အခန်း (၆၄) စစ်သည်တော်ဒင်္ဂါးများ

တံခါးမှတစ်ဆင့် အတွင်းသို့ လှမ်းဝင်လိုက်ပြီးနောက် မက်စ်သည် စတုရန်းပုံသဏ္ဌာန်ရှိသော အလတ်စား အခန်းကျဉ်းလေးတစ်ခုထဲသို့ ရောက်ရှိသွားသည်။ နံရံပေါ်ရှိ ကြီးမားသော မျက်နှာပြင်ကားချပ် (Screen) တစ်ခုမှလွဲ၍ ထိုအခန်းထဲတွင် ဘာမျှမရှိဘဲ ဟာလာဟင်းလင်း ဖြစ်နေသည်။

[သင်သည် တိုက်ပွဲဝင်ရန် ဆန္ဒရှိပါသလား?]

ထိုအခိုက်အတန့်တွင်ပင် သူ၏မျက်စိရှေ့၌ အသိပေးချက်တစ်ခု ပေါ်လာသည်။ ၎င်းမှာ စစ်သည်တော်နယ်ပယ် (Battle Realm) ထံမှ လာခြင်းဖြစ်သည်။

"ဟုတ်ကဲ့" ဟု မက်စ်က ပြန်ဖြေလိုက်ပြီးနောက် ခဏအကြာတွင် ထိုအခန်းထဲမှ ပျောက်ကွယ်သွားတော့သည်။

သူပြန်လည်ပေါ်ထွက်လာသောနေရာမှာ သစ်ပင်ကျဲကျဲလေးများရှိသည့် မြက်ခင်းပြင်ကျယ်တစ်ခု ဖြစ်သည်။

'ဒီနေရာက ဗိုလ်ချုပ်ရဲ့ အခန်းထဲမှာရှိတဲ့ စစ်သည်တော်နယ်ပယ် ကုဗတုံး (Battle Cube) ထဲက တိုက်ကွင်းနဲ့ တော်တော်လေး ဆင်တူတာပဲ' ဟု မက်စ်က ပတ်ဝန်းကျင်ကို အကဲခတ်ရင်း တွေးတောနေမိသည်။ ထို့ပြင် သူနှင့် မလှမ်းမကမ်းတွင် ရပ်နေသော ပြိုင်ဘက်ကိုလည်း သတိပြုမိသွားသည်။ ၎င်းမှာ သူ့အရွယ်ခန့်ရှိသော လူငယ်တစ်ဦးဖြစ်ပြီး ဆူးတောင်များကဲ့သို့ ထောင်နေသည့် ဆံပင်နက်နှင့် တီရှပ်အဖြူကို ဝတ်ဆင်ထားသည်။

"ငါ့အဖေပြောတာတော့ ငါက အတွေ့အကြုံမရှိသေးတဲ့ အဆင့်သစ်တစ်ယောက်နဲ့ ယှဉ်ပြိုင်ရမယ်ဆိုပဲ၊ အခုကြည့်ရတာ သူပြောတာ မှန်ပုံရတယ်"

မက်စ်က တောသားမြို့တက်ကဲ့သို့ ဟိုဟိုဒီဒီ လျှောက်ကြည့်နေသည်ကို မြင်သောအခါ ထိုလူငယ်က လှောင်ပြုံးပြုံးရင်း ပြောဆိုလိုက်သည်။

"မင်းအဖေပြောတာ တကယ်မှန်ပါတယ်"

မက်စ်က အေးဆေးတည်ငြိမ်သော်လည်း ထက်မြက်လှသော လေသံဖြင့် ပြုံး၍ ပြန်ပြောလိုက်သည်။ ထိုကောင်လေး၏ စွမ်းအားမှာ Level 6 ဖြစ်ပြီး သူ့အဆင့်နှင့် တူညီနေသည်ကို သူသတိပြုမိပြီးသားဖြစ်သည်။

"ဒါပေမဲ့ စိတ်မကောင်းစရာတစ်ခုကတော့... မင်းရဲ့ ပထမဆုံးတိုက်ပွဲမှာ မင်းရှုံးတော့မယ်ဆိုတာကိုတော့ မင်းအဖေက ကြိုမပြောလိုက်ဘူး ထင်တယ်"

"ဟွန်း... ကြည့်ကြသေးတာပေါ့"

ထိုလူငယ်က နှာခေါင်းရှုံ့လိုက်ပြီး ဓားတစ်လက်ကို ဆွဲထုတ်လိုက်သည်။ မက်စ်က သူ၏ အနေအထားကို စောင့်ကြည့်ရင်း "မင်းရဲ့ အဆင့်အတန်းအစား (Class) က ဘာလဲ" ဟု မေးလိုက်သည်။

"မင်း သိဖို့မလိုဘူး"

လူငယ်က အေးစက်စွာ ပြောလိုက်ပြီး ဓားကိုကိုင်ကာ မက်စ်ထံသို့ ပြေးဝင်လာသည်။ လမ်းခုလတ်တွင် ဓားသွားမှ အေးစက်လှသော အငွေ့ဖြူများ ထွက်ပေါ်လာပြီး သူနင်းဖြတ်ခဲ့သော လမ်းတစ်လျှောက်တွင် နှင်းခဲများ ပျံ့နှံ့ကာ မြေပြင်ကို ခဲသွားစေသည်။ ခဏအကြာတွင် သူသည် မက်စ်အနီးသို့ ရောက်ရှိလာပြီး ဓားဖြင့် အားကုန်လွှဲ၍ ခုတ်ချလိုက်သည်။

ကချာ!

သို့သော်လည်း အံ့ဩစရာကောင်းသည်မှာ ဓားသွားက မက်စ်၏ကိုယ်ကို ထိခါနီးအချိန်တွင် မက်စ်က ထိုဓားကို လက်ဖြင့် ဖမ်းကိုင်လိုက်ခြင်းဖြစ်သည်။ နှင်းခဲများက သူ၏ လက်မောင်းတစ်ဝက်ခန့်အထိ ချက်ချင်းခဲသွားစေသော်လည်း ထိုလူငယ်သည် ဓားကို မည်သို့ပင် ရုန်းဆွဲသော်လည်း အစိုးမရတော့ပေ။

"လွှတ်စမ်း! ငါ့ဓားကို အခုချက်ချင်းလွှတ်!" ဟု သူက မက်စ်ကို ဟောက်ငေါက်အော်ဟစ်လေတော့သည်။

"မင်းဆန္ဒအတိုင်းပေါ့"

မက်စ်က ပြောပြောဆိုဆိုနှင့် ဓားကို လွှတ်ပေးလိုက်သည်။ သို့သော် ထိုလူငယ် နောက်သို့ မဆုတ်နိုင်မီမှာပင် မက်စ်က နဂါးအကြေးခွံ (Draconic Scales) နှစ်ခုစာ စွမ်းအားပါဝင်သော လက်သီးဖြင့် အားကုန်ထိုးနှက်လိုက်သည်။

ဘုန်း!

လက်သီးက သူ၏ ဝမ်းဗိုက်ကို ထိမှန်သွားပြီး ခါးအောက်ပိုင်းတစ်ခုလုံးမှာ တောက်ပသော အနီရောင်အလင်းတုံးများအဖြစ် ကြေမွသွားတော့သည်။ ခဏအကြာတွင် သူ၏ ခန္ဓာကိုယ်မှာ လွင့်စင်ပျောက်ကွယ်သွားပြီး လုံးဝ သေဆုံးသွားခဲ့သည်။

'ငါ့ရဲ့ စွမ်းအားအစစ်အမှန်ကို ထုတ်သုံးနိုင်အောင် လုပ်နိုင်မယ့် ထိုက်တန်တဲ့ ပြိုင်ဘက်တွေကို ရှာဖို့ လိုအပ်တယ်၊ မဟုတ်ရင် ငါက မုဆိုး (Hunter) တစ်ယောက်အနေနဲ့ ကောင်းကောင်းမွန်မွန် ကြီးထွားလာနိုင်မှာ မဟုတ်ဘူး'

သူ့အဆင့်တူ ပြိုင်ဘက်ကို အလွယ်တကူ အနိုင်ယူလိုက်နိုင်သည်ကို မြင်ပြီး မက်စ်က တွေးတောနေမိသည်။ မိမိကိုယ်ကို အစွမ်းကုန်တွန်းအားပေးခြင်းဖြင့်သာ SSS အဆင့် အတန်းအစားနှင့် စွမ်းအားအစစ်အမှန်ကို ထုတ်ဖော်နိုင်မည်ဟု သူနားလည်ထားသည်။ ထို့ကြောင့် အလွယ်တကူ အနိုင်ရမည့် ပြိုင်ဘက်များကို သူစိတ်မဝင်စားပေ။ မိမိ၏ အကန့်အသတ်ကို သိရှိမှသာ ထိုအကန့်အသတ်ကို ကျော်လွှားနိုင်မည်ဖြစ်သည်။ ၎င်းအတွက် သူ၏ အားအင်အကုန်သုံးရန် လိုအပ်မည့် ပြိုင်ဘက်မျိုး လိုအပ်သည်။

'ဒီစမ်းသပ်ပွဲ (Test) ပြီးရင်တော့ အခြေခံအဆင့် (Apprentice Rank) ရှိတဲ့သူတွေကို ငါစိန်ခေါ်ရမယ်'

မက်စ်က ဆုံးဖြတ်လိုက်သော်လည်း သတိကြီးစွာ ထားရမည်ကိုတော့ သိရှိသည်။ အဆင့်သစ် (Novice Rank) တစ်ယောက်က အခြေခံအဆင့် ရှိသူများကို အနိုင်ရနေခြင်းက မလိုအပ်သော အာရုံစိုက်မှုများကို ခေါ်ဆောင်လာနိုင်သည်။ ဓားအသုံးပြုသူဘလိတ်မိသားစု (Blade Family) က သူ့နောက်ကို လိုက်နေချိန်တွင် မက်စ်အနေဖြင့် လူသိရှင်ကြား လူပေါ်မပေါ်ချင်ပေ။

ခဏမျှ အသေအချာ စဉ်းစားပြီးနောက် ဤကိစ္စကို လက်ရှိစမ်းသပ်ပွဲပြီးမှသာ ဆက်လက်စဉ်းစားရန် ဆုံးဖြတ်လိုက်သည်။ အပြာရောင်တံခါးဆီသို့ ပြန်ကြည့်ရင်း မက်စ်က အတွင်းသို့ ဝင်လိုက်ရာ သူ၏ ကုဗတုံး (Cube) ထဲသို့ ပြန်ရောက်သွားသည်။

'နောက်ထပ် နှစ်ပွဲ ထပ်နိုင်ဖို့ လိုသေးတယ်' ဟု တွေးရင်း သူ၏ ကုဗတုံးတံခါးကို ဖွင့်၍ အပြင်သို့ ထွက်လိုက်သည်။

"ဘယ်လိုလဲ? နိုင်ခဲ့ရဲ့လား?" ဟု ဆံပင်ဝါနှင့်လူက သူ့ကို လက်လှမ်းပြရင်း မေးလိုက်သည်။ မက်စ်က သူ့ကိုမြင်သောအခါ ပြုံးပြပြီး ခေါင်းညိတ်ပြလိုက်သည်။

"ဟုတ်ကဲ့၊ နိုင်ခဲ့ပါတယ်၊ ဒါပေမဲ့ တော်တော်လေး ပြင်းထန်တဲ့ တိုက်ပွဲပဲ"

ဆံပင်ဝါနှင့်လူက နွေးထွေးစွာ ပြုံးလိုက်ပြီး "စိတ်မပူပါနဲ့၊ လူတိုင်းက ပထမဆုံးတိုက်ပွဲမှာ အမှားအယွင်း ရှိတတ်တာပဲ၊ အခု မင်းအာရုံစိုက်ရမှာက နောက်ထပ်တိုက်ပွဲတွေအတွက်ပဲ" ဟု အားပေးလိုက်သည်။

မက်စ်က ခေါင်းညိတ်ပြကာ "အကို့ရဲ့ အကြံဉာဏ်ကို ကျွန်တော် အမြဲတမ်း မှတ်ထားပါ့မယ်" ဟု ကျေးဇူးတင်စွာ ပြောလိုက်သည်။

"မင်းရဲ့ စစ်သည်တော်နယ်ပယ် အခြေအနေ (Status) ကို တစ်ချက်စစ်ကြည့်ဦး၊ တစ်ခုခု ပြောင်းလဲသွားတာ ရှိလိမ့်မယ်" ဟု ဆံပင်ဝါနှင့်လူက ပြုံးလျက် ပြောသည်။ မက်စ်က သူ၏ အ‌ေခြအနေ(Status )ကို ဖွင့်ကြည့်လိုက်ရာ အပြောင်းအလဲအချို့ကို သတိပြုမိသွားသည်။

—

[မက်စ်]

– တိုက်ပွဲအရေအတွက်: [၁]

– အနိုင်ရရှိမှု: [၁]

– စစ်သည်တော်ဒင်္ဂါး (Battle Coins): [၁၀၀]

—

"စစ်သည်တော်ဒင်္ဂါး ၁၀၀ တဲ့"

တန်းအသစ်တစ်ခု တိုးလာသည်ကို မြင်သောအခါ မက်စ်က တိုးတိုးလေး ရေရွတ်လိုက်သည်။ ထို့နောက် ဆံပင်ဝါနှင့်လူဘက်သို့ လှည့်၍ "အကို၊ ဒီစစ်သည်တော်ဒင်္ဂါးတွေကို ဘယ်နေရာမှာ အသုံးပြုရတာလဲ" ဟု သိချင်စိတ်ဖြင့် မေးလိုက်သည်။

ဆံပင်ဝါနှင့်လူက ခဏမျှ စဉ်းစားပြီးနောက် မက်စ်ကို စိတ်ရှည်လက်ရှည် ရှင်းပြလိုက်သည်။

"စစ်သည်တော်ဒင်္ဂါးတွေက လူတိုင်း စစ်သည်တော်နယ်ပယ် (Battle Realm) ကို အရူးအမူးဖြစ်နေရတဲ့ အဓိက အကြောင်းရင်းပဲ၊ ဒါကို ဒီကမ္ဘာရဲ့ ငွေကြေးယူနစ်လို့သာ မှတ်လိုက်တော့။ မင်းမှာ စစ်သည်တော်ဒင်္ဂါးတွေ များများရှိလေလေ၊ မင်းရရှိနိုင်မယ့် အခွင့်အရေးနဲ့ အထူးအခွင့်အရေးတွေက ပိုများလေလေပဲ။"

သူက မက်စ်ကို လျှို့ဝှက်ဆန်းပြားသော အကြည့်ဖြင့် ကြည့်ကာ ဆက်ပြောသည်။

"ဒါကတော့ တစ်ဦးချင်းအနေနဲ့ မြင်တဲ့အမြင်ပေါ့။ ဒါပေမဲ့ ထိပ်တန်း အဖွဲ့အစည်း (Guild) ငါးခုနဲ့ ထိပ်တန်း မိသားစုကြီးငါးခု အတွက်ကတော့၊ ဒါဟာ သုံးနှစ်ပြည့်တိုင်းမှာ ဘယ်အင်အားစုက စစ်သည်တော်ဒင်္ဂါး အများဆုံး ပိုင်ဆိုင်ထားသလဲဆိုတာကို ဆုံးဖြတ်တဲ့ နည်းလမ်းတစ်ခုပဲ"

မက်စ်က သူ၏စကားများကို စဉ်းစားကြည့်သည်။ "သုံးနှစ်ပြည့်တဲ့အချိန်မှာ ဘာဖြစ်မှာမလို့လဲ? အဲ့ဒီအချိန်မှာ ဘယ်သူက ဒင်္ဂါးအများဆုံးရှိလဲဆိုတာ ယှဉ်ပြိုင်နေကြတယ်ဆိုရင် တစ်ခုခု အရေးကြီးတာ ရှိလို့ဖြစ်မယ် မဟုတ်လား?"

မက်စ်၏ ထိုးထွင်းသိမြင်မှုကို မြင်ပြီး ဆံပင်ဝါနှင့်လူက အံ့ဩသွားကာ ခေါင်းညိတ်လိုက်သည်။

"မင်းပြောတာ မှန်တယ် ညီလေး။ သူတို့က ပျောက်ဆုံးနေသောတိုက်ကြီး (Lost Continent) ကို သွားရောက်ခွင့်ရမယ့် အကန့်အသတ် (Quota) အရေအတွက်အတွက် တိုက်ပွဲဝင်နေကြတာ"

"ပျောက်ဆုံးနေသောတိုက်ကြီး ဟုတ်လား?"

မက်စ်က ထိုအမည်ကို ပထမဆုံးအကြိမ် ကြားဖူးခြင်းဖြစ်ရာ တိုးတိုးလေး ရေရွတ်လိုက်သည်။ "အဲ့ဒါက ဘယ်လိုနေရာမလို့ အရှေ့ပိုင်းဒေသ (East Region) ရဲ့ အင်အားကြီးအဖွဲ့အစည်းအားလုံးက အာရုံစိုက်နေကြတာလဲ?"

ဆံပင်ဝါနှင့်လူက အားနာသလို ရယ်မောလိုက်သည်။ "အဲ့ဒါကတော့ ထိပ်တန်းအင်အားစုတွေပဲ အမှန်တကယ် သိနိုင်တဲ့ အရာမျိုးပါ။ ငါတို့ကတော့ ကောလာဟလတွေပဲ ကြားရတာပေါ့၊ အခွင့်အလမ်းကြီးတစ်ခု ရှိတယ်ဆိုတာမျိုး၊ ထိပ်တန်းမိသားစုငါးခုနဲ့ ထိပ်တန်းအဖွဲ့အစည်းတွေတောင် အသည်းအသန် လိုချင်ကြတဲ့ ဆုလာဘ်မျိုးပေါ့။"

သူက သက်ပြင်းချရင်း ဆက်ပြောသည်။ "ညီလေး၊ ငါက Level 6 အဆင့်သစ် (Novice Rank) မုဆိုးတစ်ယောက်အနေနဲ့ ဒီလောက်ပဲ သိတာပါ။ တကယ်တော့ အခြေခံအဆင့် (Apprentice Rank) နဲ့ အထက်က လူတွေကို ဖယ်လိုက်ရင် အဆင့်သစ် မုဆိုးတော်တော်များများကတော့ ဒီ ပျောက်ဆုံးနေသောတိုက်ကြီး အကြောင်းကို သိကြမှာ မဟုတ်ဘူး"

မက်စ်က ခေါင်းညိတ်လိုက်ပြီး သူသိချင်နေသည့် နောက်ဆုံးအချက်ကို မေးလိုက်သည်။ "ဒါဆို ဒီ ၃ နှစ် သံသရာက အခု ဘယ်လောက်အထိ ရောက်နေပြီလဲ?"

ဆံပင်ဝါနှင့်လူက ပြန်ဖြေသည်မှာ "နှစ်နှစ်ကတော့ ကုန်သွားပြီ၊ နောက်ထပ် တစ်နှစ်လောက်ပဲ ကျန်တော့တယ်"

"တစ်နှစ်..."

မက်စ်က တစ်စုံတစ်ခုကို စဉ်းစားရင်း ရေရွတ်လိုက်သည်။

"ဒါနဲ့ ညီလေး၊ ငါတို့ နှစ်ယောက် တိုက်ပွဲတစ်ပွဲလောက် ဆင်နွှဲကြည့်ကြမလား" ဟု ဆံပင်ဝါနှင့်လူက အကြံပြုလိုက်သည်။ "မင်းအတွက် ဒါက ဒုတိယမြောက် တိုက်ပွဲဆိုတော့ ငါ မင်းကို အလျှော့ပေးပါ့မယ်"

"အကို အဲ့ဒီလို ပြောရင်လည်း... ကောင်းပါပြီ" ဟု မက်စ်က အနည်းငယ် တွန့်ဆုတ်စွာဖြင့် ပြန်ဖြေလိုက်သည်။

"စိတ်မပူပါနဲ့ ညီလေး။ ငါပြောသလိုပဲ မင်းကို အလျှော့ပေးမှာပါ" မက်စ်၏ တွန့်ဆုတ်မှုကို မြင်သောအခါ ဆံပင်ဝါနှင့်လူက စိတ်ချစေရန် ထပ်ပြောလိုက်သည်။

မက်စ်က ခေါင်းညိတ်လိုက်ပြီး "ဒါနဲ့ ကျွန်တော် အကို့ကို ဘယ်လို စိန်ခေါ်ရမလဲ" ဟု မေးသည်။

"မင်းရဲ့ လက်ညှိုးနဲ့ ငါ့ကို ထောက်ပြလိုက်ရုံပဲ၊ အဲ့ဒီအခါ မျက်နှာပြင်တစ်ခု ပေါ်လာလိမ့်မယ်" ဟု ဆံပင်ဝါနှင့်လူက လမ်းညွှန်ပေးလိုက်သည်။

မက်စ်က ခေါင်းညိတ်ကာ သူ့ကို လက်ညှိုးဖြင့် ထောက်ပြလိုက်သည်။ ချက်ချင်းဆိုသလိုပင် သူ၏ အမြင်အာရုံထဲတွင် အသိပေးချက်တစ်ခု ပေါ်လာသည်။

[သင်သည် နော်မန် ကေ့ဖ် (Norman Caif) ကို စိန်ခေါ်ရန် ဆန္ဒရှိပါသလား?]

"ဟုတ်ကဲ့" ဟု မက်စ်က တွေဝေခြင်းမရှိဘဲ ပြန်ဖြေလိုက်သည်။

"စိန်ခေါ်မှုက ငါ့ဆီ ရောက်လာပြီ"

နော်မန်က ပြုံးလျက် မက်စ်၏ စိန်ခေါ်မှုကို လက်ခံလိုက်သည်။ "ဒါဆို တိုက်ကြတာပေါ့" ဟု ပြောရင်း သူ၏ ကုဗတုံးထဲသို့ လှမ်းဝင်သွားသည်။

မက်စ်က နော်မန် တိုက်ပွဲဝင်ရန် စိတ်အားထက်သန်နေသည်ကို မြင်ပြီး ပြုံးလိုက်သည်။

"ဒါက ကျွန်တော့်အပြစ်မဟုတ်ဘူးနော် အကို၊ အကိုက ပြိုင်ဘက်ကို မှားရွေးမိသွားတာပဲ"

သူက သက်ပြင်းချရင်း ခေါင်းခါလျက် သူ၏ ကုဗတုံးထဲသို့ ဝင်လိုက်သည်။

ခဏအကြာတွင် သူတို့နှစ်ဦးလုံးမှာ မြက်ခင်းပြင် တိုက်ကွင်းထဲသို့ ရောက်ရှိသွားကြသည်။

"အို... အကို့ရဲ့ အဆင့်အတန်းအစား (Class) က တော်တော်မိုက်တာပဲ"

နော်မန်၏ ဘေးပတ်ပတ်လည်တွင် ပျံဝဲနေသော ဓားမြှောင်မြားစင်း(Dagger) ငါးစင်းကို ကြည့်ရင်း မက်စ်က ပြုံး၍ ပြောလိုက်သည်။

"ဟဲဟဲ" နော်မန်က ဂုဏ်ယူစွာဖြင့် ပြုံးဖြီးလိုက်ပြီး "ဒါကို ဓားမြှောင်ကခုန်သူ (Dagger Dancer) လို့ ခေါ်တယ်"

ထိုသို့ ပြောပြီးသည်နှင့် သူသည် ပျံဝဲနေသော ဓားမြှောင်ငါးစင်းကို မက်စ်ထံသို့ ပစ်လွှတ်လိုက်လေတော့သည်။