အခန်း(၄၈)

[ရွှေရောင် ဆင်မြင်းဘုရင်]

အဆင့် - ကြယ်သုံးပွင့် (အဆင့် ၂၅)

အရည်အသွေး - ရွှေရောင်

ဝိသေသလက္ခဏာများ - ပေါက်ကွဲအားကောင်းသော ခွန်အားရှိသည်၊ ရေရှည်ခံနိုင်ရည် မြင့်မားသည်၊ တစ်ရက်လျှင် ကီလိုမီတာ ၁၅၀၀ အထိ ဖြတ်သန်းသွားလာနိုင်သည်။

အားနည်းချက် - ခံစစ်စွမ်းရည် ပျမ်းမျှအောက် ရောက်နေသည်။

မွေးရာပါ စွမ်းရည် - အရှိန်မြှင့်တင်ခြင်း (အရှိန်အပြည့်ဖြင့် ပြေးပါက သာမန်ဆင်မြင်းများထက် သုံးဆပိုမိုမြန်ဆန်သော အရှိန်သို့ ရောက်ရှိနိုင်သည်)

ကျွမ်းကျင်မှု - လျှပ်စီးအရှိန်ဖြင့် တိုက်ခိုက်ခြင်း (Lightning Charge) (မီတာ ၃၀၀ အကွာအဝေးအထိ ခေတ္တမျှ ၁၀ ဆ ပိုမိုမြန်သော အရှိန်ဖြင့် ပြေးနိုင်သည်။ အေးခဲချိန် (Cooldown) - မိနစ် ၃၀)

အလားအလာ - အဆင့် ဒီ (D Rank) (လက်ရှိအဆင့်ကို ကျော်ဖြတ်နိုင်ရန် ၂၅ ရာခိုင်နှုန်း အခွင့်အရေးရှိပြီး လက်ရှိအရည်အသွေးကို ကျော်ဖြတ်နိုင်ရန် ၂.၅ ရာခိုင်နှုန်း အခွင့်အရေးရှိသည်။ နောက်တစ်ကြိမ် အဆင့်မြှင့်တင်ပါက အခွင့်အရေး ထက်ဝက် လျော့နည်းသွားမည်။ ၂ ကြိမ်အထိ အဆင့်မြှင့်တင်နိုင်သည်)

ပြုစုပျိုးထောင်မှု လမ်းညွှန်ချက်များ

“ဒါက တကယ်ပဲ ကြယ်သုံးပွင့် ရွှေရောင်အရည်အသွေးရှိတဲ့ ဆင်မြင်းဘုရင် ဖြစ်နေတာပဲ”

တစ်ချက်မျှ လှမ်းကြည့်လိုက်ပြီးနောက် ကျန်းချဲ့သည် မျက်လုံးများ ပြူးကျယ်သွားကာ ဆွံ့အမိသွားတော့သည်။ ဤမျှ အသုံးမကျသော အချက်အလက်များသာရှိသည့် ဆင်မြင်းအုပ်စုကြားထဲတွင် ယခုကဲ့သို့ အစွမ်းထက်သော ဘုရင်တစ်ကောင် ရှိနေလိမ့်မည်ဟု မထင်ထားမိပေ။ မျှော်လင့်ထားသည့်အတိုင်းပင် ဆန်းပြားသားရဲ အုပ်စုကြီးများထဲတွင်မူ ထူးခြားဆန်းပြားသည့် သားရဲဆန်းကြီးများ ပေါ်ထွက်လာဖို့ ပို၍ လွယ်ကူလှပေသည်။

ကျန်းချဲ့သည် ခဏချင်းအတွင်းမှာပင် စိတ်လှုပ်ရှားသွားခဲ့သည်။ အကယ်၍ သူသာ ဤရွှေရောင် ဆင်မြင်းဘုရင်ကို သတ်ဖြတ်နိုင်ပြီး ကံကောင်းထောက်မစွာဖြင့် သားရဲကတ်ပြားတစ်ခု ရရှိခဲ့မည်ဆိုပါက ယင်းက စိတ်ကူးယဉ်ကြည့်ရုံနှင့်တင် တကယ့်ကို လှပလွန်းလှသည့် မြင်ကွင်းတစ်ခု ဖြစ်ပေလိမ့်မည်။

သို့သော် ချက်ချင်းဆိုသလိုပင် ကျန်းချဲ့၏ မျက်နှာအမူအရာက စိတ်ပျက်အားလျော့မှုအဖြစ် ပြောင်းလဲသွားသည်။

မဖြစ်နိုင်တာပဲ...

သူ့အနေဖြင့် ဤရွှေရောင် ဆင်မြင်းဘုရင်ကို သတ်ဖြတ်နိုင်မလားဆိုသည့် ကိစ္စကို ထားလိုက်ဦးတော့၊ ကံကောင်း၍ သတ်ဖြတ်နိုင်ခဲ့လျှင်ပင် သားရဲကတ်ပြား ထွက်လာလိမ့်မည်ဟု ရာနှုန်းပြည့် မသေချာချေ။ ထို့အပြင် ဤကောင်သည် စစ်တပ်ကြီးတစ်ခု၏ အလယ်တွင် ထိုင်နေသော စစ်သေနာပတိချုပ်ကဲ့သို့ အနည်းဆုံး သာမန်ဆင်မြင်းကောင်ရေ တစ်ထောင်ခန့်၏ ဝန်းရံခြင်းကို ခံထားရသည်။ သူက ၎င်း၏အနားသို့ မည်သို့ ချဉ်းကပ်နိုင်ပါမည်နည်း။

ထိုသို့ သိပ်သည်းစွာ စုဝေးနေသော သာမန်ဆင်မြင်းအုပ်ကြီးသည် သူ၏ထံမှ ရန်လိုသည့် အရိပ်အယောင် အနည်းငယ်မျှကို မြင်တွေ့လိုက်ရသည်နှင့် သူ့ထံသို့ အလုံးအရင်းဖြင့် နင်းခြေပြေးဝင်လာကြပေလိမ့်မည်။ သူ့တွင် သံမဏိခန္ဓာကိုယ် ရှိနေဦးတော့၊ ထိုရေတွက်၍မရနိုင်သော ခွာရာများအောက်တွင် ပြားချပ်သွားရမည်သာ ဖြစ်သည်။ ယခုကဲ့သို့ အခြေအနေမျိုးတွင် အသံလှိုင်းတိုက်ခိုက်မှုကိုလည်း အသုံးပြု၍ မရနိုင်ပေ။ မည်သို့ပင်ဆိုစေ သန္ဓေပြောင်း ငါးပူတင်းဓားမြှောင်၏ ထိရောက်သော တိုက်ခိုက်မှု အကွာအဝေးမှာ ကန့်သတ်ချက်ရှိသည်။ ကောင်ရေတစ်ထောင်နီးပါးကို အသံလှိုင်းတိုက်ခိုက်မှုအတွင်း အမိအရ ဖမ်းဆွဲနိုင်ရန်မှာ မဖြစ်နိုင်ချေ။

“ဘယ်လိုလုပ်ရမလဲ၊ ဘယ်လိုလုပ်ရမလဲ။ ဒီလောက် ကောင်းမွန်တဲ့ စီးတော်ယာဉ်အမျိုးအစား သားရဲကို ငါ တကယ်ပဲ ဒီအတိုင်း လက်လွှတ်မခံနိုင်ဘူး”

ကျန်းချဲ့သည် စိတ်ပျက်လက်ပျက်ဖြစ်လွန်းသဖြင့် မိမိ၏ဆံပင်ကိုပင် ဆွဲဖွမိတော့မတတ် ဖြစ်သွားရသည်။ သူသည် ဖြစ်နိုင်ချေရှိသော ဖြေရှင်းနည်းတစ်ခုကို စဉ်းစားရန်အတွက် သူ၏ဦးနှောက်ကို အစွမ်းကုန် အလုပ်ပေးလိုက်သည်။ အချိန်အတော်ကြာအောင် စဉ်းစားပြီးနောက် သူ၏မျက်လုံးများက ရုတ်တရက် ဝင်းလက်သွားကာ ရေရွတ်လိုက်သည်။

“ဖြစ်နိုင်တာက... ငါ ဒီနည်းလမ်းကို စမ်းကြည့်လို့ရမလား”

မိမိ၏ စိတ်ကူးက ဖြစ်နိုင် မဖြစ်နိုင်ကို အတည်ပြုရန်အတွက် ကျန်းချဲ့သည် သူ၏ စိတ်ဝိဉ်ာဉ်ပင်လယ်ထဲတွင် အာရုံစိုက်လိုက်ပြီး ကောင်းကင်ယံထက်တွင် တိတ်တဆိတ် ဝဲပျံနေသော ခုနစ်ရောင်ခြယ် သလင်းကျောက်တုံးကြီးဆီသို့ စိတ်အာရုံကို ပို့လွှတ်ကာ ၎င်းကို အပြင်သို့ ထုတ်ယူရန် ကြိုးစားလိုက်သည်။

မှန်ပါသည်။ ကျန်းချဲ့၏ စိတ်ကူးမှာ ခုနစ်ရောင်ခြယ် သလင်းကျောက်တုံးကို အပြင်သို့ ထုတ်ယူကာ ဆန်းပြားသားရဲများကို ဆွဲဆောင်နိုင်သည့် ၎င်း၏စွမ်းရည်ကို အသုံးပြု၍ ရွှေရောင် ဆင်မြင်းဘုရင်ကို မြှူဆွယ်ရန် ဖြစ်သည်။ ထိုခုနစ်ရောင်ခြယ် သလင်းကျောက်တုံးကို ကမ္ဘာပေါ်တွင် ပထမဆုံးအကြိမ် ထုတ်ဖော်ပြသခဲ့စဉ်ကပင် ခန့်မှန်းရခက်လောက်အောင် အစွမ်းထက်သော မှင်ကဲ့သို့ မည်းနက်သည့် ပျံသန်းနိုင်သော သားရဲကြီးကိုပင် ရှာဖွေတွေ့ရှိအောင် ဆွဲဆောင်နိုင်ခဲ့သည်။ သို့ဖြစ်ရာ ဤသေးနုပ်လှသော ရွှေရောင် ဆင်မြင်းဘုရင်ကို ဆွဲဆောင်ရန်အတွက်တော့ ဘာပြဿနာမျှ ရှိလိမ့်မည်မဟုတ်ပေ။

သို့သော်လည်း ကျန်းချဲ့သည် သူ၏ စိတ်ဝိဉ်ာဉ်ပင်လယ်ထဲရှိ ခုနစ်ရောင်ခြယ် သလင်းကျောက်တုံးကြီးမှာ မလှုပ်မယှက်ဘဲ တိတ်တဆိတ်သာ ရှိနေဆဲဖြစ်ကြောင်း ဝမ်းနည်းဖွယ် တွေ့ရှိလိုက်ရသည်။ သူ မည်မျှပင် ကြိုးစားပါစေ၊ သလင်းကျောက်တုံးက ဘာတုံ့ပြန်မှုမျှ မရှိချေ။

“တောက်... မင်းက ဒီမှာ အခြေချပြီးကတည်းက ထွက်သွားဖို့ စိတ်ကူးမရှိတော့ဘူးပေါ့ ဟုတ်လား”

ကျန်းချဲ့သည် လွန်စွာ စိတ်ပျက်သွားသဖြင့် မျက်လုံးပင် စွေသွားမတတ် ဖြစ်သွားရသည်။ ဤအရာသည် သူ၏ စိတ်ဝိဉ်ာဉ်ပင်လယ်ထဲသို့ ရုတ်တရက် ဝင်ရောက်လာခဲ့ပြီး ယခုအခါတွင် သူ၏အမိန့်ကိုပင် နာခံခြင်းမရှိတော့ချေ။ တကယ့်ကို ကျိုးကြောင်းဆင်ခြင်မှုမရှိတဲ့ အိမ်ငှားတစ်ယောက်ပါပဲ။

ယခုမူ ထိုရွှေရောင် ဆင်မြင်းဘုရင်ကို အမဲလိုက်ရန် လုံးဝ မဖြစ်နိုင်တော့ချေ။ ကျန်းချဲ့သည် သက်ပြင်းတစ်ချက်ချကာ ခေါင်းငိုက်စိုက်ကျသွားတော့သည်။ သူသည် အမြန်ဆုံး အဆင့် ၃ သားရဲထိန်း ဖြစ်လာစေရန်အတွက် အမဲလိုက်ဖို့ အုပ်စုငယ်လေးတစ်ခုကို ရှာဖွေရန် မြက်ခင်းပြင်ကြီး၏ အနက်ပိုင်းသို့ ဆက်လက်သွားရောက်ရန်သာ ဆုံးဖြတ်လိုက်သည်။ ဤကဲ့သို့ လက်တွေ့မကျသော စိတ်ကူးများကို တကယ်ပဲ စွန့်လွှတ်လိုက်ရတော့မည်။

ရုတ်တရက်ပင် သူ၏ စိတ်ဝိဉ်ာဉ်ပင်လယ်ထဲရှိ ခုနစ်ရောင်ခြယ် သလင်းကျောက်တုံးကြီးသည် ခေတ္တမျှ တုန်ခါသွားပုံရသည်။ ခုနစ်ရောင်ခြယ် မြူခိုးများမှ ပြောင်းလဲသွားသော စွမ်းအင်လှိုင်းတစ်ခုသည် မမြင်နိုင်သော လမ်းကြောင်းတစ်ခုကို ဖွင့်လှစ်လိုက်ပြီး ရွှေရောင် ဆင်မြင်းဘုရင်ထံသို့ သွယ်တန်းသွားခဲ့သည်။

ကျန်းချဲ့သည် လုံးဝကို ဆွံ့အသွားရသည်။

ဒီအရာမှာ ဒီလိုလုပ်ဆောင်ချက်မျိုး ရှိနေသေးတာလား

ဒါဆို ဒါက ခုနစ်ရောင်ခြယ် သလင်းကျောက်တုံးရဲ့ စွမ်းရည်ကို မှန်ကန်စွာ အသုံးပြုတဲ့ နည်းလမ်းပေါ့။

နောက်တစ်စက္ကန့်တွင် သာမန်ဆင်မြင်းများထက် ခေါင်းတစ်လုံးခန့် ပိုမိုမြင့်မားကာ ကြက်သွေးရောင် ခန္ဓာကိုယ်ရှိသည့် ရွှေရောင် ဆင်မြင်းဘုရင်သည် အုပ်စုကြားထဲတွင် ရုတ်တရက် ရပ်တန့်သွားခဲ့ပြီး တစ်ခုခုကို ခံစားမိသွားဟန်ဖြင့် ကျန်းချဲ့ရှိရာ လမ်းကြောင်းဘက်သို့ ခေါင်းလှည့်၍ ကြည့်လိုက်သည်။

“ဒီဘက်ကိုလာ ခလေးလေး။ မင်း လိုချင်တဲ့အရာက ဒီမှာရှိတယ်။ ငါ့ကို လိမ္မာပါးနပ်စွာ အသတ်ခံပြီး သားရဲကတ်ပြားကို ပူဇော်သက္ကာအဖြစ် ပေးလိုက်စမ်းပါ။ အဲ့ဒီအခါကျရင် မင်း လိုချင်သလောက် ခုနစ်ရောင်ခြယ် မြူခိုးတွေကို စားသုံးနိုင်လိမ့်မယ်”

ကျန်းချဲ့၏ ခန္ဓာကိုယ်တစ်ခုလုံးသည် စိတ်လှုပ်ရှားမှုကြောင့် တုန်ရင်နေပြီး သူ၏မျက်လုံးများကို ဆင်မြင်းဘုရင်ထံသို့ စိုက်ကြည့်ထားသည်။

၎င်းသည် ရုတ်တရက်ပင် ကျယ်လောင်စွာ ဟီတွတ်လိုက်ရာ အရှေ့ဘက်ရှိ ဆင်မြင်းများသည် ၎င်းအတွက် လမ်းတစ်ခုကို ချက်ချင်း ဖယ်ပေးကြလေသည်။

“လာပြီ၊ လာပြီ”

ကျန်းချဲ့သည် သူ၏စိတ်ထဲရှိ စိတ်လှုပ်ရှားမှုများကို အတင်းအကြပ် ထိန်းချုပ်လိုက်ရပြီး အားရပါးရ ရယ်မောမိတော့မတတ် ဖြစ်သွားရသည်။ ဆင်မြင်းများက လမ်းဖယ်ပေးပြီးနောက် ရွှေရောင် ဆင်မြင်းဘုရင်သည် ၎င်း၏ခြေလှမ်းများကို ကျယ်ကျယ်လှမ်းလျက် ပျားရည်အိုးကို မြင်တွေ့လိုက်ရသည့် ဝက်ဝံတစ်ကောင်ကဲ့သို့ ကျန်းချဲ့ထံသို့ အရှိန်အဟုန်ဖြင့် ပြေးဝင်လာခဲ့သည်။

ရွှေရောင် ဆင်မြင်းဘုရင် နီးကပ်လာသည်နှင့်အမျှ ကျန်းချဲ့၏ စိတ်ထဲတွင် ရုတ်တရက် ခံစားချက်များ ရှုပ်ထွေးလာခဲ့သည်။

ငါ တကယ်ပဲ ဒီဆင်မြင်းဘုရင်ကို သတ်ရမလား

သားရဲကတ်ပြား ထွက်လာဖို့က မသေချာချေ။ အကယ်၍ နောက်ပိုင်းတွင် သူ ကံမကောင်းဘဲ ရွှေရောင် ဆင်မြင်းဘုရင်၏ သားရဲကတ်ပြားကို မရရှိခဲ့လျှင် မည်သို့လုပ်မည်နည်း။

မျက်စိတစ်မှိတ်အတွင်းမှာပင် ရွှေရောင် ဆင်မြင်းဘုရင်သည် ကျန်းချဲ့နှင့် မီတာငါးဆယ်ပင် မပြည့်တော့သော အကွာအဝေးသို့ ရောက်ရှိလာခဲ့ပြီ ဖြစ်သည်။ တောက်ပသော ရွှေရောင်ကတ်ပြားတစ်ခုသည် ကျန်းချဲ့၏ လက်ချောင်းကြားတွင် ပေါ်လာသည်။ ရွှေရောင် ဆင်မြင်းဘုရင် အနားသို့ ရောက်လာသည်နှင့် သူသည် ၎င်း၏ခေါင်းကို ဓားဖြင့် တစ်ချက်တည်း ဖြတ်ပစ်မည် ဖြစ်သည်။ သားရဲကတ်ပြား ထွက်လာသည်ဖြစ်စေ၊ မထွက်လာသည်ဖြစ်စေ ကျန်းချဲ့ကတော့ ဤကောင်ကို သတ်ပစ်ရန် ဆုံးဖြတ်လိုက်ပြီ ဖြစ်သည်။ သတ်ပစ်ပြီးမှသာ သားရဲကတ်ပြား ရရှိနိုင်မည့် အခွင့်အရေး ရှိပေလိမ့်မည်။ သို့မဟုတ်ပါက ဘာအခွင့်အရေးမျှ ရှိလာလိမ့်မည် မဟုတ်ပေ။

နှစ်ဦးကြား အကွာအဝေး ကျဉ်းမြောင်းလာသောအခါ ရွှေရောင် ဆင်မြင်းဘုရင်သည် ၎င်း၏အရှိန်ကို လျင်မြန်စွာ လျှော့ချလိုက်သည်။ နောက်ဆုံးတွင် ၎င်းသည် ကျန်းချဲ့၏ အရှေ့ဘက်သို့ ခြေလှမ်းအငယ်လေးများဖြင့် ချဉ်းကပ်လာခဲ့ပြီး ခုနစ်ရောင်ခြယ် သလင်းကျောက်တုံးမှ ထွက်ပေါ်လာသော စွမ်းအင်ကို လွန်စွာ သဘောကျနှစ်ခြိုက်နေဟန်ဖြင့် ကျန်းချဲ့ကို စူးစမ်းလိုသော မျက်လုံးများဖြင့် စိုက်ကြည့်နေသည်။ ၎င်း၏ ရိုးရှင်းသော ဦးနှောက်သည် အရှေ့ဘက်ရှိ ခြေနှစ်ချောင်းရှိသော သက်ရှိသည် အဘယ်ကြောင့် ယခုကဲ့သို့ စွဲမက်ဖွယ်ကောင်းသော စွမ်းအင်များကို ထုတ်လွှတ်နေရသလဲဆိုသည်ကို မည်သည့်အခါမျှ နားလည်နိုင်မည် မဟုတ်ချေ။ ယင်းက ၎င်းကို ပိုမိုအင်အားကြီးမားလာစေမည့် စွမ်းအင် ဖြစ်သည်မဟုတ်ပါလား။

ဆင်မြင်းများသည် မည်သို့ပင်ဆိုစေ တည်ငြိမ်အေးချမ်းသော သက်သက်လွတ်စားသည့် ဆန်းပြားသားရဲမျိုး ဖြစ်သည်။ အကယ်၍ အခြားသော အသားစားသတ္တဝါ ဆန်းပြားသားရဲများသာဆိုလျှင် ကျန်းချဲ့ကို တစ်လုပ်တည်းဖြင့် မျိုချပစ်လောက်ပြီ ဖြစ်သည်။ ထိုသို့ဖြင့် ၎င်းတို့သည် ထိုလျှို့ဝှက်ဆန်းကြယ်သော စွမ်းအင်ကို ရရှိရုံသာမက တစ်ပြိုင်နက်တည်းမှာပင် အရသာရှိသော အစားအစာတစ်နပ်ကိုလည်း မြည်းစမ်းခွင့် ရရှိသွားပေလိမ့်မည်။

ရွှေရောင် ဆင်မြင်းဘုရင်၏ ထံမှ ရန်လိုသည့် အရိပ်အယောင်များ လုံးဝမတွေ့ရသည်ကို မြင်သောအခါ ကျန်းချဲ့သည် ရုတ်တရက် စိတ်ပျော့သွားခဲ့သည်။ နောက်ဆုံးတွင် သူသည် သန္ဓေပြောင်း ငါးပူတင်းဓားမြှောင်ကို ဆင့်ခေါ်ခြင်း မပြုခဲ့ဘဲ အရှေ့ဘက်ရှိ ချစ်စရာကောင်းသော ဆန်းပြားသားရဲ၏ အသက်ကို ချန်လှပ်ပေးလိုက်သည်။

“ဆင်မြင်းရဲ့ နာမည်ထဲမှာ ‘မြင်း’ ဆိုတဲ့ စကားလုံးလည်း ပါတာပဲ... ငါ ၎င်းကို ယဉ်ပါးအောင် လုပ်လို့ရမလား မသိဘူး”

ရွှေရောင် ဆင်မြင်းဘုရင်သည် ၎င်း၏ မိန်းမောတွေဝေနေသော မျက်နှာကို ကျန်းချဲ့ထံသို့ ပိုမိုနီးကပ်စွာ ယူဆောင်လာချိန်မှာပင် ကျန်းချဲ့သည် ရုတ်တရက် ခြေလှမ်းများကို ရွှေ့လိုက်ပြီး ၎င်း၏ကျောပြင်ကို လက်ဖြင့်လှမ်းကိုင်ကာ ကိုယ်ကို မြှောက်ပင့်၍ ခွစီးလိုက်သည်။

သို့သော်လည်း နောက်တစ်စက္ကန့်တွင် ကျန်းချဲ့သည် မြက်ခင်းပြင်ပေါ်သို့ တည့်တည့်ကြီး ကျရောက်သွားခဲ့ပြီး မျက်နှာတစ်ခုလုံး ခွေးချေးပုံထဲသို့ ထိုးစိုက်မိသွားသည့်အလား ဖြစ်သွားရတော့သည်။

ကျန်းချဲ့၏ လက်များသည် ရွှေရောင် ဆင်မြင်းဘုရင်၏ ကျောပြင်ပေါ်သို့ ထိမိလိုက်သည့် အချိန်မှာပင် ထိုကြက်သွေးရောင် မြင်းထီးကြီးသည် မီတာအနည်းငယ်ခန့် ဝေးကွာသော နေရာသို့ တယ်လီပို့ (Teleport) လုပ်လိုက်သကဲ့သို့ ရုတ်တရက် ပျောက်ကွယ်သွားခဲ့ပြီး သူ့ကို သတိကြီးစွာဖြင့် လှမ်းကြည့်နေသည်။

“ဒါက တကယ်ပဲ လျှပ်စီးအရှိန်ဖြင့် တိုက်ခိုက်ခြင်း (Lightning Charge) ဆိုတဲ့ ကျွမ်းကျင်မှုလား။ လျှပ်စီးလို တကယ်ပဲ မြန်တာပဲ... တောက်... ငါ့ရဲ့ ချောမောလှတဲ့ မျက်နှာလေးတော့ ပြုတ်ကျလို့ ပျက်စီးတော့မလို့ပဲ”

ကျန်းချဲ့သည် ခါးသက်သော အပြုံးဖြင့် ပြန်လည်ထရပ်လိုက်ပြီး သူ၏ခန္ဓာကိုယ်ပေါ်ရှိ မြက်ပင်များနှင့် ဖုန်မှုန့်များကို ခါထုတ်ရင်း ရွှေရောင် ဆင်မြင်းဘုရင်ထံသို့ လှမ်းကြည့်လိုက်သည်။ ထိုကောင်၏ အကြည့်ထဲတွင် သူ့အပေါ် အထင်သေးသည့် အရိပ်အယောင် အနည်းငယ် ပါဝင်နေပုံရသည်။

“တောက်... မင်းက ငါ့ကို အထင်သေးရဲတယ်ပေါ့။ လာစမ်းပါ၊ ဒီနေ့ ငါ မင်းကို ယဉ်ပါးအောင် မလုပ်နိုင်ရင် နောက်နောင် ဘယ်ဆင်မြင်းတစ်ကောင်ကိုမှ မသတ်တော့ဘူးကွာ”

ကျန်းချဲ့သည် ဒေါသတကြီး ဖြစ်သွားပြီး ရွှေရောင် ဆင်မြင်းဘုရင်ကို ရန်စသော မျက်လုံးများဖြင့် စိုက်ကြည့်လိုက်တော့သည်။