အခန်း (၅၉) စံချိန်သစ်တစ်ရပ်

မက်စ်သည်အသက်ကို ပြင်းပြင်းရှူလိုက်ရင်း ကျန်ရှိနေသေးသော မကောင်းဆိုးဝါး ၁၆ ကောင်ကို စူးစိုက်ကြည့်နေသည်။ ထိုခဏ၌ပင် သူသည် ရုတ်ချည်းပျောက်ကွယ်သွားပြီး မကောင်းဆိုးဝါးတစ်ကောင်၏ရှေ့တွင် ပြန်ပေါ်လာကာ အားပါသောလက်သီးဖြင့် အောက်သို့ ထိုးနှက်လိုက်သည်။

ဝုန်း!

မကောင်းဆိုးဝါးမှာ မြေကြီးထဲသို့ တစ်ပါတည်း နစ်ဝင်သွားပြီး အရိုးများ အကုန်ကြေမွသွားတော့သည်။ ဝံပုလွေလူသားပုံစံ မကောင်းဆိုးဝါးတစ်ကောင်က နောက်ကွယ်မှ ခုန်အုပ်လာသော်လည်း မက်စ်၏ သုံးဖက်မြင်ခန္ဓာကိုယ် (Three Dimensional Body) စွမ်းရည်ရှေ့တွင်တော့ ထိုအကောင်မှာ အခွင့်အရေးပင် မရှိပေ။ သူသည် ကိုယ်ကို ဝေ့ယမ်းကာ ဝံပုလွေ၏ လက်သည်းပါသောလက်ကို ဖမ်းဆွဲလိုက်ပြီး ဝမ်းဗိုက်ကို ပြင်းထန်စွာ ထိုးနှက်လိုက်သည်။

ဘုန်း!

မကောင်းဆိုးဝါးမှာ ကွင်း၏ အခြားတစ်ဖက်သို့ လွင့်စင်သွားပြီး နံရံနှင့် အရှိန်ပြင်းစွာ ရိုက်မိကာ သွေးများနှင့် အရိုးစများ လွင့်စင်သွားတော့သည်။ မက်စ်သည် အသက်ကို ခပ်ပြင်းပြင်းရှူရင်း ပတ်ဝန်းကျင်ကို အကဲခတ်လိုက်ရာ ဘေးတစ်ဖက်တစ်ချက်စီမှ ချဉ်းကပ်လာသည့် မကောင်းဆိုးဝါး နှစ်ကောင်ကို သတိထားမိလိုက်သည်။ ၎င်းတို့မှာ အရိပ်အစွယ်အမှောင်စွမ်းအားရှိတဲ့ ကျားမျိုး သတ္တဝါကြီး (Shadowfang Panther) နှင့် လေဟုန်စီးနဂါး (Skywind Drake) တို့ ဖြစ်ကြသည်။ သူသည် အချိန်မီ နောက်သို့ ဆုတ်လိုက်ပြီး ၎င်းတို့၏ တိုက်ခိုက်မှုကို ရှောင်တိမ်းလိုက်သည်။

သို့သော် ထိုအချိန်မှာပင် နောက်ကွယ်မှ အခြားမကောင်းဆိုးဝါးတစ်ကောင် ပေါ်လာပြန်သည်—၎င်းမှာ လျှပ်စီးများ တဖျတ်ဖျတ်လက်နေသော ဦးချိုပါသည့် လျှပ်စီးကြံ့ (Lightning Rhino) ပင် ဖြစ်သည်။ မက်စ်သည် ချက်ချင်းတုံ့ပြန်ကာ ဒူးကိုကွေးလျက် ပြင်ဆင်လိုက်သော်လည်း တစ်ချိန်တည်းမှာပင် လျှပ်စီးကြံ့က ၎င်း၏ လျှပ်စီးတိုက်ကွက်ကို ထုတ်လွှတ်လိုက်သည်။

ချိ-လား!

မက်စ်သည် လျှပ်စီးအားဖြည့်ထားသော ဦးချိုကိုသာ အာရုံအပြည့်စိုက်ထားပြီး တိုက်ကွက်က သူ့ဆီသို့ ပြေးဝင်လာသည့်အချိန်၌ပင် လေထဲသို့ ခုန်တက်ကာ အလှည့်ကျွမ်းပစ်လျက် လျှပ်စီးကြံ့၏ နောက်ကျောဘက်သို့ ဆင်းသက်လိုက်သည်။

ဘုန်း!

လျှပ်စီးတိုက်ကွက်မှာ သူ့ကို အစောက တိုက်ခိုက်ခဲ့သည့် အခြားမကောင်းဆိုးဝါးနှစ်ကောင်ကို ထိမှန်သွားပြီး ၎င်းတို့၏ အရေပြားများမှာ မီးလောင်ကာ မည်းတူးသွားတော့သည်။ ပြင်းထန်စွာ ဒဏ်ရာရသွားသော်လည်း ၎င်းတို့မှာ သေဆုံးခြင်းမရှိဘဲ လျှပ်စီးကြံ့ဘက်သို့ လှည့်ကာ အစွယ်များထုတ်လျက် ပြန်လည်ခုန်အုပ်ကြတော့သည်။ လျှပ်စီးကြံ့ အာရုံလွဲနေသည်ကို မြင်သောအခါ မက်စ်သည် ၎င်းနှင့် အခြားမကောင်းဆိုးဝါးနှစ်ကောင်ကိုပါ အပြတ်ရှင်းရန် အခွင့်အရေးကို အရယူလိုက်သည်။ သို့သော် ကျန်ရှိနေသော မကောင်းဆိုးဝါး ၁၁ ကောင်မှာလည်း စက္ကန့်ပိုင်းအတွင်း သူတို့ဆီ ရောက်လာတော့မည်ကို သတိထားမိလိုက်သည်။

'ဒါကို အမြန်အဆုံးသတ်မှ ဖြစ်မယ်' မက်စ် စိတ်ထဲမှ တွေးလိုက်ရင်း သူ၏ ပုံရိပ်မှာ ဝေဝါးသွားကာ လျှပ်စီးကြံ့၏ နောက်ကျောကို ပစ်မှတ်ထား၍ လက်သီးဖြင့် ထိုးနှက်လိုက်သည်။

ဘုန်း!

လျှပ်စီးကြံ့မှာ ခုခံနိုင်စွမ်းမရှိဘဲ လွင့်စင်သွားတော့သည်။ ၎င်းတစ်ကောင်တည်း မဟုတ်ဘဲ အရိပ်အစွယ်ပန်သာ နှင့် လေဟုန်စီးနဂါး တို့ပါ မက်စ်၏ ထိုးနှက်ချက် အရှိန်ကြောင့် အတူတူ လွင့်ထွက်သွားကြသည်။

"ဒါက မပြီးသေးဘူး!"

မက်စ် အော်ဟစ်လိုက်ပြီး တစ်ဖန် ပြန်လည်ပျောက်ကွယ်သွားကာ မကောင်းဆိုးဝါး သုံးကောင်၏ အထက်တွင် ပေါ်လာပြီး ပြင်းထန်သော လက်သီးချက် သုံးချက်ကို ဆင့်တိုက်လိုက်သည်။

ဘုန်း! ဘုန်း! ဘုန်း!

လက်သီးတစ်ချက်ချင်းစီက မကောင်းဆိုးဝါးများကို မြေပြင်ပေါ်သို့ ပြင်းထန်စွာ ရိုက်ချလိုက်ရာ မြေပြင်တွင် တွင်းကြီးတစ်ခု ဖြစ်သွားတော့သည်။ ထို့နောက် မက်စ်သည် ကျန်ရှိနေသော မကောင်းဆိုးဝါး ၁၁ ကောင်ဘက်သို့ လှည့်ကာ ပြုံးလိုက်သည်။

"လာကြလေ"

သူသည် လက်ကို မြှောက်လိုက်ရာ နီရဲတောက်လောင်နေသော မီးလျှံများက သူ၏ ညာဘက်လက်မောင်း တံတောင်ဆစ်အထိ လွှမ်းခြုံသွားတော့သည်။

"သူ့ရဲ့ မန္တန်စွမ်းအင်တွေ ပြန်ပြည့်လာတာလား? ဒါ ဘယ်လိုဖြစ်နိုင်မှာလဲ?" လူငယ် မုဆိုး (Hunter) တစ်ယောက်က အံ့အားသင့်စွာ အော်ဟစ်လိုက်သည်။

"သူ မီးလျှံစွမ်းရည်ကို ထပ်သုံးနေပြန်ပြီ... သူ့မန္တန်စွမ်းအင်တွေ ကုန်ခါနီးနေပြီ မဟုတ်ဘူးလား?" အခြားသူများကလည်း အလားတူပင် အံ့သြနေကြသည်။

ရိုင်ယန် (Ryan) က မျက်မှောင်ကြုတ်ကာ စဉ်းစားနေသည်။ "ငါ မမှားဘူးဆိုရင် ဒီကလေးက နောက်ဆုံးကျန်တဲ့ မကောင်းဆိုးဝါးတွေအတွက် မန္တန်စွမ်းအင် ချွေတာဖို့ မီးလျှံစွမ်းရည်ကို တမင်ပိတ်ထားခဲ့တာပဲ။ သူက ကျန်တဲ့အကောင်တွေကို စက္ကန့်ပိုင်းအတွင်း အပြတ်ရှင်းဖို့ ကြံနေတာ ထင်တယ်။ သူ့ရဲ့ မန္တန်စွမ်းအင်တွေ အကုန်မခန်းခြောက်ခင် အချိန်ခဏလေးအတွင်းမှာ သူ အဆုံးသတ်လိမ့်မယ်" ဟု သူ၏ အမြင်ကို ရှင်းပြလိုက်သည်။

ထိုအချိန်တွင် မက်စ်က ရိုင်ယန်ဘက်သို့ လှည့်ကာ ပြုံးလျက် လက်ညှိုးထိုးလိုက်ပြီး "ခင်ဗျား ဒီအခိုက်အတန့်ကို သေချာမှတ်တမ်းတင်ထားလိုက်တော့" ဟု ပြောကာ ပျောက်ကွယ်သွားပြန်သည်။

ထို့နောက်တွင် ဖြစ်ပျက်ခဲ့သည်မှာ တိုက်ပွဲအစကကဲ့သို့ပင် တစ်ဖက်သတ် သတ်ဖြတ်မှုကြီး ဖြစ်တော့သည်။ မက်စ်၏ ဝေဝါးနေသော ပုံရိပ်နှင့် တောက်လောင်နေသော ညာဘက်လက်မောင်းသည် ဖျက်ဆီးရေးလက်နက်တစ်ခုကဲ့သို့ မကောင်းဆိုးဝါးများကို ဖြတ်သန်းချေမှုန်းနေသည်။ သူသည် မီးလျှံတန်းကြီးများကို ချန်ရစ်ကာ အနီးဆုံးသတ္တဝါဆီသို့ ပြေးဝင်သွားရာ ပတ်ဝန်းကျင်လေထုမှာ အပူရှိန်ကြောင့် တုန်ခါနေသည်။ အားပါသော လက်သီးတစ်ချက်ဖြင့် ထိုသတ္တဝါမှာ မီးလောင်ကျွမ်းနေသော အပိုင်းအစများအဖြစ် ပေါက်ကွဲသွားပြီး ၎င်း၏ ဟိန်းဟောက်သံမှာလည်း ရုတ်ချည်းပျောက်ကွယ်သွားသည်။

မက်စ်သည် လျင်မြန်စွာ လှည့်လိုက်ရာ သူ၏ အရှိန်ကြောင့် လေထဲတွင် အရိပ်တန်းများ ကျန်ရစ်ခဲ့သည်။ အခြားမကောင်းဆိုးဝါးတစ်ကောင်က လက်သည်းများဖြင့် ခုန်အုပ်လာသော်လည်း ၎င်း၏ တိုက်ခိုက်မှုမှာ လေထဲမှာတင် ရပ်တန့်သွားသည်။ မက်စ်၏ မီးလျှံလက်သီးမှာ ထိုအကောင်၏ ရင်ဘတ်ကို ဟိန်းထွက်နေသော အသံကြီးနှင့်အတူ ထိမှန်သွားကာ အပိုင်းပိုင်းအစစ ပေါက်ကွဲထွက်သွားတော့သည်။

"သူ ၉၁ ကောင်အထိ သတ်ပြီးပြီ..." ထိပ်ပြောင်ပြောင်နှင့် လူကြီးက ရိုင်ယန်ဘက်သို့ လှည့်ကာ အသံများတုန်ရင်လျက် ရေရွတ်လိုက်သည်။

ရိုင်ယန်သည် အံကြိတ်ထားသော်လည်း မျက်နှာတွင် အပြုံးတစ်ခု ရှိနေသည်။ "ဒီကလေးက တကယ့်ကို မကောင်းဆိုးဝါးပဲ။ သူပြောတဲ့အတိုင်း အတိအကျ လုပ်ပြနေတာပဲ။" တစ်စုံတစ်ယောက်က သတ်ဖြတ်မှု အရေအတွက် အများဆုံး စံချိန်သစ်တင်နေသည့် စမ်းသပ်ပွဲကို သူကိုယ်တိုင် ကြီးကြပ်နေရသည်ဆိုသည်ကို သူ မယုံကြည်နိုင်အောင် ဖြစ်နေရသည်။ သူသည် တစ်စုံတစ်ခုကြောင့် ဂုဏ်ယူသလိုပင် ခံစားနေရသည်။

လူငယ်မုဆိုးများသည် မက်စ်ထံမှ မျက်တောင်မခတ်တမ်း အံ့အားသင့်စွာ ကြည့်နေကြသည်။ သူတို့ မျက်နှာမလွှဲနိုင်ကြသလို၊ မလွှဲချင်ကြပေ။ မက်စ်သည် ဖီးနစ်အဖွဲ့ချုပ် (Phoenix Order) အတွင်း သမိုင်းသစ် ရေးထိုးနေခြင်းဖြစ်ပြီး၊ သူတို့အားလုံးသည် မကောင်းဆိုးဝါး အကြွင်းအကျန်များကြားတွင် မက်စ် တစ်ဦးတည်း မားမားမတ်မတ် ရပ်တည်နေမည့် အခိုက်အတန့်ကို ကိုယ်တိုင်မြင်တွေ့လိုကြသည်။

ကျန်ရှိနေသော မကောင်းဆိုးဝါးများသည် မက်စ်၏ လက်တွင် တောက်လောင်နေသော မီးလျှံများကို မြင်သောအခါ ၎င်းတို့၏ တောက်ပနေသော မျက်လုံးများတွင် ကြောက်ရွံ့မှုများ အရိပ်ယောင်သန်းလာကာ နောက်တွန့်သွားကြသည်။ တိုက်ပွဲအစတွင် ဖြစ်ပွားခဲ့သော သတ်ဖြတ်မှုနှင့် ယခုလေးတင် ဖြစ်ပျက်သွားသည်များကို ပြန်လည်သတိရသွားကြပြီး ၎င်းတို့အားလုံး ကြောက်လန့်တုန်ရီနေကြသည်။

'အဆုံးသတ်ရမယ့် အချိန်ရောက်ပြီ'

မက်စ် တွေးလိုက်ရင်း ၎င်းတို့ မတုံ့ပြန်နိုင်ခင်မှာပင် အကွာအဝေးကို ချက်ချင်းဖြတ်ကျော်လိုက်သည်။ အောက်သို့ ထိုးနှက်ချက်တစ်ခုက ထွားကျိုင်းသော သတ္တဝါကြီး၏ ခုခံမှုကို ဖျက်ဆီးပစ်လိုက်ပြီး၊ လျင်မြန်သော လက်ပြန်ရိုက်ချက်တစ်ခုက နောက်တစ်ကောင်ကို မီးစွဲလောင်စေခဲ့သည်။ တိုက်ခိုက်မှုတိုင်းသည် လျင်မြန်တိကျလှပြီး ခုခံရန် အခွင့်အရေးပင် မပေးပေ။ ထို့နောက် မက်စ်သည် နောက်ဆုံးကျန်သော မကောင်းဆိုးဝါး အနည်းငယ်ဘက်သို့ လှည့်ကာ တစ်ဖန် ပျောက်ကွယ်သွားပြီး မျက်စိတစ်မှိတ်အတွင်း အားလုံးကို သတ်ဖြတ်လိုက်တော့သည်။

ခဏအတွင်းမှာပင် အားလုံး ပြီးဆုံးသွားသည်။ နောက်ဆုံး မကောင်းဆိုးဝါးမှာ မြေပြင်ပေါ်သို့ လဲကျသွားပြီး ၎င်း၏ မီးလောင်ကျွမ်းနေသော ခန္ဓာကိုယ်အစိတ်အပိုင်းများမှာ ကွင်းအတွင်း ပြန့်ကျဲနေတော့သည်။ မက်စ်သည် ကွင်း၏ အလယ်တွင် ရပ်နေပြီး အပူရှိန်များ လျော့ပါးသွားသည်နှင့်အမျှ သူ၏ တောက်လောင်နေသော လက်မောင်းမှာလည်း မှေးမှိန်သွားသည်။ သူ၏ အသက်ရှူသံမှာ တည်ငြိမ်နေပြီး မျက်နှာမှာလည်း ဤစမ်းသပ်ပွဲကြီးက သူ့အတွက် ဘာမှမဟုတ်သကဲ့သို့ အေးဆေးတည်ငြိမ်နေသည်။

ကွင်းပြင်တစ်ခုလုံး တိတ်ဆိတ်သွားပြီး မြေပြင်မှာ မီးလောင်ကျွမ်းကာ သက်မဲ့နေတော့သည်။ မက်စ်၏ ခပ်ပြင်းပြင်း အသက်ရှူသံများသာ ထိုနေရာတွင် ပဲ့တင်ထပ်နေသည်။

"သူ လုပ်နိုင်သွားပြီ။ မကောင်းဆိုးဝါးတွေ အကုန်လုံးကို သူ သတ်လိုက်ပြီ။"

"တောက်! ဒီကလေးက တကယ့်ကို ကြောက်စရာကောင်းတာပဲ။ အဆင့် ၆ မှာတင် ဒီလိုတွေ လုပ်နိုင်တယ်ဆိုတာ တကယ်ကို စဉ်းစားလို့တောင် မရဘူး။"

"ဒါကို ကိုယ်တိုင်မြင်တွေ့ခွင့်ရလို့ ငါ ဝမ်းသာလိုက်တာ။"

"ငါလည်း အတူတူပဲ။ ငါ ဒီစမ်းသပ်ပွဲမှာ ကျရှုံးသွားရင်တောင် ပြုံးပြုံးကြီး ပြန်နိုင်ပြီ။ ဒီလိုမြင်ကွင်းမျိုးကို နေ့တိုင်း မြင်ရတာမှ မဟုတ်တာ။"

လူငယ်မုဆိုးများမှာ အားရပါးရ ဟစ်ကြွေးလိုက်ကြသည်။ တစ်စုံတစ်ယောက်က စံချိန်သစ်တင်သည်ကို မြင်တွေ့လိုက်ရသဖြင့် သူတို့ အံ့သြမှင်သက်နေကြသည်။

မက်စ်နှင့်အတူ စမ်းသပ်ပွဲကို အတူတူ ဖြေဆိုခွင့်ရခြင်းမှာ ကံကောင်းသည်ဟု သူတို့ ခံစားနေကြရသည်။

"သူ လုပ်နိုင်ခဲ့ပြီ... သူ့ရဲ့ စွမ်းအားမျိုးက ငါ အလိုချင်ဆုံးပဲ" ဟု လိုင်ရာ က မက်စ်ကို စိုက်ကြည့်ရင်း အံ့အားသင့်စွာ ရေရွတ်လိုက်သည်။ သူမ၏ စိတ်ထဲတွင် ဘာတွေတွေးနေသည်ကိုတော့ မည်သူမျှ မသိနိုင်ပေ။

အခြားတစ်ဖက်တွင်တော့ လူကြီးများမှာ လူငယ်များထက်ပင် ပိုမိုအံ့သြနေကြသည်။

"သူ လုပ်နိုင်ခဲ့ပြီ... မကောင်းဆိုးဝါးတွေ အကုန်လုံးကို သတ်ပြီး နောင်လာနောင်သားတွေအတွက်ပါ စံချိန်သစ် တစ်ခု တင်နိုင်ခဲ့ပြီ" ဟု ရိုင်ယန်က မျက်နှာတွင် အပြုံးကြီးဖြင့် ခုန်ပေါက်ကာ အလွန်အမင်း ဝမ်းသာအားရ ပြောလိုက်သည်။ ယခင်က တစ်ခါမှ မရှိခဲ့ဖူးသည့် မြင်ကွင်း—မကောင်းဆိုးဝါး ၁၀၀ လုံးကို တစ်ကြိမ်တည်းနှင့် အကုန်သတ်နိုင်ခဲ့သည့် ဤအခိုက်အတန့်ကို သူ ဘယ်တော့မှ မေ့နိုင်မည် မဟုတ်ပေ။

"မကောင်းဆိုးဝါး ၁၀၀ လုံး..." ဟု ထိပ်ပြောင်နှင့်လူက မယုံကြည်နိုင်စွာ ရေရွတ်နေသည်။ အဆင့်သစ် (Novice Rank) မှာ ရှိနေတုန်း တစ်စုံတစ်ယောက်က မကောင်းဆိုးဝါး ၁၀၀ ကို တစ်ပြိုင်တည်း သတ်နိုင်ခဲ့သည်ကို သူ မယုံကြည်နိုင်ဖြစ်နေသည်။ အဆင့်သစ် (Novice Rank) တွင် ဤတာဝန်မှာ မဖြစ်နိုင်သလောက်ပင်။ အဆင့်သစ် (Novice Rank) ၌ မန္တန်စွမ်းအင် မြစ်ဖျားခံရာသည် သွေးများနှင့် ဆဲလ်များမှတစ်ဆင့် ခန္ဓာကိုယ်အနှံ့ စီးဆင်းနေသဖြင့် စွမ်းအင်မှာ ပျံ့နှံ့နေပြီး ကိုယ်ပိုင်အသုံးပြုရန် လုံလောက်သော ပမာဏကို ထုတ်ယူရန် ခက်ခဲလှသည်။ မန္တန်စွမ်းအင် မကုန်ခမ်းမီ တိုက်ကွက်အနည်းငယ်ကိုသာ ခက်ခက်ခဲခဲ လုပ်ဆောင်နိုင်သည်။ အ‌ခြေခံအဆင့် (Apprentice Rank) ရောက်ပြီး အူဒိုင်မှော်‌ကျောက်တုံး (Core) တစ်ခု ပုံဖော်ပြီးမှသာ ယခုကဲ့သို့ ခက်ခဲသော တာဝန်များအတွက် လုံလောက်သော မန္တန်စွမ်းအင်ကို စုဆောင်းနိုင်သည်။ သို့သော် သူတို့သည် အဆင့်သစ် (Novice Rank)၊ အဆင့် ၆ သာ ရှိသေးသော သူတစ်ယောက်က မဖြစ်နိုင်သောအရာကို လုပ်ပြသွားသည်ကို ကိုယ်တိုင် မြင်တွေ့လိုက်ရလေပြီ။