အခန်း (၈၅) သုံးလတာကာလ

လေ့ကျင့်ရေးအရုပ်များဖြင့် ပြည့်နှက်နေသော တိတ်ဆိတ်ငြိမ်သက်သည့် အခန်းတစ်ခုအတွင်း ငွေဖြူရောင်ဆံပင်နှင့် လူငယ်တစ်ဦးသည် မျက်လုံးများကို မှိတ်ကာ တင်ပလ္လင်ခွေ ထိုင်နေသည်။ သူသည် လေ့ကျင့်ရေးဘောင်းဘီတစ်ထည်ကိုသာ ဝတ်ဆင်ထားပြီး ကိုယ်ပေါ်တွင် အင်္ကျီဗလာဖြင့် ရှိနေ၏။ သူ၏ ခန္ဓာကိုယ်တစ်ပြင်လုံးတွင် အာရုံကြောသဖွယ် ရွှေရောင်လမ်းကြောင်းများမှာ အခြားကမ္ဘာမှ အလင်းတန်းများသဏ္ဌာန် တောက်ပနေပြီး ရှုပ်ထွေးဆန်းကြယ်သော ပုံစံများကို ဖော်ဆောင်နေသည်။ အနီးကပ်ကြည့်မည်ဆိုပါက ထိုတောက်ပနေသော နွယ်ပင်သဏ္ဌာန်အစင်းကြောင်းများသည် လျှပ်စစ်စီးကြောင်းများကဲ့သို့ ခုန်လှုပ်နေပြီး ၎င်းတို့၏ စွမ်းအင်များသည် ချက်ရှိရာ အလယ်ဗဟိုအမှတ်ဆီသို့ စည်းချက်ကျကျ စီးဝင်နေကြသည်။ ထိုအလယ်ဗဟိုချက်တွင် အလင်းရောင်မှာ ပိုမိုတောက်ပလာပြီး ဘေးပတ်ပတ်လည်မှ အလင်းတန်းများထက်ပင် သာလွန်သည့် ထိန်ထိန်ညီးသော အူဒိုင်တစ်ခု ဖြစ်ပေါ်လာသည်။ စွမ်းအင်ခုန်လှုပ်မှုတိုင်းသည် ထိုအလယ်ဗဟိုမှတ်သို့ စီးဝင်သွားပြီး သူ၏ ခန္ဓာကိုယ်အတွင်းရှိ စွမ်းအားအားလုံးမှာ ထိုတောက်ပသော အမှတ်ကလေးတစ်ခုတည်းဆီသို့ စုစည်းသိပ်သည်းသွားသကဲ့သို့ ရှိနေတော့သည်။

ဤဖြစ်စဉ်သည် နာရီအနည်းငယ်ကြာအောင် ဆက်လက်ဖြစ်ပွားနေပြီးနောက်တွင်မူ ခန္ဓာကိုယ်ပေါ်ရှိ တောက်ပနေသော အလင်းတန်းများမှာ မှေးမှိန်သွားပြီး ချက်နေရာရှိ အမှတ်ကလေးမှာမူ လုံးဝန်းသော အလင်းလုံးလေးတစ်ခုကဲ့သို့ အလင်း၏ ဗဟိုချက်မ ဖြစ်လာသည်။ ၎င်းသည် ရွှေရောင်အလင်းတန်းများကို ထုတ်လွှတ်ကာ လေ့ကျင့်ရေးအခန်းတစ်ခုလုံးကို လင်းထိန်သွားစေပြီးနောက် တဖြည်းဖြည်းနှင့် ပြန်လည်ကွယ်ပျောက်သွားတော့သည်။

[မက်စ် ဗွိုက်ဝေါ့ကာ အား အ‌ခြေခံအဆင့် (Apprentice Rank) Level 1 သို့ တက်လှမ်းနိုင်သည့်အတွက် ဂုဏ်ယူပါသည်။]

[မက်စ် ဗွိုက်ဝေါ့ကာ အား မီးလျှံနယ်ပယ် (Dimension of Flames) ကို ဖွင့်လှစ်နိုင်သည့်အတွက် ဂုဏ်ယူပါသည်။]

မက်စ်သည် အသိပေးချက်များကို မြင်လိုက်ရသောအခါ ပြုံးလိုက်မိသည်။ အ‌ခြေခံအဆင့်သို့ ရောက်ရှိပြီးနောက်တွင် နယ်ပယ်အသစ်တစ်ခုပါ ထပ်မံပွင့်လာလိမ့်မည်ဟု သူ မထင်မှတ်ထားခဲ့ပေ။

"နောက်ဆုံးတော့ ငါ အ‌ခြေခံအဆင့်ကို ရောက်ပြီပေါ့"

သူ့ခန္ဓာကိုယ်အတွင်း စီးဆင်းနေသော အားကောင်းသည့် စွမ်းအားအသစ်ကို ခံစားရင်း တိုးတိုးလေး ရေရွတ်လိုက်သည်။ 'ငါ အရင်ကနဲ့မတူဘဲ လုံးဝကို ပြောင်းလဲသွားသလို ခံစားရတယ်။ အဓိကကတော့ ငါ့ရဲ့ ခွန်အားတွေက အဆင့်သစ်တစ်ခုကို တက်လှမ်းသွားသလိုပဲ။'

ယခုရရှိသည့် ခွန်အားတိုးလာမှုမှာ အဆင့်သစ် (Novice Rank) တုန်းက အဆင့်တက်ခဲ့သည်များနှင့် လုံးဝမတူပေ။ အဆင့်သစ်တွင် အဆင့်တစ်ခုတက်တိုင်း ခွန်အား ၁ ရာခိုင်နှုန်းခန့်သာ တိုးလာသော်လည်း ယခု အ‌ခြေခံအဆင့်သို့ ရောက်ရှိချိန်တွင်မူ ခွန်အားမှာ စုစုပေါင်း ၁၀ ရာခိုင်နှုန်းခန့်အထိ သိသိသာသာ မြင့်တက်သွားခြင်း ဖြစ်သည်။

"အူဒိုင်မှော်ကျောက်တုံးတွေကို ဒီလောက်အများကြီး စုပ်ယူခဲ့ရတာပဲ၊ ဒီလောက်တော့ ရှိသင့်တာပေါ့"

သူ အဆင့်တက်ရန်အတွက် အသုံးပြုခဲ့ရသည့် မတရားများပြားလှသော မှော်ကျောက်တုံးအရေအတွက်ကို ပြန်တွေးရင်း မက်စ်က ဆိုသည်။ Level 9 နှင့် Level 10 မှော်ကျောက်တုံးများကို မရေမတွက်နိုင်အောင် စုပ်ယူခဲ့ပြီးနောက်တွင်ပင် Level 6 မှ ရှေ့သို့တိုးမလာခဲ့ပေ။ Level 7 သို့ ရောက်ရန်အတွက် Level 1 အ‌ခြေခံအဆင့် မှော်ကျောက်တုံး ၅ တုံးကို ထပ်မံစုပ်ယူခဲ့ရသည်။ Level 8 သို့ ရောက်ရန်အတွက် Level 1 အ‌ခြေခံအဆင့် မှော်ကျောက်တုံး ရာနှင့်ချီပြီး Level 2 အ‌ခြေခံအဆင့် ကျောက်တုံး ၄ တုံးကို သုံးခဲ့ရ၏။ ထို့နောက် Level 9 သို့ ရောက်ရန် Level 2 ကျောက်တုံး အမြောက်အမြားနှင့် Level 3 ကျောက်တုံး ၆ တုံးကို အသုံးပြုခဲ့ရပြီး နောက်ဆုံး Level 10 သို့ ရောက်ရန်အတွက် Level 3 ကျောက်တုံး လက်တစ်ဆုပ်စာနှင့် Level 4 ကျောက်တုံးအချို့ကို ထပ်မံစုပ်ယူခဲ့ရသည်။

အဆင့်မတက်ဘဲ မှော်ကျောက်တုံးများစွာကို စုပ်ယူနေသည်ကို မြင်သောအခါ ဆရာမ ဆိုဖီယာပင်လျှင် သူ နောက်ပြောင်နေသည်လားဟု သံသယဝင်ခဲ့သော်လည်း ၎င်းမှာ အမှန်တရားသာ ဖြစ်သည်။ သူ့ကို အဆင့်တက်ရန် ကျောက်တုံးများ ထောက်ပံ့ပေးနေရသူမှာ သူမဖြစ်သောကြောင့် ဤအချက်ကို သူမ ကောင်းကောင်းကြီး သိလိုက်ရသည်။ မက်စ်က ကီလီယန်ကို အနိုင်ယူပြီး တစ်ပတ်အကြာတွင် ထိုသို့ဖြစ်ခဲ့ခြင်းဖြစ်သည်။ ထိုနေ့က သူမ၏ ပိုင်ဆိုင်မှုများစွာ ဆုံးရှုံးခဲ့ရသည်။

ထိုအချိန်မှစ၍ မက်စ်သည် အ‌ခြေခံအဆင့်သို့ တက်လှမ်းရန် ခန္ဓာကိုယ်အတွင်းရှိ မန္တန်စွမ်းအင်အားလုံးကို ဗဟိုအမှတ်တစ်ခုတည်းသို့ စုစည်းနိုင်ရန် ကြိုးစားခဲ့ရသည်။ အဲလစ် ပြောခဲ့သလိုပင် ၎င်းမှာ အလွန်ခက်ခဲလှသော်လည်း သုံးလနီးပါး ကြိုးစားအားထုတ်ခဲ့ပြီးနောက် နောက်ဆုံးတွင် သူ အောင်မြင်သွားခဲ့ပြီး အ‌ခြေခံအဆင့် Level 1 သို့ ရောက်ရှိခဲ့ပြီဖြစ်သည်။

'ငါ့ရဲ့ အခြေအနေ (status) တွေကို ကြည့်ရအောင်' မက်စ်က တွေးရင်း သူ၏ အခြေအနေပြ မျက်နှာပြင်ကားချပ်ကို ဖွင့်လိုက်သည်။

[မက်စ်] – အဆင့် (Rank): [အ‌ခြေခံအဆင့် (Apprentice)] – Level: 1 – အဆင့်အတန်းအစား (Class): [နယ်ပယ်‌ေစာင့်‌ေရှာက်သူ (Dimensional Keeper)] – ဘွဲ့ထူး (Title): [အတားအဆီးကို ကျော်လွှားသူ (Limitbreaker), ရှေးဦးအစွမ်း၏ အရှိန်အဝါ (Aura of Primordials)] – ရုပ်ပိုင်းဆိုင်ရာ (Physique): 9.6 – ဝိညာဉ်စွမ်းအား (Soul): 8.3 – စွမ်းအင် (Energy): 16.5 – စွမ်းရည်များ (Skills): —» အဆင့်အတန်းအစားဆိုင်ရာ စွမ်းရည်များ: [သုံးဖက်မြင်ခန္ဓာကိုယ်၊ မဟူရာအချိန်နယ်ပယ်၊ ဝိညာဉ်များ၏ နယ်ပယ်၊ မီးလျှံနယ်ပယ်] —» ရရှိထားသော စွမ်းရည်များ: [မှော်ဆန်သောဓားကျည်ဆန် ဆက်တိုက်ပစ်ခတ်မှု (Lvl-10)၊ အဆင့်မြင့် ဓားသိုင်းပညာ (Lvl-16)၊ ဝိညာဉ်အသွင်ဖြင့် ပြေးလွှားမှု (Lvl-12)၊ ကောင်းကင်ဘုံ မုန်တိုင်း (Lvl-8)၊ မီးလျှံဖန်တီးခြင်း (Lvl-100)၊ ငရဲမီးလျှံ လွှမ်းခြုံခြင်း (Lvl-11)၊ ထာဝရခံစစ်တံတိုင်း (Lvl-7)၊ ကောင်းကင်တွင် လွင့်မျောခြင်း (Lvl-17)] —» နားလည်သဘောပေါက်မှုများ: [ဓားအရှိန်အဝါ (Lvl-1)၊ မီးလျှံအရှိန်အဝါ (Lvl-1)] – သွေးမျိုးဆက်: [နဂါးနက် ပရမ်းပတာ သွေးမျိုးဆက်] —» နဂါးအနှစ်သာရ (Draconic Essence): [10] —» နဂါးအကြေးခွံ (Dragon Scales): [2]

ခဏတာ ကြည့်ရှုပြီးနောက် မက်စ်သည် အဆင့်သစ် (Novice Rank) နှင့် နှိုင်းယှဉ်ပါက အ‌ခြေခံအဆင့်တွင် အခြေအနေအချို့ ပြောင်းလဲသွားသည်ကို သတိပြုမိလိုက်သည်။

'အဆင့်သစ် Level 10 မှာတုန်းက ငါ့ရဲ့ stats တွေက ရုပ်ပိုင်းဆိုင်ရာ - ၉၊ ဝိညာဉ်စွမ်းအား - ၈ နဲ့ စွမ်းအင် - ၁၅ ရှိခဲ့တာ

' မက်စ်က တွေးတောရင်း ယခုတွင် ၎င်းတို့မှာ ၀.၆၊ ၀.၃ နှင့် ၁.၅ အသီးသီး တိုးလာသည်ကို မှတ်သားလိုက်သည်။ သို့သော် ကိန်းဂဏန်းများ တိုးလာမှုထက် လက်တွေ့တွင် ခံစားရသည့် ခွန်အားတိုးလာမှုက ပို၍ သိသာနေသည်ဟု သူ ခံစားရသည်။

'ဒါဆို အရင်အဆင့်ကနေ တိုးလာတာမှာ စွမ်းအင် (Energy) တစ်ခုပဲ ၀.၅ ဆိုပြီး သိသိသာသာ တိုးလာတာပေါ့။ ရုပ်ပိုင်းဆိုင်ရာနဲ့ ဝိညာဉ်စွမ်းအားကတော့ ၀.၁ စီပဲ တိုးလာတယ်။' အခြားသူများနှင့် နှိုင်းယှဉ်လျှင် သူ၏ အခြေအနေက မည်သို့ရှိမည်နည်းဟု သူ တွေးတောနေမိသည်။ သို့သော် stats များကို စစ်ဆေးပြီးနောက် တစ်ခုတော့ သူ သဘောပေါက်လိုက်သည်။ 'အဆင့်တစ်ခုချင်းစီမှာရှိတဲ့ stat တစ်မှတ်ရဲ့ တန်ဖိုးက အများကြီး ကွာခြားသွားတာပဲ။' မက်စ်က ကောက်ချက်ချလိုက်သည်။

စွမ်းရည်များဘက်သို့ အာရုံလှည့်လိုက်သောအခါ မက်စ် ကျေနပ်စွာ ပြုံးလိုက်မိသည်။ အတားအဆီးကို ကျော်လွှားသူ (Limitbreaker) အဆင့်သို့ ရောက်ရှိပြီးနောက် စွမ်းရည်များကို အဆင့်မြင့်အဆင့်များသို့ တစ်ဖန် မြှင့်တင်ပြီးနောက်တွင် သူသည် ခန္ဓာကိုယ်အတွင်း အူဒိုင်ဖြစ်ပေါ်လာစေရန်သာ အာရုံစိုက်ခဲ့သည်။

မက်စ်သည် 'မှော်ဆန်သောဓားကျည်ဆန် ဆက်တိုက်ပစ်ခတ်မှု' စွမ်းရည်ကို ကြည့်ရင်း "ဒီတစ်ခါ အဆင့်မြှင့်တင်မှုက အရင်အခေါက်ထက် ပိုအားကောင်းတယ်" ဟု ရေရွတ်လိုက်သည်။ သူ၏ လက်ကို ရှေ့သို့ ဆန့်ထုတ်လိုက်ရာ အပြာရောင်တောက်ပနေသော အရာဝတ္ထု သုံးခုသည် သူ့ရှေ့တွင် လွင့်မျောလာပြီး သူ၏ မျက်နှာကို အလင်းဖျော့ဖျော့ ဟပ်နေစေသည်။

ပထမတစ်ခုမှာ လက်ချောင်းအရွယ်အစားရှိ အပြာရောင် စက်လုံးလေးဖြစ်ပြီး 'မှော်ကျည်ဆန်' စွမ်းရည်မှ ထွက်ပေါ်လာခြင်းဖြစ်သည်။ ဒုတိယတစ်ခုမှာ သူ၏ လက်ဝါးခန့်ရှိသော အပြာရောင်ဓားငယ်လေးဖြစ်ပြီး တတိယတစ်ခုမှာမူ သူ၏ လက်မောင်းထက် ပိုကြီးမားသော ပုံမှန်အပြာရောင်ဓားကြီး ဖြစ်သည်။

'အဆင့်တက်လာတာနဲ့အမျှ ပိုပြီးတော့ပဲ ကြီးလာတာပေါ့' မက်စ်က အမြင့်စားအဆင့် ကို ရောက်လျှင် ဤထက် ပိုကြီးသော ဓားကို ရနိုင်မလားဟု တွေးတောနေမိသည်။ လက်ရှိတွင် သူ ရရှိထားသော အမြင့်ဆုံးစွမ်းရည်မှာ ဒဏ္ဍာရီအဆင့် ဖြစ်ပြီး ရှားပါးအဆင့် (Rare) စွမ်းရည် နှစ်ခုကို နှစ်ကြိမ်တိုင်တိုင် အဆင့်မြှင့်တင်ပြီးနောက် ရရှိခဲ့ခြင်းဖြစ်သည်။

၎င်းတို့မှာ 'ဒေါသတကြီး တိုက်ခိုက်မှု (Rare)' မှ 'ဆက်တိုက်တိုက်ခိုက်မှု (Epic)' သို့၊ ထိုမှတစ်ဆင့် 'ကောင်းကင်ဘုံ မုန်တိုင်း (Legendary)' သို့ ပြောင်းလဲသွားခြင်းဖြစ်သည်။ အခြားတစ်ခုမှာ 'အရပ်ဆယ်မျက်နှာ ကာကွယ်ရေးဒိုင်း (Rare)' မှ 'အရပ်ဆယ်မျက်နှာ ကာကွယ်ရေးဒိုင်းအမြင့်စားအဆင့်(Omni Guard - Epic)' သို့၊ ထိုမှတစ်ဆင့် 'ထာဝရခံစစ်တံတိုင်း ဒဏ္ဍာရီအဆင့်(Legendary)' သို့ တိုးတက်သွားခြင်းဖြစ်သည်။

'ကောင်းကင်ဘုံ မုန်တိုင်းက တကယ်ကို အားကောင်းတဲ့ စွမ်းရည်ပဲ' မက်စ်က ထိုစွမ်းရည်ကို လေ့ကျင့်စဉ်က မြင်ကွင်းကို ပြန်လည်တွေးတောရင်း မှတ်ချက်ချလိုက်သည်။ သို့သော် သူ အစိတ်လှုပ်ရှားဆုံး ဖြစ်ရသည်မှာ သူ၏ ခံစစ်စွမ်းရည် 'ထာဝရခံစစ်တံတိုင်း' ပင် ဖြစ်သည်။

'အခုဆိုရင် ငါ့မှာ ခံစစ်အလွှာ သုံးဆင့်ရှိသွားပြီ' မက်စ်က စိတ်လှုပ်ရှားစွာဖြင့် 'အရပ်ဆယ်မျက်နှာ ကာကွယ်ရေးဒိုင်း' ကို အသုံးပြုလိုက်ရာ သူ၏ ပတ်ပတ်လည်တွင် ခြောက်ထောင့်ပုံစံ အနီရောင်ဒိုင်း ဆယ်ခု ပေါ်လာသည်။ ၎င်းတို့မှာ အနီရောင်အလင်းများ ထွက်ပေါ်နေပြီး တစ်ပိုင်းတစ်စ ကြည်လင်နေကာ တစ်ခုချင်းစီမှာ မက်စ်၏ ကိုယ်လုံးခန့် ကြီးမားကြသည်။

ထို့နောက် မက်စ်သည် 'အရပ်ဆယ်မျက်နှာ ကာကွယ်ရေးဒိုင်း(Omni Guard)' စွမ်းရည်ကို သုံးလိုက်ရာ စက်လုံးပုံစံ ဒိုင်းတစ်ခုက သူ့ကို လုံးဝ လွှမ်းခြုံသွားသည်။ ၎င်းသည် အစိမ်းရောင် အရှိန်အဝါဖြင့် တောက်ပနေပြီး အရင်တစ်ခုနှင့်မတူဘဲ လုံးဝ ကြည်လင်နေသည်။ နောက်ဆုံးတွင် သူသည် 'ထာဝရခံစစ်တံတိုင်း' စွမ်းရည်ကို သုံးလိုက်ရာ မူလစစ်မြေပြင်သုံး ဒိုင်းကြီးများကဲ့သို့ ဝိုင်းစက်သော ဒိုင်းတစ်ခု သူ့ရှေ့တွင် ပေါ်လာတော့သည်။

'ဒီထာဝရခံစစ်တံတိုင်းက ထူးဆန်းတဲ့ ဒိုင်းစွမ်းရည်တစ်ခုပဲ။ ဒါပေမဲ့ ဒါက ဒဏ္ဍာရီအဆင့် စွမ်းရည်ဖြစ်လို့ သူ့ရဲ့ အပြည့်အဝ ခံစစ်စွမ်းအားက ရှေ့က နှစ်ခုထက် ပိုအားကောင်းမယ်လို့ ငါ ယုံကြည်တယ်' ဟု မက်စ်က တွေးလိုက်သည်။

သူ၏ အဆင့်တက်လာမှုအပေါ် ကျေနပ်နေရင်း မက်စ်က ကိုယ့်ဘာကိုယ် ရေရွတ်လိုက်သည်။ "အဖွဲ့အစည်းများ၏ ထိပ်သီးအစည်းအဝေး မစခင် တစ်ပတ်လောက် လိုသေးတယ်၊ အဲဒီအတောအတွင်း မန္တန်စွမ်းအင်မျှော်စင် (Rune Tower) ကို သွားချင်သေးတယ်။"

လွန်ခဲ့သည့် သုံးလအတွင်း သူသည် စွမ်းရည်လေ့ကျင့်ခြင်းနှင့် ကျင့်ကြံခြင်းတို့ကိုသာမက မန္တန်စွမ်းအင်သင်္ကေတများစာအုပ်၊ မန္တန်လမ်းကြောင်းများနှင့် မန္တန်တည်ဆောက်ပုံများ စာအုပ်များကိုလည်း အသေအချာ လေ့လာခဲ့ပြီး အရာများစွာကို နားလည်သဘောပေါက်ခဲ့သည်။ ဂိုလမ်များကို သုတေသနပြုနေသည့် အရူးသိပ္ပံပညာရှင် ဒန်နီရယ်လ် ဝင်းချက်စတာ ၏ အသိပညာကို မမီသေးသော်လည်း အနည်းဆုံးတော့ Level 1 မန္တန်သင်္ကေတများကို ဖန်တီးနိုင်မည်ဟု သူ ယုံကြည်ချက်ရှိနေသည်။ သို့သော် လိုအပ်သည့် ပစ္စည်းကိရိယာများ မရှိသောကြောင့် မန္တန်တစ်ခုကိုမျှ လက်တွေ့ မဖန်တီးရသေးပေ။ ထို့ကြောင့်လည်း သူ မန္တန်စွမ်းအင်မျှော်စင်သို့ သွားချင်နေခြင်းဖြစ်သည်။

"မန္တန်စွမ်းအင်မျှော်စင်မှာပဲ တွေ့နိုင်တဲ့ မန္တန်စွမ်းအင်ကျောက်တုံး (Runestone) ဆိုတာလည်း ရှိသေးတယ်" ဟု မက်စ်က ဆိုသည်။

မန္တန်သင်္ကေတများ စာအုပ်တွင် ဖတ်ရသလောက် မန္တန်သင်္ကေတ (Rune) နှင့် မန္တန်စွမ်းအင်ကျောက်တုံး (Runestone) မှာ မတူညီသောအရာနှစ်ခု ဖြစ်သည်။ မန္တန်သင်္ကေတ ဆိုသည်မှာ ဝိညာဉ်စွမ်းအားကို အသုံးပြု၍ စက္ကူပေါ်တွင် ရေးဆွဲထားသည့် နက်နဲသော အမှတ်အသားတစ်ခုမျှသာ ဖြစ်ပြီး မန္တန်စွမ်းအင်ကျောက်တုံးမှာမူ လူသားများ အလွယ်တကူ အသုံးပြုနိုင်ရန်အတွက် (တစ်ခါသုံးစွမ်းရည်ကဲ့သို့) မန္တန်သင်္ကေတကို 'Chaos Stone' ဟုခေါ်သော ရှားပါးကျောက်တုံးတစ်မျိုးနှင့် ပေါင်းစပ်ထားခြင်း ဖြစ်သည်။

မက်စ်သည် ထို ရှားပါးကျောက်တူံး (Chaos Stone )တွင် ထူးခြားချက်တစ်ခုခု ရှိမည်ဟု သေချာပေါက် ယုံကြည်နေသည်။ ထိုနေ့က သူ မန္တန်စွမ်းအင်ကျောက်တုံးကို စုပ်ယူလိုက်ချိန်တွင် သူ၏ နဂါးအကြေးခွံ ၁ ခု တိုးလာခဲ့ခြင်းမှာ ထိုကျောက်တုံးကြောင့်ဟု သူ ထင်နေသည်။ ဤအရာအားလုံးမှာ သူ၏ တွေးထင်ချက်သာ ဖြစ်သော်လည်း အရာအားလုံး သေချာစေရန် မန္တန်စွမ်းအင်မျှော်စင်သို့ သူ သွားရမည်ဖြစ်သည်။

အချိန်ကို စစ်ဆေးကြည့်ရာ နံနက်စောစောပိုင်းသာ ရှိသေးသည်။ 'ငါ့ရဲ့ မီးလျှံနယ်ပယ်ကို စစ်ဆေးဖို့နဲ့ မန္တန်စွမ်းအင်မျှော်စင်ကို သွားဖို့ အချိန်အလုံအလောက် ရှိပါသေးတယ်' ဟု တွေးကာ သူ၏ နယ်ပယ်အသစ်ထဲသို့ မဝင်ရောက်မီ ဤအကြောင်းကို အဲလစ်ထံသို့ မက်ဆေ့ချ် ပို့လိုက်တော့သည်။