အခန်း ၆ - အဆင့် ၄ မှင်စာတို့၏ခေါင်းဆောင်မှော်ဆရာတစ်ကောင်

မက်စ်သည် သူ့ထံသို့ ပြေးဝင်လာသော မှင်စာ၁၅ ကောင်ဆီသို့ အရှိန်အဟုန်ဖြင့် တိုးဝင်သွားပြီး မှော်ကျည်ဆန် ၁၀ ခုကို ပစ်လွှတ်လိုက်သည်။ သူသည် Level 3 ရှိသောမှင်စာများကို တမင်တကာ လျစ်လျူရှုထားပြီး Level 2 မှင်စာအသေးစားများကိုသာ ပစ်မှတ်ထားခဲ့သည်။

ဒိန်း! ဒိန်း! ဒိန်း!

Level 2 မှင်စာများသည် မက်စ်၏ ကျည်ဆန်များကို လုံးဝ မခုခံနိုင်ကြပေ။ ၎င်းတို့၏ ဦးခေါင်းများ ပွင့်ထွက်သွားပြီး ခန္ဓာကိုယ်များတွင်လည်း အပေါက်ကြီးများ ဖြစ်သွားလေသည်။ သို့သော် မှင်စာ ငါးကောင် ကျန်ရှိနေသေးပြီး ထိုအထဲမှ သုံးကောင်မှာ Level 3 များ ဖြစ်ကြသည်။

မက်စ်သည် Level 2 မှင်စာတစ်ကောင်၏ ရှေ့သို့ လျှပ်တစ်ပြက် ရောက်ရှိသွားပြီး သူ၏ ဓားကို ဘေးတိုက် ဝေ့ယမ်းလိုက်သည်။

ရှပ်!

မှင်စာ၏ ခန္ဓာကိုယ်ပေါ်တွင် နက်ရှိုင်းသော ဒဏ်ရာတစ်ခု ဖြစ်သွားသော်လည်း ထိုမျှသာ ဖြစ်သည်။ သူ၏ တိုက်ခိုက်မှုက ဤမျှသာ အထိနာစေနိုင်ခဲ့သည်။

ထိုမြင်ကွင်းကို ကြည့်ပြီး မက်စ် မျက်မှောင်ကြုတ်သွားသော်လည်း

Level 3 မှင်စာများ လှုပ်ရှားလာသည်ကို မြင်လိုက်ရသဖြင့် တွေဝေနေရန် အချိန်မရှိတော့ပေ။ ၎င်းတို့သည် တောက်ပနေသော ကျောက်ဓားများကို ကိုင်ဆောင်ကာ သူ့ဆီသို့ အပြေးအလွှား လာနေကြပြီ ဖြစ်သည်။

'ငါ ဒီတစ်ကောင်ကို အရင် အပြတ်ရှင်းရမယ်။'

မက်စ်သည် သူ ခုနက ဒဏ်ရာပေးထားသော မှင်စာကို မှော်ကျည်ဆန် တစ်တောင့်ဖြင့် ပစ်လိုက်သည်။

ဒိန်း!

၎င်း၏ ဦးခေါင်း ပွင့်ထွက်သွားပြီး သေဆုံးသွားလေသည်။ သူသည် နောက်သို့ အမြန်ဆုတ်ကာ အကွာအဝေးတစ်ခု ခြားလိုက်ပြီး နောက်ဆုံးကျန်နေသည့် Level 2 မှင်စာကို ပစ်မှတ်ထားကာ မှော်ကျည်ဆန် တစ်ခု ပစ်ထုတ်လိုက်ပြန်သည်။

ဒိန်း!

ကျည်ဆန်သည် ၎င်း၏ ခန္ဓာကိုယ်ကို ထိမှန်သွားပြီး ဖောက်ထွက်ကာ အပေါက်ကြီး ဖြစ်သွားစေသည်။

'Level 1 ကျွမ်းကျင်မှုပဲ ရှိသေးတဲ့ ဒီ အခြေခံ ဓားသိုင်း စွမ်းရည်ကတော့ အမှိုက်ပဲ' ဟု မက်စ်က သူ့ဆီ ပြေးဝင်လာနေသော Level 3 မှင်စာ သုံးကောင်နှင့် အကွာအဝေးတစ်ခု ထိန်းထားရင်း တွေးလိုက်သည်။

'ဒါပြီးရင် ငါ့ရဲ့ အခြေခံ ဓားသိုင်း ကျွမ်းကျင်မှုကို အနည်းဆုံး Level 10 ဖြစ်အောင် မြှင့်တင်ရမယ်' ဟု တွေးတောရင်း Level 3 မှင်စာ သုံးကောင်ထံ မှော်ကျည်ဆန် သုံးတောင့် ပစ်လွှတ်လိုက်သည်။

ဒိန်း! ဒိန်း! ဒိန်း!

"ဂရား!!!" "ဂရား!!!" "ဂရား!!!"

ကျည်ဆန်များက မှင်စာ သုံးကောင်လုံးကို ထိမှန်သွားပြီး ၎င်းတို့၏ ခန္ဓာကိုယ်များထဲမှ စိမ်းဖျော့ဖျော့ သွေးများ စိမ့်​ထွက်လာသည်။ ကျည်ဆန်များက မှင်စာများကို သေစေလောက်သည့်အထိ မပြင်းထန်သော်လည်း လှုပ်ရှားမှုမရအောင် ပြင်းထန်စွာ ဒဏ်ရာရသွားစေသည်။ ၎င်းတို့သည် စိမ်းဖျော့ဖျော့ သွေးများ စီးကျနေရင်း မြေပြင်ပေါ်သို့ လဲကျသွားကြသည်။

'ငါ့ရဲ့ မှော်စွမ်းအင်ကလည်း နည်းနေပြီ။ အလွန်ဆုံး နောက်ထပ် မှော်ကျည်ဆန် ၁၀ တောင့်ပဲ ပစ်နိုင်တော့မယ်။'

မှော်ကျည်ဆန်များက ၎င်းတို့ကို သေအောင် မသတ်နိုင်သည်ကို မြင်သောအခါ မက်စ် မျက်မှောင်ကြုတ်လိုက်မိသည်။

'မှင်စာ အုပ်ကြီး မဟုတ်ဘဲ သုံးကောင်တည်း ဖြစ်နေတာ တော်သေးတာပေါ့။'

သူသည် ၎င်းတို့ဆီသို့ ပြေးသွားပြီး ရှေ့သို့ ရောက်သွားသည်။ စိမ်းဖျော့ဖျော့ သွေးများထဲတွင် လဲလျောင်းနေသည်ကို မြင်သော်လည်း မက်စ်သည် မည်သည့် သနားညှာတာမှုမှ မပြဘဲ ၎င်းတို့၏ ဦးခေါင်းများကို မှော်ကျည်ဆန် သုံးတောင့်ဖြင့် ပစ်သတ်လိုက်သည်။

မကြာမီမှာပင် ၎င်းတို့၏ အလောင်းများ ပျောက်ကွယ်သွားပြီး တောက်ပသော ဓားအချို့နှင့် အခြားသော ပစ္စည်းအချို့ ကျန်ရစ်ခဲ့သည်။ သို့သော် သူ အဓိက စိတ်ဝင်စားသည်မှာ ၎င်းတို့ဆီမှ ရရှိသော အူဒိုင်မှော်ကျောက်တုံး(Core) သုံးခုဖြစ်သည်။

မက်စ်သည် ၎င်းတို့အားလုံးကို သူ၏ သိုလှောင်ခန်းထဲသို့ ထည့်လိုက်ပြီး နောက်ဘက်တွင် ရှိနေသော အခြားသူများဆီသို့ ဦးတည်လိုက်သည်။ ကျောင်းသားများသည် သူ ချန်ထားခဲ့သော နောက်ဘက်မှ မှင်စာများကို စတင် ကိုင်တွယ်နေကြပြီ ဖြစ်ကြောင်း သူ သတိပြုမိလိုက်သည်။ သူ သတ်ခဲ့သော မှင်စာများထံမှ ကျန်ရစ်ခဲ့သည့် ပစ္စည်းများကိုလည်း သူ မြင်တွေ့နေရသည်။

သူသည် ထိုမြင်ကွင်းကို ကြည့်ကာ ပြုံးလိုက်ပြီး ပစ္စည်းအားလုံးကို သူ၏ သိုလှောင်ခန်းထဲသို့ သိမ်းဆည်းကာ ထိုနေရာမှ တိတ်တဆိတ် ပျောက်ကွယ်သွားခဲ့သည်။

---

မက်စ်သည် တိတ်တဆိတ် Level တက်နိုင်မည့် နေရာကို ရှာဖွေရင်း ရွာ၏ အစွန်အဖျားတွင် လှည့်လည်သွားလာနေသည်။ သူသည် အခြေခံ ဓားသိုင်း ကို Level 10 ရောက်အောင် နာရီအနည်းငယ်ခန့် လေ့ကျင့်ချင်နေသည်။

ရွာ၏ အစွန်တစ်လျှောက် ရွေ့လျားလာရင်း အခြားတစ်ဖက်ရှိ ရွာဝင်ပေါက်သို့ သူ ရောက်ရှိလာသည်။ လမ်းခရီးတွင် Level 2 မှင်စာ အများအပြားနှင့် တွေ့ခဲ့သော်လည်း ထိုနေရာသို့ မရောက်မီ အားလုံးကို ရှင်းလင်းခဲ့ပြီး ဖြစ်သည်။

အခြားတစ်ဖက် ဝင်ပေါက်ရှိ အခြေအနေမှာလည်း သူ လာခဲ့သည့် ဝင်ပေါက်နှင့် အတူတူပင် ဖြစ်သည်။ မှင်စာများက ကျောင်းသားများကို ဝိုင်းရံထားပြီး ကျောင်းသားများမှာလည်း ခက်ခက်ခဲခဲ ပြန်လည် တိုက်ခိုက်နေကြသည်။ သို့သော် ထိုအုပ်စုထဲတွင် Level 3 မှင်စာတစ်ကောင်မှ မပါဝင်သဖြင့် မက်စ် ဝင်မကူညီခဲ့ပေ။

ရွာကို အတိုက်ခံရချိန်တွင် Level 3 မှင်စာ သုံးကောင်လုံးက သူတို့ ဝင်လာသည့် ဝင်ပေါက်ဘက်သို့ ရောက်သွားပြီး ကျန်ရစ်ခဲ့သည့် ဤဝင်ပေါက်တွင်မူ Level 2 မှင်စာများသာ အများအပြား ရှိနေခြင်း ဖြစ်မည်ဟု သူ တွေးလိုက်သည်။

'ဝီလျံ၊ စီရှီး နဲ့ ဟင်နရီ တို့လည်း သူတို့နဲ့ အတူရှိနေတာဆိုတော့ ဒီက မှင်စာတွေကို သူတို့ ကိုင်တွယ်နိုင်မှာပါ' ဟု ရင်းနှီးသော မျက်နှာအချို့ကို မြင်လိုက်ရသောအခါ မက်စ် တွေးလိုက်သည်။ သူတို့ မှင်စာများနှင့် တိုက်ခိုက်နေစဉ် သူ့ကို မမြင်နိုင်စေရန် တဲအိမ်တစ်ခု၏ နောက်ကွယ်တွင် ပုန်းကွယ်နေလိုက်သည်။

'ငါ သွားတော့မယ်။'

မက်စ်သည် ရွာ၏ အလယ်ဗဟိုဘက်သို့ ရွေ့လျားသွားသည်။ သူ အချို့ကို သတ်ဖြတ်ခဲ့သော်လည်း Level 2 မှင်စာများက ရွာအစွန်တွင် ဆက်တိုက် ရောက်လာပြီး စောင့်ကြပ်နေဆဲ ဖြစ်သည်ကို သတိပြုမိသည်။ ထို့ကြောင့် ပိုကောင်းသော နေရာတစ်ခု တွေ့နိုင်မလား သိရရန် အလယ်ပိုင်း ဒေသကို သွားစစ်ဆေးရန် သူ ဆုံးဖြတ်လိုက်သည်။

'ဟို ကျဉ်းမြောင်းတဲ့ လမ်းမှာ ငါ သတ်ခဲ့တဲ့ Level 1 မှင်စာတွေဆီက ရတဲ့ အူဒိုင်မှော်ကျောက်တုံး(Core) တွေအားလုံးကို ငါ စုပ်ယူပြီးပြီ။ Level မတက်ခဲ့ပေမဲ့ ငါ့ရဲ့ မှော်စွမ်းအင် တွေကတော့ အပြည့် ပြန်ဖြစ်သွားပြီ' ဟု တွေးရင်း ရွာအလယ်ပိုင်းသို့ တိတ်တဆိတ် ချဉ်းကပ်သွားသည်။ ဤဒေသတွင် Level 3 မှင်စာများနှင့် ပိုမို တွေ့ကြုံရနိုင်သည်ကို သိသဖြင့် သူ အထူး သတိထား လှုပ်ရှားနေရသည်။

အလယ်ပိုင်းသို့ တိတ်တဆိတ် ရောက်ရှိလာပြီးနောက် မက်စ်သည် သေတ္တာကြီး တစ်ခု၏ နောက်ကွယ်တွင် ရုတ်တရက် ပုန်းလိုက်သည်။ ထိုနေရာတွင် လက်နက်ကိုယ်စီ ကိုင်ဆောင်ထားသော Level 1 နှင့် Level 2 မှင်စာအများအပြားကို မြင်လိုက်ရသောကြောင့် ဖြစ်သည်။ ၎င်းတို့သည် ကျောက်ဓားများ နှင့် သံချေးတက်နေသော ဓားများ၊ အချို့မှာမူ တုတ်အကောက်များ ကို ကိုင်ဆောင်ထားကြသည်။

'တောက်! တကယ်ဆိုရင်တော့ သွားပြီး အကုန်လုံးကို သတ်ပစ်လိုက်ချင်တာပဲ။'

မှင်စာအုပ်ကြီး အနီးအနားတွင် Level 3 မှင်စာအများအပြား ရှိနေသည်ကို မြင်သောကြောင့် မက်စ်သည် ၎င်းတို့ကို သတ်ဖြတ်ချင်သည့် စိတ်ကို ထိန်းချုပ်လိုက်ရသည်။

'ငါ သွား—'

မက်စ်သည် ထိုနေရာမှ ထွက်ခွာတော့မည် အပြုတွင် တစ်ခုခုကို ရုတ်တရက် ခံစားလိုက်ရသည်။ ဤနေရာရှိ တစ်ခုခုကို သူ၏ ခန္ဓာကိုယ်က တုံ့ပြန်နေခြင်း ဖြစ်သည်။ သူ၏ 'သုံးဖက်မြင် ခန္ဓာကိုယ်' စွမ်းရည်မှာ အမြဲတမ်း ပွင့်နေခဲ့သော်လည်း ထို အရာရာကို မြင်နိုင်စွမ်းရှိသော အာရုံဖြင့် ကြည့်သည့်တိုင် ထူးခြားသည့် အရာတစ်ခုမျှ မတွေ့ရပေ။

'ဒါပေမဲ့ ငါ တစ်ခုခုကို ခံစားနေရတုန်းပဲ...'

မက်စ် မျက်မှောင်ကြုတ်ကာ သေတ္တာနောက်မှ ဆုတ်လိုက်သည်။ ခေတ္တမျှ မျက်စိမှိတ်ကာ ထိုခံစားမှုကို အာရုံစိုက်လိုက်သည်။

'ဒါ ငါ့ရဲ့ သုံးဖက်မြင် ခန္ဓာကိုယ် စွမ်းရည်ကနေ လာတဲ့ ခံစားချက်ပဲ!'

သူ မျက်လုံးဖွင့်လိုက်ပြီး ထိုခံစားမှု လာရာနေရာသို့ တိတ်တဆိတ် ချဉ်းကပ်သွားသည်။ မှင်စာများကိုလည်း သတိထားရန် မမေ့ဘဲ တတ်နိုင်သမျှ ရှောင်ကွင်းသွားသည်။ ရှောင်မရသော မှင်စာများကိုမူ လမ်းမှာတင် တိတ်တဆိတ် သတ်ပစ်ခဲ့သည်။

အတန်ကြာ ချဉ်းကပ်ပြီးနောက် မက်စ်သည် တဲအိမ်လေး တစ်ခု၏ ရှေ့သို့ ရောက်ရှိလာသည်။ တဲအိမ်မှာ မဝေးလှသော်လည်း Level 3 မှင်စာများ ပြည့်နှက်နေသည့် ရွာအလယ်ပိုင်းတွင် ဖြစ်သဖြင့် ဤနေရာသို့ လာရန် မက်စ် အထူး သတိထားခဲ့ရသည်။

'ဒီတဲအိမ်ဆီက ခံစားချက်တွေ လာနေတာပဲ။'

မက်စ်သည် တဲအိမ်ကို ကြည့်လိုက်သောအခါ ရွာထဲရှိ အခြားသော တဲအိမ်များကဲ့သို့ပင် သစ်သားနှင့် သစ်ရွက်များဖြင့် ပြုလုပ်ထားကြောင်း တွေ့ရသည်။ 'ဒီတဲအိမ်ထဲမှာ ဘာတွေ ဒီလောက် ထူးခြားနေလဲ ကြည့်ရအောင်။'

သူသည် သတိကြီးစွာဖြင့် တဲအိမ်ထဲသို့ ဝင်သွားလိုက်သည်။ သို့သော် အတွင်းထဲတွင် သူ မြင်တွေ့လိုက်ရသည့် အရာက သူ့ကို အနည်းငယ် အံ့အားသင့်သွားစေသည်။

သူသည် အသုံးအဆောင် ပစ္စည်းများစွာ ရှိနေသော ခန်းမကျယ်ကြီး တစ်ခုထဲသို့ ရောက်ရှိနေခြင်း ဖြစ်သည်။ ဓားများ၊ လှံများ၊ တုတ်အကောက်များနှင့် ဓားမြှောင်များစွာ ရှိသော်လည်း ၎င်းတို့အားလုံးမှာ Level 1 နှင့် Level 2 မှင်စာများ အသုံးပြုသည့် သံချေးတက်နေသော သို့မဟုတ် သစ် ကျောက်လက်နက်များသာ ဖြစ်နေသည်ကို သူ သတိပြုမိသည်။

အခြားသော အရာများစွာ ရှိနေသော်လည်း သူ့အာရုံကို အဖမ်းစားနိုင်ဆုံးမှာ ခန်းမ၏ အစွန်ဆုံးတွင် ရပ်နေသော ဂေါ်ဘလင်ဖြစ်သည်။ ထိုမှင်စာ၏ အစွမ်းမှာ Level 4 တွင် ရှိပုံရပြီး အခြား မှင်စာများနှင့်မတူဘဲ လက်ထဲတွင် လက်ကိုင်တုတ် တစ်ခုကို ကိုင်ဆောင်ထားသည်။

"နေပါဦး... ဒါ မှင်စာမှော်ဆရာလား၊ မှင်စာတွေရဲ့ခေါင်းဆောင်သခင်လား?"

မက်စ်၏ မျက်လုံးများ ပြူးကျယ်သွားသည်။ မှင်စာခေါင်းဆောင်မှော်ဆရာ များသည် ပုံမှန်အားဖြင့် အဆင့်နိမ့် ဂူဗိမာန်များတွင် အကြီးအကဲ ဘော့စ် အမျိုးအစား မိစ္ဆာသတ္တ၀ါများ ဖြစ်ကြသော်လည်း ဤတစ်ကောင်မှာ ဂူဗိမာန် အကြီးအကဲဘော့စ် ဖြစ်ပုံမရပေ။

'သိပြီ! ငါတော့ ရတနာသိုက်ကြီး တိုးပြီပဲ။ ဒါ ဒီဂူဗိမာန်ရဲ့ လျှို့ဝှက်အခန်း ဖြစ်ရမယ်' ဟု မက်စ် နားလည်သွားသည်။

သူ၏ 'သုံးဖက်မြင် ခန္ဓာကိုယ်' စွမ်းရည်က သူ့ကို အဘယ်ကြောင့် ဤနေရာသို့ ခေါ်ဆောင်လာသနည်း ဆိုသည်ကိုလည်း သူ သဘောပေါက်သွားသည်။

'သုံးဖက်မြင် ခန္ဓာကိုယ်' စွမ်းရည်က ဟင်းလင်းပြင်နဲ့ ဆက်နွှယ်တဲ့ အစွမ်းဆိုတော့ ဒီတဲအိမ် ပတ်ဝန်းကျင်မှာ ရှိနေတဲ့ ထူးခြားတဲ့ ဟင်းလင်းပြင် အခြေအနေကို အာရုံခံမိတာ ဖြစ်နိုင်တယ်' ဟု သူ ခန့်မှန်းလိုက်သည်။

"ဂရားးး!"

သို့သော် မက်စ်မှာ ဆက်လက် တွေးတောနေရန် အချိန်မရလိုက်ပေ။ မှင်စာတို့၏ခေါင်ဆောင်မှော်ဆရာ က အခွင့်အရေး မပေးဘဲ သူ၏ လက်ကိုင်တုတ် ကို ဝှေ့ယမ်းကာ တောက်လောင်နေသော မီးလုံး ကြီးတစ်လုံးဖြင့် စတင် တိုက်ခိုက်လိုက်လေသည်။

တိုက်ခိုက်မှုမှာ လျှင်မြန်လွန်းသဖြင့် မက်စ်အနေဖြင့် တုံ့ပြန်ရန် စက္ကန့်ပိုင်းလောက်သာ အချိန်ရလိုက်သည်။