အခန်း (၁၀)

လူသားစားမျှော့များ ကျက်စားရာ တောအုပ်အစပ်သို့ တစ်ခေါက်ပြန်ရောက်လာချိန်တွင် ကျန်းချဲ့၏ရင်ထဲ၌ အနည်းငယ် စိုးထိတ်မိသည်မှာ အမှန်ပင်ဖြစ်၏။ ဤသားရဲကောင်များ၏ အရေအတွက်က တကယ်ပင် များပြားလွန်းလှသည့်အပြင် ၎င်းတို့၏ ပုန်းလျှိုးကွယ်လျှိုး တိုက်ခိုက်တတ်သည့် သဘာဝကလည်း ရှိသေးသည်။ အကယ်၍ မတော်တဆတစ်ခုခုကြောင့် ထိုကောင်များထဲမှတစ်ကောင် မိမိကိုယ်ပေါ်သို့ တွယ်ကပ်မိသွားပါက မိနစ်ဝက်မပြည့်မီ အချိန်အတွင်းမှာပင် သွေးစုပ်ခံရပြီး အလောင်းခြောက်ဖြစ်သွားနိုင်သည်မဟုတ်ပါလား။

"အင်း... သားရဲကတ်ပြားကို ရတာနဲ့ ငါ ချက်ချင်း ပြန်ထွက်မယ်"

မိမိရှေ့တွင် ဒဏ်ရာအနာတရများ လုံးဝသက်သာပျောက်ကင်းသွားပြီဖြစ်သော မီးတောက်ကင်းမြီးကောက်ကို ကြည့်ရင်း ကျန်းချဲ့ တစ်ချက် စိတ်အေးသွားရသည်။ ခရမ်းရွှေရောင် လူသားစားမျှော့ နှစ်ကောင်ထက်ပိုပြီး မကြုံရသရွေ့တော့ မီးတောက်ကင်းမြီးကောက်၏ တိကျလှသော ပစ်မှတ်ထားတိုက်ခိုက်မှုစွမ်းရည်ဖြင့် အေးဆေးကိုင်တွယ်နိုင်မည်ဟု တွေးမိသည်။

အရင်အတိုင်းပင် ကျန်းချဲ့သည် မီးတောက်ကင်းမြီးကောက်ကို မိမိရှေ့မှ ခပ်လှမ်းလှမ်းတွင် လမ်းပြခိုင်းပြီးနောက် သူကမူ အနောက်မှ အကဲခတ်လျက် သတိကြီးစွာဖြင့် လိုက်ပါလာခဲ့သည်။ ပုံမှန်မဟုတ်သောအခြေအနေ တစ်ခုခုကို မြင်သည်နှင့် နောက်သို့လှည့်၍ ထွက်ပြေးရန် အသင့်ပြင်ထား၏။

တောအုပ်တစ်ခုလုံးက ထူးဆန်းစွာ တိတ်ဆိတ်လျက်ရှိသည်။ ခြောက်သွေ့နေသော သစ်ရွက်ခြောက်များကို နင်းဖြတ်သွားသည့် လူတစ်ယောက်နှင့် သားရဲတစ်ကောင်၏ ခပ်တိုးတိုးအသံမှတစ်ပါး အခြားအသံများ ထွက်ပေါ်မလာဘဲ ဖြည်းညှင်းစွာ ရှေ့ဆက်ခဲ့ကြသည်။ နောက်ဆုံးတွင်တော့ အစိမ်းရင့်ရောင် ကတ်ပြားတစ်ခုသည် ကျန်းချဲ့၏ အမြင်အာရုံထဲသို့ ဝင်ရောက်လာခဲ့ပြီဖြစ်၏။

"သွား... အဲဒါကို သွားယူချေ၊ တစ်ခုခုလွဲချော်တာနဲ့ တိုက်မနေနဲ့တော့"

ကျန်းချဲ့သည် ရင်ထဲမှ ဝမ်းသာသွားပြီး မီးတောက်ကင်းမြီးကောက်ကို အမိန့်ပေးလိုက်သည်။ ကင်းမြီးကောက်သည်လည်း ၎င်း၏လက်မကြီးများကို အဆင်သင့်ပြင်လျက် လူသားစားမျှော့ကတ်ပြားဆီသို့ ချက်ချင်း ပြေးဝင်သွားတော့သည်။

မီးတောက်ကင်းမြီးကောက်က ပန်းတိုင်သို့ရောက်ရှိပြီး သားရဲကတ်ပြားကို လက်မဖြင့် ကောက်ယူလိုက်စဉ်မှာပင် သစ်တောအုပ်၏ ထူထပ်သော သစ်ပင်ထိပ်ဖျားများပေါ်မှ နေ၍ နက်မှောင်သော အရိပ်အချို့က ရုတ်တရက် ခုန်ထွက်လာပြီး မီးတောက်ကင်းမြီးကောက်၏ ကျောပေါ်သို့ တိကျမှန်ကန်စွာ တွယ်ကပ်လိုက်ကြလေသည်။

ကျန်းချဲ့သည် ဤမြင်ကွင်းကို မြင်သော်လည်း လန့်ဖျန့်မသွားဘဲ အားရဝမ်းသာပင် ဖြစ်သွားမိသည်။ ခပ်ကောင်းကောင်း ဖြစ်သွားပြီ။ ဤကောင်များအားလုံးမှာ သာမန်လူသားစားမျှော့များသာ ဖြစ်ကြပြီး ၎င်းတို့ထက် သန်မာသည့်ကောင်များ ပါမလာချေ။

"ဆုတ်မယ်!"

အမိန့်ပေးပြီးသည်နှင့် ကျန်းချဲ့သည် ဦးဆောင်ကာ တောအုပ်ပြင်ပသို့ ခပ်သွက်သွက် ပြန်လည်ထွက်ခွာခဲ့သည်။ သူ၏အနောက် မီတာနှစ်ဆယ်ခန့်အကွာတွင် မီးတောက်ကင်းမြီးကောက်က အလျင်မလိုဘဲ လုံခြုံသော အကွာအဝေးတစ်ခုကို ထိန်းသိမ်းရင်း အမှီလိုက်လာခဲ့၏။ ဤလူသားစားမျှော့များ၏ ခုန်အုပ်နိုင်စွမ်းကို လျှော့တွက်၍မရပေ။ ကျန်းချဲ့အနေဖြင့် ၎င်းတို့ထဲမှတစ်ကောင်က ရုတ်တရက် ပစ်မှတ်ပြောင်းပြီး မိမိဆီသို့ ခုန်ကူးလာမျိုးကို အဖြစ်မခံနိုင်ပါ။

ဆုတ်ခွာလာရင်းနှင့် မီးတောက်ကင်းမြီးကောက်သည် ၎င်း၏ကျောပေါ်ရှိ လူသားစားမျှော့များကို စတင်ရှင်းလင်းတော့သည်။ မကြာသေးမီကမှ ကျန်းချဲ့ သင်ကြားပေးထားသည့် အနောက်ကွယ်မှ ချဉ်းကပ်တိုက်ခိုက်သည့် နည်းဗျူဟာကို မီးတောက်ကင်းမြီးကောက်သည် ယခုအခါ အလွန်ကျွမ်းကျင်စွာ အသုံးပြုနေပြီဖြစ်သည်။ ၎င်း၏ ကြောက်မက်ဖွယ်ကောင်းသော အဆိပ်ဆူးမြီးကြီးက လှုပ်ရှားလိုက်တိုင်း လူသားစားမျှော့များ၏ ခန္ဓာကိုယ်အပေါက်ဝများဆီသို့ တိကျစွာ ထိုးစိုက်ဝင်ရောက်သွား၏။ သိပ်မကြာလိုက်ဘဲ မျှော့များသည် ပြင်းထန်စွာ တွန့်လိမ်သွားကြပြီး ရဲရဲတောက် အလင်းရောင်များနှင့်အတူ မီးတောက်ကင်းမြီးကောက်၏ ကျောပေါ်မှ ပြုတ်ကျကုန်ကြသည်။

[သင်သည် လူသားစားမျှော့တစ်ကောင်ကို သတ်ဖြတ်လိုက်ပြီဖြစ်သည်။ စိတ်ဝိဉာဉ်အင်အား ၄ မှတ် ရရှိသည်။ လူသားစားမျှော့ ကတ်ပြားတစ်ခု ရရှိသည်။]

တောအုပ်ထဲမှ မထွက်ခွာမီမှာပင် မီးတောက်ကင်းမြီးကောက်၏ ကျောပေါ်တွင် တွယ်ကပ်နေသော လူသားစားမျှော့အားလုံးမှာ တစ်ကောင်ပြီးတစ်ကောင် အဆိပ်ဆူးဖြင့် အထိုးခံရပြီး အလင်းတန်းများအဖြစ် ပြောင်းလဲကာ လျင်မြန်စွာ ပျောက်ကွယ်သွားခဲ့ကြသည်။

ကျန်းချဲ့ကို အံ့အားသင့်စေသည်မှာ ယခုတစ်ကြိမ်တွင်လည်း သားရဲကတ်ပြား နောက်တစ်ခု ထပ်မံရရှိခဲ့ခြင်းပင် ဖြစ်သည်။

'ငါ ဒီလိုပဲ အစာပြပြီး မျှော့တွေကို မျှားခေါ်ကာ သတ်ရမလား၊ ဒါဆိုရင် သားရဲကတ်ပြားတွေ ပိုရလာမှာပဲ'

တောအုပ်အစပ်တွင် ရပ်လျက် ကျန်းချဲ့ နောက်သို့ လှည့်ကြည့်ရင်း စိတ်ကူးယဉ်မိသွားသည်။ သို့သော် ချက်ချင်းပင် ခေါင်းခါလိုက်၏။ အန္တရာယ်က ကြီးလွန်းလှသည်။ ခရမ်းရွှေရောင် လူသားစားမျှော့က မီးတောက်ကင်းမြီးကောက်ကို ကြီးမားသော ထိခိုက်မှု ပေးနိုင်သည်ကို ထားလိုက်ဦးတော့၊ အကယ်၍ တောအုပ်ထဲတွင် ပိုမိုသန်မာသော မျိုးကွဲသားရဲများ ပုန်းအောင်းနေပြီး ၎င်းတို့၏ လက်အောက်ခံများ တစ်ကောင်ပြီးတစ်ကောင် အသတ်ခံနေရသည်ကို မြင်၍ ဒေါသတကြီး ထွက်လာပါက မည်သို့လုပ်မည်နည်း။

ထိုအခါကျလျှင် သူ ဘာတတ်နိုင်တော့မည်နည်း။ ကျန်းချဲ့အနေဖြင့် ထိုသို့သော စွန့်စားမှုကို အဖြစ်မခံနိုင်ပါ။ ၎င်းအပြင် သူသည် ကြယ်နှစ်ပွင့်ပြိုင် ငွေအဆင့်ကတ်ပြား တစ်ခုနှင့် ကြယ်နှစ်ပွင့်ပြိုင် ကြေးဝါအဆင့်ကတ်ပြား သုံးခုကို ရရှိထားပြီး ဖြစ်သည်။ ၎င်းကပင် အလွန်ကြီးမားသော အကျိုးအမြတ်ဖြစ်ရာ မိမိကိုယ်ကိုယ် အန္တရာယ်ဇုန်ထဲသို့ ဆက်ပြီး တွန်းပို့နေရန် မလိုတော့ချေ။

"အင်း... နောက်ကျလို့ ပိုကောင်းတဲ့ သားရဲကတ်ပြားတွေ ရှိလာမှပဲ ဒီနေရာကို ပြန်လာတော့မယ်"

ဤတောအုပ်သည် တကယ်ပင် ရတနာသိုက်ကြီးတစ်ခု ဖြစ်သည်ဟု ဆိုရမည်။ ခံစစ်အမျိုးအစား သားရဲကတ်ပြားများသည် အတော်အတန် တန်ဖိုးရှိလှသည်။ လူသားစားမျှော့များသည် အဆင့်နိမ့်သားရဲများသာ ဖြစ်သော်လည်း ၎င်းတို့၏ ကတ်ပြားများသည် ဈေးကွက်ထဲတွင် အလွန်ရေပန်းစားမည့်အရာများ ဖြစ်ကြသည်။

ကျန်းချဲ့သည် ဤသို့တွေးတောရင်း တောအုပ်အပြင်ဘက်သို့ ဆက်လက်ထွက်ခွာလာခဲ့သည်။ တစ်ချိန်တည်းမှာပင် ရရှိထားသော သားရဲကတ်ပြားနှစ်ခုကို မိမိထံ ယူဆောင်လာရန် မီးတောက်ကင်းမြီးကောက်ကို အမိန့်ပေးလိုက်၏။

"အစ်ကို... အဲဒီ သားရဲကတ်ပြားကို ရောင်းမလို့လားဗျ"

ထိုစဉ်မှာပင် အရပ်ရှည်ပြီး ထုထည်ကြီးမားသော ဝံပုလွေတစ်ကောင်၊ ကြီးမားတုတ်ခိုင်သော စပါးအုန်းမြွေတစ်ကောင်နှင့်အတူ လူငယ်တစ်ယောက်သည် ကျန်းချဲ့၏ရှေ့တွင် ရုတ်တရက် ပေါ်လာပြီး သူ လှမ်းယူလိုက်သော ကြယ်နှစ်ပွင့်ပြိုင် ကြေးဝါအဆင့်ကတ်ပြား နှစ်ခုကို ကြည့်ကာ မေးလိုက်သည်။

ကျန်းချဲ့၏ ရင်ထဲ၌ ထိတ်ခနဲ ဖြစ်သွားရ၏။ သူနှင့် စိတ်ချင်းနီးစပ်မှု စတင်ရရှိနေပြီဖြစ်သော မီးတောက်ကင်းမြီးကောက်ကလည်း ကျန်းချဲ့၏ရှေ့တွင် ကာကွယ်ရန် ရပ်လိုက်ပြီး ၎င်း၏ လက်မကြီးများကို မြှောက်ကာ ထိုလူငယ်နှင့် သားရဲများကို သတိကြီးစွာဖြင့် စိုက်ကြည့်နေတော့သည်။

ထိုလူငယ်က အလျင်အမြန်ပင် နောက်သို့ နှစ်လှမ်းခန့် ဆုတ်လိုက်ပြီး ပြုံးလျက်

"စိတ်အေးအေးထားပါ အစ်ကို၊ ကျွန်တော်က ဒီအတိုင်း လမ်းကြုံလို့ ဖြတ်လာတာပါ"

ကျန်းချဲ့သည် ထိုလူငယ်ကို မျက်မှောင်ကြုတ်၍ ကြည့်လိုက်ပြီးနောက် သူ၏ ဘေးနားရှိ အောင်နိုင်ပြီးသား သားရဲနှစ်ကောင်ထံသို့ အကြည့်ကို ရွှေ့လိုက်သည်။

[အူဟောင်တတ်သော ငွေရောင်ဝံပုလွေ]

အဆင့် - ကြယ်နှစ်ပွင့်ပြိုင် (အဆင့် ၁၈)

အရည်အသွေး - သံနက်အဆင့်

အမျိုးအစား - မူလတိုက်ခိုက်ရေးခန္ဓာ

ထူးခြားချက် - လျင်မြန်မှု

အားနည်းချက် - အဆိပ်စွမ်းအင်သုံး တိုက်ခိုက်မှုများ

အလားအလာ - အဆင့် E

ရာခိုင်နှုန်း - လက်ရှိအဆင့်ကို ကျော်ဖြတ်နိုင်ရန် ၂၅% အခွင့်အရေး၊ လက်ရှိအရည်အသွေးကို ကျော်ဖြတ်နိုင်ရန် ၂.၅% အခွင့်အရေးရှိသည်။ တစ်ကြိမ် အဆင့်မြှင့်တင်နိုင်သည်။

ပြုစုပျိုးထောင်မှုလမ်းညွှန် - ပြုစုပျိုးထောင်ရန် တန်ဖိုးမရှိပါ။

[စကေးနီ စပါးအုန်းမြွေ]

အဆင့် - ကြယ်တစ်ပွင့်ပြိုင် (အဆင့် ၈)

အရည်အသွေး - ကြေးဝါအဆင့်

အမျိုးအစား - မူလတိုက်ခိုက်ရေးခန္ဓာ

ထူးခြားချက် - ရစ်ပတ်မှု

အားနည်းချက် - ရေခဲစွမ်းအင်သုံး တိုက်ခိုက်မှုများ

အလားအလာ - အဆင့် D

ရာခိုင်နှုန်း - လက်ရှိအဆင့်ကို ကျော်ဖြတ်နိုင်ရန် ၂၅% အခွင့်အရေး၊ လက်ရှိအရည်အသွေးကို ကျော်ဖြတ်နိုင်ရန် ၂.၅% အခွင့်အရေးရှိသည်။ နောက်တစ်ကြိမ် အဆင့်မြှင့်တင်မှုတွင် အခွင့်အရေး ထဝက်လျော့နည်းသွားမည်။ နှစ်ကြိမ် အဆင့်မြှင့်တင်နိုင်သည်။

ထိုသားရဲနှစ်ကောင်၏ အချက်အလက်များကို ကြည့်ပြီးနောက်တွင်တော့ ကျန်းချဲ့တစ်ယောက် မသိမသာ သက်ပြင်းချနိုင်သွားတော့သည်။ မိမိရှေ့ရှိ လူငယ်သည် အဆင့်နှစ် သားရဲထိန်းတစ်ဦး၏ အရှိန်အဝါရှိသော်လည်း သူ၏ သားရဲများမှာမူ တကယ်ပင် အားနည်းလွန်းလှသည်။ မီးတောက်ကင်းမြီးကောက် တစ်ကောင်တည်းနှင့်တင် ထိုကောင်များကို အပြတ်ရှင်းပစ်ရန် လုံလောက်လှပေသည်။

ကျန်းချဲ့က မိမိ၏ သားရဲများကို အကဲခတ်သလို ကြည့်နေသည်ကို မြင်သောအခါ ထိုလူငယ်မှာ ကျောချမ်းသွားရ၏။ ဤလူ၏ သားရဲက လူသားစားမျှော့ကိုပင် အလွယ်တကူ သတ်ဖြတ်နိုင်စွမ်းရှိသည် မဟုတ်ပါလား။ တစ်ဖက်လူက မိမိကို အထင်မလွဲပါစေနှင့်ဟုသာ ဆုတောင်းနေမိသည်၊ မဟုတ်လျှင်တော့ ဒုက္ခအကြီးအကျယ် တွေ့ရပေလိမ့်မည်။

အခြေအနေကို တွက်ဆပြီးနောက် ထိုလူငယ်သည် သူ၏ သားရဲများကို ချက်ချင်းပင် ပြန်လည်ရုပ်သိမ်းလိုက်ပြီး ပွင့်ပွင့်လင်းလင်းပင် ပြောလိုက်သည်။

"အထင်မလွဲပါနဲ့ အစ်ကိုရယ်၊ ကျွန်တော် တကယ်ပဲ ဒီနားက ဖြတ်သွားရင်း အစ်ကို လူသားစားမျှော့ ကတ်ပြားနှစ်ခု ရတာကို မြင်လိုက်လို့ပါ။ အဲဒါ တစ်ခုလောက် ကျွန်တော့်ကို ရောင်းဖို့ အစီအစဉ်ရှိမလားခင်ဗျာ၊ ဈေးနှုန်းကိုတော့ ညှိနှိုင်းလို့ရပါတယ်"

ထိုအခါမှသာ ကျန်းချဲ့လည်း ထိုလူငယ် လမ်းကြုံဝင်လာခြင်းဖြစ်ကြောင်း ယုံကြည်သွားပြီး ခေါင်းငြိမ့်ပြကာ ဘေးကင်းရာဇုန်ဆီသို့ ဆက်လက်လျှောက်လှမ်းခဲ့သည်။ မိုးကလည်း ချုပ်လုနီးပါး ဖြစ်နေပြီဖြစ်သည်။

"စခန်းကို အရင်ပြန်ကြစို့၊ ပြီးမှ စကားပြောတာပေါ့"

လူငယ်၏ မျက်နှာတွင် ဝမ်းသာအားရ ဖြစ်သွားပြီး စိတ်လှုပ်ရှားမှုကို မထိန်းနိုင်ဘဲ ကျန်းချဲ့၏ အနောက်မှ ခပ်လှမ်းလှမ်းက လိုက်ပါလာခဲ့သည်။ ၎င်းက ခံစစ်အမျိုးအစား ကြယ်နှစ်ပွင့်ပြိုင် ကြေးဝါအဆင့် ကတ်ပြားတစ်ခု ဖြစ်သည်လေ။ အကယ်၍သာ ဝယ်ယူနိုင်ခဲ့ပါက နောင်တွင် အမဲလိုက်ထွက်သည့်အခါ ပိုမိုဘေးကင်းလုံခြုံနိုင်မည် ဖြစ်သည်။

ကျန်းချဲ့ကမူ အနောက်မှ လူငယ်ကို ဂရုမစိုက်အားဘဲ လမ်းလျှောက်ရင်း မိမိလက်ထဲရှိ သားရဲကတ်ပြားနှစ်ခုကို ကြည့်နေမိသည်။ သူသည် အလွန်အမင်း စိတ်လှုပ်ရှားနေသဖြင့် အသံထွက်၍ပင် ရယ်မောမိလုနီးပါး ဖြစ်သွားရ၏။

အဘယ်ကြောင့်ဆိုသော် စောစောက သားရဲကတ်ပြားနှစ်ခုကို လက်ထဲယူ၍ စစ်ဆေးလိုက်သည့်အခါတွင် လူသားစားမျှော့၏ အချက်အလက်များ ပေါ်လာရုံသာမက စွမ်းရည်အသစ်တစ်ခုပါ ပွင့်သွားခဲ့သောကြောင့် ဖြစ်သည်။

၎င်းမှာ... ပေါင်းစပ်ခြင်း (Fusion) ဖြစ်၏။

[ပေါင်းစပ်ခြင်း - အဆင့် ၁ (အတွေ့အကြုံ ၀/၁၀၀) - မျိုးစိတ်တူ၊ အဆင့်တူ သားရဲကတ်ပြားနှစ်ခုကို ပေါင်းစပ်၍ တစ်ဆင့်မြင့်သော သားရဲကတ်ပြားတစ်ခုအဖြစ် ပြောင်းလဲနိုင်သည်။ ကြယ်သုံးပွင့်အောက် သားရဲကတ်ပြားများသာ ကန့်သတ်ချက်ရှိသည်။]

သူ နားလည်သလောက် ဆိုရလျှင် ကျန်းချဲ့အနေဖြင့် ပေါင်းစပ်ခြင်းစွမ်းရည်ကို အသုံးပြုလိုက်ပါက ကြယ်နှစ်ပွင့်ပြိုင် ကြေးဝါအဆင့် လူသားစားမျှော့ကတ်ပြား နှစ်ခုကို တစ်ခုတည်းအဖြစ် ပေါင်းစပ်နိုင်ပြီး ကြယ်သုံးပွင့်ပြိုင် ကြေးဝါအဆင့် သားရဲကတ်ပြားတစ်ခုအဖြစ် ပြောင်းလဲသွားစေမည်ဟူ၍ ဖြစ်သည်။

ဤစွမ်းရည်မှာ တကယ်ပင် ကောင်းကင်ဘုံကို ဆန့်ကျင်နိုင်လောက်သည့် အစွမ်းထက်စွမ်းရည်တစ်ခု ဖြစ်ပေတော့သည်။