အခန်း (၄၇) အတားအဆီးကို ကျော်လွှားသူ

အဆုံးမဲ့ဖြူဖွေးနေသော ဟင်းလင်းပြင်ကျယ်ကြီးထဲတွင် တောက်ပနေသော အပြာရောင်အစက်အပြောက် ရာပေါင်းများစွာကြား၌ လူရိပ်တစ်ခု မတ်တပ်ရပ်နေသည်။ ထိုအစက်အပြောက်များသည် တစ်ခါတစ်ရံ သူ့ကို ဝန်းရံလှည့်ပတ်နေကြပြီး၊ တစ်ခါတစ်ရံတွင်မူ သူ့တစ်ကိုယ်လုံးကို လုံးဝဖုံးလွှမ်းသွားကြသည်။ ဤဖြစ်စဉ်သည် အကြိမ်ပေါင်း သိန်းနှင့်ချီ၍ ထပ်ခါတလဲလဲ ဖြစ်ပျက်နေပြီးနောက်၊ နောက်ဆုံးတွင် တောက်ပနေသော အပြာရောင်အစက်အပြောက်အားလုံး ပျောက်ကွယ်သွားကာ ထိုလူရိပ်မှာ မှောင်မိုက်ခြောက်ကပ်လှသော ဖြူဖွေးသည့်ကမ္ဘာထဲတွင် တစ်ကိုယ်တည်း ကျန်ရစ်ခဲ့တော့သည်။

[မက်စ် ဗွိုက်ဝေါလ်ကာသည် စွမ်းရည်တစ်ခုကို အဆင့် ၁၀၀ ကျော်လွန်သည်အထိ မြှင့်တင်နိုင်ခဲ့သည့်အတွက် ဂုဏ်ယူပါသည်။]

[မက်စ် ဗွိုက်ဝေါလ်ကာသည် 'အတားအဆီးကို ကျော်လွှားသူ (Limitbreaker)' ဘွဲ့တံဆိပ်ကို ရရှိသည့်အတွက် ဂုဏ်ယူပါသည်။]

[မက်စ် ဗွိုက်ဝေါလ်ကာသည် 'ရှေးဦးအစွမ်း၏ အရှိန်အဝါ (Aura of the Primordials)' ဘွဲ့တံဆိပ်ကို ရရှိသည့်အတွက် ဂုဏ်ယူပါသည်။]

"ငါ လုပ်နိုင်ခဲ့ပြီဟေ့!"

ဝိညာဉ်များ၏ နယ်ပယ် (Dimension of Spirits) ထဲမှ ပြန်ထွက်လာစဉ် သူက အောင်ပွဲခံသံဖြင့် အော်ဟစ်လိုက်သည်။ သူသည် ချက်ချင်းပင် ဝုန်းကနဲ ထရပ်ကာ လက်သီးကို တင်းတင်းဆုပ်လျက် "ငါ လုပ်နိုင်ခဲ့ပြီ!" ဟု နောက်တစ်ကြိမ် ထပ်အော်ပြန်သည်။ သူ၏ မျက်နှာအမူအရာမှာ ခက်ထန်နေပြီး ချွေးများဖြင့် စိုရွှဲနေသော်လည်း၊ ဖုံးဖိမရနိုင်အောင် ထွက်ပေါ်လာသည့် ကြည်နူးဝမ်းသာရိပ်များကြောင့် သူသည် ထူးခြားဆန်းပြားသည့် အရာတစ်ခုကို အောင်မြင်ခဲ့ပြီဖြစ်ကြောင်း သိသာနေသည်။ ဤအဆင့်သို့ ရောက်ရှိရန် သူ မည်မျှ ပေးဆပ်ခဲ့ရပြီး မည်မျှ ကြိုးစားခဲ့ရသည်ကို သူကိုယ်တိုင်သာ သိပေလိမ့်မည်။

သူသည် 'မှော်ကျည်ဆန် (Magic Bullets)' စွမ်းရည်ကို စက်ရုပ်တစ်ရုပ်ကဲ့သို့ နှစ်ပတ်နီးပါး ဆက်တိုက် လေ့ကျင့်ခဲ့ရသည်။ ထိုအလုပ်ကိုပင် ထပ်ခါတလဲလဲ လုပ်ဆောင်ခဲ့သည်မှာ နှစ်ပေါင်း ၃၅၀ ခန့် ကြာမြင့်ခဲ့၏။ အကယ်၍ စားသောက်ရန်နှင့် အနားယူရန် ကြားဖြတ်နားချိန်များသာ မရှိခဲ့လျှင် သူသည် ယခုထက် ပို၍ ပင်ပန်းဆင်းရဲခဲ့ပေလိမ့်မည်။

"စွမ်းရည်တစ်ခုတည်းကို အဆင့် ၁၀၀ ကျော်အောင် လုပ်ဖို့ နှစ်ပတ်တောင် ကြာသွားပေမဲ့ ငါ အောင်မြင်ခဲ့ပြီပဲ" ဟု မက်စ်က စိတ်လှုပ်ရှားမှုနှင့် ပြတ်သားမှုများ ပြည့်နှက်နေသော လက်သီးများကို ကျစ်ကျစ်ပါအောင် ဆုပ်ရင်း သူ့ဘာသာ ရေရွတ်လိုက်သည်။ "အဲဒီ နှစ်ပတ်... မဟုတ်ဘူး၊ ငါ ကုန်ဆုံးခဲ့တဲ့ နှစ်ပေါင်း ၃၅၀ ကတော့..."

တစ်ပတ်ကြာအောင် မအောင်မြင်ဘဲ ကျရှုံးနေခဲ့စဉ်က 'အဆင့် ၁၀၀ ကျော်လွန်သော နယ်ပယ်' ဆိုသည်မှာ ရှိမှရှိပါလေစဟု သူ သံသယဝင်ခဲ့မိသည်။ ၎င်းသည် အဆုံးမရှိသော ကြိုးတစ်ချောင်းကို ဆွဲနေရသလိုမျိုး အဆုံးသတ်ကို မမြင်နိုင်ခဲ့ပေ။ သို့သော်လည်း အပြင်လောကတွင် သူ့အတွက် ဘာမှ စောင့်ကြိုမနေသည့်အတွက် ဤနေရာတွင်သာ အချိန်ပေးပြီး လေ့ကျင့်နေခြင်းက ပိုကောင်းသည်ဟု သူ တွေးခဲ့သည်။ ထို့ကြောင့် သူသည် နှစ်ပေါင်းများစွာ မနားမနေ ကြိုးစားအားထုတ်ရင်း သူ ယုံကြည်ထားသည့်အရာကို ရရှိရန် ရှေ့သို့သာ တိုးခဲ့သည်။ မက်စ်သည် ထိုစိတ်ဓာတ်ဖြင့် နောက်သို့လှည့်မကြည့်ဘဲ ခရီးဆက်ခဲ့သည်။ လွယ်ကူသော ခရီးတစ်ခု မဟုတ်ခဲ့သော်လည်း၊ ကျရှုံးမှုများစွာကို ရင်ဆိုင်ကျော်ဖြတ်ပြီးနောက် နောက်ဆုံးတွင် သူ အောင်မြင်ခဲ့ပြီဖြစ်သည်။

"ကဲ... ဒီဘွဲ့တံဆိပ်တွေက ဘာအတွက်လဲဆိုတာ ကြည့်ရအောင်..." မက်စ်သည် ကျေနပ်စွာ ပြုံးလိုက်ပြီး ကုတင်ပေါ်တွင် ဝင်ထိုင်လိုက်သည်။

[မက်စ် (Max)]

• အဆင့် (Rank): အဆင့်သစ် (Novice)

• Level: 6

• Class: [Dimensional Keeper]

• ဘွဲ့တံဆိပ် (Title): [Limitbreaker, Aura of Primordial]

• ရုပ်ပိုင်းဆိုင်ရာ (Physique): 7

• ဝိညာဉ် (Soul): 7.2

• စွမ်းအင် (Energy): 11

• စွမ်းရည်များ (Skills):

  --» Class Skills: [သုံးဖက်မြင်ခန္ဓာကိုယ် (Three Dimensional Body), Dimension of Time, ဝိညာဉ်များ၏ နယ်ပယ် (Dimension of Spirits)]

  --» ရရှိထားသော စွမ်းရည်များ: [Magic Bullets (Limitbreaker), အခြေခံ ဓားသိုင်း (Basic Sword Arts) (Lvl-100), လျင်မြန်သော ပြေးလွှားမှု (Swift Dash) (Lvl-100), ဒေါသတကြီး တိုက်ခိုက်မှု (Flurry Strike) (Lvl-100), မီးလျှံဖန်တီးခြင်း (Flame Creation) (Lvl-100), ငရဲမီးလျှံ လွှမ်းခြုံခြင်း (Infernal Coating) (Lvl-100), အရပ်ဆယ်မျက်နှာ ကာကွယ်ရေးဒိုင်း (Ten Directional Shield) (Lvl-100), လေထဲလွင့်မျောခြင်း (Float) (Lvl-100)]

• သိမြင်နားလည်မှု (Comprehensions): [ဓားအရှိန်အဝါ (Sword Aura) (Lvl-1)]

• သွေးမျိုးဆက် (Bloodline): [နဂါးနက် ပရမ်းပတာ သွေးမျိုးဆက် (Black Dragon Chaotic Bloodline)]

  --» နဂါးအနှစ်သာရ (Draconic Essence): [10]

  --» နဂါးအကြေးခွံ (Dragon Scales): [2]

'ဘွဲ့တံဆိပ်တွေအတွက် သီးသန့် ကော်လံအသစ်တောင် ပါလာတာပဲ... မိုက်တယ်' ဟု မက်စ်က တွေးတောရင်း ထိုဘွဲ့တံဆိပ်များကို စစ်ဆေးကြည့်လိုက်သည်။

[အတားအဆီးကို ကျော်လွှားသူ (Limitbreaker)]

• အဆင့်: —

• ရှင်းလင်းချက်: လူတစ်ယောက်သည် မိမိ၏ ကန့်သတ်ချက်များနှင့် မလွဲမသွေ ရင်ဆိုင်ရစမြဲ ဖြစ်သော်လည်း၊ စစ်မှန်သော Limitbreaker တစ်ဦးသည် ထိုအတားအဆီးများကို ကျော်လွှားပြီး အဆင့်အတန်းအသစ်တစ်ခုသို့ တက်လှမ်းနိုင်မည့် နည်းလမ်းကို ရှာဖွေတွေ့ရှိသူ ဖြစ်သည်။

• အကျိုးသက်ရောက်မှု: ဤဘွဲ့တံဆိပ်ကို ပိုင်ဆိုင်သူသည် မိမိ၏ အတားအဆီးများကို ကျော်လွှားနိုင်မည့် နည်းလမ်းများကို မကြာခဏ ရှာဖွေတွေ့ရှိလိမ့်မည်။ ထူးခြားသော သိမြင်မှု၊ ဝှက်ဖုံးနေသော စွမ်းရည် သို့မဟုတ် အသစ်ရရှိသော ခွန်အားများမှတစ်ဆင့် ဖြစ်နိုင်ချေမရှိဟု ထင်ရသော အရာများကို အောင်မြင်အောင် လုပ်ဆောင်နိုင်ရန် အမြဲတမ်း လမ်းပြပေးနေလိမ့်မည်။

"ဝိုး! တော်တော်မိုက်တဲ့ ဘွဲ့တံဆိပ်ပဲ" ဟု မက်စ်က အံ့အားသင့်စွာ ရေရွတ်လိုက်သည်။ ဘွဲ့တံဆိပ်၏ အစွမ်းကို မြင်ပြီးနောက် ဒုတိယအကြိမ်တွင် အဆင့် ၁၀၀ ကျော်လွန်ရန်မှာ ပထမအကြိမ်လောက် ခက်ခဲတော့မည်မဟုတ်ကြောင်း သူ ခံစားလိုက်ရသည်။ "ဒါ တကယ်ကောင်းတာပဲ!"

မက်စ်သည် စိတ်လှုပ်ရှားစွာဖြင့် လက်သီးကို ကျစ်ကျစ်ပါအောင် ဆုပ်လိုက်ပြီး နောက်ထပ် ဘွဲ့တံဆိပ်တစ်ခုကို ထပ်မံစစ်ဆေးသည်။

[ရှေးဦးအစွမ်း၏ အရှိန်အဝါ (Aura of Primordials)]

• အဆင့်: —

• ရှင်းလင်းချက်: ကမ္ဘာဦးအစဦးဆုံး သက်ရှိများ၏ အနှစ်သာရများ ကိန်းဝပ်နေသော ဘွဲ့တံဆိပ်ဖြစ်သည်။

• အကျိုးသက်ရောက်မှု:

• (Limitbreaker )အတားအဆီးကို‌ေကျာ်လွှားသူအဆင့်သို့ ရောက်ရှိသွားသော မည်သည့်စွမ်းရည်မဆို ပိုမိုမြင့်မားသော အဆင့်မြင့်စွမ်းရည် (Higher-level skill) တစ်ခုအဖြစ် အလိုအလျောက် အဆင့်တိုးမြှင့်သွားမည်။

"ဘာ!!!"

'ရှေးဦးအစွမ်း၏ အရှိန်အဝါ' ဘွဲ့တံဆိပ်၏ အစွမ်းကို မြင်လိုက်ရသောအခါ မက်စ်၏ မျက်လုံးများ ပြူးကျယ်သွားသည်။ သူသည် အလွန်အမင်း အံ့အားသင့်သွားပြီး ကျောက်ရုပ်ကဲ့သို့ မှင်သက်သွားရသည်။ သူ ဖတ်နေရသည့်အရာကိုပင် သူ မယုံကြည်နိုင်လောက်အောင် ဖြစ်နေသည်။

"ဒီအစွမ်းက တကယ်ကို မတရားလောက်အောင် ကောင်းလွန်းတာပဲ (OP)!" ဟု သူ အော်ဟစ်ကာ အောင်ပွဲခံ ခုန်ပေါက်လိုက်သည်။ စွမ်းရည်တစ်ခု၏ အဆင့် (Rank) ကို ပိုမြင့်သော အဆင့်သို့ မြှင့်တင်နိုင်ခြင်းသည် လူတိုင်း၏ အဆုံးစွန်သော အိမ်မက်ပင် ဖြစ်သည်။ မိမိတို့၏ လက်ရှိစွမ်းရည်ထက် ပိုမိုမြင့်မားသော အဆင့်သို့ ရောက်ရှိရန်မှာ လူတိုင်း လိုချင်တောင့်တကြသည့် အမြင့်ဆုံးပန်းတိုင် ဖြစ်သည်။ သို့သော် ထိုအခွင့်အရေးမှာ အလွန်ပင် ရှားပါးလှသဖြင့် လူအများစုသည် မိမိတို့ဘဝတစ်လျှောက်တွင် အဆင့်မြှင့်တင်ရေးလိပ်စာ (Upgrade Scroll) တစ်ခုကို ကိုင်တွယ်ခွင့်ရဖို့ မဆိုထားနှင့်၊ ကြားဖူးရုံပင် မရှိကြချေ။

"ဒါဆိုရင် ငါ့ရဲ့ စွမ်းရည်တစ်ခုခုက အတားအဆီး‌ေကျာ်လွှားသူ (Limitbreaker) အဆင့်ကို ရောက်တိုင်း၊ အဲဒါက ပိုမြင့်တဲ့ အဆင့်တစ်ခုကို အလိုအလျောက် ပြောင်းလဲသွားမှာပေါ့" ဟု မက်စ်က အဆင့်မြင့်စွမ်းရည်များကို ပိုင်ဆိုင်ရမည့်အရေးကို တွေးတောရင်း ရေရွတ်လိုက်သည်။

[သာမန်ထက်ထူးကဲအဆင့် (Common Rank) ဖြစ်သော 'မှော်ကျည်ဆန် (Magic Bullets)' စွမ်းရည်အား သာမန်ထက်ထူးကဲအဆင့် (Uncommon Rank) ဖြစ်သော 'မှော်ဓားကျည်ဆန် (Magic Sword Bullets)' အဖြစ် အဆင့်မြှင့်တင်လိုက်ပါပြီ။]

ထိုစဉ်မှာပင် အကြောင်းကြားစာတစ်ခု သူ၏ မျက်စိရှေ့၌ ပေါ်လာကာ သူ၏ အတွေးများကို အတည်ပြုပေးလိုက်ပြီး 'ရှေးဦးအစွမ်း၏ အရှိန်အဝါ' ဘွဲ့တံဆိပ်အပေါ် သံသယအားလုံးကို ပျောက်ကွယ်သွားစေသည်။

[မှော်ဓားကျည်ဆန် (Magic Sword Bullets)]

• အဆင့်: သာမန်ထက်ထူးကဲအဆင့် (Uncommon Rank)

• Level: 0

• ရှင်းလင်းချက်: အသုံးပြုသူအား စစ်မှန်သော မှော်စွမ်းအင်များဖြင့် ပြုလုပ်ထားသော ဓားငယ်ပုံစံ မှော်ကျည်ဆန်များကို ဖန်တီး၍ ပစ်ခတ်ခွင့် ပေးသည်။

"ရှင်းလင်းချက်မှာ အနည်းငယ်ပဲ ပြောင်းသွားပေမဲ့ စွမ်းရည်ရဲ့ Level ကတော့ ၀ ကို ပြန်ကျသွားတာပဲ" ဟု မက်စ်က မျက်မှောင်ကြုတ်ကာ ရေရွတ်လိုက်သည်။အတားအဆီးကိုကျော်လွှားသူ (Limitbreaker) အဆင့်မှာရှိသည့် 'မှော်ကျည်ဆန်' နှင့် Level ၀ သာရှိသေးသည့် 'မှော်ဓားကျည်ဆန်' တို့တွင် မည်သည့်အရာက ပို၍ စွမ်းအားကြီးမားမည်ကို သူ တွေးတောနေမိသည်။ သီအိုရီအရဆိုလျှင် အစပိုင်း၌ အရင်စွမ်းရည်က ပိုမိုအားကောင်းနိုင်သော်လည်း၊ 'မှော်ဓားကျည်ဆန်' သည် တစ်နေ့ထက်တစ်နေ့၊ တစ်နှစ်ထက်တစ်နှစ် Level တက်လာသည်နှင့်အမျှ နောက်ဆုံးတွင် အရင်စွမ်းရည်ထက် ပိုမိုအားကောင်းပြီး သာလွန်သွားမည်ဖြစ်သည်။

"ကဲ... စမ်းကြည့်ရအောင်" ဟု မက်စ်က စိတ်အားထက်သန်စွာ ဆိုလိုက်သည်။ သူသည် သူ၏ လက်ညှိုးကို ထောင်လိုက်ရာ ခဏအကြာတွင် ကျည်ဆန်အရွယ်အစားရှိသော တောက်ပနေသည့် အပြာရောင်အစက်လေးတစ်ခု သူ၏ လက်ထိပ်တွင် ဖြစ်ပေါ်လာသည်။

"ဒါကအတားအဆီးကိုကျော်လွှားသူ (Limitbreaker) အဆင့်မှာရှိတဲ့ 'မှော်ကျည်ဆန်' ပဲ" ဟု သူ ရေရွတ်ရင်း 'မှော်ဓားကျည်ဆန်' စွမ်းရည်သို့ ဖြည်းညင်းစွာ ပြောင်းလဲလိုက်သည်။ ရုတ်တရက်ဆိုသလို မက်စ်၏ လက်ထိပ်ရှိ မှော်ကျည်ဆန်မှာ ပုံစံအမျိုးမျိုး ပြောင်းလဲသွားပြီးနောက် သူ၏ လက်ဝါးခန့်ရှိသော ဓားတစ်လက်အဖြစ် ပြောင်းလဲသွားသည်။ ၎င်းသည် မှော်စွမ်းအင်များဖြင့် တောက်ပနေသော အပြာရောင်ဓားငယ်လေး ဖြစ်သည်။

"ဒါက Level 1 'မှော်ဓားကျည်ဆန်' ပေါ့... ဒါပေမဲ့..." ဓားငယ်လေး၏ အနားသတ်များမှ ထွက်ပေါ်နေသော အရှိန်အဝါကို ကြည့်ပြီး မက်စ် အံ့အားသင့်သွားသည်။ ၎င်း၏ ဖျက်ဆီးနိုင်စွမ်းမှာ Limitbreaker အဆင့်ရှိ ကျည်ဆန်ကို မမီနိုင်သေးသော်လည်း၊ ထိုဓားငယ်လေး၏ ထက်မြက်မှုမှာမူ သီးခြားစွမ်းအားတစ်ခု ကိန်းဝပ်နေသကဲ့သို့ပင်။

"အဆင့်မြင့်သွားတဲ့ စွမ်းရည်က ကောင်းပါတယ်၊ ဒါပေမဲ့ Level ပြန်တက်ဖို့ အချိန်လိုဦးမယ်" မက်စ်က သက်ပြင်းချလိုက်သည်။ အချိန်က သူ့ဘက်မှာ မရှိပေ။ ဖီးနစ်အဖွဲ့ချုပ် (Phoenix Order) သို့ ဝင်ခွင့်စစ်ဆေးရန် တစ်ပတ်ခန့်သာ လိုတော့ပြီး ထိုအချိန်အတွင်း သူ လုပ်စရာတွေ အများကြီး ရှိနေသေးသည်။ ပထမဆုံးအနေဖြင့် သူ၏ စွမ်းရည်အားလုံးကိုအတားအဆီးကို‌ေကျာ်လွှားသူ (Limitbreaker) အဆင့်သို့ ရောက်အောင် လုပ်ရမည်ဖြစ်ပြီး၊ ထို့နောက်မှ ထိုစွမ်းရည်များကို အဆင့်မြင့်ဆင့်သို့ မြှင့်တင်ရမည်ဖြစ်သည်။

"ဒီတစ်ပတ်အတွင်းမှာ အဆင့်မြင့်သွားတဲ့ စွမ်းရည်တွေကို Level ၁၀၀ ရောက်အောင် လုပ်နိုင်မယ်မထင်ဘူး၊ ဒါကြောင့် လက်ရှိရှိနေတဲ့ စွမ်းရည်တွေကိုပဲ Limitbreaker (အတားအဆီးကိုကျော်လွှားသူ ) အဆင့်ရောက်အောင် အာရုံစိုက်ရမယ်" ဟု မက်စ်က ဆုံးဖြတ်ချက်ချလိုက်သည်။

'အရေးကြီးဆုံးကတော့ စွမ်းရည်တွေဟာ (Limitbreaker) အတားအဆီးကိုကျော်လွှားသူ အဆင့်ကို ရောက်သွားတာနဲ့ အရင်ကထက် အဆပေါင်းများစွာ ပိုပြီး အားကောင်းလာမှာပဲ' ဟု သူ တိတ်တဆိတ် တွေးလိုက်သည်။ သူ၏ 'မှော်ကျည်ဆန်' စွမ်းရည်အရ သိရသည်မှာ( Limitbreaker )အတားအဆီးကိုကျော်လွှားသူ အဆင့်သို့ ရောက်ရှိခြင်းသည် စွမ်းအား၏ အရည်အသွေးကို တစ်ဟုန်ထိုး မြင့်တက်သွားစေပြီး Level ၁၀၀ ထက် အများကြီး သာလွန်သွားစေသည်။ ထို့ပြင် ၎င်းသည် Level ၁၀၀ ၏ အကန့်အသတ်ကို ကျော်လွန်ထားသော နယ်ပယ်ဖြစ်သောကြောင့် မည်သည့် Level ၁၀၀ စွမ်းရည်ထက်မဆို အဆပေါင်းများစွာ ပို၍ စွမ်းအားကြီးမားမည်မှာ အသေအချာပင်။

"ရေချိုး၊ အစားစားပြီးရင် နောက်ထပ် တစ်ပတ်လောက် ထပ်ပြီး လေ့ကျင့်ရဦးမယ်" ဟု မက်စ်က ရေရွတ်ရင်း ရေချိုးခန်းဘက်သို့ လျှောက်လှမ်းသွားတော့သည်။