အခန်း (၃၀) အလွယ်တကူ အနိုင်ရရှိခြင်း
သူ့ထံသို့ လေထဲတွင် ဝေ့ဝိုက်ပျံသန်းလာသည့် မြှားများကို ကြည့်ပြီး မက်စ်က ပြုံးလိုက်သည်။ သူသာ အလိုရှိပါက ‘မှော်ကျည်ဆံ’ (Magic Bullets) စွမ်းရည်ဖြင့် ထိုမြှားများကို ပစ်ချနိုင်သော်လည်း သူ၏ အစွမ်းအစကို သူတစ်ပါးအား အလွန်အကျွံ မပြသလိုပေ။ ထို့ကြောင့် ဓားတစ်လက်တည်းဖြင့်သာ ဖြေရှင်းရန် သူ ဆုံးဖြတ်လိုက်သည်။ မက်စ်သည် သူ၏ ‘သရီးဒီခန္ဓာကိုယ်’ (Three-dimensional body) စွမ်းရည်ကို အသုံးပြုကာ တောက်လောင်နေသော မြှားခြောက်စင်း၏ လမ်းကြောင်းနှင့် လှုပ်ရှားမှုကို ချက်ချင်းပင် တွက်ချက်လိုက်သည်။ သူ၏ မြှင့်တင်ထားသော အာရုံခံစားမှုများတွင် ထိုမီးမြှားတန်းများသည် သူ့ထံသို့ နှေးကွေးစွာ ပြေးဝင်လာသကဲ့သို့ ထင်မှတ်ရသည်။ အချိန်ကိုက်ပင် သူသည် ရှေ့သို့တစ်လှမ်းတိုးကာ အနေအထားကို ခိုင်မာစွာ ပြင်လိုက်သည်။ သူ၏ ‘လျှပ်တပြတ်တိုက်ကွက်’ (Flurry Strike) စွမ်းရည်ကို ထုတ်ဖော်လိုက်စဉ် ဓားကို တင်းတင်းကြပ်ကြပ် ဆုပ်ကိုင်ထားသည်။ လျှပ်တပြက် လှုပ်ရှားမှုနှင့်အတူ မက်စ်သည် ရှေ့သို့ အရှိန်အဟုန်ဖြင့် တိုးဝင်ကာ လျင်မြန်သော ထိုးချက်ခြောက်ချက်ကို ဆက်တိုက် ထုတ်ဖော်လိုက်ရာ ဓားချက်တိုင်းသည် လေထုကို အတုမရှိ မြန်နှုန်းဖြင့် ခွဲထွက်သွားသည်။ ထက်မြက်ပြီး တိကျလှသော ဓားရိပ် ခြောက်ခုသည် ဓားဖျားမှ ထွက်ပေါ်လာပြီး ပျံသန်းလာသော မီးမြှားများကို ကြားဖြတ်ဟန့်တားရန် ပြေးဝင်သွားတော့သည်။
ဗုန်းး! ဗုန်းး! ဗုန်းး!
နားကွဲမတတ် ပေါက်ကွဲသံများနှင့်အတူ မီးမြှား ခြောက်စင်းလုံးသည် လေထဲတွင်ပင် ပေါက်ကွဲသွားပြီး ၎င်းတို့၏ မီးစွမ်းအင်များသည် ပတ်ဝန်းကျင်သို့ ဘေးဥပါဒ်မရှိဘဲ ပျံ့လွင့်ပျောက်ကွယ်သွားသည်။ ဓားရိပ်များသည် မြှားတစ်စင်းချင်းစီကို တိကျစွာ ကြားဖြတ်တိုက်ခိုက်နိုင်ခဲ့ပြီး မက်စ်ထံသို့ မရောက်ရှိမီ ၎င်းတို့၏ ပေါက်ကွဲအားကို ချေဖျက်ပေးလိုက်ခြင်းဖြစ်သည်။
"ဒါ.....ဒါက!"
အဲလစ်သည် ဖြစ်ပျက်သွားသမျှကို နားမလည်နိုင်သကဲ့သို့ မျက်လုံးအစုံ ပြူးကျယ်ကာ တောင့်တောင့်ကြီး ရပ်နေမိသည်။ စောစောက သူမ မြင်တွေ့ခဲ့ရသည်မှာ အထင်ကြီးစရာကောင်းသော်လည်း ယခုမူ... ၎င်းသည် လုံးဝကို အခြားအဆင့်တစ်ခုသို့ ရောက်ရှိနေပြီဖြစ်သည်။ မက်စ်က သူမ၏မြှားကို တိကျစွာ ကြားဖြတ်တားဆီးနိုင်ခဲ့သည်ကို ယခင်ကလည်း မြင်ဖူးခဲ့သော်လည်း ယခုကဲ့သို့ ဓားရိပ်များဖြင့် တောက်လောင်နေသော မြှားများကို အားစိုက်စရာမလိုဘဲ အစပျောက်အောင် ဖြတ်တောက်ပစ်နိုင်သည်မှာ သူမ အလွယ်တကူ နားလည်နိုင်သော အဆင့်ထက် ကျော်လွန်နေပြီဖြစ်သည်။ အဲလစ်၏ စိတ်ထဲတွင် နက်ရှိုင်းသော သိလိုစိတ်တစ်ခု ဖြစ်ပေါ်လာသည်။
'သူက ဘယ်သူလဲ'
မက်စ်သည် သူမ အစောပိုင်းက ထင်ထားသည်ထက် ပို၍ အစွမ်းထက်သူဖြစ်ကြောင်း စတင်ခံစားလာရသည်။
"ကဲ... နောက်ဆုံးတစ်ကြိမ် တိုက်ခိုက်မှုပဲ" မက်စ်က ပြုံးလျက် ပြောလိုက်သည်။ "ဒီကိစ္စကို မြန်မြန်အဆုံးသတ်ကြစို့။ ငါတို့ ဘော့စ်အခန်း (Boss Chamber) ကိုလည်း သွားဖို့လိုသေးတယ် မဟုတ်လား"
အဲလစ်က ခေါင်းငြိမ့်ပြပြီး သူမ၏ဓားကို ထုတ်လိုက်သည်။ 'ငါ့အထင်မမှားဘူးဆိုရင် သူက ဓားသခင် (Swordmaster) အတန်းအစား နိုးထလာတာ ဖြစ်ရမယ်။ ဒါပေမဲ့လည်း အဆင့် ၄ အားနဲ့ အဆင့် ၈ ရှိတဲ့သူကို ယှဉ်ပြိုင်နိုင်ဖို့ကတော့ မလုံလောက်သေးဘူး' သူမသည် မက်စ်၏ အစွမ်းကို နားမလည်နိုင်သဖြင့် ဆက်မတွေးတော့ဘဲ နောက်ဆုံးတိုက်ကွက်အတွက်သာ အာရုံစိုက်လိုက်သည်။
"အဆင်သင့်ပဲလား" သူမက မေးလိုက်သည်။
"အမြဲတမ်း အဆင်သင့်ပဲ" မက်စ်က ယုံကြည်မှုအပြည့်ဖြင့် ပြန်ဖြေသည်။
"ဒါဆို ငါ့ဓားချက်ကို ခံယူကြည့်စမ်း!"
အဲလစ်က အော်ဟစ်ကာ သူ့ထံသို့ အရှိန်အဟုန်ဖြင့် ပြေးဝင်လာသည်။ သူ့အနီးသို့ ရောက်သည်နှင့် သူမက တိုက်ခိုက်လိုက်သည်။ သူမ၏ဓားကို အားကုန်လွှဲယမ်းကာ ခုတ်ချလိုက်စဉ် ဓားသွားထက်၌ ရဲရဲတောက် မီးတောက်များ ချက်ချင်း ဖုံးလွှမ်းသွားသည်။ ထိုတိုက်ခိုက်မှုကို မြင်သောအခါ မက်စ်သည် သူ၏ဓားကို သူ့ရှေ့၌ ခိုင်မာစွာ ထားရှိလိုက်သည်။
ဂလန်း!!
ဓားနှစ်လက် ထိတွေ့သွားသောအခါ သတ္တုချင်း ရိုက်ခတ်သံသည် မီးလောင်ပြင်တောအုပ် တစ်ခုလုံးတွင် ပဲ့တင်ထပ်သွားသည်။
"ဒါ... ဒါက ဘယ်လိုဖြစ်နိုင်မှာလဲ?!"
အဲလစ်မှာ နောက်တစ်ကြိမ် အံ့အားသင့်သွားရပြန်သည်။ ယခုတစ်ကြိမ်တွင်မူ အစောပိုင်းကထက် ပို၍ ထိတ်လန့်သွားပုံရသည်။ သူတို့၏ ဓားနှစ်လက်မှာ ထိကပ်နေသော်လည်း မက်စ်သည် အားစိုက်စရာပင် လိုပုံမရချေ။ သူမ၏ ဓားသွားမှာ မီးတောက်များ ေ၀ေ၀တောက်လောင်နေသော်လည်း မက်စ်ကမူ သူ၏ဓားကို ကိုင်လျက် အေးအေးဆေးဆေးပင် ရပ်နေသည်။ သို့သော်လည်း သူမသည် မက်စ်၏ဓားကို အနည်းငယ်မျှပင် ရွေ့အောင် မလုပ်နိုင်ခဲ့ပေ။ ဓားကိုင်ထားသော လူသားတစ်ယောက်ကို တိုက်ခိုက်နေရသည်ထက် သတ္တုတံတိုင်းကြီးတစ်ခုကို တိုက်ခိုက်နေရသကဲ့သို့ ခံစားနေရသည်။
"ကောင်းပြီလေ... ရှင်နိုင်သွားပါပြီ" အဲလစ်က သက်ပြင်းချကာ သူမ၏ ရှုံးနိမ့်မှုကို ဝန်ခံလျက် နောက်သို့ ဆုတ်လိုက်သည်။ ထို့နောက် သူမသည် မက်စ်ထံသို့ လက်စွပ်တစ်ကွင်း လှမ်းပစ်ပေးလိုက်သည်။
မက်စ်သည် ထိုလက်စွပ်ကို ဖမ်းလိုက်သည်။ 'ဒါက ပစ္စည်းသိုလှောင်တဲ့ လက်စွပ် (Storage Ring) လား' လက်စွပ်အတွင်းရှိ ပစ္စည်းများကို အာရုံခံကြည့်ရင်း သူ တွေးလိုက်မိသည်။ အတွင်း၌ သူ မြင်လိုက်ရသော ပစ္စည်းများကြောင့် မက်စ်၏ စိတ်အစုံမှာ အတိုင်းထက်အလွန် အံ့အားသင့်သွားရသည်။
"မှော်စွမ်းအင် ကျောက်တုံး (Mana Crystal) တွေ အများကြီးပါလား"
"ဒီ ချော်ရည်မြွေနဂါးက အဆင့် ၁၀ ကို တက်လှမ်းနိုင်ဖို့အတွက် ဒီမီးလောင်ပြင်တောအုပ် နယ်မြေမှာရှိတဲ့ မန်နာစွမ်းအင် ကျောက်တုံးတွေ အားလုံးကို စုဆောင်းထားပုံရတယ်" အဲလစ်က ပုခုံးတွန့်ကာ အသေးစိတ်ကို ရှင်းပြသည်။
မက်စ်က ခေါင်းငြိမ့်လိုက်ပြီး စိတ်လှုပ်ရှားမှုကြောင့် လက်များပင် တုန်ယင်နေသည်။ 'ငါ သူဌေးပြန်ဖြစ်ရမယ့် နေ့ရက်တွေ ရောက်လာပြန်ပြီပဲ' သူက သိုလှောင်လက်စွပ်ကို သိမ်းဆည်းလိုက်ရင်း တွေးလိုက်သည်။ အဲလစ်ကို ပြန်ကြည့်ကာ မက်စ်က လှည့်ဖြားသော အပြုံးဖြင့် ပြုံးလိုက်ပြီး-
"ခုနက ဓားနဲ့တိုက်ခိုက်တဲ့နေရာမှာ မင်းရဲ့ အစွမ်းအကုန် မသုံးခဲ့ဘူး မဟုတ်လား"
"ရှင် မှားနေပြီ" အဲလစ်က ထိုအတွေးကို ငြင်းပယ်ရန် ခေါင်းခါပြသော်လည်း သူမ၏ စိတ်ထဲတွင်မူ ထိုအချက်မှာ အမှန်တရားဖြစ်ကြောင်း သိနေသည်။ အမှန်စင်စစ် သူမသည် သူမ၏ အစွမ်း ထက်ဝက်ကိုပင် အသုံးမပြုခဲ့ပေ။ မက်စ်နှင့် လောင်းကြေးနိုင်စေရန်အတွက် ၁၀ ရာခိုင်နှုန်းခန့်ကိုသာ အသုံးပြုခဲ့ခြင်း ဖြစ်သည်။ အကြောင်းပြချက်မှာ ရိုးရှင်းပါသည်—၎င်းမှာ မက်စ်၏ ပါရမီ ကြောင့်ပင်။ အကယ်၍ မက်စ်သာ ဖီးနစ်အဖွဲ့ချုပ် (Phoenix Order) သို့ ဝင်ရောက်လာပါက အဖွဲ့ချုပ်တစ်ခုလုံးကို ကိုင်လှုပ်နိုင်မည့် ဂယက်ရိုက်ခတ်မှုများ သေချာပေါက် ဖန်တီးနိုင်လိမ့်မည်ဟု အဲလစ် အခိုင်အမာ ယုံကြည်ထားသည်။ ထိုသို့ ဖြစ်လာရန်အတွက် သူမ ရှုံးနိမ့်ပေးရမည်ဆိုလျှင်လည်း သူမ ဂရုမစိုက်ပေ။ အကယ်၍ သူမသာ အစွမ်းအကုန် သုံးခဲ့ပါက အမှန်တကယ် ရှုံးနိမ့်သွားမည် မဟုတ်သည်မှာတော့ အမှန်ပင်။
အဲလစ်က စကားလမ်းကြောင်းလွှဲလိုက်သည်ကို မက်စ် သတိထားမိသဖြင့် ပြုံးလိုက်သော်လည်း သူမကို ထပ်မံ၍ အကျပ်မကိုင်တော့ပေ။ သူမ ဘာကြောင့် ထိုသို့လုပ်ခဲ့သည်ဆိုသော အကြောင်းပြချက်ကို သူ ကောင်းစွာ နားလည်သည်။
'ငါ့အစွမ်းကို နည်းနည်း ထုတ်ပြလိုက်တာ အလုပ်ဖြစ်သွားပုံပဲ' ဟု မက်စ် တွေးတောနေမိသည်။ ဤမိန်းကလေးနှစ်ဦးသည် ဖီးနစ်အဖွဲ့ချုပ်တွင် ရာထူးတစ်ခုခု ရှိလိမ့်မည်ဟု သူ ရိပ်မိထားသည်။ ထိုသို့မဟုတ်ပါက သူပင်လျှင် အစွမ်းကို ထိုးဖောက်မမြင်နိုင်သော အဖိုးကြီးတစ်ဦး၏ စောင့်ရှောက်မှုကို ခံရမည် မဟုတ်ပေ။ ထိုအချက်ကို ကြည့်ခြင်းအားဖြင့် ထိုအဖိုးကြီးမှာ မိန်းကလေးနှစ်ဦးအတွက် သွားလေရာရာ၌ လိုက်ပါစောင့်ရှောက်ပေးရသည့် ကိုယ်ရံတော် ဖြစ်နိုင်ကြောင်း မက်စ် ခန့်မှန်းလိုက်သည်။ ၎င်းတို့၏ အဆင့်အတန်းမှာ အကာအကွယ်ပေးသူ တစ်ယောက် လိုအပ်သည်အထိ မြင့်မားနေသည်မှာ ထင်ရှားလှသည်။
'ဘာပဲဖြစ်ဖြစ်... ဒါက ငါ့အတွက်တော့ နှစ်ဖက်လုံး အကျိုးရှိတဲ့ အခြေအနေပဲ' မက်စ်က ပြုံးလျက် တွေးလိုက်သည်။
"ရှင့်နာမည်က ဘယ်သူလဲ" ထိုအချိန်တွင် အဲလစ်က မေးမြန်းလိုက်သည်။
မက်စ်သည် သူတို့၏ နာမည်များကိုပင် မမေးရသေးကြောင်း သတိထားမိလိုက်သဖြင့် မျက်လုံးများ အနည်းငယ် ပြူးသွားသည်။
"ငါ့နာမည်က မက်စ် (Max)... မက်စ် မော်ဂန် (Max Morgan) ပါ" သူက အနည်းငယ် တုံ့ဆိုင်းပြီးနောက် ပြောလိုက်သည်။ သူ၏ 'ဗွိုက်ဝေါ့ကာ' (Voidwalker) ဆိုသော မျိုးရိုးအမည်ကို သူတစ်ပါးအား မသိစေလိုပေ။ သူ့မိသားစုက သူ့ကို မော်ဂန် ဟု နာမည်ပေးခဲ့ခြင်းမှာ အကြောင်းရင်းတစ်ခုခု ရှိလိမ့်မည်ဟု သူ ယုံကြည်သည်။ "မင်းတို့နှစ်ယောက်ကရော" သူက အခွင့်အရေးယူကာ ပြန်မေးလိုက်သည်။
"ကျွန်မက အဲလစ် (Alice) ပါ၊ ဒါကတော့ ကျွန်မသူငယ်ချင်း အေမီ (Amy) '' အဲလစ်က သူမနှင့် သူမ၏ အစေခံမိန်းကလေးကို မိတ်ဆက်ပေးလိုက်သည်။
မက်စ်က ခေါင်းငြိမ့်ပြပြီး မေးလိုက်သည်။ "ဒါဆို အဲလစ်... မင်း ငါ့ကို မင်းတို့အဖွဲ့ချုပ်ဆီ ထောက်ခံပေးမယ်လို့ မှတ်ယူလို့ရမလား"
အဲလစ်က ခဏမျှ စဉ်းစားပြီးမှ ပြန်မေးသည်။ "ရှင်က ဘာလို့ ဖီးနစ်အဖွဲ့ချုပ်ကို ဝင်ချင်ရတာလဲ"
မက်စ်က ထိုမေးခွန်းကြောင့် မျက်မှောင်ကြုတ်လိုက်သည်။ "ဘာလို့လဲ ဟုတ်လား။ ဒါက မေးစရာလိုလို့လား" သူက ပုခုံးတွန့်ပြရင်း— "ဘာလို့လဲဆိုတော့ ငါက မီးတောက်တွေကို ဘယ်လိုထိန်းချုပ်ရမလဲဆိုတာ သင်ယူချင်လို့ပေါ့။ ဒါက ရိုးရိုးလေးပဲလေ"
"ရှင့်မှာ မီးနဲ့ပတ်သက်တဲ့ စွမ်းရည်တွေ ရှိလို့လား။ ရှင့်ရဲ့ အတန်းအစားကရော မီးစွမ်းအင်ကို အခြေခံတာလား" အဲလစ်က မေးခွန်းနှစ်ခုကို ဆက်တိုက် မေးမြန်းသည်။
"သေချာတာပေါ့။ ငါ့ရဲ့ အတန်းအစားက မီးစွမ်းအင်ကို အခြေခံတာပါ" မက်စ်က
ခပ်ထေ့ထေ့ပေါ့ပေါ့ ပြောလိုက်သည်။ "ဒါမှမဟုတ်ရင် ဒီလို အဓိပ္ပာယ်မရှိတဲ့ မြေအောက်အကျဉ်းစခန်းဂူ (Dungeon) ထဲကို ငါ ဘာလို့ လာပါ့မလဲ။ ဒီဂူထဲမှာ လျှို့ဝှက်အခန်းတစ်ခု ရှိတယ်ဆိုတာ ငါ သိတယ်၊ အဲဒီထဲမှာ မီးစွမ်းအင်နဲ့ ပတ်သက်တဲ့ စွမ်းရည်တစ်ခုခု ရှိလိမ့်မယ်... ထင်တာပဲ... အဲဒါကြောင့် ငါ ဒီကို ရောက်နေတာ" သူက ရှင်းပြလိုက်သည်။
အဲလစ်က စဉ်းစားဟန်ဖြင့် ခေါင်းငြိမ့်လိုက်သည်။ "ကောင်းပါပြီ... ရှင်က ဘယ်မြို့မှာ နေတာလဲ"
"အင်းနားဆာကယ် (Inner Circle)၊ ဒတ်စ်ဖော ရပ်ကွက် (Dustfall District)၊ ခရက်စ်ဖို့ဒ် မြို့ (Crestford City) မှာပါ" ဟု
မက်စ်က ပြန်ဖြေသည်။
အဲလစ်က ခေါင်းငြိမ့်လိုက်ပြီး သူမ၏ လက်ကောက်ဝတ်ကို ပွတ်လိုက်ရာ အင်းနားဆာကယ် တစ်ခုလုံး၏ မြေပုံကို ပြသသော သုံးဖက်မြင်ပုံရိပ်ယောင် (Hologram) အလင်းရိပ်တစ်ခု ပေါ်လာသည်။ သူမသည် မက်စ် နေထိုင်ရာ မြို့ကို မှတ်သားလိုက်ပြီးနောက် လက်ကို ဝှေ့ယမ်းကာ အလင်းရိပ်ကို ပြန်သိမ်းလိုက်သည်။
"ရှင့်ရဲ့မြို့ကို ကျွန်မ မှတ်သားထားလိုက်ပြီ" အဲလစ်က မက်စ်ကို ကြည့်ကာ ပြောသည်။ "ကျွန်မတို့ အဖွဲ့ချုပ်ခွဲကနေ အဖွဲ့ဝင်သစ် စုဆောင်းတဲ့နေ့ကျရင် တစ်ယောက်ယောက်က ရှင့်ဆီ လာလိမ့်မယ်။ ဒါပေမဲ့ အဲဒီနေ့မှာ ရှင့်ကို အဖွဲ့ဝင်အဖြစ် သေချာပေါက် လက်ခံမယ်လို့တော့ အာမမခံနိုင်ဘူးနော်"
"မင်း ဘာကို ဆိုလိုတာလဲ" မက်စ်က မျက်မှောင်ကြုတ်ကာ မေးလိုက်သည်။
အဲလစ်က ရှင်းပြသည်မှာ— "ကျွန်မက ရှင့်ကို ထောက်ခံရုံပဲ လုပ်ပေးနိုင်တာ။ အဖွဲ့ဝင်သစ် စုဆောင်းတဲ့နေ့မှာ အဖွဲ့ချုပ် စီမံခန့်ခွဲရေးကနေ အင်းနားဆာကယ်က ရှင့်မြို့ဆီကို အဖွဲ့ဝင်တစ်ယောက် လွှတ်လိမ့်မယ်။ အဲဒီလူကို ရှင့်ရဲ့ အစွမ်းအစနဲ့ အထင်ကြီးအောင် လုပ်နိုင်မှသာ အဓိကအချက်အချာဒေသစခန်း (Core Region) ကို သွားခွင့်ရမှာ ဖြစ်တယ်။ မဟုတ်ရင်တော့ အဲဒီကိစ္စကို မေ့လိုက်ပါတော့"
မက်စ်က ခဏမျှ တွေးတောပြီးနောက် ခေါင်းငြိမ့်လိုက်သည်။ "ငါ သဘောတူတယ်" သူက ပြုံးလျက် ပြန်ဖြေလိုက်သည်။ အစွမ်းအစ အနည်းငယ် ထုတ်ပြခြင်းက ဖီးနစ်အဖွဲ့ချုပ်၏ ရွေးချယ်ခံရဖို့ အခွင့်အလမ်း ပိုများလာစေမည်ဆိုလျှင် ထိုသို့လုပ်ဆောင်နိုင်ဖို့ရန် သူအနေဖြင့်၀န်လေးနေမည်မဟုတ်ပေ။