အခန်း (၇၀) အဖွဲ့အစည်းများ၏ ထိပ်သီးအစည်းအဝေး

"ဟိုမှာကြည့်စမ်း၊ အမ်မာရယ်လ် လီဂျီယံ (Emerald Legion) အဖွဲ့က ဒဲရစ် ဗော့စ် တစ်ယောက် ပြန်ရောက်လာပြန်ပြီ။"

"ငါကြားတာတော့ သခင်ကြီး အန်တွန် မရှိတဲ့အချိန်တိုင်း သူက အဲလစ်ကို လိုက်နှောင့်ယှက်နေတာတဲ့။"

"ဒီတစ်ခါကော ဘာကိစ္စနဲ့ လာတာပါလိမ့်။"

အနီးနားရှိ စားပွဲဝိုင်းများတွင် စားသောက်နေကြသော အခြားအဖွဲ့ဝင်များသည် ဒဲရစ် ဗော့စ်ကို မြင်သည်နှင့် တီးတိုးအတင်းပြောကြတော့သည်။ သူသည် မျက်ခုံးပေါ်ဝဲကျနေပြီး ဂုတ်သားကို ထိလုနီးပါးဖြစ်နေသော အနက်ရောင်ဆံပင် ခပ်ရှုပ်ရှုပ်ကို ပိုင်ဆိုင်ထားသည်။

"ဒဲရစ်... နင် ဘာအလိုရှိလို့လဲ" အဲလစ်က အေးစက်စွာ မေးလိုက်သည်။

ဒဲရစ်က လှောင်ပြုံးပြုံးလိုက်ရင်း "ဒီတစ်ခါတော့ ဘာမှအလိုမရှိပါဘူး" ဟု ဆိုကာ တောက်ပနေသော စက်ဝိုင်းပုံ ကတ်ပြားတစ်ခုကို အဲလစ်ထံ ပစ်ပေးလိုက်သည်။ "ဒါကို နင့်အမေဆီ ပေးလိုက်ပါ" ဒဲရစ်က ပြုံးလျက် ပြောလိုက်သော်လည်း သူ၏ အမူအရာမှာ လှောင်ပြောင်မှုများဖြင့် ပြည့်နှက်နေသည်။ "နင့်တို့အဖွဲ့ ဒီတစ်ခါတော့ ပြီးခဲ့တဲ့အကြိမ်ကလို အဆင့်မနိမ့်ပါစေနဲ့လို့ ငါမျှော်လင့်ပါတယ်"

ထိုသို့ပြောပြီးနောက် သူသည် သူ၏နောက်လိုက်များနှင့်အတူ ထွက်ခွာသွားတော့သည်။ မက်စ်သည် ထိုတောက်ပနေသော ကတ်ပြားကို တစ်လှည့်၊ အဲလစ်၏ မျက်မှောင်ကြုတ်နေသော မျက်နှာကို တစ်လှည့် စပ်စုလိုသော မျက်လုံးများဖြင့် ကြည့်လိုက်သည်။

"ဒါက ဘာလဲ"

အဲလစ်က သက်ပြင်းအရှည်ကြီး ချလိုက်ပြီး "ဒါက အဖွဲ့အစည်းများရဲ့ ထိပ်သီးအစည်းအဝေး (The Guild Summit) အတွက် ဖိတ်စာပါ" ဟု ပြောလိုက်သည်။

"အဖွဲ့အစည်းများရဲ့ ထိပ်သီးအစည်းအဝေး (The Guild Summit) ဟုတ်လား" မက်စ်က တိုးတိုးလေး ရေရွတ်လိုက်ပြီးနောက် "အဲဒါက အဖွဲ့အစည်းအားလုံး စုပြီး တစ်ခုခု ဆွေးနွေးကြတဲ့ နေရာမျိုးလား" ဟု မေးလိုက်သည်။

အဲလစ်က ခေါင်းကို အသာအယာ ငြိတ်လိုက်သည်။ "ဒီနှစ်က ထူးထူးခြားခြား အရေးကြီးတဲ့နှစ် ဖြစ်နေလို့ အစည်းအဝေးကို နောက်သုံးလအကြာမှာ ကျင်းပမယ်လို့ အမေက ပြောတယ်။ ဗာလိုရာ တိုက်ကြီးရဲ့ သမိုင်းတစ်လျှောက်မှာ အခုလာမယ့် ၁၂ လဟာ အရှည်ကြာဆုံး ဖြစ်လိမ့်မယ်လို့လည်း သူပြောသေးတယ်။" သူမက မတ်တပ်ရပ်လိုက်ပြီး "နင်က သဘောတူညီချက်ကို လက်ခံလိုက်ပြီဆိုတော့ ငါ အစ်မကြီး ဆိုဖီယာကို သွားအကြောင်းကြားလိုက်ဦးမယ်"

မက်စ်က ထိုင်ခုံတွင် နောက်မှီလိုက်ရင်း "ကောင်းပြီလေ၊ နင် သွားလိုက်ပါ" ဟု ပြောလိုက်သည်။

အဲလစ်က ခေါင်းငြိတ်ကာ အမ်ဘာဟတ်တ် ခန်းမထဲမှ အလျင်အမြန် ထွက်ခွာသွားသည်။ 'ဒီအစည်းအဝေးကိစ္စကြောင့် သူ တော်တော်လေး စိတ်လှုပ်ရှားနေပုံပဲ' ဟု မက်စ်က သက်ပြင်းချရင်း တွေးလိုက်သည်။ သူကတော့ သူမနှင့်အတူ တစ်ခုခု စားသောက်ပြီးမှ ပျော်ပျော်ရွှင်ရွှင် ပြန်ဖို့ စိတ်ကူးထားခဲ့ခြင်း ဖြစ်သည်။ 'ဒီအစည်းအဝေးက ဘာပဲဖြစ်ဖြစ်၊ သူ့အတွက်ရော အဖွဲ့အစည်းအတွက်ပါ တော်တော်လေး အရေးကြီးပုံရတယ်'

သူက စားပွဲတင် မျက်နှာပြင်ကားချပ်ကို ပုတ်လိုက်ရာ အစားအသောက် အမျိုးမျိုး ပေါ်လာသည်။ မက်စ်သည် သူအကြိုက်ဆုံး ဟင်းလျာများကို ရွေးချယ်ပြီး အစားအစာ ရောက်လာမည့်အချိန်ကို စိတ်ရှည်လက်ရှည် စောင့်ဆိုင်းနေလိုက်သည်။ လတ်လတ်ဆတ်ဆတ် ချက်ပြုတ်ထားသော အစားအစာများ၏ ရနံ့က လေထုထဲတွင် ပျံ့လွင့်နေပြီး အစားအသောက်များ ရောက်လာသောအခါတွင် သူသည် အရသာရှိရှိ မြိန်ယှက်စွာ စားသောက်လိုက်သည်။ စားသောက်ပြီးနောက် သူသည် အိမ်သို့ တိတ်တဆိတ် ပြန်လာခဲ့သည်။

'မှော်ဆန်သောဓားကျည်ဆန် (Magic Sword Bullets) ရဲ့ ကျွမ်းကျင်မှု အဆင့်ကို မြှင့်တင်ဖို့ အချိန်တန်ပြီ' ဟု မက်စ်က သူ၏ လေ့ကျင့်ရေးအခန်းထဲတွင် တင်ပျဉ်ခွေထိုင်ရင်း တွေးလိုက်သည်။ သူသည် တစ်ညလုံးကို မဟူရာအချိန်နယ်ပယ်ထဲတွင် ကုန်ဆုံးစေပြီး မှော်ဆန်သောဓားကျည်ဆန် စွမ်းရည်ကို Level 70 အထိ လေ့ကျင့်ခဲ့သည်။ အဲလစ်က နောက်ထပ် ၁၂ လသည် ရှည်လျားသော ကာလတစ်ခု ဖြစ်လိမ့်မည်ဟု ပြောခဲ့သည်ကို ကြားပြီးနောက် မက်စ်၏ စိတ်က လေးလံသွားသည်။ ရှေ့လာမည့် လများတွင် ဘာတွေဖြစ်လာမည်ကို သူ မသိသော်လည်း ကြိုတင်ပြင်ဆင်ထားခြင်းကသာ သူ့အတွက် အကောင်းဆုံးဖြစ်မည်ကို သူ နားလည်ထားသည်။

နောက်တစ်နေ့တွင် မက်စ်သည် ပုံမှန်အတိုင်း ရေချိုးပြီးနောက် အစားအသောက် စားရန် ထိုင်လိုက်သည်။ 'ဒီနေ့ကစပြီး စစ်သည်တော်နယ်ပယ် (Battle Realm) မှာ အလေးအနက်ထားပြီး တိုက်ခိုက်တော့မယ်' ဟု စားနေရင်း တွေးလိုက်သည်။

တီ... တီ...

စားသောက်ပြီးနောက် သူ အပြင်ထွက်ခါနီးတွင် သူ၏ သုံးဖက်မြင်ပုံစံဖြင့်‌ေစာင့်ကြပ်ကြည့်ရှုနိုင်မူ (holowatch) မှ မြည်သံတစ်ခု ကြားလိုက်ရသည်။ စစ်ဆေးကြည့်လိုက်ရာ အိုင်ဖိုစ် [Aiphos] ဟု အမည်ရသော တစ်စုံတစ်ယောက်ထံမှ မက်စ်ကို တွေ့လိုက်ရသည်။

'ဒီ အိုင်ဖိုစ် (Aiphos) ဆိုတာ ဘယ်သူလဲ' ဟု သူ သိချင်စိတ်ဖြင့် စာတိုကို ဖွင့်ကြည့်လိုက်ရာ ထိတ်လန့်သွားပြီး မျက်လုံးများ ပြူးကျသွားတော့သည်။

[ဖရေးယား ဗွိုက်ဝေါ့ကာကို သူမ ပျောက်ဆုံးမသွားခင် ရှေးဟောင်းတိုက်ကြီး (Lost Continent) မှာ နောက်ဆုံးတွေ့ခဲ့ရတယ်။]

'ငါနဲ့ ဖရေးယား ဆက်နွှယ်နေတာကို သိတဲ့သူ ရှိနေတာလား' မက်စ်တစ်ယောက် အံ့အားသင့်ပြီး စိတ်လှုပ်ရှားသွားမိသည်။ 'ဒီလူက ဘယ်သူလဲ။ ဖီးနစ်အဖွဲ့ချုပ်က လူပဲလား။' သူ၏ ရင်ခုန်သံများ မြန်လာပြီး စိတ်ထဲတွင် မေးခွန်းများစွာ ပေါ်လာသည်။ သူသည် စိတ်ကို တည်ငြိမ်အောင် အသက်ပြင်းပြင်းရှူလိုက်ပြီး စာပြန်လိုက်သည်။

[ခင်ဗျားက ဘယ်သူလဲ၊ ပြီးတော့ ခင်ဗျားကို ကျွန်တော်က ဘာလို့ ယုံကြည်ရမှာလဲ]

ခဏအကြာတွင် အကြောင်းပြန်စာ ရောက်လာသည်။

[မင်းမှာ ငါ့ကို ယုံကြည်ဖို့ကလွဲလို့ တခြားရွေးချယ်စရာ မရှိပါဘူး။ မင်းမှာ ဖရေးယားနဲ့ ပတ်သက်တဲ့ သဲလွန်စ လုံးဝမရှိဘူးမလား၊ ဒါကြောင့် ငါ့စကားကို နားထောင်တာက မင်းအတွက် ပညာရှိရာ ရောက်လိမ့်မယ်။]

မက်စ်က မျက်မှောင်ကြုတ်လိုက်သည်။ လက်ရှိတွင် သူ့အစ်မ ဘယ်မှာရှိနေသည်ကို သဲလွန်စမရှိသည်မှာ အမှန်ပင်။ သို့သော် ထိုအချက်ကြောင့်ပင် လူတိုင်းကို ယုံကြည်လိုက်မည်ဟု မဆိုလိုပေ။

[ကျွန်တော်နဲ့ သူမနဲ့ ပတ်သက်နေတာကို ခင်ဗျား ဘယ်လိုသိတာလဲ] သူက ထပ်မေးလိုက်သည်။

အကြောင်းပြန်စာက ချက်ချင်း ရောက်လာသည်။

[မင်း ဘယ်သူလဲဆိုတာ ငါသိတယ်... မက်စ် ဗွိုက်ဝေါ့ကာ၊ ဖရေးယား ဗွိုက်ဝေါ့ကာရဲ့ မောင်လေးပေါ့။ မင်းရဲ့ မိဘတွေက လွန်ခဲ့တဲ့ ငါးနှစ်က လျှို့ဝှက်စွာ ပျောက်ဆုံးသွားတယ်၊ မင်းအစ်မက လွန်ခဲ့တဲ့ နှစ်နှစ်က ပျောက်ဆုံးသွားတယ်၊ အခုတော့ မင်းက သူတို့ကို ရှာဖွေဖို့ တာဝန်ယူထားတာ မဟုတ်လား]

မက်စ် အသက်ရှူမှားသွားပြီး မျက်လုံးများ ကျဉ်းမြောင်းသွားသည်။ ဤလူက သူ့အကြောင်း အားလုံးကို သိနေလိမ့်မည်ဟု သူ မမျှော်လင့်ထားခဲ့ပေ။ 'ဒီလူက ဘယ်သူလဲ' ဟု တွေးရင်း တစ်ဖက်လူက သူ့အကြောင်း အကုန်သိနေပြီး သူကတော့ ဘာမှမသိရသည့်အတွက် စိတ်ဖိစီးလာမိသည်။ 'ဒီလူက... ဖြစ်နိုင်တာက...' သူ ရုတ်တရက် အတွေးတစ်ခု ရလာပြီး မေးလိုက်သည်။

"ခင်ဗျားက ဖီးနစ်အဖွဲ့ချုပ်ထဲက တစ်ယောက်ယောက်လား"

အကြောင်းပြန်စာမှာ - [ငါက အဲဒီထဲက တစ်ယောက်ပါ၊ ဒါပေမဲ့ ငါ ဘယ်သူလဲဆိုတာကတော့ မင်းကိုယ်တိုင်ပဲ ခန့်မှန်းကြည့်ပေါ့။ ဒါပေမဲ့ ဒါကိုတော့ မှတ်ထားပါ၊ မင်းက ဓားသွားပေါ် လမ်းလျှောက်နေရသလိုပဲ။ ဖီးနစ်အဖွဲ့ချုပ်က မင်းအတွက် အကောင်းဆုံး အဖွဲ့အစည်း ဖြစ်နိုင်သလို၊ အဆိုးဆုံးလို့လည်း ငါပြောရလိမ့်မယ်။ မင်းရဲ့ ဗွိုက်ဝေါ့ကာ ဆိုတဲ့ အထောက်အထားသာ ပေါ်သွားရင် မင်း အဖွဲ့အစည်းကနေ ချက်ချင်း ထွက်ပြေးရလိမ့်မယ်။ ဒါက ငါ့ရဲ့ နောက်ဆုံး သတိပေးချက်ပဲ။ ငါ့ဆီကနေ မကြာခင်မှာ ဆက်သွယ်လာဖို့တော့ မမျှော်လင့်နဲ့ဦး။]

မက်စ်သည် ထိုစာကို ဖတ်ပြီးနောက် မျက်နှာ ပျက်သွားသည်။ 'ငါ့အစ်မ ဒီမှာ ဘာတွေလုပ်ခဲ့လို့ အဖွဲ့အစည်းက ဒီလောက်တောင် ဒေါသထွက်နေရတာလဲ' သူ သက်ပြင်းချလိုက်ရင်း သူ၏မိသားစုအမည်ဖြစ်သော ဗွိုက်ဝေါ့ကာ အပေါ် အဘယ်ကြောင့် ဤမျှအမုန်းပွားနေရသနည်းဟု တွေးတောနေမိသည်။

'ငါ့ရဲ့ အထောက်အထား မပေါ်အောင် ပိုပြီးတော့တောင် ဂရုစိုက်ရမယ်' မက်စ်၏ အမူအရာမှာ တည်ကြည်သွားသည်။ အဲလစ်က သူ့အကြောင်း စုံစမ်းစဉ်က အချက်အလက်များ ပြောင်းလဲနေရခြင်း၏ အကြောင်းရင်းကို သူ မသိသော်လည်း ထိုသို့ဖြစ်အောင် လုပ်ပေးခဲ့သူကို သူ ကျေးဇူးတင်မိသည်။ သို့သော် သူက ဘေးကင်းသွားပြီဟု မဆိုလိုသေးပေ။ သူ့အထောက်အထား အချိန်မရွေး ပေါ်သွားနိုင်သည့် နေရာတစ်ခု ရှိနေသေးသည် — ၎င်းမှာ ဓားအသုံးပြုသူဘလိတ်မိသားစု (Blade Family) ပင် ဖြစ်သည်။

'သူတို့က ငါ့အကြောင်း သိနေပုံရပေမဲ့ ထူးဆန်းတာက ငါ့အထောက်အထားကို အခုထိ ထုတ်မပြောသေးတာပဲ' ဟု မက်စ်က စိတ်ဝင်တစား တွေးလိုက်သည်။ အကယ်၍ အယ်လီနာ ဘလိတ်က အဲလစ်တို့နှင့် နောက်ဆုံးတွေ့စဉ်က သူသည် ဗွိုက်ဝေါ့ကာ တစ်ယောက်ဖြစ်ကြောင်း ပြောလိုက်လျှင် ဖီးနစ်အဖွဲ့ချုပ်က သူ့ကို ကယ်တင်ရန် ကြိုးစားလိမ့်မည် မဟုတ်ပေ။

"အခြေအနေတွေက တော်တော်လေး ရှုပ်ထွေးနေပါလား" မက်စ်က သက်ပြင်းချရင်း အပြင်သို့ ထွက်လာခဲ့သည်။ မကြာမီတွင် သူသည် ကြီးမားလှသော စစ်သည်တော်နယ်ပယ် ကုဗတုံး (Battle Cube) ရှိရာ ခန်းမသို့ ရောက်ရှိလာသည်။ လူအများအပြား စစ်သည်တော်နယ်ပယ် ကုဗတုံးထဲသို့ အဝင်အထွက် လုပ်နေကြသည်ကို မြင်သောအခါ မက်စ်လည်း တိတ်တဆိတ် ဝင်သွားလိုက်သည်။

စစ်သည်တော်နယ်ပယ် (Battle Realm) ထဲတွင် မက်စ်သည် သူ၏ ကုဗတုံးအတွင်းသို့ ရောက်ရှိနေသည်။ 'ဒီတော့ ငါ စိန်ခေါ်ချင်တဲ့ Level ကို ဒီမှာ သတ်မှတ်လို့ရတာပေါ့' ဟု တွေးကာ လေထဲတွင် ပုတ်လိုက်သည်။

လေထဲတွင် မျက်နှာပြင်ကားချပ်တစ်ခု ပေါ်လာပြီး အဆင့်သစ် (Novice Rank) အတွင်းရှိ အမျိုးမျိုးသော Level များထဲမှ ရွေးချယ်ရန် ပြသနေသည်။ မက်စ်သည် ခဏမျှ ကြည့်လိုက်ပြီးနောက် Level 10 ကို ရွေးချယ်လိုက်သည်။ ထို့နောက် သူသည် ကုဗတုံးထဲမှ ထွက်ကာ တောက်ပနေသော တံခါးမှတစ်ဆင့် အပြင်သို့ ထွက်လာခဲ့သည်။

သူ့ကုဗတုံးအပြင်ဘက်တွင် ပုံမှန်အတိုင်းပင် လူများစွာသည် ကိုယ်စီ အလုပ်ရှုပ်နေကြသည်။ အချို့က တစ်စုံတစ်ဦးကို စိန်ခေါ်နေကြပြီး အချို့ကမူ အခြားသူများ၏ တိုက်ပွဲကို ကြည့်ရှုနေကြသည်။ သို့သော် မက်စ်သည် ယခင်အကြိမ်နှင့်မတူဘဲ ထူးခြားချက်တစ်ခုကို သတိထားမိလိုက်သည်။

'ဒီမှာရှိတဲ့သူတွေ အားလုံးက အဆင့်သစ် (Novice Rank) ရဲ့ Level 10 တွေချည်းပဲ' မက်စ်က ပြုံးရင်း တွေးလိုက်သည်။ အကယ်၍ သူက အဆင့်သစ် (Novice Rank) ရဲ့ အဆင့်သတ်မှတ်ချက် (Rank) ထဲကို ဝင်ချင်တယ်ဆိုရင် Level 10 သမားတွေကို တိုက်ခိုက်ရမည်ကို သူ သိထားသည်။ သို့မဟုတ်ပါက Level 10 အောက်က လူတွေကို ဘယ်လောက်ပဲ နိုင်နိုင် သူ့ရဲ့ အဆင့် (Rank) က တက်လာလိမ့်မည် မဟုတ်ပေ။

"ဟေး၊ ဟိုမှာကြည့်စမ်း၊ Level 6 လေးက ငါတို့ရဲ့ Level 10 နယ်မြေထဲကို လာရဲတယ်ဟ"

"လမ်းမှားလာတာ ထင်ပါရဲ့"

"လမ်းမှားတာ? မဟုတ်လောက်ပါဘူး၊ ဒီအထိ လာရဲတယ်ဆိုကတည်းက သူ့မှာ သတ္တိတော့ ရှိပုံရတယ်"

"သူ ငါတို့ကို လာစိန်ခေါ်တာ ထင်တယ်"

"နောက်မနေနဲ့ဦး။ သူက Level 6 လေးတင်ရှိသေးတာကို Level 10 ဖြစ်တဲ့ ငါတို့ကို နိုင်အောင် တိုက်နိုင်ပါ့မလား"

သူတို့၏ ကုဗတုံးအပြင်ဘက်ရှိ လူများသည် မက်စ်ကို သတိပြုမိသွားကြသည်။ Level 6 သမားတစ်ယောက်က ဘာကြောင့် Level 10 နယ်မြေထဲကို ရောက်လာရသလဲဆိုသည်ကို သူတို့ မသိသော်လည်း သူ့ကို တိုက်ခိုက်ရန် သူတို့က အဆင်သင့်ပင်။

မက်စ်သည် သူတို့၏ စကားများကို ကြားသောအခါ ယုံကြည်မှုရှိသော အပြုံးဖြင့် ပြုံးလိုက်သည်။ သူ၏ မျက်လုံးများထဲတွင် စိန်ခေါ်လိုစိတ်များ တောက်ပနေပြီး ရှေ့သို့ တစ်လှမ်း တိုးလိုက်သည်။

"ဘယ်သူ ငါနဲ့ ယှဉ်ပြိုင်ရဲသလဲ" သူက အသံကျယ်ကျယ်ဖြင့် ကြေညာလိုက်တော့သည်။