အခန်း (၈၄) အခြားသော မျိုးနွယ်စုများ

မက်စ်သည် စစ်သည်တော်နယ်ပယ် ကုဗတုံး (Battle Cube) ထဲမှ ပေါ့ပေါ့ပါးပါးပင် ပြန်ထွက်လာစဉ် ဓားအသုံးပြုသူဘလိတ်မိသားစု (Blade Family) ၏ ရုပ်ဆိုးအကျည်းတန်လှသော မျက်နှာများကို မြင်လိုက်ရသည်။ “ဘာဖြစ်ကြတာလဲ? အားလုံးပဲ အဆင်ပြေကြရဲ့လား?” ဟု သူက စိုးရိမ်တကြီးလေသံဖြင့် မေးလိုက်သော်လည်း ထိုလေသံနောက်ကွယ်တွင် လှောင်ပြောင်မှုများ ကပ်ပါနေသည်။ ၎င်းက ဘလိတ်မိသားစုဝင်များကို ဒေါသကြောင့် သွားကြိတ်မိစေသည်။ မက်စ်ကို ဒီနေရာမှာတင် ဝိုင်းရိုက်ချင်စိတ် ပေါက်လာကြသည်အထိ ပြင်းထန်သော ဒေါသကို ခံစားလိုက်ရသည်။

အန်လန် (Allen) နှင့် အယ်လီနာ ဘလိတ် (Elena Blade) တို့နှစ်ဦးသာ တည်ငြိမ်နေဆဲဖြစ်သည်။ အန်လန်သည် မက်စ်ကို ခံစားချက်ကင်းမဲ့သော မျက်လုံးများဖြင့် စိုက်ကြည့်ကာ “မင်း တော်ပါတယ်... ဒါပေမဲ့ ကီလီယန် (Killian) ကို ဒီလောက်ထိ ညှဉ်းပန်းနှိပ်စက်ခဲ့တာမျိုး မလုပ်သင့်ဘူး”

မက်စ်က ပခုံးတွန့်လိုက်ပြီး အမုန်းတရားများ ပြည့်နှက်နေသော မျက်နှာဖြင့် အန်လန်ကို ပြန်ကြည့်သည်။ “ခင်ဗျားတို့ကျတော့ရော? ခင်ဗျားတို့ စိတ်ကြိုက်အချိန်မရွေး ကျွန်တော့်ကို လာသတ်လို့ရတယ်လို့ ထင်နေတာလား? ကျွန်တော်ဝင်ထားတဲ့ အဖွဲ့အစည်းကနေ ဆွဲထုတ်ပြီး ခင်ဗျားတို့ဆီ ခေါ်သွားမယ်၊ ပြီးမှ ကျွန်တော့်ကို ပြန်သတ်မယ်ပေါ့ ဟုတ်လား?” သူ၏ အမူအရာက ခက်ထန်သွားသည်။ “အနည်းဆုံးတော့ ကျွန်တော်လုပ်ခဲ့တာက ခင်ဗျားတို့ လုပ်ခဲ့တာတွေထက်စာရင် အများကြီး တော်ပါသေးတယ်”

အန်လန်က မက်စ်ကို စေ့စေ့ကြည့်ပြီး တည်ငြိမ်စွာပင် ပြောလိုက်သည်။ “အရာအားလုံးမှာ သူ့အကျိုးဆက်နဲ့သူ ရှိတယ်” ထိုသို့ပြောပြီးနောက် သူသည် လှည့်ထွက်သွားတော့သည်။ အယ်လီနာက ကျန်မိသားစုဝင်များကို ဦးဆောင်ကာ အန်လန်နောက်မှ လိုက်ပါသွားပြီး မက်စ်၏ မျက်စိရှေ့မှ ပျောက်ကွယ်သွားကြသည်။

“ရှင် နိုင်သွားပြီပဲ” အဲလစ် (Alice) က

မက်စ်အနားသို့ လျှောက်လာရင်း ပြောလိုက်သည်။ မက်စ်က ဂုဏ်ယူစွာ ပြုံးလိုက်ပြီး “ဒါပေါ့... ငါ နိုင်မှာပဲလေ၊ ဒါက သေချာပြီးသားကိစ္စပဲ”

နာရှ် (Nash) နှင့် အဲရစ်ကာ (Erica) တို့လည်း မက်စ်ရှေ့သို့ ရောက်လာကြပြီး မျက်နှာတွင် အပြုံးများ ပြည့်နှက်နေသည်။ “မင်းမှာ ဒီလောက် အစွမ်းရှိလိမ့်မယ်လို့ ငါ မမျှော်လင့်ထားဘူး” နာရှ်က ပြုံးလျက် ပြောသော်လည်း သူ၏ လေသံတွင် လှောင်ပြောင်မှုများ ပါဝင်နေသည်။ “ဒါပေမဲ့ မင်း ရန်စဖို့ လူရွေးမှားသွားပြီ”

“ဘလိတ်တွေက ဒီမိသားစုကြီး လေးစုထဲမှာ အရက်စက်ဆုံးပဲ” အဲရစ်ကာ၏ အမူအရာက တည်ကြည်သွားသည်။ “သူတို့ မင်းကို မျက်စိကျသွားပြီဆိုရင်တော့ ဖီးနစ်အဖွဲ့ချုပ် (Phoenix Order) ထဲမှာပဲ အချိန်ပြည့် ပုန်းနေတာ အကောင်းဆုံးပဲ။ မဟုတ်ရင် ဘယ်အချိန်မှာ အသတ်ခံရမလဲဆိုတာ မင်း သိမှာမဟုတ်ဘူး”

မက်စ်က သက်ပြင်းချကာ ပခုံးတွန့်ပြလိုက်သည်။ “ဒါက ငါ့အပြစ်မှ မဟုတ်တာ။ အရင်ဆုံး သူတို့က ငါ့ကို လာသတ်တယ်၊ ပြီးတော့မှ သူတို့မိသားစုထဲ ဝင်ခိုင်းပြန်ရော။ သူတို့လုပ်ရပ်တွေက ငါ့အတွက် အန္တရာယ်ပဲ ဖြစ်နေတာလေ၊ ဒါကြောင့် ငါက ပြန်တိုက်ခိုက်ရုံကလွဲလို့ တခြားရွေးချယ်စရာ မရှိဘူး”

မက်စ်၏ စကားကြောင့် နာရှ်က ပြုံးလိုက်သော်လည်း သူ၏ အမူအရာက ယုတ်မာသော အသွင်သို့ ပြောင်းသွားသည်။ “ဒါပေမဲ့ မင်း ကီလီယန်ကို လုပ်လိုက်တာကတော့ တကယ့်ကို အားရစရာပဲ။ သူက ဘလိတ်မိသားစုဝင် ဖြစ်နေပြီးတော့ လူကောင်းလို ဟန်ဆောင်နေတာကို ငါ တစ်ခါမှ သဘောမကျခဲ့ဘူး။ မင်း လုပ်လိုက်တာကို ကြည့်ပြီး ငါ တော်တော်ကျေနပ်သွားတယ်”

မက်စ်က မျက်လုံးပြူးကာ သူ့ကို ကြည့်လိုက်သော်လည်း သူ စကားမပြောရသေးမီမှာပင် နာရှ်က “အော်... ဒါပေမဲ့ ဒီကိစ္စက ငါ့အဖွဲ့အစည်းက မင်းဆီကနေ လိုချင်တဲ့အရာကို ပြောင်းလဲသွားစေမှာ မဟုတ်ဘူးနော်၊ ဒါကြောင့် စိတ်မကူးနဲ့ဦး”

“နှမြောစရာပဲ... ငါကတော့ မင်းက လွှတ်ပေးတော့မလားလို့ အောက်မေ့နေတာ” မက်စ်က ဟန်ဆောင်ပန်ဆောင် နှမြောတသဟန်ဖြင့် ခေါင်းခါပြလိုက်သည်။ “ဘာပဲဖြစ်ဖြစ် ကိုယ့်ကိုယ်ကိုယ် ဂရုစိုက်ပါဦး” အဲရစ်ကာက အဓိပ္ပာယ်ပါပါ ပြုံးရင်း ပြောလိုက်သည်။ “မကြာခင် ပြန်တွေ့ကြမယ်... အရှေ့ပိုင်းဒေသရဲ့ စူပါစတားသစ်လေး” ထိုသို့ပြောပြီးနောက် သူမ ထွက်ခွာသွားသည်။ နာရှ်က လက်ညှိုး၊ လက်ခလယ်ဖြင့် သူ၏ မျက်လုံးကို ထောက်ပြပြီးနောက် မက်စ်ကို ညွှန်ပြကာ အဲရစ်ကာနောက်သို့ လိုက်သွားတော့သည်။

မက်စ်သည် သူတို့ ထွက်သွားသည်ကို ကြည့်ကာ ခပ်တိုးတိုး ရယ်မောလိုက်သည်။ “ခြင်္သေ့နှလုံးသား (Lionheart) အဖွဲ့ကလည်း သိပ်တော့ မဆိုးလှပါဘူး”

အဲလစ်က ခေါင်းညိတ်သည်။ “သူတို့က နည်းနည်းတော့ မာနကြီးကြပေမဲ့ လူကောင်းတွေပါ။ တကယ့် ပြဿနာက ငါတို့အဖွဲ့ရဲ့ ပြိုင်ဘက်ရန်သူဖြစ်တဲ့ အစိမ်းရောင်စွမ်းအင်ရဲရင့်သူများအဖွဲ့အစည်း (Emerald Legion) နဲ့ ထိပ်သီးအဖွဲ့ ငါးဖွဲ့ထဲမှာ လျှို့ဝှက်ချက်အများဆုံးနဲ့ အကြောက်ရဆုံးဖြစ်တဲ့ နတ်မှောင်သောပဒုမ္မာကြာ (Black Lotus) အဖွဲ့ပဲ”

မက်စ်က ခေါင်းညိတ်လိုက်ပြီး မေးလိုက်သည်။ “ရဲရင့်သောမှော်ဓါးရှင်များအဖွဲ့ (Knights of Valor) ကရော? သူတို့က လူကောင်းတွေလား?”

အဲလစ်က “သူတို့ကတော့ အချိန်အများစုမှာ ကြားနေပဲ နေကြတာ။ ဒါပေမဲ့ သူတို့က ကြယ်စင်ကုန်သည်များမဟာမိတ်အဖွဲ့ (Stellar Merchant Alliance) နဲ့ အဆက်အသွယ်ရှိတယ်” ဟု ပြောသည်။

“ကြယ်စင်ကုန်သည်များမဟာမိတ်အဖွဲ့? အဲဒါက ဘယ်လို အင်အားစုမျိုးလဲ?” ထိုအမည်ကို ပထမဆုံးအကြိမ် ကြားဖူးခြင်း ဖြစ်သောကြောင့် မက်စ်က မေးလိုက်သည်။

အဲလစ်က မက်စ်ကို ကြည့်ကာ ဖြေလိုက်သည်။ “ဗာလိုရာ တိုက်ကြီး (Valora Continent) မှာ ကြားနေအဖွဲ့အစည်း နှစ်ခုရှိတယ်။ အဲဒါတွေက ကြယ်စင်ကုန်သည်များမဟာမိတ်အဖွဲ့ နဲ့ မန္တန်စွမ်းအင်မျှော်စင် (Rune Tower) ပဲ။ အခြေခံအားဖြင့် ဒေသလေးခုကြားက ကုန်သွယ်မှုမှန်သမျှကို ကြယ်စင်ကုန်သည်များမဟာမိတ်အဖွဲ့က ကိုင်တွယ်ပြီး မန္တန်စွမ်းအင်မျှော်စင်ကတော့ ဒေသလေးခုလုံးအတွက် မန္တန်စွမ်းအင်သင်္ကေတ (Rune) ပစ္စည်းတွေ ထောက်ပံ့ပေးတာကို တာဝန်ယူတယ်”

မက်စ်သည် သူသိလိုက်ရသော သတင်းအချက်အလက်သစ်များကို စဉ်းစားဆင်ခြင်နေသည်။ “ဒေသလေးခုဆိုတာ ငါတို့နေတဲ့ အရှေ့ပိုင်းဒေသ၊ အနောက်ပိုင်း၊ မြောက်ပိုင်းနဲ့ နောက်ဆုံး တောင်ပိုင်းဒေသတွေကို ပြောတာ မဟုတ်လား?”

အဲလစ်က ခေါင်းညိတ်သည်။ “ဗာလိုရာ တိုက်ကြီးက တိုက်ကြီးတစ်ခုတည်းဆိုပေမဲ့ ဟိုးအရင်ကတည်းက ဒေသလေးခုအဖြစ် ပိုင်းခြားထားခဲ့တာ”

မက်စ်သည် ဤကမ္ဘာအကြောင်း ပိုမိုနားလည်လာသည်နှင့်အမျှ အံ့သြမိသော်လည်း သူ၏စိတ်ထဲတွင် နောက်ထပ် မေးခွန်းတစ်ခု ပေါ်လာသည်။ “ဒါဆို ပျောက်ဆုံးနေသော တိုက်ကြီး (Lost Continent) က ဘယ်မှာလဲ?”

အဲလစ်က ခေါင်းခါပြသည်။ “အဲဒါကိုတော့ ငါလည်း မသိဘူး။ ဒါပေမဲ့ ပျောက်ဆုံးနေသော တိုက်ကြီးက ငါတို့ကမ္ဘာက နောက်ထပ် တိုက်ကြီးတစ်ခုလို့တော့ ကြားဖူးတယ်။ အဲဒီတိုက်ကြီးရဲ့ အထူးခြားဆုံးနဲ့ အလျှို့ဝှက်ဆုံး အချက်က ဘာလဲဆိုတာ မင်း သိလား?”

မက်စ်သည် အလွန် စိတ်ဝင်စားသွားကာ စိတ်အားထက်သန်စွာဖြင့် “ဘာလဲဟ?” ဟု မေးလိုက်သည်။

အဲလစ်က အရှိန်မြှင့်ရန်အတွက် အသက်ပြင်းပြင်းတစ်ချက် ရှူလိုက်ပြီးမှ “အပြင်ရောက်မှ ပြောပြမယ်” ဟု ဆိုကာ သူမ၏ ကုဗတုံးဆီသို့ အမြန်လျှောက်သွားတော့သည်။

“...”

“တောက်... သူ ငါ့ကို ပြန်ပညာပေးသွားတာလား?” မက်စ်က ဘေးပတ်ဝန်းကျင်က လူအုပ်ကို ကြည့်ကာ ညည်းတွားလိုက်ပြီးနောက် သူ၏ ကုဗတုံးထဲသို့ ဝင်ရောက်ကာ စစ်သည်တော်နယ်ပယ် (Battle Realm) မှ ထွက်ခွာခဲ့သည်။

စစ်သည်တော်နယ်ပယ် ပြင်ပတွင် မက်စ်ကို ဖီးနစ်အဖွဲ့ချုပ်မှ ကြီးမားသော လူအုပ်ကြီးက ကြိုဆိုနေကြသည်။

“ဂုဏ်ယူပါတယ် မက်စ်! မင်းက အခု စစ်သည်တော်နယ်ပယ်ရဲ့ အဆင့်သတ်မှတ်ချက် (Rankings) မှာ အဆင့်သစ် (Novice Rank) နံပါတ်တစ် ပါရမီရှင် ဖြစ်သွားပြီ!”

“မက်စ်! ငါတို့အုပ်စုနဲ့ အတူတူ သွားစားရအောင်!”

“မဟုတ်ဘူး! မက်စ်က ငါတို့ တူအသုံးပြုသူဌာန (Hammer Faction) နဲ့ ညစာစားမှာ!”

“မင်းတို့က နောက်နေတာလား? သူက ဓားအသုံးပြုသူဌာန (Blade Division) ကို လာလည်မှာဟ!”

အဖွဲ့ဝင်များက မက်စ်ကို သူတို့အုပ်စုများ၊ ဌာနများဆီသို့ ဖိတ်ခေါ်နေကြသဖြင့် မက်စ် ခေါင်းကုတ်မိသွားသည်။ ကီလီယန်ကို အနိုင်ယူလိုက်ခြင်းက သူ၏ လူကြိုက်များမှုကို အဆင့်သစ်တစ်ခုအထိ မြှင့်တင်ပေးလိုက်လိမ့်မည်ဟု သူ မမျှော်လင့်ထားခဲ့ပေ။

“သွားကြရအောင်” အဲလစ် အမြန်ရောက်လာပြီး မက်စ်၏ လက်ကိုဆွဲကာ လူအုပ်ထဲမှ ဆွဲထုတ်သွားသည်။

ဖီးနစ်မြို့တော် (Phoenix City) ရှိ တိတ်ဆိတ်သော စားသောက်ဆိုင်တစ်ခုတွင် အဲလစ်နှင့် မက်စ်တို့သည် သူတို့နောက်ကို လူအုပ်ကြီး လိုက်မလာတော့သဖြင့် သက်ပြင်းချနိုင်တော့သည်။

“လူကြိုက်များလွန်းတာလည်း မကောင်းပါဘူး” မက်စ်က သူ့ဘာသာ ညည်းတွားရင်း အဲလစ်ဘက်သို့ လှည့်လိုက်သည်။ “ပြောပါဦး... ပျောက်ဆုံးနေသော တိုက်ကြီးအကြောင်း ဘာပြောမလို့လဲ?”

အဲလစ်က လက်စားချေလိုက်ရသကဲ့သို့ ပြုံးနေသည်။ ထိုအမူအရာကို မြင်လိုက်ရသဖြင့် မက်စ်သည် နောင်တွင် ပြန်လည်အသာစီးရအောင် လုပ်မည်ဟု တေးထားလိုက်သည်။

“မအဲလစ်ခင်ဗျာ... ဒီသနားစရာကောင်းတဲ့ လူသား သိချင်နေတာလေးကို ကျေးဇူးပြုပြီး ပြောပြပေးပါဦး” မက်စ်က သွားကြိတ်ရင်း ပြောလိုက်သည်။

အဲလစ်က ဂုဏ်ယူစွာ ပြုံးပြီး “မင်းက ဒီလောက်တောင် ရိုးရိုးသားသား တောင်းဆိုနေမှတော့ ငါ ပြောပြရမှာပေါ့” ဟု ဆိုသည်။ သူမ၏ အမူအရာက လျှို့ဝှက်ဆန်းကြယ်သွားကာ “ပျောက်ဆုံးနေသော တိုက်ကြီးမှာ လူသားတွေအပြင် တခြားမျိုးနွယ်စုတွေ ဖြစ်တဲ့ မိစ္ဆာတွေ၊ ဒဏ္ဍာရီလာလူပုံစံသတ္တဝါ(Elf) တွေ စသဖြင့် အများကြီး နေထိုင်ကြတယ်လို့ ငါ ကြားဖူးတယ်”

“အခြားမျိုးနွယ်စုတွေ... မိစ္ဆာတွေ၊ အက်လ်ဖ်တွေ ဟုတ်လား?” မက်စ် မယုံနိုင်ဘဲ မျက်လုံးပြူးသွားသည်။ လူသားတွေအပြင် တခြားမျိုးနွယ်စုတွေ ရှိနေလိမ့်မည်ဟု သူ တစ်ခါမှ မစဉ်းစားမိခဲ့ပေ။ ယခုအခါ အပြင်လောကတွင် အခြားသော မျိုးနွယ်စုများ ရှိနေကြောင်း သိလိုက်ရသဖြင့် မက်စ်သည် ၎င်းတို့နှင့် ဤကမ္ဘာကြီးအကြောင်းကို အလွန် စိတ်ဝင်စားသွားသည်။

သို့သော် သူ၏ အမူအရာက အနည်းငယ် တည်ကြည်သွားသည်။ “အခြားမျိုးနွယ်စုတွေက လူသားတွေနဲ့ အဆင်မပြေကြဘူးလို့ ငါ ထင်တယ်။ ဒါဆို ဘာလို့ ငါတို့က သုံးနှစ်တစ်ကြိမ် ပါရမီရှင်တွေကို ပျောက်ဆုံးနေသော တိုက်ကြီးဆီ ပို့နေကြတာလဲ?”

အဲလစ်က ပခုံးတွန့်ပြသည်။ “အဲဒါကိုတော့ ငါလည်း မသိဘူး။ ဒါပေမဲ့ ဗာလိုရာ တိုက်ကြီးက ပျောက်ဆုံးနေသော တိုက်ကြီးကို အလွန်တန်ဖိုးထားတယ်ဆိုတာတော့ သိတယ်။ အဲဒီမှာ ဘာပဲရှိနေရှိနေ... သူတို့က စွန့်စားမှုတွေကို ခံယူပြီး ပါရမီရှင်တွေကို စူးစမ်းလေ့လာဖို့ ပို့ကြတာပဲ”

မက်စ်က “အော်... အဲလိုလား” ဟု ခပ်တိုးတိုး ရေရွတ်လိုက်သည်။

‘ငါလည်း ပျောက်ဆုံးနေသော တိုက်ကြီးကို သွားရမှာပဲ၊ အဲဒီကျရင်တော့ အကုန်လုံးကို သိရမှာပါ’ ဟု သူ တွေးလိုက်သည်။ သူ၏ ညီမနှင့် ပတ်သက်ပြီး ရရှိထားသော သတင်းစကားသည် မှားယွင်းနေနိုင်သည်ဟုလည်း သူ သတိပြုမိသည်။ သူ့မှာ တခြား သဲလွန်စ မရှိသေးသဖြင့် လောလောဆယ်တွင် သိထားရသမျှနှင့်ပင် ကျေနပ်နေရမည် ဖြစ်သည်။

“အခု မင်းရဲ့ အစီအစဉ်က ဘာလဲ?” အဲလစ်က မက်စ်ကို မေးသည်။

မက်စ် ခဏမျှ စဉ်းစားပြီး ပြန်ဖြေလိုက်သည်။ “ကီလီယန်ကို အနိုင်ယူပြီးရင် ဆရာမ ဆိုဖီယာပေးမယ်လို့ ကတိပေးထားတဲ့ မှော်စွမ်းအင် ကျောက်တုံး (Mana Crystal) တွေ အကုန်လုံးကို သုံးပြီး အ‌ခြေခံအဆင့် (Apprentice Rank) ရောက်အောင် အဆင့်တက်ဖို့ ကြိုးစားရမှာပေါ့”

အဲလစ်က မျက်ခုံးပင့်လိုက်ပြီး အမူအရာက တည်ကြည်သွားသည်။ “အ‌ခြေခံအဆင့်ကို ဘယ်လို အဆင့်တက်ရမလဲဆိုတာ မင်း သိလား?”

“မှော်ကျောက်တုံးတွေကို စုပ်ယူရုံပဲ မဟုတ်ဘူးလား?” မက်စ်က မေးလိုက်သည်။

အဲလစ်က ခေါင်းခါပြီး ရှင်းပြသည်။ “မင်း Level 10 ရောက်သွားပြီဆိုရင် မှော်ကျောက်တုံးတွေက မင်းအတွက် အသုံးမဝင်တော့ဘူး။ အဲဒီအချိန်ကျရင် မင်းရဲ့ ခန္ဓာကိုယ်ထဲမှာရှိတဲ့ မန္တန်စွမ်းအင် (Mana) တွေကို ထိန်းချုပ်ပြီး အူဒိုင်မှော်‌ကျောက်တုံး (Core) တစ်ခု ဖြစ်လာအောင် အချိန်ပေးပြီး ပုံဖော်ရမယ်။ အဲဒီ အူဒိုင်ကျောက်တုံးကို ပုံဖော်နိုင်တဲ့အချိန်ကျမှ မင်းက အ‌ခြေခံအဆင့်ကို ရောက်မှာ”

မက်စ်က ရှက်ကိုးရှက်ကန်း ပြုံးကာ မေးလိုက်သည်။ “အဲဒီအတွက် လမ်းညွှန်စာအုပ် တစ်ခုခုတော့ ရှိမှာပါနော်၊ ဟုတ်တယ်မလား?”

အဲလစ်က တဟားဟား ရယ်မောလိုက်သည်။ “ရှိတာပေါ့၊ ဒါပေမဲ့ ငါကတော့ မင်းကို ပေးလို့မရဘူး။ အဲဒါကို မမဆိုဖီယာကိုပဲ မေးကြည့်လိုက်”

မက်စ် ခေါင်းညိတ်လိုက်သည်။ “ဒါဆိုရင်တော့ ငါ တော်တော်ကြာကြာ လေ့ကျင့်ရတော့မယ် ထင်တယ်”

“ဒါပေမဲ့ နောက်သုံးလနေရင် ကျင်းပမယ့် အဖွဲ့အစည်းများ၏ ထိပ်သီးအစည်းအဝေး (The Guild Summit) မတိုင်ခင် အဆင့်တက်နိုင်အောင်တော့ လုပ်ဦးနော်” အဲလစ်က သတိပေးလိုက်သည်။ “အဲဒီ အစည်းအဝေးကို အ‌ခြေခံအဆင့် ရှိသူတွေပဲ ပါဝင်ဆင်နွှဲခွင့် ရှိတာ”

မက်စ်က ပြတ်သားသော စိတ်ဓာတ်ဖြင့် ပြောလိုက်သည်။ “ငါ အစွမ်းကုန် ကြိုးစားမှာပါ”