အခန်း (၃၂) ထူးဆန်းသော မပြည့်စုံသည့် စွမ်းရည်

"သူ... သူ ချော်ရည်တွင်းထဲ ခုန်ချသွားတယ်ဟ!" အေမီတစ်ယောက် ထိတ်လန့်တကြား အော်ဟစ်လိုက်ရင်း ဟိုဘက်ဒီဘက် ဂနာမငြိမ် လမ်းလျှောက်နေတော့သည်။

အဲလစ်၏ မျက်နှာကတော့ ယခုအချိန်တွင် မည်းမှောင်နေသည်။ မက်စ် ဒီလိုလုပ်လိမ့်မည်ဟု သူမ လုံးဝ မျှော်လင့်မထားခဲ့သည်မှာ သိသာလှသည်။

"ဒီလိုတွေ အကုန်လုပ်တာ ဘာအတွက်လဲ။ အသုံးမကျတဲ့ စွမ်းရည်တစ်ခုအတွက်နဲ့လေ" သူမ သက်ပြင်းချလိုက်သည်။

"အဲဒီ ချော်ရည်တွင်းက တခြားဟာတွေလို ပွက်ပွက်ဆူ အသက်ဝင်နေတာမျိုး မရှိဘူးဆိုတော့ သူ ဘာမှမဖြစ်လောက်ဘူးလို့ ငါထင်ပါတယ်" ဟု အဲလစ်က အေးစက်စက် ပြောလိုက်သည်။ "ငါတို့ နှစ်နာရီလောက် စောင့်ကြမယ်။ ဘာပဲဖြစ်ဖြစ်၊ မုန်တိုင်းချောက်ကမ်းပါးဆီကို အချိန်မီရောက်နိုင်တော့မှာမှ မဟုတ်တာ"

အေမီက စိုးရိမ်ပူပန်မှုအပြည့်ရှိနေသော မျက်နှာထားဖြင့် ခေါင်းညိတ်ပြလိုက်သည်။

တစ်ချိန်တည်းမှာပင်၊ မက်စ်မှာမူ အောက်သို့ ပြုတ်ကျနေရသည့် အချိန်က အလွန်ကြာမြင့်နေသကဲ့သို့ ခံစားနေရသည်။ သူ ပြုတ်ကျနေသည်မှာ စက္ကန့်အတော်ကြာနေပြီ ဖြစ်သော်လည်း မြေပြင်နှင့် မထိသေးပေ။

ခွပ်!

သူ ဆက်ပြီး ပြုတ်ကျနေဦးမည်ဟု တွေးလိုက်မိချိန်မှာပင် မြေပြင်ပေါ်သို့ ရုတ်တရက် ပြုတ်ကျသွားလေသည်။

အရှိန်ဖြင့် ပြုတ်ကျမှုကြောင့် ကျောကုန်းတစ်ခုလုံး နာကျင်သွားသော်လည်း ယေဘုယျအားဖြင့်တော့ သူ အဆင်ပြေနေသေးသည်။

'ထူးဆန်းလိုက်တာ၊ ဒီလောက်အမြင့်ကြီးကနေ ပြုတ်ကျတာတောင် ကျောနာတာလေးပဲ ရှိတယ်ပေါ့?' မက်စ်က တွေးတောလိုက်ရင်း သူ၏ ပတ်ဝန်းကျင်ကို အကဲခတ်ကြည့်လိုက်သည်။

သူ့ကိုယ်သူ မီးတောက်များနှင့် မီးခိုးငွေ့ ပုံစံများကို နံရံတွင် ထွင်းထုထားသည့် ထူးဆန်းသော လိုဏ်ဂူတစ်ခုထဲသို့ ရောက်နေကြောင်း တွေ့လိုက်ရသည်။ ခပ်လှမ်းလှမ်းတွင်တော့ သူ့ဆီသို့ ဦးတည်လာနေသော အရင်ကလိုမျိုးပင်ဖြစ်သည့် အဆင့် (၈) ကျောက်ရုပ်ကြီး သုံးကောင်ကို လှမ်းမြင်လိုက်ရသည်။

"ဒီနေရာက ထူးထူးဆန်းဆန်း လိုဏ်ဂူတွေ အများကြီးရှိတာပဲ" ဟု မက်စ်က ရေရွတ်လိုက်ရင်း သူ၏ လက်နှစ်ဖက်စလုံးမှ မှော်ကျည်ဆန် ဆယ်ဂဏန်းပင်မကပဲ ပစ်လွှတ်လိုက်သည်။

အပြာရောင် လေဆာတန်းများသဖွယ် လေထုကို ခွဲထွက်သွားသော မှော်ကျည်ဆန်များသည် အဆင့် (၈) ကျောက်ရုပ်ကြီး သုံးကောင်ကို တစ်ကောင်ပြီးတစ်ကောင် အဆက်မပြတ် ဝင်မှန်သွားလေသည်။

ဒိုင်း! ဒိုင်း! ဒိုင်း! ဒိုင်း!

မှော်ကျည်ဆန်များ ဝင်မှန်သွားပြီး ထိုကျောက်ရုပ်ကြီးများ ဘာမှပင် မတုံ့ပြန်နိုင်လိုက်ခင်မှာပဲ သူတို့၏ ခန္ဓာကိုယ်များမှာ အစိတ်စိတ်အမွှာမွှာ ကွဲကြေသွားတော့သည်။

ခဏအကြာတွင်၊ ကျောက်ရုပ်ကြီးများထံမှ အနီရောင်အလင်းတန်းများ တောက်ပလာပြီးနောက် ပစ္စည်းအပုံလိုက်ကို ချန်ရစ်ကာ ပျောက်ကွယ်သွားကြသည်။

မက်စ်က ရှေ့သို့တိုးသွားကာ ၎င်းတို့အားလုံးကို သိမ်းဆည်းလိုက်သည်။ ထို့နောက် ပြင်ပကွန်ရက် (Extranet) တွင် ဖော်ပြထားသော စွမ်းရည်ကို ရှာဖွေရန် လိုဏ်ဂူထဲတွင် စတင်ရှာဖွေတော့သည်။

သို့သော် ရှာဖွေနေစဉ်အတွင်း အခြား စိတ်ဝင်စားစရာကောင်းသည့် အရာများစွာကိုလည်း သူ တွေ့ရှိခဲ့သည်။

လိုဏ်ဂူနံရံများပေါ်တွင် နောက်ထပ် ထွင်းထုထားသည့် ပုံများကို သူတွေ့လိုက်ရသည်။ အချို့မှာ ကျောက်တုံးများ၊ အချို့မှာ ချော်ရည်များနှင့် သူ ခုနလေးတင် သတ်ပစ်လိုက်သည့် ကျောက်ရုပ်ကြီးများကို ပုံဖော်ထားခြင်း ဖြစ်သည်။

'ဒီ ပန်းပုလက်ရာတွေက ဘာကိုဆိုလိုတာလဲ?' မက်စ် စဉ်းစားခန်းဝင်သွားရင်း နံရံမှပုံများကို ခြေရာခံကာ လိုဏ်ဂူထဲသို့ ပိုမိုနက်ရှိုင်းစွာ ဝင်ရောက်သွားရာ နောက်ဆုံးတွင် ဓာတ်ခွဲခန်းတစ်ခုနှင့်တူသော နေရာတစ်ခုကို တွေ့ရှိသွားလေသည်။

'ဓာတ်ခွဲခန်း? မဟုတ်ဘူး၊ အမှိုက်ပုံကြီးနဲ့ ပိုတူနေတယ်' ထိုနေရာကို စတင်စစ်ဆေးရင်း သူ တွေးလိုက်မိသည်။

ချော်ရည်ကန်တစ်ခု၊ သံသေတ္တာများပေါ်တွင် ဂရုတစိုက် တင်ထားသော ကျောက်တုံးအစုအဝေးတစ်ခုနှင့် ဂူတစ်ခု အပါအဝင် ထူးဆန်းသော ပစ္စည်းများစွာကို သူ သတိထားမိလိုက်သည်။

"တကယ်ပဲ... ဒီနေရာက ဘာကြီးလဲ" မက်စ်က အံ့ဩတကြီး ရေရွတ်လိုက်သည်။

ဒီလို လျှို့ဝှက်ခန်းမျိုးကို သူ အရင်က မမြင်ဖူးသလို မကြားလည်း မကြားဖူးခဲ့ပေ။ သူ့အမြင်တွင်တော့ လူတစ်ယောက်ယောက်က တစ်စုံတစ်ရာကို စမ်းသပ်နေခဲ့သည့် သုတေသန ဌာနတစ်ခုနှင့် တူနေသည်။

ထိုစဉ် လိုဏ်ဂူ၏ အလယ်ဗဟိုတွင် ချထားသော ပွင့်နေသည့် သေတ္တာတစ်လုံးက မက်စ်၏ အာရုံကို ဖမ်းစားသွားသည်။ ၎င်းမှာ သတိမထားမိဘဲ နေ၍မရနိုင်လောက်အောင် ထင်ရှားသည့်နေရာတွင် ရှိနေခြင်းဖြစ်သည်။

'ထူးဆန်းတယ်'။ မက်စ်အနေဖြင့် အနည်းငယ် သံသယဝင်သွားသော်လည်း၊ စူးစမ်းချင်စိတ်က ပိုများသွားသဖြင့် သွားရောက် စစ်ဆေးကြည့်ရန် အနားသို့ ကပ်သွားခဲ့သည်။

သေတ္တာအနီးသို့ ရောက်သောအခါ မက်စ်က သေတ္တာထဲမှ ပစ္စည်းများကို မြေပြင်ပေါ်သို့ ချက်ချင်း သွန်ချလိုက်ပြီး စတင်စစ်ဆေးတော့သည်။

'ပစ္စည်းတွေ အများကြီးပါလား။ ပြီးတော့ တချို့ဟာတွေက မြေအောက်လျို၀ှက်စခန်းဂူ (Dungeon) ထဲက ပစ္စည်းတွေနဲ့တောင် မတူဘူး...' ပစ္စည်းများကို စစ်ဆေးလေလေ၊ မက်စ်၏ သံသယက ပိုကြီးလာလေလေ ဖြစ်သည်။

ကျောက်တုံးများအကြောင်း၊ မန်နာစွမ်းအင် စီးဆင်းရာ လမ်းကြောင်းများအကြောင်း၊ မှော်အက္ခရာများ (Runes) အကြောင်း စသည်ဖြင့် ရေးသားထားသော စာအုပ်များစွာ ရှိနေသည်။

ထို့အပြင်၊ အဆင့် (၆) စွမ်းအင်အူတိုင်တချို့၊ ဒိုင်ယာရီတစ်အုပ်၊ အနက်ရောင်ကြာပန်းပုံ ထွင်းထုထားသည့် ဆဋ္ဌဂံပုံ တိုကင်ပြားတစ်ခုနှင့် မှော်စာလိပ်တစ်ခုကိုလည်း သူ တွေ့ရှိခဲ့သည်။

မက်စ်သည် မှော်စာလိပ်မှလွဲ၍ ကျန်သည့် မည်သည့်အရာကိုမျှ ဂရုမစိုက်သဖြင့် အခြားပစ္စည်းများကို ဘေးဖယ်ထားလိုက်ကာ စာလိပ်ကိုသာ အာရုံစိုက်လိုက်သည်။

[မီးတောက် ဖန်တီးခြင်း (သာမန်အဆင့်)]

"မီးတောက် ဖန်တီးခြင်း စွမ်းရည်တဲ့... ဒါပေမဲ့ သာမန်အဆင့်ပဲ ရှိတယ်..." စွမ်းရည်၏ အဆင့်ကို ကြည့်ပြီး မက်စ် မျက်မှောင်ကြုတ်လိုက်မိသည်။

မီးတောက်တောရိုင်းမြေ (Burning Wilds) သည် F-အဆင့် ဝင်္ကပါတစ်ခု ဖြစ်သောကြောင့် ၎င်း၏ လျှို့ဝှက်ခန်းထဲမှ ရရှိသော စွမ်းရည်သည် အနည်းဆုံးတော့ အထူးအဆင့် (Uncommon Rank) ဖြစ်သင့်သော်လည်း၊ ယခု သူရရှိခဲ့သည်မှာ သာမန်အဆင့် မီးစွမ်းအင်သုံး စွမ်းရည်တစ်ခုသာ ဖြစ်နေသည်။

"ဒီလျှို့ဝှက်ခန်းက ထူးဆန်းတယ်၊ ပြီးတော့ ငါဒီကရတဲ့ စွမ်းရည်ကလည်း အဆင့်နိမ့်နေတယ်" ဟု သူ မကျေမနပ် ရေရွတ်လိုက်ရင်း သက်ပြင်းချလိုက်သည်။

"ဒါပေမဲ့ ဘာပဲဖြစ်ဖြစ်ပါ။ ငါသာ ဒီစွမ်းရည်ကို အဆင့်မြင့်မြင့်ရောက်အောင် ကျွမ်းကျင်သွားရင် သူတို့က ငါ့ကို မီးစွမ်းအင် အဓိကသုံးတဲ့ အတန်းအစား (Class) လို့ ထင်သွားကြမှာပဲ" ဟု သူ တွေးလိုက်သည်။

ယေဘုယျအားဖြင့်၊ လူတစ်ယောက်သည် သူတို့၏ အတန်းအစားနှင့် သက်ဆိုင်သော စွမ်းရည်များကိုသာ လေ့ကျင့်လေ့ရှိသည်။ သူတို့၏ အတန်းအစားနှင့် စွမ်းရည်များ ကိုက်ညီနေမည်ဆိုပါက ယင်းစွမ်းရည်များ၏ ကျွမ်းကျင်မှုအဆင့်ကို မြှင့်တင်ရာတွင် များစွာ အထောက်အကူ ဖြစ်စေသောကြောင့် ဖြစ်သည်။

ထိုသို့မဟုတ်ဘဲ မိမိအတန်းအစားနှင့် မသက်ဆိုင်သည့် ကျပန်းစွမ်းရည်များကို အသုံးပြုခြင်းက ထိုစွမ်းရည်များတွင် တိုးတက်ရန် ခက်ခဲစေကြောင်း သက်သေပြပြီးသား ဖြစ်သည်။

ဥပမာအားဖြင့်၊ လူတစ်ယောက်သည် ရေခဲမှော်ဆရာ အတန်းအစား ရှိပါက၊ သူတို့အတွက် ရေခဲနှင့် ရေဆိုင်ရာ စွမ်းရည်များကို ကျွမ်းကျင်ရန် လွယ်ကူပေမည်။ တစ်ဖက်တွင်လည်း မီးမြားများ သို့မဟုတ် အခြားသော မီးနှင့်သက်ဆိုင်သည့် စွမ်းရည်များကို လေ့ကျင့်ခြင်းသည် တိုးတက်ရန်မှာ လုံးဝမဖြစ်နိုင်သလောက်ပင်။

သို့သော် မက်စ်ကတော့ ခြွင်းချက်တစ်ခုဖြစ်သည်။ သူ၏ အချိန်ဘုံ (Dimension of Time) ၏ အကူအညီဖြင့် အချိန်အလုံအလောက်သာရလျှင် မည်သည့်စွမ်းရည်ကိုမဆို အဆင့် (၁၀၀) အထိ သူ လက်တွေ့ကျကျ ကျွမ်းကျင်အောင် လုပ်နိုင်စွမ်းရှိသည်။

'သူတို့ သိမှာမဟုတ်ပါဘူး' မက်စ်တစ်ယောက် ပြုံးလိုက်ရင်း စွမ်းရည်စာလိပ်ကို ဖွင့်ကာ ထိုအပေါ်သို့ သူ၏လက်ကို တင်လိုက်သည်။

[စွမ်းရည်ရရှိသည့်အတွက် မက်စ် ဗွိုက်ဝေါ့ကာကို ဂုဏ်ပြုပါသည်။ — မီးတောက် ဖန်တီးခြင်း]

[မီးတောက် ဖန်တီးခြင်း (မပြည့်စုံသော)]
– အဆင့် : [သာမန်]
– လယ်ဗယ် : ၀
– ဖော်ပြချက် : ရူးသွပ်နေသော သိပ္ပံပညာရှင်တစ်ဦးမှ သူ၏ စမ်းသပ်မှုများအတွက် ဖန်တီးထားသော စွမ်းရည်တစ်ခု။
—

"ဒါ တကယ်ကြီးလား" စွမ်းရည်၏ ဖော်ပြချက်ကို ဖတ်လိုက်ရချိန်တွင် မက်စ်တစ်ယောက် ဆွံ့အသွားရသည်။

"ကျစ်... ငါထင်တဲ့အတိုင်း ကွက်တိပဲ! ဒါ တစ်ယောက်ယောက်က သုတေသနတွေနဲ့ စမ်းသပ်မှုတွေ လုပ်ခဲ့တဲ့ နေရာအစစ်ပဲ။ ဒါပေမဲ့ သူတို့ ဘယ်လိုများ လုပ်ခဲ့တာပါလိမ့်"

သူသိထားသလောက်ကတော့၊ မြေအောက်စခန်းဂူစခန်း(***၀င်္ကပါဟုလဲသူံးနှုန်းသည်***) (Dungeon) တစ်ခုသည် ဘော့စ် (Boss) ကို အနိုင်ယူပြီးပါက လူတိုင်းကို ထွက်ခွာရန် တစ်နာရီ အချိန်ပေးလေ့ရှိသည်။ ထို့အပြင် ဝေးကွာသော သီးသန့်နေရာများသို့ ရောက်နေသူများထံသို့လည်း ဝင်္ကပါ ပြန်လည်မသတ်မှတ်မီ ပြန်လည်ပြောင်းလဲ(reset) မလုပ်မီ ၎င်းတို့ ထွက်ခွာနိုင်စေရန် မှော်ဝင်ပေါက်တစ်ခု ပို့ပေးလေ့ရှိသည်။

သို့ရာတွင် ပြန်လည်ပြောင်းလဲ၍လုပ်ခြင်းက အရာအားလုံးကို သက်ရောက်မှုမရှိပေ။ ဥပမာအားဖြင့်၊ ဝင်္ကပါပြင်ပမှ လူတစ်ဦး ဝင်လာပြီး အထဲတွင် သေဆုံးသွားပါက၊ ၎င်းတို့၏ ရုပ်အလောင်းကို အကြိမ်များစွာ ပြန်လည်ပြောင်းလဲလုပ်ပြီးသည့်တိုင်အောင် တွေ့မြင်နိုင်ဆဲဖြစ်သည်။

ဝင်္ကပါအတွင်း ပြုလုပ်ထားသော မည်သည့် ပြောင်းလဲမှုများမဆို ပြန်လည်ပြောင်းလဲလုပ်ပြီးနောက်တွင် ကျန်ရှိနေမည်ဖြစ်သည်။ ပြောင်းလဲသွားမည့် တစ်ခုတည်းသောအရာမှာ ဘီလူးအကောင်များ ပိုမိုများပြားစွာ ပြန်လည်ပေါ်ပေါက်လာခြင်းသာ ဖြစ်သည်။

'ဒါပေမဲ့ သတ်မှတ်ထားတဲ့ တစ်နာရီ အချိန်ကန့်သတ်ချက် ပြည့်သွားပြီးတဲ့အထိ သူတို့ ဝင်္ကပါထဲကနေ မထွက်ခဲ့ဘူးဆိုရင် ဘာဖြစ်သွားမလဲ' မက်စ် စဉ်းစားခန်းဝင်သွားပြီးနောက် ခေါင်းခါလိုက်သည်။

"ငါသိတာကတော့၊ ဒီရူးသွပ်နေတဲ့ သိပ္ပံပညာရှင်က ဘယ်သူပဲဖြစ်ဖြစ် ဒီလျှို့ဝှက်ခန်းထဲမှာ နှစ်ပေါင်းများစွာ နေနိုင်ခဲ့ပြီးတော့ ဒီမှာ သုတေသနတွေ လုပ်ခဲ့တယ်၊ ပြီးတော့ ဒီစွမ်းရည်ကိုလည်း သူပဲ ဖန်တီးခဲ့တာ ဖြစ်ရမယ်"

ထိုရူးသွပ်နေသော သိပ္ပံပညာရှင်က ဤသို့ဖြစ်မြောက်အောင် မည်သို့ စွမ်းဆောင်နိုင်ခဲ့သည်ကို သူ မသိသော်လည်း၊ ဤစွမ်းရည် အလုပ်လုပ်နေသရွေ့တော့ သူ ဂရုမစိုက်ပါ။

"ဒါ တိတ်တိတ်ဆိတ်ဆိတ်နဲ့ အဆင့်တင် (Level up) လို့ ကောင်းတဲ့နေရာပဲ" ဟု မက်စ်က ရေရွတ်လိုက်ပြီး သူ့ထံတွင်ရှိသော စွမ်းအင်အူတိုင် အားလုံးကို ထုတ်ယူကာ စတင်စုပ်ယူတော့သည်။

အဆင့် ၆ နှင့် အဆင့် ၇ စွမ်းအင်အူတိုင် အားလုံးကို မိနစ်အနည်းငယ်ကြာ စုပ်ယူပြီးနောက်တွင်လည်း၊ မက်စ်မှာ လယ်ဗယ်တက်မလာခဲ့ပေ။

"ကျစ်.....၊ ငါ့မှာ ဘာပြဿနာရှိနေတာလဲ" သူ မျက်မှောင်ကြုတ်လိုက်ပြီးနောက် ကျန်ရှိနေသော အဆင့် ၈ စွမ်းအင်အူတိုင် အနည်းငယ်ကို ဆက်လက်စုပ်ယူလိုက်ရာ သူ၏ မြင်ကွင်းထဲတွင် လယ်ဗယ်တက်ကြောင်း အသိပေးချက်တစ်ခု ပေါ်လာတော့သည်။

[အတွေ့အကြုံနုအဆင့် (Novice Rank) ၏ လယ်ဗယ် ၅ သို့ အဆင့်တက်သွားသည့်အတွက် မက်စ် ဗွိုက်ဝေါ့ကာ အား ဂုဏ်ပြုပါသည်။]

[မက်စ်]
– အဆင့် : [အတွေ့အကြုံနုအဆင့်]
– လယ်ဗယ် : ၅
– အတန်းအစား : [ဘုံထိန်းသိမ်းသူ]
– ရုပ်ပိုင်းဆိုင်ရာ : ၆.၅
– ဝိညာဉ် : ၇
– စွမ်းအင် : ၁၀
– စွမ်းရည်များ :
—» အတန်းအစား စွမ်းရည်များ : [သရီးဒီခန္ဓာကိုယ်၊ အချိန်ဘုံ]
—» ရရှိထားသော စွမ်းရည်များ : [မှော်ကျည်ဆန်များ (လယ်ဗယ်-၁၀၀)၊ အခြေခံ ဓားသိုင်း (လယ်ဗယ်-၁၀၀)၊ လျှပ်တစ်ပြက် ပြေးလွှားခြင်း (လယ်ဗယ်-၁၀၀)၊ မုန်တိုင်းထန် တိုက်ခိုက်ခြင်း (လယ်ဗယ်-၁၀၀)၊ မီးတောက် ဖန်တီးခြင်း (လယ်ဗယ်-၁)]
—» နားလည်သဘောပေါက်မှုများ : [ဓားအငွေ့အသက် (လယ်ဗယ်-၁)]
– သွေးမျိုးဆက် : [မဟူရာနဂါး၏ ကမောက်ကမ သွေးမျိုးဆက်]
—» နဂါးအဆီအနှစ် : [၁၀]
—» နဂါးကြေးခွံများ : [၁]