အခန်း (၈၆) မီးလျှံနယ်ပယ်

တိမ်တိုက်ကမ္ဘာဆီသို့ တစ်ဖန်ပြန်လည်ရောက်ရှိလာသောအခါ မက်စ်သည် မဟူရာအချိန်နယ်ပယ်နှင့် ဝိညာဉ်များ၏ နယ်ပယ်သို့ ဦးတည်သည့် တံခါးများအပြင် တံခါးအသစ်တစ်ချပ်ကို သတိပြုမိလိုက်သည်။ ထိုတံခါးအသစ်မှာ မီးလျှံများဖြင့် တောက်လောင်နေ၏။ 'မီးလျှံနယ်ပယ်က ဘာတွေပေးစွမ်းနိုင်မလဲ ကြည့်ရအောင်' မက်စ်က တွေးတောရင်း တံခါးကိုဖွင့်ကာ အတွင်းသို့ လှမ်းဝင်လိုက်သည်။

သူ ပထမဆုံး မြင်လိုက်ရသည်မှာ မီးတောက်မီးလျှံများပင် ဖြစ်သည်။ သူ့ပတ်ပတ်လည် တစ်ခွင်လုံးမှာ မီးများလွှမ်းခြုံထားသည့် ကမ္ဘာတစ်ခုဖြစ်သော်လည်း ထူးဆန်းသည်မှာ ထိုမီးလျှံများထံမှ အပူရှိန်ကို သူ လုံးဝမခံစားရခြင်းပင်။ ပတ်ဝန်းကျင်ကို ဝေ့ဝဲကြည့်လိုက်သောအခါ ဤကမ္ဘာသည် အဆုံးအစမရှိ ကျယ်ပြောလှပြီး မီးလျှံများဖြင့်သာ တောက်လောင်နေသည်ကို တွေ့ရသည်။

သို့သော် ထိုမီးလျှံကမ္ဘာထဲတွင် အခြားအရာတစ်ခုကိုလည်း သူ သတိပြုမိလိုက်သည်။ အလယ်ဗဟိုတွင် သူ၏ အရပ်ခန့်ရှိသော မြင့်တက်နေသည့် ပလ္လင်တစ်ခုရှိပြီး ၎င်းအပေါ်တွင် မီးတောက်တစ်ခု ကခုန်နေသည်။ 'ငါရရှိထားတဲ့ အမှတ်သညာအသစ်တွေအရ ဒီပလ္လင်က အရမ်းထူးခြားတဲ့ စွမ်းအားတစ်ခု ရှိတယ်။ အဲဒီပေါ်ကို ငါတင်လိုက်တဲ့ မီးလျှံအမျိုးအစားပေါ် မူတည်ပြီး ငါ့ကို မတူညီတဲ့ စွမ်းရည်တွေ ပေးစွမ်းနိုင်တယ်' ဟု မက်စ်က တွေးလိုက်သည်။

ဤကမ္ဘာတွင် မီးလျှံအမျိုးအစားများစွာ ရှိကြပြီး တစ်ခုချင်းစီတွင် ထူးခြားသော စွမ်းရည်များ ရှိကြသည်ဟု ဆိုသည်။ သို့သော် သူ၏ နဂါးနက်မီးလျှံများမှလွဲ၍ အခြားမည်သည့် မီးလျှံ၏ စွမ်းဆောင်ရည်ကိုမျှ မက်စ် မမြင်ဖူးသေးပေ။ မတူညီသော မီးလျှံများအကြောင်း တွေးတောရင်း သူ၏ 'ခရမ်းရောင်သေမင်းဆီမီးအိမ် (Lantern of Purple Death)' ကို ထုတ်ယူလိုက်သည်။ 'ဘာဖြစ်မလဲ ကြည့်ကြတာပေါ့' သူက တွေးရင်း ခရမ်းရောင်မီးလျှံ အစကလေးတစ်ခုကို ထိန်းချုပ်ကာ ပလ္လင်ပေါ်တွင် တောက်လောင်နေသော မီးတောက်ထဲသို့ ချလိုက်သည်။

သို့သော် မက်စ် အံ့အားသင့်သွားရသည်မှာ ခရမ်းရောင်မီးလျှံသည် ပလ္လင်ပေါ်ရှိ မီးတောက်ထဲသို့ ကျမသွားခြင်းပင် ဖြစ်သည်။ ၎င်းအစား မီးတောက်များ၏ အပေါ်တွင် လွင့်မျောနေပြီး ဆီမီးအိမ်ပုံစံ သင်္ကေတလေးတစ်ခု ဖြစ်ပေါ်လာသည်အထိ ပုံစံပြောင်းလဲသွားသည်။ ထိုခဏမှာပင် မက်စ်၏ စိတ်ထဲ၌ တစ်စုံတစ်ခုကို နားလည်သွားသလို ခံစားလိုက်ရပြီး သူ၏ လက်ကို ရှေ့သို့ ဆန့်ထုတ်လိုက်သည်။ သူကိုယ်တိုင်ပင် အံ့သြသွားရလောက်အောင်ပင် သူ၏ လက်ထဲ၌ ခရမ်းရောင်မီးလျှံများ တောက်လောင်လာတော့သည်။

"မဟုတ်ဘူး... ဒီမီးလျှံက တခြားစီပဲ" မက်စ် တိုးတိုးလေး ရေရွတ်လိုက်သည်။ ဤမီးလျှံသည် အသက်ရှိသတ္တဝါများကို တိုက်ခိုက်ရာတွင် အသုံးမဝင်နိုင်ကြောင်း သူ ခံစားမိသည်။ "သေဆုံးပြီးသားသူတွေအပေါ်မှာပဲ သက်ရောက်မှုရှိမှာ။ ဒီမီးလျှံနဲ့ဆိုရင် သေဆုံးသွားတဲ့သူတွေဆီကနေ အမှတ်သညာတွေကို ငါ ထုတ်ယူနိုင်လိမ့်မယ်။" အသိတစ်ခု ဝင်လာသည်နှင့်အမျှ သူ ရေရွတ်မိသည်။ ဤကဲ့သို့ စွမ်းရည်မျိုး ရရှိလိမ့်မည်ဟု သူ မထင်မှတ်ထားသော်လည်း ဤမီးလျှံ၏ မြစ်ဖျားခံရာမှာ 'ခရမ်းရောင်သေမင်းဆီမီးအိမ်' ဖြစ်နေသောကြောင့် ဖြစ်နိုင်ခြေရှိသည်ဟု သူ ယူဆလိုက်သည်။

'ဒီစွမ်းရည်က ကောင်းသားပဲ... ငါ ဒါကို "ထိုးထွင်းသိမြင်ခြင်း ပြာမှုန်များ (Ashes of Insight)" လို့ပဲ ခေါ်လိုက်မယ်' မက်စ်က သူ၏ နဂါးနက်မီးလျှံများအကြောင်းကိုလည်း ဆက်လက်တွေးတောမိသည်။ 'ငါ့ရဲ့ နဂါးနက်မီးလျှံတွေမှာ ဘယ်လိုစွမ်းရည်တွေ ရှိနေသေးလဲဆိုတာ ငါ မသိသေးဘူး။' ၎င်းတို့ကို ကောင်းမွန်စွာ ထိန်းချုပ်နိုင်ပြီး ခရမ်းရောင်ဆီမီးအိမ်ကို အသုံးချနိုင်သည်မှအပ နဂါးနက်မီးလျှံများ၏ စွမ်းဆောင်ရည် အပြည့်အဝကို သူ မသိသေးပေ။

'နဂါးနက်မီးလျှံကနေ ဘယ်လိုစွမ်းရည် ရမလဲ ကြည့်ရအောင်' မက်စ်၏ လက်တွင် နဂါးနက်မီးလျှံများ တောက်လောင်လာသည်။ သူသည် မီးလျှံ၏ အစိတ်အပိုင်းတစ်ခုကို ခွဲထုတ်ကာ ပလ္လင်ပေါ်သို့ ချလိုက်သည်။ အရင်အတိုင်းပင် မီးလျှံသည် ပလ္လင်အထက်၌ လွင့်မျောနေပြီး နဂါးတစ်ကောင်၏ ပုံစံ ဖြစ်ပေါ်လာသည်အထိ ပြောင်းလဲသွားသည်။ ထိုအခါ သတင်းအချက်အလက်အချို့ မက်စ်၏ စိတ်ထဲသို့ ရောက်ရှိလာတော့သည်။

"ဒီနဂါးနက်မီးလျှံတွေနဲ့ဆိုရင် ငါ ဒီကမ္ဘာပေါ်က ဘယ်အရာကိုမဆို စုပ်ယူနိုင်တယ်... ဒါမှမဟုတ် ဝါးမြိုပစ်နိုင်တယ်လို့ ပြောရမှာပေါ့" သူ၏ မျက်နှာတွင် စိတ်လှုပ်ရှားမှုများ အထင်းသား ပေါ်လွင်နေသည်။ အရာအားလုံးကို ဝါးမြိုနိုင်သည့် စွမ်းရည်မှာ အလွန်ပင် အားကောင်းလှပြီး သူ၏ အဆင့်အတန်းအစား (Class) နှင့်သာ ပေါင်းစပ်လိုက်လျှင် နောင်တစ်ချိန်တွင် သူ့ကို မည်သူမျှ တားဆီးနိုင်မည်မဟုတ်ကြောင်း သူ သိနေသည်။

"ကောင်းတယ်!" မက်စ်က ဝမ်းသာအားရ ရယ်မောလိုက်သည်။ "နောက်ထပ် ကိုးလလောက်ပဲ စောင့်ဦး၊ ငါ 'ပျောက်ဆုံးနေတဲ့တိုက်ကြီး ' ကို သွားတော့မယ်။" သူ၏ ညီမလေးကို ရှာဖွေခြင်းမှာ သူ၏ နောက်ဆုံးပန်းတိုင်ဖြစ်ပြီး သန်မာလာခြင်းမှာ ထိုပန်းတိုင်သို့ ရောက်ရှိရန် သော့ချက်ဖြစ်သည်။ သူမကို သူ မေ့မထားသလို၊ မေ့ပစ်ရန်လည်း မဖြစ်နိုင်ပေ။

"မီးလျှံဖန်တီးခြင်း (Flame Creation) စွမ်းရည်က ရတဲ့ မီးလျှံကရော စွမ်းရည်တစ်ခုခု ရှိမလား" မက်စ်က တွေးတောရင်း နဂါးနက်မီးလျှံများကို ဖျောက်လိုက်ကာ စွမ်းရည်ကို အသုံးပြု၍ လက်ထဲတွင် မီးတောက်တစ်ခု ဖန်တီးလိုက်သည်။ အပြင်ပန်းကြည့်လျှင် သာမန်မီးလျှံနှင့် တူသော်လည်း အရူးသိပ္ပံပညာရှင်တစ်ဦးက ဂိုလမ်များပြုလုပ်ရန် ဖန်တီးခဲ့ခြင်းဖြစ်သောကြောင့် ၎င်းမှာ သာမန်မဟုတ်ကြောင်း မက်စ် ခံစားမိသည်။

မဆိုင်းမတွပင် သူသည် ထိုမီးလျှံအစကလေးကို ပလ္လင်ပေါ်သို့ ချလိုက်သည်။ အရင်နှစ်ကြိမ်ကဲ့သို့ပင် ၎င်းသည် မီးတောက်များအထက်တွင် လွင့်မျောကာ ပုံစံပြောင်းလဲသွားသည်။ နောက်ဆုံးတွင် ကြိုးမျှင်တစ်ချောင်း၏ ပုံစံ ဖြစ်သွားရာ မက်စ် အံ့အားသင့်သွားရသည်။ ထိုခဏမှာပင် အသိပေးချက်တစ်ခု ပေါ်လာသည်။

[မက်စ် ဗွိုက်ဝေါ့ကာ အား 'မီးလျှံဖန်တီးခြင်း' စွမ်းရည်ကို အောင်မြင်စွာ ပြီးမြောက်သည့်အတွက် ဂုဏ်ယူပါသည်။]

[ဆုလာဘ်အဖြစ် 'မီးလျှံဖန်တီးခြင်း' စွမ်းရည်ကို သာမန်ထက်ထူးကဲအဆင့် (Uncommon Rank) သို့ မြှင့်တင်ပေးလိုက်ပါသည်။]

မက်စ်၏ မျက်လုံးများ ပြူးကျယ်သွားရသည်မှာ အသိပေးချက်ကြောင့် မဟုတ်ဘဲ ထိုမီးလျှံမှ သူရရှိလိုက်သော စွမ်းရည်ကြောင့် ဖြစ်သည်။ သူ၏ လက်ထဲရှိ မီးလျှံကို ပြန်ကြည့်ရင်း တုန်ရီသော အသံဖြင့် ရေရွတ်လိုက်သည်။ "ဒီမီးလျှံက ရုပ်သေးရုပ်တွေ ဖန်တီးဖို့ လိုအပ်တဲ့ အသက်ဝင်နေတဲ့ ကြိုးမျှင်တစ်ခုလိုပဲ။ ဒါကို သေသေချာချာ အသုံးချနိုင်ရင် ဒန်နီရယ်လ် ဝင်းချက်စတာ ဂိုလမ်တွေ ဖန်တီးတုန်းက ရင်ဆိုင်ခဲ့ရတဲ့ ပြဿနာကို ဖြေရှင်းနိုင်လိမ့်မယ်။"

ဒန်နီရယ်လ်သည် ချော်ရည်ဂိုလမ် (Lava Golems) များ၏ အူဒိုင်ပေါ်ရှိ ရှုပ်ထွေးသော မန္တန်သင်္ကေတများကို ကူးယူရန် ကြိုးစားခဲ့သော်လည်း ကျရှုံးခဲ့သည်။ အူဒိုင်အတွင်းရှိ ပုံစံများကို သူ မတုပနိုင်၍ မဟုတ်ဘဲ အခြားအူဒိုင်တစ်ခုပေါ်တွင် ထိုသင်္ကေတများကို ကူးယူလိုက်သည့်အခါ သူဖန်တီးသော ဂိုလမ်မှာ အသက်မဲ့နေသောကြောင့် ဖြစ်သည်။ ဒန်နီရယ်လ်၏ သုတေသနမှတ်တမ်း တစ်ခုလုံးကို ဖတ်ပြီးနောက်တွင် မက်စ်သည် အခြေအနေကို ကိုယ်ပိုင်အမြင်ဖြင့် နားလည်လာခဲ့ပြီး ဒန်နီရယ်လ် အဘယ်ကြောင့် ကျရှုံးခဲ့သည်ကို သဘောပေါက်သွားသည်။ အကြောင်းရင်းမှာ ရိုးရှင်းပါသည် - ဒန်နီရယ်လ်သည် ဂိုလမ်အူဒိုင်များအတွင်းရှိ 'ဇီဝအသက်စွမ်းအား (life force)' ကို မတုပနိုင်ခဲ့ခြင်းဖြစ်သည်။ သူဖန်တီးခဲ့သော ဂိုလမ်မှာ ဝိညာဉ်မရှိသည့် လူ့ခန္ဓာကိုယ်ကဲ့သို့ပင်။ အရေးကြီးသော အစိတ်အပိုင်းတစ်ခု လိုအပ်နေခြင်းဖြစ်သည်။

'ငါ ဂိုလမ်တွေအကြောင်းကို သေချာ သုတေသနလုပ်ဖို့ လိုမယ်' ဟု မက်စ်က တွေးလိုက်သည်။ ဂိုလမ်များနှင့် ပတ်သက်သော သူ၏ အသိပညာအားလုံးမှာ ဒန်နီရယ်လ်၏ မှတ်တမ်းမှ လာခြင်းဖြစ်ပြီး မန္တန်သင်္ကေတများကဲ့သို့ မဟုတ်ဘဲ မပြည့်စုံသေးပေ။ သူကိုယ်တိုင် ဂိုလမ်တစ်ကောင် ဖန်တီးချင်ပါက သုတေသနများ ပိုမိုလုပ်ဆောင်ရန် လိုအပ်မည်ဖြစ်သည်။

'ဂိုလမ်တွေအကြောင်း အကုန်နားလည်သွားပြီဆိုရင် ဒီ "အသက်ဝင်ကြိုးမျှင်" စွမ်းရည်က အရမ်းအသုံးဝင်လာမှာ။ အရာအားလုံး အဆင်ပြေသွားရင် ငါကိုယ်တိုင် တစ်ကောင် ဖန်တီးနိုင်လိမ့်မယ်' မက်စ်က စိတ်လှုပ်ရှားစွာ တွေးတောနေမိသည်။ ထိုအခါမှ အသိတစ်ခု ဝင်လာပြန်သည်။ "ဒါဆို ဒန်နီရယ်လ်က ဒီစွမ်းရည်ကို ဖန်တီးတုန်းက လမ်းကြောင်းမှန်ပေါ်မှာ ရှိနေခဲ့တာပဲ၊ ဒါပေမဲ့ အဆုံးသတ်မှာ ပြဿနာတချို့ ရင်ဆိုင်ခဲ့ရလို့ ဒီစွမ်းရည်က မပြည့်စုံဘဲ ကျန်ရစ်ခဲ့တာနေမှာ" ဟု သူ သဘောပေါက်သွားသည်။

သို့သော် သူ၏ စိတ်ထဲတွင် နောက်ထပ် မေးခွန်းတစ်ခု ပေါ်လာသည်။ "လူသားတွေက စွမ်းရည် (Skill) တွေကို ဖန်တီးနိုင်လို့လား" လူသားများနှင့် အခြားမျိုးနွယ်စုများသည် နည်းစနစ် (Technique) များကို ဖန်တီးနိုင်သည်ဟု ဆရာမ ဆိုဖီယာက ပြောခဲ့ဖူးသော်လည်း စွမ်းရည်များ ဖန်တီးခြင်းအကြောင်းကိုမူ သူမ တစ်ခါမျှ မပြောခဲ့ဖူးပေ။

"ဒီ ဒန်နီရယ်လ် ဝင်းချက်စတာ ဆိုတဲ့လူကတော့... သူ ပြင်ပကွန်ရက် (Extranet) ပေါ်မှာ ရှိမလား ကြည့်ရမယ်" မက်စ်က သူ၏ စောင့်ကြပ်ကြည့်ရှုနိုင်မူစနစ် (holowatch)ကို နှိပ်ကာ ရှာဖွေကြည့်သော်လည်း ထိုအမည်ဖြင့် မည်သူ့ကိုမျှ မတွေ့ရပေ။ 'သူက လူသိမများတာပဲ ဖြစ်ဖြစ်၊ ဒါမှမဟုတ် သူ့ဘာသာသူ အထီးကျန်စွာ သုတေသနလုပ်နေတဲ့ အရူးသိပ္ပံပညာရှင်ပဲ ဖြစ်ဖြစ် တစ်ခုခုပေါ့' မက်စ်က တွေးရင်း မီးလျှံနယ်ပယ်မှ ပြန်ထွက်လာခဲ့သည်။

တိမ်တိုက်ကမ္ဘာထဲတွင် လွင့်မျောနေရင်း သူသည် ဝိညာဉ်များ၏ နယ်ပယ်သို့ ဦးတည်သည့် တံခါးဘက်သို့ လှည့်ကာ ဝင်ရောက်လိုက်သည်။ လွန်ခဲ့သည့် အချိန်အချို့က သူ စိုက်ပျိုးခဲ့သော ဝိညာဉ်မျိုးစေ့၏ အခြေအနေကို သွားကြည့်ချင်သောကြောင့် ဖြစ်သည်။ လွင့်မျောနေသော တောင်တန်းများနှင့် ရေတံခွန်များရှိရာ အိမ်မက်ဆန်သော ကမ္ဘာသို့ ရောက်ရှိသောအခါ မက်စ်သည် လတ်ဆတ်သော လေထုကို ရှူရှိုက်လိုက်သည်။ "ငါ ဒီနယ်ပယ်ထဲကို ကိုယ်တိုင် ဘယ်တော့များမှ ဝင်နိုင်ပါ့မလဲ" ဟု သူ မျှော်လင့်တကြီး ရေရွတ်မိသည်။

အောက်သို့ ငုံ့ကြည့်လိုက်ရာ ပင်စည်တစ်ခုနှင့် ထူးဆန်းသော အနီရောင်အရွက်တစ်ရွက်သာ ရှိသေးသည့် အလွန်သေးငယ်သော အပင်လေးတစ်ပင်ကို တွေ့လိုက်ရသည်။ "ကြည့်ရတာ ဒါက အချိန် ထပ်လိုဦးမယ်ထင်တယ်" မက်စ်က ဆိုပြီးနောက် ဝိညာဉ်နယ်ပယ်မှ ထွက်ကာ နိုးထလာခဲ့သည်။

"မန္တန်စွမ်းအင်မျှော်စင်ကို မသွားခင် ရေအရင်ချိုးလိုက်ဦးမယ်" မက်စ်က အသံထွက်၍ ပြောရင်း ရေချိုးရန် ပြင်ဆင်လိုက်တော့သည်။