အခန်း (၇၆) ပြတ်သားသော ကြေညာချက်
အဲလစ်မှာ မက်စ်၏ ရဲတင်းလွန်းသော စကားများကြောင့် အံ့အားသင့်သွားကာ ပါးစပ်ကို လက်ဖြင့်အုပ်ထားမိပြီး မျက်လုံးများမှာလည်း ဝိုင်းစက်သွားတော့သည်။ သူမအနီးရှိ နာရှ်နှင့် အဲရစ်ကာတို့မှာလည်း တစ်ယောက်ကိုတစ်ယောက် မယုံကြည်နိုင်သလို ကြည့်လိုက်ကြရင်း ကြားလိုက်ရသည့် စကားကို အတော်နှင့် အစာမကြေနိုင် ဖြစ်နေကြသည်။ မက်စ်၏ လေသံမှာ ထက်မြက်ပြီး နောင်တကင်းမဲ့နေကာ အလွန်တရာ အရှက်ရစေသည့် အသွင်ဆောင်နေ၏။ အရှေ့ပိုင်းဒေသတွင် ဩဇာအာဏာ အကြီးမားဆုံးနှင့် အကြောက်ရဆုံး မိသားစုတစ်ခုဖြစ်သည့် 'ဓားအသုံးပြုသူဘလိတ်မိသားစု' ကို ဤမျှ ပြောင်ပြောင်တင်းတင်း စော်ကားလိမ့်မည်ဟု မည်သူမျှ မထင်ထားခဲ့ကြချေ။ သူတို့ကို "ခွေးမတွေ၊ ခွေးေကာင်တွေ" ဟု ခေါ်ဝေါ်လိုက်ခြင်းမှာ ရဲတင်းရုံတင်မကဘဲ ကိုယ့်ကိုယ်ကိုယ် သတ်သေရန် ကြိုးစားသည့် မောက်မာမှုမျိုးပင် ဖြစ်နေသည်။ မက်စ်၏ စကားကို ကြားလိုက်ရချိန်တွင် အန်တွန်၏ အပြုံးများ ပျောက်ကွယ်သွားပြီး အေးစက်ခက်ထန်သည့် မျက်နှာပေးဖြင့် အစားထိုးဝင်ရောက်လာသည်။
"မင်းက တော်တော်လေး မောက်မာတာပဲ... ငါ့ညီမ ပြောပြတာ တကယ်ပဲပေါ့"
မက်စ်က ပုခုံးတွန့်ပြလိုက်သည်။ "ခွေးမနဲ့ ခွေးသားဆိုတာ မိသားစုတစ်ခုတည်းက လာတာပဲလေ... အဲ့တော့ ဘာထူးမှာမလို့လဲ ဟုတ်တယ်မလား?" သူက အန်တွန်နှင့် အယ်လီနာ ဘလိတ်တို့ကို ကြည့်ကာ လှောင်ပြုံးပြုံးလိုက်သည်။
အန်တွန်က မက်စ်၏စကားကို ဂရုမစိုက်သယောင် ပြုံးလိုက်ရင်း "မင်းက တော်တော့တော်ပါတယ်၊ ဒါပေမဲ့ ပုရွက်ဆိတ်တစ်ကောင်ရဲ့ စကားကို ငါက အလေးထားနေမှာ မဟုတ်ဘူး။ ငါပြောတာကိုသာ မှတ်ထားလိုက်ပါ" ဟု ပြောကာ အယ်လီနာနှင့် သူ့လူစုကိုခေါ်၍ ထွက်ခွာရန် ပြင်လိုက်သည်။ သို့သော် မက်စ်က သူတို့ကို လွယ်လွယ်နှင့် ထွက်သွားခွင့်မပြုခဲ့ပေ။
"ခွေးသားနဲ့ ခွေးမတို့... ကီလီယန်ကို သွားပြောလိုက်၊ ငါ သူနဲ့ တိုက်ခိုက်ဖို့ စိန်ခေါ်တယ်လို့!" မက်စ်က သူ့အသံကို လူအများကြားအောင် ဟစ်အော်လိုက်သည်။ "သူ့ကို ဘလိတ်မိသားစုရဲ့ အစွမ်းကုန် ပြင်ဆင်ထားခိုင်းလိုက်၊ မဟုတ်ရင် ငါ မက်စ်မက်စ်မော်ဂန်က ငါတို့ရဲ့ တိုက်ပွဲမှာ သူ့ကို လွယ်လွယ်နဲ့ လွှတ်ပေးမှာ မဟုတ်ဘူး!"
မက်စ်၏ ကြေညာချက်ကြောင့် အန်တွန် ခတ္တရပ်သွားသော်လည်း နောက်လှည့်မကြည့်ဘဲ မက်စ်၏ မျက်စိရှေ့မှ ပျောက်ကွယ်သွားတော့သည်။ ထို့နောက်တွင်တော့ မက်စ်က တဟားဟား ရယ်မောလိုက်၏။ "ဘလိတ်မိသားစုက တကယ့်ကို အရှက်မရှိတဲ့ မိသားစုပဲ!"
ဘလိတ်မိသားစုဝင်များ ထွက်သွားမှသာ အဲလစ်မှာ သက်ပြင်းချနိုင်တော့သည်။ မက်စ်က သူတို့ကို စကားနာထိုး စော်ကားနေကတည်းက သူမမှာ ရင်တမမ ဖြစ်နေခဲ့ရသည် မဟုတ်ပါလား။
"မင်းကတော့ တကယ်ကို အရူးပဲ" ဘေးနားမှ နာရှ်က အံ့ဩတုန်လှုပ်နေသော မျက်နှာဖြင့် ဆိုလာသည်။
မက်စ်က ပုခုံးတွန့်ပြရင်း "ငါက ဘာလုပ်ရမှာလဲ? သူတို့က အရမ်း ရွံစရာကောင်းနေတာကို"
နာရှ်က ခေါင်းခါလိုက်သည်။ "ဒါပေမဲ့ မင်း ကီလီယန်ကိုတော့ စိန်မခေါ်သင့်ဘူး။ သူက အရမ်းသန်မာတယ်၊ အဆင့်သစ် (Novice Rank) Level 10 အတွက် သူက အားကြီးလွန်းတယ်။ သူ့ရဲ့ လက်ရှိစွမ်းအားနဲ့ဆို အခြေခံအဆင့် (Apprentice Rank) မုဆိုးတွေကိုတောင် ယှဉ်တိုက်နိုင်တယ်လို့ ကောလာဟလတွေ ထွက်နေတာ။" သူက ဆက်လက်၍ "မင်းကလည်း အရမ်းသန်မာတယ်ဆိုတာ ငါသိပါတယ်၊ တကယ်ကို ရူးလောက်အောင် သန်မာတာပါ၊ ဒါပေမဲ့ ကီလီယန်ကို စိန်ခေါ်ဖို့ကျတော့ မင်းရဲ့ Level က နိမ့်လွန်းနေသေးတယ်"
မက်စ်က ပြုံးစစဖြင့် "ဒါဆို ဒီလိုလုပ်ရင်ကော? ငါသာ ကီလီယန်ကို နိုင်သွားရင် ခရမ်းရောင်သေမင်းဆီမီးအိမ်ကိစ္စကို မင်းတို့ မေ့လိုက်တော့၊ ဒါပေမဲ့ ငါရှုံးသွားရင်တော့ အဲ့ဒီဆီမီးအိမ်ကို မင်းတို့ ယူသွားလိုက်"
မက်စ်၏ စကားကြောင့် နာရှ်၏ မျက်လုံးများ မှေးကျသွားသော်လည်း သူက ခေါင်းခါပြလိုက်ပြန်သည်။ "ခရမ်းရောင်သေမင်းဆီမီးအိမ်က ခြင်္သေ့နှလုံးသား (Lionheart) အဖွဲ့အစည်းရဲ့ ပိုင်ဆိုင်မှုပဲ။ ငါတို့ကတော့ နည်းလမ်းမျိုးစုံနဲ့ မင်းဆီက ပြန်ယူမှာပဲ။"
"ဒါဆိုရင်တော့ မင်းတို့နဲ့ မင်းတို့အဖွဲ့ ကံကောင်းပါစေလို့ပဲ ဆုတောင်းပေးလိုက်မယ်" မက်စ်က ပြောပြောဆိုဆိုနှင့် အဲလစ်၏လက်ကိုဆွဲကာ ထွက်လာခဲ့တော့သည်။
နာရှ်က ထွက်သွားသော သူတို့ကိုကြည့်ကာ သက်ပြင်းချရင်း အဲရစ်ကာဘက်သို့ လှည့်လိုက်သည်။ "ဒီကောင်ကတော့ ရူးနေပြီ။ ငါ သူ့ကို မကိုင်တွယ်နိုင်တော့ဘူး။"
"ဒါဆို နောက်ထပ် တာဝန်တစ်ခု ထပ်ကျရှုံးပြန်ပြီပေါ့" အဲရစ်ကာက ပြုံးရင်း ဆိုသည်။ နာရှ်ကတော့ စိတ်ပျက်လက်ပျက်ဖြင့် ပုခုံးများတွန့်ကျသွားကာ "ပြန်ကြစို့" ဟု ဆိုလိုက်တော့သည်။
"မင်း ဘလိတ်မိသားစုကို မကြောက်ဘူးလား?" အဓိကအသိုင်းအဝိုင်း (Core Circle) ကနေ ထွက်လာချိန်တွင် အဲလစ်က သိလိုစိတ်ဖြင့် မေးလိုက်သည်။ "မင်း သူတို့ကို အဲ့ဒီလောက်ဆိုးဆိုးဝါးဝါးတွေ ပြောလိုက်တာလေ။"
မက်စ်က အဲလစ်ဘက်သို့ လှည့်လိုက်ရာ သူ၏ မျက်နှာထားမှာ ထူးထူးခြားခြား တည်ကြည်လေးနက်နေသည်။ သူက သူမ၏ မျက်လုံးများကို တည့်တည့်စိုက်ကြည့်ရင်း ယုံကြည်ချက်အပြည့်ရှိသော လေသံဖြင့် ဆိုလာသည်။
"အဲလစ်၊ ငါပြောတာကို သေချာနားထောင်ပါ" သူက စတင်ပြောကြားသည်။ "မင်းကို မင်းရဲ့ ကြောက်စိတ်က လွှမ်းမိုးခွင့် မပေးလိုက်နဲ့။ တစ်စုံတစ်ယောက်ကို ကြောက်ရွံ့လိုက်တဲ့ ခဏမှာပဲ မင်းဟာ မင်းကိုယ်မင်း သံသယဆိုတဲ့ မျိုးစေ့ကို ချလိုက်တာပဲ။ အဲ့ဒီမျိုးစေ့က မင်း မကျော်ဖြတ်နိုင်တဲ့ တံတိုင်းကြီးဖြစ်လာတဲ့အထိ ကြီးထွားလာလိမ့်မယ်။" သူက ဆက်လက်၍ "အဲ့ဒီသူတွေကို ပြန်ပြီး ရင်ဆိုင်ရမယ့်အချိန်ကျရင် မင်းက သူတို့ထက် အားနည်းလို့ ရှုံးနိမ့်တာမဟုတ်ဘဲ၊ တိုက်ပွဲမစခင်ကတည်းက ကြောက်စိတ်ကို အဆုံးအဖြတ်ပေးခွင့်ပြုလိုက်လို့ ရှုံးနိမ့်သွားရမှာ။ အဲ့ဒီကြောက်စိတ်ကပဲ တကယ့်ရန်သူပဲ အဲလစ်။ အဲ့ဒါကို အမြစ်တွယ်ခွင့် မပေးနဲ့။ မင်းကို အဲ့ဒီကြောက်စိတ်က ထိန်းချုပ်ခွင့် မပေးလိုက်နဲ့။"
သူ့စကားများက လေထုထဲတွင် ပဲ့တင်ထပ်သွားပြီး အဲလစ်ကို ခဏတာ စကားမဲ့သွားစေသည်။ မက်စ်၏ အတွေးအခေါ်က ဤမျှအထိ နက်ရှိုင်းလိမ့်မည်ဟု သူမ မထင်ထားခဲ့ပေ။ သူမ၏ မျက်နှာပေးကို မြင်လိုက်ရသောအခါ မက်စ်က ဟက်ဟက်ပက်ပက် ရယ်မောလိုက်သည်။ "ဒါတွေက ငါ့အဖေ မဆုံးခင် ငါ့ကို ပြောသွားခဲ့တဲ့ စကားတွေလေ။"
အဲလစ်က နားလည်သွားသလို ခေါင်းညိတ်ပြသည်။ ထို့နောက် စကားလမ်းကြောင်းလွှဲလိုက်၏။ "မင်းက အဆင့်သစ် (Novice Rank) အဆင့်သတ်မှတ်ချက်မှာ အဆင့် ၁၇ ပဲ ရှိသေးတာ။ ကီလီယန်က မင်းရဲ့စိန်ခေါ်မှုကို လက်ခံမယ်လို့ ငါမထင်ဘူး။"
မက်စ်က သက်ပြင်းချလိုက်ရင်း "ငါက ဘာလုပ်ရမှာလဲ? အဆင့်သတ်မှတ်ချက်ထဲ ရောက်သွားပြီဆိုမှတော့ ငါ့ထက်အဆင့်မြင့်တဲ့သူတွေကို အနိုင်ယူမှပဲ ငါ့အဆင့်က တက်မှာလေ။ ဒါပေမဲ့ စစ်သည်တော်နယ်ပယ် (Battle Realm) ထဲမှာ သူတို့ကို ဘယ်လိုမှ ရှာမတွေ့ဘူး ဖြစ်နေတယ်။" သူက ဆက်ပြောသည်မှာ "ဒါပေမဲ့ ကီလီယန် ငါ့စိန်ခေါ်မှုကို လက်ခံလာအောင် လုပ်ဖို့ ငါ့မှာ နည်းလမ်းရှိပါတယ်။"
"ဘာနည်းလမ်းလဲ?" အဲလစ်က စပ်စုလိုက်သည်။
"ငါ့ရဲ့ ကုဗတုံး (Battle Cube) ဆီ အရင်ပြန်ကြရအောင်" မက်စ်က ပြုံးရင်းပြောလိုက်ကာ သူတို့နှစ်ဦး စကားတပြောပြောဖြင့် ကုဗတုံးရှိရာဆီသို့ ဦးတည်ထွက်ခွာလာခဲ့ကြသည်။
ပုံမှန်အတိုင်းပင် မက်စ်၏ ကုဗတုံးရှေ့တွင် လူအုပ်ကြီးက သူ့ကို စောင့်ကြိုနေကြသည်။
"သူတို့ကတော့ နားကိုမနားကြဘူးပဲ" အဲလစ်နှင့်အတူ ရောက်ရှိလာချိန်တွင် မက်စ်က ရယ်မောရင်း ဆိုသည်။ မကြာမီ တစ်စုံတစ်ယောက်က သူ့ကို သတိထားမိသွားပြီးနောက် လူအုပ်ကြီးတစ်ခုလုံးက မက်စ်ဆီသို့ မျက်လုံးများ လှည့်လာကြတော့သည်။ သူတို့၏ မျက်နှာများမှာ စိတ်ဝင်တစားဖြစ်မှုများ၊ အချို့မှာတော့ လောဘစိတ်များဖြင့် နီမြန်းနေကြသည်။ သူသည် အဆင့် ၂၀ အတွင်းသို့ ဝင်ရောက်သွားပြီဖြစ်သော်လည်း၊ မက်စ်၏စွမ်းအားမှာ Level 6 သာရှိသေးသည်ဟု ထင်မှတ်နေကြဆဲဖြစ်သောကြောင့် သူ့ကို အနိုင်ယူပြီး နာမည်ကျော်ကြားမှုနှင့် အဆင့်ကို လုယူလိုသူများစွာ ရှိနေသေးသည်။
"မက်စ်၊ မင်း အဆင့်သတ်မှတ်ချက်ထဲက တခြားသူတွေကို တိုက်ခိုက်ဦးမှာလား?"
"နောက်ထပ် ဘယ်သူနဲ့ တိုက်မှာလဲ?"
"မင်းရဲ့ တိုက်ပွဲတွေကို တိုက်ရိုက်ထုတ်လွှင့် (Livestream) ပြဦးမှာလား?"
မက်စ် ပေါ်လာသည်နှင့် လူအများက နောက်ထပ်တိုက်ပွဲများနှင့် ပတ်သက်၍ မေးခွန်းများ ဝိုင်းမေးကြတော့သည်။
"အဲ့ဒီကိစ္စနဲ့ ပတ်သက်ပြီး..." မက်စ်က လေးနက်သော မျက်နှာထားဖြင့် ဆိုလိုက်သည်။ "ငါ့ရဲ့ နောက်ထပ်တိုက်ပွဲအတွက် ကြေညာစရာတစ်ခု ရှိတယ်။"
"ဘာများလဲ?" "ပြောပြပါဦး!" "မြန်မြန် ကြေညာလိုက်စမ်းပါ မက်စ်ရာ!"
မက်စ်၏ စကားကြောင့် လူအုပ်ကြီးမှာ ချက်ချင်းပင် လှုပ်လှုပ်ခတ်ခတ် ဖြစ်သွားသည်။ သူ ဘာများကြေညာမလဲဆိုသည်ကို အလွန်အမင်း သိချင်နေကြပြီ ဖြစ်သည်။
မက်စ်က ပြုံးလိုက်ပြီး သူ့ကုဗတုံးဆီသို့ လျှောက်သွားရာ လူအုပ်ကြီးက သူ့အတွက် လမ်းဖယ်ပေးကြသည်။ လူအများကလည်း မက်စ် ကြေညာမည့်အရာကို မှတ်တမ်းတင်ရန် သူတို့၏ သုံးဖက်မြင်စောင့်ကြပ်ကြည့်ရှုနိုင်မူစနစ်(Holowatch) များကို အသင့်ပြင်ထားကြလေသည်။
ကုဗတုံးရှေ့သို့ ရောက်သောအခါ မက်စ်က လူအုပ်ဘက်သို့ လှည့်လိုက်ပြီး ယုံကြည်ချက်အပြည့်ရှိသော အပြုံးတစ်ခုကို ဆင်မြန်းလိုက်သည်။ သူ၏ အကြည့်များက စုရုံးနေသော မုဆိုးများကို ဝေ့ကြည့်လိုက်ပြီး တည်ငြိမ်သော်လည်း ပြတ်သားလှသော အရှိန်အဝါပါသည့် လေသံဖြင့် ဆိုလိုက်သည်။
"စစ်သည်တော်နယ်ပယ် (Battle Realm) ရဲ့ အခြေခံအုတ်မြစ်ကို လှုပ်ခါပစ်ရမယ့်အချိန် ရောက်ပြီ" ဟု သူက ကြေညာလိုက်ပြီး စိတ်ဝင်စားမှု မြင့်တက်လာအောင် ခဏတာ အရှိန်ယူလိုက်သည်။ လူအုပ်ကြီးမှာ သူ နောက်ထပ် ဘာပြောမည်ကို သိရန် စိတ်လှုပ်ရှားစွာဖြင့် ရှေ့သို့ တိုးလာကြသည်။
"ငါ မက်စ်မော်ဂန်က... အဆင့်သစ် (Novice Rank) အဆင့်သတ်မှတ်ချက်ရဲ့ နံပါတ် (၁) လို့ အမည်ခံထားတဲ့ 'ကီလီယန် ဘလိတ်' ကို စိန်ခေါ်တယ်!"
သူ၏ လေသံက ပို၍ထက်မြက်လာပြီး စကားလုံးတိုင်းမှာ ပရိသတ်၏ တိုးတိုးတိတ်တိတ် ပြောဆိုသံများကို ဖြတ်တောက်သွားသည်။ "ဒါပေမဲ့ ဒါက သာမန်စိန်ခေါ်မှုမျိုး မဟုတ်ဘူး ကီလီယန်။ ငါက ခင်မင်ရင်းနှီးစွာနဲ့ ယှဉ်ပြိုင်ဖို့ လာတာမဟုတ်ဘူး။ မင်းက မင်းရဲ့ အဆင့်နဲ့ မထိုက်တန်ဘူးလို့ ငါယုံကြည်လို့ စိန်ခေါ်တာ။ ငါ့ရဲ့ စိတ်ဝိညာဉ်ထဲကနေ မင်းနဲ့ မင်းကိုယ်စားပြုတဲ့ အရာအားလုံးကို ငါရွံရှာမုန်းတီးတယ်။"
လူအုပ်ကြီးဆီမှ အံ့ဩသံများနှင့် တိုးတိုးတိတ်တိတ် ဆွေးနွေးသံများ ဆူညံစွာ ထွက်ပေါ်လာသည်။ မက်စ်က ဤကဲ့သို့သော စကားလုံးများကို ပြောထွက်လိမ့်မည်ဟု သူတို့ မယုံကြည်နိုင်ကြချေ။
"မင်းမှာ ဘလိတ်မိသားစုဝင် တစ်ယောက်အနေနဲ့ ဂုဏ်သိက္ခာ အနည်းငယ်လောက်ပဲရှိရင်တောင်" မက်စ်က အသံကိုမြှင့်၍ ဆက်ပြောသည်။ "မင်း ငါ့ရဲ့ စိန်ခေါ်မှုကို လက်ခံမှာပါ။ ဒီ စစ်သည်တော်နယ်ပယ်မှာ ငါနဲ့ လာတိုက်ပြီး မင်းရဲ့ အရည်အချင်းကို သက်သေပြလိုက်စမ်း။ မင်းအခု ဂုဏ်ယူဝင့်ကြွားနေတဲ့ ဒီဘွဲ့ထူးနဲ့ တကယ်ပဲ ထိုက်တန်ရဲ့လားဆိုတာ တစ်ကမ္ဘာလုံးကို ပြလိုက်ပါ။"
သူက ခေတ္တရပ်လိုက်ပြီးနောက် လှောင်ပြုံးလေးဖြင့် ဖြည့်စွက်ပြောလိုက်သည်မှာ "ပြီးတော့ လုံးဝတရားမျှတမှု ရှိစေဖို့အတွက်... ဒီတိုက်ပွဲကို စစ်သည်တော်နယ်ပယ်ထဲက ချန်နယ်အားလုံးမှာ တိုက်ရိုက်ထုတ်လွှင့်ပြဖို့ ငါအဆိုပြုတယ်။ ငါ့ရဲ့ တကယ့်အစွမ်းနဲ့ မင်းရဲ့ ရှောင်လွှဲလို့မရတဲ့ ရှုံးနိမ့်မှုကို လူတိုင်း မျက်မြင်တွေ့ရှိပါစေဦးတော့။"
လူအုပ်ကြီးမှာလည်း မက်စ်၏ ရဲတင်းလွန်းသော စကားများကြောင့် အံ့အားသင့်ကာ စိတ်လှုပ်ရှားမှုများဖြင့် ဆူညံပွက်လောရိုက်သွားတော့သည်။ စိန်ခေါ်မှုကတော့ ထွက်ပေါ်လာခဲ့ပြီ ဖြစ်သည်။ အခုအခါ လူတိုင်း၏ မျက်လုံးများက ကီလီယန် ဘလိတ်သည် ဤစိန်ခေါ်မှုကို ရဲရဲဝံ့ဝံ့ လက်ခံလာမည်လားဆိုသည်ကို စောင့်ကြည့်ရန်အတွက်သာ ဖြစ်နေပါတော့သည်။