့်ပေးမည်ဆိုပါက လင်းချီသည် အနာဂတ်တွင် စီရင်ချက်တုန့်လော့တစ်ဦး ဖြစ်လာရန် အခွင့်အလမ်း အလွန်များသည်။

အဖိုးဂျက်ကတော့ ပျော်လွန်း၍ မျက်ရည်ပင် ဝဲနေသည်။ "လင်းချီကြောင့် ငါတို့ရွာလေး နာမည်ကြီးတော့မှာပဲ"

ရွာလူကြီးဂျက်၏ စကားကို ကြားသောအခါ ထန်ဆန်း၏ စိတ်ထဲတွင် ရန်လိုမုန်းထားမှုအထိ ဖြစ်ပေါ်လာသည်။

"ငါမွေးရာပါ အမြင့်ဆုံးဝိညာဉ်စွမ်းအား နိုးထလာတုန်းကကျတော့ ဒီအဖိုးကြီး ဘာလို့ ဒီလောက်အထိ စိတ်မလှုပ်ရှားတာလဲ" ထို့နောက် သူသည် လင်းချီကို အေးစက်စွာ ကြည့်လိုက်သည်။

"ဟမ် မွေးရာပါ အမြင့်ဆုံးဝိညာဉ်စွမ်းအား ဆိုတော့ ဘာဖြစ်လဲ ငါ့မှာလည်း ရှိတာပဲ။ ငါ့မှာ ကျင့်ကြံခြင်းကို မြန်ဆန်စေတဲ့ လျှို့ဝှက်ကောင်းကင်သိုင်းလည်း ရှိသလို ထန်ဂိုဏ်းရဲ့ ပုန်းကွယ်လက်နက်တွေလည်း ရှိသေးတယ်။ သူ ငါ့ကို ဘယ်တော့မှ ယှဉ်နိုင်မှာ မဟုတ်ဘူး"

ဤကဲ့သို့ တွေးလိုက်မိမှသာ ထန်ဆန်း၏ စိတ်ထဲတွင် အနည်းငယ် သက်သာရာရသွားတော့သည်။