အခန်း (၃၅) သေဆုံးခြင်း
"စွမ်းအင်စာသားကျောက်တုံး(Runestone)..." အဲလစ်၏ မျက်နှာတစ်ခုလုံး မျှော်လင့်ချက် ကင်းမဲ့သွားတော့သည်။ သူတို့အား နံရံတွင် ကပ်ထားသည့် ထိုစွမ်းအား၏ အရင်းအမြစ်ကို သူမ ကောင်းကောင်း နားလည်သည်။ 'ငါ့ရဲ့ ရွန်းကျောက်စာကိုသာ လက်လှမ်းမီမယ်ဆိုရင်... ဒါပေမဲ့ ငါ့ဟာက သာမန်အဆင့်ဆိုတော့ သိပ်တော့ ထူးခြားမှာ မဟုတ်ဘူး။ ဒါပေမဲ့ ငါတို့ အသက်ရှင်နိုင်မယ့် နည်းလမ်းတစ်ခုခုတော့ ရှိရမယ်' သူမသည် မျက်မှောင်ကြုတ်လျက် အရှုံးမပေးဘဲ တွေးနေမိသည်။
"ဟဲဟဲ၊ ဒီတာဝန်က ခက်ခဲလိမ့်မယ်လို့ ငါထင်ထားတာ၊ ဒါပေမဲ့ ဒီလောက် လွယ်ကူလိမ့်မယ်လို့ ဘယ်သူ ထင်ထားမှာလဲ" ဟု ဗိုက်ရွှဲရွှဲနှင့် လူတစ်ယောက်က ပြောလိုက်သည်။ သူက သုံးယောက်သားကို ကြည့်ကာ လှောင်ပြုံး ပြုံးလိုက်ပြီး "ဒါနဲ့ မင်းတို့ သေတော့မှာဆိုတော့ သတ်မယ့်သူ ဘယ်သူလဲဆိုတာ သိထားသင့်တာပေါ့။ ငါက ဘီလီ ဘောင်စာ (Billy Bouncer) ပဲ ၊ ဒီအဖွဲ့ကိုလည်း ငါ့နာမည်ပဲ ပေးထားတာ" ဟု ဆိုကာ တဟားဟား ရယ်မောရင်း ဓားကို ဆွဲထုတ်လိုက်သည်။ (*bouncer ကို အစောင့်အရှောက်၍လည်းကောင်း နာမည်၌လည်းကောင်း တွေ့ရသည်ကြောင့် bouncer squad အား အတိအကျ အေေစာင့်အေရှာက်အဖဲွ့ဟု ပြန်ပေးထားပါသည်* )
"ဟားဟားဟား။" ကျန်သည့် လေးယောက်ကလည်း ယုတ်မာစွာ လိုက်ရယ်ကြသည်။ ဆံပင်နီနှင့်လူ အပြင် အဖွဲ့ထဲတွင် တုတ်ကောက် ကိုင်ထားသည့် ဆံပင်ရွှေဝါရောင်နှင့် အမျိုးသမီးတစ်ဦး၊ လုပ်ကြံသတ်ဖြတ်သူ ဝတ်စုံ ဝတ်ထားသည့် လူတစ်ဦးနှင့် ကျောတွင် လေးနှင့် မြားလွယ်ထားသည့် လူတစ်ဦးတို့ ပါဝင်သည်။
"ကဲ... ဘယ်သူ့ကို အရင်စရမလဲ" ဘီလီသည် တစ်ယောက်ချင်းစီကို လိုက်ကြည့်နေရင်း မက်စ် (Max) ထံတွင် အကြည့်ရပ်သွားသည်။ "ဒီထဲကို ပါလာရတဲ့ မင်းကို တကယ်ပဲ သနားမိပါတယ်၊ ဒါပေမဲ့ မင်းကို အရင်စသတ်လိုက်ရင် ပိုစိတ်လှုပ်ရှားဖို့ ကောင်းမယ်ထင်တယ်"
မက်စ်က လူငါးယောက်ကို အကဲခတ်ရင်း ခပ်ထေ့ထေ့ ပြုံးလိုက်သည်။ "စမ်းကြည့်ချင်ရင်လည်း ကြည့်လေ"
"သူ့ကို လွှတ်လိုက်ပါ!" အဲလစ်က ဘီလီကို ကြည့်ကာ တောင်းပန်တိုးလျှိုးသံဖြင့် အော်ပြောလိုက်သည်။ "သူက ကျွန်မနဲ့ ဘာမှမဆိုင်ဘူး၊ သူ့ကို သွားခွင့်ပြုလိုက်ပါ"
မော်ရယ် (Morel) နှင့် ဘီလီတို့ အချင်းချင်း ကြည့်ကာ ရယ်မောလိုက်ကြသည်။ "ဝမ်းနည်းစရာပဲ၊ အဲဒီလို လုပ်လို့မရဘူး" မော်ရယ်က လှောင်ပြုံးပြုံးရင်း ပတ်ပတ်လည်ရှိ အလောင်းများကို ညွှန်ပြလိုက်သည်။ "မင်းတို့ကို မျှားခေါ်ဖို့အတွက်ပဲ ဒီလူတွေကို သတ်ခဲ့တယ်လို့ ထင်နေတာလား? မဟုတ်ဘူး၊ ငါတို့ ဘာလုပ်ခဲ့တယ်ဆိုတာ သိတဲ့သူမှန်သမျှ တစ်ယောက်မှ အသက်မရှင်စေရဘူး။ ဒါကြောင့် ဒီကောင်လေးက မင်းနဲ့ ပတ်သက်သည်ဖြစ်စေ၊ မပတ်သက်သည်ဖြစ်စေ ဒီကို ရောက်လာမှတော့ သေဖို့ပဲ ရှိတော့တယ်"
"ဟားဟားဟား၊ ကောင်းပြီ။ ဒါဆို ငါစတော့မယ်" ဘီလီ၏ မျက်နှာသည် လူမဆန်စွာ ပြောင်းလဲသွားပြီး မက်စ် အနီးသို့ တိုးကပ်လာသည်။
"မလုပ်နဲ့! သူ့ကို လွှတ်ပေး!" အဲလစ်သည် အသည်းအသန် အော်ဟစ်လိုက်ပြီး အသုံးမပြုရန် တားမြစ်ထားသည့် အရာတစ်ခုခုကို အသုံးပြုရန် ဘယ်ဘက်သို့ ခေါင်းလှည့်လိုက်သည်။ သို့သော် မက်စ်၏ မျက်နှာကို မြင်လိုက်ရသည့်အခါ သူမ ရုတ်တရက် မှင်တက်သွားသည်။ အကြောင်းမှာ မက်စ်၏ မျက်နှာတွင် သူမ မျှော်လင့်ထားသည့် ကြောက်လန့်တုန်လှုပ်မှုများ မရှိဘဲ တစ်စုံတစ်ခုအတွက် ထူးဆန်းစွာ စိတ်လှုပ်ရှားနေသည့်ပုံ ပေါက်နေသောကြောင့် ဖြစ်သည်။
မက်စ်၏ မျက်နှာပေါ်ရှိ အပြုံးကို ဘီလီလည်း သတိထားမိသွားပြီး ကျောထဲ စိမ့်တက်သွားသည်။ "ဘာလို့ ရယ်နေတာလဲ ကောင်လေး" ဟု သူက မေးလိုက်သည်။
"ဘာလို့လဲ ဟုတ်လား" မက်စ်က ဘီလီနှင့် ဘောင်စာအဖွဲ့ဝင် လေးယောက်ကို ကြည့်ကာ ခပ်ထေ့ထေ့ ရယ်လိုက်သည်။ သူက ပြုံးလျက် "မင်းတို့ကို အံ့အားသင့်စရာတစ်ခု ပြမယ်" ဟု ဆိုလိုက်သည်။
မက်စ်သည် နဂါးအနှစ်သာရ (Draconic Essences) နှစ်ခု၏ စွမ်းအားကို အသုံးပြုကာ လက်ကို လှုပ်ရှားရန် ကြိုးစားသော်လည်း တုန်ရီနေရုံသာ ရှိသေးသည်။ သူက ထပ်မံပြုံးလိုက်ပြီး နဂါးအနှစ်သာရ ငါးခု၏ စွမ်းအားကို အသုံးပြုကာ ထပ်မံ ကြိုးစားလိုက်သည်။
ဘုန်း!
အသံနှင့်အတူ သူ၏ ညာလက်ကို အောင်မြင်စွာ မြှောက်နိုင်ခဲ့ပြီး နောက်တွင် ဘယ်လက်ကိုပါ မြှောက်လိုက်သည်။
"ဘယ်လို... ဒါကို ဘယ်လိုလုပ်လိုက်တာလဲ" မက်စ် လက်လွတ်သွားသည်ကို မြင်ပြီး ဘီလီ အော်ဟစ်လိုက်သည်။ အဲလစ်ပင်လျှင် ထိုမြင်ကွင်းကြောင့် အံ့အားသင့်သွားရသည်။
"ဒါက အစပဲ ရှိသေးတယ်" မက်စ်က နဂါးအနှစ်သာရ ခုနစ်ခု၏ စွမ်းအားကို အသုံးပြုရင်း အေးစက်စက် ရယ်မောလိုက်သည်။ နဂါးအနှစ်သာရ ခုနစ်ခုကို ထုတ်သုံးလိုက်သည်နှင့် ကြမ်းတမ်းလှသော စွမ်းအားများက သူ၏ သွေးကြောထဲတွင် တိုးဝှေ့စီးဆင်းလာသည်။
ဘုန်း!
ခန္ဓာကိုယ်အတွင်း စီးဆင်းနေသည့် ထိုမျှလောက်သော အရှိန်အဝါဖြင့် မက်စ်သည် ရှေ့သို့ ခုန်ထွက်လိုက်ရာ မြေပြင်ပေါ်သို့ ကျယ်လောင်သော အသံနှင့်အတူ ကျဆင်းသွားသည်။ ဖိအားက သူ့အပေါ် သက်ရောက်နေဆဲ ဖြစ်သော်လည်း သူ၏ ခန္ဓာကိုယ် ကြံ့ခိုင်မှုသက်သက်ဖြင့်ပင် ထိုဖိအားကို အံတုထားနိုင်ခဲ့သည်။
"သူ ဘယ်လိုများ...?" အဲလစ်၏ အသံများ တုန်ရီနေပြီး ပါးစပ်အဟောင်းသား ဖြစ်သွားရသည်။ သူတို့အား နံရံတွင် ကပ်ထားသည့် စွမ်းအားက မည်မျှ ပြင်းထန်သည်ကို သူမ ကိုယ်တိုင် မခုခံနိုင်၍ သိထားသည်။ ထို့ကြောင့် မက်စ် မည်သို့ လုပ်ဆောင်နေသည်ကို သူမ လုံးဝ နားမလည်နိုင်တော့ပေ။
"ဒီကောင်လေးကတော့..." ဘီလီ မျက်မှောင်ကြုတ်လိုက်ပြီး မျက်နှာ ပျက်သွားသည်။ သူက မော်ရယ်ဘက် လှည့်ကာ "စွမ်းအားအပြည့် သုံးပြီး သူ့ကို ပြန်ဖိထားလိုက်။ ငါ သူ့ကို မြန်မြန် ဇာတ်သိမ်းပေးလိုက်မယ်"
မော်ရယ်က ခေါင်းညိတ်ပြီး စွမ်းအင်စာသားကျောက်တံုးကို ထပ်မံ ထုတ်လိုက်သည်။
"မိပြီ" မက်စ်က ပြုံးလိုက်ပြီး ရွန်းကျောက်စာဆီသို့ မှော်ကျည်ဆံတစ်တောင့် တိုက်ရိုက် ပစ်လွှတ်လိုက်သည်။ အပြာရောင် အလင်းတန်းတစ်ခုက သူ၏ လက်ချောင်းမှ မည်သူမျှ တုံ့ပြန်ရန် အချိန်မရလောက်အောင် မြန်ဆန်စွာ ထွက်ပေါ်လာသည်။ ၎င်းသည် မော်ရယ်၏ လက်ထဲမှ စွမ်းအင်စာသားေကျာက်တံုးမှန်သွားပြီး လွင့်ထွက်သွားစေသည်။
ဖြောင်း!
"အား!" တစ်စုံတစ်ခုက သူ၏ လက်ကို ပြင်းထန်စွာ ထိမှန်သွားသဖြင့် မော်ရယ် နာကျင်စွာ မျက်နှာရှုံ့မဲ့သွားပြီးမှ ရွန်းကျောက်စာ ပျောက်ဆုံးသွားသည်ကို သတိထားမိလိုက်သည်။ "စွမ်းအင်းစာသားကျောက်တုံး ဘယ်ရောက်သွားတာလဲ" မော်ရယ်က ပတ်ဝန်းကျင်ကို ပျာပျာသလဲ လိုက်ရှာရင်း အော်ဟစ်လိုက်သည်။
ဘီလီလည်း အံ့အားသင့်သွားသည်။ မော်ရယ်၏ အော်သံကို မကြားမီနှင့် လက်ထဲမှ စွမ်းအင်စာသားကျောက်တုံးမပျောက်ဆုံးမီ အပြာရောင် အလင်းတန်းတစ်ခုကိုသာ သူ မြင်လိုက်ရသည်။စွမ်းအင်စာသားကျောက်တုံး၏ ဖိအားကို အံသြဖွယ် ခုခံနိုင်ခဲ့သည့် ကောင်လေးကို ပြန်စဉ်းစားမိပြီး ဘီလီသည် မက်စ်ဘက်သို့ လှည့်လိုက်သည်။
"ဒါ မင်းလက်ချက်ပေါ့ ဟုတ်လား" သူက လှောင်ပြောင်သံဖြင့် အော်ပြောလိုက်သည်။ "မင်းက တော်တော် လည်တဲ့ ကောင်လေးပဲ၊ ဒါပေမဲ့ ငါတို့မှာ စွမ်းအင်စာသားေကျာက်တံုး မရှိတော့တာနဲ့ မင်းတို့အပေါ် သက်ရောက်နေတဲ့ ဖိအားတွေက လွတ်သွားပြီလို့ မထင်နဲ့။ စွမ်းအင်စာသားေကျာက်တံုးတစ်ခုက အသက်ဝင်သွားပြီဆိုရင် အထဲက စွမ်းအားတွေ အကုန်ကုန်တဲ့အထိ ရပ်တန့်မှာ မဟုတ်ဘူး"
သူက ဆက်လက်၍ ယုတ်မာစွာ ပြောလိုက်သည်မှာ "ပြီးတော့ မင်းက ဖိအားကို ဘယ်လိုပဲ အံတုနိုင်ပါစေဦး၊ လှုပ်ရုံပဲ လှုပ်နိုင်မှာပါ။ အဆင့် ၅ လောက်ပဲ ရှိတဲ့ မင်းရဲ့ အားမတန်တဲ့ ခွန်အားနဲ့ ငါတို့ကို တစ်ခုခု လုပ်နိုင်မယ်လို့ တကယ်ပဲ ထင်နေတာလား"
သူသည် မက်စ်ကို တရပ်စပ် လှောင်ပြောင်ရင်း ဓားဖြင့် အနီးသို့ ကပ်လာသည်။ "သေပေတော့ ကောင်လေး!" ဘီလီက သူ၏ ဓားကို အားကုန် လွှဲရိုက်လိုက်သည်။
ချွန်း!
သို့သော် သူ မျှော်လင့်ထားသည့် သွေးပျက်ဖွယ် အသံကို မကြားရဘဲ ကျယ်လောင်သော သတ္တုချင်း ထိခတ်သံကိုသာ ကြားလိုက်ရသည်။ ထိုအခါမှ မက်စ်သည် လက်တစ်ဖက်တည်းဖြင့် ဓားကို ကိုင်ထားပြီး သူ၏ ဓားချက်ကို အလွယ်တကူ ခုခံထားသည်ကို မြင်လိုက်ရသည်။
"မင်း ဘယ်လိုများ...?" ဘီလီ မှင်တက်သွားသည်။ သူ၏ အရှိန်အပြည့် ပါသော ဓားချက်ကို ထိုကောင်လေးက အလွယ်တကူ တားဆီးထားနိုင်ရုံသာမက သူ မည်မျှပင် အားစိုက်သော်လည်း ကောင်လေး၏ ဓားကို အနည်းငယ်မျှ ရွေ့အောင် မလုပ်နိုင်ပေ။
"မင်းပြောတာ မှန်တယ်" မက်စ်က ဘီလီကို ကြည့်ကာ ပြောလိုက်သည်။ "ငါ လှုပ်ရုံပဲ လှုပ်နိုင်တာ၊ ဒါပေမဲ့ မင်းတို့ကို ရှင်းဖို့အတွက် ငါက အများကြီး လှုပ်ရှားနေဖို့ လိုလို့လား"
သူက ခပ်ထေ့ထေ့ ပြုံးလိုက်သည်နှင့် သူ၏ ဓားမှ အပြာနုရောင် အလင်းများ ထွက်ပေါ်လာပြီး ဘီလီကို နောက်သို့ လွင့်ထွက်သွားစေသည်။
"တောက်! ဒီကောင်လေးကတော့" ဘီလီက နာကျင်စွာ မျက်နှာရှုံ့မဲ့ရင်း ကျန်တဲ့သူများဘက် လှည့်ကာ "သူ့ကို ထားလိုက်တော့၊ ကျန်တဲ့ နှစ်ယောက်ကိုပဲ အရင်သတ်"
ကျန်သည့်သူများက ခေါင်းညိတ်ကာ လှုပ်ရှားလိုက်ကြသည်။ မက်စ်လည်း လှုပ်ရှားလိုက်သည်။ လက်ထိပ်ခန့် အရွယ်အစားရှိသော အပြာရောင် တောက်ပသည့် အလင်းလုံးလေးများသည် မက်စ်၏ ခန္ဓာကိုယ်မှ တစ်ခုပြီးတစ်ခု ထွက်ပေါ်လာသည်။ သူ၏ လက်များ၊ ခြေထောက်များ၊ ကျောပြင်... သူ၏ ခန္ဓာကိုယ် အစိတ်အပိုင်း တိုင်းမှ ထိုထူးဆန်းသော အလင်းတန်းများ ဖြာထွက်နေသည်။
တစ်ခု၊ နှစ်ခု၊ သုံးခု၊ လေးခု... အလင်းလုံးလေးများသည် လျင်မြန်စွာ များပြားလာပြီး တစ်ပြင်လုံးကို ဖုံးလွှမ်းသွားတော့သည်။ လုပ်ကြံသတ်ဖြတ်သူဖြစ်စေ၊ လေးသမားဖြစ်စေ သူတို့အားလုံးသည် သူတို့ကို ဝန်းရံထားသည့် အလင်းလုံးများကို မြင်လိုက်ရသည့်အခါ လှုပ်ရှားမှုများ ရပ်တန့်သွားကြသည်။
"ဒါတွေက ဘာတွေလဲ" သူတို့ ပတ်ပတ်လည်တွင် ဝဲပျံနေသည့် အပြာရောင် အလင်းစက်လေးများကို ကြည့်ပြီး မော်ရယ် မျက်မှောင်ကြုတ်လိုက်သည်။
"ဒါတွေက...?" အဲလစ်နှင့် အေမီ (Amy) တို့လည်း ထိုအလင်းစက်လေးများက ဘာမှန်း မသိသဖြင့် တစ်ဦးကိုတစ်ဦး ဝေခွဲမရစွာ ကြည့်လိုက်မိကြသည်။
ဘီလီသည် သူတို့ကို ဝန်းရံထားသည့် အပြာရောင် အလင်းစက်များကို ကြည့်ကာ မျက်မှောင်ကြုတ်လိုက်ပြီး မက်စ်ဘက်သို့ လှောင်ပြုံးဖြင့် လှည့်လာသည်။ "ဒါက ဘာလဲ? မျက်လှည့်ပြနေတာလား"
မက်စ်က တည်ငြိမ်စွာ ပြုံးလိုက်သည်။ "တစ်မျိုးတော့ ဟုတ်တာပေါ့... မြည်းစမ်းကြည့်ချင်လား"
ဘီလီသည် မက်စ်ကို ခဏမျှ စိုက်ကြည့်နေပြီးမှ တဟားဟား ရယ်မောလိုက်သည်။ "ငါ သိပြီ။ မင်း အချိန်ဆွဲနေတာပဲ မဟုတ်လား? တစ်ယောက်ယောက် လာကယ်မလားလို့ မျှော်လင့်နေတာလား"